မၤထွဲ “တၢ်ဘျုးတၢ်ဖှိၣ် အတၢ်သိၣ်တၢ်သီ” လၢအမ့ၢ်တၢ်သူၣ်ဂ့ၤသးဝါ
ဒ်သိး ဒီပုၢ်ဝဲၢ်မုၣ်လံစၤa ကတူၢ်လိာ် တၢ်မ့ၢ်တၢ်တီအဂီၢ် တၢ်မနုၤမၤစၢၤအီၤလဲၣ်န့ၣ် အဝဲတဲပၠးဝဲဒ်အံၤ “တၢ်လၢအထုးန့ၢ်ယသး ဒိၣ်ကတၢၢ်န့ၣ် မ့ၢ်ဝဲဒီပုၢ်ဝဲၢ်မုၣ်ခွါတဖၣ် ပာ်ဖျါထီၣ် တၢ်သူၣ်ဂ့ၤသးဝါ လၢယဖီခိၣ်.” ဒီပုၢ်ဝဲၢ်မုၣ်အဲ(န်) စ့ၢ်ကီးတဲဝဲလၢ “ဒီပုၢ်ဝဲၢ်မုၣ်ခွါပာ်ဖျါထီၣ် တၢ်သူၣ်ဂ့ၤသးဝါလၢ ယဖီခိၣ်န့ၣ် ထုးန့ၢ်ယသးဒိၣ်န့ၢ်ဒံး တၢ်သိၣ်လိဒံး.” ဒီပုၢ်ဝဲၢ်တဖၣ်ပာ်ဖျါထီၣ် တၢ်သူၣ်ဂ့ၤသးဝါလၢ ဒီပုၢ်ဝဲၢ်မုၣ်ခံဂၤအံၤ အဖီခိၣ်အဃိ ကဲဘျုးလၢ အဝဲသ့ၣ်အဂီၢ်ဒိၣ်မး. ဒီးခဲအံၤန့ၣ် ဒီပုၢ်ဝဲၢ်မုၣ်ခံဂၤအံၤ ဖးလံာ်စီဆှံ ဒီးဆိကမိၣ်ထံလံာ်စီဆှံမုာ်မး.
ပဝဲစ့ၢ်ကီးပပာ်ဖျါထီၣ် တၢ်သူၣ်ဂ့ၤသးဝါလၢ အထုးန့ၢ် ပှၤလၢပဃၢၤတဖၣ် အသးကသ့ဒ်လဲၣ်. လၢတၢ်မၤလိတခါအံၤအပူၤ ပကသ့ၣ်ညါဘၣ်လၢ ပပာ်ဖျါထီၣ် တၢ်သူၣ်ဂ့ၤသးဝါသ့လၢ ပတၢ်ကတိၤ ဒီးတၢ်လၢပမၤအီၤတဖၣ်. ဒီးပကသ့ၣ်ညါဘၣ် စ့ၢ်ကီးလၢ ပကဘၣ်ပာ်ဖျါထီၣ် တၢ်သူၣ်ဂ့ၤသးဝါအံၤလၢ မတဂၤအဖီခိၣ်လဲၣ်.
ဖဲပတဲတၢ်အခါ ပမၤထွဲ “တၢ်ဘျုးတၢ်ဖှိၣ် အတၢ်သိၣ်တၢ်သီ”
ကတိၤဒိ အဆၢဒိၣ် ၃၁ ပာ်ဖျါထီၣ်ဝဲ ဘၣ်ဃးဒီး မါလၢအဂ့ၤတဂၤအဂ့ၢ်. ဖဲန့ၣ်န့ၣ် အပာ်ဖျါထီၣ်ဝဲလၢ ဖဲအတဲတၢ်အခါ အမၤထွဲဝဲ “တၢ်ဘျုးတၢ်ဖှိၣ် အတၢ်သိၣ်တၢ်သီ.” (ကတိၤဒိ ၃၁:၂၆) အဝဲမၤထွဲဝဲ “တၢ်သိၣ်တၢ်သီ” အံၤအဃိ အတဲတၢ်လၢ ကလုၢ်မုာ်မုာ် ဒီးအတဲတၢ်လၢ အကဲဘျုးကဲဖှိၣ်. ပါသ့ၣ်တဖၣ်စ့ၢ်ကီး ဖဲအဝဲသ့ၣ်တဲတၢ်အခါ အဝဲသ့ၣ်ကဘၣ်မၤထွဲဝဲ “တၢ်သိၣ်တၢ်သီ” တခါအံၤ. မိပါအါတက့ၢ်န့ၣ် သ့ၣ်ညါဝဲလၢ အဝဲသ့ၣ်မ့ၢ်အ့န့ အဖိတဖၣ် လၢအကလုၢ်ဆူၣ်ဆူၣ်န့ၣ် အဖိတဖၣ်အသးဘၣ်ဒိသ့. မိပါတဖၣ် တဲတၢ်ဒီးအဖိ အကလုၢ် မ့ၢ်တမုာ်ဘၣ်န့ၣ် အဖိတဖၣ် တအဲၣ်ဒိးဒိကနၣ် အဝဲသ့ၣ်ကလုၢ်ဘၣ်. အဃိမိပါတဖၣ် မ့ၢ်တဲတၢ်ဒီးအဖိ လၢအကလုၢ်မုာ်မုာ်န့ၣ် ကညီထီၣ်လၢ အဖိတဖၣ် ကအဲၣ်ဒိး ဒိကနၣ်အကလုၢ်.
ပမ့မ့ၢ်မိပါမ့ၢ်ဂ့ၤ ပတမ့ၢ်မိပါဘၣ်မ့ၢ်ဂ့ၤ ဖဲပတဲတၢ်အခါ ပပာ်ဖျါထီၣ် တၢ်သူၣ်ဂ့ၤသးဝါ ကသ့ဒ်လဲၣ်. ပထံၣ်ဘၣ်တၢ်ဟ့ၣ်ကူၣ်ဖဲ ကတိၤဒိ ၃၁:၂၆ အဆိကတၢၢ်တကူာ်အပူၤ. ဖဲန့ၣ် အတဲဝဲလၢ အ “အဲးထီၣ်အထးခိၣ် အိၣ်ဒီးတၢ်ကူၣ်သ့” အဃိ အဝဲကတဲ တၢ်ကတိၤလၢ အကဲဘျုး ဒီးကတဲတၢ်မုာ်မုာ်. ပမၤထွဲတၢ်ဟ့ၣ်ကူၣ်အံၤ ကသ့အဂီၢ် ပကဘၣ်သံကွၢ်လီၤပသးလၢ “တၢ်လၢယကတဲအီၤတဖၣ်န့ၣ် အကမၤဘၣ်ဒိပှၤသးဧါ မ့တမ့ၢ် အကမၤဂ့ၤထီၣ် တၢ်အိၣ်သးဧါ.” (ကတိၤဒိ ၁၅:၁) အဃိ ပမ့ၢ်ဆိကမိၣ်ထံဆိ တၢ်လၢပကတဲတဖၣ်န့ၣ် ပမ့ၢ်ပှၤလၢအအိၣ်ဒီး တၢ်ကူၣ်သ့.
တၢ်ဟ့ၣ်ကူၣ်အဂၤတခါလၢ ကတိၤဒိပာ်ဖျါထီၣ်ဝဲန့ၣ် တဲဝဲလၢ “ပှၤလၢအကတိၤဖဲ အခိၣ်စၢၢ်ဆၢ ဒ်နးဧိၤဘီဧိၤ ဆဲးတၢ်အသိးန့ၣ် အိၣ်ဝဲလီၤ.” (ကတိၤဒိ ၁၂:၁၈) ပမ့ၢ်ဆိကမိၣ်ဘၣ်ဃးဒီး ပတၢ်ကတိၤဒီးပကလုၢ် မၤဘၣ်ဒိပှၤဂၤ သ့ဒ်လဲၣ်န့ၣ် အကမၤစၢၤပှၤလၢ ပတဟးတဲကြီတၢ်ဘၣ်. အဃိ ပမ့ၢ်မၤထွဲ “တၢ်ဘျုးတၢ်ဖှိၣ် အတၢ်သိၣ်တၢ်သီ” န့ၣ် အကမၤစၢၤပှၤလၢ ပတတဲတၢ်လၢ ကမၤဘၣ်ဒိပှၤဂၤဘၣ် ဒီးပတတဲတၢ်လၢ ကလုၢ်ဆူၣ်ဆူၣ်ဘၣ်. (အ့းဖ့းစူး ၄:၃၁, ၃၂) ပမ့ၢ်မၤဒ်န့ၣ်န့ၣ် ပတတဲတၢ်ဒီး ဆိကမိၣ်တၢ်လၢ အတဂ့ၤတဘၣ်တဖၣ် လၢၤဘၣ်. ဒီးပကတဲတၢ်လၢ အကဲဘျုးကဲဖှိၣ် ဒီးပကတဲတၢ်လၢ ကလုၢ်မုာ်မုာ်. ယဟိဝၤယွၤပာ်လီၤန့ၢ်ပှၤ ဒိဂ့ၤတဲာ်ဘၣ်န့ၣ် ပထံၣ်ဘၣ်အီၤဖဲ အခ့အပှၤဝံအ့ၤလံယၤ ပျံၤတၢ်အခါ အဝဲမၤမုာ်ထီၣ်အသး. မူခိၣ်ကလူးလၢ ယဟိဝၤယွၤမၢလီၤအီၤ တဂၤန့ၣ် ဟဲတဲတၢ်ဒီးဝံအ့ၤလံယၤလၢ အ “ကလုၢ်ကပုာ်လုး.” (၁ စီၤပၤ ၁၉:၁၂, ခ့ခါစှီၤကျိာ်) ထဲဒၣ် ပတဲတၢ်လၢအမုာ်န့ၣ် တလၢပှဲၤဒံးဘၣ်. ပကဘၣ်ပာ်ဖျါထီၣ်အီၤလၢ တၢ်လၢပမၤအီၤတဖၣ် အဖီခိၣ်စ့ၢ်ကီး. အဃိပပာ်ဖျါထီၣ်အီၤ ကသ့ဒ်လဲၣ်.
ပမ့ၢ်ပာ်ဖျါထီၣ် တၢ်သူၣ်ဂ့ၤသးဝါ လၢပတၢ်မၤအပူၤန့ၣ် ကထုးန့ၢ်ပှၤဂၤအသး
ပမ့ၢ်ကွၢ်လိ ယဟိဝၤယွၤန့ၣ် ပကပာ်ဖျါထီၣ် တၢ်သူၣ်ဂ့ၤသးဝါလၢ ပတၢ်ကတိၤ ဒီးတၢ်လၢပမၤအီၤတဖၣ်. (အ့းဖ့းစူး ၄:၃၂; ၅:၁, ၂) ဒီပုၢ်ဝဲၢ်မုၣ်လံစၤ လၢပပာ်ဖျါထီၣ်အဂ့ၢ် ဖဲမကၢာ်န့ၣ် ဘၣ်ဃးဒီး ယဟိဝၤပှၤအုၣ်အသးတဖၣ် ပာ်ဖျါထီၣ် တၢ်သူၣ်ဂ့ၤသးဝါ လၢအဖီခိၣ်န့ၣ် အတဲဝဲလၢ “ဖဲပှၤမၢန့ၢ်ဆူၣ်ပဟံၣ်ဖိဃီဖိလၢ ပကဘၣ်သုးလီၢ်သုးကျဲအခါ ဒီပုၢ်ဝဲၢ်လၢတၢ်အိၣ်ဖှိၣ်ပူၤ ၄ ဂၤ ဟံန့ၢ်အခွဲးလၢ အဝဲသ့ၣ်တၢ်မၤလီၢ် ဒ်သိးကဟဲမၤစၢၤပှၤဖဲ ပဘိၣ်ထီၣ် ပတၢ်ဘိၣ်အခါ. ဖဲန့ၣ်အခါ ယမၣ်တစးထီၣ် မၤလိလံာ်စီဆှံဒံးဘၣ်.” ဒီပုၢ်ဝဲၢ်တဖၣ်ပာ်ဖျါထီၣ် တၢ်သူၣ်ဂ့ၤသးဝါလၢ လံစၤအဖီခိၣ် ဒ်အံၤအဃိ မၤစၢၤအီၤလၢ အဝဲကသးအိၣ် မၤလိလံာ်စီဆှံ.
ဒီပုၢ်ဝဲၢ်မုၣ်အဲ(န်) လၢပပာ်ဖျါထီၣ်အဂ့ၢ် လၢတၢ်ဖီခိၣ်န့ၣ် အထံၣ်ဘၣ်လၢ ယဟိဝၤပှၤအုၣ်အသးတဖၣ် ပာ်ဖျါထီၣ်တၢ်သူၣ်ဂ့ၤသးဝါ လၢအဖီခိၣ်န့ၣ် အပာ်လုၢ်ပာ်ပှ့ၤဝဲဒိၣ်မး. အဲ(န်) တဲဝဲလၢ “ပှၤဟီၣ်ခိၣ်ဖိသ့ၣ်တဖၣ်န့ၣ် ပနာ်န့ၢ်အဝဲသ့ၣ်တသ့ဘၣ် အဃိ ကီလၢယကနာ်န့ၢ်ပှၤဂၤ. အဃိ ဖဲယထံၣ်လိာ်သးဒီး ယဟိဝၤပှၤအုၣ်အသးတဖၣ်အခါ ယတနာ်န့ၢ်အဝဲသ့ၣ် စ့ၢ်ကီးဘၣ်. ယသံကွၢ်လီၤယသးလၢ ‘ဘၣ်မနုၤဃိ အဝဲသ့ၣ် သူၣ်အိၣ်သးအိၣ်ယၤလဲၣ်.’ ပှၤလၢအမၤလိ လံာ်စီဆှံဒီးယၤတဂၤန့ၣ် အပာ်ဖျါထီၣ်ဝဲ တၢ်သူၣ်ဂ့ၤသးဝါနီၢ်ကီၢ်လၢ ယဖီခိၣ်အဃိ ယသ့ၣ်ညါလၢ ယနာ်န့ၢ်အီၤသ့သပှၢ်တၢၢ်.” ပဒီပုၢ်ဝဲၢ်ပာ်ဖျါထီၣ် တၢ်သူၣ်ဂ့ၤသးဝါလၢ အဖီခိၣ်န့ၣ် အဒိးန့ၢ်ဘၣ်အဘျုးဒ်လဲၣ်. အဝဲဆဲးတဲဝဲလၢ “လၢခံယစးထီၣ် မၤလိဝဲလံာ်စီဆှံ ဒီးယဃုသ့ၣ်ညါက့ၤအီၤ လီၤတံၢ်လီၤဆဲး.”
ပသ့ၣ်ညါဘၣ်လၢ ဒီပုၢ်ဝဲၢ်တဖၣ် ပာ်ဖျါထီၣ် တၢ်သူၣ်ဂ့ၤသးဝါလၢ လံစၤ ဒီးအဲ(န်) အဖီခိၣ်အဃိ ကဲဘျုးလၢအဝဲသ့ၣ်အဂီၢ်ဒိၣ်မး. ဒီးမၤစၢၤအဝဲသ့ၣ်လၢ အဝဲသ့ၣ်ကမၤလိ တၢ်မ့ၢ်တၢ်တီ. တၢ်သူၣ်ဂ့ၤသးဝါလၢ ဒီပုၢ်ဝဲၢ်တဖၣ် ပာ်ဖျါထီၣ်ဝဲန့ၣ် မၤစၢၤအဝဲသ့ၣ်လၢ အဝဲသ့ၣ်ကနာ်န့ၢ် တၢ်မ့ၢ်တၢ်တီဒီး ဒီပုၢ်ဝဲၢ်တဖၣ်.
ကွၢ်လိကစၢ်ယွၤ ဒီးပာ်ဖျါထီၣ် တၢ်သူၣ်ဂ့ၤသးဝါလၢ ပှၤဂၤအဖီခိၣ်
ပှၤတနီၤန့ၣ် ခီဖျိလၢ အတၢ်ဆဲးတၢ်လၤအဃိ ကတဲတၢ်မုာ်မုာ် ဒီးပာ်ဖျါထီၣ် တၢ်မဲာ်မုာ်နါဆၢ. ပှၤတနီၤ ပာ်ဖျါထီၣ် တၢ်သူၣ်ဂ့ၤသးဝါဒ်အံၤ ခီဖျိလၢ အတၢ်ဆဲးတၢ်လၤအဃိန့ၣ် ဂ့ၤဝဲ. ဘၣ်ဆၣ် ပမ့ၢ်ပာ်ဖျါထီၣ် တၢ်သူၣ်ဂ့ၤသးဝါ ထဲလၢပတၢ်ဆဲးတၢ်လၤ အဃိလီၤဒု တမ့ၢ်လၢ ပကွၢ်လိမၤဒိး ကစၢ်ယွၤ အတၢ်သူၣ်ဂ့ၤသးဝါဘၣ်.—ထိၣ်သတြီၤဒီး မၤတၢ် ၂၈:၂.
တၢ်သူၣ်ဂ့ၤသးဝါ နီၢ်ကီၢ်န့ၣ် အိၣ်ထီၣ်ခီဖျိလၢ ကစၢ်ယွၤအသးစီဆှံ အတၤသၣ်. (ကလၤတံ ၅:၂၂, ၂၃) အဃိ ဒ်သိးပကပာ်ဖျါထီၣ် တၢ်သူၣ်ဂ့ၤသးဝါအဂီၢ် ပလိၣ်ဘၣ် ကစၢ်ယွၤအသးစီဆှံ အတၢ်မၤစၢၤ. ပမ့ၢ်မၤဒ်န့ၣ်န့ၣ် မ့ၢ်ဝဲပကွၢ်လိ ယဟိဝၤယွၤ ဒီးယ့ၣ်ၡူး. ဒ်ယ့ၣ်ၡူးအသိး ပပာ်ဖျါထီၣ် တၢ်သူၣ်အိၣ်သးအိၣ်ပှၤဂၤ နီၢ်ကီၢ်. ပပာ်ဖျါထီၣ် တၢ်သးအိၣ်ပှၤဂၤ ဒ်အံၤန့ၣ် မ့ၢ်လၢပအဲၣ်ယဟိဝၤယွၤ ဒီးပှၤလၢပဃၢၤအဃိ. ပတၢ်ဂ့ၤတၢ်ဝါတခါအံၤန့ၣ် အဟဲထီၣ်လၢ ပသးပူၤ ဒီးအထုးန့ၢ်ပှၤဂၤအသး ဒီးကစၢ်ယွၤ ဘၣ်သူၣ်ဘၣ်သးဝဲ.
ပကဘၣ်ပာ်ဖျါထီၣ် တၢ်သူၣ်ဂ့ၤသးဝါလၢ မတဂၤအဖီခိၣ်လဲၣ်
ပကပာ်ဖျါထီၣ် တၢ်သူၣ်ဂ့ၤသးဝါလၢ ပှၤလၢအဂ့ၤလၢပဖီခိၣ် ဒီးပှၤလၢပသ့ၣ်ညါအီၤ အဖီခိၣ်န့ၣ်ညီဝဲ. (၂ ၡမူၤအ့လး ၂:၆) ပပာ်ဖျါထီၣ် တၢ်သူၣ်ဂ့ၤသးဝါလၢ ပှၤဂၤအဖီခိၣ် သ့ခီဖျိ ပစံးဘျုးပှၤဂၤ. (ကလီးစဲ ၃:၁၅) ဘၣ်ဆၣ် ပမ့ၢ် တူၢ်ဘၣ်လၢ ပတကြၢးပာ်ဖျါထီၣ် တၢ်သူၣ်ဂ့ၤသးဝါလၢ ပှၤတဂၤဂၤ အဖီခိၣ်ဘၣ်န့ၣ် ပကဘၣ်မၤဒ်လဲၣ်.
ဆိကမိၣ်ကွၢ် ဘၣ်ဃးဒီး တၢ်သးကညီၤ ဒိၣ်ဒိၣ်မုၢ်မုၢ်န့ၣ် ယဟိဝၤယွၤ ပာ်လီၤန့ၢ်ပှၤ တၢ်အဒိလၢ အဂ့ၤကတၢၢ်. ဒီးအကလုၢ်ကထါန့ၣ် သိၣ်လိပှၤ တၢ်မၤလိအရ့ဒိၣ်တခါလၢ ပကဘၣ်ပာ်ဖျါထီၣ် တၢ်ဂ့ၤတၢ်ဝါအံၤ. တၢ်သးကညီၤ ဒိၣ်ဒိၣ်မုၢ်မုၢ်န့ၣ် မ့ၢ်ဝဲတၢ်သူၣ်ဂ့ၤသးဝါလၢ အတကြၢးဒီးပှၤဘၣ် ဘၣ်ဆၣ် ပဒိးန့ၢ်ဘၣ်အီၤ. တၢ်ကတိၤလၢအမ့ၢ် “တၢ်သးကညီၤ ဒိၣ်ဒိၣ်မုၢ်မုၢ်” န့ၣ် လံာ်စီဆှံလၢ ကြံးကျိာ်တကတြူၢ်အပူၤ ပာ်ဖျါထီၣ်ဝဲအါဘျီ. ဒီးတၢ်သးကညီၤ ဒိၣ်ဒိၣ်မုၢ်မုၢ်အံၤန့ၣ် ကစၢ်ယွၤ ပာ်ဖျါထီၣ်ဝဲလၢ ပဖီခိၣ်ဒ်လဲၣ်.
ဆိကမိၣ်ကွၢ် ယဟိဝၤယွၤ ပာ်ဖျါထီၣ် တၢ်သူၣ်ဂ့ၤသးဝါလၢ ပှၤလၢအကကွဲၢ်တဖၣ်အဖီခိၣ် ခီဖျိအဝဲဟ့ၣ်လီၤဝဲ တၢ်လၢအဝဲသ့ၣ်လိၣ်ဘၣ်ဝဲ ကိးမံၤဒဲး ဒ်သိးအဝဲသ့ၣ် ကဆဲးအိၣ်မူဘၣ်အဂီၢ်. (မးသဲ ၅:၄၅) တကးဒံးဘၣ် တချုးလၢပသ့ၣ်ညါ ယဟိဝၤယွၤဒံးဘၣ်န့ၣ် အပာ်ဖျါထီၣ်ဆိ တၢ်သူၣ်ဂ့ၤသးဝါလၢ ပဖီခိၣ်လံ. (အ့းဖ့းစူး ၂:၄, ၅, ၈) အဒိ, ယဟိဝၤယွၤ ပာ်ဖျါထီၣ် အတၢ်သးကညီၤ ဒိၣ်ဒိၣ်မုၢ်မုၢ်လၢ ပဖီခိၣ် ခီဖျိအဖိခွါလၢ အအဲၣ်ဝဲဒိၣ်ကတၢၢ် အိၣ်ဝဲတဂၤ. ဘၣ်ဆၣ် အဟ့ၣ်လီၤကွံာ်ဝဲလၢ ပှၤဟီၣ်ခိၣ်ဖိခဲလၢာ်အဂီၢ်. တၢ်မၢဖိပီလူးတဲဝဲလၢ ယဟိဝၤယွၤ ကတဲာ်ကတီၤ တၢ်ပှ့ၤက့ၤ “မ့ၢ်လၢ ကစၢ်ယွၤအတၢ်သးကညီၤ ဒိၣ်ဒိၣ်မုၢ်မုၢ်လၢ အထူးဝဲတီၤဝဲ အဃိ.” (အ့းဖ့းစူး ၁:၇) တကးဒံးဘၣ် ပမၤကမၣ်ဘၣ်တၢ် ဒီးပမၤသးအုးဘၣ် ယဟိဝၤယွၤအသး ဘၣ်ဆၣ် အဝဲဆဲးဟံးစုနဲၣ်ကျဲပှၤ ဒီးသိၣ်လိပှၤဒံး. အတၢ်သိၣ်လိ ဒီးအတၢ်ကတိၤတဖၣ်န့ၣ် လီၤဂာ်ဒ်မူခိၣ်ထံ “လီၤသဖှံၣ်” အသိး. (၅ မိၤၡ့ ၃၂:၂, ခ့ခါစှီၤကျိာ်) နီၢ်ကီၢ်န့ၣ် ကစၢ်ယွၤတၢ်သူၣ်ဂ့ၤသးဝါ လၢအပာ်ဖျါထီၣ်လၢ ပဖီခိၣ်န့ၣ် ပဟ့ၣ်ဆၢက့ၤအီၤ လၢလၢပှဲၤပှဲၤ တသ့ဘၣ်. ဒီးယဟိဝၤယွၤ မ့ၢ်တပာ်ဖျါထီၣ် အတၢ်သူၣ်ဂ့ၤသးဝါ လၢပဖီခိၣ်ဘၣ်န့ၣ် ပတၢ်မုၢ်လၢ်လၢ ခါဆူညါ တအိၣ်ဘၣ်.—ထိၣ်သတြီၤဒီး ၁ ပ့းတရူး ၁:၁၃.
ယဟိဝၤယွၤ အတၢ်သူၣ်ဂ့ၤသးဝါန့ၣ် လီၤထုးန့ၢ် ပသးဒိၣ်မး. ဒီးအမၤစၢၤပှၤလၢ ပကအဲၣ်ဒိး ကွၢ်လိမၤဒိးအီၤ. အဃိ ပကဘၣ် ပာ်ဖျါထီၣ်တၢ်သူၣ်ဂ့ၤသးဝါ လၢပတၢ်အိၣ်မူကိးနံၤဒဲး လၢပှၤကိးဂၤဒဲးအဖီခိၣ် ဒ်သိးဒီးယဟိဝၤယွၤ ဒီးပတဘၣ် ပာ်ဖျါထီၣ်တၢ်သူၣ်ဂ့ၤသးဝါ ထဲလၢပှၤတနီၤ အဖီခိၣ်ဘၣ်. (၁ သ့းစၤလနံ ၅:၁၅) ပမ့ၢ်ပာ်ဖျါထီၣ် တၢ်သူၣ်ဂ့ၤသးဝါ ထီဘိန့ၣ် ပကလီၤဂာ်ဒ် မ့ၣ်အူလၢ အမၤကလၢၤထီၣ်ပှၤ ဖဲတၢ်ဂိၢ်ပှၤသးအခါ. အဃိ ပကကဲထီၣ် တၢ်ဟ့ၣ်ဂံၢ်ဟ့ၣ်ဘါလၢ ပဟံၣ်ဖိဃီဖိ, ပဒီပုၢ်ဝဲၢ်မုၣ်ခွါ, ပှၤလၢပတၢ်မၤလီၢ်, ပသကိးလၢကၠိ ဒီးပှၤလၢပဃၢၤတဖၣ်အဂီၢ်.
ဆိကမိၣ်ကွၢ် နမ့ၢ်ပာ်ဖျါထီၣ်တၢ်သူၣ်ဂ့ၤသးဝါ လၢနတၢ်ကတိၤ ဒီးနတၢ်ဖံးတၢ်မၤန့ၣ် ကကဲဘျုးလၢ နဟံၣ်ဖိဃီဖိ ဒီးဒီပုၢ်ဝဲၢ်မုၣ်ခွါတဖၣ် အဂီၢ်ဒိၣ်မး. ပှၤလၢနတၢ်အိၣ်ဖှိၣ်ပူၤတနီၤန့ၣ် ဘၣ်သ့ၣ်သ့ၣ် အကလိၣ်ဘၣ် တၢ်မၤစၢၤ ဒ်သိးဒီး တၢ်မၤကဆှီဟံၣ်ဒီးကရၢၢ် မ့တမ့ၢ် အဝဲသ့ၣ်ကလိၣ်ဘၣ် တၢ်မၤစၢၤလၢ နကလဲၤပှ့ၤန့ၢ် အဝဲသ့ၣ် အတၢ်အီၣ်တၢ်အီထီဘိ. တကးဒံးဘၣ် ဖဲနဟးစံၣ်တဲၤတဲလီၤတၢ်အခါ နမ့ၢ်ထံၣ်ဘၣ် ပှၤတဂၤဂၤလၢ အလိၣ်ဘၣ် တၢ်မၤစၢၤန့ၣ် နမၤစၢၤအဝဲသ့ၣ် ကသ့ဧါ.
ပကကွၢ်လိ ယဟိဝၤယွၤ ဒီးပကမၤထွဲ “တၢ်ဘျုးတၢ်ဖှိၣ် အတၢ်သိၣ်တၢ်သီ” ခီဖျိ ပပာ်ဖျါထီၣ် တၢ်သူၣ်ဂ့ၤသးဝါလၢ ပတၢ်ကတိၤ ဒီးပတၢ်ဖံးတၢ်မၤထီဘိ.
a ပှၤမံၤတနီၤန့ၣ် ပှၤဆီတလဲဝဲ.