မၤစၢၤနပှၤမၤလိ လံာ်စီဆှံဖိ ဒ်သိးကတုၤထီၣ်ထီၣ်ဘးလၢ ကဒိးဘျၢထံအဂီၢ်တက့ၢ်

၁. ယ့ၣ်ၡူးအပျဲၢ်အဘီၣ်တဖၣ်လၢ တၢ်မၢဖိအစိၤန့ၣ်​ အဝဲသ့ၣ်တဲဘၣ်​ ပှၤဂီၢ်မုၢ်လၢ တၢ်မနုၤလဲၣ်

ပှၤဂီၢ်မုၢ်ဖးဒိၣ်ဟဲဝဲလၢ ဝ့ၢ်ယရူၤၡလ့ၣ်လီၤ. ဒီးအဝဲသ့ၣ်န့ၣ်​ ဟဲလၢထံကီၢ်အါဘ့ၣ်ဒီး တဲကျိာ်အကလုာ်ကလုာ်လီၤ. ဖဲတၢ်တနံၤန့ၣ်​ တၢ်ကဲထီၣ်အသးတခါလၢ ပှၤသးပ့ၤနီၣ်ဝဲတန့ၢ်ဘၣ်. လၢတၢ်တမုၢ်လၢ်အပူၤ ပှၤယူဒၤဖိတနီၤ ကတိၤဝဲကျိာ်အဂၤတဖၣ်လီၤ. အဃိ ပှၤဂီၢ်မုၢ်တဖၣ်အံၤ ကမၢကမၣ်ဝဲဒိၣ်မးလီၤ. ပှၤယူဒၤဖိတဖၣ်တဲဘၣ်အဝဲသ့ၣ်​ တၢ်မနုၤလဲၣ်​ ဒီးတၢ်မၢဖိပ့းတရူးတဲဝဲ တၢ်မနုၤလဲၣ်န့ၣ်​ ဒုးကမၢကမၣ်အဝဲသ့ၣ်ဒိၣ်မးလီၤ. ပှၤဂီၢ်မုၢ်ဖးဒိၣ်အံၤ မၤလိဘၣ်ဝဲလၢ ဒ်သိးအဝဲသ့ၣ်​ ကဒိးန့ၢ်ဘၣ်​ တၢ်အုၣ်က့ၤခီၣ်က့ၤအဂီၢ် အဝဲသ့ၣ်​ ကဘၣ်စူၢ်က့ၤနာ်က့ၤ ယ့ၣ်ၡူးခရံာ်လီၤ. ဒီးတၢ်ကစီၣ်အံၤ ထုးန့ၢ်အဝဲသ့ၣ်အသးဒိၣ်မးလီၤ. ခီဖျိလၢအဝဲသ့ၣ်​ ဘၣ်သူၣ်ဘၣ်သးဝဲ တၢ်ကစီၣ်အဃိ အဝဲသ့ၣ်သံကွၢ်ဝဲလၢ “ပကဘၣ်မၤဒ်လဲၣ်.” စီၤပ့းတရူးတဲအဝဲသ့ၣ်လၢ “သုဝဲတဂၤစုာ်စုာ် မ်သုဒိးဘျၢထံ” တက့ၢ်.—မၤတၢ် ၂:၃၇, ၃၈.

၂. လၢတၢ်မၤလိအံၤအပူၤ ပကတဲသကိးတၢ်မနုၤလဲၣ်. (ကွၢ်တၢ်ဂီၤလၢ လံာ်ကုခိၣ်တက့ၢ်.)

^၂ လၢခံတၢ်ကဲထီၣ်အသးန့ၣ်​ လီၤကမၢကမၣ်ဒိၣ်မးလီၤ. ဖဲတၢ်တနံၤန့ၣ်​ ပှၤဒိးဘျၢထံအိၣ်ဝဲအဂၤ ၃,၀၀၀ ဃၣ်ဃၣ်​ ဒီးကဲထီၣ်ဝဲ ခရံာ်အပျဲၢ်အဘီၣ်လီၤ. တၢ်မၤအသးတဖၣ်အံၤန့ၣ်​ မ့ၢ်ဝဲ တၢ်ဒုးကဲထီၣ်ပှၤဂၤလၢ ခရံာ်အပျဲၢ်အဘီၣ်တၢ်မၤ စးထီၣ်အသး ဒ်ယ့ၣ်ၡူးမၤလိာ်ဝဲအသိးလီၤ. မ့မ့ၢ်လၢ ပစိၤခဲအံၤန့ၣ်​ ပကမၤစၢၤပှၤဂၤလၢ ကကဲထီၣ်ခရံာ်အပျဲၢ်အဘီၣ်လၢ စှၤကိးနၣ်ရံၣ်အတီၢ်ပူၤဒုတသ့ဘၣ်. ဒ်သိး ပှၤမၤလိလံာ်စီဆှံဖိ ကတုၤထီၣ်ထီၣ်ဘးလၢ တၢ်ဒိးဘျၢထံအဂီၢ် ကတံာ်တာ်ဝဲလၢ အနံၣ်အလါတဖၣ်ညါလီၤ. ခဲအံၤနပှၤမၤလိ လံာ်စီဆှံဖိမ့ၢ်အိၣ်န့ၣ်​ နကသ့ၣ်ညါလၢ ဒ်သိးပှၤကကဲထီၣ်ခရံာ် အပျဲၢ်အဘီၣ်အဂီၢ် တၢ်လၢနကဘၣ်မၤန့ၣ်​ အိၣ်အါမးလီၤ. လၢတၢ်မၤလိအံၤအပူၤ ပကတဲသကိး ပမၤစၢၤပပှၤမၤလိလံာ်စီဆှံဖိ ဒ်သိးကဒိးဘျၢထံဒီး ကဲထီၣ်ခရံာ်အပျဲၢ်အဘီၣ်​ ကသ့ဒ်လဲၣ်န့ၣ်လီၤ.

မၤစၢၤနပှၤမၤလိလံာ်စီဆှံဖိ လၢကမၤထွဲတၢ်လၢအမၤလိဘၣ်ဝဲတဖၣ်

၃. ဒ် မးသဲ ၂၈:၁၉, ၂၀ ပာ်ဖျါထီၣ်ဝဲအသိး ပှၤမၤလိလံာ်စီဆှံဖိ ကတုၤထီၣ်ထီၣ်ဘးလၢ တၢ်ဒိးဘျၢထံအဂီၢ် အကဘၣ်မၤတၢ်မနုၤလဲၣ်.

^၃ တချုးလၢပှၤမၤလိလံာ်စီဆှံဖိ ဒိးဘျၢထံဒံးဘၣ်န့ၣ်​ အဝဲကဘၣ်မၤထွဲ တၢ်လၢအမၤလိဘၣ်ဝဲလၢ လံာ်စီဆှံအပူၤတဖၣ်လီၤ. (ဖး မးသဲ ၂၈:၁၉, ၂၀ တက့ၢ်.) ဖဲပှၤမၤလိလံာ်စိဆှံဖိ မၤထွဲတၢ်လၢအမၤလိဘၣ်ဝဲအခါ အဝဲကဲထီၣ်​ “ပှၤကူၣ်တၢ်သ့” ဒ်ယ့ၣ်ၡူးဟ့ၣ်တၢ်အဒိ ဘၣ်ဃးဒီး ပှၤသူၣ်ထီၣ်အဟံၣ်လၢ လၢၢ်ခိၣ်အဂ့ၢ်လီၤ. (မးသဲ ၇:၂၄, ၂၅; လူၤကၣ်​ ၆:၄၇, ၄၈) ပမၤစၢၤပှၤမၤလိလံာ်စီဆှံဖိလၢ ကမၤထွဲတၢ်လၢအမၤလိဘၣ်ဝဲတဖၣ်​ ကသ့ဒ်လဲၣ်. ပကတဲသကိး တၢ်ဟ့ၣ်ကူၣ်သၢခါလီၤ.

၄. ပမၤစၢၤပှၤမၤလိလံာ်စီဆှံဖိ ဒ်သိးကဂုာ်ကျဲးစၢး တုၤထီၣ်ထီၣ်ဘးလၢ တၢ်ဒိးဘျၢထံအဂီၢ် ကသ့ဒ်လဲၣ်. (ကွၢ်တၢ်လွံၢ်နၢၣ်​ “မၤစၢၤနပှၤမၤလိ လံာ်စီဆှံဖိလၢ ကပာ်လီၤဖီတၢၣ်ဒီး ကတုၤထီၣ်ထီၣ်ဘးလၢ အဖီတၢၣ်” တက့ၢ်.)

^၄ မၤစၢၤပှၤမၤလိလံာ်စီဆှံဖိ လၢကပာ်လီၤဖီတၢၣ်တဖၣ်တက့ၢ်. ဘၣ်မနုၤအဃိ နကြၢးမၤဒ်န့ၣ်လဲၣ်. ဆိကမိၣ်ကွၢ်တၢ်အဒိအံၤတက့ၢ်. နမ့ၢ်ဘၣ်လဲၤနီကါလၢ တၢ်လီၢ်အယံၤန့ၣ်​ ဘၣ်သ့ၣ်သ့ၣ်​ နကအိၣ်ပတုာ်လၢ တၢ်လီၢ်လၢအဃံလၤ တတီၤတီၤလီၤ. အဃိ တၢ်လီၢ်လၢ နကလဲၤအီၤန့ၣ်​ နကဆိမိၣ်ဘၣ်လၢ အအိၣ်တယံၤလၢၤဘၣ်. ဒ်န့ၣ်အသိး ဖဲပှၤမၤလိလံာ်စီဆှံဖိတဂၤ ပာ်လီၤဖီတၢၣ်ဒီးမၤလၢပှဲၤအဖီတၢၣ်လၢ တၢ်ဆၢကတီၢ်ဖုၣ်ကိာ်ဖိန့ၣ်​ ဘၣ်သ့ၣ်သ့ၣ်​ အဝဲကဆိကမိၣ်ထံ ဖီတၢၣ်လၢ ကဒိးဘျၢထံအဂီၢ်လီၤ. သူတၢ်လွံၢ်နၢၣ်​ လၢအမ့ၢ် “ဖီတၢၣ်” လၢအအိၣ်လၢလံာ် အိၣ်မူလီၤထူလီၤယိာ် ပှဲၤဒီးတၢ်သးခု အပူၤ ဒ်သိးနကမၤစၢၤ ပှၤမၤလိလံာ်စီဆှံဖိလၢ ကပာ်လီၤဖီတၢၣ်တက့ၢ်. ဖဲတၢ်မၤလိ တခါဘၣ်တခါ အကတၢၢ်န့ၣ်​ တဲသကိး ဖီတၢၣ်တဖၣ်လၢ နပှၤမၤလိလံာ်စီဆှံဖိ ပာ်လီၤဝဲန့ၣ်​ အဝဲသ့ၣ်ကမၤထွဲဝဲ ဒ်လဲၣ်န့ၣ်တက့ၢ်. နမ့ၢ်အဲၣ်ဒိးလၢ နပှၤမၤလိလံာ်စီဆှံဖိ ကမၤထွဲဖီတၢၣ်​ လၢအဂၤတဖၣ်အခါ နကွဲးလီၤလၢ တၢ်လီၢ်လီၤဟိလၢအမ့ၢ်ဝဲ “အဂၤ” အပူၤန့ၣ်သ့ဝဲလီၤ. ဖီတၢၣ်တဖၣ်လၢ နပှၤမၤလိလံာ်စီဆှံဖိပာ်လီၤဝဲ ဒ်သိးကမၤလၢပှဲၤဝဲလၢ တၢ်ဆၢကတီၢ်ဖုၣ်ကိာ်ဖိမ့ၢ်ဂ့ၤ ဒီးကမၤလၢပှဲၤဝဲလၢ တၢ်ဆၢကတီၢ်ဖးယံာ်မ့ၢ်ဂ့ၤန့ၣ်​ တဲသကိးဒီးအီၤ ထီဘိတက့ၢ်.

၅. ဒ် မၢ်ကူး ၁၀:၁၇-၂၂ ပာ်ဖျါထီၣ်ဝဲအသိး ယ့ၣ်ၡူးတဲဘၣ်ပှၤထူးပှၤတီၤတဂၤ တၢ်မနုၤလဲၣ်​ ဒီးဘၣ်မနုၤအဃိလဲၣ်.

^၅ မၤစၢၤပှၤမၤလိလံာ်စီဆှံဖိလၢ ကဆီတလဲအတၢ်အိၣ်မူတက့ၢ်. (ဖး မၢ်ကူး ၁၀:၁၇-၂၂ တက့ၢ်.) ယ့ၣ်ၡူးသ့ၣ်ညါဝဲလၢ ပှၤထူးပှၤတီၤတဂၤ ကဆါကွံာ် အစုလီၢ်ခီၣ်ခိၣ်ခဲလၢာ်န့ၣ်​ ကီဝဲဒိၣ်မးလီၤ. (မၢ်ကူး ၁၀:၂၃) ဘၣ်ဆၣ်​ ယ့ၣ်ၡူးမၢပိာ်ခွါတဂၤ ဆီတလဲအတၢ်အိၣ်မူလီၤ. ဘၣ်မနုၤအဃိလဲၣ်. ခီဖျိလၢယ့ၣ်ၡူးအဲၣ်အီၤအဃိလီၤ. တဘျီတခီၣ်​ ဘၣ်သ့ၣ်သ့ၣ်​ ပတအဲၣ်ဒိးဟ့ၣ်ဂံၢ်ဟ့ၣ်ဘါ ပှၤမၤလိလံာ်စီဆှံဖိလၢ ကအိၣ်မူမၤထွဲ တၢ်လၢအမၤလိဘၣ်ဝဲတဖၣ်​ တဘျီဃီဘၣ်. မ့ၢ်လၢပဆိကမိၣ်လၢ အဝဲသ့ၣ်ကဆီတလဲ အတၢ်အိၣ်မူအဂီၢ် တညီဒံးဘၣ်အဃိလီၤ. ဒ်သိးပှၤတဂၤကပာ်တီၢ်ကွံာ် တၢ်အိၣ်မူအလီၢ်လံၤ ဒီးအိၣ်မူက့ၤ တၢ်အိၣ်မူလၢအသီအဂီၢ်န့ၣ်​ ကလိၣ်ဘၣ်ဝဲ တၢ်ဆၢကတီၢ်လီၤ. (ကလီးစဲ ၃:၉, ၁၀) ဘၣ်ဆၣ်​ နမ့ၢ်တဲသကိးဘၣ်ဃးဒီးတၢ်ဂ့ၢ်အံၤလၢ အဆိအချ့န့ၣ်​ အဝဲသ့ၣ်ကဆီတလဲ အတၢ်အိၣ်မူလၢ အဆိအချ့သ့ဝဲလီၤ. ခီဖျိလၢနမၤဒ်အံၤအဃိ နပာ်ဖျါထီၣ်လၢ နသူၣ်အိၣ်သးအိၣ်အီၤလီၤ.—စံးထီၣ်ပတြၢၤ ၁၄၁:၅; ကတိၤဒိ ၂၇:၁၇.

၆. ဒ်သိးပကသ့ၣ်ညါ ပှၤမၤလိလံာ်စီဆှံဖိ အတၢ်ထံၣ်အိၣ်ဒ်လဲၣ်အဂီၢ် ဘၣ်မနုၤအဃိ ပဘၣ်သူတၢ်သံကွၢ်တဖၣ်လဲၣ်.

^၆ ဒ်သိးပကသ့ၣ်ညါ ပှၤမၤလိလံာ်စီဆှံဖိ အတၢ်ထံၣ်အိၣ်ဒ်လဲၣ်အဂီၢ် ပကဘၣ်သံကွၢ်အီၤ ဘၣ်ဃးဒီးတၢ်ဂ့ၢ်တၢ်ကျိၤတဖၣ်လီၤ. သံကွၢ်အီၤတၢ်သံကွၢ်ဒ်သိး နကသ့ၣ်ညါထီၣ်လၢ အနၢ်ပၢၢ်တၢ်ထဲလဲၣ်​ ဒီးအတၢ်နာ် အိၣ်ဒ်လဲၣ်န့ၣ်တက့ၢ်. နမ့ၢ်မၤဒ်အံၤထီဘိန့ၣ်​ ညီဝဲလၢနကတဲသကိး တၢ်ဂ့ၢ်လၢအတူၢ်လိာ်ဘၣ်ဝဲ ကီတဖၣ်လီၤ. လံာ်အိၣ်မူလီၤထူလီၤယိာ် ပှဲၤဒီးတၢ်သးခု န့ၣ်အိၣ်ဝဲဒီးတၢ်သံကွၢ်တဖၣ်လၢ ကမၤစၢၤနၤလီၤ. အဒိ, ဖဲတၢ်မၤလိ ၄ န့ၣ်​ တၢ်သံကွၢ်အိၣ်ဝဲလၢ “နဆိကမိၣ်​ ဖဲနသူယဟိဝၤယွၤအမံၤအခါ အဝဲကတူၢ်ဘၣ်ဝဲဒ်လဲၣ်.” တၢ်မၤလိ ၉ န့ၣ်​ တၢ်သံကွၢ်အိၣ်ဝဲလၢ “ဖဲနဃ့ဘါထုကဖၣ်အခါ နအဲၣ်ဒိးဃ့တၢ်မနုၤလဲၣ်.” ဖဲအခီၣ်ထံးခါန့ၣ်​ ပှၤမၤလိလံာ်စီဆှံဖိ ကစံးဆၢဝဲ တၢ်သံကွၢ်တဖၣ်အံၤအဂီၢ် တညီဝဲဘၣ်. နမၤစၢၤအီၤသ့ ခီဖျိနသိၣ်လိအီၤလၢ အကဆိကမိၣ်ထံ လံာ်စီဆှံအဆၢလၢ အဘၣ်ထွဲလိာ်သးဒီး တၢ်ဂ့ၢ်တဖၣ်​ ဒီးကွၢ်ဃုာ်ဒီးတၢ်ဂီၤလၢလံာ်ပူၤတက့ၢ်.

၇. ပသူတၢ်အိၣ်မူ အတၢ်လဲၤခီဖျိအဂ့ၢ် လၢကမၤစၢၤ ပှၤမၤလိလံာ်စီဆှံဖိ ကသ့ဒ်လဲၣ်.

^၇ ဖဲနပှၤမၤလိလံာ်စီဆှံဖိ သ့ၣ်ညါထီၣ်တၢ်လၢ အကဘၣ်မၤဝဲအခါ သူတၢ်အိၣ်မူအတၢ်လဲၤခီဖျိအဂ့ၢ် ဒ်သိးနကဟ့ၣ်ဂံၢ်ဟ့ၣ်ဘါအီၤလၢ အကမၤပိာ်ထွဲဝဲတက့ၢ်. အဒိ, ပှၤမၤလိလံာ်စီဆှံဖိ မ့ၢ်တထီၣ်တၢ်အိၣ်ဖှိၣ်ရိဖှိၣ်​ ထီဘိဘၣ်န့ၣ်​ ဒုးနဲၣ်အီၤတၢ်ဂီၤမူလၢအမ့ၢ် ယဟိဝၤယွၤသူၣ်အိၣ်သးအိၣ်ယၤဧါ လၢအအိၣ်လၢ “ဃုသ့ၣ်ညါအါထီၣ်” လၢတၢ်မၤလိ ၁၄ အပူၤလီၤ. တၢ်မၤလိအါခါလၢ လံာ်အိၣ်မူလီၤထူလီၤယိာ် ပှဲၤဒီးတၢ်သးခု အပူၤန့ၣ်​ နကထံၣ်ဘၣ်​ ပှၤတၢ်လဲၤခီဖျိတဖၣ်လၢ “မၤလိအါထီၣ်” မ့တမ့ၢ် “ဃုသ့ၣ်ညါအါထီၣ်” အပူၤလီၤ.b ပလီၢ်နသးဒ်သိး နသုတထိၣ်သတြီၤ နပှၤမၤလိလံာ်စီဆှံဖိဒီးပှၤအဂၤ ဒီးတဲအီၤလၢ “ပှၤမၤမ့ၢ်န့ၢ်န့ၣ်​ နၤစ့ၢ်ကီးနမၤန့ၢ်လီၤ.” နကဘၣ်မၤစၢၤအီၤလၢ အကဆၢတဲာ်တၢ်လၢ အနီၢ်ကစၢ်လီၤ. လၢတၢ်န့ၣ်အလီၢ် တဲအီၤဘၣ်ဃးဒီး တၢ်ဂ့ၢ်အရ့ဒိၣ်လၢ အမၤစၢၤပှၤလၢအအိၣ်လၢ တၢ်ဂီၤမူအပူၤ ခီဖျိလၢအမၤထွဲ လံာ်စီဆှံအတၢ်သိၣ်လိန့ၣ်တက့ၢ်. ဘၣ်သ့ၣ်သ့ၣ်​ နဒုးနဲၣ်လံာ်စီဆှံအဆၢလၢအရ့ဒိၣ်​ မ့တမ့ၢ် တၢ်ဂ့ၢ်လၢအကဲဘျုးသ့ဝဲလီၤ. ဒ်လဲၣ်ဂ့ၤဒ်လဲၣ်ဂ့ၤ တဲဘၣ်အီၤလၢ ယဟိဝၤယွၤမၤစၢၤပှၤတဂၤန့ၣ်​ လၢကျဲဒ်လဲၣ်.

၈. ပမၤစၢၤပပှၤမၤလိလံာ်စီဆှံဖိလၢ ကအဲၣ်အါထီၣ်ယဟိဝၤယွၤ ကသ့ဒ်လဲၣ်.

^၈ မၤစၢၤပှၤမၤလိလံာ်စီဆှံဖိ လၢကအဲၣ်ယဟိဝၤယွၤတက့ၢ်. နမၤစၢၤအီၤကသ့ဒ်လဲၣ်. မၤစၢၤနပှၤမၤလိလံာ်စီဆှံဖိ ဒ်သိးကသ့ၣ်ညါအါထီၣ်​ ယဟိဝၤယွၤ အတၢ်ဂ့ၤတၢ်ဝါတဖၣ်တက့ၢ်. ဒီးမၤစၢၤအီၤဒ်သိး အဝဲကထံၣ်ဝဲလၢ ယဟိဝၤယွၤမ့ၢ် ကစၢ်ယွၤလၢအသးခု ဒီးအဆီၣ်ထွဲမၤစၢၤ ပှၤလၢအအဲၣ်အီၤတဖၣ်လီၤ. (၁ တံၤမသ့း ၁:၁၁; ဧ့ၤဘြံၤ ၁၁:၆) တဲဘၣ်နပှၤမၤလိလံာ်စီဆှံဖိလၢ အဝဲမ့ၢ်မၤထွဲတၢ်ဂ့ၢ်တၢ်ကျိၤတဖၣ်န့ၣ်​ အကဒိးန့ၢ်ဘၣ်​ အဘျုးအဖှိၣ်ဒ်လဲၣ်န့ၣ်လီၤ. ဒီးတဲဘၣ်နပှၤမၤလိလံာ်စီဆှံဖိလၢ တၢ်အဘျုးအဖှိၣ်လၢအဒိးန့ၢ်ဘၣ်ဝဲတဖၣ်န့ၣ်​ မ့ၢ်လၢကစၢ်ယွၤအဲၣ်အီၤ အဃိလီၤ. (ယၡါယၤ ၄၈:၁၇, ၁၈) နပှၤမၤလိလံာ်စီဆှံဖိအတၢ်အဲၣ်​ ကစၢ်ယွၤမ့ၢ်ဒိၣ်ထီၣ်န့ၣ်​ အဝဲကသးအိၣ်​ ဆီတလဲအတၢ်အိၣ်မူလီၤ.—၁ ယိၤဟၣ်​ ၅:၃.

ဒုးသ့ၣ်ညါ နပှၤမၤလိလံာ်စီဆှံဖိဒီး ဒီပုၢ်ဝဲၢ်မုၣ်ခွါတဖၣ်

၉. ဒ် မၢ်ကူး ၁၀:၂၉, ၃၀ ပာ်ဖျါထီၣ်ဝဲအသိး ပှၤလၢအတူၢ်ဆါအသး ဒ်သိးကကဲထီၣ်​ ခရံာ်အပျဲၢ်အဘီၣ်အဂီၢ်န့ၣ်​ တၢ်မနုၤမၤစၢၤအီၤလဲၣ်.

^၉ ဒ်သိးပှၤမၤလိလံာ်စီဆှံဖိ ကတုၤထီၣ်ထီၣ်ဘးလၢ တၢ်ဒိးဘျၢထံအဂီၢ် အကဘၣ်တူၢ်ဆါအသးလီၤ. ဒ်ပိာ်ခွါအထူးအတီၤလၢထးတဂၤန့ၣ်အသိး ပှၤမၤလိလံာ်စီဆှံဖိတနီၤ ကဘၣ်တူၢ်ၡူကွံာ် အတၢ်ထူးတၢ်တီၤတဖၣ်လီၤ. အဝဲသ့ၣ်အတၢ်ဖံးတၢ်မၤ မ့ၢ်တလီၤပလိာ်အသးဒီး လံာ်စီဆှံအတၢ်ဟံးစုနဲၣ်ကျဲဘၣ်န့ၣ်​ အဝဲသ့ၣ်ကဘၣ်ဃု တၢ်မၤလၢအသီတခါလီၤ. ဘၣ်သ့ၣ်သ့ၣ်​ အဝဲသ့ၣ်အါဂၤ ကဘၣ်ပာ်တ့ၢ်ကွံာ် အတံၤသကိးလၢ တအဲၣ်ယဟိဝၤယွၤတဖၣ်လီၤ. အဂၤတနီၤ မ့ၢ်လၢအဟံၣ်ဖိဃီဖိ တကၠဲးယဟိဝၤပှၤအုၣ်အသးဘၣ်အဃိ ကပာ်တ့ၢ်ကွံာ်အဝဲသ့ၣ်လီၤ. ယ့ၣ်ၡူးသ့ၣ်ညါဝဲလၢ ပှၤတနီၤနီၤ ကပာ်တ့ၢ်ကွံာ် တၢ်သ့ၣ်တဖၣ်အံၤအဂီၢ် တညီဝဲဘၣ်. ဘၣ်ဆၣ်​ ယ့ၣ်ၡူးအၢၣ်လီၤဝဲလၢ ပှၤလၢအပိာ်အခံတဖၣ်န့ၣ်​ တၢ်လၢအဝဲသ့ၣ်တူၢ်ၡူဝဲတဖၣ်န့ၣ်​ တကဲထီၣ်တၢ်ကလီကလီဘၣ်. လၢတၢ်န့ၣ်အလီၢ် အဝဲသ့ၣ်ကဒိးန့ၢ်ဘၣ်တၢ်ဆိၣ်ဂ့ၤ ခီဖျိ ကဒိးန့ၢ်ဘၣ်​ အဟံၣ်ဖိဃီဖိလၢ နီၢ်သးတခီလီၤ. (ဖး မၢ်ကူး ၁၀:၂၉, ၃၀ တက့ၢ်.) နမၤစၢၤပှၤမၤလိလံာ်စီဆှံဖိလၢ ကဒိးန့ၢ်ဘၣ်ဝဲ အဟံၣ်ဖိဃီဖိလၢ နီၢ်သးတခီကသ့ဒ်လဲၣ်.

၁၀. ဒီပုၢ်ဝဲၢ်ခွါမဲညူၤ အတၢ်လဲၤခီဖျိန့ၣ်​ နမၤလိန့ၢ်တၢ်မနုၤလဲၣ်.

^၁၀ ရ့လိာ်သးဒီး ပှၤမၤလိလံာ်စီဆှံဖိတက့ၢ်. တၢ်လၢအရ့ဒိၣ်န့ၣ်​ မ့ၢ်ဝဲ ပကဘၣ်ပာ်ဖျါထီၣ်​ တၢ်အဲၣ်တၢ်ကဟုကယာ်လၢ ပပှၤမၤလိလံာ်စီဆှံဖိအအိၣ်လီၤ. ဘၣ်မနုၤအဃိလဲၣ်. ပာ်သူၣ်ပာ်သး ဒီပုၢ်ဝဲၢ်ခွါမဲညူၤ လၢအအိၣ်လၢကီၢ်မဲးကစံၣ်ကိၣ်​ အတၢ်ကတိၤန့ၣ်တက့ၢ်. အဝဲနီၣ်ထီၣ်ဘၣ်က့ၤ ဖဲအဝဲကဲပှၤမၤလိလံာ်စီဆှံဖိအခါ ဒီးအတဲဝဲလၢ “တချုးလၢပစးထီၣ်မၤလိ လံာ်စီဆှံဒံးဘၣ်န့ၣ်​ ပှၤလၢအသိၣ်လိယၤလံာ်စီဆှံတဂၤန့ၣ်​ သံကွၢ်ယၤလၢ ယတၢ်အိၣ်သးအိၣ်ဒ်လဲၣ်. အဝဲမၤစၢၤယၤလၢ ယကပာ်သးမုာ်မုာ်ဒီး တဲဖျါထီၣ်ယတၢ်ကီတၢ်ခဲတဖၣ်လီၤ. ယတူၢ်ဘၣ်လၢ အဝဲသးအိၣ်ယၤနီၢ်နီၢ်လီၤ.”

၁၁. ပမ့ၢ်ရ့ဒီးပှၤမၤလိလံာ်စီဆှံဖိန့ၣ်​ ကကဲဘျုးလၢ အဝဲသ့ၣ်အဂီၢ်ဒ်လဲၣ်.

^၁၁ ရ့ဒီးနပှၤမၤလိလံာ်စီဆှံဖိ ဒ်ယ့ၣ်ၡူးရ့ဒီး အပျဲၢ်အဘီၣ်တဖၣ်တက့ၢ်. (ယိၤဟၣ်​ ၃:၂၂) တၢ်ခွဲးတၢ်ယာ်မ့ၢ်အိၣ်န့ၣ်​ ကွဲမုာ်နပှၤမၤလိလံာ်စီဆှံဖိလၢ အလဲၤထီၣ်လဲၤထီတဖၣ်လၢ နဟံၣ်ဒ်သိး ကအီၣ်သကိးအီသကိးတၢ်ဒီးနၤ မ့တမ့ၢ် ကကွၢ်သကိး JW တၢ်ဂီၤမူန့ၣ်တက့ၢ်. ဖဲနံၤသဘျ့အဆၢကတီၢ်န့ၣ်​ ပမ့ၢ်ကွဲမုာ်ပပှၤမၤလိလံာ်စီဆှံဖိလၢ ပဟံၣ်န့ၣ်​ အဝဲသ့ၣ်ကပာ်လုၢ်ပာ်ပှ့ၤဝဲ ဒီးတတူၢ်ဘၣ်လၢ အအိၣ်သယုၢ်သညိဘၣ်. ဒီပုၢ်ဝဲၢ်ခွါခၤစံဘှဲ လၢအအိၣ်လၢယူၤကၣ်ဒၣ်​ တဲဝဲလၢ “ယသ့ၣ်ညါအါထီၣ်​ ယဟိဝၤယွၤ ခီဖျိယရ့လိာ်ဘၣ်သး ဒီးပှၤလၢအမၤလိယၤ လံာ်စီဆှံတဂၤန့ၣ်လီၤ. ယထံၣ်ဘၣ်လၢ ယဟိဝၤယွၤ ကဟုကယာ်ဝဲ အခ့အပှၤသပှၢ်ကတၢၢ် ဒီးအဝဲသ့ၣ်​ အိၣ်ဒီးတၢ်သးခုလီၤ. အဃိ ယၤစ့ၢ်ကီးယလီကီ တၢ်အိၣ်မူဒ်အံၤလီၤ.”

၁၂. ဘၣ်မနုၤအဃိ ပကဘၣ်လဲၤကိး ပှၤစံၣ်တဲၤတဲလီၤတၢ်ဖိ အဂၤတဖၣ်လၢ ပတၢ်မၤလိလံာ်စီဆှံအပူၤလဲၣ်.

^၁၂ ကွဲမုာ်ဒီပုၢ်ဝဲၢ်အဂၤလၢ ကလဲၤပိာ်နခံလၢ တၢ်မၤလိလံာ်စီဆှံန့ၣ်တက့ၢ်. တဘျီတခီၣ်​ နကတူၢ်ဘၣ်လၢ အညီဒိၣ်မးလၢ နကလဲၤမၤလိလံာ်စီဆှံ ထဲနနီၢ်ကစၢ် မ့တမ့ၢ် လဲၤကိးပှၤလၢ အလဲၤပိာ်ညီနုၢ်နခံန့ၣ်လီၤ. ပမၤဒ်အံၤန့ၣ်​ အညီလၢပဂီၢ်ဒိၣ်မးလီၤ. ဘၣ်ဆၣ်​ ပမ့ၢ်လဲၤကိး ပှၤစံၣ်တဲၤတဲလီၤတၢ်ဖိအသီန့ၣ်​ ကမၤစၢၤဝဲ ပှၤမၤလိလံာ်စီဆှံဖိဒိၣ်မးလီၤ. ဒီပုၢ်ဝဲၢ်ခွါဒၤမ့ထြံၤ လၢအအိၣ်လၢ တၢ်လီၢ်မိၤဒိဘၤန့ၣ်​ အတဲဝဲလၢ “ပှၤစံၣ်တဲၤတဲလီၤတၢ်ဖိ လၢအဟဲပိာ် ပှၤလၢအသိၣ်လိယၤ လံာ်စီဆှံအခံန့ၣ်​ အဝဲသ့ၣ်တဂၤဘၣ်တဂၤ ၡဲပၠးလံာ်စီဆှံအဂ့ၢ်လၢ ကျဲအါဘိလီၤ. အဃိ အဝဲသ့ၣ်မၤစၢၤယၤလၢ ယကမၤထွဲ တၢ်လၢယမၤလိဘၣ်တဖၣ်​ လၢကျဲအကလုာ်ကလုာ်လီၤ. ဖဲယလဲၤထီၣ်​ တၢ်အိၣ်ဖှိၣ်အဆိကတၢၢ်တဘျီန့ၣ်​ ယတမဲာ်ဆှးအါအါဘၣ်​ မ့ၢ်လၢယသ့ၣ်ညါတ့ၢ် ဒီပုၢ်ဝဲၢ်မုၣ်ခွါအါဂၤ အဃိလီၤ.”

၁၃. ဘၣ်မနုၤအဃိ ပကဘၣ်မၤစၢၤ ပှၤမၤလိလံာ်စီဆှံဖိလၢ ကဟဲထီၣ်​ တၢ်အိၣ်ဖှိၣ်အဂီၢ်လဲၣ်.

^၁၃ မၤစၢၤနပှၤမၤလိလံာ်စီဆှံဖိ လၢကဟဲထီၣ်​ တၢ်အိၣ်ဖှိၣ်တက့ၢ်. ဘၣ်မနုၤအဃိလဲၣ်. မ့ၢ်လၢယဟိဝၤယွၤ အဲၣ်ဒိးဝဲလၢ ပှၤလၢအဘူၣ်ထီၣ်ဘါထီၣ်အီၤတဖၣ်န့ၣ်​ ကအိၣ်ဖှိၣ်ရိဖှိၣ်တပူၤဃီလီၤ. တၢ်လဲၤထီၣ်တၢ်အိၣ်ဖှိၣ်န့ၣ်​ မ့ၢ်ဝဲတၢ်ဘူၣ်ထီၣ်ဘါထီၣ်​ ယဟိဝၤယွၤလီၤ. (ဧ့ၤဘြံၤ ၁၀:၂၄, ၂၅) တကးဒံးဘၣ်​ ဒီပုၢ်ဝဲၢ်မုၣ်ခွါတဖၣ်န့ၣ်​ မ့ၢ်ဝဲပနီၢ်သးဟံၣ်ဖိဃီဖိလီၤ. ဖဲပထီၣ်တၢ်အိၣ်ဖှိၣ်​ ဃုာ်ဒီးအဝဲသ့ၣ်အခါ လီၤဂာ်ဒ်ပအီၣ်သကိး တၢ်အီၣ်လၢအဝံၣ်အဘဲ လၢဟံၣ်တဖျၢၣ်ဃီအပူၤလီၤ. ဖဲနမၤစၢၤနပှၤမၤလိလံာ်စီဆှံဖိလၢ ကဟဲထီၣ်တၢ်အိၣ်ဖှိၣ်အခါ မ့ၢ်ဒၣ်နမၤစၢၤအီၤလၢ အဝဲကခါထီၣ်ခီၣ်ခါလၢ တၢ်ဒိးဘျၢထံအဂီၢ်လီၤ. ဘၣ်ဆၣ်​ ဘၣ်သ့ၣ်သ့ၣ်ကကီလၢ အဝဲကဟဲထီၣ်တၢ်အိၣ်ဖှိၣ်အဂီၢ်လီၤ. လံာ်အိၣ်မူလီၤထူလီၤယိာ် ပှဲၤဒီးတၢ်သးခု န့ၣ်မၤစၢၤ နပှၤမၤလိလံာ်စီဆှံဖိလၢ ကမၤနၢၤကွံာ်အတၢ်ကီတၢ်ခဲ ဒ်သိးကထီၣ်ဘၣ်တၢ်အိၣ်ဖှိၣ်အဂီၢ်လီၤ.

၁၄. ပထိၣ်ဟူးထိၣ်ဂဲၤထီၣ်​ ပပှၤမၤလိလံာ်စီဆှံဖိလၢ ကဟဲထီၣ်တၢ်အိၣ်ဖှိၣ်​ ကသ့ဒ်လဲၣ်.

^၁၄ သူတၢ်မၤလိ ၁၀ လၢလံာ်အိၣ်မူလီၤထူလီၤယိာ် ပှဲၤဒီးတၢ်သးခု လၢကထိၣ်ဟူးထိၣ်ဂဲၤထီၣ်​ နပှၤမၤလိလံာ်စီဆှံဖိလၢ ကထီၣ်တၢ်အိၣ်ဖှိၣ်အဂီၢ်တက့ၢ်. ပှၤစံၣ်တဲၤတဲလီၤတၢ်ဖိလၢ အအိၣ်ဒီးတၢ်လဲၤခီဖျိအါန့ၣ်​ ပှၤမၢအဝဲသ့ၣ်လၢ ကသိၣ်လိကွၢ်ဝဲ တၢ်မၤလိ ၁၀ တချုးဖဲ ပှၤရၤလီၤလံာ်အံၤဒံးဘၣ်အခါ ဒီးအဝဲသ့ၣ်တဲဝဲလၢ တၢ်မၤလိအံၤမၤစၢၤ ပှၤမၤလိလံာ်စီဆှံဖိလၢ ကဟဲထီၣ်ဝဲ တၢ်အိၣ်ဖှိၣ်အဂီၢ်လီၤ. ပတဘၣ်အိၣ်ခိးတုၤလၢ တၢ်မၤလိ ၁၀ မးကွဲမုာ်အဝဲသ့ၣ်လၢ ကဟဲထီၣ်တၢ်အိၣ်ဖှိၣ်တဂ့ၤ. ကွဲမုာ်အဝဲသ့ၣ်လၢ ကဟဲထီၣ်တၢ်အိၣ်ဖှိၣ်​ လၢအဆိအချ့ဒီး ကဆဲးထီၣ်တၢ်အိၣ်ဖှိၣ်​ ထီဘိတက့ၢ်. ပှၤမၤလိလံာ်စီဆှံဖိတဖၣ်န့ၣ်​ ကအိၣ်ဒီးတၢ်ကီတၢ်ခဲ တဂၤတမံၤလီၤ. အဃိ အဝဲသ့ၣ်အတၢ်လိၣ်ဘၣ်အိၣ်ဒ်လဲၣ်န့ၣ်​ မၤစၢၤအဝဲသ့ၣ်တက့ၢ်. အဝဲသ့ၣ်မ့ၢ်တဟဲထီၣ်​ တၢ်အိၣ်ဖှိၣ်လၢ အဆိအချ့ဘၣ်န့ၣ်​ တဘၣ်သးဟးဂီၤတဂ့ၤ. ဆဲးအိၣ်ဒီးတၢ်ဝံသးစူၤ ဒီးဆဲးကွဲမုာ်အဝဲသ့ၣ်တက့ၢ်.

မၤစၢၤနပှၤမၤလိလံာ်စီဆှံဖိလၢ ကမၤနၢၤကွံာ် အတၢ်ပျံၤတၢ်ဖုးတဖၣ်

၁၅. ပှၤမၤလိလံာ်စီဆှံဖိတဖၣ်န့ၣ်​ ကပျံၤတၢ်မနုၤလဲၣ်.

^၁၅ ဖဲနကဲထီၣ်​ ယဟိဝၤပှၤအုၣ်အသးသီသီအခါ နပျံၤတၢ်ဖုးတၢ်န့ၣ်​ နနီၣ်ဘၣ်ဒံးဧါ. ဘၣ်သ့ၣ်သ့ၣ်​ နကပျံၤလၢ နဟးစံၣ်တဲၤတဲလီၤတၢ်လၢ ပှၤဂၤအမဲာ်ညါတဘူၣ်ဘၣ်. ဒီးနဘၣ်ယိၣ်လၢ နဟံၣ်ဖိဃီဖိ ဒီးနတံၤသကိး ကထီဒါနၤလီၤ. မ့မ့ၢ်ဒ်န့ၣ်န့ၣ်​ နနၢ်ပၢၢ်စၢၤနပှၤမၤလိလံာ်စီဆှံဖိသ့လီၤ. ယ့ၣ်ၡူးတဲဝဲလၢ ပှၤတနီၤကပျံၤတၢ်ဖုးတၢ်လီၤ. ဘၣ်ဆၣ်​ ယ့ၣ်ၡူးဟ့ၣ်ဂံၢ်ဟ့ၣ်ဘါ ပှၤလၢအပိာ်အခံတဖၣ်လၢ တဘၣ်ဟ့ၣ်အခွဲးလၢ အတၢ်ပျံၤတၢ်ဖုးတဖၣ်​ ကမၤပတုာ်အီၤလၢ ကမၤယဟိဝၤယွၤအတၢ်မၤအဂီၢ်ဘၣ်. (မးသဲ ၁၀:၁၆, ၁၇, ၂၇, ၂၈) ယ့ၣ်ၡူးမၤစၢၤ ပှၤလၢအပိာ်အခံတဖၣ်လၢ ကမၤနၢၤကွံာ် အတၢ်ပျံၤတၢ်ဖုးဒ်လဲၣ်. ဒီးနကွၢ်လိ မၤဒိးယ့ၣ်ၡူးကသ့ဒ်လဲၣ်.

၁၆. နသိၣ်လိနပှၤမၤလိလံာ်စီဆှံဖိလၢ ကတဲဘၣ်ပှၤဂၤ တၢ်လၢအမၤလိဘၣ်ဝဲတဖၣ်​ ကသ့ဒ်လဲၣ်.

^၁၆ သိၣ်လိပှၤမၤလိလံာ်စီဆှံဖိလၢ ကတဲဘၣ်ပှၤဂၤဘၣ်ဃးဒီး တၢ်လၢအမၤလိဘၣ်ဝဲတဖၣ်န့ၣ်တက့ၢ်. ဖဲယ့ၣ်ၡူးမၢအပျဲၢ်အဘီၣ်တဖၣ်လၢ ကစံၣ်တဲၤတဲလီၤတၢ်အခါ အဝဲသ့ၣ်​ ကဘၣ်ယိၣ်တၢ်လီၤ. ဘၣ်ဆၣ်​ ယ့ၣ်ၡူးမၤစၢၤအဝဲသ့ၣ်ခီဖျိ တဲဘၣ်အဝဲသ့ၣ်လၢ ကဘၣ်လဲၤစံၣ်တဲၤတဲလီၤတၢ်ဖဲလဲၣ်ဒီး ကဘၣ်စံၣ်တဲၤတဲလီၤ တၢ်ဂ့ၢ်မနုၤလဲၣ်န့ၣ်လီၤ. (မးသဲ ၁၀:၅-၇) ပကွၢ်လိမၤဒိး ယ့ၣ်ၡူးကသ့ဒ်လဲၣ်. မၤစၢၤနပှၤမၤလိလံာ်စီဆှံဖိ ဒ်သိးကသ့ၣ်ညါဝဲလၢ အဝဲသ့ၣ်ကဘၣ်စံၣ်တဲၤတဲလီၤလၢ မတဂၤအအိၣ်လဲၣ်. အဒိ, သံကွၢ်အဝဲသ့ၣ်လၢ မ့ၢ်အသ့ၣ်ညါ ပှၤလၢအအဲၣ်ဒိးမၤလိ လံာ်စီဆှံတၢ်မ့ၢ်တၢ်တီအိၣ်ဧါ. အမ့ၢ်အိၣ်န့ၣ်​ မၤစၢၤအီၤလၢ အဝဲကဘၣ်တဲတၢ်ဒ်လဲၣ်ဒီး ဒုးနဲၣ်အီၤတၢ်ယိယိဖိလၢ အကဘၣ်မၤဝဲန့ၣ်တက့ၢ်. တၢ်ခွဲးတၢ်ယာ်မ့ၢ်အိၣ်ထီၣ်န့ၣ်​ ကၠီးလိနသးဒီးနပှၤမၤလိလံာ်စီဆှံဖိ ဒီးသူ “ပှၤတနီၤတဲဝဲ” ဒီး “ပှၤတနီၤသံကွၢ်ဝဲ” လၢအအိၣ်လၢ လံာ်အိၣ်မူလီၤထူလီၤယိာ် ပှဲၤဒီးတၢ်သးခု အပူၤတက့ၢ်. ဖဲနမၤဒ်န့ၣ်အခါ မ့ၢ်ဒၣ်နသိၣ်လိ နပှၤမၤလိလံာ်စီဆှံဖိလၢ ကသ့ၣ်ညါသူလံာ်စီဆှံဒီး စံးဆၢက့ၤပှၤဂၤလၢ တၢ်ကူၣ်သ့အပူၤလီၤ.

၁၇. ပဖးပၠး မးသဲ ၁၀:၁၉, ၂၀, ၂၉-၃၁ လၢကမၤစၢၤ ပှၤမၤလိလံာ်စီဆှံဖိလၢ ကနာ်န့ၢ်ယဟိဝၤယွၤကသ့ဒ်လဲၣ်.

^၁၇ မၤစၢၤပှၤမၤလိလံာ်စီဆှံဖိလၢ ကနာ်န့ၢ်ယဟိဝၤယွၤတက့ၢ်. ယ့ၣ်ၡူးတဲဘၣ်​ အပျဲၢ်အဘီၣ်တဖၣ်လၢ ယဟိဝၤယွၤ ကမၤစၢၤအဝဲသ့ၣ်​ မ့ၢ်လၢယဟိဝၤယွၤအဲၣ်​ အဝဲသ့ၣ်အဃိလီၤ. (ဖး မးသဲ ၁၀:၁၉, ၂၀, ၂၉-၃၁ တက့ၢ်.) တဲဘၣ်နပှၤမၤလိလံာ်စီဆှံဖိလၢ ယဟိဝၤယွၤအဲၣ်အဝဲသ့ၣ်စ့ၢ်ကီးလီၤ. မၤစၢၤအဝဲသ့ၣ်ဒ်သိး ကသန့ၤအသးလၢ ယဟိဝၤယွၤ ခီဖျိလၢဃ့ဘါထုကဖၣ်​ ဘၣ်ဃးဒီး အဖီတၢၣ်တဖၣ်တက့ၢ်. ဒီပုၢ်ဝဲၢ်ခွါဖြဲၤစံၣ်ၡဲၤ လၢအအိၣ်လၢကီၢ်ဖိလဲ(န်)န့ၣ်​ တဲဝဲလၢ “ဖဲယထံၣ်ဘၣ်​ ယဟိဝၤယွၤ စံးဆၢ ပှၤလၢ အမၤလိယၤလံာ်စီဆှံ အတၢ်ဃ့ဘါထုကဖၣ်အခါ ယၤစ့ၢ်ကီး ယစးထီၣ်ဃ့ဘါထုကဖၣ်လီၤ. ယထံၣ်ဘၣ်လၢ ယဟိဝၤယွၤမၤစၢၤယၤ ဖဲယကဘၣ်ဃ့ခွဲးလၢ ယတၢ်မၤလီၢ် ဒ်သိးယကလဲၤထီၣ်ဘၣ်​ တၢ်အိၣ်ဖှိၣ်ရိဖှိၣ်​ ဒီးတၢ်အိၣ်ဖှိၣ်ဖးဒိၣ်တဖၣ်လီၤ.

၁၈. ဒီပုၢ်ဝဲၢ်မုၣ်ခွါတဖၣ်​ သိၣ်လိပှၤဂၤလံာ်စီဆှံန့ၣ်​ ယဟိဝၤယွၤထံၣ်ဝဲဒ်လဲၣ်.

^၁၈ ယဟိဝၤယွၤသူၣ်အိၣ်သးအိၣ်​ ပှၤမၤလိလံာ်စီဆှံဖိ သပှၢ်ကတၢၢ်လီၤ. ယဟိဝၤယွၤ သ့ၣ်ညါဝဲ ပှၤသိၣ်လိတၢ်ဖိတဖၣ်​ မၤတၢ်ဆူၣ်ဆူၣ်လၢ ကမၤစၢၤပှၤဂၤ ဒ်သိးဒီး ကဘူးထီၣ်ဒီးအီၤအဂီၢ် အဃိ အဝဲအဲၣ်ဘၣ်ဝဲ အဝဲသ့ၣ်ဒိၣ်မးလီၤ. (ယၡါယၤ ၅၂:၇) ခဲအံၤနပှၤမၤလိလံာ်စီဆှံဖိ မ့ၢ်တအိၣ်ဘၣ်ဒၣ်လဲာ် နမၤစၢၤပှၤမၤလိလံာ်စီဆှံဖိလၢအဂၤတဖၣ်​ ဒ်သိးအဝဲသ့ၣ်​ ကတုၤထီၣ်ထီၣ်ဘးလၢ တၢ်ဒိးဘျၢထံအဂီၢ်သ့ ခီဖျိ နမၤသကိးဃုာ်တၢ်ဒီး ပှၤစံၣ်တဲၤတဲလီၤတၢ်ဖိ အဂၤတဖၣ်အဃိလီၤ.