ဆဲးပာ်ဖျါထီၣ်​ တၢ်အဲၣ်လၢအတီ လၢတဂၤဒီးတဂၤအဖီခိၣ်

၁-၂. ဘၣ်မနုၤအဃိ ပကဘၣ်ပာ်ဖျါထီၣ်​ တၢ်အဲၣ်လၢအတီ လၢတဂၤဒီးတဂၤ အဖီခိၣ်လဲၣ်.

ပမ့ၢ်ပာ်ဖျါထီၣ်​ တၢ်အဲၣ်လၢအတီ လၢတဂၤဒီးတဂၤ အဖီခိၣ်န့ၣ်​ ပကဒိးန့ၢ်ဘၣ်အဘျုးဒ်လဲၣ်. လၢလံာ်စီဆှံပူၤ တၢ်ကတိၤဒိ အိၣ်ဝဲလၢ “ဒုးလဲၤသဒၣ်တၢ်ဘျုးတၢ်ဖှိၣ်,b ဒီးတၢ်မ့ၢ်တၢ်တီလၢနၤတဂ့ၤ, စၢထီၣ်အီၤလၢနကိာ်လိၤ, ကွဲးအီၤလၢ နသးအဘ့ၣ်ဘၣ်လိၤန့ၣ်တက့ၢ်. မ့မ့ၢ်ဒ်န့ၣ်ဒီး နကဘၣ်တၢ်အသး, ဒီးဘီၣ်ထီၣ်ညီထီၣ်လၢ ယွၤဒီးပှၤကညီအမဲာ်ညါလီၤ.” “ပှၤမၤဘျုးမၤဖှိၣ်တၢ်န့ၣ်​ မၤတၢ်ဂ့ၤလၢအသးဒၣ်ဝဲအဂီၢ်လီၤ.” “ပှၤလၢအလူၤတၢ်တီတၢ်လိၤဒီး တၢ်သးကညီၤန့ၣ်​ ကထံၣ်န့ၢ်တၢ်မူ” လီၤ.—ကတိၤဒိ ၃:၃, ၄; ၁၁:၁၇; ၂၁:၂၁.

^၂ တၢ်ကတိၤဒိတဖၣ်အံၤ ပာ်ဖျါထီၣ်ဝဲလၢ ပမ့ၢ်ပာ်ဖျါထီၣ်​ တၢ်အဲၣ်လၢအတီန့ၣ်​ ပကဒိးန့ၢ်ဘၣ်အဘျုး သၢခါလီၤ. တၢတခါန့ၣ်​ ပမ့ၢ်ပာ်ဖျါထီၣ်​ တၢ်အဲၣ်လၢအတီန့ၣ်​ ပကကဲထီၣ်​ ပှၤလုၢ်ဒိၣ်ပှ့ၤဒိၣ်လၢ ကစၢ်ယွၤအမဲာ်ညါ. ခံခါတခါန့ၣ်​ ပပာ်ဖျါထီၣ်​ တၢ်အဲၣ်လၢအတီအဃိ ကဲဘျုးလၢ ပနီၢ်ကစၢ်အဂီၢ်. အဒိ, ပကအိၣ်ဒီး တၢ်ရ့လိာ်သးဒီးပှၤဂၤလၢအဂ့ၤ. သၢခါတခါန့ၣ်​ ပမ့ၢ်ပာ်ဖျါထီၣ်​ တၢ်အဲၣ်လၢအတီန့ၣ်​ ပကဒိးန့ၢ်ဘၣ်​ တၢ်ဆိၣ်ဂ့ၤတဖၣ်လၢခါဆူညါ ဃုာ်ဒီးတၢ်အိၣ်မူ လီၤထူလီၤယိာ်လီၤ. တကးဒံးဘၣ်​ ပမ့ၢ်ပာ်ဖျါထီၣ်​ တၢ်အဲၣ်လၢအတီန့ၣ်​ မ့ၢ်ဒၣ်ပဒိကနၣ်​ ယဟိဝၤယွၤ အတၢ်ကတိၤလၢ “ဟ့ၣ်တၢ်ဘျုးတၢ်ဖှိၣ်, ဒီးတၢ်သးကညီၤ, တဂၤလၢအဒီပုၢ်ဝဲၢ်တဂၤလၢ အဒီပုၢ်ဝဲၢ်တက့ၢ်.”—စကၤရယၤ ၇:၉.

၃. လၢတၢ်မၤလိအံၤအပူၤ ပကတဲသကိး တၢ်သံကွၢ်မနုၤတဖၣ်လဲၣ်.

^၃ လၢတၢ်မၤလိအံၤအပူၤ ပကတဲသကိး တၢ်သံကွၢ်လွံၢ်ဖျၢၣ်​ အတၢ်စံးဆၢလီၤ. ပကဘၣ်ပာ်ဖျါထီၣ်​ တၢ်အဲၣ်လၢအတီ လၢမတဂၤအဖီခိၣ်လဲၣ်. ဘၣ်ဃးဒီး တၢ်အဲၣ်လၢအတီန့ၣ်​ ပမၤလိန့ၢ်ဘၣ်​ တၢ်မနုၤလၢ လံာ်ရူၤသးအပူၤလဲၣ်. မုၢ်မဆါတနံၤအံၤ ပပာ်ဖျါထီၣ်​ တၢ်အဲၣ်လၢအတီ ကသ့ဒ်လဲၣ်. ပှၤလၢအပာ်ဖျါထီၣ်​ တၢ်အဲၣ်လၢအတီန့ၣ်​ ကဒိးန့ၢ်ဘၣ်ဝဲ အဘျုးဒ်လဲၣ်.

ပကဘၣ်ပာ်ဖျါထီၣ်​ တၢ်အဲၣ်လၢအတီ လၢမတဂၤအဖီခိၣ်လဲၣ်

၄. ယဟိဝၤယွၤပာ်ဖျါထီၣ်​ တၢ်အဲၣ်လၢအတီန့ၣ်​ ပကွၢ်လိမၤဒိးအီၤ ကသ့ဒ်လဲၣ်. (မၢ်ကူး ၁၀:၂၉, ၃၀)

^၄ တၢ်မၤလိလၢ အပူၤကွံာ်တခါန့ၣ်​ ပသ့ၣ်ညါဘၣ်လၢ ယဟိဝၤယွၤ ပာ်ဖျါထီၣ်​ တၢ်အဲၣ်လၢအတီ ထဲဒၣ်​ ပှၤလၢအအဲၣ်အီၤ ဒီးပှၤလၢအမၤ အတၢ်မၤတဖၣ်​ အဖီခိၣ်လီၤ. (ဒၤနံးယ့လး ၉:၄) ပအဲၣ်ဒိး “ကဲထီၣ်ပှၤကွၢ်လိ ကစၢ်ယွၤ ဒ်ဖိသးဘိတဖၣ်​ အသိး” လီၤ. (အ့းဖ့းစူး ၅:၁) အဃိ ပအဲၣ်ဒိးပာ်ဖျါထီၣ်​ တၢ်အဲၣ်လၢအတီ လၢပဒီပုၢ်ဝဲၢ်မုၣ်ခွါတဖၣ်​ အဖီခိၣ်လီၤ.—ဖး မၢ်ကူး ၁၀:၂၉, ၃၀.

၅-၆. ပှၤအါတက့ၢ် ဆိကမိၣ်ဝဲလၢ ပှၤလၢအအိၣ်ဒီး “တၢ်သးတီ” န့ၣ်အမ့ၢ်ပှၤဒ်လဲၣ်.

^၅ ပမ့ၢ်နၢ်ပၢၢ်အါထီၣ်​ တၢ်အဲၣ်လၢအတီ အခီပညီန့ၣ်​ ပကအဲၣ်ဒိးပာ်ဖျါထီၣ်​ တၢ်အဲၣ်လၢအတီ လၢပဒီပုၢ်ဝဲၢ်မုၣ်ခွါတဖၣ်​ အဖီခိၣ်လီၤ. ဒ်သိးပကနၢ်ပၢၢ်အါထီၣ်​ တၢ်အဲၣ်လၢအတီအဂီၢ် ပကထိၣ်သတြီၤကွၢ် တၢ်အဲၣ်လၢအတီန့ၣ်​ အလီၤဆီဒီး တၢ်သးတီလၢ ပထံၣ်ဘၣ်အီၤလၢ မုၢ်မဆါတနံၤအံၤဒ်လဲၣ်. ပကကွၢ်သကိး တၢ်အဒိတခါ.

^၆ မုၢ်မဆါတနံၤအံၤ ပှၤတဂၤမ့ၢ်မၤတၢ်လၢ ခီပနံာ်တဖျၢၣ်လၢ အနံၣ်အါမးန့ၣ်​ ပှၤပာ်ပနီၣ်အီၤဒ် ပှၤမၤတၢ်ဖိလၢအအိၣ်ဒီး တၢ်သးတီတဂၤလီၤ. ဘၣ်သ့ၣ်သ့ၣ်​ အမၤတၢ်လၢ အနံၣ်အါမးသနာ်က့ အတထံၣ်လိာ်သးဒီး ခီပနံာ်အခိၣ်တဖၣ်​ နီတဘျီဘၣ်. ဘၣ်သ့ၣ်သ့ၣ်​ အဝဲတသးလီၤပလိာ်ဒီး ခီပနံာ်အတၢ်ဘျၢတဖၣ်​ ခဲလၢာ်ဘၣ်​ ဒီးအဝဲတကၠဲးခီပနံာ်ဘၣ်. ဘၣ်ဆၣ်​ မ့ၢ်လၢခီပနံာ်ဟ့ၣ်အီၤစ့အဃိ အမၤတၢ်ဖဲန့ၣ်မုာ်မး. ဒီးဘၣ်သ့ၣ်သ့ၣ်​ အဝဲကဆဲးမၤတၢ်ဖဲန့ၣ်​ တုၤလၢအဘၣ်အိၣ်ဘှံးတစု မ့တမ့ၢ် တုၤလၢအန့ၢ်ဘၣ်​ တၢ်မၤအဂၤလၢ အဂ့ၤန့ၢ်အန့ၣ်တစုလီၤ.

၇-၈. (က) တၢ်မနုၤ ထိၣ်ဟူးထိၣ်ဂဲၤထီၣ်​ ပှၤတဂၤလၢ ကပာ်ဖျါထီၣ်​ တၢ်အဲၣ်လၢအတီလဲၣ်. (ခ) ဘၣ်မနုၤအဃိ ပကတဲသကိးတၢ်ဂ့ၢ်လၢ လံာ်ရူၤသးအပူၤလဲၣ်.

^၇ တၢ်သးတီလၢ ဘၣ်တၢ်ပာ်ဖျါထီၣ်အီၤလၢ လံာ်အဆၢ ၆ အပူၤန့ၣ်​ လီၤဆီဒီး တၢ်အဲၣ်လၢအတီလၢ ပှၤတဂၤ ပာ်ဖျါထီၣ်ဝဲလီၤ. မ့ၢ်လၢတၢ်ဂ့ၢ်လၢ ပှၤတဂၤပာ်ဖျါထီၣ်​ တၢ်သးတီ ဒီးတၢ်ဂ့ၢ်လၢပှၤတဂၤ ပာ်ဖျါထီၣ်​ တၢ်အဲၣ်လၢအတီန့ၣ်​ တဒ်သိးလိာ်အသးဘၣ်​ အဃိလီၤ. ကစၢ်ယွၤအခ့အပှၤလၢ လံာ်စီဆှံအစိၤတဖၣ်န့ၣ်​ ဘၣ်မနုၤအဃိ အဝဲသ့ၣ်ပာ်ဖျါထီၣ်​ တၢ်အဲၣ်လၢအတီလဲၣ်. အဝဲသ့ၣ်ပာ်ဖျါထီၣ်ဝဲ တၢ်အဲၣ်လၢအတီန့ၣ်​ တမ့ၢ်လၢအဘၣ်​ ပာ်ဖျါထီၣ်ဝဲအဃိဘၣ်, မ့ၢ်လၢ အဝဲသ့ၣ်​ သးအိၣ်ပာ်ဖျါထီၣ်ဝဲ အဃိလီၤ. ခဲအံၤ ပကကွၢ်သကိး စီၤဒၤဝံးအတၢ်လဲၤခီဖျိ. စီၤယိနၤသၣ်အပါန့ၣ်​ အဲၣ်ဒိးမၤသံစီၤဒၤဝံး ဘၣ်ဆၣ်​ စီၤဒၤဝံး ပာ်ဖျါထီၣ်တၢ်အဲၣ်လၢအတီ လၢအသကိး စီၤယိနၤသၣ်​ အဖီခိၣ်လီၤ. စီၤယိနၤသၣ်သံဝံၤ အနံၣ်ဖးယံာ်လံ သနာ်က့ စီၤဒၤဝံးဆဲးပာ်ဖျါထီၣ်​ တၢ်အဲၣ်အတီလၢ စီၤယိနၤသၣ်အဖိခွါ စီၤမဖံဘိၤၡ့း အဖီခိၣ်လီၤ.—၁ ၡမူၤအ့လး ၂၀:၉, ၁၄, ၁၅; ၂ ၡမူၤအ့လး ၄:၄; ၈:၁၅; ၉:၁, ၆, ၇.

^၈ ပမ့ၢ်ဆိကမိၣ်ထံ တၢ်ဂ့ၢ်လၢ လံာ်ရူၤသးအပူၤန့ၣ်​ ပကမၤလိန့ၢ်ဘၣ်​ ဘၣ်ဃးဒီး တၢ်အဲၣ်လၢအတီ အါမးလီၤ. လၢလံာ်ရူၤသးအပူၤ ပှၤလၢအအိၣ်ဒီး တၢ်အဲၣ်လၢအတီသ့ၣ်တဖၣ်န့ၣ်​ ပမၤလိန့ၢ်ဘၣ်​ တၢ်မနုၤလၢအဝဲသ့ၣ်အအိၣ်လဲၣ်. တၢ်လၢပမၤလိဘၣ်အီၤတဖၣ်န့ၣ်​ ပမၤထွဲအီၤလၢ ပတၢ်အိၣ်ဖှိၣ်ပူၤ ကသ့ဒ်လဲၣ်.c

ဘၣ်ဃးဒီး တၢ်အဲၣ်လၢအတီန့ၣ်​ ပမၤလိန့ၢ်ဘၣ်​ တၢ်မနုၤလၢ လံာ်ရူၤသးအပူၤလဲၣ်

၉. ဘၣ်မနုၤအဃိ နီၢ်နၤဧမံ ဆိကမိၣ်လၢ ယဟိဝၤယွၤ ထီဒါအီၤလဲၣ်.

^၉ လၢလံာ်ရူၤသးအပူၤန့ၣ်​ ပဖးဘၣ်ဝဲ နီၢ်နၤဧမံ ဒီးအဒဲၣ်မုၣ်နီၢ်ရူၤသး ဒီးစီၤဘိၤဧးအဂ့ၢ်. စီၤဘိၤဧးန့ၣ်မ့ၢ်ပှၤလၢ အအဲၣ်ယွၤပျံၤယွၤ ဒီးမ့ၢ်ဝဲနီၢ်နၤဧမံ အဝၤအဘူးအတံၢ်လီၤ. ခီဖျိလၢ တၢ်သၣ်ဝံၤလီၤဒိ အိၣ်ထီၣ်လၢ ကီၢ်အံၣ်စရ့လးပူၤအဃိ နီၢ်နၤဧမံ ဒီးအဝၤ ဒီးအဖိခွါခံဂၤန့ၣ်​ လဲၤအိၣ်လၢ ကီၢ်မိၤအးလီၤ. ဖဲအဝဲသ့ၣ်​ လဲၤအိၣ်ဖဲန့ၣ်အခါ နီၢ်နၤဧမံ အဝၤသံသဒၣ်ကွံာ်အီၤ. မ့မ့ၢ်လၢအဖိခွါခံဂၤန့ၣ်​ ဆီဟံၣ်ဆီဃီ ဘၣ်ဆၣ်​ လၢခံန့ၣ်​ အဝဲသ့ၣ်သံသဒၣ်ကွံာ်အီၤအဃိ လီၤသးအုးဒိၣ်မး. (ရူၤသး ၁:၃-၅; ၂:၁) နီၢ်နၤဧမံ တူၢ်ဘၣ်ဝဲ တၢ်ကီတၢ်ခဲနးမး တုၤဒၣ်လဲာ် အလီၤဂာ်လၢ အကျဲကတၢၢ်ဘုသးလၢာ်. အဝဲတူၢ်ဘၣ်တၢ် နးမးအဃိ အဆိကမိၣ်ဝဲလၢ ယဟိဝၤယွၤစံၣ်ညီၣ်အီၤ. အတၢ်တူၢ်ဘၣ်လၢ ကစၢ်ယွၤအဖီခိၣ်​ အိၣ်ဒ်လဲၣ်န့ၣ်​ အတဲဝဲလၢ “ယွၤဃၣ်အသးထီဒါယၤလံ.” “တၢ်သ့တၢ်လၢာ် မၤယၤနးနးကလဲာ်လီၤ.” ဒီးအတဲစ့ၢ်ကီးဝဲလၢ “ယွၤအုၣ်အသးထီဒါယၤ, ဒီးတၢ်သ့တၢ်လၢာ်မၤအၢယၤလီၤ.”—ရူၤသး ၁:၁၃, ခ့ခါစှီၤကျိာ်; ရူၤသး ၁:၂၀, ၂၁.

၁၀. နီၢ်နၤဧမံ တူၢ်ဘၣ်ဝဲလၢ ယဟိဝၤယွၤ ထီဒါအီၤသနာ်က့ ယဟိဝၤယွၤ မၤစၢၤအီၤဒ်လဲၣ်.

^၁၀ နီၢ်နၤဧမံ တဲဝဲလၢ ယဟိဝၤယွၤထီဒါအီၤ သနာ်က့ ယဟိဝၤယွၤ တပာ်တ့ၢ်ကွံာ်အီၤဘၣ်. လၢတၢ်န့ၣ်အလီၢ် ယဟိဝၤယွၤ ပာ်ဖျါထီၣ်​ တၢ်ဒိသူၣ်ဒိသးလၢ အဖီခိၣ်လီၤ. ယဟိဝၤယွၤ နၢ်ပၢၢ်ဝဲလၢ “တၢ်မၤအၢမၤနးန့ၣ်​ မၤပျုၢ်ပှၤကူၣ်တၢ်သ့လီၤ.” (စံၣ်တဲၤတဲလီၤတၢ် ၇:၇) ဘၣ်ဆၣ်​ ဒ်သိးဒီး နီၢ်နၤဧမံ ကထံၣ်လၢ ယဟိဝၤယွၤ တပာ်တ့ၢ်ကွံာ်အီၤအဂီၢ်ဘၣ်န့ၣ်​ ယဟိဝၤယွၤ မၤစၢၤအီၤဒ်လဲၣ်. (၁ ၡမူၤအ့လး ၂:၈) ယဟိဝၤယွၤ ထိၣ်ဟူးထိၣ်ဂဲၤထီၣ်​ နီၢ်ရူၤသးလၢ ကမၤစၢၤ နီၢ်နၤဧမံ ဒီးကပာ်ဖျါထီၣ်​ တၢ်အဲၣ်လၢအတီလၢ အဖီခိၣ်. နီၢ်ရူၤသးပာ်ဖျါထီၣ်​ တၢ်အဲၣ်လၢအတီလၢ နီၢ်နၤဧမံအဖီခိၣ်​ ဒီးမၤစၢၤအီၤဒ်သိး အသးသုတလီၤစၢ်တဂ့ၤ ဒီးမၤစၢၤအီၤလၢ ကသ့ၣ်ညါလၢ ယဟိဝၤယွၤ ဆဲးအဲၣ်အီၤဒံး. ပမၤလိန့ၢ်တၢ်လၢ နီၢ်ရူၤသးအအိၣ်ဒ်လဲၣ်.

၁၁. ဘၣ်မနုၤအဃိ ဒီပုၢ်ဝဲၢ်မုၣ်ခွါတဖၣ်​ မၤစၢၤပှၤလၢအသူၣ်အုးသးအုး ဒီးအသးဂံၢ်ဘါလီၤစၢ်တဖၣ်န့ၣ်လဲၣ်.

^၁၁ ပမ့ၢ်အိၣ်ဒီး တၢ်အဲၣ်လၢအတီန့ၣ်​ ကထိၣ်ဟူးထိၣ်ဂဲၤထီၣ်ပှၤလၢ ပကမၤစၢၤပှၤလၢ အသူၣ်အုးသးအုး ဒီးအသးဂံၢ်ဘါလီၤစၢ်တဖၣ်. ဒ်နီၢ်ရူၤသးမၤစၢၤ နီၢ်နၤဧမံအသိး မုၢ်မဆါတနံၤအံၤ ပဒီပုၢ်ဝဲၢ်မုၣ်ခွါအါဂၤ သးအိၣ်မၤစၢၤ ပှၤလၢတၢ်အိၣ်ဖှိၣ်ပူၤ လၢအသူၣ်အုးသးအုး ဒီးအသးဂံၢ်ဘါလီၤစၢ်တဖၣ်လီၤ. အဝဲသ့ၣ်အဲၣ်​ ဒီပုၢ်ဝဲၢ်မုၣ်ခွါတဖၣ်​ ဒိၣ်မးအဃိ တသ့ဖဲအသ့ အဝဲသ့ၣ်​ မၤစၢၤဝဲလၢအဂ့ၤကတၢၢ်. (ကတိၤဒိ ၁၂:၂၅; ၂၄:၁၀) တၢ်လၢအဝဲသ့ၣ်မၤဝဲန့ၣ်​ လီၤပလိာ်ဒီး စီၤပီလူးအတၢ်ကတိၤလၢ အတဲဝဲလၢ “တဲမုာ်ထီၣ်က့ၤ ပှၤလၢ အသးအုးတဖၣ်အသး, ဆီၣ်ထွဲမၤစၢၤ ပှၤလၢ အဂံၢ်စၢ်ဘါစၢ် ဒီးပာ်ဖျါထီၣ်​ တၢ်ဝံသးစူၤလၢ ပှၤကိးဂၤဒဲးအဖီခိၣ်” တက့ၢ်.—၁ သ့းစၤလနံ ၅:၁၄.

၁၂. ကျဲအဂ့ၤကတၢၢ်တဘိလၢ ပမၤစၢၤ ပဒီပုၢ်ဝဲၢ်မုၣ်ခွါလၢ အသးဂံၢ်ဘါလီၤစၢ်တဖၣ်သ့န့ၣ်​ မ့ၢ်မနုၤလဲၣ်.

^၁၂ ကျဲအဂ့ၤကတၢၢ်တဘိလၢ ပမၤစၢၤပဒီပုၢ်ဝဲၢ်မုၣ်ခွါလၢ အသးဂံၢ်ဘါလီၤစၢ်တဖၣ်သ့န့ၣ်​ မ့ၢ်ဝဲ ပဒိကနၣ်န့ၢ်အဝဲသ့ၣ်​ ဒီးဒုးနာ်န့ၢ်အဝဲသ့ၣ်လၢ ပအဲၣ်အဝဲသ့ၣ်လီၤ. ပမ့ၢ်ပာ်ဖျါထီၣ်​ တၢ်သူၣ်အိၣ်သးအိၣ်​ လၢကစၢ်ယွၤအခ့အပှၤလၢ အလုၢ်ဒိၣ်ပှ့ၤဒိၣ်တဖၣ်​ အဖီခိၣ်န့ၣ်​ ယဟိဝၤယွၤထံၣ်ဝဲ. (စံးထီၣ်ပတြၢၤ ၄၁:၁) အဃိ ကတိၤဒိ ၁၉:၁၇ တဲဝဲလၢ “ပှၤလၢအသးကညီၤ ပှၤဖှီၣ်ဖိန့ၣ်​ ဒုးလိၢ်တၢ်လၢယွၤလီၤ. ဒီးတၢ်လၢအမၤဂ့ၤတၢ်န့ၣ်​ ယွၤကဟ့ၣ်ကၣ်အီၤလီၤ.”

၁၃. နီၢ်ရူၤသးန့ၣ်​ လီၤဆီလိာ်အသးဒီး နီၢ်ဧိးရပၤ ဒ်လဲၣ်, ဒီးအဝဲပာ်ဖျါထီၣ်ဝဲ တၢ်အဲၣ်လၢအတီဒ်လဲၣ်. (ကွၢ်တၢ်ဂီၤလၢ လံာ်ကုခိၣ်.)

^၁၃ ဒ်သိးပကနၢ်ပၢၢ်အါထီၣ်​ တၢ်အဲၣ်လၢအတီအဂီၢ် ပကဆိကမိၣ်ကွၢ် ဘၣ်ဃးဒီး ဖဲနီၢ်နၤဧမံ အဝၤဒီးအဖိခွါသံဝံၤအလီၢ်ခံ တၢ်မၤအသးဒီးအီၤဒ်လဲၣ်. နီၢ်နၤဧမံ နၢ်ဟူဘၣ်ဝဲလၢ “ယွၤအိၣ်သကိးလံအပှၤဂီၢ်မုၢ်, ဒီးဟ့ၣ်လီၤလံအီၤလၢကိၣ်” အခါ အဝဲပာ်လီၤအသးလၢ ကက့ၤကဒါက့ၤလၢ အတၢ်လီၢ်လီၤ. (ရူၤသး ၁:၆) လၢအခီၣ်ထံးန့ၣ်​ နီၢ်နၤဧမံ အဒဲၣ်မုၣ်ခံဂၤ ပိာ်ထီၣ်အခံလီၤ. ဘၣ်ဆၣ်​ လၢကျဲန့ၣ်​ နီၢ်နၤဧမံ မၢအဒဲၣ်မုၣ်ခံဂၤက့ၤလၢ ကီၢ်မိၤအး. ဒီးအဝဲမၢ အဝဲသ့ၣ်က့ၤသၢဘျီညါ. အဃိ အဝဲသ့ၣ်မၤဝဲဒ်လဲၣ်. လံာ်စီဆှံတဲဝဲလၢ “နီၢ်ဧိးရပၤနၢမူအမံၤပှၢ်ပိာ်မုၣ်လီၤ. မ့မ့ၢ်နီၢ်ရူၤသးတဂၤစဲဘူးဒီးအီၤလီၤ.” (ရူၤသး ၁:၇-၁၄) နီၢ်ဧိးရပၤန့ၣ်​ ဒ်နီၢ်နၤဧမံ တဲအီၤအသိး အက့ၤဝဲလၢ ကီၢ်မိၤအး. ဘၣ်ဆၣ်​ မ့မ့ၢ်နီၢ်ရူၤသးန့ၣ်​ တက့ၤဝဲဘၣ်. အဝဲမ့ၢ်အဲၣ်ဒိးက့ၤန့ၣ်​ အက့ၤဝဲသ့ ဘၣ်ဆၣ်​ မ့ၢ်လၢအအိၣ်ဒီး တၢ်အဲၣ်လၢအတီအဃိ အဝဲပာ်လီၤအသးလၢ ကအိၣ်ဒီးအမံၤပှၢ်ပိာ်မုၣ်လီၤ. (ရူၤသး ၁:၁၆, ၁၇) နီၢ်ရူၤသးပာ်လီၤအသးလၢ အကအိၣ်ဒီး နီၢ်နၤဧမံန့ၣ်​ တမ့ၢ်လၢအကဘၣ်မၤဝဲ အဃိဘၣ်. မ့ၢ်လၢအသးအိၣ်မၤဝဲ အဃိလီၤ. နီၢ်ရူၤသး အတၢ်ဆၢတဲာ်တဖၣ်အံၤန့ၣ်​ ပာ်ဖျါထီၣ်ဝဲလၢ အအိၣ်ဒီးတၢ်အဲၣ်လၢအတီ နီၢ်ကီၢ်. ပမၤလိန့ၢ်တၢ်မနုၤလၢ နီၢ်ရူၤသးအအိၣ်လဲၣ်.

၁၄. (က) မုၢ်မဆါတနံၤအံၤ ဒီပုၢ်ဝဲၢ်မုၣ်ခွါအါဂၤ ပာ်ဖျါထီၣ်​ တၢ်အဲၣ်ဒ်လဲၣ်. (ခ) ဒ် ဧ့ၤဘြံၤ ၁၃:၁၆ ပာ်ဖျါထီၣ်ဝဲအသိး ယဟိဝၤယွၤ ကဘၣ်သူၣ်ဘၣ်သးပှၤအဂီၢ် ပမၤတၢ်မနုၤသ့လဲၣ်.

^၁၄ ပမ့ၢ်အိၣ်ဒီး တၢ်အဲၣ်လၢအတီန့ၣ်​ ပကဂုာ်ကျဲးစၢးမၤစၢၤပှၤဂၤ သပှၢ်ကတၢၢ်. ဒ်လၢညါအသိး မုၢ်မဆါတနံၤအံၤ ပဒီပုၢ်ဝဲၢ်မုၣ်ခွါအါဂၤန့ၣ်​ အဝဲသ့ၣ်​ မ့ၢ်တထံၣ်ဘၣ်​ ပဒီပုၢ်ဝဲၢ်မုၣ်ခွါ လၢအဂၤတဖၣ်​ နီတဘျီဘၣ်​ သနာ်က့ အဝဲသ့ၣ်ပာ်ဖျါထီၣ်​ တၢ်အဲၣ်လၢအတီ လၢတဂၤဒီးတဂၤ အဖီခိၣ်လီၤ. အဒိ, ဖဲန့ဆၢၣ်တၢ်ဘၣ်ဒိဘၣ်ထံး ကဲထီၣ်အခါ ဒီပုၢ်ဝဲၢ်မုၣ်ခွါတဖၣ်​ ကရီဃုသ့ၣ်ညါဝဲလၢ အဝဲသ့ၣ်​ မၤစၢၤတၢ်မနုၤ ကသ့လဲၣ်. ပှၤလၢအအိၣ်လၢ တၢ်အိၣ်ဖှိၣ်အပူၤ မ့ၢ်အိၣ်ဒီး ကျိၣ်စ့တၢ်ကီတၢ်ခဲန့ၣ်​ အဝဲသ့ၣ်ဃုသ့ၣ်ညါဝဲလၢ ပှၤတဂၤန့ၣ်​ လိၣ်ဘၣ်တၢ်မၤစၢၤဒ်လဲၣ်​ ဒီးမၤစၢၤအီၤလၢ အဆိအချ့လီၤ. အဝဲသ့ၣ်​ ဂုာ်ကျဲးစၢး မၤစၢၤပှၤဂၤ သပှၢ်ပှၢ် ဒ်ခရံာ်ဖိလၢ တၢ်မၢဖိအစိၤ လၢအအိၣ်လၢ မၤက့းဒနံအသိးလီၤ. အဝဲသ့ၣ်​ ဂုာ်ကျဲးစၢး ဟ့ၣ်လီၤတၢ်လၢ အအိၣ်ဒီးအဝဲသ့ၣ်​ လၢဒီပုၢ်ဝဲၢ်မုၣ်ခွါလၢ အလိၣ်ဘၣ်​ တၢ်မၤစၢၤတဖၣ်အဂီၢ်. ဒီးအဝဲသ့ၣ်​ “ဟ့ၣ်တၢ်အါန့ၢ်ဒံး တၢ်လၢအအိၣ်ဒီး အဝဲသ့ၣ်” လီၤ. (၂ ကရံၣ်သူး ၈:၃) ဖဲယဟိဝၤယွၤ ထံၣ်ဝဲလၢ အဝဲသ့ၣ်​ ပာ်ဖျါထီၣ်​ တၢ်အဲၣ်လၢအတီ ဒ်အံၤန့ၣ်​ ယဟိဝၤယွၤ ကဘၣ်သူၣ်ဘၣ်သးဝဲဒိၣ်မး.—ဖး ဧ့ၤဘြံၤ ၁၃:၁၆.

မုၢ်မဆါတနံၤအံၤ ပပာ်ဖျါထီၣ်​ တၢ်အဲၣ်လၢအတီ ကသ့ဒ်လဲၣ်

၁၅-၁၆. နီၢ်ရူၤသး တဟ့ၣ်အၡူဘၣ်န့ၣ်​ ပသ့ၣ်ညါဘၣ်ဒ်လဲၣ်.

^၁၅ ဖဲပဆိကမိၣ်ထံ နီၢ်ရူၤသးမၤစၢၤ နီၢ်နၤဧမံ ဒ်လဲၣ်အခါ ပဒိးန့ၢ်ဘၣ်​ တၢ်မၤလိအါမး. ခဲအံၤပကတဲသကိး တၢ်မၤလိတနီၤလီၤ.

^၁၆ တဘၣ်ဟ့ၣ်အၡူတဂ့ၤ. ဖဲနီၢ်ရူၤသး ကလဲၤပိာ် နီၢ်နၤဧမံအခံ လၢကီၢ်ယူဒၤအခါ လၢအခီၣ်ထံးခါ နီၢ်နၤဧမံ တတူၢ်လိာ်ဝဲဘၣ်. ဘၣ်ဆၣ်​ နီၢ်ရူၤသးတဟ့ၣ်အၡူဘၣ်​ အဃိ နီၢ်နၤဧမံ “ထံၣ်ဘၣ်ဝဲလၢ အသးအိၣ်နီၢ်နီၢ်လၢ အကလဲၤတၢ်ဒီးအီၤ, ဒီးကတိၤတၢ်ဒီးအီၤန့ၣ်​ ဆိတ့ၢ်ဝဲလီၤ.”—ရူၤသး ၁:၁၅-၁၈.

၁၇. တၢ်မနုၤကမၤစၢၤပှၤဒ်သိး ပသုတဟ့ၣ်ၡူ ညီညီတဂ့ၤအဂီၢ်လဲၣ်.

^၁၇ တၢ်မၤလိလၢပဂီၢ်– ဒ်သိးပကမၤစၢၤ ပှၤလၢအသူၣ်ဟးဂီၤသးဟးဂီၤတဂၤအဂီၢ် ပကဘၣ်အိၣ်ဒီး တၢ်သူၣ်စူၤသးစူၤ ဒီးပတဘၣ်ဟ့ၣ်ၡူ လၢအဝဲသ့ၣ်​ အဖီခိၣ်ညီညီဖိဘၣ်. ဘၣ်သ့ၣ်သ့ၣ်​ ပဒီပုၢ်ဝဲၢ်မုၣ်ခွါလၢ အလိၣ်ဘၣ်တၢ်မၤစၢၤန့ၣ်​ လၢအခီၣ်ထံးခါ တမ့ၢ်လၢအကတူၢ်လိာ် ပတၢ်မၤစၢၤဘၣ်. ဘၣ်ဆၣ်​ ပမ့ၢ်အိၣ်ဒီး တၢ်အဲၣ်လၢအတီန့ၣ်​ ကမၤစၢၤပှၤဒ်သိး ပကဆဲးမၤစၢၤအီၤလီၤ. (ကလၤတံ ၆:၂) လၢခံ ကယီကယီန့ၣ်​ အဝဲသ့ၣ်​ ကပျဲလၢပကမၤစၢၤအီၤ ဒီးမၤမုာ်ထီၣ်အီၤလီၤ.

၁၈. ဘၣ်မနုၤအဃိ နီၢ်ရူၤသး အသးကဘၣ်ဒိ ဒိၣ်မးလဲၣ်.

^၁၈ တဘၣ်သးဟးဂီၤတဂ့ၤ. ဖဲနီၢ်နၤဧမံ ဒီးနီၢ်ရူၤသး က့ၤတုၤလၢ ဝ့ၢ်ဘ့ၤသလ့ဃ့ၣ်အခါ နီၢ်နၤဧမံ ထံၣ်လိာ်အသးဒီး ပှၤလၢအဟံၣ်ခိၣ်ဟံၣ်ဃၢၤ လၢညါတဖၣ်လီၤ. ဒီးအတဲဘၣ်​ အဝဲသ့ၣ်လၢ “ယလဲၤထီၣ်အိၣ်ပှဲၤ, ဒီးယွၤဒုးဟဲက့ၤယၤအိၣ်ကလီလီၤ.” (ရူၤသး ၁:၂၁) ထံၣ်တမှံကွၢ် ဖဲနီၢ်ရူၤသးနၢ်ဟူဘၣ်ဝဲ နီၢ်နၤဧမံ အတၢ်ကတိၤအခါ အကတူၢ်ဘၣ်ဝဲဒ်လဲၣ်. နီၢ်ရူၤသး ဂုာ်ကျဲးစၢးဝဲလၢ အဂ့ၤကတၢၢ် လၢကမၤစၢၤ နီၢ်နၤဧမံ အဂီၢ်လီၤ. နီၢ်ရူၤသး ဟီၣ်စၢၤအီၤ, မၤမုာ်ထီၣ်အီၤ ဒီးဟဲက့ၤပိာ်အခံ လၢကျဲဖးယံၤညါ. နီၢ်နၤဧမံ တဲဝဲလၢ “ယွၤဒုးဟဲက့ၤယၤအိၣ်ကလီလီၤ.” နီၢ်နၤဧမံ အတၢ်ကတိၤတဖၣ်အံၤန့ၣ်​ ပာ်ဖျါထီၣ်ဝဲလၢ နီၢ်ရူၤသးအိၣ်လၢ အကပၤသနာ်က့ အတထံၣ်​ နီၢ်ရူၤသး အတၢ်မၤစၢၤဘၣ်. အဃိ နီၢ်ရူၤသး အသးကဘၣ်ဒိဒိၣ်မး. ဘၣ်ဆၣ်​ အဝဲဆဲးအိၣ်ဒီး နီၢ်နၤဧမံလီၤ.

၁၉. ဒ်သိး ပဆဲးမၤစၢၤ ပှၤလၢအသူၣ်အုးသးအုး ဒီးပှၤလၢအဂံၢ်ဘါလီၤစၢ် ကသ့အဂီၢ် ပကဘၣ်မၤ တၢ်မနုၤလဲၣ်.

^၁၉ တၢ်မၤလိလၢပဂီၢ်– မုၢ်မဆါတနံၤအံၤ ဒီပုၢ်ဝဲၢ်မုၣ်လၢ အသူၣ်အုးသးအုး ဒီးအသးဂံၢ်ဘါလီၤစၢ်တဂၤန့ၣ်​ ပမ့ၢ်ဂုာ်ကျဲးစၢးမၤစၢၤအီၤ လၢအဂ့ၤကတၢၢ်လံ သနာ်က့ ဘၣ်သ့ၣ်သ့ၣ်​ အကတဲဘၣ်တၢ်ကတိၤလၢ အမၤဘၣ်ဒိပသးဒံးလီၤ. သနာ်က့ တဘၣ်သးဟးဂီၤတဂ့ၤ. ပကဘၣ်ဃုကျဲလၢ ပကမၤစၢၤ ပဒီပုၢ်ဝဲၢ်မုၣ်အဂီၢ် ဒီးဃ့ယဟိဝၤယွၤ အတၢ်မၤစၢၤလၢ ပကထံၣ်န့ၢ်ကျဲလၢ ကမၤမုာ်ထီၣ်​ ဒီပုၢ်ဝဲၢ်မုၣ်တဂၤအံၤအဂီၢ်လီၤ.—ကတိၤဒိ ၁၇:၁၇.

၂၀. ဒ်သိး နီၢ်ရူၤသး ကအိၣ်ဒီးတၢ်ဂံၢ်တၢ်ဘါ လၢကဆဲးမၤစၢၤ နီၢ်နၤဧမံအဂီၢ် တၢ်မနုၤမၤစၢၤအီၤလဲၣ်.

^၂၀ ဟ့ၣ်ဂံၢ်ဟ့ၣ်ဘါပှၤဂၤ ဘၣ်ဆၢဘၣ်ကတီၢ်. နီၢ်ရူၤသး ဆဲးပာ်ဖျါထီၣ်​ တၢ်အဲၣ်လၢအတီလၢ နီၢ်နၤဧမံ အဖီခိၣ်​ ဘၣ်ဆၣ်​ နီၢ်ရူၤသး အနီၢ်ကစၢ်စ့ၢ်ကီး လိၣ်ဘၣ်တၢ်ဟ့ၣ်ဂံၢ်ဟ့ၣ်ဘါလီၤ. အဃိ ယဟိဝၤယွၤ ထိၣ်ဟူးထိၣ်ဂဲၤထီၣ်​ စီၤဘိၤဧး လၢကဟ့ၣ်ဂံၢ်ဟ့ၣ်ဘါ နီၢ်ရူၤသးလီၤ. စီၤဘိၤဧး တဲဘၣ်​ နီၢ်ရူၤသးလၢ “မ်ယွၤဟ့ၣ်ကၣ်နမၤတၢ်တက့ၢ်. ဒီးမ်နကန့ၢ်ဘၣ်​ တၢ်အဘူးအလဲလၢယွၤ, အံၣ်စရ့လးအကစၢ်လၢ နဟဲအိၣ်သဒၢလၢ အဒံးဆ့ဖီလာ်န့ၣ်တက့ၢ်.” တၢ်ကတိၤသ့ၣ်တဖၣ်န့ၣ်​ မၤမုာ်ထီၣ်​ နီၢ်ရူၤသးအသးဒိၣ်မး အဃိ နီၢ်ရူၤသး တဲဆၢက့ၤ စီၤဘိၤဧးလၢ “နမၤမုာ်ထီၣ်က့ၤယၤ, . . . ဒီး, နကတိၤတ့ၢ်ဒီးနကုၢ်ပိာ်မုၣ်​ မုာ်မုာ်ခုၣ်ခုၣ်လံ.” (ရူၤသး ၂:၁၂, ၁၃) ဖဲနီၢ်ရူၤသး လိၣ်ဘၣ်တၢ်ဂံၢ်တၢ်ဘါလၢ ကဆဲးလဲၤဆူညါအဂီၢ်အခါ စီၤဘိၤဧး ဟ့ၣ်ဂံၢ်ဟ့ၣ်ဘါအီၤ တဘျီဃီ.

၂၁. ဒ် ယၡါယၤ ၃၂:၁, ၂ ပာ်ဖျါထီၣ်ဝဲအသိး တၢ်အိၣ်ဖှိၣ်သးပှၢ်တဖၣ်န့ၣ်​ မၤစၢၤပှၤဂၤတဖၣ်​ ကသ့ဒ်လဲၣ်.

^၂၁ တၢ်မၤလိလၢပဂီၢ်– ပှၤလၢအပာ်ဖျါထီၣ်​ တၢ်အဲၣ်လၢအတီ လၢပှၤဂၤအဖီခိၣ်န့ၣ်​ တဘျီတခီၣ်​ အဝဲသ့ၣ်​ အနီၢ်ကစၢ်ဒၣ်ဝဲ လိၣ်ဘၣ်တၢ်ဟ့ၣ်ဂံၢ်ဟ့ၣ်ဘါလီၤ. ဖဲစီၤဘိၤဧး ထံၣ်ဝဲလၢ နီၢ်ရူၤသး မၤစၢၤဝဲဒၣ်​ အမံၤပှၢ်ပိာ်မုၣ်​ နီၢ်နၤဧမံအခါ အဝဲပတြၢၤ နီၢ်ရူၤသးလီၤ. မုၢ်မဆါတနံၤအံၤစ့ၢ်ကီး ဖဲတၢ်အိၣ်ဖှိၣ်သးပှၢ်တဖၣ်​ ထံၣ်ဝဲလၢ ဒီပုၢ်ဝဲၢ်မုၣ်ခွါတဖၣ်​ မၤစၢၤပှၤဂၤအခါ အဝဲသ့ၣ်ပတြၢၤဝဲ ဒီပုၢ်ဝဲၢ်မုၣ်ခွါတဖၣ်လီၤ. ပမ့ၢ်ပတြၢၤ ဒီးဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါတဖၣ်​ ဘၣ်ဆၢဘၣ်ကတီၢ်န့ၣ်​ ကကဲထီၣ်တၢ်ဂံၢ်တၢ်ဘါ ဒ်သိးအဝဲသ့ၣ်​ ဆဲးလဲၤခီဖျိတၢ်ဆူညါ ကန့ၢ်အဂီၢ်လီၤ.—ဖး ယၡါယၤ ၃၂:၁, ၂.

ပှၤလၢအပာ်ဖျါထီၣ်​ တၢ်အဲၣ်လၢအတီန့ၣ်​ ကဒိးန့ၢ်ဘၣ်ဝဲ အဘျုးဒ်လဲၣ်

၂၂-၂၃. နီၢ်နၤဧမံ အတၢ်ထံၣ်​ ဆီတလဲဒ်လဲၣ်​ ဒီးဘၣ်မနုၤအဃိလဲၣ်. (စံးထီၣ်ပတြၢၤ ၁၃၆:၂၃, ၂၆)

^၂၂ လၢခံန့ၣ်​ စီၤဘိၤဧး ဟ့ၣ်လီၤဝဲ တၢ်အီၣ်တၢ်အီလၢ နီၢ်ရူၤသးဒီး နီၢ်နၤဧမံအဂီၢ်လီၤ. (ရူၤသး ၂:၁၄-၁၈) ဖဲစီၤဘိၤဧး ဟ့ၣ်လီၤအဝဲသ့ၣ်တၢ်အီၣ်​ ဝံၤအလီၢ်ခံ နီၢ်နၤဧမံ တဲဝဲလၢ မ်စီၤဘိၤဧး “ဘၣ်တၢ်ဆိၣ်ဂ့ၤလၢယွၤ” လၢ “အတလဲၤသဒၣ်အဘျုးအဖှိၣ်​ ဒီးပှၤမူဝဲ ဒီးပှၤသံဝဲတဂၤ” န့ၣ်တက့ၢ်. (ရူၤသး ၂:၂၀) အဃိ ပထံၣ်ဘၣ်လၢ နီၢ်နၤဧမံ အတၢ်ထံၣ်တဖၣ်န့ၣ်​ ဆီတလဲဝဲလၢာ်ပျီ. လၢအခီၣ်ထံးခါ လၢတၢ်သူၣ်အုးသးအုးအပူၤ နီၢ်နၤဧမံ တဲထီၣ်ဝဲလၢ ယဟိဝၤယွၤ “ဃၣ်အသးထီဒါယၤလံ.” ဘၣ်ဆၣ်ခဲအံၤန့ၣ်​ အသးမုာ်ထီၣ်က့ၤ ဒီးအတဲဝဲလၢ ယဟိဝၤယွၤ “တလဲၤသဒၣ်အဘျုးအဖှိၣ်” လၢအမ့ၢ် အတၢ်အဲၣ်လၢအတီဘၣ်. နီၢ်နၤဧမံ အတၢ်ထံၣ်တဖၣ်န့ၣ်​ ဘၣ်မနုၤအဃိ ဆီတလဲဝဲလဲၣ်.

^၂၃ လၢခံကတၢၢ်န့ၣ်​ နီၢ်နၤဧမံ သ့ၣ်ညါထီၣ်ဝဲလၢ ယဟိဝၤယွၤ တပာ်တ့ၢ်ကွံာ်အီၤဘၣ်. ယဟိဝၤယွၤသူဝဲ နီၢ်ရူၤသး ဒ်သိးကမၤစၢၤအီၤ ဖဲအဟဲက့ၤလၢကျဲလၢ ကီၢ်ယူဒၤအခါလီၤ. (ရူၤသး ၁:၁၆) တကးဒံးဘၣ်​ နီၢ်နၤဧမံ ထံၣ်ဘၣ်ဝဲယဟိဝၤယွၤ အတၢ်မၤစၢၤ ဖဲစီၤဘိၤဧး လၢအမ့ၢ် “ပှၤလၢအပှ့ၤက့ၤတၢ်” တဂၤ ကွၢ်ထွဲအဝဲသ့ၣ်ခံဂၤ အခါလီၤ.d (ရူၤသး ၂:၁၉, ၂၀) အဃိ နီၢ်နၤဧမံ ကဆိကမိၣ်ဘၣ်ဝဲလၢ ‘ခဲအံၤန့ၣ်​ ယနၢ်ပၢၢ်ထီၣ်လံ. ယဟိဝၤယွၤန့ၣ်​ တပာ်တ့ၢ်ယၤ နီတဘျီဘၣ်. အအိၣ်ဒီးယၤထီဘိ’ လီၤ. (ဖး စံးထီၣ်ပတြၢၤ ၁၃၆:၂၃, ၂၆.) နီၢ်ရူၤသး ဒီးစီၤဘိၤဧး တဟ့ၣ်ၡူဘၣ်အဃိ နီၢ်နၤဧမံ ကစံးဘျုးဘၣ်​ အဝဲသ့ၣ်ခံဂၤလၢာ် ဒိၣ်မး. ပမ့ၢ်ကွၢ် တၢ်မၤအသး လၢခံတဖၣ်န့ၣ်​ အဝဲသ့ၣ်​ သၢဂၤလၢာ် ကသးခုဝဲထဲလဲၣ်န့ၣ်​ ပထံၣ်တမှံကွၢ်အီၤသ့လီၤ.

၂၄. ဘၣ်မနုၤအဃိ ပအဲၣ်ဒိး ဆဲးပာ်ဖျါထီၣ်​ တၢ်အဲၣ်လၢအတီ လၢပဒီပုၢ်ဝဲၢ်မုၣ်ခွါတဖၣ်​ အဖီခိၣ်လဲၣ်.

^၂၄ ဘၣ်ဃးဒီး တၢ်အဲၣ်လၢအတီန့ၣ်​ ပမၤလိန့ၢ်ဘၣ်​ တၢ်မနုၤလၢ နီၢ်ရူၤသးအအိၣ်လဲၣ်. တၢ်အဲၣ်လၢအတီန့ၣ်​ မၤစၢၤပှၤဒ်သိး ပသုတဟ့ၣ်အၡူ ညီညီဖိလၢ ပဒီပုၢ်ဝဲၢ်မုၣ်ခွါလၢ အသးဂံၢ်ဘါလီၤစၢ်တဖၣ်အဖီခိၣ်​ တဂ့ၤအဂီၢ်လီၤ. တၢ်အဲၣ်လၢအတီန့ၣ်​ မၤစၢၤပှၤဒ်သိး ပကထဲးဂံၢ်ထဲးဘါ လၢပကမၤစၢၤ ပဒီပုၢ်ဝဲၢ်မုၣ်ခွါတဖၣ်​ အဂီၢ်လီၤ. ဖဲတၢ်အိၣ်ဖှိၣ်သးပှၢ်တဖၣ်​ ထံၣ်ဘၣ်ဝဲလၢ ပှၤပာ်ဖျါထီၣ်​ တၢ်အဲၣ်လၢပှၤဂၤအဖီခိၣ်အခါ အဝဲသ့ၣ်ဟ့ၣ်ဂံၢ်ဟ့ၣ်ဘါ ဒီးပတြၢၤအဝဲသ့ၣ်​ တဘျီဃီ. ဖဲပထံၣ်ဘၣ်​ ပှၤလၢအလိၣ်ဘၣ်​ တၢ်မၤစၢၤတဖၣ်​ အတၢ်ရ့လိာ်သးဒီး ယဟိဝၤယွၤ ဂ့ၤထီၣ်အခါ ပသးခုဒိၣ်မး. (မၤတၢ် ၂၀:၃၅) ဘၣ်ဆၣ်​ တၢ်ဂ့ၢ်အရ့ဒိၣ်ကတၢၢ်လၢ ပကဘၣ်ပာ်ဖျါထီၣ်​ တၢ်အဲၣ်လၢအတီန့ၣ်​ မ့ၢ်ဝဲ ပအဲၣ်ဒိးကွၢ်လိမၤဒိး ယဟိဝၤယွၤ ဒီးမၤသးခုယဟိဝၤယွၤလၢ “အဘျုးအဖှိၣ်” လၢအမ့ၢ် အတၢ်အဲၣ်လၢအတီ “အိၣ်ဝဲအါမး” တဂၤအဃိလီၤ.—၂ မိၤၡ့ ၃၄:၆; စံးထီၣ်ပတြၢၤ ၃၃:၂၂.