ပိာ်ခွါသးစၢ်သ့ၣ်ဧၢ, နဒိးန့ၢ်အါထီၣ်​ ပှၤဂၤအတၢ်နာ်န့ၢ်နၤ ကသ့ဒ်လဲၣ်

၁. ပဒီပုၢ်ဝဲၢ်ခွါသးစၢ်တဖၣ်​ မၤတၢ်မနုၤသ့လဲၣ်.

ဒီပုၢ်ဝဲၢ်ခွါသးစၢ်တဖၣ်​ လၢတၢ်အိၣ်ဖှိၣ်အပူၤန့ၣ်​ အဝဲသ့ၣ်မၤစၢၤတၢ်သ့အါမးလီၤ. အဝဲသ့ၣ်အါဂၤ အဂံၢ်ဆူၣ်ဘါဆူၣ်​ ဒီးအိၣ်ဒီးအဂံၢ်အဘါ လၢလၢပှဲၤပှဲၤလီၤ. (ကတိၤဒိ ၂၀:၂၉) နမၤစၢၤ ဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်အပူၤသ့အါမးလီၤ. ဘၣ်သ့ၣ်သ့ၣ်​ နဆၢမုၢ်လၢ်လၢ နကကဲထီၣ်ဘၣ်​ တၢ်အိၣ်ဖှိၣ်အပှၤမၤစၢၤတၢ်လီၤ. ဘၣ်ဆၣ်​ နကတူၢ်ဘၣ်လၢ နကဘၣ်ဖီၣ်ထီၣ်မူဒါ လၢအရ့ဒိၣ်တဖၣ်အံၤန့ၣ်​ ပှၤကထံၣ်နၤလၢ နသးစၢ်တလၢ ဒီးနတၢ်လဲၤခီဖျိတအိၣ်ဘၣ်. နမ့မ့ၢ် ပှၤလၢအသးစၢ်ဒၣ်လဲာ် ခဲအံၤတၢ်လၢနမၤအီၤသ့ ဒ်သိးနကဒိးန့ၢ်အါထီၣ်​ ပှၤဂၤတၢ်နာ်န့ၢ်နၤ ဒီးတၢ်ပာ်ကဲနၤ လၢတၢ်အိၣ်ဖှိၣ်အပူၤန့ၣ်​ အိၣ်ဝဲလီၤ.

၂. လၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်.

^၂ လၢတၢ်မၤလိအံၤအပူၤ ပကတဲသကိး စီၤပၤဒၤဝံးအတၢ်အိၣ်မူအဂ့ၢ်လီၤ. ဒီးပကတဲသကိးစ့ၢ်ကီး ပှၤယူဒၤဖိအစီၤပၤခံဂၤ လၢအမ့ၢ်ဝဲ စီၤအၤစါ ဒီးစီၤယဟိၡၤဖးအဂ့ၢ်လီၤ. အဝဲသ့ၣ်ထံၣ်ဘၣ်ဒီး တၢ်ကီတၢ်ခဲဒ်လဲၣ်​ ဒီးဖဲအဝဲသ့ၣ်ထံၣ်ဘၣ်ဒီး တၢ်ကီတၢ်ခဲအခါ အဝဲသ့ၣ်မၤဝဲဒ်လဲၣ်န့ၣ်​ ပကတဲသကိးအီၤလီၤ. ဒီးဒီပုၢ်ဝဲၢ်ခွါသးစၢ်တဖၣ်​ မၤလိန့ၢ်တၢ်လၢ အဝဲသ့ၣ်အဒိအတဲာ် ကသ့ဒ်လဲၣ်

မၤလိန့ၢ်တၢ်လၢ စီၤပၤဒၤဝံးအအိၣ်

၃. ဒီပုၢ်ဝဲၢ်သးစၢ်တဖၣ်​ မၤစၢၤဝဲ ဒီပုၢ်ဝဲၢ်သးပှၢ်လၢ တၢ်အိၣ်ဖှိၣ်အပူၤ ကသ့လၢကျဲဒ်လဲၣ်.

^၃ ဖဲစီၤဒၤဝံးသးစၢ်အခါ အအိၣ်ဒီးတၢ်သ့တၢ်ဘၣ်အါမးလီၤ. အဝဲမ့ၢ်ပှၤလၢ အတၢ်ရ့လိာ်သးဒီး ယဟိဝၤယွၤဂ့ၤ ဒီးတကးဒံးဘၣ်​ အဒ့တနၢ်သ့အဃိ အဝဲသူဝဲအတၢ်သ့တၢ်ဘၣ်အံၤလၢ ကမၤစၢၤဝဲ စီၤပၤစီလူးလၢ ကစၢ်ယွၤပာ်ထီၣ်အီၤန့ၣ်လီၤ. (၁ ၡမူၤအ့လး ၁၆:၁၆, ၂၃) ဒီပုၢ်ဝဲၢ်ခွါသးစၢ်တဖၣ်​ မ့ၢ်နအိၣ်ဒီးတၢ်သ့တၢ်ဘၣ်လၢ ကကဲဘျုးလၢပှၤဂၤအဂီၢ်လၢ တၢ်အိၣ်ဖှိၣ်အပူၤစ့ၢ်ကီးဧါ. သုဝဲသ့ၣ်အါဂၤ သုအိၣ်ဒီးတၢ်သ့တၢ်ဘၣ်တဖၣ်လီၤ. အဒိ, ဒီပုၢ်ဝဲၢ်သးပှၢ်တဖၣ်​ ကစံးဘျုးနၤ ဖဲနမၤစၢၤအဝဲသ့ၣ်လၢ အကသ့ၣ်ညါသူ ထဲးဘလဲး ဒီးအံၣ်လဲးထြီနံး တၢ်ပီးတၢ်လီတဖၣ်လၢ ကမၤနီၢ်ကစၢ်တၢ်မၤလိလံာ်စီဆှံဒီး တၢ်အိၣ်ဖှိၣ်အတၢ်ရဲၣ်တၢ်ကျဲၤတဖၣ်လီၤ. ခီဖျိလၢ နသူတၢ်ပီးတၢ်လီသ့ၣ်တဖၣ်အံၤသ့ဂ့ၤဂ့ၤအဃိ ကဲဘျုးလၢ ဒီပုၢ်ဝဲၢ်သးပှၢ်တဖၣ်အံၤအဂီၢ်လီၤ.

၄. ဒ်စီၤဒၤဝံးအသိး တၢ်ဂ့ၤတၢ်ဝါတဖၣ်လၢ ဒီပုၢ်ဝဲၢ်ခွါသးစၢ်သ့ၣ်တဖၣ်​ ကဘၣ်မၤအိၣ်ထီၣ်ဝဲန့ၣ်​ ကမ့ၢ်မနုၤလဲၣ်. (ကွၢ်တၢ်ဂီၤလၢ လံာ်ကုခိၣ်တက့ၢ်.)

^၄ လၢစီၤဒၤဝံးအတၢ်အိၣ်မူအပူၤန့ၣ်​ အပာ်ဖျါထီၣ်ဝဲလၢ အမ့ၢ်ပှၤလၢ ပှၤနာ်န့ၢ်အီၤသ့ ဒီးအမၤလၢပှဲၤအမူဒါလီၤ. အဒိ, ဖဲအသးစၢ်အခါန့ၣ်​ အမၤတၢ်ဆူၣ်ဆူၣ်​ လၢကကွၢ်ထွဲဝဲအပၢ်အသိတဖၣ်လီၤ. အဘၣ်ကွၢ်ထွဲဝဲ အပၢ်သိန့ၣ်​ မ့ၢ်ဝဲမူဒါလၢ အလီၤဘၣ်ယိၣ်ဒိၣ်မးတခါလီၤ. လၢခံ စီၤဒၤဝံးတဲဘၣ်​ စီၤပၤစီလူးလၢ “နခ့နပှၤကွၢ်အပၢ်အသိဒီး မဲာ်တဲးလဲး, ဒီးခ့ယုၢ်ဒီးတၤသူဟဲမၤန့ၢ်သိဖိလၢ သိဒီးမဲာ်တဲးလဲးတဖုအကျါလီၤ. ဒီးယလူၤအီၤ, ဒီးမၤထူၣ်ဖျဲးအီၤလၢ အထးခိၣ်” လီၤ. (၁ ၡမူၤအ့လး ၁၇:၃၄, ၃၅) စီၤဒၤဝံးသ့ၣ်ညါဝဲဒၣ်လၢ အကဘၣ်ကွၢ်ထွဲဝဲအသိတဖၣ်​ ဒီးအဝဲဒီသဒၢဝဲအသိတဖၣ်​ လၢတၢ်သူၣ်ဒူသးဒူအပူၤလီၤ. ဒီပုၢ်ဝဲၢ်ခွါသးစၢ်တဖၣ်​ သုကွၢ်လိမၤဒိး စီၤဒၤဝံးအတၢ်သူၣ်ဆူၣ်သးဆူၣ်လၢ ကမၤလၢပှဲၤအမူဒါလၢ အဒိးန့ၢ်ဘၣ်ဝဲန့ၣ်​ သ့ဝဲလီၤ.

၅. ဒ် စံးထီၣ်ပတြၢၤ ၂၅:၁၄ ပာ်ဖျါထီၣ်ဝဲအသိး တၢ်လၢအရ့ဒိၣ်ကတၢၢ်လၢ ဒီပုၢ်ဝဲၢ်ခွါသးစၢ်တဖၣ်အဂီၢ်န့ၣ်​ မ့ၢ်မနုၤလဲၣ်.

^၅ စီၤဒၤဝံး မၤဒိၣ်ထီၣ်အါထီၣ်​ အတၢ်ရ့လိာ်သးဒီး ယဟိဝၤယွၤလီၤ. တၢ်ရ့လိာ်သးအံၤ အရ့ဒိၣ်န့ၢ်ဒံး စီၤဒၤဝံးအတၢ်သးဒူ ဒီးအတၢ်သ့တၢ်ဘၣ်လၢ အဒ့တနၢ်လီၤ. ယဟိဝၤယွၤန့ၣ်​ တမ့ၢ်ထဲစီၤဒၤဝံးအကစၢ်ယွၤဘၣ်​ ဒီးအမ့ၢ်စ့ၢ်ကီး စီၤဒၤဝံးအတံၤသကိး တံၢ်နီၢ်တဂၤလီၤ. (ဖး စံးထီၣ်ပတြၢၤ ၂၅:၁၄ တက့ၢ်.) ဒီပုၢ်ဝဲၢ်ခွါသးစၢ်သ့ၣ်ဧၢ, တၢ်လၢအရ့ဒိၣ်ကတၢၢ်လၢသုဂီၢ်န့ၣ်မ့ၢ်ဝဲ မၤဂၢၢ်ကျၢၤထီၣ်​ သုတၢ်ရ့လိာ်သးဒီး သုပၢ်လၢမူခိၣ်တက့ၢ်. သုမ့ၢ်မၤဒ်န့ၣ်န့ၣ်​ သုကဒိးန့ၢ်အါထီၣ်ဘၣ်မူဒါ လၢတၢ်အိၣ်ဖှိၣ်အပူၤလီၤ.

၆. ပှၤတနီၤဆိကမိၣ်ဆံး စီၤဒၤဝံးဒ်လဲၣ်.

^၆ တၢ်ကီတၢ်ခဲတခါလၢ စီၤဒၤဝံးကဘၣ်လဲၤခီဖျိဝဲန့ၣ်​ မ့ၢ်ဝဲပှၤဆိကမိၣ်ဆံးအီၤလၢ အမ့ၢ်ပှၤလၢအသးစၢ်တလၢ ဒီးပှၤနာ်န့ၢ်အီၤတသ့ဘၣ်. အဒိ, ဖဲစီၤဒၤဝံးဟ့ၣ်လီၤအသးလၢ ကလဲၤဒုးဝဲ စီၤကၤလယးအခါ စီၤစီလူးတြီအီၤဒီး တဲဝဲလၢ “နဖိသၣ်​ . . . ဒံးလီၤ.” (၁ ၡမူၤအ့လး ၁၇:၃၁-၃၃) လၢအပူၤကွံာ်န့ၣ်​ စီၤဒၤဝံးအဝဲၢ်ခွါသ့ၣ်တဖၣ်ဒၣ်လဲာ် ပာ်ဒ့ၣ်ပာ်ကမၣ်အီၤလၢ အတမၤလၢပှဲၤအမူဒါဘၣ်. (၁ ၡမူၤအ့လး ၁၇:၂၆-၃၀) ဘၣ်ဆၣ်​ ယဟိဝၤယွၤတထံၣ်​ စီၤဒၤဝံးလၢ အမ့ၢ်ပှၤသးစၢ်တလၢ ဒီးပှၤနာ်န့ၢ်အီၤ တသ့ဘၣ်တဂၤန့ၣ်ဘၣ်. ယဟိဝၤယွၤသ့ၣ်ညါစီၤဒၤဝံးဂ့ၤဂ့ၤလီၤ. ခီဖျိလၢ စီၤဒၤဝံးသန့ၤအသးလၢ ယဟိဝၤယွၤအတၢ်ဂံၢ်တၢ်ဘါအဃိ စီၤဒၤဝံးမၤသံကွံာ်ဝဲ စီၤကၤလယးလီၤ.—၁ ၡမူၤအ့လး ၁၇:၄၅, ၄၈-၅၁.

၇. နမၤလိန့ၢ်တၢ်လၢ စီၤဒၤဝံးအအိၣ်ကသ့ဒ်လဲၣ်.

^၇ စီၤဒၤဝံးအတၢ်လဲၤခီဖျိန့ၣ်  နမၤလိန့ၢ်တၢ်မနုၤသ့ဒ်လဲၣ်. ပမၤလိန့ၢ်ဘၣ်လၢ ပကဘၣ်အိၣ်ဒီး တၢ်ဝံသးစူၤလီၤ. ဒ်သိးပှၤကထံၣ်နၤလၢ နမ့ၢ်ပှၤဒိၣ်တုၤခိၣ်ပှဲၤတဂၤအဂီၢ် တၢ်ဆၢကတီၢ်လိၣ်ဝဲလီၤ. ယဟိဝၤယွၤတကွၢ်ထဲ တၢ်အိၣ်လၢခိတခီဘၣ်, အကွၢ်စ့ၢ်ကီးတၢ်အိၣ်လၢ နသးကံၢ်ပူၤလီၤ. နနာ်သ့လၢ ယဟိဝၤယွၤသ့ၣ်ညါနၤဂ့ၤဂ့ၤ ဒီးသ့ၣ်ညါဝဲလၢ နမၤတၢ်မနုၤသ့လဲၣ်န့ၣ်လီၤ. (၁ ၡမူၤအ့လး ၁၆:၇) မၤဂၢၢ်ကျၢၤထီၣ်​ နတၢ်ရ့လိာ်သးဒီး ယဟိဝၤယွၤတက့ၢ်. စီၤဒၤဝံးမၤဝဲဒ်န့ၣ်​ ခီဖျိလၢအဝဲကွၢ်ဝဲ ယဟိဝၤယွၤအတၢ်ဘၣ်တ့တဖၣ်လီၤ. စီၤဒၤဝံးဆိကမိၣ်ထံဝဲ ယဟိဝၤယွၤအတၢ်ဘၣ်တ့တဖၣ်အဃိ အဝဲသ့ၣ်ညါအါထီၣ်​ ယဟိဝၤယွၤအဂ့ၢ်လီၤ. (စံးထီၣ်ပတြၢၤ ၈:၃, ၄; ၁၃၉:၁၄; ရိမ့ၤ ၁:၂၀) တၢ်အဂၤလၢနမၤအီၤသ့ဒံးန့ၣ်​ မ့ၢ်ဝဲ နကဘၣ်ဃ့ယဟိဝၤယွၤအတၢ်မၤစၢၤ လၢအကဟ့ၣ်လီၤနၤ တၢ်ဂံၢ်တၢ်ဘါလၢ နလိၣ်ဘၣ်န့ၣ်လီၤ. အဒိ, မ့ၢ်နတံၤသကိးလၢကၠိသ့ၣ်တဖၣ်​ မၤဆဲးအဲးနၤ ခီဖျိလၢနမ့ၢ် ယဟိဝၤပှၤအုၣ်အသးအဃိန့ၣ်ဧါ. နမ့ၢ်ထံၣ်ဘၣ်ဒ်န့ၣ်န့ၣ်​ ဃ့ဘါထုကဖၣ်လၢ ယဟိဝၤယွၤအအိၣ်​ ဒ်သိးနကလဲၤခီဖျိ တၢ်ကီတၢ်ခဲတဖၣ်အံၤတက့ၢ်. ဒီးမၤထွဲတၢ်ဟ့ၣ်ကူၣ်လၢ နထံၣ်လၢကစၢ်ယွၤကလုၢ်ကထါ လံာ်စီဆှံအပူၤ ဒီးလံာ်လဲၢ်လၢ အဒိးသန့ၤထီၣ်သးလၢ လံာ်စီဆှံ ဒီးတၢ်ဂီၤမူတဖၣ်အပူၤန့ၣ်တက့ၢ်. ဖဲနထံၣ်ဘၣ်​ ယဟိဝၤယွၤမၤစၢၤနၤလၢ နကလဲၤခီဖျိ တၢ်ကီတၢ်ခဲတဖၣ်အခါ နတၢ်နာ်န့ၢ်အီၤ ကဟဲဒိၣ်ထီၣ်ဝဲလီၤ. အါန့ၢ်အန့ၣ်​ ပှၤဂၤတဖၣ်​ ကထံၣ်ဝဲလၢ နသန့ၤနသးလၢယဟိဝၤယွၤဒီး အဝဲသ့ၣ်စ့ၢ်ကီး ကနာ်န့ၢ်နၤလီၤ.

၈-၉. တချုးလၢ စီၤဒၤဝံးကဲထီၣ်ဘၣ်စီၤပၤဒံးဘၣ်န့ၣ်​ တၢ်မနုၤမၤစၢၤအီၤလၢ အကအိၣ်ခိးတၢ်လၢ တၢ်ဝံသးစူၤအပူၤလဲၣ်. ဒီးဒီပုၢ်ဝဲၢ်ခွါသးစၢ်တဖၣ်​ မၤလိန့ၢ်တၢ်လၢ စီၤဒၤဝံးအဒိအတဲာ် ကသ့ဒ်လဲၣ်.

^၈ ဆိကမိၣ်ကွၢ် တၢ်ကီတၢ်ခဲအဂၤတခါလၢ စီၤဒၤဝံးဘၣ်လဲၤခီဖျိဝဲန့ၣ်တက့ၢ်.  ဖဲစီၤဒၤဝံးဘၣ်တၢ်ဒိးဖှူအီၤလၢ  စီၤပၤဝံၤအလီၢ်ခံ အဝဲဘၣ်အိၣ်ခိးဝဲလၢ အကကဲထီၣ်ဘၣ်​ ယူၤဒၤအစီၤပၤလီၤ. (၁ ၡမူၤအ့လး ၁၆:၁၃; ၂ ၡမူၤအ့လး ၂:၃, ၄) ဖဲန့ၣ်အဆၢကတီၢ် တၢ်မနုၤမၤစၢၤအီၤလၢ အကအိၣ်ခိးတၢ်လၢ တၢ်ဝံသးစူၤအပူၤလဲၣ်. စီၤဒၤဝံးတဆိကမိၣ်ဝဲတၢ်လၢ ကမၤလီၤစၢ်အသးသ့ၣ်တဖၣ်ဘၣ်. လၢတၢ်န့ၣ်အလီၢ် စီၤဒၤဝံးသးစၢၢ်ဆၢဝဲ တၢ်လၢအမၤဝဲသ့တဖၣ်လီၤ. အဒိ, ဖဲစီၤဒၤဝံးအိၣ်လၢ ပှၤဖလ့ၤၡသးဖိတၢ်လီၢ်အခါ အဝဲအိၣ်ဒီးတၢ်ခွဲးတၢ်ယာ်တဖၣ်လၢ ကဒုးဆၢက့ၤဝဲ ပှၤအံၣ်စရ့လးဖိအဒုၣ်အဒါတဖၣ်လီၤ. ခီဖျိလၢ အဝဲမၤဝဲဒ်န့ၣ်အဃိ  အဒီသဒၢဝဲ  ယူၤဒၤအတၢ်လီၢ်တၢ်ကျဲလီၤ.—၁ ၡမူၤအ့လး ၂၇:၁-၁၂.

^၉ ဒီပုၢ်ဝဲၢ်ခွါသးစၢ်တဖၣ်​ မၤလိန့ၢ်တၢ်လၢ စီၤဒၤဝံးအဒိအတဲာ် ကသ့ဒ်လဲၣ်. ဟ့ၣ်လီၤနသးလၢ နကမၤစၢၤနဒီပုၢ်ဝဲၢ်သ့ၣ်တဖၣ်တက့ၢ်. ဆိကမိၣ်ကွၢ် ဒီပုၢ်ဝဲၢ်ခွါရံၤခါဒိၤb အတၢ်လဲၤခီဖျိတက့ၢ်. ဖဲအသးစၢ်အခါ အဝဲပာ်လီၤအသးလၢ အကမၤပှၤလဲၤလၢညါလီၤ. ဘၣ်ဆၣ်​ အဝဲမၤဝဲတန့ၢ်ဒံးဘၣ်. သနာ်က့ အသးတဂီၤဘၣ်. လၢတၢ်န့ၣ်အလီၢ် ဒီပုၢ်ဝဲၢ်ခွါရံၤခါဒိၤ အဝဲဂုာ်ကျဲးစၢးပၣ်ဃုာ်အါထီၣ်လၢ တၢ်စံၣ်တဲၤတဲလီၤတၢ်မၤအပူၤလီၤ. အတဲဝဲလၢ “ဖဲယမ့ၢ်ဆိကမိၣ်ထီၣ်က့ၤ တၢ်လၢအပူၤကွံာ်န့ၣ်​ ယသ့ၣ်ညါလၢ ယကဘၣ်မၤတၢ်ဆီတလဲ ဒ်သိးယကလဲၤထီၣ်လဲၤထီအဂီၢ်လီၤ. အဃိ ပှၤလၢအသးအိၣ်တၢ်မ့ၢ်တၢ်တီတဖၣ်န့ၣ်​ ယက့ၤဟးကဒါက့ၤလၢ အဝဲသ့ၣ်အအိၣ်လီၤ. တဘျီလၢ်လၢ် ဖဲယက့ၤဟးကဒါက့ၤ လၢအဝဲသ့ၣ်အအိၣ်အခါ ယကတဲၤကတီၤပာ်စၢၤတၢ်ဂ့ၢ်တၢ်ကျိၤ မူၤမူၤနီၢ်နီၢ်လီၤ. တကးဒံးဘၣ်​ ယသိၣ်လိဘၣ်​ တၢ်မၤလိလံာ်စီဆှံ အဆိကတၢၢ်တဘျီလီၤ. ဒ်ယတၢ်လဲၤခီဖျိအိၣ်အါထီၣ်အသိး ယတၢ်နာ်န့ၢ်လီၤသးစ့ၢ်ကီး ဟဲဒိၣ်ထီၣ်အါထီၣ်ဝဲဒၣ်လီၤ.” အခဲအံၤ ဒီပုၢ်ဝဲၢ်ခွါရံၤခါဒိၤ န့ၣ်မၤပှၤလဲၤလၢညါ ဒီးအကဲစ့ၢ်ကီး တၢ်အိၣ်ဖှိၣ်အပှၤမၤစၢၤတၢ်တဂၤလီၤ.

၁၀. ဘၣ်တဘျီ တချုးလၢစီၤဒၤဝံး မၤတၢ်ဆၢတဲာ် လၢအရ့ဒိၣ်ဒံးဘၣ်န့ၣ်​ အဝဲမၤတၢ်မနုၤလဲၣ်.

^၁၀ ဆိကမိၣ်ကွၢ် စီၤဒၤဝံးအတၢ်လဲၤခီဖျိ လၢအဂၤတခါတက့ၢ်. ဘၣ်တဘျီ စီၤဒၤဝံးဒီးအပှၤသုးဖိတဖၣ်​ လဲၤဒုးတၢ်အခါ အဝဲသ့ၣ်ပာ်တီၢ်အဟံၣ်ဖိဃီဖိလၢ အတၢ်လီၢ်န့ၣ်လီၤ. ဖဲအဝဲသ့ၣ်လဲၤတၢ်လၢအယံၤအခါ အဒုၣ်အဒါတဖၣ်ဟဲဖီၣ်န့ၢ် အဝဲသ့ၣ်အဖိအမါတဖၣ်​ ဒီးက့ၤစိာ်ဝဲ အတၢ်ဖိတၢ်လံၤခဲလၢာ်လီၤ. စီၤဒၤဝံး မ့ၢ်ဆိကမိၣ်ဘၣ်ဝဲလၢ အဒုးညီနုၢ်တၢ်လံအဃိ အမ့ၢ်လဲၤလူၤက့ၤဝဲအဒုၣ်အဒါ ဒီးမၤပူၤဖျဲးဝဲ အဖိအမါန့ၣ်သ့ဝဲလီၤ. ဘၣ်ဆၣ်​ စီၤဒၤဝံး တဆိကမိၣ်ဝဲဒ်န့ၣ်ဘၣ်. လၢတၢ်န့ၣ်အလီၢ် စီၤဒၤဝံးဃ့တၢ်မၤစၢၤလၢ ယဟိဝၤယွၤအအိၣ်လီၤ. ခီဖျိလၢ ပှၤလုၢ်တၢ်အဒိၣ်​ စီၤအ့ဘယၤသၢ်တၢ်မၤစၢၤအဃိ စီၤဒၤဝံးသံကွၢ် ယဟိဝၤယွၤလၢ “ယဘၣ်လူၤပှၤတဖုန့ၣ်ဧါ.” ယဟိဝၤယွၤတဲဘၣ်​ စီၤဒၤဝံးလၢ လဲၤလူၤက့ၤအဝဲသ့ၣ်န့ၣ်တက့ၢ်. နကမၤနၢၤတၢ် ဒီးမၤပူၤဖျဲးအဝဲသ့ၣ်လီၤ. (၁ ၡမူၤအ့လး ၃၀:၇-၁၀) နမၤလိန့ၢ်တၢ်လၢ စီၤဒၤဝံးအတၢ်လဲၤခီဖျိအံၤ သ့ဒ်လဲၣ်.

၁၁. တချုးလၢ နမၤတၢ်ဆၢတဲာ်တဖၣ်ဒံးဘၣ်န့ၣ်​ နမၤတၢ်မနုၤသ့လဲၣ်.

^၁၁ တချုးလၢ  နမၤတၢ်ဆၢတဲာ်ဒံးဘၣ်န့ၣ်  ဃုကွၢ် တၢ်ဟ့ၣ်ကူၣ်ဟ့ၣ်ဖးတဖၣ်တက့ၢ်.  တဲသကိးတၢ်ဒီး  နမိၢ်နပၢ်တက့ၢ်. တကးဒံးဘၣ်​ နတဲသကိးတၢ်ဒီး တၢ်အိၣ်ဖှိၣ်သးပှၢ်လၢအအိၣ်ဒီး တၢ်လဲၤခီဖျိအါတဖၣ်အဃိ နဒိးန့ၢ်ဘၣ်တၢ်ဟ့ၣ်ကူၣ်ဟ့ၣ်ဖး လၢအဂ့ၤသ့လီၤ. ယဟိဝၤယွၤနာ်န့ၢ် တၢ်အိၣ်ဖှိၣ်သးပှၢ်သ့ၣ်တဖၣ်အံၤအဃိ နၤစ့ၢ်ကီး နနာ်န့ၢ်အဝဲသ့ၣ်သ့လီၤ. ယဟိဝၤယွၤထံၣ်​ တၢ်အိၣ်ဖှိၣ်သးပှၢ်သ့ၣ်တဖၣ်အံၤ ဒ်သိးဒီး “တၢ်ဟ့ၣ်တဖၣ်” လၢတၢ်အိၣ်ဖှိၣ်အပူၤလီၤ. (အ့းဖ့းစူး ၄:၈) နမ့ၢ်မၤဒ်န့ၣ်န့ၣ်​ နကဒိးန့ၢ်ဘၣ်အဘျုး ခီဖျိလၢနကွၢ်လိမၤဒိး အဝဲသ့ၣ်အတၢ်နာ် ဒီးဒိကနၣ်အဝဲသ့ၣ်​ တၢ်ဟ့ၣ်ကူၣ်လၢအပှဲၤဒီး တၢ်ကူၣ်သ့လီၤ. ခဲအံၤပကကွၢ်သကိး ပမၤလိန့ၢ်တၢ်လၢ စီၤပၤအၤစါအအိၣ်ကသ့ဒ်လဲၣ်.

မၤလိန့ၢ်တၢ်လၢ စီၤပၤအၤစါအအိၣ်

၁၂. ဖဲစီၤပၤအၤစါ စးထီၣ်ပၢတၢ်အခါ အဝဲအိၣ်ဒီးတၢ်ဂ့ၤတၢ်ဝါမနုၤလဲၣ်.

^၁၂ ဖဲစီၤပၤအၤစါအသးစၢ်အခါ အဝဲအိၣ်ဒီးတၢ်ဆီၣ်လီၤသး ဒီးတၢ်သူၣ်ဒူသးဒူလီၤ. အဒိ, ဖဲအထီၣ်စီၤပၤ လၢအပၢ်စီၤအဘံယၤအလီၢ်အခါ အဝဲမၤဟးဂီၤကွံာ် တၢ်ဂီၤတၢ်ဖှီၣ်တဖၣ်​ လၢကီၢ်ပူၤဒီးအဝဲ “မၤလိာ်ယူဒၤဒ်သိး အကဃုန့ၢ်ယွၤအပၢ်တဖၣ်​ အကစၢ်, ဒီးတိၢ်န့ၢ်တၢ်သိၣ်တၢ်သီ, ဒီးတၢ်မၤလိာ်လီၤ.” (၂ ကွဲးနီၣ်တၢ် ၁၄:၁-၇) ဖဲပှၤကူၤၡးဖိ စီၤစ့ရၤဒီး အသုးမုၢ်အဂၤ ၁,၀၀၀,၀၀၀ ဟဲဒုးဝဲ ပှၤယူဒၤဖိအခါ စီၤပၤအၤစါ ဃ့ယဟိဝၤယွၤ အတၢ်မၤစၢၤ ဒီးတဲဝဲလၢ “ယွၤဧၢ, လၢအအါမ့ၢ်ဂ့ၤ, လၢအစှၤမ့ၢ်ဂ့ၤ, နမၤစၢၤတၢ်ဒ်သိးသိးလီၤ. မၤစၢၤပှၤတက့ၢ်, ယွၤပကစၢ်ဧၢ, အဂ့ၢ်ဒ်အံၤ, ပသန့ၤပသးလၢနၤ” လီၤ. တၢ်ကတိၤအံၤ ပာ်ဖျါထီၣ်ဝဲ စီၤပၤအၤစါန့ၣ်​ အတၢ်နာ်န့ၢ်ဝဲ ယဟိဝၤယွၤလၢလၢပှဲၤပှဲၤ ဒီးအသ့ၣ်ညါဝဲဒၣ်လၢ ယဟိဝၤယွၤကမၤပူၤဖျဲးအီၤ ဒီးအပှၤဂီၢ်မုၢ်တဖၣ်လီၤ. စီၤပၤအၤစါ နာ်န့ၢ်ဝဲ အပၢ်လၢမူခိၣ်​ ယဟိဝၤယွၤဒီး “ယွၤကျီကွံာ်ပှၤကူၤၡးဖိ” တဖၣ်လီၤ.—၂ ကွဲးနီၣ်တၢ် ၁၄:၈-၁၂.

၁၃. လၢခံ တၢ်ကဲထီၣ်အသးဒီး စီၤအၤစါဒ်လဲၣ်​ ဒီးဘၣ်မနုၤအဃိလဲၣ်.

^၁၃ ပှၤသုးဖိအဂၤ ၁,၀၀၀,၀၀၀ မ့ၢ်ဟဲဒုးနၤန့ၣ်​ နကပျံၤတၢ်ဖုးတၢ်ဒိၣ်မးလီၤ. ခီဖျိလၢ စီၤပၤအၤစါ သန့ၤအသးလၢယဟိဝၤယွၤအဃိ အဝဲမၤနၢၤတၢ်လီၤ. ဘၣ်ဆၣ်​ လီၤသးအုးဒိၣ်မး ဖဲစီၤပၤအၤစါထံၣ်ဘၣ်ဒီး တၢ်ကီတၢ်ခဲအဂၤတခါအခါ အဝဲတသန့ၤအသးလၢ ယဟိဝၤယွၤလၢၤဘၣ်. ဖဲစီၤပၤဘါၡၤ လၢအမ့ၢ် အံၣ်စရ့လးအစီၤပၤဟဲဒုးဝဲ စီၤပၤအၤစါအခါ စီၤပၤအၤစါလဲၤဃ့တၢ်မၤစၢၤလၢ စူၤရံအစီၤပၤအအိၣ်လီၤ. ခီဖျိလၢ အမၤဝဲဒ်န့ၣ်အဃိ အထံၣ်ဘၣ်ဝဲ တၢ်ကီတၢ်ခဲလီၤ. ယဟိဝၤယွၤ မၢဝံဃနၤနံ လဲၤတဲဘၣ်​ စီၤပၤအၤစါလၢ “မ့ၢ်နသန့ၤနသးလၢ စူၤရံအစီၤပၤ, ဒီးတသန့ၤဘၣ်နသးလၢ ယွၤနကစၢ်ဘၣ်ဒီး, စူၤရံအစီၤပၤအပှၤသုးမုၢ်ပူၤဖျဲးလၢ နစုပူၤလီၤ.” စးထီၣ်ဖဲန့ၣ်​ ဝံၤအလီၢ်ခံ စီၤပၤအၤစါထံၣ်ဘၣ်ဒီး တၢ်ဒုးတၢ်ယၤ တလီၢ်လီၢ်လီၤ. (၂ ကွဲးနီၣ်တၢ် ၁၆:၇, ၉; ၁ စီၤပၤ ၁၅:၃၂) ပမၤလိန့ၢ်ဘၣ်တၢ်မနုၤလဲၣ်.

၁၄. နသန့ၤနသးလၢ ယဟိဝၤယွၤအအိၣ်​ ကသ့ဒ်လဲၣ်​ ဒီးနမ့ၢ်မၤထွဲအီၤ ဒ် ၁ တံၤမသ့း ၄:၁၂ ပာ်ဖျါထီၣ်ဝဲအသိးန့ၣ်​ ကကဲဘျုးလၢနဂီၢ်ဒ်လဲၣ်.

^၁၄ ဆဲးပၢၤဃာ် နတၢ်ဆီၣ်လီၤသးဒီး ဆဲးနာ်န့ၢ်ယဟိဝၤယွၤတက့ၢ်. ဖဲနဒိးဘျၢထံဝံၤအခါ နပာ်ဖျါထီၣ်​ နတၢ်နာ်လၢအဂၢၢ်ကျၢၤ ဒီးနနာ်န့ၢ် ယဟိဝၤယွၤလီၤ. ယဟိဝၤယွၤ နာ်န့ၢ်နၤအဃိ ဟ့ၣ်လီၤနၤတၢ်ခွဲးတၢ်ယာ်လၢ နကကဲထီၣ်ဘၣ်​ အဟံၣ်ဖိဃီဖိလီၤ. တၢ်လၢနကဘၣ်မၤအီၤခဲအံၤန့ၣ်​ မ့ၢ်ဝဲနကဘၣ်ဆဲးနာ်န့ၢ် ယဟိဝၤယွၤလီၤ. ဘၣ်သ့ၣ်သ့ၣ်​ ဖဲနမၤတၢ်ဆၢတဲာ်ဖးဒိၣ်လၢ နတၢ်အိၣ်မူပူၤအခါ ညီဒိၣ်မးလၢ နကသန့ၤနသးလၢ ယဟိဝၤယွၤလီၤ. ဘၣ်ဆၣ်​ ဖဲနမၤ တၢ်ဆၢတဲာ်ဆံးဆံးဖိအခါ မ့ၢ်နသန့ၤနသးလၢ ယဟိဝၤယွၤအအိၣ်စ့ၢ်ကီးဧါ. ဖဲနမၤတၢ်ဆၢတဲာ်လၢ အဘၣ်ဃးဒီး နဃုထၢ တၢ်မၤမုာ်မၤဖှံသး, တၢ်ဃုထၢတၢ်ဖံးတၢ်မၤ ဒီးနပာ်လီၤဖီတၢၣ်လၢ နတၢ်အိၣ်မူအပူၤအခါ အရ့ဒိၣ်ဒိၣ်မးလၢ နကဘၣ်သန့ၤနသးလၢ ယဟိဝၤယွၤလီၤ. နတဘၣ်သန့ၤသးလၢ နနီၢ်ကစၢ်အတၢ်ကူၣ်သ့ဘၣ်. လၢတၢ်န့ၣ်အလီၢ် နကဘၣ်ဃုကွၢ် လံာ်စီဆှံအတၢ်ဟံးစုနဲၣ်ကျဲ လၢအဘၣ်ထွဲဒီးနတၢ်အိၣ်သးတဖၣ်​ ဝံၤဒီး နကဘၣ်မၤထွဲအီၤလီၤ. (ကတိၤဒိ ၃:၅, ၆) နမ့ၢ်မၤဒ်န့ၣ်န့ၣ်​ နကမၤသးခု ယဟိဝၤယွၤအသး ဒီးနကဒိးန့ၢ်အါထီၣ်ဘၣ်​ ပှၤဂၤအတၢ်နာ်န့ၢ်နၤ လၢတၢ်အိၣ်ဖှိၣ်အပူၤလီၤ.—ဖး ၁ တံၤမသ့း ၄:၁၂ တက့ၢ်.

မၤလိန့ၢ်တၢ်လၢ စီၤပၤယဟိၡၤဖးအအိၣ်

၁၅. ဒ် ၂ ကွဲးနီၣ်တၢ် ၁၈:၁-၃; ၁၉:၂ ပာ်ဖျါထီၣ်ဝဲအသိး စီၤပၤယဟိၡၤဖး မၤကမၣ်ဘၣ်တၢ်မနုၤလဲၣ်.

^၁၅ ပဝဲခဲလၢာ် ပမ့ၢ်ပှၤတလၢတပှဲၤဘၣ်. ဒီးနၤစ့ၢ်ကီး တမ့ၢ်ပှၤတလၢတပှဲၤဘၣ်​ အဃိ တဘျီတခီၣ်​ ပကမၤကမၣ်ဘၣ်တၢ်လီၤ. ဘၣ်ဆၣ်​ နတဘၣ်ပျဲတၢ်ဂံၢ်စၢ်ဘါစၢ်အံၤလၢ ကမၤပတုာ်နၤလၢ နကမၤယဟိဝၤယွၤအတၢ်မၤန့ၣ်တဂ့ၤ. ဆိကမိၣ်ကွၢ် စီၤပၤယဟိၡၤဖး အတၢ်လဲၤခီဖျိန့ၣ်တက့ၢ်. အဝဲအိၣ်ဒီး တၢ်ဂ့ၤတၢ်ဝါအါမးလီၤ. ဖဲစီၤပၤယဟိၡၤဖး သးစၢ်အခါ အ “ဃုယွၤအပၢ်အကစၢ်, ဒီးလဲၤဝဲလၢ အတၢ်မၤလိာ်အပူၤ” လီၤ. တကးဒံးဘၣ်​ စီၤပၤယဟိၡၤဖးဆှၢလီၤဝဲ ပဒိၣ်တဖၣ်လၢကလဲၤဝဲလၢ ကီၢ်ယူဒၤအဝ့ၢ်တဖၣ်​ ဒ်သိးကသိၣ်လိပှၤဂီၢ်မုၢ်ဘၣ်ဃးဒီး ယဟိဝၤယွၤအဂ့ၢ်လီၤ. (၂ ကွဲးနီၣ်တၢ် ၁၇:၄, ၇) စီၤပၤယဟိၡၤဖးန့ၣ်​ အမ့ၢ်ပှၤလၢ အအိၣ်ဒီးတၢ်သးတီ ဘၣ်ဆၣ်​ တဘျီတခီၣ်န့ၣ်​ အမၤဘၣ်တၢ်ဆၢတဲာ် လၢအကမၣ်တဖၣ်လီၤ. ခီဖျိလၢ အမၤဘၣ်တၢ်ဆၢတဲာ်လၢ အကမၣ်အဃိ ယဟိဝၤယွၤအပှၤခၢၣ်စးတဂၤ ဟဲသိၣ်က့ၤသီက့ၤအီၤလီၤ. (ဖး ၂ ကွဲးနီၣ်တၢ် ၁၈:၁-၃; ၁၉:၂ တက့ၢ်.) နမၤလိန့ၢ်တၢ်လၢ စီၤပၤယဟိၡၤဖးအအိၣ်သ့ဒ်လဲၣ်.

၁၆. နမၤလိန့ၢ်တၢ်လၢ ဒီပုၢ်ဝဲၢ်ခွါရကၠံ အအိၣ်သ့ဒ်လဲၣ်.

^၁၆ တူၢ်လိာ်ဒီးမၤထွဲ တၢ်သိၣ်က့ၤသီက့ၤတက့ၢ်. ဘၣ်သ့ၣ်သ့ၣ်​ ဒီပုၢ်ဝဲၢ်ခွါသးစၢ်အါဂၤ အိၣ်ဝဲဒီးတၢ်ကီတၢ်ခဲလၢ ကပာ်ယဟိဝၤယွၤအတၢ်ဖံးတၢ်မၤ လၢနီၢ်ဂံၢ်တၢ လၢအတၢ်အိၣ်မူအပူၤလီၤ. ဘၣ်ဆၣ်​ တဘၣ်သးဟးဂီၤတဂ့ၤ. ဆိကမိၣ်ကွၢ် ဒီပုၢ်ဝဲၢ်ခွါရၤကၠံ အတၢ်လဲၤခီဖျိတက့ၢ်. ဖဲအသးစၢ်ဒံးအခါ အတဲဝဲလၢ “တဘျီတခီၣ်​ လၢယတၢ်အိၣ်မူအပူၤန့ၣ်​ ယကဘၣ်မၤတၢ်မနုၤလဲၣ်န့ၣ်​ ယတသ့ၣ်ညါနီတမံၤလၢၤဘၣ်. ဒ်ပှၤသးစၢ်အါဂၤအသိး ယၤစ့ၢ်ကီး ယသးအိၣ်ဝဲတၢ်လိာ်ကွဲ ဒီးတၢ်မၤမုာ်မၤဖှံသးအါန့ၢ် ယလဲၤထီၣ်တၢ်အိၣ်ဖှိၣ်​ ဒီးဟးစံၣ်တဲၤတဲလီၤတၢ်ဒံးလီၤ.” တၢ်မနုၤမၤစၢၤ ဒီပုၢ်ဝဲၢ်ခွါရၤကၠံလဲၣ်. တၢ်အိၣ်ဖှိၣ်သးပှၢ်လၢ အအိၣ်ဒီးတၢ်ဒိသူၣ်ဒိသးတဂၤ ဟ့ၣ်ကူၣ်ဟ့ၣ်ဖးအီၤလီၤ. ဒီပုၢ်ဝဲၢ်ခွါရၤကၠံ တဲဝဲလၢ “အဝဲမၤစၢၤယၤဒ်သိး ယကဆိကမိၣ်ထံ လံာ်စီဆှံအတၢ်ဟံးစုနဲၣ်ကျဲ လၢ ၁ တံၤမသ့း ၄:၈ အပူၤလီၤ.” ဒီပုၢ်ဝဲၢ်ခွါရၤကၠံ အိၣ်ဒီးတၢ်ဆီၣ်လီၤသး ဒီးတူၢ်လိာ်ဝဲတၢ်ဟ့ၣ်ကူၣ်အံၤအဃိ အဝဲဆိကမိၣ်ထံဝဲ ဘၣ်ဃးဒီး တၢ်အရ့ဒိၣ်ကတၢၢ်လၢ အတၢ်အိၣ်မူပူၤလီၤ. ဒီးအဝဲတဲဝဲလၢ “ယပာ်လီၤနီၢ်သးဖီတၢၣ်​ လၢယကမၤယဟိဝၤယွၤအတၢ်မၤလၢ နီၣ်ဂံၢ်တၢလီၤ.” ခီဖျိလၢ အမၤဝဲဒ်န့ၣ်အဃိ လၢခံန့ၣ်​ အတဲဝဲလၢ “ ဖဲယဒိးန့ၢ်ဘၣ်​ တၢ်ဟ့ၣ်ကူၣ်စှၤကိးနံၣ်ဝံၤအလီၢ်ခံ ယကဲထီၣ်ဘၣ်​ တၢ်အိၣ်ဖှိၣ်အပှၤစၢၤတၢ်တဂၤလီၤ.”

မၤသးခု နပၢ်လၢမူခိၣ်တဂၤအသး

၁၇. ဒီပုၢ်ဝဲၢ်ခွါသးစၢ်လၢ အမၤယဟိဝၤယွၤ အတၢ်မၤတဖၣ်န့ၣ်​ ဒီပုၢ်ဝဲၢ်သးပှၢ်တဖၣ်​ ထံၣ်အဝဲသ့ၣ်ဒ်လဲၣ်.

^၁၇ ဒီပုၢ်ဝဲၢ်လၢအသးပှၢ်တဖၣ်န့ၣ်​ ပာ်လုၢ်ပာ်ပှ့ၤဝဲ ဒီပုၢ်ဝဲၢ်ခွါသးစၢ်တဖၣ်လၢ အမၤသကိး ယဟိဝၤယွၤတၢ်မၤလၢ “သးတဖျၢၣ်ဃီ” ဒီးအဝဲသ့ၣ်န့ၣ်​ ဒိၣ်မးလီၤ. (စဖါနယၤ ၃:၉) ဒီးအဝဲသ့ၣ်ပာ်လုၢ်ပာ်ပှ့ၤဝဲ သုဂံၢ်သုဘါဒီး သုတၢ်သးဆူၣ်လၢ တၢ်ဖံးတၢ်မၤလၢ သုမၤအီၤတဖၣ်န့ၣ်လီၤ. သုမ့ၢ်တၢ်လုၢ်ဒိၣ်ပှ့ၤဒိၣ်လၢ အဝဲသ့ၣ်အဂီၢ်လီၤ.—၁ ယိၤဟၣ်​ ၂:၁၄.

၁၈. ဒ် ကတိၤဒိ ၂၇:၁၁ ပာ်ဖျါထီၣ်ဝဲအသိး ဖဲဒီပုၢ်ဝဲၢ်ခွါသးစၢ်တဖၣ်​ မၤယဟိဝၤယွၤတၢ်မၤအခါ ယဟိဝၤယွၤထံၣ်အဝဲသ့ၣ်ဒ်လဲၣ်.

^၁၈ ဒီပုၢ်ဝဲၢ်ခွါသးစၢ်သ့ၣ်ဧၢ, ယဟိဝၤယွၤအဲၣ်နၤဒီး နာ်န့ၢ်နၤန့ၣ်​ တဘၣ်သးပ့ၤနီၣ်တဂ့ၤ. ယဟိဝၤယွၤ တဲဆိပာ်စၢၤဝဲလၢ ဖဲမုၢ်နံၤခံကတၢၢ်အဆၢကတီၢ်န့ၣ်​ ပှၤပိာ်ခွါသးစၢ်အါဒံအါဂၤ ကသးအိၣ်ဟ့ၣ်လီၤအသးလီၤ. (စံးထီၣ်ပတြၢၤ ၁၁၀:၁-၃) ယဟိဝၤယွၤသ့ၣ်ညါဝဲလၢ သုအဲၣ်အီၤဒီး သုအဲၣ်ဒိးမၤအတၢ်မၤ လၢအဂ့ၤကတၢၢ်လီၤ. အဃိ အိၣ်ဒီးတၢ်ဝံသးစူၤ လၢနနီၢ်ကစၢ်အဖီခိၣ်​ ဒီးပှၤဂၤအဖီခိၣ်တက့ၢ်. ဖဲနမၤကမၣ်တၢ်အခါ တူၢ်လိာ်တၢ်သိၣ်က့ၤသီက့ၤ ဒီးတၢ်ဘှီဘၣ်ထီၣ်က့ၤနၤတက့ၢ်. ဒီးထံၣ်တၢ်သ့ၣ်တဖၣ်အံၤလၢ အဟဲလၢယဟိဝၤယွၤအအိၣ်န့ၣ်တက့ၢ်. (ဧ့ၤဘြံၤ ၁၂:၆) မူဒါလၢ နဒိးန့ၢ်ဘၣ်အီၤန့ၣ်​ ဂုာ်ကျဲးစၢးမၤအီၤလၢ အဂ့ၤကတၢၢ်တက့ၢ်. ဒီးတၢ်လၢအရ့ဒိၣ်ကတၢၢ်န့ၣ်​ နကဘၣ်မၤတၢ်လၢ အမၤသးခု နပၢ်လၢမူခိၣ်တဂၤအသးလီၤ.—ဖး ကတိၤဒိ ၂၇:၁၁ တက့ၢ်.