တၢ်မၤဂ့ၤထီၣ် ပတၢ်သ့တၢ်ဘၣ်လၢ တၢ်သးခုကစီၣ်တၢ်မၤအပူၤ—တၢ်စးထီၣ်ကတိၤတၢ်ဒီးပှၤဂၤလၢ ဒုးအိၣ်ထီၣ် တၢ်ခွဲးတၢ်ယာ်လၢ ပကစံၣ်တဲၤတဲလီၤတၢ်အဂီၢ်

ယ့ၣ်ၡူးစးထီၣ်ကတိၤတၢ်ဒီး ပှၤၡၤမရံမုၣ်တဂၤအဃိ ဒိးန့ၢ်ဘၣ်တၢ်ခွဲးတၢ်ယာ်လၢ ကစံၣ်တဲၤတဲလီၤအီၤလီၤ. ဒ်သိးပကအိၣ်ဒီးတၢ်သ့တၢ်ဘၣ်လၢ ပကစးထီၣ်ကတိၤတၢ်ဒီးပှၤဂၤအဂီၢ် ပမၤကသ့ဒ်လဲၣ်.

• တဲတၢ်ဒီးပှၤဂၤလၢ တၢ်မဲာ်မုာ်နါဆၢတက့ၢ်. ယ့ၣ်ၡူးန့ၣ်​ လီၤဘှံးလီၤတီၤသနာ်က့ အဝဲစးထီၣ်ကတိၤတၢ်ဒီးပှၤဂၤ ခီဖျိဃ့အီဝဲထံလီၤ. လၢတၢ်န့ၣ်အဃိ နၤစ့ၢ်ကီးနစးထီၣ်ကတိၤတၢ်ဒီးပှၤဂၤ သ့ခီဖျိ နဆၢဂ့ၤဆၢဝါအီၤ, တဲသကိးမူခိၣ်မူလါတၢ်အိၣ်သး, မ့တမ့ၢ် တၢ်ကဲထီၣ်အသးသတူၢ်ကလာ် တခါခါအဂ့ၢ်သ့လီၤ. သ့ၣ်နီၣ်ထီၣ်လၢ နတၢ်တိာ်ပာ်န့ၣ်မ့ၢ်ဝဲ နကစးထီၣ်ကတိၤတၢ်ဒီးပှၤဂၤအဃိ တဲတၢ်ဂ့ၢ်လၢ ပှၤဂၤကသးစၢၢ်ဆၢဝဲန့ၣ်တက့ၢ်. ပှၤလၢနစးထီၣ်တဲတၢ်ဒီးအီၤတဂၤ မ့ၢ်တစံးဆၢက့ၤနၤသနာ်က့ ဂုာ်ကျဲးစၢးဆဲးတဲကဒီး ပှၤအဂၤတဂၤတက့ၢ်. ဃ့ယဟိဝၤယွၤလၢ နကအိၣ်ဒီးတၢ်သူၣ်ဒူသးဒူအဂီၢ်တက့ၢ်.—ဃ့. ၂:၄; မၤတၢ်. ၄:၂၉.

• ဖဲတၢ်ခွဲးတၢ်ယာ်အိၣ်ထီၣ်အခါ ဒ်သိးနတဲတၢ်သးခုကစီၣ်ကသ့အဂီၢ် အိၣ်ကတဲာ်ကတီၤနသးထီဘိတက့ၢ်. ဘၣ်ဆၣ်​ တဘၣ်မၤကရီတဂ့ၤ. ဟ့ၣ်အခွဲးတုၤလၢ သုတဲသကိးတၢ် တဂၤဒီးတဂၤမုာ်ထီၣ်တက့ၢ်. နမ့ၢ်တဲတၢ်ဂ့ၢ်ထဲလၢ နအဲၣ်ဒိးတဲတဖၣ်န့ၣ်​ တၢ်ကကၢၣ်ပှၤသး ဒီးအဝဲသ့ၣ်​ တအဲၣ်ဒိးတဲသကိးတၢ်ဒီးနၤလၢၤဘၣ်. တချုးလၢ နစံၣ်တဲၤတဲလီၤအီၤဒံးဘၣ်​ ဒီးသုတၢ်တဲသကိးတၢ်မ့ၢ်ကတၢၢ်ကွံာ် သနာ်က့ တဘၣ်သးဟးဂီၤတဂ့ၤ. နကတဲဘၣ်ပှၤဂၤလၢ တၢ်သးခုကစီၣ်အဂီၢ် နမ့ၢ်ပျံၤတၢ်န့ၣ်​ အဆိကတၢၢ်ပာ်လီၤဖီတၢၣ်လၢ နကမၤလိသ့ထီၣ်နသးလၢ နကစးထီၣ်ကတိၤတၢ်ဒီး ပှၤဂၤအဂီၢ်တက့ၢ်. [ကွၢ်တၢ်ဂီၤမူ ၁ ဝံၤတဲသကိးအီၤ]

• ဒ်သိးနစံၣ်တဲၤတဲလီၤတၢ်ကန့ၢ်အဂီၢ် ဂုာ်ကျဲးစၢး ဒုးအိၣ်ထီၣ်​ တၢ်ခွဲးတၢ်ယာ်ခီဖျိ တဲပၠးပှၤဂၤလၢ နတၢ်စူၢ်တၢ်နာ်အဂ့ၢ်လၢ တၢ်သူၣ်အိၣ်သးအိၣ်အပူၤတက့ၢ်. နမ့ၢ်မၤဒ်န့ၣ်န့ၣ်​ ကထိၣ်ဟူးထိၣ်ဂဲၤထီၣ်​ ပှၤဒိကနၣ်တၢ်ဖိအသး ဒ်သိးအဝဲကမၢ နတဲနၢ်ပၢၢ်အီၤအဂီၢ်လီၤ. ယ့ၣ်ၡူးတဲဝဲတၢ်ဂ့ၢ်လၢ အထိၣ်ဟူးထိၣ်ဂဲၤထီၣ်​ ပိာ်မုၣ်တဂၤအသး ဒ်သိးကသံကွၢ်တၢ်အဂီၢ်လီၤ. ဖဲယ့ၣ်ၡူးတဲဝဲတၢ်သးခုကစီၣ်အခါ ပိာ်မုၣ်တဂၤအံၤ သ့ၣ်ညါဘၣ်ဝဲ အတၢ်သံကွၢ်တဖၣ်​ အတၢ်စံးဆၢတနီၤလံ. [ကွၢ်တၢ်ဂီၤမူ ၂ ဒီးတဲသကိးအီၤဝံၤ, ကွၢ်တၢ်ဂီၤမူ ၃ ဒီးတဲသကိးအီၤ]