ဆၢကတီၢ်ခဲအံၤ အိၣ်ကတဲာ်ကတီၤပာ်စၢၤနသး လၢတၢ်မၤအၢမၤနးအဂီၢ်

၁. ဘၣ်မနုၤအဃိ ပကဘၣ်အိၣ်ကတဲာ်ကတီၤပသး လၢတၢ်မၤအၢမၤနးအဂီၢ်လဲၣ်.

တချုးလၢပကစၢ်ယ့ၣ်ၡူး ဘၣ်တၢ်မၤသံအီၤအနၤန့ၣ်​ အဝဲတဲဝဲလၢ ပှၤလၢအပိာ်အခံတဖၣ်န့ၣ်​ ပှၤကသးဟ့အီၤလီၤ. (ယိၤဟၣ်​ ၁၇:၁၄) စးထီၣ်ဖဲန့ၣ်​ တုၤလၢခဲအံၤန့ၣ်​ ပှၤလၢအထီဒါ တၢ်ဘူၣ်တၢ်ဘါအမ့ၢ်အတီန့ၣ်​ မၤအၢမၤနးဝဲ ခရံာ်ဖိလၢ အမ့ၢ်အတီတဖၣ်လီၤ. (၂ တံၤမသ့း ၃:၁၂) ပသ့ၣ်ညါလၢ ဒ်တၢ်အကတၢၢ်ဘူးထီၣ်ဝဲအသိး ပဒုၣ်ပဒါတဖၣ်န့ၣ်​ ကထီဒါပှၤ အါန့ၢ်ဒံးလၢညါလီၤ.—မးသဲ ၂၄:၉.

၂-၃. (က) ဘၣ်ဃးဒီး တၢ်ပျံၤတၢ်ဖုးန့ၣ်​ ပကဘၣ်သ့ၣ်ညါ တၢ်မနုၤလဲၣ်. (ခ) လၢတၢ်မၤလိအံၤအပူၤ ပကမၤလိသကိး တၢ်ဂ့ၢ်မနုၤလဲၣ်.

^၂ ဒ်သိးပလဲၤခီဖျိ တၢ်မၤအၢမၤနးကန့ၢ်အဂီၢ် ပအိၣ်ကတဲာ်ကတီၤပသးလၢ ဆၢကတီၢ်ခဲအံၤ ကသ့ဒ်လဲၣ်. ပတလိၣ်​ ဆိကမိၣ်ကွၢ် တၢ်အၢတၢ်သီ လၢအဟဲဘၣ်ပှၤသ့ ကိးမံၤဒဲး အဂ့ၢ်န့ၣ်ဘၣ်. ပမ့ၢ်ဆိကမိၣ်ဆိ တၢ်သ့ၣ်တဖၣ်န့ၣ်န့ၣ်​ တချုးလၢ ပထံၣ်ဘၣ်​ တၢ်မၤကွၢ်ဒံးဘၣ်အခါ ပကပျံၤတၢ် ဒီးသူၣ်ကိၢ်သးဂီၤတၢ် ဒီးဘၣ်သ့ၣ်သ့ၣ်​ ပကပာ်တ့ၢ်ကွံာ် ယဟိဝၤယွၤ အတၢ်မၤလီၤ. (ကတိၤဒိ ၁၂:၂၅; ၁၇:၂၂) တၢ်ပျံၤတၢ်ဖုး မ့ၢ်ဝဲတၢ်စုကဝဲၤ လၢအဆူၣ်လၢ ‘ပဒုၣ်ပဒါမုၣ်ကီၤလံၢ်’ ကျဲးစၢးသူဝဲ ဒ်သိးကထီဒါပှၤအဂီၢ်လီၤ. (၁ ပ့းတရူး ၅:၈, ၉) ဒ်သိးပလဲၤခီဖျိ တၢ်မၤအၢမၤနးကန့ၢ်အဂီၢ် ဆၢကတီၢ်ခဲအံၤ ပကဘၣ်မၤမနုၤလဲၣ်.

^၃ လၢတၢ်မၤလိအံၤအပူၤ ပကမၤလိဘၣ်လၢ ပမၤဂၢၢ်ကျၢၤထီၣ်​ ပတၢ်ရ့လိာ်သးဒီး ယဟိဝၤယွၤ ကသ့ဒ်လဲၣ်​ ဒီးဆၢကတီၢ်ခဲအံၤ ဘၣ်မနုၤအဃိ အရ့ဒိၣ်လၢ ပကမၤဒ်န့ၣ်လဲၣ်. ဒီးပကတဲသကိးစ့ၢ်ကီး ပမၤအါထီၣ်​ ပတၢ်သူၣ်ဒူသးဒူ ကသ့ဒ်လဲၣ်​ ဒီးဖဲပှၤသးဟ့ပှၤအခါ ပမၤတၢ်မနုၤ ကသ့လဲၣ်န့ၣ်လီၤ.

နမၤဂၢၢ်ကျၢၤထီၣ်​ နတၢ်ရ့လိာ်သးဒီး ယဟိဝၤယွၤ ကသ့ဒ်လဲၣ်

၄. ဧ့ၤဘြံၤ ၁၃:၅, ၆ တဲဘၣ်ပှၤ တၢ်မနုၤလဲၣ်​ ဒီးဘၣ်မနုၤအဃိ ပနာ်ဒ်န့ၣ်သ့လဲၣ်.

^၄ နာ်လၢယဟိဝၤယွၤ အဲၣ်နၤ ဒီးအဝဲတပာ်တ့ၢ်နၤ နီတဘျီဘၣ်န့ၣ်တက့ၢ်. (ဖး ဧ့ၤဘြံၤ ၁၃:၅, ၆ တက့ၢ်.) လၢအပူၤကွံာ်အနံၣ်အါမးန့ၣ်​ တၢးထီခိးတၢ် တဲဝဲလၢ “ပှၤလၢအသ့ၣ်ညါ ကစၢ်ယွၤဂ့ၤဂ့ၤတဂၤန့ၣ်​ ဖဲအထံၣ်ဘၣ်ဒီး တၢ်မၤအၢမၤနးတဖၣ်အခါ အဝဲကနာ်န့ၢ်ကစၢ်ယွၤ အနီၢ်ကီၢ်လီၤ.” ဒ်သိးပလဲၤခီဖျိ တၢ်မၤအၢမၤနးတဖၣ်​ ကန့ၢ်အဂီၢ် ပကဘၣ်အဲၣ်ယဟိဝၤယွၤ ဒီးနာ်န့ၢ်အီၤ လၢပသးဒီဖျၢၣ်​ ဒီးပတဘၣ်သးဒ့ဒီ နီတဘျီလၢ ယဟိဝၤယွၤအဲၣ်ပှၤန့ၣ်ဘၣ်.—မးသဲ ၂၂:၃၆-၃၈; ယၤကိာ် ၅:၁၁.

၅. တၢ်မနုၤကမၤစၢၤနၤ ဒ်သိးနကတူၢ်ဘၣ်လၢ ယဟိဝၤယွၤ အဲၣ်နၤလဲၣ်.

^၅ ဖးလံာ်စီဆှံ ကိးနံၤဒဲးဒီး ဖဲနဖးအီၤအခါ အိၣ်ဒီးဖီတၢၣ်လၢ နကမၤဂ့ၤထီၣ်​ နတၢ်ရ့လိာ်သးဒီး ယဟိဝၤယွၤတက့ၢ်. (ယၤကိာ် ၄:၈) ဖဲနဖးလံာ်စီဆှံအခါ သးစၢၢ်ဆၢ ယဟိဝၤယွၤ အတၢ်ဂ့ၤတၢ်ဝါတဖၣ်တက့ၢ်. ဒီးဖဲနဖး တၢ်လၢအတဲဝဲ ဒီးမၤဝဲတဖၣ်အဂ့ၢ်အခါ ဆိကမိၣ်ကွၢ်လၢ အဝဲအဲၣ်နၤ ထဲလဲၣ်န့ၣ်တက့ၢ်. (၂ မိၤၡ့ ၃၄:၆) မ့ၢ်လၢ ပှၤတနီၤန့ၣ်​ ပှၤတပာ်ဖျါထီၣ်​ တၢ်အဲၣ်လၢအဝဲသ့ၣ်​ အဖီခိၣ်နီတဘျီဘၣ်အဃိ အဝဲသ့ၣ်​ ကနာ်ဝဲလၢ ကစၢ်ယွၤအဲၣ်အီၤန့ၣ်​ ကီဒိၣ်မးလီၤ. နမ့ၢ်တူၢ်ဘၣ်ဒ်န့ၣ်န့ၣ်​ ကွဲးနီၣ်ဃာ်တၢ်ဂ့ၢ်လၢ တနံၤဘၣ်တနံၤ ယဟိဝၤယွၤ ပာ်ဖျါထီၣ်​ တၢ်အဲၣ်ဒီးတၢ်သးကညီၤ လၢနဖီခိၣ်ဒ်လဲၣ်န့ၣ်တက့ၢ်. (စံးထီၣ်ပတြၢၤ ၇၈:၃၈, ၃၉; ရိမ့ၤ ၈:၃၂) နမ့ၢ်ဆိကမိၣ်ထံ နနီၢ်ကစၢ်အတၢ်လဲၤခီဖျိ ဒီးတၢ်လၢနဖးဘၣ်အီၤ လၢလံာ်စီဆှံအပူၤတဖၣ်န့ၣ်​ နကထံၣ်ဘၣ်​ တၢ်လၢယဟိဝၤယွၤ မၤဝဲလၢနဂီၢ် အါမံၤန့ၣ်လီၤ. ဒီးနစံးဘျုးစံးဖှိၣ်အီၤ မ့ၢ်အါထီၣ်န့ၣ်​ နတၢ်ရ့လိာ်သးဒီးအီၤ ကဂၢၢ်ကျၢၤ ဒိၣ်ထီၣ်ဝဲလီၤ.—စံးထီၣ်ပတြၢၤ ၁၁၆:၁, ၂.

၆. ဒ် စံးထီၣ်ပတြၢၤ ၉၄:၁၇-၁၉ ပာ်ဖျါထီၣ်ဝဲအသိး တၢ်ဃ့ထုကဖၣ်လၢ သးဒီဖျၢၣ်န့ၣ်​ ကမၤစၢၤပှၤဒ်လဲၣ်.

^၆ ဃ့ဘါထုကဖၣ်တၢ် ထီဘိတက့ၢ်. ဆိကမိၣ်ကွၢ် ပိာ်ခွါဖိတဂၤလၢ အပၢ်ဖိးဟုဃာ်အီၤန့ၣ်တက့ၢ်. အဝဲကတူၢ်ဘၣ်ဝဲလၢ အအိၣ်ဒီး တၢ်ဘံၣ်တၢ်ဘၢ ဒီးလၢတနံၤအတီၢ်ပူၤ တၢ်ကဲထီၣ်အသးဒီးအီၤ အဂ့ၤမ့ၢ်ဂ့ၤ အအၢမ့ၢ်ဂ့ၤ အဝဲတဲဘၣ်အပၢ်ဘူၣ်​ ကိးမံၤဒဲးလီၤ. နၤစ့ၢ်ကီး နမ့ၢ်သုးဘူးနသးဆူ ယဟိဝၤယွၤအအိၣ်​ ဒီးဃ့ထုကဖၣ်တၢ် လၢနသးဒီဖျၢၣ်​ ကိးနံၤဒဲးန့ၣ်​ နအိၣ်ဒီး တၢ်ရ့လိာ်သးဒီးယွၤ ဒ်န့ၣ်သ့ဝဲလီၤ. (ဖး စံးထီၣ်ပတြၢၤ ၉၄:၁၇-၁၉ တက့ၢ်.) ဖဲနဃ့ထုကဖၣ်​ ဆူယဟိဝၤယွၤ လၢအမ့ၢ်ပၢ်လၢအပှဲၤဒီး တၢ်အဲၣ်တၢ်ကွံတဂၤအအိၣ်အခါ “လူလီၤကွံာ်နသးဒ်ထံအသိး” ဒီးတဲဘၣ်အီၤလၢ နတၢ်ပျံၤတၢ်ဖုး ဒီးနတၢ်ဘၣ်ယိၣ်ဘၣ်ဘှီ တဖၣ်တက့ၢ်. (သးသယုၢ်တၢ် ၂:၁၉) နမ့ၢ်မၤဒ်န့ၣ်န့ၣ်​ နကဒိးန့ၢ်ဘၣ်​ အဘျုးဒ်လဲၣ်. နကန့ၢ်ဘၣ်​ “ယွၤအတၢ်ဃူတၢ်ဖိးလၢ အဒိၣ်န့ၢ်ယိာ်န့ၢ် ကယဲၢ်ပသ့ၣ်ညါ နၢ်ပၢၢ်တၢ်” လီၤ. (ဖံလံးပံၤ ၄:၆, ၇) အဃိနဃ့ဘါထုကဖၣ်တၢ် ဒံးအါန့ၣ်​ နတၢ်ရ့လိာ်သးဒီး ယဟိဝၤယွၤ ကဘူးဒံးဒိၣ်ထီၣ်လီၤ.—ရိမ့ၤ ၈:၃၈, ၃၉.

၇. ဘၣ်မနုၤအဃိ နကဘၣ်နာ်လၢ ကစၢ်ယွၤအတၢ်အၢၣ်လီၤအီလီၤလၢ ဘၣ်ဃးဒီး အဘီအမုၢ်န့ၣ်​ ကဟဲလၢထီၣ်ပှဲၤထီၣ်ဝဲ သပှၢ်ကတၢၢ်န့ၣ်လဲၣ်.

^၇ နာ်လၢယွၤအဘီအမုၢ် အတၢ်ဆိၣ်ဂ့ၤတဖၣ်​ ကဟဲလၢထီၣ်ပှဲၤထီၣ်ဝဲ သပှၢ်တၢၢ်န့ၣ်တက့ၢ်. (၄ မိၤၡ့ ၂၃:၁၉) နမ့ၢ်တနာ်လၢ ကစၢ်ယွၤအတၢ်အၢၣ်လီၤအီလီၤတဖၣ်​ ကဟဲလၢထီၣ်ပှဲၤထီၣ်ဝဲ သပှၢ်ကတၢၢ်န့ၣ်​ မုၣ်ကီၤလံၢ်ဒီး အခ့အပှၤတဖၣ်​ မၤပျံၤမၤဖုးနၤ ကန့ၢ်ဝဲ ညီညီဖိလီၤ. (ကတိၤဒိ ၂၄:၁၀; ဧ့ၤဘြံၤ ၂:၁၅) ဆၢကတီၢ်ခဲအံၤ နမၤဂၢၢ်ကျၢၤထီၣ်​ နတၢ်နာ်လၢ ဘၣ်ဃးဒီး ယွၤအဘီအမုၢ် ကသ့ဒ်လဲၣ်. ဟံးန့ၢ်တၢ်ဆၢကတီၢ် လၢနကဃုသ့ၣ်ညါ ကစၢ်ယွၤ အတၢ်အၢၣ်လီၤအီလီၤ လၢဘၣ်ဃးဒီး ယွၤအဘီအမုၢ် ဒီးဘၣ်မနုၤအဃိ နနာ်သ့လၢ တၢ်အၢၣ်လီၤအီလီၤတဖၣ်အံၤ ကဟဲလၢပှဲၤထီၣ်ဝဲလဲၣ်​ န့ၣ်တက့ၢ်. နမ့ၢ်မၤဒ်န့ၣ်န့ၣ်​ ကကဲဘျုးလၢနဂီၢ် ဒ်လဲၣ်. ဆိကမိၣ်ကွၢ် စတဲလံၤ ကၠိ(စ်) အဂ့ၢ်တက့ၢ်.b ခီဖျိလၢ အတၢ်စူၢ်တၢ်နာ်အဃိ အဝဲဘၣ်လီၤလၢဃိာ်ပူၤနွံနံၣ်လီၤ. တၢ်မနုၤ မၤစၢၤအီၤဒ်သိး အကအိၣ်ဒီး တၢ်သးတီလဲၣ်. အဝဲတဲဝဲလၢ “ယသ့ၣ်ညါ ယွၤအဘီအမုၢ်အဂ့ၢ် ဒီးတၢ်လၢယွၤအဘီအမုၢ် ကမၤလၢပှဲၤထီၣ်ဝဲအဂ့ၢ် ဒီးယနာ်အီၤ သပှၢ်ကတၢၢ်လီၤ. အဃိ ယတၢ်နာ်ဂၢၢ်ကျၢၤ ဒီးပှၤမၤ ဒ်သိးယကပာ်တ့ၢ် ယဟိဝၤယွၤအဂီၢ် တန့ၢ်နီတဂၤဘၣ်.” နမ့ၢ်နာ် ယဟိဝၤယွၤ အတၢ်အၢၣ်လီၤအီလီၤတဖၣ်​ လၢလၢပှဲၤပှဲၤန့ၣ်​ နကဘူးဒိၣ်ထီၣ်ဒီးအီၤ ဒီးပှၤမၤပျံၤမၤဖုးနၤ ဒ်သိးနကပတုာ်မၤ ယဟိဝၤယွၤအတၢ်မၤအဂီၢ် တန့ၢ်နီတဂၤလၢၤဘၣ်.—ကတိၤဒိ ၃:၂၅, ၂၆.

၈. ပတၢ်ပာ်သူၣ်ပာ်သးလၢ ဘၣ်ဃးဒီး တၢ်ထီၣ်တၢ်အိၣ်ဖှိၣ်န့ၣ်​ ပာ်ဖျါထီၣ်ဝဲ တၢ်မနုၤလဲၣ်, တဲဖျါထီၣ်တက့ၢ်.

^၈ ထီၣ်တၢ်အိၣ်ဖှိၣ်​ ထီဘိတက့ၢ်. တၢ်အိၣ်ဖှိၣ်န့ၣ်​ မၤစၢၤပှၤဒ်သိး ပကဘူးထီၣ်ဒီး ယဟိဝၤယွၤအဂီၢ်လီၤ. ပမ့ၢ်ပာ်လုၢ်ပာ်ပှ့ၤ တၢ်ထီၣ်တၢ်အိၣ်ဖှိၣ်န့ၣ်​ ခါဆူညါ ဖဲပထံၣ်ဘၣ်​ တၢ်မၤအၢမၤနးအဆၢကတီၢ် ပလဲၤခီဖျိအီၤ ကန့ၢ်ဝဲဂ့ၤဂ့ၤလီၤ. (ဧ့ၤဘြံၤ ၁၀:၂၄, ၂၅) ဘၣ်မနုၤအဃိ ပတဲဒ်န့ၣ်သ့လဲၣ်. ခီဖျိလၢ တၢ်ဂ့ၢ်ဆံးဆံးဖိတဖၣ်အဃိ ပမ့ၢ်တထီၣ်တၢ်အိၣ်ဖှိၣ်ဘၣ်န့ၣ်​ ခါဆူညါ ပကထံၣ်လိာ်သးဒီး ဒီပုၢ်ဝဲၢ်တဖၣ်အဂီၢ် တၢ်လီၤဘၣ်ယိၣ်မ့ၢ်အိၣ်လၢ ပသးသမူအဂီၢ်န့ၣ်​ တမ့ၢ်လၢ ပကထီၣ်​ တၢ်အိၣ်ဖှိၣ်လၢၤဘၣ်. လၢတၢ်န့ၣ်အဃိ ဆၢကတီၢ်ခဲအံၤ ပမ့ၢ်ဆၢတဲာ်လီၤပသးလၢ ပကထီၣ်တၢ်အိၣ်ဖှိၣ်န့ၣ်​ ခါဆူညါ ပှၤမ့ၢ်ထီဒါပှၤ ဒ်သိးပသုတထံၣ်ဖှိၣ်လိာ်ပသးတဂ့ၤအဂီၢ်န့ၣ်​ တမ့ၢ်လၢ ပကပတုာ်ထီၣ်​ တၢ်အိၣ်ဖှိၣ်ဘၣ်. ဆၢကတီၢ်ခဲအံၤ ပကဘၣ်မၤအါထီၣ်​ ပတၢ်ပာ်လုၢ်ပာ်ပှ့ၤ တၢ်ထီၣ်တၢ်အိၣ်ဖှိၣ်​ အါန့ၢ်ဒံးလၢညါလီၤ. ပမ့ၢ်ပာ်လုၢ်ပာ်ပှ့ၤ တၢ်ထီၣ်တၢ်အိၣ်ဖှိၣ်န့ၣ်​ တၢ်ထီဒုၣ်ထီဒါတဖၣ်​ ဒီးပဒိၣ်ပပှၢ်အတၢ်သိၣ်တၢ်သီ မၤဟးဂီၤပတၢ်ဆၢတဲာ်လၢ ပကဒိကနၣ်​ ကစၢ်ယွၤအကလုၢ် အါန့ၢ်ပဒိကနၣ်​ ပှၤဟီၣ်ခိၣ်ဖိတဖၣ်အကလုၢ် တန့ၢ်ဘၣ်.—မၤတၢ် ၅:၂၉.

၉. ပမ့ၢ်တိၢ်ရူးသံဃာ် လံာ်စီဆှံအဆၢတဖၣ်န့ၣ်​ ဘၣ်မနုၤအဃိ မ့ၢ်ကျဲအဂ့ၤတဘိလၢ ပကအိၣ်ကတဲာ်ကတီၤပသးလၢ တၢ်မၤအၢမၤနးအဂီၢ်လဲၣ်.

^၉ တိၢ်ရူးသံဃာ် လံာ်စီဆှံအဆၢ လၢနဘၣ်သူၣ်ဘၣ်သးအီၤတဖၣ်​ န့ၣ်တက့ၢ်. (မးသဲ ၁၃:၅၂) ဘၣ်သ့ၣ်သ့ၣ်​ နတိၢ်နီၣ်တၢ် တန့ၢ်အါအါဘၣ်, ဘၣ်ဆၣ်​ ယဟိဝၤယွၤ အသးစီဆှံ ကမၤစၢၤနၤဒ်သိး နကသ့ၣ်နီၣ်ထီၣ်က့ၤ လံာ်စီဆှံအဆၢတဖၣ်န့ၣ်လီၤ. (ယိၤဟၣ်​ ၁၄:၂၆) ဆိကမိၣ်ကွၢ် ဒီပုၢ်ဝဲၢ်ခွါတဂၤလၢ အလီၤဘၣ်လၢ ဃိာ်ပူၤလၢ ကၠၢမနံၣ်​ အမုၢ်ထီၣ်တခီ ဒီးဘၣ်တၢ်ပာ်အီၤ ထဲတဂၤဧိၤန့ၣ်တက့ၢ်. အဝဲတဲဝဲလၢ “ခီဖျိလၢ ယတိၢ်နီၣ်သံဃာ် လံာ်စီဆှံအဆၢလၢ အကယၤတဖၣ်အဃိ ယသးခုဒိၣ်မးလီၤ. ယအိၣ်ဘၣ်ထဲတဂၤဧိၤ သနာ်က့ ထီဘိန့ၣ်​ ယဆိကမိၣ်​ တၢ်ဂ့ၢ်လၢအဘၣ်ဃးဒီး လံာ်စီဆှံလီၤ.” လံာ်စီဆှံအဆၢတဖၣ်အံၤ မၤစၢၤဝဲပဒီပုၢ်ဝဲၢ်ခွါတဂၤအံၤ ဒ်သိးအကအိၣ်ဘူးဒီး ယဟိဝၤယွၤ ဒီးကအိၣ်ဒီး တၢ်သးတီအဂီၢ်လီၤ.

၁၀. ဘၣ်မနုၤအဃိ ပကဘၣ်​ တိၢ်နီၣ်သံဃာ် တၢ်သးဝံၣ်တဖၣ်န့ၣ်လဲၣ်.

^၁၀ တိၢ်နီၣ်သံဃာ် တၢ်သးဝံၣ်အဖျၢၣ်တဖၣ်​ ဒီးသးဝံၣ်စံးထီၣ်ပတြၢၤ ယဟိဝၤယွၤတက့ၢ်. ဖဲစီၤပီလူးဒီးစီၤစံလၤ လီၤဘၣ်လၢဃိာ်ပူၤ လၢဖံလံးပံၤအခါ အဝဲသ့ၣ်​ သးဝံၣ်စံးထီၣ်ပတြၢၤ ယဟိဝၤယွၤ လၢတၢ်သးဝံၣ်လၢ အဝဲသ့ၣ်​ တိၢ်နီၣ်ဘၣ်ဝဲတဖၣ်န့ၣ်လီၤ. (မၤတၢ် ၁၆:၂၅) ဒ်န့ၣ်အသိး လၢညါပဒီပုၢ်ဝဲၢ်လၢ အအိၣ်လၢ စိဘံးယၢး ယူနံၤယၢၤအပူၤ ဒီးဘၣ်တၢ်နီဟးထီၣ်ကွံာ်အီၤ ဆူဆဲးဘံရံယါ အပူၤတဖၣ်န့ၣ်​ အဝဲသ့ၣ်​ မၤဂၢၢ်ကျၢၤထီၣ်အတၢ်နာ် ဒ်လဲၣ်. ဒီပုၢ်ဝဲၢ်မုၣ်​ မၤရံယၤ ဖၢၤဒူ တဲဝဲလၢ “ပသးဝံၣ်​ တၢ်သးဝံၣ်ကိးယုၢ်ဒဲးလၢ ပသ့ၣ်နီၣ်ဘၣ်အီၤတဖၣ်လီၤ. တၢ်သးဝံၣ်တဖၣ်အံၤ အိၣ်လၢလံာ်သးဝံၣ်အပူၤလီၤ.” အဝဲတဲဝဲလၢ တၢ်သးဝံၣ်တဖၣ်အံၤ ဟ့ၣ်ဂံၢ်ဟ့ၣ်ဘါ အဝဲသ့ၣ်​ ကိးဂၤဒဲး ဒီးမၤစၢၤအဝဲသ့ၣ်​ ဒ်သိးကတူၢ်ဘၣ်ဝဲလၢ အအိၣ်ဘူးဒီး ယဟိဝၤယွၤအဂီၢ်လီၤ. ဖဲနသးဝံၣ်​ ဘီမုၢ်အတၢ်သးဝံၣ်လၢ နဘၣ်သူၣ်ဘၣ်သးအီၤတဖၣ်အခါ မ့ၢ်နတူၢ်ဘၣ်လၢ နဂံၢ်နဘါထီၣ်ဧါ. မ့မ့ၢ်ဒ်န့ၣ်န့ၣ်​ တိၢ်သံဃာ် တၢ်သးဝံၣ်တဖၣ်န့ၣ်​ အဖျၢၣ်တက့ၢ်.—ကွၢ်တၢ်လွံၢ်နၢၣ်လၢအမ့ၢ် “ဟ့ၣ်ယၤတၢ်သးဒူ” တက့ၢ်.

နမၤအါထီၣ်​ နတၢ်သးဒူ ကသ့ဒ်လဲၣ်

၁၁-၁၂. (က) ဒ် ၁ ၡမူၤအ့လး ၁၇:၃၇, ၄၅-၄၇ ပာ်ဖျါထီၣ်ဝဲအသိး ဘၣ်မနုၤအဃိ စီၤဒၤဝံး အိၣ်ဒီးတၢ်သူၣ်ဒူသးဒူလဲၣ်. (ခ) ပမၤလိန့ၢ် တၢ်မၤလိအရ့ဒိၣ်​ မနုၤလၢ စီၤဒၤဝံးအဒိအတဲာ်လဲၣ်.

^၁၁ ဒ်သိးနလဲၤခီဖျိ တၢ်မၤအၢမၤနးကန့ၢ်အဂီၢ် နကဘၣ်အိၣ်ဒီး တၢ်သူၣ်ဒူသးဒူလီၤ. နမ့ၢ်တူၢ်ဘၣ်လၢ နတအိၣ်ဒီး တၢ်သးဒူဘၣ်န့ၣ်​ နကဘၣ်မၤမနုၤလဲၣ်. သ့ၣ်နီၣ်ထီၣ်လၢ တၢ်သးဒူန့ၣ်​ တဒိးသန့ၤထီၣ်အသးလၢ နနီၢ်အဒိၣ်အထီ, နဂံၢ်နဘါ မ့တမ့ၢ် နတၢ်သ့တၢ်ဘၣ်န့ၣ်ဘၣ်. ဆိကမိၣ်ကွၢ် စီၤဒၤဝံးလၢ အကွၢ်ဆၢၣ်မဲာ်ဒီး စီၤကၤလယးအဂ့ၢ်န့ၣ်တက့ၢ်. ပမ့ၢ်ထိၣ်သတြီၤကွၢ် ပှၤနီၢ်ဒိၣ်ဖိအံၤဒီး စီၤဒၤဝံးန့ၣ်​ စီၤဒၤဝံးမ့ၢ်ပှၤလၢ အနီၢ်ဆံး, အဂံၢ်စၢ် ဒီးအတၢ်စုကဝဲၤလၢ ကဒုးတၢ်အဂီၢ်တအိၣ်​ ဂ့ၤဂ့ၤဘၣ်. အဒီဒၣ်လဲာ် တအိၣ်လၢအစုပူၤဘၣ်. ဘၣ်ဆၣ်​ စီၤဒၤဝံးမ့ၢ်ပှၤလၢ အသးဒူဒိၣ်မးလီၤ. အဝဲလဲၤဃ့ၢ်ဝဲ ဆူပှၤနီၢ်ဒိၣ်ဖိလၢ အပာ်ထီၣ်ထီအသးတဂၤအံၤ အအိၣ်ဒူဒူ ဒီးဒုးတၢ်ဒီးအီၤလီၤ.

^၁၂ ဘၣ်မနုၤအဃိ စီၤဒၤဝံး အိၣ်ဒီးတၢ်သူၣ်ဒူသးဒူဒိၣ်မးလဲၣ်. အဝဲနာ်ဝဲလၢ ယဟိဝၤယွၤ ကအိၣ်ဒီးအီၤ သပှၢ်ကတၢၢ်လီၤ. (ဖး ၁ ၡမူၤအ့လး ၁၇:၃၇, ၄၅-၄၇ တက့ၢ်.) အဝဲတသးစၢၢ်ဆၢဝဲလၢ စီၤကၤလယး အနီၢ်ဒိၣ်န့ၢ်အီၤ ထဲလဲၣ်န့ၣ်ဘၣ်. လၢတၢ်န့ၣ်အလီၢ် အဝဲသးစၢၢ်ဆၢဝဲလၢ စီၤကၤလယး ဆံးန့ၢ်ကစၢ်ယွၤ ထဲလဲၣ်န့ၣ်လီၤ. ပမ့ၢ်နာ် သပှၢ်ကတၢၢ်လၢ ယဟိဝၤယွၤအိၣ်ဒီးပှၤ ဒီးပှၤလၢအထီဒါပှၤတဖၣ်​ ဆံးန့ၢ်သ့တၢ်လၢာ်ကစၢ် အါမးန့ၣ်​ ပကအိၣ်ဒီး တၢ်သူၣ်ဒူသးဒူလီၤ. (၂ ကွဲးနီၣ်တၢ် ၂၀:၁၅; စံးထီၣ်ပတြၢၤ ၁၆:၈) တချုးလၢ ပထံၣ်ဘၣ်ဒီး တၢ်မၤအၢမၤနးဒံးဘၣ်န့ၣ်​ ပမၤအါထီၣ်​ ပတၢ်သူၣ်ဒူသးဒူ လၢဆၢကတီၢ်ခဲအံၤ ကသ့ဒ်လဲၣ်.

၁၃. ပမၤအါထီၣ်​ ပတၢ်သူၣ်ဒူသးဒူ ကသ့ဒ်လဲၣ်, တဲဖျါထီၣ်တက့ၢ်.

^၁၃ ဆၢကတီၢ်ခဲအံၤ ပမၤအါထီၣ်​ ပတၢ်သူၣ်ဒူသးဒူသ့ခီဖျိ ပဟးစံၣ်တဲၤတဲလီၤ ပှၤဂၤလၢ ယွၤအဘီအမုၢ် အတၢ်သးခုကစီၣ်လီၤ. ဘၣ်မနုၤအဃိ ပဘၣ်မၤဒ်န့ၣ်လဲၣ်. တၢ်စံၣ်တဲၤတဲလီၤတၢ်န့ၣ်​ မၤစၢၤပှၤဒ်သိး ပကနာ်န့ၢ်ယဟိဝၤယွၤ ဒီးပသုတပျံၤပှၤကညီ တဂ့ၤအဂီၢ်လီၤ. (ကတိၤဒိ ၂၉:၂၅) ပမ့ၢ်မၤ နီၢ်ခိအတၢ်ဟူးတၢ်ဂဲၤန့ၣ်​ ပနီၢ်ခိဂံၢ်ဘါကဆူၣ်ထီၣ်လီၤ. ဒ်န့ၣ်အသိး ပမ့ၢ်ဟးစံၣ်တဲၤတဲလီၤတၢ် တဟံၣ်ဘၣ်တဟံၣ်, မၤတၢ်စံၣ်တဲၤတဲလီၤတၢ်လၢ ကမျၢၢ်အမဲာ်ညါ, စံၣ်တဲၤတဲလီၤတၢ်တပူၤလၢ်လၢ် ဒီးလၢတၢ်လီၢ်လၢ ပှၤဆါတၢ်ပှ့ၤတၢ်အလီၢ်န့ၣ်​ ပတၢ်သူၣ်ဒူသးဒူ ကဟဲအါထီၣ်ဝဲလီၤ. ဆၢကတီၢ်ခဲအံၤ ပမ့ၢ်မၤအါထီၣ်​ ပတၢ်သးဒူ လၢပကစံၣ်တဲၤတဲလီၤတၢ်အဂီၢ်န့ၣ်​ ကလီၤဂာ်ဒ် ပအိၣ်ကတဲာ်ကတီၤပသးလၢ ပကဆဲးစံၣ်တဲၤတဲလီၤတၢ် ဖဲပဒိၣ်ပပှၢ်တဖၣ်​ တြီဃာ်ပတၢ်စံၣ်တဲၤတဲလီၤတၢ်မၤ အခါန့ၣ်လီၤ.—၁ သ့းစၤလနံ ၂:၁, ၂.

၁၄-၁၅. ပန့ၢ်ဘၣ်တၢ်မၤလိလၢ နဲစံၤ ယူၤဝဲၤ ဒီးဘၢၤလဲၤထံနၤ ကၤနိ(စ်)ကါယၤ အအိၣ်ဒ်လဲၣ်.

^၁၄ ပဟံးန့ၢ်တၢ်မၤလိလၢ ဒီပုၢ်ဝဲၢ်မုၣ်လၢ အအိၣ်ဒီးတၢ်သးတီခံဂၤအအိၣ်​ သ့ဝဲအါမးလီၤ. အဝဲသ့ၣ်​ အိၣ်ဒီးတၢ်သူၣ်ဒူသးဒူ ဒိၣ်မးလီၤ. ဒီပုၢ်ဝဲၢ်မုၣ်​ နဲစံၤ ယူၤဝဲၤန့ၣ်​ အနီၣ်ထီဝဲထဲ ယဲၢ်ပ့ၣ်ဃၣ်ဃၣ်​ (၁.၅ မံထၢၣ်) ဘၣ်ဆၣ်​ အဝဲသးဒူဒိၣ်မးလီၤ.c ပှၤတြီဃာ် တၢ်စံၣ်တဲၤတဲလီၤတၢ်မၤ ဘၣ်ဆၣ်​ အဝဲတပတုာ် မၤတၢ်စံၣ်တဲၤတဲလီၤ ဘီမုၢ်အတၢ်သးခုကစီၣ်အဃိ အဝဲလီၤဘၣ်လၢ တရူးအဃိာ်ပူၤ အါန့ၢ်အနံၣ်​ ၂၀ လီၤ. ပှၤဘၣ်မူဘၣ်ဒါ လၢအသံကွၢ်သံဒိးအီၤတဖၣ်​ တဲဝဲလၢ နဲစံၤ ယူၤဝဲၤ “မ့ၢ်ပှၤလၢ အခိၣ်ကိၤကတၢၢ်” လၢအဝဲသ့ၣ်​ အထံအကီၢ်အပူၤလီၤ.

^၁၅ ဒ်န့ၣ်အသိး ဘၢၤလဲၤထံနၤ ကၤနိ(စ်)ကါယၤ လီၤဘၣ်လၢ စိဘံးယၢး ယူနံၤယၢၤအဃိာ်ပူၤ သၢဘျီလီၤ. ဒီးအဝဲ ဘၣ်လီၤလၢဃိာ်ပူၤ အနံၣ်ခဲလၢာ်န့ၣ်​ ကအိၣ်ဝဲ ၂၁ နံၣ်ဃၣ်ဃၣ်လီၤ.d ဘၣ်မနုၤအဃိလဲၣ်. အဝဲဆၢတဲာ်လီၤအသးလၢ ကဆဲးစံၣ်တဲၤတဲလီၤတၢ်အဃိ ပဒိၣ်ပပှၢ် ကိးအီၤလၢ “ပှၤအၢပှၤသီ လၢအလီၤပျံၤတဂၤ” လီၤ. ဘၣ်မနုၤအဃိ ဒီပုၢ်ဝဲၢ်မုၣ်လၢ အအိၣ်ဒီးတၢ်သးတီခံဂၤအံၤ အိၣ်ဒီးတၢ်သူၣ်ဒူသးဒူ ထဲအံၤညါလဲၣ်. မ့ၢ်လၢအဝဲသ့ၣ်​ နာ်ဝဲလၢ ယဟိဝၤယွၤ အိၣ်ဒီးအဝဲသ့ၣ်အဃိလီၤ.

၁၆. ဒ်သိး ပကအိၣ်ဒီး တၢ်သူၣ်ဒူသးဒူနီၢ်နီၢ်အဂီၢ် ပကဘၣ်မၤတၢ်မနုၤလဲၣ်.

^၁၆ ဒ်ပမၤလိတ့ၢ်အသိး ဒ်သိးပကမၤအါထီၣ်​ ပတၢ်သူၣ်ဒူသးဒူအဂီၢ် ပတဘၣ်သန့ၤပသးလၢ ပနီၢ်ကစၢ် အဂံၢ်အဘါ ဒီးပတၢ်သ့တၢ်ဘၣ်တဖၣ်န့ၣ်ဘၣ်. လၢတၢ်န့ၣ်အလီၢ် ပကဘၣ်နာ်လၢ ယဟိဝၤယွၤအိၣ်ဒီးပှၤ ဒီးအမ့ၢ်ပှၤလၢ အဒုးတၢ်လၢပဂီၢ်လီၤ. (၅ မိၤၡ့ ၁:၂၉, ၃၀; စကၤရယၤ ၄:၆) ဒ်သိး ပကအိၣ်ဒီး တၢ်သူၣ်ဒူသးဒူနီၢ်နီၢ်အဂီၢ် ပကဘၣ်မၤဒ်န့ၣ်န့ၣ်​ မ့ၢ်တၢ်လၢအရ့ဒိၣ်ဒိၣ်မးလီၤ.

ပှၤမ့ၢ်သးဟ့ပှၤန့ၣ်​ ပဘၣ်မၤဒ်လဲၣ်

၁၇-၁၈. ဖဲ ယိၤဟၣ်​ ၁၅:၁၈-၂၁ န့ၣ်ယ့ၣ်ၡူးဟ့ၣ်ပလီၢ်ပှၤ ဒ်လဲၣ်, တဲဖျါထီၣ်တက့ၢ်.

^၁၇ ပအဲၣ်ဒိးလၢ ပှၤကပာ်ကဲပှၤ ဘၣ်ဆၣ်​ ပှၤမ့ၢ်တပာ်ကဲပှၤဘၣ်န့ၣ်​ ပတကြၢးဆိကမိၣ်လၢ ပလုၢ်ပပှ့ၤ တအိၣ်ဘၣ်န့ၣ်ဘၣ်. ယ့ၣ်ၡူးတဲဝဲလၢ “တုၤပှၤကညီသးဟ့သု, ဒီးတုၤအဟီထီၣ်ကွံာ်သု, ဒီးဒုၣ်ဒွဲၣ်သု, ဒီးညိကွံာ်သုမံၤဒ် တၢ်အၢအသိး လၢပှၤကညီဖိခွါအံၤအဃိဒီး, သုဘၣ်ဆိၣ်ဂ့ၤ [“သးခု,” NWT] သုဝဲလီၤ.” (လူၤကၣ်​ ၆:၂၂) ယ့ၣ်ၡူးအဲၣ်ဒိးတဲဝဲ တၢ်မနုၤလဲၣ်.

^၁၈ ယ့ၣ်ၡူးတအဲၣ်ဒိးတဲဝဲလၢ ခရံာ်ဖိတဖၣ်န့ၣ်​ ဖဲပှၤသးဟ့အီၤအခါ အဝဲသ့ၣ်​ ဘၣ်သူၣ်ဘၣ်သးဝဲန့ၣ်ဘၣ်. ဖဲအဝဲတဲဝဲဒ်န့ၣ်အခါ မ့ၢ်ဒၣ်အအဲၣ်ဒိးဟ့ၣ်ပလီၢ်ပှၤ ဘၣ်ဃးဒီး တၢ်လၢပကထံၣ်ဘၣ်အီၤတဖၣ်န့ၣ်လီၤ. ပဝဲသ့ၣ်တဖၣ်န့ၣ်​ ပတဘၣ်ဃးဒီး ဟီၣ်ခိၣ်ဘၣ်. ပအိၣ်မူဒ် ယ့ၣ်ၡူးအတၢ်သိၣ်တၢ်သီအသိး ဒီးပစံၣ်တဲၤတဲလီၤ တၢ်လၢယ့ၣ်ၡူး စံၣ်တဲၤတဲလီၤဝဲတဖၣ်န့ၣ်လီၤ. လၢတၢ်န့ၣ်အဃိ ပှၤသးဟ့ပှၤလီၤ. (ဖး ယိၤဟၣ်​ ၁၅:၁၈-၂၁ တက့ၢ်.) ပအဲၣ်ဒိးမၤ တၢ်ဘၣ်ယဟိဝၤယွၤအသးလီၤ. ပှၤမ့ၢ်သးဟ့ပှၤ ခီဖျိလၢ ပအဲၣ်ယဟိဝၤယွၤအဃိန့ၣ်​ ပသးတအုးဘၣ်.

၁၉. ပကွၢ်လိမၤဒိး တၢ်မၢဖိတဖၣ်​ ကသ့ဒ်လဲၣ်.

^၁၉ တဘၣ်ဟ့ၣ်အခွဲးလၢ ပှၤဂၤအတၢ်ကတိၤ မ့တမ့ၢ် အတၢ်မၤတဖၣ်​ မၤမဲာ်ဆှးနၤ ခီဖျိလၢ နကဲယဟိဝၤပှၤအုၣ်အသးအဃိတဂ့ၤ. (မံကၤ ၄:၅) ပမၤနၢၤကွံာ် တၢ်ပျံၤပှၤကညီသ့ခီဖျိ ပဆိကမိၣ်ထံ တၢ်ဂ့ၢ်ဘၣ်ဃးဒီး ဖဲယ့ၣ်ၡူးဘၣ်တၢ်မၤသံအီၤ ဝံၤအလီၢ်ခံ တၢ်မၢဖိလၢ ဝ့ၢ်ယရူၤၡလ့ၣ်တဖၣ်​ မၤဝဲမနုၤလဲၣ်န့ၣ်လီၤ. အဝဲသ့ၣ်​ သ့ၣ်ညါဝဲလၢ ပှၤယူဒၤဖိ အတၢ်ဘူၣ်တၢ်ဘါခိၣ်နၢ်တဖၣ်​ သးဟ့အီၤဒိၣ်မးန့ၣ်လီၤ. (မၤတၢ် ၅:၁၇, ၁၈, ၂၇, ၂၈) ဘၣ်ဆၣ်အဝဲသ့ၣ်​ လဲၤလၢတၢ်လုၢ်ဟံၣ်ထီဘိ ဒီးပာ်ဖျါထီၣ်ဝဲလၢ အကဲယ့ၣ်ၡူးအပျဲၢ်အဘီၣ်​ ခီဖျိစံၣ်တဲၤတဲလီၤတၢ်န့ၣ်လီၤ. (မၤတၢ် ၅:၄၂) အဝဲသ့ၣ်​ တဟ့ၣ်အခွဲးလၢ တၢ်ပျံၤတၢ်ဖုး ကမၤပတုာ် အတၢ်စံၣ်တဲၤတဲလီၤန့ၣ်ဘၣ်. ပဝဲသ့ၣ်တဖၣ်စ့ၢ်ကီး ပမ့ၢ်အဲၣ်ဒိးမၤနၢၤကွံာ် တၢ်ပျံၤပှၤကညီန့ၣ်​ ဖဲပအိၣ်လၢ တၢ်မၤလီၢ်မ့ၢ်ဂ့ၤ, လၢကၠိမ့ၢ်ဂ့ၤ, လၢတၢ်လီၢ်တပူၤဂ့ၤတပူၤဂ့ၤ ပကဘၣ်ပာ်ဖျါထီၣ်လၢ ပမ့ၢ်ယဟိဝၤပှၤအုၣ်အသး ထီဘိလီၤ.—မၤတၢ် ၄:၂၉, ၃၀; ရိမ့ၤ ၁:၁၆.

၂၀. တၢ်မၢဖိတဖၣ်န့ၣ်​ ပှၤသးဟ့အီၤ ဘၣ်ဆၣ်​ ဘၣ်မနုၤအဃိ အဝဲသ့ၣ်​ အသးခုဝဲလဲၣ်.

^၂၀ ဘၣ်မနုၤအဃိ တၢ်မၢဖိတဖၣ်​ အသးခုလဲၣ်. မ့ၢ်လၢအဝဲသ့ၣ်​ သ့ၣ်ညါဝဲလၢ ပှၤသးဟ့အီၤ ခီဖျိလၢ အမၤကစၢ်ယွၤအတၢ်ဘၣ်သးအဃိ ဒီးအဝဲသ့ၣ်​ ပာ်ကဖၢလၢအသးလၢ တၢ်ဂ့ၢ်အံၤအဃိလီၤ. (လူၤကၣ်​ ၆:၂၃; မၤတၢ် ၅:၄၁) လၢခံတၢ်မၢဖိပ့းတရူး ကွဲးဝဲလၢ “သုမ့ၢ်ဘၣ်တၢ်ဖှီၣ်တၢ်နးလၢ တၢ်တီတၢ်လိၤအဃိဒီး, သုဘၣ်ဆိၣ်ဂ့ၤ [“သးခု,” NWT] လီၤ.” (၁ ပ့းတရူး ၂:၁၉-၂၁; ၃:၁၄) ပမ့ၢ်နၢ်ပၢၢ်ထီၣ်လၢ ပှၤသးဟ့ပှၤ ခီဖျိလၢ ပမၤတၢ်အဘၣ်အဃိန့ၣ်​ ပတပတုာ် မၤယဟိဝၤယွၤအတၢ်မၤ ခီဖျိလၢပှၤသးဟ့ပှၤအဃိ နီတဘျီဘၣ်.

နမ့ၢ်အိၣ်ကတဲာ်ကတီၤနသးန့ၣ်​ နကဒိးန့ၢ်ဘၣ်အဘျုး

၂၁-၂၂. (က) နပာ်လီၤနသးလၢ နကအိၣ်ကတဲာ်ကတီၤနသးလၢ တၢ်မၤအၢမၤနးအဂီၢ်ဒ်လဲၣ်. (ခ) တၢ်မၤလိ လၢခံတခါန့ၣ်​ ပကမၤလိဘၣ်​ တၢ်ဂ့ၢ်မနုၤလဲၣ်.

^၂၁ ပှၤကမၤအၢမၤနးပှၤ မ့တမ့ၢ် ပဒိၣ်ပပှၢ်တဖၣ်​ ကတြီဃာ် ပတၢ်ဘူၣ်ထီၣ်ဘါထီၣ်​ အခါဖဲလဲၣ်န့ၣ်​ ပတသ့ၣ်ညါဘၣ်. ဘၣ်ဆၣ်​ ပသ့ၣ်ညါလၢ ပအိၣ်ကတဲာ်ကတီၤပသးသ့ ခီဖျိပမၤဂၢၢ်ကျၢၤထီၣ်​ ပတၢ်ရ့လိာ်သးဒီး ယဟိဝၤယွၤ, မၤအါထီၣ်​ ပတၢ်သူၣ်ဒူသးဒူ ဒီးမၤနၢၤကွံာ် တၢ်ပျံၤပှၤကညီလီၤ. ဆၢကတီၢ်ခဲအံၤ ပမ့ၢ်အိၣ်ကတဲာ်ကတီၤပာ်စၢၤပသးန့ၣ်​ ကကဲထီၣ်တၢ်မၤစၢၤ လၢပကဆဲးမၤ ကစၢ်ယွၤအတၢ်မၤ လၢခါဆူညါအဂီၢ်လီၤ.

^၂၂ ဘၣ်ဆၣ်​ ပှၤမ့ၢ်တြီဃာ် ပတၢ်ဖံးတၢ်မၤတဖၣ်န့ၣ်​ ပကမၤဒ်လဲၣ်. လၢတၢ်မၤလိလၢခံတခါန့ၣ်​ ပကတဲသကိး လံာ်စီဆှံအတၢ်ဟံးစုနဲၣ်ကျဲလၢ ကမၤစၢၤပှၤဒ်သိး ပကဆဲးဘူၣ်ထီၣ်ဘါထီၣ်​ ယဟိဝၤယွၤ ဖဲပှၤတြီဃာ် ပတၢ်ဖံးတၢ်မၤ အဆၢကတီၢ်န့ၣ်လီၤ.