တၢ်မၤလိ ၇
ပအဲၣ်ပပၢ်ယဟိဝၤယွၤ ဒိၣ်မး
“ပအဲၣ်တၢ်ကွံတၢ်လီၤ, အဂ့ၢ်ဒ်အံၤ, အဝဲဒၣ် အဲၣ်ဆိပှၤလီၤ.”—၁ ယိၤဟၣ် ၄:၁၉.
တၢ်သးဝံၣ် ၃ ပတၢ်ဂံၢ်တၢ်ဘါ, ပတၢ်မုၢ်လၢ်, ပတၢ်နာ်န့ၢ်အလီၢ်
တၢ်မၤလိအံၤ အတၢ်တိာ်ပာ်a
၁-၂. ဘၣ်မနုၤအဃိ ယဟိဝၤယွၤအိးထီၣ်ကျဲ လၢပကကဲထီၣ်ဘၣ် အဟံၣ်ဖိဃီဖိအဂီၢ်လဲၣ် ဒီးအဝဲမၤဝဲလၢ ကျဲဒ်လဲၣ်.
ယဟိဝၤယွၤ ကွဲမုာ်ပှၤလၢ ပကပၣ်ဃုာ်လၢ အဟံၣ်ဖိဃီဖိလၢ အဘူၣ်ထီၣ်ဘါထီၣ်အီၤတဖၣ် အကျါလီၤ. အဃိမ့ၢ်တၢ်ခွဲးတၢ်ယာ်လၢ အဂ့ၤဒိၣ်မး တခါလီၤ. ပှၤလၢအပၣ်ဃုာ်လၢ ဟံၣ်ဖိဃီဖိတဒူၣ်အံၤန့ၣ် မ့ၢ်ပှၤလၢ အဟ့ၣ်လုၢ်ထီၣ်အသးလၢ ကစၢ်ယွၤအအိၣ် ဒီးနာ်ဝဲကစၢ်ယွၤ အဖိခွါ အတၢ်ပှ့ၤက့ၤလီၤ. ပဟံၣ်ဖိဃီဖိ တဒူၣ်အံၤ ပှဲၤဒီးတၢ်သးခုလီၤ. ဆၢကတီၢ်ခဲအံၤ ပတၢ်အိၣ်မူ ပှဲၤဒီးတၢ်သးခု ဒီးပဝဲတနီၤန့ၣ် ပအိၣ်ဒီးတၢ်မုၢ်လၢ်လၢ ပကအိၣ်မူဘၣ်လၢ ဟီၣ်ခိၣ်ချၢ လီၤထူလီၤယိာ် ဒီးတနီၤန့ၣ် အိၣ်ဒီးတၢ်မုၢ်လၢ်လၢ ကအိၣ်မူဘၣ် လၢမူခိၣ် လီၤထူလီၤယိာ်လီၤ.
၂ ယဟိဝၤယွၤ အဲၣ်ပှၤဒိၣ်မးအဃိ အဝဲအိးထီၣ်န့ၢ်ပှၤကျဲလၢ ပကအိၣ်ဘၣ်လၢ အဟံၣ်ဖိဃီဖိအကျါလီၤ. ဒ်သိးအဝဲကမၤ ဒ်န့ၣ်အဂီၢ် ဘၣ်တူၢ်ဆါအသး အါမးလီၤ. (ယိၤဟၣ် ၃:၁၆) လံာ်စီဆှံ တဲဝဲလၢသုဘၣ် “တၢ်ပှ့ၤက့ၤသု လၢအပှ့ၤ” လီၤ. (၁ ကရံၣ်သူး ၆:၂၀) ခီဖျိတၢ်ပှ့ၤက့ၤအဃိ ယဟိဝၤယွၤ အိးထီၣ်န့ၢ်ပှၤကျဲ ဒ်သိးပအိၣ်ဒီး တၢ်ရ့လိာ်သးဒီးအီၤ ဘူးဘူးတံၢ်တံၢ် ကသ့အဂီၢ်လီၤ. အဃိ ကစၢ်ယွၤလၢအမ့ၢ် ပှၤလၢအဒိၣ်အထီကတၢၢ် တဂၤအံၤန့ၣ် ပကိးအီၤလၢ ပပၢ်သ့လီၤ. ဒ်တၢ်မၤလိလၢ အပူၤကွံာ်တခါ ပာ်ဖျါထီၣ်ဝဲအသိး ယဟိဝၤယွၤမ့ၢ် ပၢ်လၢအဂ့ၤကတၢၢ်တဂၤလီၤ.
၃. ပကသံကွၢ်ဘၣ် တၢ်သံကွၢ် မနုၤလဲၣ်. (ကွၢ်စ့ၢ်ကီး တၢ်လွံၢ်နၢၣ်လၢအမ့ၢ် “မ့ၢ်ကစၢ်ယွၤ ပာ်သူၣ်ပာ်သးယၤဧါ.”)
၃ ဘၣ်သ့ၣ်သ့ၣ် ပကသံကွၢ်ဘၣ် ဒ်ပှၤကွဲးလံာ်စီဆှံတဂၤ လၢအသံကွၢ်ဝဲလၢ “ယကဟ့ၣ်ကၣ်ယွၤလၢ အမၤဂ့ၤယၤတဂၤလၢ တၢ်ခဲလၢာ်အဃိန့ၣ် လၢမနုၤတမံၤလဲၣ်.” (စံးထီၣ်ပတြၢၤ ၁၁၆:၁၂) နီၢ်ကီၢ်န့ၣ် ပဟ့ၣ်ဆၢက့ၤတၢ်လၢ ပပၢ်လၢမူခိၣ်အအိၣ် လၢာ်တန့ၢ် နီတဘျီဘၣ်. ဘၣ်ဆၣ် ကစၢ်ယွၤ အတၢ်အဲၣ်န့ၣ် ထိၣ်ဟူးထိၣ်ဂဲၤထီၣ်ပှၤလၢ ပကအဲၣ်ဆၢက့ၤအီၤလီၤ. တၢ်မၢဖိယိၤဟၣ် ကွဲးဝဲလၢ “ပအဲၣ်တၢ်ကွံတၢ်လီၤ, အဂ့ၢ်ဒ်အံၤ, အဝဲဒၣ် အဲၣ်ဆိပှၤလီၤ.” (၁ ယိၤဟၣ် ၄:၁၉) ပပာ်ဖျါထီၣ်လၢ ပအဲၣ်ပပၢ်အိၣ်လၢမူခိၣ် ကသ့ဒ်လဲၣ်.
အိၣ်ဘူးဒီး ယဟိဝၤယွၤ
ပပာ်ဖျါထီၣ်လၢ ပအဲၣ်ပပၢ်ယဟိဝၤယွၤဒိၣ်မး ခီဖျိ ပဃ့ဘါထုကဖၣ် လၢအအိၣ်ထီဘိ, ဒိကနၣ် အကလုၢ် ဒီးမၤစၢၤပှၤဂၤဒ်သိး ကအဲၣ်အီၤ (ကွၢ်လံာ်အဆၢ ၄-၁၄)
၄. ဒ် ယၤကိာ် ၄:၈ ပာ်ဖျါထီၣ်ဝဲအသိး ဒ်သိးပကဘူးထီၣ်ဒီး ယဟိဝၤယွၤအဂီၢ် ဘၣ်မနုၤအဃိ ပကဘၣ် ထဲးဂံၢ်ထဲးဘါလဲၣ်.
၄ ယဟိဝၤယွၤ အဲၣ်ဒိးလၢ ပသုးဘူးပသးဆူအအိၣ် ဒီးတဲတၢ်ဒီးအီၤလီၤ. (ဖး ယၤကိာ် ၄:၈ တက့ၢ်.) အဝဲဟ့ၣ်ဂံၢ်ဟ့ၣ်ဘါပှၤလၢ “လၢတၢ်ထုကဖၣ်အဂ့ၢ်န့ၣ် မၤသပှၢ်ပှၢ်တက့ၢ်.” ပမ့ၢ်ဃ့ထုကဖၣ်န့ၣ် အဝဲဒိကနၣ်န့ၢ်ပှၤ ထီဘိလီၤ. (ရိမ့ၤ ၁၂:၁၂) ကစၢ်ယွၤန့ၣ် တၢ်ကဘှံးအသး ဒီးအတၢ်မၤကအါ တုၤဒၣ်လဲာ် အဒိကနၣ်ပှၤ တချုးဘၣ်န့ၣ် တအိၣ်နီတဘျီဘၣ်. ပဝဲသ့ၣ်စ့ၢ်ကီး ပဒိကနၣ် ကစၢ်ယွၤ အကလုၢ် ခီဖျိပဖးအကလုၢ်ကထါ လံာ်စီဆှံ ဒီးလံာ်လဲၢ်လၢ အကမၤစၢၤပှၤ ဒ်သိးပကနၢ်ပၢၢ် လံာ်စီဆှံအဂီၢ်လီၤ. ဒီးပဒိကနၣ် အကလုၢ်ခီဖျိလၢ ဖဲပထီၣ် ခရံာ်ဖိတၢ်အိၣ်ဖှိၣ်အခါ ပဒိကနၣ်တၢ် လီၤတံၢ်လီၤဆဲးန့ၣ်လီၤ. မိၢ်ပၢ်တဖၣ် မ့ၢ်ရ့လိာ်အသးဒီးအဖိ ထီဘိန့ၣ် အဝဲသ့ၣ် အတၢ်ရ့လိာ်သး ကဂ့ၤထီၣ်ဝဲလီၤ. ဒ်န့ၣ်အသိး ပမ့ၢ်တဲတၢ်ဒီး ယဟိဝၤယွၤ ထီဘိန့ၣ် ကမၤစၢၤပှၤဒ်သိး ပကဘူးထီၣ်ဒီးအီၤအဂီၢ်လီၤ.
ကွၢ်လံာ်အဆၢ ၅
၅. ဒ်သိးယဟိဝၤယွၤ ကဘၣ်သူၣ်ဘၣ်သး ပတၢ်ထုကဖၣ်အဂီၢ် ပမၤဂ့ၤထီၣ် ပတၢ်ထုကဖၣ် ကသ့ဒ်လဲၣ်.
၅ ဆိကမိၣ်ကွၢ် ဘၣ်ဃးဒီး နတၢ်ဃ့ထုကဖၣ်လၢ ယဟိဝၤယွၤအအိၣ်န့ၣ် လီၤဂာ်ဒ်လဲၣ်န့ၣ်တက့ၢ်. ဖဲပဃ့ဘါထုကဖၣ်တၢ်အခါ ယဟိဝၤယွၤ အဲၣ်ဒိးလၢ ပကတဲဘၣ်အီၤ ပတၢ်ဆိကမိၣ် ဒီးပတၢ်တူၢ်ဘၣ်တဖၣ်လီၤ. (စံးထီၣ်ပတြၢၤ ၆၂:၈) အဃိ ပကြၢးသံကွၢ်လီၤပသးလၢ ‘မ့ၢ်ယတၢ်ဃ့ထုကဖၣ်န့ၣ် လီၤဂာ်ဒ်သိး ယကွဲးကူ ပှၤတဂၤဂၤ အလံာ်ဧါ မ့တမ့ၢ် အလီၤဂာ်ဒ် ယကွဲးလီၤ ယတၢ်တူၢ်ဘၣ်လၢ လံာ်ပူၤဧါ.’ ပနာ်သပှၢ်ကတၢၢ်လၢ နအဲၣ်ယဟိဝၤယွၤဒိၣ်မး ဒီးနအဲၣ်ဒိးလၢ နတၢ်ရ့လိာ်သးဒီးအီၤ ဂၢၢ်ကျၢၤထီဘိလီၤ. နမ့ၢ်အဲၣ်ဒိးမၤ ဒ်န့ၣ်န့ၣ် နကဘၣ်တဲတၢ်ဒီးအီၤ ထီဘိလီၤ. တဲဘၣ်အီၤ နတၢ်တူၢ်ဘၣ်တဖၣ်တက့ၢ်. ဒီးတၢ်လၢ အမၤသးခုနၤမ့ၢ်ဂ့ၤ, တၢ်လၢအမၤသူၣ်ကိၢ်သးဂီၤနၤမ့ၢ်ဂ့ၤ တဲဘၣ်အီၤတက့ၢ်. ဒီးနာ်လၢ နဃ့တၢ်မၤစၢၤလၢအအိၣ် သ့န့ၣ်တက့ၢ်.
၆. ဒ်သိးပကဘူးထီၣ်ဒီး ပပၢ်ယွၤအဂီၢ် ပကဘၣ်မၤဒ်လဲၣ်.
၆ ဒ်သိးပကဆဲးအိၣ်ဘူးဒီး ပပၢ်အိၣ်လၢမူခိၣ်အဂီၢ် ပကဘၣ်စံးဘျုးစံးဖှိၣ်အီၤ ထီဘိလီၤ. ဒီးပတူၢ်ဘၣ်ဒ် ပှၤကွဲးထါစံးထီၣ်ပတြၢၤတဂၤ လၢအတဲဝဲလၢ “ယွၤကစၢ်ဧၢ, နမၤလီၤလးတၢ်, ဒီးနဆိကမိၣ်တၢ်လၢ ပဂီၢ်အါမံၤလီၤ. ဘၣ်တၢ်ကျဲၤလီၤအီၤလၢ နမဲာ်ညါ တသ့ဘၣ်, ယမ့ၢ်ကိးထီၣ်ဒီး ဒုးနဲၣ်အဂ့ၢ်ဒီး, အါန့ၢ်ပဂံၢ်သ့တက့ၢ်လီၤ.” (စံးထီၣ်ပတြၢၤ ၄၀:၅) တမ့ၢ်ထဲ ပတူၢ်ဘၣ်လၢ ပစံးဘျုးစံးဖှိၣ် ယဟိဝၤယွၤဘၣ်, ပပာ်ဖျါထီၣ်လၢ ပစံးဘျုးစံးဖှိၣ်အီၤ ခီဖျိလၢ တၢ်ကတိၤဒီးတၢ်မၤတဖၣ်လီၤ. လၢတၢ်န့ၣ်အဃိ ပလီၤဆီဒီး ပှၤအါဂၤလၢ ဟီၣ်ခိၣ်ချၢအံၤလီၤ. ပအိၣ်မူဘၣ်လၢ ပှၤအါဂၤလၢ အတစံးဘျုးစံးဖှိၣ် ကစၢ်ယွၤအကျါလီၤ. အဃိ မ့ၢ်ဝဲတၢ်အုၣ်အသးတခါလၢ ပအိၣ်မူဘၣ်လၢ “မုၢ်နံၤအခံကတၢၢ်တဖၣ်” အဆၢကတီၢ် လၢပှၤအါဂၤ တသ့ၣ်ညါဆၢက့ၤ တၢ်ဘျုးတၢ်ဖှိၣ်ဘၣ်န့ၣ်လီၤ. (၂ တံၤမသ့း ၃:၁, ၂) ပတအဲၣ်ဒိးမ့ၢ် ပှၤဒ်န့ၣ်ဘၣ်.
၇. ယဟိဝၤယွၤ အဲၣ်ဒိးလၢ ပကမၤတၢ်မနုၤလဲၣ် ဒီးဘၣ်မနုၤအဃိလဲၣ်.
၇ မိၢ်ပၢ်တဖၣ်န့ၣ် တအဲၣ်ဒိးလၢ အဖိတဖၣ် ကအ့ၣ်လိာ်အသးဘၣ်, အဝဲသ့ၣ် အဲၣ်ဒိးလၢ အဖိတဖၣ် ကအဲၣ်လိာ်ကွံလိာ်အသးလီၤ. ဒ်န့ၣ်အသိး ယဟိဝၤယွၤ အဲၣ်ဒိးလၢ အဖိအလံၤတဖၣ် ကအဲၣ်လိာ်ကွံလိာ်အသး တဂၤဒီးတဂၤလီၤ. ဒီးပမ့ၢ်အဲၣ်လိာ်ကွံလိာ်ပသးန့ၣ် မ့ၢ်ဒၣ်ပပာ်ဖျါထီၣ်လၢ ပမ့ၢ်ခရံာ်ဖိနီၢ်နီၢ်တဖၣ်လီၤ. (ယိၤဟၣ် ၁၃:၃၅) ပတူၢ်ဘၣ်ဒ် ပှၤကွဲးထါစံးထီၣ်ပတြၢၤတဂၤ လၢအကွဲးဝဲလၢ “ဒီပုၢ်ဝဲၢ် အိၣ်ဝဲဆိးဝဲလၢ အသးတဖျၢၣ်ဃီအံၤ, ဂ့ၤဆံးဒိၣ်လဲၣ်, ဒီးမုာ်ဆံးဒိၣ်လဲၣ် ဆံးဒိၣ်လဲၣ်” န့ၣ်လီၤ. (စံးထီၣ်ပတြၢၤ ၁၃၃:၁) ပမ့ၢ်အဲၣ် ပဒီပုၢ်ဝဲၢ်မုၣ်ခွါတဖၣ်န့ၣ် မ့ၢ်ဒၣ်ပပာ်ဖျါထီၣ်လၢ ပအဲၣ်ယဟိဝၤယွၤလီၤ. (၁ ယိၤဟၣ် ၄:၂၀) ပအိၣ်ဘၣ်လၢ ဟံၣ်ဖိဃီဖိတဒူၣ်လၢ အပှဲၤဒီး ဒီပုၢ်ဝဲၢ်မုၣ်ခွါတဖၣ်လၢအ ‘ဝံသးစူၤလိာ်အသး, သူၣ်ကညီၤသးကညီၤလိာ်အသး’ အဃိ ပသးခုဒိၣ်မးလီၤ.—အ့းဖ့းစူး ၄:၃၂.
ပာ်ဖျါထီၣ်နတၢ်အဲၣ် ခီဖျိလၢ တၢ်ဒိကနၣ်
ကွၢ်လံာ်အဆၢ ၈
၈. ဒ် ၁ ယိၤဟၣ် ၅:၃ တဲဝဲအသိး တၢ်ဂ့ၢ်အရ့ဒိၣ်ကတၢၢ်တမံၤလၢ ပဒိကနၣ် ယဟိဝၤယွၤအကလုၢ်န့ၣ် မ့ၢ်မနုၤလဲၣ်.
၈ ဒ်ယဟိဝၤယွၤ အဲၣ်ဒိးလၢ ဖိသ့ၣ်တဖၣ် ကဒိကနၣ် အမိအပါအကလုၢ်အသိး အဝဲအဲၣ်ဒိးလၢ ပကဒိကနၣ် အကလုၢ်လီၤ. (အ့းဖ့းစူး ၆:၁) ဒီးအဝဲမ့ၢ် ပှၤလၢအတ့လီၤပှၤ, အဟ့ၣ်လီၤပှၤ သးသမူ ဒီးမ့ၢ်ပှၤလၢ အကူၣ်တၢ်သ့ ဒိၣ်န့ၢ်ဒံး မိၢ်ပၢ်ခဲလၢာ်အဃိ ပကြၢးဒိကနၣ် အကလုၢ်လီၤ. ဘၣ်ဆၣ် တၢ်ဂ့ၢ်အရ့ဒိၣ်ကတၢၢ်တမံၤလၢ ပဒိကနၣ် ယဟိဝၤယွၤ အကလုၢ်န့ၣ် မ့ၢ်လၢပအဲၣ်အီၤအဃိလီၤ. (ဖး ၁ ယိၤဟၣ် ၅:၃ တက့ၢ်.) ဘၣ်မနုၤအဃိ ပကြၢးဒိကနၣ် ယဟိဝၤယွၤ အကလုၢ်လဲၣ်န့ၣ် တၢ်ဂ့ၢ်အိၣ်ဝဲ အါမးလီၤ. ဘၣ်ဆၣ် အဝဲတမၢဆူၣ်ပှၤလၢ ပကဒိကနၣ်အကလုၢ်ဘၣ်. ယဟိဝၤယွၤ ဟ့ၣ်ပှၤတၢ်သဘျ့ ဒီးပမ့ၢ်ဃုထၢလၢ ပကဒိကနၣ်အကလုၢ် ခီဖျိလၢ ပအဲၣ်အီၤအဃိန့ၣ် အဝဲသးခုဒိၣ်မးလီၤ.
၉-၁၀ ပကဘၣ်သ့ၣ်ညါ ကစၢ်ယွၤအတၢ်သိၣ်တၢ်သီ ဒီးအိၣ်မူမၤထွဲအီၤန့ၣ် ဘၣ်မနုၤအဃိ မ့ၢ်တၢ်လၢအရ့ဒိၣ်လဲၣ်.
၉ မိၢ်ပၢ်သ့ၣ်တဖၣ်န့ၣ် အဲၣ်ဒိးလၢ အဖိတဖၣ် ကအိၣ်ဘၣ် ဘံၣ်ဘံၣ်ဘၢဘၢလီၤ. လၢတၢ်န့ၣ်အဃိ အဝဲသ့ၣ် ပာ်လီၤတၢ်သိၣ်တၢ်သီလၢ ကဒီသဒၢ အဖိတဖၣ်အဂီၢ်လီၤ. ဖဲဖိတဖၣ် ဒိကနၣ် အမိၢ်အပၢ် အတၢ်ဟံးစုနဲၣ်ကျဲအခါ မ့ၢ်ဒၣ်အဝဲသ့ၣ် ပာ်ဖျါထီၣ်ဝဲလၢ အဝဲသ့ၣ် နာ်အီၣ်ဒီးပာ်ကဲ အမိၢ်အပၢ်လီၤ. လၢတၢ်န့ၣ်အဃိ ပကဘၣ် သ့ၣ်ညါပပၢ်အိၣ်လၢမူခိၣ် အတၢ်သိၣ်တၢ်သီ ဒီးမၤထွဲအီၤန့ၣ် မ့ၢ်တၢ်လၢ အရ့ဒိၣ်န့ၢ်အန့ၣ် စၢၢ်တလၢၢ်လီၤ. ပမ့ၢ်မၤဒ်န့ၣ်န့ၣ် မ့ၢ်ဒၣ်ပပာ်ဖျါထီၣ်လၢ ပအဲၣ်ယဟိဝၤယွၤ ဒီးပာ်ကဲအီၤလီၤ. တကးဒံးဘၣ် ပကဒိးန့ၢ်ဘၣ်အဘျုး စ့ၢ်ကီးလီၤ. (ယၡါယၤ ၄၈:၁၇, ၁၈) ဘၣ်ဆၣ် မ့မ့ၢ်ပှၤလၢ အတကနၣ်ဃုာ် ယဟိဝၤယွၤ ဒီးအတၢ်ဟံးစုနဲၣ်ကျဲတဖၣ်န့ၣ် လၢခံကတၢၢ် အဝဲသ့ၣ် ထံၣ်ဘၣ်ဒီး တၢ်ကီတၢ်ခဲလီၤ.—ကလၤတံ ၆:၇, ၈.
၁၀ ပမ့ၢ်အိၣ်မူဒ် တၢ်ဘၣ်ယဟိဝၤယွၤအသးန့ၣ် မ့ၢ်ဒၣ်ပဒီသဒၢလီၤ ပသးလၢ တၢ်လၢအကမၤဘၣ်ဒိ ပနီၢ်ခိ, ပသးအတၢ်တူၢ်ဘၣ် ဒီးပတၢ်ရ့လိာ်သးဒီးကစၢ်ယွၤန့ၣ်လီၤ. ယဟိဝၤယွၤသ့ၣ်ညါ တၢ်အဂ့ၤကတၢၢ် လၢပဂီၢ်လီၤ. အီးရိရၤ လၢအအိၣ်လၢ ကီၢ်အမဲရကၤန့ၣ် တဲဝဲလၢ “ယသ့ၣ်ညါလၢ ပမ့ၢ်ဒိကနၣ် ယဟိဝၤယွၤအကလုၢ်န့ၣ် ပကအိၣ်ဒီး တၢ်အိၣ်မူလၢ အဂ့ၤကတၢၢ် ထီဘိလီၤ.” ပဝဲခဲလၢာ် ပထံၣ်ဘၣ်လၢ တၢ်ကတိၤအံၤ ဘၣ်သပှၢ်တၢၢ်လီၤ. မ့မ့ၢ်နၤန့ၣ် ခီဖျိလၢ နဒိကနၣ် ယဟိဝၤယွၤ အကလုၢ်အဃိ နဒိးန့ၢ်ဘၣ်အဘျုး ဒ်လဲၣ်.
၁၁. တၢ်ထုကဖၣ် ကမၤစၢၤပှၤဒ်လဲၣ်.
၁၁ တၢ်ထုကဖၣ် မၤစၢၤပှၤဒ်သိး ပကအိၣ်ဒီး တၢ်ဒိကနၣ် ဖဲအကီလၢပဂီၢ်အခါ ဒၣ်လဲာ်န့ၣ်လီၤ. မ့ၢ်လၢပမ့ၢ် ပှၤတၢ်ဒဲးဘးဖိအဃိ တဘျီတခီၣ် ကီလၢပကဒိကနၣ် ယဟိဝၤယွၤအကလုၢ် သနာ်က့ ပကဘၣ် ထဲးဂံၢ်ထဲးဘါ ဒ်သိးပကဒိကနၣ် အကလုၢ်အဂီၢ်လီၤ. ပှၤကွဲး ထါစံးထီၣ်ပတြၢၤတဂၤ ဃ့ကညး ကစၢ်ယွၤလၢအက “မၤစၢၤ” အီၤဒ်သိးအကအိၣ်ဒီး “သးလၢအမၤဒၣ်တၢ် [မ့တမ့ၢ် သးလၢအဒိကနၣ်တၢ်]” လီၤ. (စံးထီၣ်ပတြၢၤ ၅၁:၁၂) ဒဲနံး(စ်) လၢအမၤ ပှၤလဲၤလၢညါတဂၤန့ၣ် တဲဝဲလၢ “ဖဲအကီလၢ ယကမၤထွဲ ယဟိဝၤယွၤ အတၢ်သိၣ်တၢ်သီအခါ ယဃ့ထုကဖၣ် ဒ်သိးယကအိၣ်ဒီး တၢ်သးဆူၣ် လၢယကမၤ တၢ်အဘၣ်အဂီၢ်လီၤ.” ပနာ်သ့သပှၢ်ကတၢၢ်လၢ ယဟိဝၤယွၤ ကစံးဆၢ တၢ်ထုကဖၣ် ဒ်အံၤတဖၣ် ထီဘိလီၤ.—လူၤကၣ် ၁၁:၉-၁၃.
မၤစၢၤပှၤဂၤဒ်သိး အဝဲသ့ၣ် ကအဲၣ်ပပၢ်သးဘိ
၁၂. ဒ် အ့းဖ့းစူး ၅:၁ တဲဝဲအသိး ပကြၢးမၤ တၢ်မနုၤလဲၣ်.
၁၂ ဖး အ့းဖ့းစူး ၅:၁ တက့ၢ်. ဒ်ပမ့ၢ်ယဟိဝၤယွၤအ “ဖိသးဘိ” အသိး ပကွၢ်လိမၤဒိးအီၤ လၢအဂ့ၤကတၢၢ်လီၤ. ပပာ်ဖျါထီၣ် ကစၢ်ယွၤအတၢ်ဂ့ၤတၢ်ဝါတဖၣ် ခီဖျိပရ့ဒီးပှၤဂၤလၢ တၢ်အဲၣ်တၢ်ကွံ, တၢ်သးကညီၤ ဒီးပျၢ်ပှၤဂၤအတၢ်ကမၣ်န့ၣ်လီၤ. ပမ့ၢ်မၤဒ်န့ၣ်န့ၣ် ဖဲပှၤလၢအတသ့ၣ်ညါ ကစၢ်ယွၤတဖၣ် ထံၣ်ဘၣ်ဝဲ ပတၢ်မၤလၢ အဂ့ၤတဖၣ်အခါ အဝဲသ့ၣ် ကအဲၣ်ဒိးသ့ၣ်ညါအါထီၣ် ကစၢ်ယွၤအဂ့ၢ်လီၤ. (၁ ပ့းတရူး ၂:၁၂) ခရံာ်ဖိမိၢ်ပၢ်တဖၣ်စ့ၢ်ကီး ကဘၣ်ဂုာ်ကျဲးစၢး ရ့ဒီးအဖိဒ် ယဟိဝၤယွၤ ရ့ဒီးပှၤအသိးလီၤ. အဝဲသ့ၣ် မ့ၢ်မၤဒ်န့ၣ်န့ၣ် အဖိတဖၣ်စ့ၢ်ကီး ကအဲၣ်ဒိး အိၣ်ဒီးတၢ်ရ့လိာ်သးဒီး ပပၢ်လၢအပှဲၤဒီး တၢ်အဲၣ်တၢ်ကွံတဂၤအံၤလီၤ.
ကွၢ်လံာ်အဆၢ ၁၃
၁၃. နမၤအါထီၣ် နတၢ်သူၣ်ဒူသးဒူ ကသ့ဒ်လဲၣ်.
၁၃ ညီနုၢ်န့ၣ် ပှၤဖိသၣ်တဖၣ် ပာ်ကဖၢလၢအသးလၢ အပၢ်အဃိ ဒီးအဝဲသ့ၣ် အဲၣ်ဒိးတဲဘၣ်ပှၤဂၤ လၢအပၢ်အဂ့ၢ်လီၤ. ဒ်န့ၣ်အသိး ပပာ်ကဖၢလၢပသးလၢ ပပၢ်ယဟိဝၤယွၤအဃိ ဒီးပအဲၣ်ဒိးလၢ ပှၤဂၤကသ့ၣ်ညါအီၤလီၤ. ပဝဲခဲလၢာ် ပတူၢ်ဘၣ်ဒ် စီၤပၤဒၤဝံး လၢအကွဲးဝဲလၢ “ယသးကပာ်ကဖိအသး လၢယွၤအပူၤ” လီၤ. (စံးထီၣ်ပတြၢၤ ၃၄:၂) နကတဲ ယဟိဝၤယွၤအဂ့ၢ်အဂီၢ် ဘၣ်သ့ၣ်သ့ၣ် နမဲာ်ကဆှးလီၤ. မ့မ့ၢ်ဒ်န့ၣ်န့ၣ် နအိၣ်ဒီး တၢ်သးဒူ ကသ့ဒ်လဲၣ်. ဆိကမိၣ်ဘၣ်ဃးဒီး နမ့ၢ်တဲဘၣ်ပှၤဂၤလၢ ယဟိဝၤယွၤအဂ့ၢ်န့ၣ် အဝဲကသးခု ထဲလဲၣ် ဒီးပှၤဂၤစ့ၢ်ကီး ကဒိးန့ၢ်ဘၣ်အဘျုး ဒ်လဲၣ်န့ၣ်တက့ၢ်. နမ့ၢ်မၤဒ်န့ၣ်န့ၣ် နကအိၣ်ဒီး တၢ်သးဒူလီၤ. ယဟိဝၤယွၤ ကဟ့ၣ်ပှၤ တၢ်သးဒူ လၢပလိၣ်ဘၣ်အီၤတဖၣ်န့ၣ်လီၤ. အဝဲမၤစၢၤဝဲ ခရံာ်ဖိလၢပျၢၤတဖၣ် ဒ်သိးကအိၣ်ဒီးတၢ်သးဒူအဃိ ပနာ်သ့လၢ အကမၤစၢၤပှၤ စ့ၢ်ကီးလီၤ.—၁ သ့းစၤလနံ ၂:၂.
၁၄. ပကဘၣ် လဲၤဒုးကဲထီၣ်ပှၤဂၤ လၢခရံာ်အပျဲၢ်အဘီၣ်န့ၣ် ဘၣ်မနုၤအဃိ မ့ၢ်တၢ်လၢအရ့ဒိၣ်လဲၣ်.
၁၄ ယဟိဝၤယွၤ တကွၢ်ဒိၣ်ဆံးအါစှၤတၢ်ဘၣ်, အဃိဖဲအဝဲထံၣ်ဝဲလၢ ပပာ်ဖျါထီၣ် တၢ်အဲၣ်လၢ ပှၤတဂၤဂ့ၤတဂၤဂ့ၤ အဖီခိၣ်အခါ အသးခုဝဲလီၤ. (မၤတၢ် ၁၀:၃၄, ၃၅) ကျဲအဂ့ၤကတၢၢ်တဘိ လၢပပာ်ဖျါထီၣ်လၢ ပအဲၣ်ပှၤဂၤန့ၣ် မ့ၢ်ဝဲပစံၣ်တဲၤတဲလီၤ အဝဲသ့ၣ် လၢတၢ်သးခုကစီၣ်လီၤ. (မးသဲ ၂၈:၁၉, ၂၀) ခီဖျိလၢ ပစံၣ်တဲၤတဲလီၤတၢ်အဃိ ကဲဘျုးလၢ ပှၤဂၤအဂီၢ်ဒ်လဲၣ်. ဆၢကတီၢ်ခဲအံၤ ပှၤလၢအဒိကနၣ်တၢ်တဖၣ်န့ၣ် အိၣ်ဒီးတၢ်အိၣ်မူ လၢအဂ့ၤသ့ ဒီးအိၣ်ဒီးတၢ်မုၢ်လၢ်လၢ ကအိၣ်မူဘၣ်လၢ ဟီၣ်ခိၣ်ပၤရဒံစူးအပူၤ သ့စ့ၢ်ကီးလီၤ.—၁ တံၤမသ့း ၄:၁၆.
ပမ့ၢ်အဲၣ် ပပၢ်သးဘိန့ၣ် ပကအိၣ်ဒီးတၢ်သးခု
၁၅-၁၆ ဘၣ်မနုၤအဃိ ပသးခုလဲၣ်.
၁၅ ယဟိဝၤယွၤမ့ၢ် ပၢ်လၢအပှဲၤဒီး တၢ်အဲၣ်တၢ်ကွံအဃိ အဝဲအဲၣ်ဒိးလၢ အဟံၣ်ဖိဃီဖိတဖၣ် ကအိၣ်ဒီး တၢ်သးခုလီၤ. (ယၡါယၤ ၆၅:၁၄) ဆၢကတီၢ်ခဲအံၤ ပမ့ၢ်ထံၣ်ဘၣ်ဒီး တၢ်ကီတၢ်ခဲဒၣ်လဲာ် ပအိၣ်ဒီးတၢ်ဂ့ၢ်အါမံၤ လၢအမၤသးခုပှၤလီၤ. အဒိ ပသ့ၣ်ညါလီၤတံၢ်လၢ ပပၢ်လၢမူခိၣ် အဲၣ်ပှၤဒိၣ်မးလီၤ. ပသ့ၣ်ညါဘၣ် တၢ်မ့ၢ်တၢ်တီလၢ ဘၣ်ဃးဒီး ကစၢ်ယွၤအကလုၢ်ကထါ လံာ်စီဆှံလီၤ. (ယံးရမံယၤ ၁၅:၁၆) ဒီးပအိၣ်ဘၣ်လၢ ဟံၣ်ဖိဃီဖိလၢ အလီၤဆီတဒူၣ်လၢ အအဲၣ်ယဟိဝၤယွၤ, အအိၣ်မူဒ် ကစၢ်ယွၤ အတၢ်သိၣ်တၢ်သီ ဒီးအအဲၣ်လိာ်ကွံလိာ်အသး တဂၤဒီးတဂၤ အကျါလီၤ.—စံးထီၣ်ပတြၢၤ ၁၀၆:၄, ၅.
၁၆ မ့ၢ်လၢပသ့ၣ်ညါလၢ ခါဆူညါန့ၣ် ပကဒိးန့ၢ်ဘၣ် တၢ်အိၣ်မူလၢ အဂ့ၤဒိၣ်မးအဃိ ပအိၣ်ဒီးတၢ်သးခုသ့ ထီဘိလီၤ. ဒီးပသ့ၣ်ညါလၢ တယံာ်လၢၤဘၣ်န့ၣ် ယဟိဝၤယွၤ ကမၤလီၤမၢ်ကွံာ် တၢ်အၢတၢ်သီခဲလၢာ် ဒီးလၢအဘီအမုၢ် အတၢ်ပၢဖီလာ်န့ၣ် အဝဲကမၤကဲထီၣ်က့ၤ ပၤရဒံစူးန့ၣ်လီၤ. တကးဒံးဘၣ် ပအိၣ်ဒီးတၢ်မုၢ်လၢ်လၢ ပကထံၣ်ဘၣ်က့ၤ ပှၤလၢအသံတ့ၢ်တဖၣ် ဟဲက့ၤဂဲၤဆၢထၢၣ်သမူထီၣ်က့ၤ ဒီးအဝဲသ့ၣ် ကအိၣ်ဘၣ်က့ၤဒီး ပှၤလၢအအဲၣ်ဘၣ်ဝဲတဖၣ်လီၤ. (ယိၤဟၣ် ၅:၂၈, ၂၉) အဃိ ကမ့ၢ်တၢ်ဆၢကတီၢ် လၢအလီၤသးခုဒိၣ်မးလီၤ. ဒီးတၢ်လၢအရ့ဒိၣ်ကတၢၢ်န့ၣ် ပသ့ၣ်ညါဘၣ်လၢ တယံာ်လၢၤဘၣ် ပှၤကိးဂၤဒဲးလၢ မူခိၣ်မ့ၢ်ဂ့ၤ ဟီၣ်ခိၣ်မ့ၢ်ဂ့ၤ ကမၤလၤကပီၤ, ကစံးထီၣ်ပတြၢၤ ဒီးကဘူၣ်ထီၣ်ဘါထီၣ် ပပၢ်သးဘိလီၤ.
တၢ်သးဝံၣ် ၁၂ ကစၢ်ယဟိဝၤယွၤ
a ပသ့ၣ်ညါလၢ ပပၢ်ယဟိဝၤယွၤ အဲၣ်ပှၤဒိၣ်မး ဒီးမိၤဃီၤပှၤလၢ အဟံၣ်ဖိဃီဖိလၢ အဘူၣ်ထီၣ်ဘါထီၣ်အီၤ အကျါလီၤ. လၢတၢ်န့ၣ်အဃိ ပအဲၣ်အီၤလီၤ. တၢ်မၤလိတခါအံၤ ကပာ်ဖျါထီၣ်န့ၢ်ပှၤ တၢ်ဂ့ၢ်လီၤတံၢ်လီၤဆဲး လၢဘၣ်ဃးဒီး ပပာ်ဖျါထီၣ်လၢ ပအဲၣ်ပပၢ် ကသ့ဒ်လဲၣ်န့ၣ်လီၤ.