တၢ်မၤလိ ၄၁
ပမၤယွၤလၢအအိၣ်ဒီး “တၢ်သးကညီၤ ထူးထူးတီၤတီၤ” တဂၤအတၢ်မၤ
“ယွၤမၤဂ့ၤတၢ်ခဲလၢာ်, ဒီးအသးအိၣ် ကယဲၢ်အတ့လီၤတၢ်ခဲလၢာ်လီၤ.” —စံးထီၣ်ပတြၢၤ ၁၄၅:၉.
တၢ်သးဝံၣ် ၄၄ ပှၤလၢဆီၣ်လီၤအသး အတၢ်ထုကဖၣ်
တၢ်မၤလိအံၤ အတၢ်တိာ်ပာ်a
၁. ပှၤလၢအအိၣ်ဒီး တၢ်သးကညီၤတဂၤန့ၣ် ပထံၣ်တမှံလၢ အမ့ၢ်ပှၤဒ်လဲၣ်.
ပှၤလၢအအိၣ်ဒီးတၢ်သးကညီၤတဂၤန့ၣ် ပထံၣ်တမှံလၢ အမ့ၢ်ပှၤသးဂ့ၤ, အအိၣ်ဒီးတၢ်အဲၣ်တၢ်ကွံ, တၢ်ဒိသူၣ်ဒိသး, ဒီးအသးအိၣ်ဟ့ၣ်တၢ်ညီလီၤ. ဘၣ်သ့ၣ်သ့ၣ် ပကနီၣ်ဘၣ် ယ့ၣ်ၡူးဟ့ၣ်တၢ်အဒိ ဘၣ်ဃးဒီး ပှၤၡၤမရံဖိလၢ အသးဂ့ၤတဂၤ လၢအမၤစၢၤ ပှၤလၢအဃၢၤလီၤ. ပှၤယူဒၤဖိလၢ တမျာ်တီၢ်အီၤတဂၤအံၤန့ၣ် ပှၤလၢအကလုာ် လီၤဆီဒီးအီၤတဂၤ “ပာ်ဖျါထီၣ် တၢ်သးကညီၤလၢ” အဖီခိၣ်လီၤ. ပှၤၡၤမရံဖိတဂၤ “သးကညီၤဘၣ်အီၤ” အဃိ မၤစၢၤအီၤဒီး ကွၢ်ထွဲအီၤလီၤ. (လူၤကၣ် ၁၀:၂၉-၃၇) တၢ်အဒိအံၤ သိၣ်လိပှၤဘၣ်ဃးဒီး ကစၢ်ယွၤအတၢ်ဂ့ၤတၢ်ဝါတခါလၢ အမ့ၢ်ဝဲတၢ်သးကညီၤလီၤ. ကစၢ်ယွၤအဲၣ်ပှၤအဃိ အသးကညီၤပှၤ ဒီးအပာ်ဖျါထီၣ် တၢ်သးကညီၤလၢ ပဖီခိၣ်ကိးနံၤဒဲး.
၂. ကျဲအဂၤလၢ ပပာ်ဖျါထီၣ် တၢ်သးကညီၤသ့န့ၣ် မ့ၢ်မနုၤလဲၣ်.
၂ ပှၤပာ်ဖျါထီၣ် တၢ်သးကညီၤလၢ ကျဲအဂၤသ့ဝဲစ့ၢ်ကီးလီၤ. ပှၤလၢအအိၣ်ဒီး တၢ်သးကညီၤတဂၤန့ၣ် တစံၣ်ညီၣ်ပှၤဂၤဒ် ပှၤတၢ်ကမၣ်အိၣ်ဝဲ အသိးဘၣ်. ယဟိဝၤယွၤန့ၣ် အိၣ်ဒီးတၢ်သးကညီၤလၢ ပဝဲခဲလၢာ်အဖီခိၣ်လီၤ. ပှၤကွဲးထါ စံးထီၣ်ပတြၢၤတဂၤ တဲဝဲလၢ ကစၢ်ယွၤန့ၣ် “တမၤဘၣ်ပှၤဒ် ပတၢ်ဒဲးဘးအသိးဘၣ်.” (စံးထီၣ်ပတြၢၤ ၁၀၃:၁၀) ဘၣ်ဆၣ် တဘျီတခီၣ် ယဟိဝၤယွၤကဘှီဘၣ်ထီၣ်ဝဲ ပှၤလၢအမၤ ကမၣ်တၢ်တဂၤလီၤ.
၃. ပကတဲသကိး တၢ်သံကွၢ်မနုၤတဖၣ်လဲၣ်.
၃ လၢတၢ်မၤလိအံၤအပူၤ ပကတဲသကိး တၢ်သံကွၢ်သၢဖျၢၣ် လၢအမ့ၢ် ဘၣ်မနုၤအဃိ ယဟိဝၤယွၤ ပာ်ဖျါထီၣ်တၢ်သးကညီၤလဲၣ်. ပှၤလၢအသိၣ်က့ၤသီက့ၤတၢ်တဂၤန့ၣ် မ့ၢ်အအိၣ်ဒီးတၢ်သးကညီၤဧါ. ဒီးပပာ်ဖျါထီၣ် တၢ်သးကညီၤ ကသ့အဂီၢ် တၢ်မနုၤကမၤစၢၤပှၤလဲၣ်. ပကကွၢ်သကိး တၢ်သံကွၢ်တဖၣ်အံၤ အတၢ်စံးဆၢ လၢလံာ်စီဆှံအပူၤလီၤ.
ဘၣ်မနုၤအဃိ ယဟိဝၤယွၤပာ်ဖျါထီၣ် တၢ်သးကညီၤလဲၣ်
၄. ဘၣ်မနုၤအဃိ ယဟိဝၤယွၤ ပာ်ဖျါထီၣ်တၢ်သးကညီၤလဲၣ်.
၄ ယဟိဝၤယွၤ အိၣ်ဒီးတၢ်သးကညီၤ. တၢ်မၢဖိပီလူးကွဲးဝဲလၢ ကစၢ်ယွၤန့ၣ် အိၣ်ဒီး “တၢ်သးကညီၤ ထူးထူးတီၤတီၤ” လီၤ. ဘၣ်ဃးတၢ်ဂ့ၢ်အံၤန့ၣ် စီၤပီလူးၡဲပၠးဝဲလၢ ကစၢ်ယွၤအိၣ်ဒီး တၢ်သးကညီၤ မ့ၢ်လၢအဟ့ၣ်ဝဲ ပှၤဒိးဖှူသးလၢ တလၢတပှဲၤတဖၣ်အံၤ တၢ်မုၢ်လၢ်လၢ ကလဲၤထီၣ်ဘၣ်လၢမူခိၣ်လီၤ. (အ့းဖ့းစူး ၂:၄-၇) ဘၣ်ဆၣ် ယဟိဝၤယွၤ တပာ်ဖျါထီၣ် တၢ်သးကညီၤထဲ ပှၤလၢအဒိးဖှူသးတဖၣ် အဖီခိၣ်ဘၣ်. ပှၤကွဲးထါစံးထီၣ်ပတြၢၤ စီၤဒၤဝံးကွဲးဝဲလၢ “ယွၤမၤဂ့ၤတၢ်ခဲလၢာ်, ဒီးအသးအိၣ် ကယဲၢ်အတ့လီၤတၢ်ခဲလၢာ်လီၤ.” (စံးထီၣ်ပတြၢၤ ၁၄၅:၉) ခီဖျိလၢ ယဟိဝၤယွၤအဲၣ်ပှၤအဃိ ဖဲအထံၣ်ဝဲတၢ်အိၣ်သးလၢ အလိၣ်ဘၣ်ပာ်ဖျါထီၣ် တၢ်သးကညီၤလၢ ပဖီခိၣ်အခါန့ၣ် အပာ်ဖျါထီၣ်ဝဲဒၣ်လီၤ.
၅. ဘၣ်ဃးဒီးယဟိဝၤယွၤ အတၢ်သးကညီၤန့ၣ် ယ့ၣ်ၡူးသ့ၣ်ညါဝဲ တၢ်မနုၤလဲၣ်.
၅ ယဟိဝၤယွၤ အဲၣ်ဒိးပာ်ဖျါထီၣ် တၢ်သးကညီၤထဲလဲၣ်န့ၣ် ယ့ၣ်ၡူးသ့ၣ်ညါဝဲ အါန့ၢ်ဒံးပှၤဂၤတဖၣ်လီၤ. တချုးလၢ ယ့ၣ်ၡူးဟဲလီၤလၢ ဟီၣ်ခိၣ်ချၢဒံးဘၣ်န့ၣ် ယ့ၣ်ၡူး အိၣ်ဒီးအပၢ်တပူၤဃီ လၢမူခိၣ်န့ၣ် ဖးယံာ်ညါ. (ကတိၤဒိ ၈:၃၀, ၃၁) ယဟိဝၤယွၤပျၢ်ကွံာ် ပှၤဟီၣ်ခိၣ်ဖိတဖၣ် အတၢ်ကမၣ်ပှဲၤဘျီလဲၣ်န့ၣ် ယ့ၣ်ၡူးထံၣ်ဘၣ်ဝဲ. (စံးထီၣ်ပတြၢၤ ၇၈:၃၇-၄၂) အဃိ ဖဲယ့ၣ်ၡူးစံၣ်တဲၤတဲလီၤတၢ်အခါန့ၣ် အပာ်ဖျါထီၣ်ဝဲ အပၢ်အတၢ်ဂ့ၤတၢ်ဝါ တခါအံၤလီၤ.
ပၢ်တဂၤတမၤမဲာ်ဆှး အဖိခွါလၢအဟးဖျိးတဂၤဘၣ် ဒီးတူၢ်လိာ်က့ၤအီၤလၢဟံၣ် (ကွၢ်လံာ်အဆၢ ၆)c
၆. ဒ်သိးပကနၢ်ပၢၢ်ထီၣ်လၢ ယဟိဝၤယွၤအိၣ်ဒီး တၢ်သးကညီၤအဂီၢ် ယ့ၣ်ၡူးမၤစၢၤပှၤဒ်လဲၣ်.
၆ တၢ်မၤလိလၢအပူၤကွံာ်တခါန့ၣ် ယ့ၣ်ၡူးဟ့ၣ်တၢ်အဒိလၢ ဘၣ်ဃးဒီး ဖိသဒါလၢအဟးဖျိးတဂၤအဂ့ၢ်န့ၣ် သိၣ်လိပှၤလၢ ယဟိဝၤယွၤန့ၣ် မ့ၢ်ယွၤလၢအအိၣ်ဒီး တၢ်သးကညီၤ. ဖိသဒါအံၤ ဟးထီၣ်ကွံာ်လၢအဟံၣ်ဒီး “မၤလၢာ်ဂီၤကွံာ် အတၢ်စုလီၢ်ခီၣ်ခိၣ်တဖၣ် ခီဖျိ အိၣ်မူဝဲ နါစိၤန့ၣ်လီၤ.” (လူၤကၣ် ၁၅:၁၃) လၢခံန့ၣ် ဖိသဒါအံၤ အမၤကမၣ်တၢ်အဃိ အသ့ၣ်ညါလီၤက့ၤအသး, အဆီၣ်လီၤအသး ဒီးဟဲက့ၤကဒါက့ၤဆူအဟံၣ်လီၤ. ဖဲအပၢ်ထံၣ်အီၤအခါန့ၣ် အပၢ်မၤဝဲဒ်လဲၣ်. ဖိသဒါအံၤ တလိၣ်အိၣ်ခိးအပၢ်ဘၣ်. ယ့ၣ်ၡူးတဲဝဲလၢ “ဖဲ [ဖိသဒါ] အိၣ်စီၤစုၤ ဖးယံၤဒံးအခါ အပၢ်ထံၣ်စိအီၤ ဒီးသးကညီၤဘၣ်အီၤ ဒီးလဲၤဃ့ၢ်ဆူအအိၣ်, ဖိးဟုအီၤ ဒီးနၢမူအီၤ ကဖီလီဖိလီၤ.” ပၢ်တဂၤအံၤ တမၤမဲာ်ဆှးအဖိခွါဘၣ် လၢတၢ်န့ၣ်အလီၢ် အဝဲပာ်ဖျါထီၣ် တၢ်သးကညီၤ ဒီးပျၢ်ကွံာ်အဖိခွါတၢ်ကမၣ် ဒီးတူၢ်လိာ်က့ၤအီၤ လၢအဟံၣ်ဖိဃီဖိအပူၤလီၤ. ဖိသဒါလၢအဟးဖျိးအံၤ မၤဘၣ်တၢ်ကမၣ်ဖးဒိၣ်ညါ ဘၣ်ဆၣ် မ့ၢ်လၢအပီၢ်ယၢ်လီၤက့ၤသးအဃိ အပၢ်ပျၢ်ကွံာ်အတၢ်ကမၣ်. ပၢ်လၢအအိၣ်ဒီး တၢ်သးကညီၤတဂၤအံၤ ဘၣ်တၢ်ဒိလီၤအီၤလၢ ယဟိဝၤယွၤလီၤ. ယ့ၣ်ၡူးပာ်ဖျါထီၣ်န့ၢ်ပှၤလၢ ယဟိဝၤယွၤသးအိၣ် ပျၢ်ကွံာ်ပှၤမၤတၢ်ဒဲးဘးဖိလၢ အပီၢ်ယၢ်လီၤက့ၤသး နီၢ်နီၢ်တဖၣ်လီၤ.—လူၤကၣ် ၁၅:၁၇-၂၄.
၇. ယဟိဝၤယွၤအိၣ်ဒီး တၢ်သးကညီၤန့ၣ် ပာ်ဖျါထီၣ်လၢအဝဲအိၣ်ဒီး တၢ်ကူၣ်သ့ဒိၣ်မးဒ်လဲၣ်.
၇ မ့ၢ်လၢယဟိဝၤယွၤ အိၣ်ဒီးတၢ်ကူၣ်သ့ဒိၣ်မးအဃိ အပာ်ဖျါထီၣ် တၢ်သးကညီၤ. ယဟိဝၤယွၤမၤတၢ်ဆၢတဲာ်လၢ ကကဲဘျုးလၢ အတၢ်ဘၣ်တ့တဖၣ်အဂီၢ် ထီဘိလီၤ. လံာ်စီဆှံတဲဝဲလၢ “တၢ်ကူၣ်သ့လၢထးန့ၣ်” အိၣ် “ပှဲၤဒီးတၢ်သးကညီၤ ဒီးတၤသၣ်လၢအဂ့ၤ.” (ယၤကိာ် ၃:၁၇) ဒ်မိပါလၢ အအိၣ်ဒီးတၢ်အဲၣ်တၢ်ကွံတဖၣ်အသိး ယဟိဝၤယွၤ သ့ၣ်ညါဝဲလၢ အအိၣ်ဒီး တၢ်သးကညီၤန့ၣ် ကဲဘျုးဝဲလၢအခ့အပှၤတဖၣ်အဂီၢ်လီၤ. (စံးထီၣ်ပတြၢၤ ၁၀၃:၁၃; ယၡါယၤ ၄၉:၁၅) ခီဖျိလၢ ယဟိဝၤယွၤ ပာ်ဖျါထီၣ် တၢ်သးကညီၤလၢ အခ့အပှၤတဖၣ် အဖီခိၣ်အဃိ အဝဲသ့ၣ် မ့ၢ်ပှၤတလၢတပှဲၤဘၣ်ဒၣ်လဲာ် အဝဲသ့ၣ်အိၣ်ဒီး တၢ်မုၢ်လၢ်လၢခါဆူညါအဂီၢ်. ယဟိဝၤယွၤအိၣ်ဒီး တၢ်ကူၣ်သ့ဒိၣ်မးအဃိ ဖဲအထံၣ်ဝဲလၢ အကြၢးပာ်ဖျါထီၣ် တၢ်သးကညီၤအခါ အပာ်ဖျါထီၣ်ဝဲထီဘိ. တကတီၢ်ဃီန့ၣ် ယဟိဝၤယွၤသ့ၣ်ညါဝဲလၢအတကြၢးပာ်ဖျါထီၣ် တၢ်သးကညီၤလၢ အခါဖဲလဲၣ်စ့ၢ်ကီးလီၤ. မ့ၢ်လၢယဟိဝၤယွၤ အိၣ်ဒီးတၢ်ကူၣ်သ့အဃိ ပှၤမၤတၢ်ကမၣ်လၢ အတပီၢ်ယၢ်လီၤသးဘၣ်န့ၣ် အဝဲတပာ်ဖျါထီၣ် တၢ်သးကညီၤလၢ အဖီခိၣ်စ့ၢ်ကီးဘၣ်.
၈. တဘျီတခီၣ် တၢ်အိၣ်ဖှိၣ်သးပှၢ်တဖၣ် ကြၢးမၤတၢ်မနုၤလဲၣ် ဒီးဘၣ်မနုၤအဃိလဲၣ်.
၈ အဒိ, ယွၤအခ့အပှၤတဂၤ မ့ၢ်အိၣ်ဒီး လုၢ်လၢ်သကဲာ်ပဝးလၢ အလီၤရၢၢ်လီၤစၢၢ်န့ၣ် ပကြၢးမၤဒ်လဲၣ်. ယဟိဝၤယွၤတဲဘၣ် စီၤပီလူးလၢကဟံးစုနဲၣ်ကျဲ တၢ်အိၣ်ဖှိၣ်လၢ “သုတဘၣ်ရ့လိာ်သုသးဒီး အီၤတဂ့ၤ.” (၁ ကရံၣ်သူး ၅:၁၁) ပှၤမၤတၢ်ကမၣ်လၢ အတပီၢ်ယၢ်လီၤသးဘၣ်န့ၣ် ကဘၣ်တၢ်ဟီထီၣ်ကွံာ်အီၤလၢတၢ်အိၣ်ဖှိၣ်အပူၤလီၤ. ဒ်သိးဒီး ပှၤကဒီသဒၢ ဒီပုၢ်ဝဲၢ်မုၣ်ခွါ လၢအအိၣ်ဒီး တၢ်သးတီတဖၣ် ဒီးပာ်ဖျါထီၣ် ယဟိဝၤယွၤ မ့ၢ်တၢ်စီဆှံအဂီၢ် တၢ်အိၣ်ဖှိၣ်သးပှၢ်တဖၣ် ကဘၣ်မၤဝဲဒ်န့ၣ်လီၤ. ဘၣ်ဆၣ် တၢ်ဟီထီၣ်ကွံာ်ပှၤလၢ တၢ်အိၣ်ဖှိၣ်ပူၤန့ၣ် ပှၤတနီၤကထံၣ်ဝဲလၢ ယဟိဝၤယွၤန့ၣ် တအိၣ်ဒီး တၢ်သးကညီၤဘၣ်. အဝဲသ့ၣ်အတၢ်ထံၣ်န့ၣ် မ့ၢ်အဘၣ်ဧါ. ပကကွၢ်သကိးအီၤနီၤ.
တၢ်ဟီထီၣ်ကွံာ်ပှၤလၢ တၢ်အိၣ်ဖှိၣ်ပူၤန့ၣ် မ့ၢ်တၢ်ရဲၣ်တၢ်ကျဲၤ လၢအပှဲၤဒီး တၢ်သးကညီၤဧါ
သိလၢအဆိးက့တဒုန့ၣ် ပှၤပာ်လီၤဆီအီၤ ဘၣ်ဆၣ် အကစၢ်ဆဲးကွၢ်ထွဲအီၤဒံး (ကွၢ်လံာ်အဆၢ ၉-၁၁)
၉-၁၀. ဧ့ၤဘြံၤ ၁၂:၅, ၆ ပာ်ဖျါထီၣ်ဝဲလၢ တၢ်ဟီထီၣ်ကွံာ်ပှၤလၢတၢ်အိၣ်ဖှိၣ်ပူၤန့ၣ် မ့ၢ်ကျဲလၢအပှဲၤဒီး တၢ်သးကညီၤဒ်လဲၣ်. ဟ့ၣ်တၢ်အဒိတက့ၢ်.
၉ လၢတၢ်အိၣ်ဖှိၣ်အပူၤ ဖဲပနၢ်ဟူဘၣ် တၢ်အိၣ်ဖှိၣ်သးပှၢ် ဘိးဘၣ်သ့ၣ်ညါဝဲလၢ ပှၤလၢပသ့ၣ်ညါအီၤ ဒီးပအဲၣ်ဘၣ်အီၤတဂၤ အ “တမ့ၢ်ယဟိဝၤပှၤအုၣ်အသးတဂၤလၢၤဘၣ်” အခါ ပသးဘၣ်ဒိဒိၣ်မး. ဒီးပကဆိကမိၣ်ဘၣ်လၢ မ့ၢ်ပှၤကြၢးဟီထီၣ်ကွံာ်အီၤလၢ တၢ်အိၣ်ဖှိၣ်အပူၤ စ့ၢ်ကီးဧါ. ပှၤလၢအလိၣ်ဘၣ် တၢ်သိၣ်က့ၤဒီး ပှၤမ့ၢ်တသိၣ်က့ၤအီၤဘၣ်န့ၣ် တမ့ၢ်ကျဲလၢ အအိၣ်ဒီး တၢ်ကူၣ်သ့, တၢ်သးကညီၤ ဒီးတၢ်အဲၣ်တၢ်ကွံဘၣ်. (ကတိၤဒိ ၁၃:၂၄) အဃိ တၢ်ဟီထီၣ်ကွံာ်ပှၤလၢ တၢ်အိၣ်ဖှိၣ်အပူၤန့ၣ် မ့ၢ်တၢ်ရဲၣ်တၢ်ကျဲၤလၢအပှဲၤဒီး တၢ်သးကညီၤ. ပှၤလၢအဘၣ် တၢ်ဟီထီၣ်ကွံာ်အီၤလၢ တၢ်အိၣ်ဖှိၣ်ပူၤတဂၤန့ၣ် အပီၢ်ယၢ်လီၤက့ၤအသးဒီး ဆီတလဲက့ၤ အတၢ်အိၣ်မူသ့ဝဲ. ဒီပုၢ်ဝဲၢ်မုၣ်ခွါအါဂၤလၢ အမၤဘၣ်တၢ်ကမၣ် ဖးဒိၣ်တဖၣ်န့ၣ် တဲဝဲလၢ အဝဲသ့ၣ်ဘၣ်တၢ်ဟီထီၣ်ကွံာ်အီၤ လၢတၢ်အိၣ်ဖှိၣ်ပူၤအဃိ အဝဲသ့ၣ် သ့ၣ်ညါလီၤက့ၤအသးလၢ အမၤကမၣ်ဘၣ် တၢ်ဖးဒိၣ် ဒီးဆီတလဲက့ၤအသး ဒီးဟဲက့ၤကဒါလၢ ယဟိဝၤယွၤအအိၣ်လီၤ.—ဖး ဧ့ၤဘြံၤ ၁၂:၅, ၆.
၁၀ ပကကွၢ်သကိး တၢ်အဒိတခါ. ပှၤကွၢ်သိဖိတဂၤ ပာ်သူၣ်ပာ်သးဘၣ်ဝဲလၢ အသိတဒုဆိးက့ဝဲ. ဒီးအသ့ၣ်ညါဝဲလၢ ဒ်သိးအကကူစါယါဘျါက့ၤ သိလၢအဆိးက့တဒုအံၤအဂီၢ် အဝဲကဘၣ်ပာ်လီၤဆီ သိတဒုအံၤ ဒီးသိလၢအဂၤတဖၣ်လီၤ. ညီနုၢ်သိတဖၣ်န့ၣ် အဝဲသ့ၣ်တအဲၣ်ဒိး အိၣ်လီၤဖးအသးဘၣ် အဃိ ဖဲအဘၣ်အိၣ်လီၤဖးအခါ အဝဲသ့ၣ်သးဘၣ်တံာ်တာ်ဝဲ. ဖဲပှၤကွၢ်သိတဂၤ ပာ်လီၤဆီသိလၢ အဆိးက့တဒုအံၤ ဒီးသိလၢအဂၤအခါ မ့ၢ်အကဲပှၤလၢ အသူၣ်အၢသးသီဧါ. တမ့ၢ်ဘၣ်. အသ့ၣ်ညါဝဲလၢ အမ့ၢ်ပာ်သိဆိးက့တဒုဒီး သိလၢအဂၤတဖၣ် တပူၤဃီန့ၣ် တၢ်ဆါကဘၣ်ကူဘၣ်ဂာ် သိလၢအဂၤတဖၣ် သ့စ့ၢ်ကီး. ခီဖျိလၢအပာ်လီၤဆီ သိဆိးက့တဒုန့ၣ် အဃိ လီၤဂာ်လၢ အဒီသဒၢဝဲ သိဒီတဖုညါ.—ထိၣ်သတြီၤဒီး ၃ မိၤၡ့ ၁၃:၃, ၄.
၁၁. (က) ပှၤလၢအဘၣ် တၢ်ဟီထီၣ်ကွံာ်အီၤလၢ တၢ်အိၣ်ဖှိၣ်ပူၤတဂၤန့ၣ် ပထိၣ်သတြီၤအီၤဒီး သိလၢအဆိးက့တဒု သ့ဒ်လဲၣ်. (ခ) ပှၤလၢအဘၣ် တၢ်ဟီထီၣ်ကွံာ်အီၤတဖၣ်မၤ တၢ်မနုၤသ့လဲၣ် ဒီးဒိးန့ၢ်ဘၣ် တၢ်မၤစၢၤမနုၤလဲၣ်.
၁၁ ဖဲဒီပုၢ်ဝဲၢ်တဂၤ ဘၣ်တၢ်ဟီထီၣ်ကွံာ်အီၤလၢ တၢ်အိၣ်ဖှိၣ်ပူၤအခါ ပကထံၣ်အီၤ ဒ်သိးဒီး သိလၢအဆိးက့တဒု. မ့ၢ်လၢအတၢ်ရ့လိာ်သးဒီး ယဟိဝၤယွၤ ဟးဂီၤဝဲအဃိ အလီၤဂာ်ဒ်သိးဒီး ပှၤလၢအဆိးက့တဂၤလီၤ. (ယၤကိာ် ၅:၁၄) ပှၤလၢအဆိးက့န့ၣ် အတၢ်ဆါ ဘၣ်ကူဘၣ်ဂာ်ဝဲပှၤဂၤသ့, ဒ်န့ၣ်အသိး ပှၤတဂၤလၢ အတၢ်ရ့လိာ်သး ဒီးယဟိဝၤယွၤဟးဂီၤန့ၣ် မၤဘၣ်ဒိပှၤဂၤ သ့စ့ၢ်ကီးလီၤ. အဃိ ကြၢးဝဲဘၣ်ဝဲလၢ ပှၤကဘၣ်ဟီထီၣ်ကွံာ် ပှၤလၢအမၤ တၢ်ကမၣ်ဖးဒိၣ်တဂၤလၢ တၢ်အိၣ်ဖှိၣ်အပူၤလီၤ. တၢ်သိၣ်ဃီၣ်တခါအံၤန့ၣ် မ့ၢ်ဝဲကျဲတဘိလၢ ယဟိဝၤယွၤ ပာ်ဖျါထီၣ်တၢ်အဲၣ်လၢ အခ့အပှၤလၢ အအိၣ်ဒီးတၢ်သးတီတဖၣ် အဖီခိၣ် ဒီးဘၣ်သ့ၣ်သ့ၣ် ကမၤစၢၤပှၤလၢအမၤ ကမၣ်တၢ်ဖးဒိၣ် တဂၤလၢ ကသ့ၣ်ညါလီၤက့ၤ အတၢ်ကမၣ် ဒီးပီၢ်ယၢ်လီၤက့ၤသးအဂီၢ်လီၤ. ဖဲအဘၣ်တၢ်ဟီထီၣ်ကွံာ်အီၤလၢ တၢ်အိၣ်ဖှိၣ်ပူၤအခါ အဝဲဟဲထီၣ်တၢ်အိၣ်ဖှိၣ်သ့ ဒ်သိးကဒိးန့ၢ်ဘၣ် တၢ်ဟံးစုနဲၣ်ကျဲ ဒီးကမၤဂၢၢ်ကျၢၤထီၣ်က့ၤ အတၢ်နာ်အဂီၢ်လီၤ. အဝဲဟံးန့ၢ်ဖး လံာ်လဲၢ်လၢ တၢ်ကရၢကရိထုးထီၣ်ဝဲ ဒီးမၤနီၢ်ကစၢ် တၢ်မၤလိလံာ်စီဆှံ ဒီးကွၢ်ဝဲ JW တၢ်ဂီၤမူ သ့ဝဲလီၤ. ဖဲတၢ်အိၣ်ဖှိၣ်သးပှၢ်တဖၣ် ထံၣ်ဝဲအတၢ်ဆီတလဲအခါ ဘၣ်သ့ၣ်သ့ၣ် အဝဲသ့ၣ် ကဟ့ၣ်ကူၣ်ဟ့ၣ်ဖးအီၤ တဘျီဘၣ်တဘျီ ဒ်သိးကမၤစၢၤအီၤလၢ အတၢ်ရ့လိာ်သးဒီး ယဟိဝၤယွၤကဂ့ၤထီၣ်အဂီၢ် ဒီးပှၤကတူၢ်လိာ်က့ၤအီၤလၢ တၢ်အိၣ်ဖှိၣ်ပူၤအဂီၢ်လီၤ.b
၁၂. ပှၤမၤတၢ်ကမၣ်လၢ အတပီၢ်ယၢ်လီၤက့ၤအသးဘၣ်န့ၣ် တၢ်အိၣ်ဖှိၣ်သးပှၢ်တဖၣ် ပာ်ဖျါထီၣ် တၢ်အဲၣ်ဒီးတၢ်သးကညီၤ လၢအဖီခိၣ် ကသ့ဒ်လဲၣ်.
၁၂ ပကဘၣ်သ့ၣ်ညါလၢ ပှၤလၢအဘၣ်တၢ်ဟီထီၣ်ကွံာ်အီၤလၢ တၢ်အိၣ်ဖှိၣ်အပူၤတဖၣ်န့ၣ် မ့ၢ်ဒၣ်ထဲပှၤမၤတၢ်ကမၣ်လၢ အတပီၢ်ယၢ်လီၤက့ၤ သးဘၣ်တဖၣ်လီၤ. တၢ်အိၣ်ဖှိၣ်သးပှၢ်တဖၣ် သ့ၣ်ညါဝဲလၢ တချုးလၢအဝဲသ့ၣ် ဟီထီၣ်ကွံာ် ပှၤလၢတၢ်အိၣ်ဖှိၣ်အပူၤဘၣ်န့ၣ် အဝဲသ့ၣ်ကဘၣ် ဆိကမိၣ်ထံတၢ်ဂ့ၢ် လီၤတံၢ်လီၤဆဲး. အဝဲသ့ၣ်သ့ၣ်ညါဝဲလၢ ယဟိဝၤယွၤသိၣ်ဃီၣ်တၢ် “ဒ်တၢ်တီတၢ်လိၤအသိး” လီၤ. (ယံးရမံယၤ ၃၀:၁၁) အဝဲသ့ၣ်အဲၣ်ဒီပုၢ်ဝဲၢ်တဖၣ် အဃိ အဝဲသ့ၣ်တအဲၣ်ဒိးမၤတၢ်လၢ ကမၤဘၣ်ဒိ ဒီပုၢ်ဝဲၢ်တဖၣ် အတၢ်ရ့လိာ်သးဒီး ယဟိဝၤယွၤဘၣ်. အဃိ အဝဲသ့ၣ် ကပာ်ဖျါထီၣ် တၢ်သးကညီၤဒီးတၢ်အဲၣ်အဂီၢ် တဘျီတခီၣ် အဝဲသ့ၣ် ကဘၣ်ဟီထီၣ်ကွံာ် ပှၤမၤတၢ်ကမၣ်တဂၤ လၢတၢ်အိၣ်ဖှိၣ်အပူၤလီၤ.
၁၃. ဘၣ်မနုၤအဃိ ခရံာ်ဖိလၢ ကရံၣ်သူးတဂၤ ဘၣ်တၢ်ဟီထီၣ်ကွံာ်အီၤ လၢတၢ်အိၣ်ဖှိၣ်အပူၤလဲၣ်.
၁၃ ပကကွၢ်သကိး ဖဲတၢ်မၢဖိအစိၤန့ၣ် ခရံာ်ဖိလၢအမၤကမၣ်တၢ်လၢ အတပီၢ်ယၢ်လီၤသးတဂၤန့ၣ် တၢ်မၢဖိပီလူးမၤဝဲဒ်လဲၣ်. ပှၤတဂၤအံၤ အမၤကမၣ်မုၣ်ကမၣ်ခွါဒီး အပၢ်အမါ အဃိ တၢ်လၢအမၤဝဲန့ၣ် မ့ၢ်တၢ်လၢအလီၤသးဘၣ်အၢဒိၣ်မး. ဘၣ်ဃးဒီးတၢ်ဂ့ၢ်အံၤ စီၤပီလူးသ့ၣ်ညါဝဲလၢ ယဟိဝၤယွၤတဲဘၣ် ပှၤအံၣ်စရ့လးဖိလၢပျၢၤတဖၣ်လၢ “ပှၤလၢအမံဃုာ်ဒီး အပၢ်အမါတဂၤန့ၣ် မ့ၢ်အမၤမဲာ်ဆှးအပၢ်လီၤ. ဒီးကဘၣ်တၢ်မၤသံကွံာ်အီၤ ခံဂၤလိာ်န့ၣ်လီၤ.” (၃ မိၤၡ့ ၂၀:၁၁, ခ့ခါစှီၤကျိာ်) စီၤပီလူးကမၢ တၢ်အိၣ်ဖှိၣ်ဖိကမၤသံ ပှၤတဂၤအံၤတသ့ဘၣ်. အဃိ အတဲဘၣ်ကရံၣ်သူး တၢ်အိၣ်ဖှိၣ်လၢ ကဟီထီၣ်ကွံာ်ပှၤတဂၤအံၤ လၢတၢ်အိၣ်ဖှိၣ်အပူၤလီၤ. စီၤပီလူးမ့ၢ်တမၢ ပှၤနီဟးထီၣ်ကွံာ် ပှၤတဂၤအံၤ လၢတၢ်အိၣ်ဖှိၣ်အပူၤဘၣ်န့ၣ် ပှၤတဂၤအံၤအသကဲာ်ပဝး လၢအလီၤရၢၢ်လီၤစၢၢ်န့ၣ် ကဘၣ်ကူဘၣ်ဂာ် ပှၤလၢတၢ်အိၣ်ဖှိၣ်အပူၤသ့လီၤ. တကးဒံးဘၣ် ပှၤတနီၤန့ၣ် ထံၣ်ဝဲလၢ တၢ်ကမၣ်ဒ်ပှၤတဂၤအံၤမၤဝဲန့ၣ် တမ့ၢ်တၢ်ကမၣ်ဖးဒိၣ်ဘၣ်.—၁ ကရံၣ်သူး ၅:၁, ၂, ၁၃.
၁၄. စီၤပီလူးပာ်ဖျါထီၣ် တၢ်သးကညီၤလၢ ပှၤလၢအဘၣ် တၢ်ဟီထီၣ်ကွံာ်အီၤလၢ ကရံၣ်သူးတၢ်အိၣ်ဖှိၣ်န့ၣ်ဒ်လဲၣ် ဒီးဘၣ်မနုၤအဃိလဲၣ်. (၂ ကရံၣ်သူး ၂:၅-၈, ၁၁)
၁၄ ဘၣ်ဆၣ် လၢခံ စီၤပီလူးသ့ၣ်ညါဝဲလၢ ပှၤတဂၤန့ၣ် ဆီတလဲကွံာ်အတၢ်အိၣ်မူ ဒီးပီၢ်ယၢ်လီၤက့ၤအသးနီၢ်ကီၢ်လီၤ. ပှၤတဂၤန့ၣ် မၤမဲာ်ဆှး တၢ်အိၣ်ဖှိၣ် သနာ်က့ စီၤပီလူးတဲဘၣ် တၢ်အိၣ်ဖှိၣ်သးပှၢ်တဖၣ်လၢ အတအဲၣ်ဒိးရ့ဒီးပှၤတဂၤန့ၣ် “ဆူၣ်တလၢဘၣ်.” စီၤပီလူး ဟ့ၣ်ကူၣ်အဝဲသ့ၣ်လၢ “ပျၢ်အတၢ်ကမၣ်လၢသးဒီဖျၢၣ် ဒီးမၤမုာ်ထီၣ်က့ၤအီၤ ဒ်သိး အသုတသးအုး တုၤဒၣ်လဲာ် အတူၢ်ၡူအသးတဂ့ၤ အဂီၢ်လီၤ.” စီၤပီလူးသးကညီၤဘၣ် ပှၤမၤတၢ်ကမၣ်လၢအပီၢ်ယၢ်လီၤက့ၤသးတဂၤအံၤ ဒီးအတအဲၣ်ဒိးထံၣ်ဝဲလၢ အသူၣ်အုးသးအုး ခီဖျိတၢ်ကမၣ်လၢ အမၤတ့ၢ်ဘၣ်ဝဲ ဒီးကဟ့ၣ်ၡူကွံာ်အသး တုၤဒၣ်လဲာ် တဃ့ပျၢ်ကွံာ်အတၢ်ကမၣ် လၢၤဘၣ်န့ၣ်ဘၣ်.—ဖး ၂ ကရံၣ်သူး ၂:၅-၈, ၁၁.
၁၅. တၢ်အိၣ်ဖှိၣ်သးပှၢ်တဖၣ် သိၣ်ဃီၣ်တၢ်ဒီးသးကညီၤတၢ် တဘျီဃီကသ့ဒ်လဲၣ်.
၁၅ တၢ်အိၣ်ဖှိၣ်သးပှၢ်တဖၣ် ကွၢ်လိမၤဒိး ယဟိဝၤယွၤအဃိ အဝဲသ့ၣ်ပာ်ဖျါထီၣ် တၢ်သးကညီၤလီၤ. အဝဲသ့ၣ် ကသိၣ်ဃီၣ် ပှၤမၤတၢ်ကမၣ်တဂၤန့ၣ် ဒ်အကြၢးဝဲဘၣ်ဝဲအသိး ဒီးကပာ်ဖျါထီၣ်တၢ်သးကညီၤလၢ အဂ့ၤကတၢၢ်လီၤ. တၢ်အိၣ်ဖှိၣ်သးပှၢ်တဖၣ် မ့ၢ်တသိၣ်ဃီၣ် ပှၤလၢအမၤတၢ်ကမၣ်ဘၣ်န့ၣ် အဝဲသ့ၣ်တအိၣ်ဒီး တၢ်သးကညီၤဘၣ်. ဘၣ်ဆၣ် ပှၤလၢကဘၣ်ပာ်ဖျါထီၣ် တၢ်သးကညီၤန့ၣ် ထဲဒၣ်တၢ်အိၣ်ဖှိၣ်သးပှၢ်တဖၣ်လီၤဧါ.
ပဝဲခဲလၢာ် ပပာ်ဖျါထီၣ် တၢ်သးကညီၤ ကသ့ဒ်လဲၣ်
၁၆. ဒ် ကတိၤဒိ ၂၁:၁၃ ပာ်ဖျါထီၣ်ဝဲအသိး ပှၤလၢတအိၣ်ဒီး တၢ်သးကညီၤလၢ ပှၤဂၤအဖီခိၣ်န့ၣ် ယဟိဝၤယွၤ ကမၤအဝဲသ့ၣ်ဒ်လဲၣ်.
၁၆ ခရံာ်ဖိခဲလၢာ်န့ၣ် ကွၢ်လိမၤဒိး ယဟိဝၤယွၤ အတၢ်သးကညီၤလီၤ. ဘၣ်မနုၤအဃိလဲၣ်. မ့ၢ်လၢ ပှၤလၢအတအိၣ်ဒီး တၢ်သးကညီၤလၢ ပှၤဂၤအဖီခိၣ်ဘၣ်န့ၣ် ယဟိဝၤယွၤ တဒိကနၣ်အဝဲသ့ၣ်ဘၣ်. (ဖး ကတိၤဒိ ၂၁:၁၃.) ပဝဲခဲလၢာ်န့ၣ် ပအဲၣ်ဒိးလၢ ယဟိဝၤယွၤကဒိကနၣ် ပတၢ်ထုကဖၣ်အဃိ ပဟးဆှဲးဝဲ တၢ်ပာ်သူၣ်ပာ်သးလၢ တအိၣ်ဒီး တၢ်သးကညီၤဘၣ်တဖၣ်လီၤ. လၢပကဟးဆှဲးဝဲ ပှၤလၢအသးဘၣ်ဒိတဖၣ်အလီၢ်န့ၣ် ပကဘၣ်ဒိကနၣ်န့ၢ် “ပှၤဖှီၣ်ဖိယာ်ဖိအတၢ်ကိး” ထီၣ်ထီဘိလီၤ. အဃိ ပကဂုာ်ကျဲးစၢးအိၣ်မူမၤထွဲ ဒ်လံာ်စီဆှံအတၢ်ဟ့ၣ်ကူၣ် အိၣ်ဝဲအသိးလီၤ. လံာ်စီဆှံတဲဝဲလၢ “ပှၤလၢအတညီနုၢ် ပာ်ဖျါထီၣ် တၢ်သးကညီၤဘၣ်န့ၣ် ဖဲအဘၣ်တၢ်စံၣ်ညီၣ်အီၤအခါ တၢ်တသးကညီၤအီၤဘၣ်.” (ယၤကိာ် ၂:၁၃) လၢတၢ်ဆီၣ်လီၤသးအပူၤ ပမ့ၢ်သ့ၣ်ညါလီၤသးလၢ ပလိၣ်ဘၣ်တၢ်သးကညီၤန့ၣ် ညီလၢပကပာ်ဖျါထီၣ်က့ၤ တၢ်သးကညီၤလၢ ပှၤဂၤအဖီခိၣ်စ့ၢ်ကီး. လီၤဆီဒၣ်တၢ် ဒီပုၢ်ဝဲၢ်လၢအပီၢ်ယၢ်လီၤက့ၤသး ဒီးဟဲက့ၤကဒါလၢ တၢ်အိၣ်ဖှိၣ်ပူၤတဖၣ်န့ၣ် ပအဲၣ်ဒိးပာ်ဖျါထီၣ် တၢ်သးကညီၤလၢ အဝဲသ့ၣ်အဖီခိၣ်လီၤ.
၁၇. စီၤပၤဒၤဝံး ပာ်ဖျါထီၣ် တၢ်သးကညီၤနီၢ်ကီၢ်ဒ်လဲၣ်.
၁၇ ပှၤအဒိအတဲာ် လၢလံာ်စီဆှံအပူၤန့ၣ် မၤစၢၤပှၤလၢ ပကပာ်ဖျါထီၣ် တၢ်သးကညီၤ ဒီးဟးဆှဲးတၢ်ရ့ဒီးပှၤဂၤ ဆူၣ်ဆူၣ်ကိၤကိၤလီၤ. အဒိ, ပကကွၢ်သကိး စီၤပၤဒၤဝံးအဂ့ၢ်လီၤ. ညီနုၢ်န့ၣ်အဝဲ ပာ်ဖျါထီၣ်တၢ်သးကညီၤ. ဘၣ်တဘျီ စီၤစီလူးအဲၣ်ဒိးမၤသံ စီၤဒၤဝံးဘၣ်ဆၣ် စီၤဒၤဝံး ပာ်ဖျါထီၣ်တၢ်သးကညီၤလၢ စီၤပၤလၢကစၢ်ယွၤ ဒိးဖှူအီၤအဖီခိၣ် ဒီးအဝဲတဂုာ်ကျဲးစၢးမၤကၣ် မ့တမ့ၢ် မၤဘၣ်ဒိ စီၤစီလူးနီတဘျီဘၣ်.—၁ ၡမူၤအ့လး ၂၄:၉-၁၂, ၁၈, ၁၉.
၁၈-၁၉. စီၤဒၤဝံးတပာ်ဖျါထီၣ် တၢ်သးကညီၤ လၢအခါဖဲလဲၣ်.
၁၈ ဘၣ်ဆၣ် စီၤဒၤဝံးတအိၣ်ဒီး တၢ်သးကညီၤထီဘိဘၣ်. အဒိ, စီၤနၤဘလး မ့ၢ်ပှၤလၢအရ့ဒီးပှၤဂၤ ဆူၣ်ဆူၣ်ကိၤကိၤ ဒီးအတပာ်ကဲတၢ်ဘၣ် ဒီးတဘၣ်သး ဟ့ၣ်လီၤတၢ်အီၣ်တၢ်အီလၢ စီၤဒၤဝံးဒီးအပှၤပိာ်ခွါတဖၣ်အဂီၢ်ဘၣ်. အဃိ စီၤဒၤဝံးသးဒိၣ်ထီၣ်တၢ်ဒိၣ်မး ဒီးပာ်လီၤအသးလၢ ကမၤသံစီၤနၤဘလးဒီး ကယဲၢ်ပှၤပိာ်ခွါလၢ အအိၣ်ဒီးအီၤခဲလၢာ်လီၤ. ဘၣ်ဆၣ် စီၤနၤဘလးအမါ နီၢ်အဘံၤကါယံးလးန့ၣ် မ့ၢ်ပှၤလၢအသးဂ့ၤဒီးသးစူၤ ဒီးအဝဲကရီကတဲာ်ကတီၤထီၣ် တၢ်အီၣ်တၢ်အီ ဒီးလဲၤဟ့ၣ်လီၤစီၤဒၤဝံးလီၤ. အဃိ စီၤဒၤဝံးတမၤသံ စီၤနၤဘလးဒီး အပှၤပိာ်ခွါတဖၣ်လၢၤဘၣ်.—၁ ၡမူၤအ့လး ၂၅:၉-၂၂, ၃၂-၃၅.
၁၉ ဘၣ်တဘျီန့ၣ် ဝံနၤသၣ်တဲဘၣ် စီၤဒၤဝံး ဘၣ်ဃးဒီး ပှၤထူးပှၤတီၤတဂၤလၢ အဟုၣ်န့ၢ် ပှၤဖှီၣ်ဖိယာ်ဖိတဂၤအသိ လၢအအဲၣ်ဝဲဒိၣ်မးတဒု. အဃိ စီၤဒၤဝံးသးဒိၣ်ထီၣ် ပှၤထူးပှၤတီၤတဂၤန့ၣ် ဒိၣ်မးဒီး အတဲဝဲလၢ “ယွၤမူဝဲ, ပှၤလၢအမၤတၢ်တမံၤန့ၣ် မ့ၢ်ပှၤကြၢးသံလီၤ.” (၂ ၡမူၤအ့လး ၁၂:၁-၆) စီၤဒၤဝံးန့ၣ်အသ့ၣ်ညါဝဲ စီၤမိၤၡ့အတၢ်သိၣ်တၢ်သီဂ့ၤဂ့ၤ အဃိအသ့ၣ်ညါဝဲလၢ ပှၤတဂၤမ့ၢ်ဟုၣ်ဝဲ ပှၤသိတဒုန့ၣ်ကဘၣ်လိးက့ၤဝဲ လွံၢ်ဒုလီၤ. (၂ မိၤၡ့ ၂၂:၁) ဘၣ်ဆၣ် စီၤဒၤဝံးစံၣ်ညီၣ်ဝဲလၢပှၤကြၢးမၤသံအီၤအဃိ အတၢ်စံၣ်ညီၣ်တခါအံၤ အဆူၣ်ဒိၣ်မး. စီၤနၤသၣ်တဲဘၣ် စီၤဒၤဝံးတၢ်အဒိအံၤန့ၣ် ဒ်သိးကမၤစၢၤစီၤဒၤဝံးလၢ အဝဲကသ့ၣ်ညါလီၤအသးလၢ တၢ်ကမၣ်လၢအမၤဘၣ်ဝဲန့ၣ် အၢသီဒိၣ်န့ၢ်ဒံး တၢ်အဒိအံၤလီၤ. ဒီးယဟိဝၤယွၤပာ်ဖျါထီၣ် တၢ်သးကညီၤလၢ စီၤဒၤဝံးအဖီခိၣ်ဒိၣ်မး သနာ်က့ စီၤဒၤဝံးတပာ်ဖျါထီၣ် တၢ်သးကညီၤလၢ ပှၤဟုၣ်သိလၢစီၤနၤသၣ် ဟ့ၣ်တၢ်အဒိအပူၤန့ၣ်ဘၣ်.—၂ ၡမူၤအ့လး ၁၂:၇-၁၃.
စီၤပၤဒၤဝံးတပာ်ဖျါထီၣ် တၢ်သးကညီၤလၢ ပှၤတဂၤလၢ စီၤနၤသၣ်ဟ့ၣ်တၢ်အဒိပူၤဘၣ် (ကွၢ်လံာ်အဆၢ ၁၉-၂၀)d
၂၀. လၢစီၤဒၤဝံးအအိၣ်န့ၣ် ပမၤလိန့ၢ်တၢ်မနုၤလဲၣ်.
၂၀ ဖဲစီၤဒၤဝံး သးဒိၣ်ထီၣ်တၢ်အခါ အစံၣ်ညီၣ်ဝဲလၢ စီၤနၤဘလး ဒီးအပှၤပိာ်ခွါခဲလၢာ် ကြၢးသံဝဲလီၤ. ဒီးလၢခံ စီၤဒၤဝံးတဲဝဲစ့ၢ်ကီးလၢ ပှၤထူးပှၤတီၤလၢစီၤနၤသၣ် ဟ့ၣ်တၢ်အဒိအပူၤန့ၣ် ကြၢးသံဝဲလီၤ. စီၤဒၤဝံးန့ၣ်မ့ၢ်ပှၤလၢအသးဂ့ၤ ဘၣ်ဆၣ် ဘၣ်မနုၤအဃိ အဝဲဘၣ်စံၣ်ညီၣ် ပှၤဟုၣ်တၢ်တဂၤန့ၣ် ဆူၣ်ဆူၣ်ကိၤကိၤလဲၣ်. ပကကွၢ်သကိး ဖဲန့ၣ်အခါ တၢ်ကဲထီၣ်အသးဒီး စီၤဒၤဝံးဒ်လဲၣ်. ဖဲန့ၣ်အခါ စီၤဒၤဝံးမၤဘၣ် တၢ်ကမၣ်ဖးဒိၣ်အဃိ အတအိၣ်ဒီး သးလၢအသ့ၣ်ညါဒၣ်တၢ် လၢအကဆှီဘၣ်. ပှၤလၢအစံၣ်ညီၣ်ပှၤဂၤ ဆူၣ်ဆူၣ်ကိၤကိၤန့ၣ် မ့ၢ်ဝဲတၢ်ပနီၣ်တခါလၢ အတအိၣ်ဒီး တၢ်ရ့လိာ်သးဒီး ယဟိဝၤယွၤလၢအဂ့ၤဘၣ်. ယ့ၣ်ၡူးဟ့ၣ်ပလီၢ် အပျဲၢ်အဘီၣ်တဖၣ်လၢ “ဒ်သိး သုတဘၣ် တၢ်စံၣ်ညီၣ်တဂ့ၤအဂီၢ် တဘၣ်စံၣ်ညီၣ် ပှၤဂၤလၢၤတဂ့ၤ. ဒ်သုစံၣ်ညီၣ်ပှၤဂၤအသိးန့ၣ် သုကဘၣ် တၢ်စံၣ်ညီၣ်က့ၤသု ဒ်န့ၣ်အသိး စ့ၢ်ကီးလီၤ.” (မးသဲ ၇:၁, ၂) အဃိ ပကဘၣ်ဂုာ်ကျဲးစၢးဟးဆှဲး စံၣ်ညီၣ်ပှၤဂၤ ဆူၣ်ဆူၣ်ကိၤကိၤ ဒီးပကဘၣ်ဂုာ်ကျဲးစၢး ဒ်သိးပကအိၣ်ဒီး “တၢ်သးကညီၤ ထူးထူးတီၤတီၤ” ဒ်ကစၢ်ယွၤအသိးလီၤ.
၂၁-၂၂. ကျဲတနီၤလၢပပာ်ဖျါထီၣ် တၢ်သးကညီၤသ့န့ၣ် မ့ၢ်မနုၤလဲၣ်.
၂၁ တၢ်သးကညီၤန့ၣ် တမ့ၢ်ထဲတၢ်တူၢ်ဘၣ် ယိယိဖိတခါဘၣ်. ပှၤလၢအသးကညီၤတၢ်န့ၣ် မၤန့ၢ်တၢ်လၢ ပှၤဂၤအဂီၢ်လီၤ. အဃိ ပဝဲခဲလၢာ် ပကဂုာ်ကျဲးစၢး မၤစၢၤပှၤလၢ အလိၣ်ဘၣ်တၢ်မၤစၢၤ လၢပဟံၣ်ဖိဃီဖိပူၤ, တၢ်အိၣ်ဖှိၣ်ပူၤ ဒီးလၢပလီၢ်ကဝီၤပူၤလီၤ. ပကဘၣ်သံကွၢ်လီၤပသးလၢ ပှၤလၢအလိၣ်ဘၣ် တၢ်မၤမုာ်ထီၣ်က့ၤအီၤန့ၣ် အိၣ်ဧါ. ပမၤစၢၤအဝဲသ့ၣ် ဒ်သိးဒီး ဟ့ၣ်အဝဲသ့ၣ်တၢ်အီၣ်တၢ်အီ ဒီးမၤန့ၢ်တၢ်လၢ အဝဲသ့ၣ်လိၣ်ဘၣ်တဖၣ် ကသ့ဧါ. ပှၤလၢအဟဲက့ၤအဒါက့ၤလၢ တၢ်အိၣ်ဖှိၣ်ပူၤ ဒီးလိၣ်ဘၣ်တံၤသကိးလၢ ကမၤမုာ်ထီၣ်အသးဒီး ဟ့ၣ်ဂံၢ်ဟ့ၣ်ဘါအီၤန့ၣ် အိၣ်ဧါ. ပတဲဘၣ်ပှၤဂၤ ဘၣ်ဃးဒီး တၢ်သးခုကစီၣ်လၢ ကမၤမုာ်ထီၣ်ပှၤသး ကသ့ဧါ. ပမ့ၢ်ဆိကမိၣ်ထီၣ် တၢ်သံကွၢ်တဖၣ်အံၤန့ၣ် ပကထံၣ်န့ၢ် တၢ်ခွဲးတၢ်ယာ်လၢ ပကပာ်ဖျါထီၣ် တၢ်သးကညီၤ လၢပှၤလၢပထံၣ်ဘၣ်အီၤတဖၣ်လီၤ.—ယိၤဘး ၂၉:၁၂, ၁၃; ရိမ့ၤ ၁၀:၁၄, ၁၅; ယၤကိာ် ၁:၂၇.
၂၂ ပမ့ၢ်ပာ်သူၣ်ပာ်သးလၢ ပှၤတနီၤလိၣ်ဘၣ်တၢ်မၤစၢၤန့ၣ် ပအိၣ်ဒီးတၢ်ခွဲးတၢ်ယာ်လၢ ပကပာ်ဖျါထီၣ် တၢ်သးကညီၤလၢ ပှၤဂၤအဖီခိၣ်လီၤ. ပပၢ်လၢမူခိၣ်န့ၣ် မ့ၢ်ယွၤလၢအအိၣ်ဒီး “တၢ်သးကညီၤ ထူးထူးတီၤတီၤ” တဂၤအဃိ ဖဲပပာ်ဖျါထီၣ် တၢ်သးကညီၤအခါ မ့ၢ်ဒၣ်ပမၤသးခုအသးလီၤ.
တၢ်သးဝံၣ် ၄၃ တၢ်ထုကဖၣ်အိၣ်ဒီး တၢ်စံးဘျုး
a တၢ်သးကညီၤန့ၣ်မ့ၢ်ဝဲ ယဟိဝၤယွၤ အတၢ်ဂ့ၤတၢ်ဝါ လၢအဂ့ၤဒိၣ်မးတခါ. ဒီးပဝဲခဲလၢာ် ပကဘၣ်ဒုးအိၣ်ထီၣ် တၢ်ဂ့ၤတၢ်ဝါတခါအံၤ. လၢတၢ်မၤလိအံၤအပူၤ ပကတဲသကိး ဘၣ်မနုၤအဃိ ယဟိဝၤယွၤ ပာ်ဖျါထီၣ် တၢ်သးကညီၤလဲၣ်, ဘၣ်မနုၤအဃိ အအိၣ်ဒီး တၢ်သးကညီၤဖဲ အဘှီဘၣ်ထီၣ်ပှၤအခါလဲၣ် ဒီးပပာ်ဖျါထီၣ် အတၢ်ဂ့ၤတၢ်ဝါတခါအံၤ ကသ့ဒ်လဲၣ်.
b ပှၤလၢအဘၣ် တၢ်တူၢ်လိာ်က့ၤအီၤလၢ တၢ်အိၣ်ဖှိၣ်ပူၤတဖၣ် မၤဂ့ၤထီၣ်က့ၤ အတၢ်ရ့လိာ်သးဒီး ယဟိဝၤယွၤကသ့ဒ်လဲၣ် ဒီးတၢ်အိၣ်ဖှိၣ်သးပှၢ်တဖၣ် မၤစၢၤအဝဲသ့ၣ် ကသ့ဒ်လဲၣ်. ဒ်သိးနကသ့ၣ်ညါအါထီၣ်အဂီၢ် ကွၢ်တၢ်ဂ့ၢ်လၢ “မၤဂ့ၤထီၣ် နတၢ်ရ့လိာ်သးဒီး ယဟိဝၤယွၤ” တက့ၢ်.
c တၢ်တဲဖျါထီၣ်တၢ်ဂီၤ အခီပညီ– ပၢ်လၢအအိၣ်လၢ ဟံၣ်ခိၣ်ဒုးအဖီခိၣ်န့ၣ် ထံၣ်စိဃီၤ အဖိခွါလၢအဟးဖျိးတဂၤ ဟဲက့ၤလၢဟံၣ် ဒီးအဝဲကရီလဲၤဖိးဟုအီၤ.
d တၢ်တဲဖျါထီၣ်တၢ်ဂီၤ အခီပညီ– စီၤပၤဒၤဝံးမၤကမၣ်ဘၣ်တၢ် ဒီးအသူၣ်ကိၢ်သးဂီၤတၢ် အဃိ ဖဲအနၢ်ဟူ ဝံနၤသၣ်ဟ့ၣ်တၢ်အဒိအခါ အဝဲသးဒိၣ်ထီၣ်တၢ်ဒိၣ်မး ဒီးအတဲဝဲလၢ ပှၤထူးပှၤတီၤတဂၤန့ၣ် အကြၢးသံလီၤ.