မ့ၢ်နသ့ၣ်ညါဧါ
လၢပျၢၤန့ၣ် ပှၤကွၢ်တၢ်တဂၤ ကဘၣ်မၤဝဲမူဒါ မနုၤလဲၣ်
လၢပျၢၤန့ၣ် ပှၤကွၢ်တၢ်တဂၤ ဘၣ်ကွၢ်ထွဲဝဲ ပှၤတဂၤဂၤအဟံၣ်အဃီ မ့တမ့ၢ် အတၢ်စုလီၢ်ခီၣ်ခိၣ်တဖၣ်လီၤ. ဧ့ၤဘြံၤ ဒီးကြံးအတၢ်ကတိၤတဖၣ်လၢ ဘၣ်တၢ်ကွဲးကျိာ်ထံအီၤလၢ “ပှၤကွၢ်တၢ်” န့ၣ်တဘျီတခီၣ် အဲၣ်ဒိးတဲဝဲ ပှၤကွၢ်ထွဲတၢ် မ့တမ့ၢ် ပှၤရဲၣ်ကျဲၤတၢ်လၢ ဟံၣ်ဖိဃီဖိတဒူၣ်အပူၤလီၤ.
ဖဲစီၤယိၤသးလၢအမ့ၢ် စီၤယၤကိာ်အဖိခွါ ကဲကုၢ်လၢ ကီၢ်အဲၤကူပတူး အဆၢကတီၢ် အဝဲကဲထီၣ်ဘၣ် ပှၤကွၢ်တၢ် လၢအကစၢ်အဟံၣ်ပူၤလီၤ. လံာ်စီဆှံတဲဝဲလၢ စီၤယိၤသး အကစၢ်လၢအမ့ၢ် ပှၤအဲၤကူပတူးဖိန့ၣ် ပာ်လီၤဝဲ “ကယဲၢ်အတၢ်အိၣ်ဒီးအီၤ” လၢစီၤယိၤသးအ “စုပူၤခဲလၢာ်လီၤ.” (၁ မိၤၡ့ ၃၉:၂-၆) လၢခံဖဲအဝဲ ကဲထီၣ်ပှၤပၢတၢ်လၢ အအိၣ်ဒီး တၢ်စိတၢ်ကမီၤဖးဒိၣ်လၢ ကီၢ်အဲၤကူပတူးအပူၤအခါ အဝဲဃုထၢထီၣ်ဝဲ ပှၤကွၢ်တၢ် လၢအကကွၢ်ထွဲတၢ်လၢ အဟံၣ်ပူၤဃီပူၤန့ၣ်လီၤ.—၁ မိၤၡ့ ၄၄:၄.
လၢယ့ၣ်ၡူးအစိၤန့ၣ် ဟီၣ်ခိၣ်အကစၢ်တဖၣ် ညီနုၢ်လဲၤအိၣ်ဝဲ လၢဝ့ၢ်ပူၤ လၢအယံၤဒီး အဝဲသ့ၣ် အစံာ်ပျီလီၤ. အဃိ အဝဲသ့ၣ် ဃုထၢထီၣ်ဝဲ ပှၤကွၢ်တၢ် လၢကကွၢ်ထွဲ ပှၤမၤတၢ်ဖိအဂၤတဖၣ် လၢအမၤတၢ်မၤလၢ အစံာ်ပျီပူၤအဂီၢ်လီၤ.
မတၤတဖၣ် ကတုၤထီၣ်ထီၣ်ဘးလၢ ကကဲထီၣ် ပှၤကွၢ်တၢ်လဲၣ်. ရိမ့ၤအပှၤကွဲးလံာ်ဖိလၢ တၢ်မၢဖိအစိၤ လၢအမ့ၢ် ခီလံမဲလၤန့ၣ် ဟ့ၣ်ကူၣ်ဝဲလၢ ကုၢ်လၢအဘၣ် တၢ်ဃုထၢထီၣ်အီၤ ဒ်ပှၤကွၢ်တၢ်တဂၤန့ၣ် ကြၢးမ့ၢ်ပှၤလၢ “အမၤလိသ့ထီၣ်အသးလၢတၢ်မၤ ဂ့ၤဂ့ၤ” လီၤ. အဝဲကမ့ၢ်ပှၤလၢအ “ကွၢ်ထွဲတၢ်ဒ်သိး အပှၤမၤတၢ်ဖိတဖၣ် မၤတၢ်ကဝံၤဂ့ၤဂ့ၤ သနာ်က့ တမ့ၢ်လၢ အဝဲမၤဆူၣ်မၤစိး အဝဲသ့ၣ်အဃိဘၣ်.” ဒီးပှၤကွဲးလံာ်တဂၤအံၤ တဲကဒီးဝဲလၢ “တၢ်လၢအရ့ဒိၣ်ကတၢၢ်န့ၣ် ပှၤကွၢ်တၢ်တဂၤ တဘၣ်ဆိကမိၣ်လီၤအသးလၢ အသ့ၣ်ညါတၢ်ခဲလၢာ်ဘၣ် ဒီးအဝဲကဘၣ် သးအိၣ်မၤလိအါထီၣ်တၢ်လီၤ.”
လံာ်စီဆှံသူဝဲ တၢ်အဒိလၢဘၣ်ဃးဒီး ပှၤကွၢ်တၢ် ဒီးအတၢ်ဖံးတၢ်မၤတဖၣ် ဒ်သိးကပာ်ဖျါထီၣ်ဝဲ ခရံာ်ဖိတၢ်အိၣ်ဖှိၣ် အတၢ်ဖံးတၢ်မၤတနီၤ အဂ့ၢ်လီၤ. အဒိ တၢ်မၢဖိပ့းတရူး ဟ့ၣ်ဂံၢ်ဟ့ၣ်ဘါဝဲ ခရံာ်ဖိတဖၣ်လၢ အဝဲသ့ၣ်ကသူဝဲ အတၢ်သ့တၢ်ဘၣ်လၢ ကစၢ်ယွၤဟ့ၣ်အီၤတဖၣ်ဒီးက ‘အံးက့ၤကွၢ်က့ၤလိာ်အသး’ “ဒ်ပှၤဂ့ၤကွၢ် [မ့တမ့ၢ် ပှၤကွၢ်တၢ်လၢအဂ့ၤ]” လၢအဒိးန့ၢ်ဘၣ် “ယွၤအဘျုးအဖှိၣ်” အသိးလီၤ.—၁ ပ့းတရူး ၄:၁၀.
ဖဲ လူၤကၣ် ၁၆:၁-၈ အပူၤန့ၣ် ပထံၣ်ဘၣ်လၢ ယ့ၣ်ၡူးသူဝဲ တၢ်အဒိလၢ ဘၣ်ဃးဒီး ပှၤကွၢ်တၢ်န့ၣ်လီၤ. တကးဒံးဘၣ် ဖဲယ့ၣ်ၡူးတဲဆိပာ်စၢၤဝဲ တၢ်ပနီၣ်လၢ အကပာ်ဖျါထီၣ်ဝဲ ဆၢကတီၢ်ဖဲ အဝဲကကဲထီၣ်စီၤပၤအခါ အဝဲအၢၣ်လီၤအီလီၤ အပျဲၢ်အဘီၣ်တဖၣ်လၢ အကဃုထၢထီၣ် “တၢ်အကုၢ်အပှၤလၢ အကလုၢ်တီ ဒီးအကူၣ်တၢ်သ့” လၢအမ့ၢ် “အခ့အပှၤ [မ့တမ့ၢ် ပှၤကွၢ်တၢ်] လၢအကလုၢ်တီ” လီၤ. ပှၤကွၢ်တၢ်အံၤ အမူဒါလၢ အရ့ဒိၣ်ကတၢၢ်န့ၣ်မ့ၢ်ဝဲ အကဘၣ် ကတဲာ်ကတီၤန့ၢ် ခရံာ်ဖိတဖၣ်လၢ နီၢ်သးအတၢ်အီၣ်တၢ်အီ လၢအဝဲသ့ၣ်လိၣ်ဘၣ်ဝဲ ဖဲမုၢ်နံၤခံကတၢၢ် အဆၢကတီၢ်န့ၣ်လီၤ. (မးသဲ ၂၄:၄၅-၄၇; လူၤကၣ် ၁၂:၄၂) ပဒိးန့ၢ်ဘၣ် လံာ်လဲၢ်တဖၣ်လၢ ပှၤကွၢ်တၢ် လၢအကလုၢ်တီ ကတဲာ်ကတီၤဝဲ ဒီးရၤလီၤဝဲလၢ ဟီၣ်ခိၣ်ဒီဘ့ၣ်အဃိ ပသးခုဒိၣ်မးလီၤ.