တၢ်မၤလိ ၂၅
သုတဘၣ်မၤလီၤဃံၢ် “ပှၤအဆံးတဖၣ်အံၤ” တဂ့ၤ
“သုတဆိကမိၣ်ဆံး ပှၤလၢ ပှၤအဆံးတဖၣ်အံၤအကျါ နီတဂၤတဂ့ၤ.” —မးသဲ ၁၈:၁၀.
တၢ်သးဝံၣ် ၁၁၃ တၢ်ဃူတၢ်ဖိးလၢ အိၣ်ဒီးပှၤ
တၢ်မၤလိအံၤ အတၢ်တိာ်ပာ်a
၁. ယဟိဝၤယွၤ မၤတ့ၢ်တၢ်လၢ ပဝဲတဂၤစုာ်စုာ် အဂီၢ်ဒ်လဲၣ်.
ယဟိဝၤယွၤမူၤဃီၤဝဲ ပှၤတဂၤစုာ်စုာ် လၢအအိၣ်လီၤ. (ယိၤဟၣ် ၆:၄၄) ယဟိဝၤယွၤမၤဝဲဒ်အံၤန့ၣ် အပာ်ဖျါထီၣ်ဝဲ တၢ်မနုၤလဲၣ်. ယဟိဝၤယွၤ သမံသမိးကွၢ်ဝဲ ပှၤလၢအကကွဲၢ်လၢအကထိတဖၣ် ဒီးအထံၣ်တၢ်လုၢ်ဒိၣ်ပှ့ၤဒိၣ်အိၣ်လၢနပူၤ လၢအမ့ၢ်ဝဲ နတၢ်သူၣ်ဘျၢသးဘျၢ ဒီးနတၢ်အဲၣ်အီၤလီၤ. (၁ ကွဲးနီၣ်တၢ် ၂၈:၉) ယဟိဝၤယွၤ သ့ၣ်ညါနၤ, နၢ်ပၢၢ်နၤ ဒီးအဲၣ်နၤလီၤ. နသ့ၣ်ညါဘၣ်ဒ်အံၤန့ၣ် နတသးခုဧီၤ.
၂. ယဟိဝၤယွၤ သူၣ်အိၣ်သးအိၣ်ပှၤန့ၣ် ယ့ၣ်ၡူးထိၣ်သတြီၤဝဲဒီး မနုၤလဲၣ်.
၂ ယဟိဝၤယွၤ သူၣ်အိၣ်သးအိၣ်နၤ ဒီးဒီပုၢ်ဝဲၢ်မုၣ်ခွါတဖၣ်ခဲလၢာ် သပှၢ်ကတၢၢ်လီၤ. ဒ်သိး ပကနၢ်ပၢၢ်တၢ်ဂ့ၢ်အံၤအဂီၢ် ယ့ၣ်ၡူးထိၣ်သတြီၤဝဲ ယဟိဝၤယွၤဒီး ပှၤကွၢ်သိလီၤ. သိအဒုတကယၤအကျါ မ့ၢ်လီၤမၢ်တဒုန့ၣ် ပှၤကွၢ်သိကမၤဝဲ တၢ်မနုၤလဲၣ်. “အဝဲကပာ်တ့ၢ်ကွံာ်အသိ ၉၉ ဒုလၢကစၢၢ်ကျါ ဒီးကလဲၤဃုက့ၤ အသိလၢ အဟးဖျိးတဒုန့ၣ် တမ့ၢ်ဘၣ်ဧါ.” ဖဲပှၤကွၢ်သိ ထံၣ်က့ၤသိအခါ အဝဲတသးထီၣ်အသိဘၣ်. လၢန့ၣ်အလီၢ် အဝဲကသးခုဒိၣ်မးလီၤ. ပမၤလိန့ၢ်တၢ်မနုၤလဲၣ်. သိတဒုစုာ်စုာ်န့ၣ် မ့ၢ်တၢ်လုၢ်ဒိၣ်ပှ့ၤဒိၣ်လၢ ယဟိဝၤယွၤအဂီၢ်လီၤ. ယ့ၣ်ၡူးတဲဝဲလၢ “ယပၢ်အိၣ်လၢမူခိၣ်န့ၣ် တအဲၣ်ဒိးဝဲလၢ ပှၤအဆံးတဖၣ်အံၤအကျါ တဂၤဒၣ်လဲာ် ကဟးဂီၤဝဲဘၣ်.”—မးသဲ ၁၈:၁၂-၁၄.
၃. လၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်.
၃ ပတအဲၣ်ဒိး ကဲထီၣ်တၢ်လီၤဃံၢ်လၢ ပဒီပုၢ်ဝဲၢ်မုၣ်ခွါ တဂၤဂ့ၤတဂၤဂ့ၤ အဂီၢ်ဘၣ်. အဃိ ပဟးဆှဲးကသ့ဒ်လဲၣ်. ဒီးပှၤမ့ၢ်မၤဘၣ်ဒိဘၣ်ပှၤန့ၣ် ပကဘၣ်မၤဒ်လဲၣ်. လၢတၢ်မၤလိအံၤအပူၤ ပကစံးဆၢတၢ်သံကွၢ်တဖၣ်အံၤလီၤ. ဘၣ်ဆၣ် အဆိကတၢၢ် ပကမၤလိအါထီၣ် ဘၣ်ဃးဒီး “ပှၤအဆံးတဖၣ်အံၤ” အဂ့ၢ် လၢအအိၣ်လၢ မးသဲ အဆၢဒိၣ် ၁၈ အပူၤလီၤ.
“ပှၤအဆံးတဖၣ်အံၤ” မ့ၢ်မတဂၤသ့ၣ်တဖၣ်လဲၣ်
၄. “ပှၤအဆံးတဖၣ်အံၤ” မ့ၢ်မတဂၤသ့ၣ်တဖၣ်လဲၣ်.
၄ “ပှၤအဆံးတဖၣ်အံၤ” မ့ၢ်ဝဲယ့ၣ်ၡူးအပျဲၢ်အဘီၣ် ခဲလၢာ်လီၤ. အဝဲသ့ၣ်သးနံၣ် အါမ့ၢ်ဂ့ၤ, စှၤမ့ၢ်ဂ့ၤ အဝဲသ့ၣ် လီၤဂာ် “ဒ်ဖိသၣ်တဖၣ်အသိး” အဃိ သးအိၣ်ဒိကနၣ်ဝဲ တၢ်လၢယ့ၣ်ၡူးသိၣ်လိဝဲတဖၣ်လီၤ. (မးသဲ ၁၈:၃) အဝဲသ့ၣ်ကလုာ်ဒူၣ်, တၢ်ဆဲးတၢ်လၤ, တၢ်ပာ်သူၣ်ပာ်သး ဒီးတၢ်ထံၣ်တဖၣ် မ့ၢ်တဒ်သိးလိာ်အသး သနာ်က့ အဝဲသ့ၣ်ခဲလၢာ် နာ်ဝဲယ့ၣ်ၡူးခရံာ်လီၤ. ဒီးယ့ၣ်ၡူးခရံာ်စ့ၢ်ကီး အဲၣ်အဝဲသ့ၣ်ဒိၣ်မးလီၤ.—မးသဲ ၁၈:၆; ယိၤဟၣ် ၁:၁၂.
၅. ဖဲပှၤတဂၤ အတၢ်စံးတၢ်ကတိၤဒီးတၢ်ဖံးတၢ်မၤ ကဲထီၣ်တၢ်လီၤဃံၢ် မ့တမ့ၢ် မၤဆူးမၤဆါပှၤအခါ ယဟိဝၤယွၤတူၢ်ဘၣ်ဝဲဒ်လဲၣ်.
၅ ကယဲၢ် “ပှၤအဆံးတဖၣ်အံၤ” န့ၣ်မ့ၢ်ဝဲ ပှၤလုၢ်ဒိၣ်ပှ့ၤဒိၣ်လၢ ယဟိဝၤယွၤအဂီၢ်လီၤ. ဒ်သိးပကသ့ၣ်ညါ ယဟိဝၤယွၤအတၢ်တူၢ်ဘၣ် အိၣ်ဒ်လဲၣ်အဂီၢ် ပကဆိကမိၣ်ကွၢ် ဘၣ်ဃးဒီး ပတၢ်တူၢ်ဘၣ် အိၣ်လၢဖိသၣ်တဖၣ်အဖီခိၣ်ဒ်လဲၣ်န့ၣ်လီၤ. ခီဖျိလၢဖိသၣ်တဖၣ်န့ၣ် အနီၢ်ဆံး, တၢ်လဲၤခီဖျိတအိၣ်ဘၣ်, ဒီးတၢ်သ့ၣ်ညါနၢ်ပၢၢ် တထီၣ်ဘးဒ် ပှၤနီၢ်ဒိၣ်အသိးဘၣ် အဃိ ပအဲၣ်ဒိးဒီသဒၢ အဝဲသ့ၣ်လီၤ. ဖဲပှၤမၤဆူးမၤဆါ ပှၤတဂၤဂၤအခါ ပကွၢ်တမုာ်ဘၣ်. လီၤဆီဒၣ်တၢ် ဖဲပထံၣ်ဘၣ် ပှၤမၤဆူးမၤဆါဖိသၣ်အခါ ပသးဒိၣ်ထီၣ်တၢ်လီၤ. ဒ်န့ၣ်အသိး ယဟိဝၤယွၤအဲၣ်ဒိး ဒီသဒၢပှၤလီၤ. အဃိ ဖဲပှၤတဂၤဂၤ အတၢ်စံးတၢ်ကတိၤဒီး အတၢ်ဖံးတၢ်မၤ မ့ၢ်ကဲထီၣ် တၢ်လီၤဃံၢ်လၢပဂီၢ် မ့တမ့ၢ် ပှၤမၤဆူးမၤဆါပှၤအခါ ယဟိဝၤယွၤ သးဒိၣ်ထီၣ်တၢ်လီၤ.—ယၡါယၤ ၆၃:၉; မၢ်ကူး ၉:၄၂.
၆. ဒ် ၁ ကရံၣ်သူး ၁:၂၆-၂၉ ပာ်ဖျါထီၣ်ဝဲအသိး ပှၤဟီၣ်ခိၣ်ဖိထံၣ် ယ့ၣ်ၡူးအပျဲၢ်အဘီၣ်တဖၣ်ဒ်လဲၣ်.
၆ ယ့ၣ်ၡူးအပျဲၢ်အဘီၣ်တဖၣ် လီၤဂာ်ဒီး “ပှၤအဆံးတဖၣ်” လၢကျဲဒ်လဲၣ်. ပှၤဟီၣ်ခိၣ်ဖိ ဆိကမိၣ်ဒိၣ်ဝဲ ပှၤဒ်လဲၣ်တကလုာ်လဲၣ်. ပှၤလၢအတၢ်အိၣ်တၢ်ယၢၤ, အမံၤဟူသၣ်ဖျါ ဒီးပှၤလၢအစိကမီၤဒိၣ်တဖၣ်လီၤ. ဘၣ်ဆၣ် မ့မ့ၢ် ယ့ၣ်ၡူးအပျဲၢ်အဘီၣ်တဖၣ်န့ၣ် တမ့ၢ်ပှၤဒ်န့ၣ်ဘၣ်. အဃိ ပှၤထံၣ်အဝဲသ့ၣ်ဒ် “ပှၤအဆံးတဖၣ်” အသိးလီၤ. (ဖး ၁ ကရံၣ်သူး ၁:၂၆-၂၉ တက့ၢ်.) ဘၣ်ဆၣ် ယဟိဝၤယွၤတထံၣ်အဝဲသ့ၣ်ဒ်န့ၣ်ဘၣ်.
၇. ယဟိဝၤယွၤအဲၣ်ဒိးဝဲလၢ ပကထံၣ်ပဒီပုၢ်ဝဲၢ်မုၣ်ခွါတဖၣ်ဒ်လဲၣ်.
၇ ပှၤလၢအမၤ ယဟိဝၤယွၤအတၢ်မၤန့ၢ် အနံၣ်ဖးယံာ်လံမ့ၢ်ဂ့ၤ, ပှၤလၢအန့ၢ်တၢ်မ့ၢ်တၢ်တီသီသီမ့ၢ်ဂ့ၤ ယဟိဝၤယွၤ အဲၣ်အဝဲသ့ၣ်ခဲလၢာ်လီၤ. ပဒီပုၢ်ဝဲၢ်မုၣ်ခွါခဲလၢာ်န့ၣ် မ့ၢ်ပှၤလုၢ်ဒိၣ်ပှ့ၤဒိၣ်လၢ ယဟိဝၤယွၤအဂီၢ်လီၤ. အဃိ ပဝဲစ့ၢ်ကီး ပကြၢးထံၣ်အဝဲသ့ၣ်ဒ်န့ၣ်လီၤ. ပ “အဲၣ်ဒီပုၢ်ဝဲၢ်တဖၣ် ခဲလၢာ်” တမ့ၢ်ထဲ အဝဲသ့ၣ်တနီၤဘၣ်. (၁ ပ့းတရူး ၂:၁၇) တသ့ဖဲအသ့ ပကဘၣ်ဂုာ်ကျဲးစၢး ဒီသဒၢ ဒီးကွၢ်ထွဲအဝဲသ့ၣ်လီၤ. ပမ့ၢ်သ့ၣ်ညါလၢ အဝဲသ့ၣ်သးဘၣ်ဒိလၢ ပဃိန့ၣ် ပတဘၣ်ဆိကမိၣ်လၢ တၢ်တကဲထီၣ်အသး နီတမံၤဘၣ်န့ၣ်တဂ့ၤ. ဒီးတဘၣ်ဆိကမိၣ်လၢ အဝဲသ့ၣ်ကြၢးပျၢ် ပတၢ်ကမၣ်ဒီး သးပ့ၤနီၣ်ကွံာ် တၢ်ဂ့ၢ်န့ၣ်တဂ့ၤ. ဘၣ်မနုၤအဃိ ပှၤတနီၤအသးဘၣ်ဒိညီဝဲလဲၣ်. ဘၣ်သ့ၣ်သ့ၣ် ခီဖျိလၢ ဒီပုၢ်ဝဲၢ်မုၣ်ခွါတနီၤ ဒိၣ်ထီၣ်တၢ်လီၢ်တၢ်ကျဲ အဃိ အဝဲသ့ၣ်ဆိကမိၣ် ဆံးလီၤအသးလီၤ. အဂၤတနီၤန့ၣ် ဒိးန့ၢ်ဘၣ်တၢ်မ့ၢ်တၢ်တီသီသီအဃိ ဖဲပှၤမၤကမၣ်အဝဲသ့ၣ်အခါ အဝဲသ့ၣ်တသ့ၣ်ညါဝဲလၢ တၢ်စၢဃာ်ပှၤဂၤအတၢ်ကမၣ်န့ၣ် မ့ၢ်တၢ်လၢအကမၣ်လီၤ. တၢ်မ့ၢ်ကဲထီၣ်အသး ဒ်လဲၣ်ဂ့ၤဒ်လဲၣ်ဂ့ၤ ပကြၢးမၤဃူမၤဖိးတၢ်လီၤ. ပှၤလၢအသးဘၣ်ဒိညီညီတဂၤန့ၣ် ကြၢးဆီတလဲအသး ဒီးဂုာ်ကျဲးစၢးအိၣ်ဒီး တၢ်ထံၣ်လၢအဂ့ၤလီၤ. အမ့ၢ်မၤဝဲဒ်န့ၣ်န့ၣ် အကအိၣ်ဒီးတၢ်သးခု ဒီးတၢ်ရ့လိာ်သးဒီးပှၤဂၤ လၢအဂ့ၤလီၤ.
ပကဘၣ်ထံၣ်ပှၤဂၤတဖၣ် ဂ့ၤဒိၣ်န့ၢ်ဒံးပှၤ
၈. တၢ်ပာ်သူၣ်ပာ်သး မနုၤတဖၣ်ဒိၣ်စိလၢ ယ့ၣ်ၡူးအပျဲၢ်အဘီၣ်တဖၣ် အဖီခိၣ်လဲၣ်.
၈ ဘၣ်မနုၤအဃိ ယ့ၣ်ၡူးတဲဘၣ်ဃးဒီး “ပှၤအဆံးတဖၣ်အံၤ” အဂ့ၢ်လဲၣ်. မ့ၢ်လၢ ယ့ၣ်ၡူးအပျဲၢ်အဘီၣ်တဖၣ် သံကွၢ်အီၤလၢ “ပှၤအဒိၣ်ကတၢၢ်လၢ မူခိၣ်အဘီအမုၢ်အပူၤန့ၣ် ကမ့ၢ် မတၤတဂၤလဲၣ်.” (မးသဲ ၁၈:၁) ဖဲန့ၣ်အဆၢကတီၢ် ပှၤယူဒၤဖိအါဂၤ အဲၣ်ဒိးလၢပှၤဂၤ ကဆိကမိၣ်ဒိၣ်အဝဲသ့ၣ် ဒီးထံၣ်လၢအဝဲသ့ၣ်အိၣ်ဒီး အလီၢ်အလၤလီၤ. ပှၤကူၣ်ဘၣ်ကူၣ်သ့တဂၤတဲဝဲလၢ “တၢ်အရ့ဒိၣ်ကတၢၢ်လၢ ပှၤတဂၤအတၢ်အိၣ်မူအပူၤန့ၣ် မ့ၢ်ဝဲတၢ်လၤကပီၤ ဒီးတၢ်မံၤဟူသၣ်ဖျါလီၤ.”
၉. ယ့ၣ်ၡူးအပျဲၢ်အဘီၣ်တဖၣ်န့ၣ် ကဘၣ်မၤတၢ်မနုၤလဲၣ်.
၉ ယ့ၣ်ၡူးသ့ၣ်ညါဝဲလၢ ပှၤယူဒၤဖိအါဂၤန့ၣ် ဆိကမိၣ်ဒိၣ်လီၤအနီၢ်ကစၢ်သးလၢ အဂ့ၤဒိၣ်န့ၢ်ဒံးပှၤဂၤလီၤ. ဒီးယ့ၣ်ၡူးအပျဲၢ်အဘီၣ်တဖၣ် ကမၤလီၤမၢ်ကွံာ် တၢ်ထံၣ်ဒ်အံၤအဂီၢ်တညီဝဲဘၣ်. အဃိ ယ့ၣ်ၡူးတဲအဝဲသ့ၣ်လၢ “ပှၤလၢအဒိၣ်ကတၢၢ်လၢ သုကျါတဂၤန့ၣ် မ်အကဲထီၣ်ဒ်သိးဒီး ပှၤလၢအသးစၢ်ကတၢၢ် ဒီးပှၤလၢ အတီခိၣ်ရိၤမဲတၢ်တဂၤန့ၣ် မ်အကဲထီၣ် ဒ်သိးဒီး ပှၤပျဲၢ်တက့ၢ်.” (လူၤကၣ် ၂၂:၂၆) ပအိၣ်ဒီးတၢ်ပာ်သူၣ်ပာ်သး ဒ်သိးဒီး “ပှၤလၢအသးစၢ်ကတၢၢ်” ဖဲပ “ဆိကမိၣ်လၢပှၤဂၤတဖၣ် ဒိၣ်န့ၢ်ဒံး” ပှၤအခါလီၤ. (ဖံလံးပံၤ ၂:၃) ပမ့ၢ်အိၣ်ဒီး တၢ်ပာ်သူၣ်ပာ်သးဒ်အံၤန့ၣ် ပတကဲထီၣ်တၢ်လီၤဃံၢ်လၢ ပှၤဂၤအဂီၢ်ညီညီလၢၤဘၣ်.
၁၀. ပကမၤထွဲ စီၤပီလူးအတၢ်ဟ့ၣ်ကူၣ်ဒ်လဲၣ်.
၁၀ ပဒီပုၢ်ဝဲၢ်မုၣ်ခွါတဖၣ်န့ၣ် အဂ့ၤဒိၣ်န့ၢ်ဒံးပှၤလၢ ကျဲအဘိဘိလီၤ. ပမ့ၢ်သးစၢၢ်ဆၢအဝဲသ့ၣ် တၢ်ဂ့ၤတၢ်ဝါတဖၣ်န့ၣ် ပကထံၣ်အဝဲသ့ၣ် ဒ်အံၤအဂီၢ်ညီဝဲလီၤ. စီၤပီလူးဟ့ၣ်ကူၣ် ဒီပုၢ်ဝဲၢ်လၢ ကရံၣ်သူးတဖၣ်န့ၣ် ပကြၢးဆိကမိၣ်ထံအီၤလီၤ. စီၤပီလူးတဲဝဲလၢ “မတၤဒုးလီၤဆီနၤဒီး ပှၤအဂၤလဲၣ်. တၢ်လၢအအိၣ်ဒီးနၤလၢ နတဒိးန့ၢ်ဘၣ်အီၤလၢ ကစၢ်ယွၤအအိၣ်န့ၣ် အိၣ်တမံၤမံၤဧါ. ဒီးနမ့ၢ်ဒိးန့ၢ်ဘၣ်အီၤန့ၣ် ဘၣ်မနုၤအဃိ နပာ်ကဖၢလၢနသး ဒ်သိးနမၤန့ၢ်အီၤလၢ နနီၢ်ကစၢ် အဂံၢ်အဘါလဲၣ်.” (၁ ကရံၣ်သူး ၄:၇) အဃိ ပတအဲၣ်ဒိးလၢ ပှၤကဆိကမိၣ်ဒိၣ်ပှၤဒီး ထံၣ်လၢ ပဂ့ၤဒိၣ်န့ၢ်ဒံးပှၤဂၤန့ၣ်ဘၣ်. ဒီပုၢ်ဝဲၢ်ခွါလၢ အဟ့ၣ်လီၤတၢ်စံၣ်တဲၤတဲလီၤတၢ် ဖၠဲးဒိၣ်မးတဂၤ ဒီးဒီပုၢ်ဝဲၢ်မုၣ်လၢ အအိၣ်ဒီးတၢ်သ့တၢ်ဘၣ်လၢ အစးထီၣ်တၢ်မၤလိလံာ်စီဆှံအါခါန့ၣ် ထီဘိ အဝဲသ့ၣ်ကြၢးဟ့ၣ် တၢ်လၤကပီၤလၢ ယဟိဝၤယွၤအအိၣ်လီၤ.
ပျၢ်ကွံာ်ပှၤဂၤအတၢ်ကမၣ် “လၢသုသးဒီဖျၢၣ်”
၁၁. ယ့ၣ်ၡူးဟ့ၣ်တၢ်အဒိ ဘၣ်ဃးဒီး စီၤပၤဒီးအကုၢ်န့ၣ် ပမၤလိန့ၢ်တၢ်မနုၤလဲၣ်.
၁၁ ဖဲယ့ၣ်ၡူးဟ့ၣ်ပလီၢ် အပျဲၢ်အဘီၣ်တဖၣ်လၢ အသုတကဲထီၣ် တၢ်လီၤဃံၢ်လၢ ပှၤဂၤအဂီၢ်တဂ့ၤ ဝံၤအလီၢ်ခံ ယ့ၣ်ၡူးဟ့ၣ်တၢ်အဒိ ဘၣ်ဃးဒီး စီၤပၤဒီးအကုၢ်လီၤ. ကုၢ်တဂၤအံၤ အကမၢ်အိၣ်ဒီး စီၤပၤအါမးလီၤ. ဘၣ်ဆၣ် စီၤပၤမၤလီၤတူာ်ကွံာ် ကုၢ်တဂၤအံၤအကမၢ် ခဲလၢာ်လီၤ. လၢခံကုၢ်တဂၤအံၤ တမၤလီၤတူာ်ကွံာ် ကုၢ်လၢအဂၤတဂၤ အကမၢ်လၢ အဘၣ်ဟ့ၣ်အီၤ ထဲစှၤစှၤဖိန့ၣ်ဘၣ်. လၢတၢ်ဂ့ၢ်အံၤအဃိ စီၤပၤမၢပှၤဖၢနုာ်ကုၢ်တဂၤအံၤ လၢဃိာ်ပူၤလီၤ. ပမၤလိန့ၢ်တၢ်မနုၤလဲၣ်. ယ့ၣ်ၡူးတဲဝဲလၢ “သုဝဲတဂၤစုာ်စုာ် သုမ့ၢ်တပျၢ်ကွံာ် သုဒီပုၢ်ဝဲၢ် အတၢ်ကမၣ် လၢသုသးဒီဖျၢၣ်ဘၣ်န့ၣ် ယပၢ်အိၣ်လၢမူခိၣ်စ့ၢ်ကီး ကမၤသုဒ်န့ၣ် အသိးလီၤ.”—မးသဲ ၁၈:၂၁-၃၅.
၁၂. ပမ့ၢ်တပျၢ်ပှၤဂၤ အတၢ်ကမၣ်ဘၣ်န့ၣ် ပမၤဘၣ်ဒိဘၣ် ပှၤဂၤလၢကျဲဒ်လဲၣ်.
၁၂ ကုၢ်တဂၤအံၤ အတၢ်ဖံးတၢ်မၤန့ၣ် တမၤဘၣ်ဒိထဲ အနီၢ်ကစၢ်ဘၣ် မၤဘၣ်ဒိပှၤအဂၤတဖၣ် စ့ၢ်ကီးလီၤ. အဆိကတၢၢ် အဝဲတပာ်ဖျါထီၣ် တၢ်သးကညီၤလၢ ကုၢ်လၢအဂၤတဂၤအဖီခိၣ်ဘၣ်ဒီး “အဝဲလဲၤမၢပှၤဖၢနုာ် ကုၢ်အဝဲန့ၣ်လၢ ဃိာ်ပူၤတုၤလၢ အလိးက့ၤအီၤခဲလၢာ်လီၤ.” ခံထံၣ်တထံၣ် အဝဲမၤဘၣ်ဒိဘၣ် ကုၢ်လၢအဂၤလၢအထံၣ်ဘၣ် တၢ်လၢအမၤဝဲတဖၣ်လီၤ. ဖဲ “ကုၢ်လၢအဂၤတဖၣ် ထံၣ်ဘၣ်ဝဲတၢ်ကဲထီၣ် အသးဒ်န့ၣ်အခါ အဝဲသ့ၣ် အသးတမုာ်ဘၣ် ဖးဒိၣ်ညါလီၤ.” ဒ်န့ၣ်အသိး တၢ်လၢပမၤတဖၣ်န့ၣ် အမၤဘၣ်ဒိပှၤဂၤသ့ဝဲလီၤ. ဖဲပှၤဂၤမၤကမၣ်ဘၣ်ပှၤအခါ ပမ့ၢ်တပျၢ်အဝဲသ့ၣ် အတၢ်ကမၣ်ဘၣ်န့ၣ် တၢ်မနုၤကကဲထီၣ်အသးလဲၣ်. အဆိကတၢၢ် ပမၤဘၣ်ဒိဘၣ်အဝဲသ့ၣ် ခီဖျိ ပတတူၢ်လိာ် အဝဲအတၢ်ဃ့ကညးပှၤဘၣ်, ပတကနၣ်ဃုာ်အီၤ ဒီးပတပာ်ဖျါထီၣ် တၢ်အဲၣ်လၢအဖီခိၣ်ဘၣ်. ခံထံၣ်တထံၣ် ဖဲပှၤလၢတၢ်အိၣ်ဖှိၣ်အပူၤတဖၣ် ထံၣ်ဝဲလၢပတအိၣ်ဃူအိၣ်ဖိးဒီး ပှၤတဂၤန့ၣ်ဘၣ်အခါ အဝဲသ့ၣ်ကရ့ဒီးပှၤအဂီၢ် တညီဝဲလၢၤဘၣ်.
မ့ၢ်နကဟံးဃာ်ပှၤဂၤ အတၢ်ကမၣ်ဧါ မ့တမ့ၢ် နကပျၢ်ကွံာ်ပှၤဂၤ အတၢ်ကမၣ်လၢ နသးဒီဖျၢၣ်ဧါ (ကွၢ်လံာ်အဆၢ ၁၃-၁၄)b
၁၃. ဒီပုၢ်ဝဲၢ်မုၣ်လၢ အမၤပှၤလဲၤလၢညါတဂၤ အတၢ်လဲၤခီဖျိန့ၣ် နမၤလိန့ၢ်ဘၣ်တၢ်မနုၤလဲၣ်.
၁၃ ဖဲပပျၢ်ကွံာ် ပဒီပုၢ်ဝဲၢ်မုၣ်ခွါတဖၣ် အတၢ်ကမၣ်အခါ ကဲဘျုးလၢပဂီၢ် ဒီးပှၤဂၤအဂီၢ်လီၤ. ဒီပုၢ်ဝဲၢ်မုၣ်ခရံၢ်စတိၤ လၢအမၤပှၤလဲၤလၢညါန့ၣ် လဲၤခီဖျိဘၣ်ဝဲဒ်အံၤလီၤ. ဒီပုၢ်ဝဲၢ်မုၣ်လၢ တၢ်အိၣ်ဖှိၣ်ပူၤတဂၤ မၤဘၣ်ဒိဘၣ်အသးလီၤ. ဒီပုၢ်ဝဲၢ်မုၣ်ခရံၢ်စတိၤ တဲဝဲလၢ “ဒီပုၢ်ဝဲၢ်မုၣ်တဂၤအံၤ အတၢ်ကတိၤ လၢအဆူၣ်အကိၤန့ၣ် အမၤဘၣ်ဒိယသး အလီၤဂာ်ဒ်သိးပှၤဆဲးယၤဒီးဒီလီၤ. ယတအဲၣ်ဒိးလဲၤစံၣ်တဲၤတဲလီၤတၢ် ဒီးအီၤတပူၤဃီလၢၤဘၣ်. လၢတၢ်စံၣ်တဲၤတဲလီၤတၢ်မၤအပူၤန့ၣ် ယတၢ်သးဆူၣ်ဒီးတၢ်သးခု တအိၣ်လၢၤဘၣ်.” ဒီပုၢ်ဝဲၢ်မုၣ်ခရံၢ်စတိၤ ဆိကမိၣ်ဝဲလၢ အသးထီၣ်တၢ်န့ၣ် အကြၢးဝဲဘၣ်ဝဲလီၤ. ဘၣ်ဆၣ် အဝဲပျၢ်ကွံာ်ဒီပုၢ်ဝဲၢ်မုၣ်အတၢ်ကမၣ် ဒီးတဆိကမိၣ်တၢ်လၢ အနီၢ်ကစၢ်အဂီၢ်လၢၤဘၣ်. အဃိ လၢတၢ်ဆီၣ်လီၤသးအပူၤ အဝဲမၤထွဲဝဲ လံာ်စီဆှံအတၢ်ဟ့ၣ်ကူၣ်ဖဲ တၢ်မၤလိလၢ တၢးထီခိးတၢ် လါအီးကထိဘၢၣ် ၁၅, ၁၉၉၉ လၢအခိၣ်တီမ့ၢ်ဝဲ “Forgive From Your Heart” န့ၣ်လီၤ. ဒီပုၢ်ဝဲၢ်မုၣ်ခရံၢ်စတိၤ တဲဝဲလၢ “ခဲအံၤ ယသ့ၣ်ညါထီၣ်လၢ ပဝဲခဲလၢာ် ပဂုာ်ကျဲးစၢး ကူထီၣ်သိးထီၣ်နီၢ်သီ ဒီးယဟိဝၤယွၤ ပျၢ်ကွံာ်ပတၢ်ကမၣ်လၢာ်လၢာ်ဆ့ဆ့ ကိးနံၤဒဲးလီၤ. ယသူၣ်ခုသးခု ဒီးယသးမုာ်ထီၣ်က့ၤလီၤ.”
၁၄. ဒ် မးသဲ ၁၈:၂၁, ၂၂ ပာ်ဖျါထီၣ်ဝဲအသိး တၢ်မၢဖိပ့းတရူးအိၣ်ဒီး တၢ်ကီတၢ်ခဲမနုၤလဲၣ် ဒီးတၢ်လၢယ့ၣ်ၡူးတဲက့ၤအီၤန့ၣ် ပမၤလိန့ၢ်တၢ်မနုၤလဲၣ်.
၁၄ ပသ့ၣ်ညါလၢ ပကြၢးပျၢ်ပှၤဂၤ အတၢ်ကမၣ်လီၤ. ဘၣ်ဆၣ် တဘျီတခီၣ်န့ၣ် ကီလၢပကပျၢ်ကွံာ် ပှၤဂၤအတၢ်ကမၣ်လီၤ. တၢ်မၢဖိပ့းတရူးစ့ၢ်ကီး တူၢ်ဘၣ်ဝဲဒ်န့ၣ်လီၤ. (ဖး မးသဲ ၁၈:၂၁, ၂၂ တက့ၢ်.) တၢ်မနုၤမၤစၢၤပှၤ ကသ့လဲၣ်. အဆိကတၢၢ် ဆိကမိၣ်ထံ ယဟိဝၤယွၤ ပျၢ်ကွံာ်နတၢ်ကမၣ် ထဲလဲၣ်န့ၣ်တက့ၢ်. (မးသဲ ၁၈:၃၂, ၃၃) ပတကြၢးဒီး ယဟိဝၤယွၤအတၢ်ပျၢ်တၢ်ကမၣ်ဘၣ်. ဘၣ်ဆၣ် အဝဲသးအိၣ်ပျၢ်ကွံာ် ပတၢ်ကမၣ် လၢာ်လၢာ်ဆ့ဆ့လီၤ. (စံးထီၣ်ပတြၢၤ ၁၀၃:၈-၁၀) တကးဒံးဘၣ် လံာ်စီဆှံတဲဝဲလၢ “ပဝဲသ့ၣ်တဖၣ် ပအိၣ်ဒီးမူဒါလၢ ပကအဲၣ်လိာ်ကွံလိာ်ပသး တဂၤဒီးတဂၤလီၤ.” အဃိ ပတၢ်ဃုထၢတအိၣ်ဘၣ် ပကဘၣ်ပျၢ်ကွံာ် ပှၤဂၤအတၢ်ကမၣ်လီၤ. ပမ့ၢ်တပျၢ်ကွံာ် ပဒီပုၢ်ဝဲၢ်မုၣ်ခွါတဖၣ် အတၢ်ကမၣ်ဘၣ်န့ၣ် ပကမၢ်ထီၣ်ဒီးအဝဲသ့ၣ်လီၤ. (၁ ယိၤဟၣ် ၄:၁၁) ခံ, ဆိကမိၣ်ထီၣ်လၢ ပမ့ၢ်ပျၢ်ကွံာ်ပှၤဂၤ အတၢ်ကမၣ်န့ၣ် ကကဲဘျုးဒ်လဲၣ်န့ၣ်တက့ၢ်. ပမ့ၢ်ပျၢ်ကွံာ်ပှၤဂၤ အတၢ်ကမၣ်န့ၣ် မ့ၢ်ဒၣ်ပမၤစၢၤဘၣ်ပှၤလၢအမၤ ကမၣ်ဘၣ်ပှၤတဂၤ, မၤဃူမၤဖိးတၢ်လၢ တၢ်အိၣ်ဖှိၣ်အပူၤ, ပဒီသဒၢပတၢ်ရ့လိာ်ဒီး ယဟိဝၤယွၤ ဒီးပသးမုာ်ထီၣ်က့ၤဝဲလီၤ. (၂ ကရံၣ်သူး ၂:၇; ကလီးစဲ ၃:၁၄) လၢခံ ဃ့ဘါထုကဖၣ်လၢ ယဟိဝၤယွၤအအိၣ် ဒ်သိးပကပျၢ်ကွံာ် ပှၤဂၤအတၢ်ကမၣ်အဂီၢ်တက့ၢ်. တဘၣ်ဟ့ၣ်မုၣ်ကီၤလံၢ်အခွဲးလၢ ကမၤဟးဂီၤ နတၢ်ဃူတၢ်ဖိး ဒီးဒီပုၢ်ဝဲၢ်မုၣ်ခွါတဖၣ်တဂ့ၤ. (အ့းဖ့းစူး ၄:၂၆, ၂၇) ပလိၣ်ဘၣ် ယဟိဝၤယွၤအတၢ်မၤစၢၤ ဒ်သိးပကဟးဆှဲး မုၣ်ကီၤလံၢ်အပျံၤအကွီၤ အဂီၢ်လီၤ.
တဘၣ်လီၤဃံၢ်လၢ ပှၤဂၤအဃိတဂ့ၤ
၁၅. ဒ် ကလီးစဲ ၃:၁၃ ပာ်ဖျါထီၣ်ဝဲအသိး ဒီပုၢ်ဝဲၢ်တဂၤဂၤ အတၢ်အိၣ်ထီၣ်အိၣ်လီၤ မ့ၢ်မၤတံာ်တာ်နသးန့ၣ် နကဘၣ်မၤဒ်လဲၣ်.
၁၅ ဒီပုၢ်ဝဲၢ်တဂၤအတၢ်အိၣ်ထီၣ်အိၣ်လီၤ မ့ၢ်မၤတံာ်တာ်နသးန့ၣ် နကမၤဒ်လဲၣ်. ဂုာ်ကျဲးစၢးမၤဃူမၤဖိးတၢ်တက့ၢ်. နတၢ်တူၢ်ဘၣ်အိၣ်ဒ်လဲၣ်န့ၣ် တဲဘၣ်ယဟိဝၤယွၤတက့ၢ်. ဃ့ဘါထုကဖၣ်လၢ ယဟိဝၤယွၤကဆိၣ်ဂ့ၤဒီပုၢ်ဝဲၢ်အံၤ ဒီးနကထံၣ်န့ၢ် အတၢ်ဂ့ၤတၢ်ဝါ ဒ်ယဟိဝၤယွၤထံၣ်ဝဲအသိးတက့ၢ်. (လူၤကၣ် ၆:၂၈) နကွၢ်ကပာ် အတၢ်ဂံၢ်စၢ်ဘါစၢ် မ့ၢ်တန့ၢ်ဘၣ်န့ၣ် ဃုကျဲလၢ နကတဲသကိးတၢ်ဒီးအီၤတက့ၢ်. ပမ့ၢ်ဆိကမိၣ်ထီၣ်လၢ ပဒီပုၢ်ဝဲၢ်တအဲၣ်ဒိး မၤဘၣ်ဒိပှၤဘၣ်န့ၣ် ပသးကမုာ်ထီၣ်ဝဲလီၤ. (မးသဲ ၅:၂၃, ၂၄; ၁ ကရံၣ်သူး ၁၃:၇) ဖဲနလဲၤတဲသကိးတၢ်ဒီးအီၤအခါ နတဘၣ်တဲတၢ်လၢ ကကဲထီၣ်တၢ်လီၤဃံၢ်လၢအဂီၢ်ဘၣ်. ဘၣ်ဆၣ် အဝဲမ့ၢ်တအဲၣ်ဒိး မၤဃူမၤဖိးတၢ်ဘၣ်ခီမီၤ. နကမၤဒ်လဲၣ်. လံာ်စီဆှံတဲဝဲလၢ “ဆဲးဝံသးစူၤလိာ်သုသး” တဂၤဒီးတဂၤတက့ၢ်. အဃိ နတဘၣ်ဟ့ၣ်အၡူတဂ့ၤ. (ဖး ကလီးစဲ ၃:၁၃ တက့ၢ်.) တၢ်လၢအရ့ဒိၣ်ကတၢၢ်န့ၣ် နတဘၣ်ဟံးဃာ် ပှၤဂၤအတၢ်ကမၣ်ဘၣ်. နမ့ၢ်ဟံးဃာ်ပှၤဂၤ အတၢ်ကမၣ်န့ၣ် ကမၤဘၣ်ဒိ နတၢ်ရ့လိာ်သးဒီး ယဟိဝၤယွၤလီၤ. နတဘၣ်ပျဲ တၢ်တမံၤဂ့ၤတမံၤဂ့ၤလၢ ကမၤလီၤဃံၢ်နၤဘၣ်. နမ့ၢ်မၤဒ်န့ၣ်န့ၣ် နပာ်ဖျါထီၣ်လၢ နအဲၣ်ယဟိဝၤယွၤအါန့ၢ်ဒံး တၢ်အဂၤတဖၣ်လီၤ.—စံးထီၣ်ပတြၢၤ ၁၁၉:၁၆၅.
၁၆. ပဝဲတဂၤစုာ်စုာ် ပအိၣ်ဒီးမူဒါ မနုၤလဲၣ်.
၁၆ ပသးခုဒိၣ်မးလၢ ပမၤသကိးဘၣ် ယဟိဝၤယွၤအတၢ်မၤဒီး ပဒီပုၢ်ဝဲၢ်မုၣ်ခွါတဖၣ် ဒ် “သိတဖုဃီ” လၢ “ပှၤကွၢ်သိတဂၤဃီ” အသိးလီၤ. (ယိၤဟၣ် ၁၀:၁၆) လံာ် Organized to Do Jehovah’s Will, ကဘျံးပၤ ၁၆၅ န့ၣ်တဲဝဲလၢ “မ့ၢ်လၢ ပဒိးန့ၢ်ဘၣ်တၢ်အဘျုးအဖှိၣ်လၢ ပတၢ်ဃူတၢ်ဖိးအဃိ ပမူဒါအိၣ်စ့ၢ်ကီးလၢ ပကဘၣ်ပၢၤဃာ်အီၤလီၤ.” အဃိ ပကဘၣ် “သိၣ်လိပသးလၢ ပကထံၣ် ပဒီပုၢ်ဝဲၢ်တဖၣ် ဒ်ယဟိဝၤယွၤထံၣ်ဝဲအသိးလီၤ.” လၢယဟိဝၤယွၤအဂီၢ်န့ၣ် ပဝဲခဲလၢာ် ပမ့ၢ် “ပှၤဆံးတဖၣ်” လၢအလုၢ်ဒိၣ်ပှ့ၤဒိၣ်လၢအဂီၢ်လီၤ. မ့ၢ်နထံၣ် နဒီပုၢ်ဝဲၢ်မုၣ်ခွါတဖၣ် ဒ်န့ၣ်အသိးစ့ၢ်ကီးဧါ. ယဟိဝၤယွၤထံၣ်ဝဲဒီး ပာ်လုၢ်ပာ်ပှ့ၤကယဲၢ်တၢ်လၢ နမၤစၢၤနဒီပုၢ်ဝဲၢ်မုၣ်ခွါ ဒီးကဟုကယာ်အဝဲသ့ၣ်န့ၣ်လီၤ.—မးသဲ ၁၀:၄၂.
၁၇. ပပာ်လီၤပသးလၢ ပကမၤတၢ်မနုၤလဲၣ်.
၁၇ ပအဲၣ်ပဒီပုၢ်ဝဲၢ်မုၣ်ခွါတဖၣ်ခဲလၢာ်လီၤ. အဃိ ပကမၤထွဲတၢ်ဟ့ၣ်ကူၣ်လၢ ရိမ့ၤ ၁၄:၁၃ အပူၤလၢ အတဲဝဲ “သုကဘၣ်ပာ်လီၤသုသး ဂၢၢ်ဂၢၢ်ကျၢၤကျၢၤ ဒ်သိး သုသုတပာ်လီၤ တၢ်ဘၣ်တိၢ်အလီၢ် မ့တမ့ၢ် တၢ်လီၤဃံၢ်အလီၢ် လၢဒီပုၢ်ဝဲၢ် တဂၤဂၤအမဲာ်ညါ တဂ့ၤအဂီၢ်လီၤ.” ပကထံၣ်လၢ ပဒီပုၢ်ဝဲၢ်မုၣ်ခွါတဖၣ် ဂ့ၤဒိၣ်န့ၢ်ဒံးပှၤ ဒီးပကပျၢ်အဝဲသ့ၣ်တၢ်ကမၣ်လၢ ပသးဒီဖျၢၣ်ညါလီၤ. မ်ပသုတပျဲလၢ ပကလီၤဃံၢ်လၢ ပှၤဂၤအဃိတဂ့ၤ. လၢတၢ်န့ၣ်အလီၢ် “ပဂုာ်ကျဲးစၢး မၤတၢ်လၢ အကဒုးအိၣ်ထီၣ် တၢ်ဃူတၢ်ဖိး ဒီးတၢ်လၢကကဲထီၣ် တၢ်ဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ” အဂီၢ်လီၤ.—ရိမ့ၤ ၁၄:၁၉.
တၢ်သးဝံၣ် ၁၃၀ ပျၢ်ကွံာ်ပှၤဂၤအတၢ်ကမၣ်
a ခီဖျိလၢ ပမ့ၢ်ပှၤတလၢတပှဲၤဘၣ်အဃိ ပတၢ်ကတိၤ ဒီးတၢ်မၤတဖၣ်န့ၣ် မၤဘၣ်ဒိ ပဒီပုၢ်ဝဲၢ်မုၣ်ခွါတဖၣ်သ့လီၤ. ပမ့ၢ်မၤဘၣ်ဒိဘၣ် ပှၤဂၤန့ၣ်ပကြၢးမၤဒ်လဲၣ်. မ့ၢ်ပဂုာ်ကျဲးစၢးဒ်သိး ပကမၤဃူမၤဖိးက့ၤပသးဒီး ပဒီပုၢ်ဝဲၢ်မုၣ်ခွါဧါ. မ့ၢ်ပလဲၤဃ့ပျၢ်ကွံာ် ပတၢ်ကမၣ်တဘျီဃီဧါ. မ့ၢ်ပဆိကမိၣ်လၢ အဝဲသ့ၣ်မ့ၢ်သးဘၣ်ဒိန့ၣ် မ့ၢ်အဝဲသ့ၣ် အနီၢ်ကစၢ်တၢ်ကီတၢ်ခဲ ဒီးတမ့ၢ်လၢပှၤဘၣ်ဧါ. မ့ၢ်ပသးဘၣ်ဒိလၢ ပှၤဂၤအတၢ်ကတိၤ ဒီးတၢ်မၤတဖၣ်ဧါ. မ့ၢ်ပတဲလၢယၤန့ၣ် ယမ့ၢ်ပှၤဒ်အံၤလီၤ ဒီးယတလိၣ် ဘှီဘၣ်ထီၣ်က့ၤ ယသးဘၣ်ဧါ. ဒီးမ့ၢ်ပထံၣ်လီၤပနီၢ်ကစၢ် တၢ်ဂံၢ်စၢ်ဘါစၢ်ဒီး ဘှီဘၣ်ထီၣ်က့ၤပသးဧါ.
b တၢ်တဲဖျါထီၣ်တၢ်ဂီၤ အခီပညီ– ဒီပုၢ်ဝဲၢ်မုၣ်တဂၤအသးဒိၣ်ထီၣ် ဒီပုၢ်ဝဲၢ်မုၣ်အဂၤတဂၤ လၢတၢ်အိၣ်ဖှိၣ်အပူၤလီၤ. ဖဲအဝဲသ့ၣ်မၤဘၣ်ဂီၢ်လိာ်က့ၤအသး ဝံၤအလီၢ်ခံ အဝဲသ့ၣ်မၤသကိး ယဟိဝၤယွၤအတၢ်မၤလၢ တၢ်သးခုအပူၤလီၤ.