အိၣ်မူဒ် ခရံာ်ဖိအသိး
သးစၢ်သ့ၣ်ဧၢ, “သးဆူၣ်လၢတၢ်မၤဂ့ၤတၢ်အဂီၢ်”
လံာ်လၢစီၤပီလူးကွဲးန့ၢ်ဝဲလၢ စီၤတံတူးအဂီၢ်န့ၣ် ပာ်ဖျါထီၣ်ဝဲလၢ စီၤတံတူး ဃုာ်ဒီးပှၤသးစၢ်တဖၣ် ကြၢးဂုာ်ကျဲးစၢးဝဲ ဒ်သိးကကဲထီၣ် “တၢ်မၤဂ့ၤအဒိအတဲာ်လၢ တၢ်ကိးမံၤဒဲးအပူၤ” လီၤ. (တံ. ၂:၆, ၇) ဒီးလၢခံအဆၢဒိၣ်တဆၢဃီအပူၤန့ၣ် တဲဝဲလၢ ယဟိဝၤယွၤ အခ့အပှၤတဖၣ် ကဘၣ်တၢ်မၤကဆှီအီၤအဃိ အဝဲသ့ၣ် “အသးဆူၣ်လၢတၢ်မၤဂ့ၤတၢ်အဂီၢ်” လီၤ. (တံ. ၂:၁၄) တၢ်မၤဂ့ၤတၢ်တမံၤန့ၣ် မ့ၢ်ဝဲ တၢ်စံၣ်တဲၤတဲလီၤ ဒီးတၢ်သိၣ်လိနဲၣ်လိတၢ် ဘၣ်ဃးဒီးယွၤအဘီအမုၢ်အဂ့ၢ်လီၤ. နမ့မ့ၢ် ပှၤသးစၢ်တဂၤန့ၣ် နသူနဂံၢ်နဘါလၢ နကမၤပှၤလဲၤလၢညါ မၤစၢၤတၢ် မ့တမ့ၢ် ပှၤလဲၤလၢညါအဂီၢ်ကသ့ဧါ.—ကတိၤ. ၂၀:၂၉.
နမ့ၢ်အဲၣ်ဒိးမၤ ပှၤလဲၤလၢညါန့ၣ် ရဲၣ်လီၤကျဲၤလီၤဒ်သိး နမၤကန့ၢ်အဂီၢ်တက့ၢ်. (လူၤ. ၁၄:၂၈-၃၀) အဒိ, ဖဲနမၤတၢ်စံၣ်တဲၤတဲလီၤတၢ်မၤလၢ ဆၢကတီၢ်လၢပှဲၤအခါ နလုၢ်အီၣ်နသးသမူကသ့ဒ်လဲၣ်. နမၤထီၣ်ဘး ပှၤလဲၤလၢညါ အနၣ်ရံၣ်ကသ့ဒ်လဲၣ်. ဃ့တၢ်မၤစၢၤလၢ ယဟိဝၤယွၤအအိၣ်တက့ၢ်. (စံး. ၃၇:၅) တဲသကိးတၢ်ဒီး နမိၢ်နပၢ် ဒီးပှၤလၢအမၤပှၤလဲၤလၢညါ န့ၢ်ဝဲဂ့ၤဂ့ၤတဖၣ် လၢနတၢ်ရဲၣ်တၢ်ကျဲၤအဂ့ၢ်တက့ၢ်. မ့ၢ်ဝံၤ ဂုာ်ကျဲးစၢးမၤ ဒ်သိးနကတုၤလၢနဖီတၢၣ်အဂီၢ်တက့ၢ်. ယဟိဝၤယွၤ ကဆိၣ်ဂ့ၤ နတၢ်ဂုာ်ကျဲးစၢး ဆူၣ်ဆူၣ်လၢ အတၢ်မၤအပူၤန့ၣ်လီၤ.
ကွၢ်တၢ်ဂီၤမူလၢအခိၣ်တီမ့ၢ်ဝဲ ပှၤသးစၢ်တဖၣ် မၤလၤကပီၤ ယဟိဝၤယွၤ, ဒီးစံးဆၢက့ၤ တၢ်သံကွၢ်လၢ လာ်တဖၣ်အံၤတက့ၢ်–
ပှၤတနီၤနီၤ ကမၤပှၤလဲၤလၢညါအဂီၢ် ထံၣ်ဘၣ်ဝဲ တၢ်ကီတၢ်ခဲ မနုၤတဖၣ်လဲၣ်, ဒီးအဝဲသ့ၣ် မၤဝဲဒ်လဲၣ်.
ဖိတဖၣ် မၤဝဲပှၤလဲၤလၢညါကန့ၢ်အဂီၢ် မိၢ်ပၢ်တဖၣ် မၤစၢၤဝဲကသ့ဒ်လဲၣ်.
ဘၣ်မနုၤအဃိအရ့ဒိၣ်လၢ ပကဘၣ်အိၣ်ဒီး တၢ်ရဲၣ်တၢ်ကျဲၤလၢ တၢ်စံၣ်တဲၤတဲလီၤတၢ်မၤအဂီၢ်လဲၣ်.
တၢ်အိၣ်ဖှိၣ်ဖိတဖၣ် မၤစၢၤ ဒီးဟ့ၣ်ဂံၢ်ဟ့ၣ်ဘါ ပှၤလဲၤလၢညါတဂၤ ကသ့ဒ်လဲၣ်.
ပှၤလဲၤလၢညါတဖၣ် ဒိးန့ၢ်ဘၣ် တၢ်ဆိၣ်ဂ့ၤမနုၤတဖၣ်လဲၣ်.
ယတုၤလၢ ပှၤလဲၤလၢညါအဖီတၢၣ် ကသ့ဒ်လဲၣ်.