ဘူၣ်လဲၤကပာ်န့ၣ် တမ့ၢ်တၢ်အဒိလၢ တၢ်သ့ၣ်နီၣ်ထီၣ်က့ၤအမူးအဂီၢ်ဘၣ်, ဘၣ်ဆၣ် ပှၤမၤအီၤဒ်လဲၣ်ဒ်လဲၣ်န့ၣ် အခီပညီအိၣ်လၢပဂီၢ်လီၤ. အဒိ တၢ်မၢဖိပီလူး ကိးဝဲယ့ၣ်ၡူးလၢ “ပဘူၣ်လဲၤကပာ်အသိဖိ” လီၤ. (၁ ကရံၣ်. ၅:၇, ခ့ခါစှီၤကျိာ်) ဒ်သိဖိအသွံၣ်လၢ ပှၤဖှူအီၤလၢ ကျဲစၢၤအထူၣ်လိၤန့ၣ် မၤပူၤဖျဲးကွံာ်ပှၤသးသမူအသိး, ယ့ၣ်ၡူးအသွံၣ် မၤပူၤဖျဲး ပှၤဟီၣ်ခိၣ်ဖိတဖၣ် အသးသမူလီၤ. (၂ မိၤ. ၁၂:၁၂, ၁၃) တကးဒံးဘၣ် ဘူၣ်လဲၤကပာ်အသိဖိအဃံန့ၣ် တကၢ်နီတဘိဘၣ်. ဒ်န့ၣ်အသိး ပှၤယူဒၤဖိတဖၣ် အလုၢ်အလၢ်အိၣ်လၢ ဖဲပှၤဘၣ်တၢ်စံၣ်ညီၣ်သံအီၤအခါ ကဘၣ်တၢ်မၤကၢ်အဃံ ဘၣ်ဆၣ် မ့မ့ၢ်ယ့ၣ်ၡူးန့ၣ် အဃံတကၢ်ဝဲ နီတဘိဘၣ်.—၂ မိၤ. ၁၂:၄၆; ယိၤ. ၁၉:၃၁-၃၃, ၃၆.