ပာ်လီၤဖီတၢၣ်လၢ တၢ်သ့ၣ်နီၣ်ထီၣ်က့ၤ ယ့ၣ်ၡူးအတၢ်သံ အဆၢကတီၢ်အဂီၢ်

ကိးနံၣ်ဒဲးန့ၣ် ယဟိဝၤယွၤ အပှၤဂီၢ်မုၢ်တဖၣ် အိၣ်ခိးကွၢ်လၢ်ဝဲ တၢ်ဆၢကတီၢ်လၢ ကမၤဝဲ တၢ်သ့ၣ်နီၣ်ထီၣ်က့ၤ ယ့ၣ်ၡူးတၢ်သံအမူး. ဖဲတၢ်သ့ၣ်နီၣ်ထီၣ်က့ၤတချုးဘၣ် ဒီးဘၣ်ဝံၤ အနွံတဖၣ်န့ၣ် ပအိၣ်ဒီးတၢ်ခွဲးတၢ်ယာ် လၢပကစံးပတြၢၤ ဒီးစံးဘျုး ယဟိဝၤယွၤ လၢအဟ့ၣ်ပှၤ တၢ်ဟ့ၣ်လၢအမ့ၢ် တၢ်ပှ့ၤက့ၤ. (အ့း ၁:၃, ၇) အဒိ ပဂုာ်ကျဲးစၢးဟးကွဲမုာ် ပှၤအါဂၤ လၢအဝဲသ့ၣ် ကဟဲထီၣ် တၢ်မၤသ့ၣ်နီၣ်ထီၣ်က့ၤ ယ့ၣ်ၡူးအတၢ်သံအဂီၢ်. ပှၤတနီၤဆီတလဲ အတၢ်ရဲၣ်တၢ်ကျဲၤ ဒ်သိးအဝဲသ့ၣ်မၤ ပှၤလဲၤလၢညါမၤစၢၤတၢ် လၢအနၣ်ရံၣ် ၃၀ မ့တမ့ၢ် အနၣ်ရံၣ် ၅၀ ဖဲလါမၢ်ၡး မ့တမ့ၢ် လါအ့ဖြ့ၣ်အဂီၢ်. နအဲၣ်ဒိးမၤအါထီၣ် တၢ်စံၣ်တဲၤတဲလီၤတၢ်မၤ ဖဲတၢ်သ့ၣ်နီၣ်ထီၣ် ယ့ၣ်ၡူးအတၢ်သံအဆၢကတီၢ်ဧါ. နမၤဒ်န့ၣ် ကသ့အဂီၢ် တၢ်မနုၤကမၤစၢၤနၤလဲၣ်.

ညီနုၢ် ပမ့ၢ်ရဲၣ်လီၤကျဲၤလီၤပာ်စၢၤတၢ်န့ၣ် ပမၤတၢ်ကဲထီၣ်လိၣ်ထီၣ် အါတစဲး. (ကတိၤ ၂၁:၅) တယံာ်လၢၤဘၣ်န့ၣ် တၢ်သ့ၣ်နီၣ်ထီၣ် ယ့ၣ်ၡူးအတၢ်သံအဆၢကတီၢ် ကဘၣ်လီၤ. အဃိဆၢကတီၢ်ခဲအံၤန့ၣ် အကဲဝဲ တၢ်ဆၢကတီၢ်အဂ့ၤကတၢၢ် လၢနကစးထီၣ် ရဲၣ်လီၤကျဲၤလီၤတၢ်. ဆိကမိၣ်ထီၣ်ဘၣ်ဃးဒီး နမၤအါထီၣ် တၢ်စံၣ်တဲၤတဲလီၤတၢ်မၤ ဖဲတၢ်သ့ၣ်နီၣ်ထီၣ် ယ့ၣ်ၡူး အတၢ်သံအဆၢကတီၢ် ကသ့ဒ်လဲၣ်. ဒီးဒ်သိးနကတုၤလၢ နဖီတၢၣ်အဂီၢ် နကဘၣ်မၤဒ်လဲၣ်. ဝံၤဒီးဃ့ယဟိဝၤယွၤ တၢ်မၤစၢၤလၢ အကဆိၣ်ဂ့ၤ နတၢ်ဂုာ်ကျဲးစၢး.—၁ ယိၤ ၅:၁၄, ၁၅.

နဆိကမိၣ် နမၤအါထီၣ် တၢ်စံၣ်တဲၤတဲလီၤတၢ်မၤ ဖဲတၢ်သ့ၣ်နီၣ်ထီၣ် ယ့ၣ်ၡူး အတၢ်သံအဆၢကတီၢ် ကသ့ဧါ.