တၢ်မၤလိ ၃၈
ဂုာ်ကျဲးစၢးကဲထီၣ် ပှၤလၢပှၤနာ်န့ၢ်အီၤသ့
“ပှၤလၢ ပှၤနာ်န့ၢ်အီၤသ့န့ၣ် တတဲဖျါထီၣ် တၢ်ဂ့ၢ်ခူသူၣ်ဘၣ်.”—ကတိၤဒိ ၁၁:၁၃.
တၢ်သးဝံၣ် ၁၀၁ မၤသကိးတၢ်လၢ တၢ်ဃူတၢ်ဖိး
တၢ်မၤလိအံၤ အတၢ်တိာ်ပာ်a
၁. ပှၤလၢပှၤနာ်န့ၢ်အီၤသ့တဂၤန့ၣ် အကဲပှၤဒ်လဲၣ်.
ပှၤလၢပှၤနာ်န့ၢ်အီၤသ့တဂၤန့ၣ် အဂုာ်ကျဲးစၢး တီဒီးတၢ်အၢၣ်လီၤ ဒီးတဲတၢ်မ့ၢ်တၢ်တီ. (စံးထီၣ်ပတြၢၤ ၁၅:၄) ပှၤဂၤစ့ၢ်ကီးသ့ၣ်ညါဝဲလၢ အဝဲသ့ၣ်နာ်န့ၢ်အီၤသ့. အဃိ ပဝဲစ့ၢ်ကီး ပအဲၣ်ဒိးလၢ ပဒီပုၢ်ဝဲၢ်မုၣ်ခွါတဖၣ် နာ်န့ၢ်ပှၤသ့. ဒ်သိးပဒီပုၢ်ဝဲၢ်မုၣ်ခွါတဖၣ် နာ်န့ၢ်ပှၤကသ့အဂီၢ် ပကဘၣ်မၤဒ်လဲၣ်.
၂. ဒ်သိး ပှၤနာ်န့ၢ်ပှၤကသ့အဂီၢ် ပကဘၣ်မၤဒ်လဲၣ်.
၂ ပမၢဆူၣ်ပှၤဂၤလၢ အကနာ်န့ၢ်ပှၤန့ၣ် တသ့ဘၣ်. ပကဘၣ်ပာ်ဖျါထီၣ်လၢ ပကဲပှၤလၢ ပှၤနာ်န့ၢ်အီၤသ့. ဘၣ်ဃးဒီး တၢ်နာ်န့ၢ်ပှၤဂၤန့ၣ် ပကထိၣ်သတြီၤအီၤ ဒ်သီးဒီးစ့. ကျိၣ်စ့န့ၣ်နဘၣ်ဃုအီၤကီမး ဘၣ်ဆၣ် အလီၤမၢ်ကွံာ်ဝဲသ့ ညီညီဖိ. တၢ်လၢ ယဟိဝၤယွၤ “မၤဝဲခဲလၢာ်န့ၣ် ပနာ်န့ၢ်အီၤသ့.” ထီဘိ. (စံးထီၣ်ပတြၢၤ ၃၃:၄) ဒီးယဟိဝၤယွၤ အဲၣ်ဒိးလၢပကကွၢ်လိအီၤ. (အ့းဖ့းစူး ၅:၁) ဒီးပကတဲသကီး တၢ်ဂ့ၤတၢ်ဝါယဲၢ်ခါ ဒ်သိး အကမၤစၢၤပှၤလၢ ပကကဲထီၣ် ပှၤလၢပှၤနာ်န့ၢ်အီၤသ့.
ကွၢ်လိယဟိဝၤယွၤအခ့အပှၤလၢ အကဲပှၤလၢပှၤနာ်န့ၢ်အီၤသ့
၃-၄. ဝံဒၤနံးယ့လး ပာ်ဖျါထီၣ်လၢ အကဲပှၤလၢ ပှၤနာ်န့ၢ်အီၤသ့န့ၣ်ဒ်လဲၣ် ဒီးပကဘၣ် သံကွၢ်လီၤပသးဒ်လဲၣ်.
၃ ဝံဒၤနံးယ့လးန့ၣ် အကဲပှၤလၢ ပှၤနာ်န့ၢ်အီၤသ့တဂၤ. စီၤဒၤနံးယ့လးန့ၣ် ပှၤက့ၤဖီၣ်အီၤလၢ ဝ့ၢ်ဘၤဘူၤလိၣ် သနာ်က့ ဖဲန့ၣ်အဝဲပာ်ဖျါထီၣ်လၢ အကဲပှၤလၢ ပှၤနာ်န့ၢ်အီၤသ့. ယဟိဝၤယွၤမၤစၢၤ စီၤဒၤနံးယ့လးလၢ ကတဲပၠးဘၣ် ဘၤဘူၤလိၣ် စီၤပၤနဘူၤကးန့စၢ် အတၢ်မံမီၢ်အခီပညီ ဝံၤအလီၢ်ခံ ပှၤတၢ်နာ်န့ၢ်အီၤအါထီၣ်. ဘၣ်တဘျီ စီၤဒၤနံးယ့လး ဘၣ်တဲပၠးဘၣ် စီၤပၤနဘူၤကးန့စၢ် လၢယဟိဝၤယွၤ တဘၣ်သးအီၤဘၣ်. ဒီးတၢ်ကစီၣ်တခါန့ၣ် တမ့ၢ်လၢ စီၤပၤကနၣ်ဝဲ ကမုာ်ဘၣ်. စီၤပၤနဘူၤကးန့စၢ်န့ၣ် အကဲပှၤလၢအသးဒိၣ်ထီၣ်တၢ်ချ့မး အဃိ စီၤဒၤနံးယ့လး ကတဲဘၣ်တၢ်ကစီၣ်အံၤအဂီၢ် အကဘၣ်အိၣ်ဒီးတၢ်သးဒူ. (ဒၤနံးယ့လး ၂:၁၂; ၄:၂၀-၂၂, ၂၅) လၢခံအနံၣ်အါမးန့ၣ် စီၤဒၤနံးယ့လးတဲဖျါထီၣ်ဝဲ တၢ်ကွဲးလၢအအိၣ်လၢ စီၤပၤအနီ တၢ်ဒူၣ်ကပၤအလိၤ အခီပညီပျီပျီအဃိ အပာ်ဖျါထီၣ်လၢ အကဲပှၤလၢ ပှၤနာ်န့ၢ်အီၤသ့. (ဒၤနံးယ့လး ၅:၅, ၂၅-၂၉) ဒီးလၢခံ ပှၤမၤဒဲဖိ စီၤဒၤရယါဝ့ၣ် ဒီးပှၤခိၣ်ပှၤနၢ်တဖၣ်န့ၣ် သ့ၣ်ညါဝဲလၢ စီၤဒၤနံးယ့လးန့ၣ် “အခိၣ်နူာ်ဖၠဲးမး.” တကးဒံးဘၣ် အဝဲသ့ၣ် သ့ၣ်ညါဝဲလၢ စီၤဒၤနံးယ့လးန့ၣ် အကဲ “ပှၤလၢ ပှၤနာ်န့ၢ်အီၤသ့ ဒီးအမၤလၢပှဲၤအမူဒါဂ့ၤဂ့ၤထီဘိ ဒီးအတမၤ တၢ်တတီတလိၤဘၣ်.” (ဒၤနံးယ့လး ၆:၃, ၄) ပှၤခိၣ်ပှၤနၢ်လၢ အဘါထီၣ်ယွၤလၢ အကမၣ်တဖၣ်နာ်က့ အဝဲသ့ၣ်သ့ၣ်ညါဝဲလၢ အနာ်န့ၢ်စီၤဒၤနံးယ့လး လၢအဘူၣ်ထီၣ်ဘါထီၣ် ယဟိဝၤယွၤတဂၤအံၤသ့.
၄ ဖဲပဆိကမိၣ်ထံ စီၤဒၤနံးယ့လး အဒိအတဲာ်အခါ ပသံကွၢ်လီၤပသးဒ်အံၤသ့ ‘ပှၤတၢ်ချၢတဖၣ်န့ၣ် အထံၣ်ယၤဒ်လဲၣ်. မ့ၢ်ယကဲပှၤတဂၤလၢ အမၤလၢပှဲၤမူဒါဒီး ပှၤနာ်န့ၢ်အီၤသ့ဧါ.’ ဘၣ်မနုၤအဃိ အရ့ဒိၣ်လၢ ပကဘၣ်သံကွၢ်လီၤပသးဒ်န့ၣ်လဲၣ်. ပမ့ၢ်ကဲပှၤလၢ ပှၤနာ်န့ၢ်အီၤသ့န့ၣ် ယဟိဝၤယွၤအမံၤ ကဘၣ်တၢ်မၤလၤကပီၤအီၤ.
စီၤနဃ့မယၤ ဟ့ၣ်လီၤမူဒါအရ့ဒိၣ်လၢ ပိာ်ခွါလၢ အနာ်န့ၢ်ဝဲဘူၣ်တဖၣ်အအိၣ် (ကွၢ်လံာ်အဆၢ ၅)
၅. ဘၣ်မနုၤအဃိ စီၤဃနၤနယၤန့ၣ် အကဲထီၣ်ပှၤလၢ ပှၤနာ်န့ၢ်အီၤသ့လဲၣ်.
၅ ပဒိၣ်စီၤနဃ့မယၤ ဘှီထီၣ်က့ၤ ဝ့ၢ်ယရူၤၡလ့ၣ်အဒူၣ် ဝံၤအလီၢ်ခံ ဖဲ ချ.ခ.န ၄၅၅ နံၣ်န့ၣ် အဟးဃုဝဲ ပိာ်ခွါတဖၣ်လၢ အနာ်န့ၢ်ဝဲသ့ လၢကကွၢ်ထွဲဝဲ ဝ့ၢ်အံၤအဂီၢ်. ဒီးအဃုထၢထီၣ်ဝဲ စီၤဃနၤနယၤ လၢအကဲသုးအတၢ်သူၣ်ထီၣ်အခိၣ် ဒ်သိးအဝဲကကွၢ်ထွဲ ဝ့ၢ်ယရူၤၡလ့ၣ်အဂီၢ်. စီၤဃနၤနယၤန့ၣ်လံာ်စီဆှံ ပာ်ဖျါထီၣ်ဝဲလၢအ “မ့ၢ်ပှၤလၢ ပှၤနာ်န့ၢ်အီၤသ့ဂ့ၤဂ့ၤ ဒီးအပျံၤ ယွၤလၢအမ့ၢ်အတီ အါန့ၢ် ပှၤအဂၤတဖၣ်.” (နဃ့မယၤ ၇:၂) စီၤဃနၤနယၤန့ၣ် အကဲပှၤလၢ အအဲၣ်ယဟိဝၤယွၤ ဒီးအပျံၤယဟိဝၤယွၤ အဃိ မူဒါလၢအဒိးန့ၢ်ဘၣ်ဝဲန့ၣ် အဂုာ်ကျဲးစၢးမၤဝဲလၢ အဂ့ၤကတၢၢ်. ပမ့ၢ်အဲၣ်ယဟိဝၤယွၤဒီးပျံၤအီၤန့ၣ် ပကကဲထီၣ်ပှၤလၢ ပှၤနာ်န့ၢ်အီၤသ့.
၆. စီၤတူဃံၤကူး ကဲဝဲတၢ်မၢဖိပီလူးအသကီးလၢ အနာ်န့ၢ်ဝဲသ့န့ၣ် အပာ်ဖျါထီၣ်ဝဲဒ်လဲၣ်.
၆ ပကဆိကမိၣ်ကွၢ် စီၤတူဃံၤကူး အဒိအတဲာ်. စီၤတူဃံၤကူး ကဲဝဲတၢ်မၢဖိပီလူးအသကီး လၢအနာ်န့ၢ်အီၤသ့တဂၤ. ဖဲစီၤပီလူးလီၤဘၣ်လၢ ဃိာ်ပူၤအခါ စီၤတူဃံၤကူး ဟဲမၤစၢၤအီၤ. ဒီးစီၤတူဃံၤကူးန့ၣ် စီၤပီလူးပာ်ဖျါထီၣ်အီၤ ဒ်အကဲ “ကစၢ်အခ့အပှၤလၢ အသးတီတဂၤ.” (အ့းဖ့းစူး ၆:၂၁, ၂၂) စီၤပီလူးနာ်န့ၢ်အီၤသ့အဃိ စီၤပီလူးမၢအလဲၤဆှၢန့ၢ်အီၤ လံာ်ပရၢလၢဒီပုၢ်ဝဲၢ်မုၣ်ခွါ လၢအအိၣ်လၢ အ့းဖ့းစူးဒီးကလီးစဲအပူၤ. တကးဒံးဘၣ် စီၤပီလူးမၢ အဟ့ၣ်ဂံၢ်ဟ့ၣ်ဘါဒီး မၤမုာ်ထီၣ်ဝဲ ဒီပုၢ်ဝဲၢ်မုၣ်ခွါတဖၣ်အသးဖဲန့ၣ်. ဆၢကတီၢ်ခဲအံၤ ဒီပုၢ်ဝဲၢ်ခွါလၢ အကွၢ်ထွဲပှၤလၢ နီၢ်သးတခီန့ၣ် အလီၤဂာ် ဒ်စီၤတူဃံၤကူးအသိး.—ကလီးစဲ ၄:၇-၉.
၇. တၢ်အိၣ်ဖှိၣ်သးပှၢ်ဒီး တၢ်အိၣ်ဖှိၣ်အပှၤမၤစၢၤတၢ်တဖၣ်န့ၣ် ပနာ်န့ၢ်အဝဲသ့ၣ်သ့န့ၣ် ပသ့ၣ်ညါဘၣ်ဒ်လဲၣ်.
၇ ဆၢကတီၢ်ခဲအံၤ ပအိၣ်ဒီးတၢ်အိၣ်ဖှိၣ်သးပှၢ် ဒီးတၢ်အိၣ်ဖှိၣ်အပှၤမၤစၢၤတၢ် လၢပနာ်န့ၢ်အီၤသ့အဃိ ပသးခုဒိၣ်မး. အဝဲသ့ၣ်န့ၣ် မၤလၢပှဲၤအမူဒါဂ့ၤဂ့ၤ ဒ်သိးဒီး စီၤဒၤနံးယ့လး, စီၤဃနၤနယၤ, စီၤတူဃံၤကူး အသိး. အဃိ ဖဲပထီၣ်နွံဖးဖီတၢ်အိၣ်ဖှိၣ်အခါန့ၣ် ပသ့ၣ်ညါလၢ မူဒါတဖၣ်န့ၣ် ပှၤဟ့ၣ်လီၤဝဲ ပှၤလၢအကဘၣ်မၤဝဲတဖၣ်အအိၣ်ဝံၤလံ ဒီးပတလိၣ်ဘၣ်ယိၣ်တၢ်လၢၤဘၣ်. ဒီးဖဲဒီပုၢ်ဝဲၢ်မုၣ်ခွါတဖၣ် မၤလၢပှဲၤအမူဒါဂ့ၤဂ့ၤအခါန့ၣ် တၢ်အိၣ်ဖှိၣ်သးပှၢ်တဖၣ် ပာ်လုၢ်ပာ်ပှ့ၤဝဲဒိၣ်မး. ဒီးဖဲပကွဲမုာ်ပပှၤမၤလိလံာ်စီဆှံဖိလၢ ကဟဲထီၣ်တၢ်အိၣ်ဖှိၣ်လၢ မုၢ်ဃုနံၤ မ့တမ့ၢ် မုၢ်အိၣ်ဘှံးနံၤအခါ မ့ၢ်ပှၤဟ့ၣ်ကမျၢၢ်တၢ်စံၣ်တဲၤတဲလီၤတၢ် ဘၣ်ကအိၣ်ဧါန့ၣ် ပတလိၣ်ဘၣ်ယိၣ်တၢ် နီတဘျီဘၣ်. ဒီးပသ့ၣ်ညါလၢ လံာ်လဲၢ်လၢ ပလိၣ်ဘၣ်အီၤလၢ တၢ်စံၣ်တဲၤတဲလီၤတၢ်အဂီၢ်န့ၣ် ကအိၣ်ဝဲ. ယဟိဝၤယွၤ ဟ့ၣ်လီၤပှၤ ဒီပုၢ်ဝဲၢ်ခွါလၢ အအိၣ်ဒီးတၢ်သးတီတဖၣ်အံၤ လၢကကွၢ်ထွဲပှၤ လၢနီၢ်သးတကပၤ ဂ့ၤဂ့ၤအဃိ ပစံးဘျုးဘၣ်အီၤသပှၢ်တၢၢ်. မ့မ့ၢ်လၢ ပဝဲဟီမီၤ ပပာ်ဖျါထီၣ်လၢ ပကဲပှၤလၢ ပှၤနာ်န့ၢ်အီၤသ့န့ၣ် ကသ့ဒ်လဲၣ်.
ဟးတဲဘၣ်ပှၤဂၤလၢ တၢ်ဂ့ၢ်ခူသူၣ်တဂ့ၤ
၈. ပမ့ၢ်အဲၣ်ဒိးပာ်ဖျါထီၣ် တၢ်သးအိၣ်ပှၤဂၤ နာ်က့ ပကဘၣ်ပလီၢ်သးဒ်လဲၣ်. (ကတိၤဒိ ၁၁:၁၃)
၈ ပအဲၣ်ပဒီပုၢ်ဝဲၢ်မုၣ်ခွါတဖၣ် ဒီးပအဲၣ်ဒိးပာ်ဖျါထီၣ် လၢပသးအိၣ်အဝဲသ့ၣ် သနာ်က့ ပကဘၣ်အိၣ်ဒီး တၢ်ထံၣ်လၢအကြၢးအဘၣ်. ပတကြၢး ဃုသ့ၣ်ညါအဝဲသ့ၣ် တၢ်ဂ့ၢ်ခူသူၣ် ဒီးဟးတဲဘၣ်ပှၤဂၤလၢ အဝဲသ့ၣ်တၢ်ဂ့ၢ်ခူသူၣ်ဘၣ်. ပမ့ၢ်ကွၢ် ခရံာ်ဖိလၢ တၢ်မၢဖိအစိၤတနီၤန့ၣ် အဝဲသ့ၣ်ကဲ “ပှၤလၢအဟးတဲအီၣ်ပှၤဂ့ၢ်, ဟးမၤဘၣ်ထွဲလိာ်အသးဒီး ပှၤဂၤအဂ့ၢ် ဒီးတဲတၢ်လၢ အတကြၢးတဲဝဲဘၣ်တဖၣ်.” (၁ တံၤမသ့း ၅:၁၃) အဃိ ပတဘၣ်သး လီၤဂာ်ဒီးအဝဲသ့ၣ်ဘၣ်. ဒီပုၢ်ဝဲၢ်တနီၤန့ၣ် အဝဲသ့ၣ်နာ်အီၣ်ပှၤအဃိ အကတဲဘၣ်ပှၤ အတၢ်ဂ့ၢ်ခူသူၣ် ဒီးအတမၢ ပဟးတဲဘၣ်ပှၤဂၤဘၣ်. အဒိ ဒီပုၢ်ဝဲၢ်မုၣ်တဂၤ ကတဲဘၣ်ပှၤ အတၢ်အိၣ်ဆူၣ်အိၣ်ချ့အဂ့ၢ် ဒီးတၢ်မၤကွၢ်လၢ အထံၣ်ဘၣ်တဖၣ် ဒီးအမ့ၢ်တအဲၣ်ဒိးလၢ ပကတဲပှၤဂၤဘၣ်န့ၣ် ပတကြၢးတဲဘၣ်ပှၤဂၤဘၣ်.b (ဖး ကတိၤဒိ ၁၁:၁၃.) တၢ်ဂ့ၢ်ခူသူၣ်တနီၤလၢ ပတဘၣ်ဟးတဲပှၤဂၤဘၣ်န့ၣ် ကမ့ၢ်မနုၤလဲၣ်. ခဲအံၤပကတဲသကီး အဒိတနီၤ.
၉. နဟံၣ်ဖိဃီဖိ နာ်န့ၢ်နၤ ကသ့အဂီၢ် နကဘၣ်မၤဒ်လဲၣ်.
၉ နဟံၣ်ဖိဃီဖိ နာ်န့ၢ်နၤ ကသ့အဂီၢ် နကဘၣ်မၤဒ်လဲၣ်. ဟံၣ်ဖိဃီဖိ ကိးဂၤဒဲးန့ၣ် အိၣ်ဒီးမူဒါလၢ ကပာ်ခူသူၣ်ဟံၣ်ဖိဃီဖိ အတၢ်ဂ့ၢ်တၢ်ကျိၤ. အဒိ ဝၤတဂၤ ကထံၣ်ဘၣ် အမါအလုၢ်အလၢ်လၢ အလီၤနံၤဘၣ်အီၤ တမံၤမံၤ. ဘၣ်ဆၣ် အဝဲတအဲၣ်ဒိးမၤမဲာ်ဆှးအမါဘၣ် အဃိ အတတဲဘၣ်ပှၤဂၤဘၣ်. ဒီးအအဲၣ်အမါအဃိန့ၣ် အတအဲၣ်ဒိး မၤဘၣ်ဒိအမါအသး နီတဘျီဘၣ်. (အ့းဖ့းစူး ၅:၃၃) ပှၤဒိၣ်ထီၣ်သီတဖၣ်န့ၣ် အဝဲသ့ၣ်အဲၣ်ဒိးလၢ ပှၤကပာ်ကဲအီၤ. အဃိ အရ့ဒိၣ်လၢ မိပါတဖၣ် ကြၢးသ့ၣ်နီၣ်ထီၣ် တၢ်ဂ့ၢ်တခါအံၤ ဒီးမိပါတဖၣ် တကြၢးမၤမဲာ်ဆှးအဖိ ခီဖျိတဲဘၣ်ပှၤဂၤလၢ အဖိအတၢ်ကမၣ်ဘၣ်. (ကလီးစဲ ၃:၂၁) ဖိတဖၣ်စ့ၢ်ကီး တကြၢးတဲပှၤဂၤတၢ်ဂ့ၢ်လၢ ကကဲထီၣ်တၢ်မဲာ်ဆှးလၢ အဟံၣ်ဖိဃီဖိအဂီၢ်ဘၣ်. (၅ မိၤၡ့ ၅:၁၆) ဟံၣ်ဖိဃီဖိကိးဂၤဒဲး မ့ၢ်တတဲဘၣ် ပှၤဂၤလၢ အဝဲသ့ၣ်အဟံၣ်ဖိဃီဖိ အတၢ်ဂ့ၢ်ခူသူၣ်ဒီး တၢ်လီၤတူာ်လီၤကာ်ဘၣ်န့ၣ် အဝဲသ့ၣ် တၢ်ရ့လိာ်သး ကဂၢၢ်ကျၢၤထီၣ်.
၁၀. တံၤသကီးတံၢ်နီၢ်န့ၣ် အကဲပှၤဒ်လဲၣ်. (ကတိၤဒိ ၁၇:၁၇)
၁၀ နသကီး နာ်န့ၢ်နၤ ကသ့အဂီၢ် နကဘၣ်မၤဒ်လဲၣ်. တဘျီတခီၣ်န့ၣ် ပဘၣ်သး တဲဘၣ်ပသကီးလၢ ပတၢ်တူၢ်ဘၣ် ဘၣ်ဆၣ် ပဘၣ်ယိၣ်လၢ ပသကီးတဂၤအံၤ ကတဲဘၣ်က့ၤပှၤဂၤ. ဘၣ်သ့ၣ်သ့ၣ် ပတတဲဘၣ် ညီနုၢ်ပှၤဂၤလၢ ပတၢ်တူၢ်ဘၣ်အဃိ ပကတဲဘၣ်ပှၤဂၤလၢ ပတၢ်တူၢ်ဘၣ်န့ၣ် တညီဘၣ်. အဃိ ပမ့ၢ်အိၣ်ဒီး သကီးလၢ အတတဲဘၣ်က့ၤ ပှၤဂၤလၢ ပတၢ်တူၢ်ဘၣ်န့ၣ် ပသးခုဒိၣ်မး. ဒီးပထံၣ်အီၤဒ် “တံၤသကိးတံၢ်နီၢ်.”—ဖး ကတိၤဒိ ၁၇:၁၇.
တၢ်အိၣ်ဖှိၣ်သးပှၢ်တဖၣ် တတဲဖျါထီၣ် တၢ်ဂ့ၢ်ခူသူၣ်လၢ အဟံၣ်ဖိဃီဖိတဖၣ်အအိၣ်ဘၣ် (ကွၢ်လံာ်အဆၢ ၁၁)c
၁၁. (က) တၢ်အိၣ်ဖှိၣ်သးပှၢ် ဒီးအမါန့ၣ် ပာ်ဖျါထီၣ်လၢအကဲ ပှၤလၢပှၤနာ်န့ၢ်အီၤသ့န့ၣ် ကသ့ဒ်လဲၣ်. (ခ) တၢ်အိၣ်ဖှိၣ်သးပှၢ်လၢ အတတဲဘၣ် တၢ်အိၣ်ဖှိၣ် အတၢ်ဂ့ၢ်ခူသူၣ်ဒီး အတတဲဘၣ် အဟံၣ်ဖိဃီဖိ အတၢ်ဂ့ၢ်ခူသူၣ်န့ၣ် ပမၤလိန့ၢ်တၢ်လၢ အအိၣ်သ့ဒ်လဲၣ်. (ကွၢ်တၢ်ဂီၤ.)
၁၁ ဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်အပူၤ နာ်န့ၢ်နၤ ကသ့အဂီၢ် နကဘၣ်မၤဒ်လဲၣ်. တၢ်အိၣ်ဖှိၣ်သးပှၢ်တဖၣ်န့ၣ် ပာ်ခူသူၣ်န့ၢ် ပှၤဂၤတၢ်ဂ့ၢ်တၢ်ကျိၤ ဒီးအဝဲသ့ၣ်န့ၣ် လီၤဂာ်ဒ် “တၢ်အိၣ်သဒၢကလံၤအလီၢ်, တၢ်ပူၤဖျဲး အလီၢ်” လၢဒီပုၢ်ဝဲၢ်မုၣ်ခွါတဖၣ်အဂီၢ်. (ယၡါယၤ ၃၂:၂) အဃိ ပသ့ၣ်ညါလၢ ပတဲဘၣ်အဝဲသ့ၣ်လၢ ပတၢ်ဂ့ၢ်ဘူၣ် ဒီးပနာ်လၢ အဝဲသ့ၣ်တတဲဘၣ်က့ၤ ပှၤဂၤလၢ တၢ်လၢပတဲအဝဲသ့ၣ်တဖၣ်ဘၣ်. ဒီးပတမၢဆူၣ်အဝဲသ့ၣ်လၢ ကတဲဘၣ်ပှၤ တၢ်ဂ့ၢ်လၢအဝဲသ့ၣ် ကြၢးပာ်ခူသူၣ်ဝဲန့ၣ်ဘၣ်. တကးဒံးဘၣ် ပတကြၢးမၢ တၢ်အိၣ်ဖှိၣ်သးပှၢ်အမါတဖၣ် ကမၤဝဲဒ်သိးအဝၤ ကတဲဘၣ်အီၤလၢ တၢ်အိၣ်ဖှိၣ်အတၢ်ဂ့ၢ်ခူသူၣ်ဘၣ်. တၢ်အိၣ်ဖှိၣ်သးပှၢ်တဖၣ် မ့ၢ်တတဲဘၣ်အမါလၢ ဒီပုၢ်ဝဲၢ်မုၣ်ခွါတဖၣ် အတၢ်ဂ့ၢ်ခူသူၣ်ဘၣ်န့ၣ် ကကဲဘျုးဝဲသပှၢ်တၢၢ်. တၢ်အိၣ်ဖှိၣ်သးပှၢ်အမါတဂၤ တဲဝဲလၢ “ဘၣ်ဃးဒီး ဒီပုၢ်ဝဲၢ်မုၣ်ခွါလၢ အလိၣ်ဘၣ်တၢ်မၤစၢၤန့ၣ် ယဝၤတတဲဘၣ်ယၤလၢ အဝဲသ့ၣ်အဂ့ၢ် နီတဘျီဘၣ်. ဒီးပှၤလၢအလိၣ်ဘၣ် တၢ်မၤစၢၤန့ၣ် အကဲမတဂၤလဲၣ်မၣ် အတတဲဘၣ်ယၤဘၣ်. တၢ်ဂ့ၢ်လၢ ယတကြၢးသ့ၣ်ညါဘၣ်န့ၣ် ပှၤတတဲပၠးယၤဘၣ်အဃိ ယသးခုညါ. ပှၤမ့ၢ်တဲပၠးယၤ သနာ်က့ ယမၤစၢၤတၢ် တသ့နီတမံၤဘၣ်အဃိ အိၣ်ဒၣ် ယကသးကိၢ်တၢ်လီၤ. မ့ၢ်လၢယတသ့ၣ်ညါ ဒီပုၢ်ဝဲၢ်မုၣ်ခွါတဖၣ် အတၢ်ဂ့ၢ်ခူသူၣ်ဘၣ်အဃိ ယရ့ဒီးအဝဲသ့ၣ်ဒ် ယရ့ညီနုၢ်အသိးသ့. ဒီးယနာ်အီၣ်ယဝၤသ့ ဒီးယသ့ၣ်ညါလၢ ယမ့ၢ်တဲဘၣ်အီၤ ယတၢ်တူၢ်ဘၣ်ဒီး ယတၢ်ကီတၢ်ခဲတဖၣ်န့ၣ် အဝဲတဟးတဲဘၣ်ပှၤဂၤဘၣ်.” ပဝဲခဲလၢာ်န့ၣ် ပအဲၣ်ဒိးကဲ ပှၤလၢပှၤနာ်အီၣ်အီၤသ့. ဒ်သိးပကကဲထီၣ် ပှၤလၢပှၤနာ်န့ၢ်အီၤသ့အဂီၢ် တၢ်မနုၤကမၤစၢၤပှၤလဲၣ်. ပကတဲသကီး တၢ်ဂ့ၤတၢ်ဝါယဲၢ်ခါလၢ အကမၤစၢၤပှၤ.
တၢ်ဂ့ၤတၢ်ဝါတဖၣ်လၢ ကမၤစၢၤနၤ ဒ်သိး နကကဲထီၣ် ပှၤလၢပှၤနာ်န့ၢ်အီၤသ့
၁၂. ဒ်သိး ပှၤနာ်န့ၢ်ပှၤကသ့အဂီၢ် ပကဘၣ်အိၣ်ဒီး တၢ်အဲၣ်န့ၣ် ဘၣ်မနုၤအဃိ မ့ၢ်တၢ်လၢအရ့ဒိၣ်လဲၣ်. ဟ့ၣ်တၢ်အဒိ.
၁၂ ဒ်သိး ပှၤနာ်န့ၢ်ပှၤ ကဘူၣ်အဂီၢ်န့ၣ် ပကဘၣ်အိၣ်ဒီး တၢ်အဲၣ်. ယ့ၣ်ၡူးတဲဝဲ တၢ်မၤလိာ် အဒိၣ်ကတၢၢ်ခံထံၣ်န့ၣ် ကဲဝဲ ပကဘၣ်အဲၣ် ယဟိဝၤယွၤဒီး ပှၤလၢပဃၢၤ. (မးသဲ ၂၂:၃၇-၃၉) ယဟိဝၤယွၤန့ၣ် အကဲပှၤလၢ ပနာ်န့ၢ်အီၤသ့ လၢလၢပှဲၤပှဲၤ. ဒီးပအဲၣ်အီၤအဃိ ပအဲၣ်ဒိးကွၢ်လိအီၤ. အဒိ ပအဲၣ်ပဒီပုၢ်ဝဲၢ်မုၣ်ခွါတဖၣ် အဃိ ပတဟးတဲအဝဲသ့ၣ် အတၢ်ဂ့ၢ်ခူသူၣ်တဖၣ်ဘၣ်. ဒီးပတအဲၣ်ဒိး မၤတၢ်လၢ ကမၤမဲာ်ဆှး, ကမၤဘၣ်ဒိ, ဒီးကမၤဆါ ပဒီပုၢ်ဝဲၢ်မုၣ်ခွါအသး နီတဘျီဘၣ်.—ယိၤဟၣ် ၁၅:၁၂.
၁၃. တၢ်ဆီၣ်လီၤသးန့ၣ် ကမၤစၢၤပှၤလၢ ပကကဲထီၣ်ပှၤလၢ ပှၤနာ်န့ၢ်အီၤသ့ဒ်လဲၣ်.
၁၃ ပမ့ၢ်အိၣ်ဒီး တၢ်ဆီၣ်လီၤသးန့ၣ် ပကကဲထီၣ်ပှၤလၢ ပှၤနာ်န့ၢ်အီၤသ့. ပှၤလၢအအိၣ်ဒီး တၢ်ဆီၣ်လီၤသးန့ၣ် အတဂုာ်ကျဲးစၢး ကဲပှၤအဆိကတၢၢ်တဂၤလၢ ကတဲဘၣ်ပှၤဂၤလၢ တၢ်ဂ့ၢ်တမံၤမံၤန့ၣ်ဘၣ်. (ဖံလံးပံၤ ၂:၃) ဒီးပတဂုာ်ကျဲးစၢးမၤဒ်သိး ပှၤကဆိကမိၣ်ဒိၣ်ပှၤလၢ ပသ့ၣ်ညါတၢ်ဂ့ၢ်ခူသူၣ် တမံၤမံၤန့ၣ်ဘၣ်. ပမ့ၢ်အိၣ်ဒီးတၢ်ဆီၣ်လီၤသးန့ၣ် တၢ်ဂ့ၢ်လၢ လံာ်စီဆှံဒီး တၢ်ကရၢကရိလံာ်လဲၢ် မ့ၢ်တၡဲပၠးဝဲဒံးဘၣ်န့ၣ် ပတတဲဘၣ်ပှၤဂၤလၢ ပနီၢ်ကစၢ် တၢ်ထံၣ်တဖၣ်ဘၣ်.
၁၄. ပမ့ၢ်ကဲပှၤလၢ အသ့ပဲာ်ထံနီၤဖးတၢ်န့ၣ် ပကကဲထီၣ်ပှၤလၢ ပှၤနာ်န့ၢ်အီၤသ့ဒ်လဲၣ်.
၁၄ ခရံာ်ဖိလၢ အသ့ပဲာ်ထံနီၤဖးတၢ်န့ၣ် ကသ့ၣ်ညါဝဲ “တၢ်ဆၢကတီၢ်လၢ ပှၤကအိၣ်ဘှ့ၣ်အဂီၢ် ဒီးတၢ်ဆၢကတီၢ်လၢ ပှၤကတဲတၢ်အဂီၢ်.” (စံၣ်တဲၤတဲလီၤတၢ် ၃:၇) ကလုာ်ဒူၣ်တနီၤအတၢ်ကတိၤဒိ အိၣ်ဝဲလၢ “ပမ့ၢ်တဲတၢ်န့ၣ် အလီၤဂာ်ဒ်သိးဒီးစ့ ဘၣ်ဆၣ် ပမ့ၢ်အိၣ်ဘှ့ၣ်န့ၣ် အလီၤဂာ်ဒ်သိးဒီးထူ.” ပမ့ၢ်တဲလၢ အဂၤတမံၤန့ၣ် တဘျီတခီၣ် ပမ့ၢ်အိၣ်ဘှ့ၣ်န့ၣ် ဂ့ၤန့ၢ်ပတဲတၢ်ဒံး. အဃိ ကတိၤဒိ ၁၁:၁၂ တဲဝဲလၢ “ပှၤလၢအသ့ပဲာ်ထံနီၤဖးတၢ်န့ၣ် အိၣ်ဘှ့ၣ်ဝဲ.” ပကကွၢ်သကီး တၢ်အဒိတခါ. တၢ်အိၣ်ဖှိၣ်သးပှၢ် လၢအအိၣ်ဒီးတၢ်လဲၤခီဖျိတဂၤန့ၣ် ညီနုၢ်ဖဲတၢ်အိၣ်ဖှိၣ်အဂၤတဖၣ် အိၣ်ဒီးတၢ်ကီတၢ်ခဲအခါ ပှၤကဟဲဃ့အီၤတၢ်မၤစၢၤ. ဘၣ်ဃးဒီး တၢ်အိၣ်ဖှိၣ်သးပှၢ်တဂၤအံၤန့ၣ် တၢ်အိၣ်ဖှိၣ်သးပှၢ်အဂၤတဂၤ တဲဝဲလၢ “ထီဘိန့ၣ် တၢ်အိၣ်ဖှိၣ်သးပှၢ်တဂၤအံၤ အပလီၢ်အသးလၢ အတတဲဖျါထီၣ် တၢ်အိၣ်ဖှိၣ်အဂၤတဖၣ် အတၢ်ဂ့ၢ်ခူသူၣ်ဘၣ်.” ခီဖျိလၢ တၢ်အိၣ်ဖှိၣ်သးပှၢ်တဂၤအံၤ အသ့ပဲာ်ထံနီၤဖးတၢ်အဃိ တၢ်အိၣ်ဖှိၣ်သးပှၢ်အဂၤ လၢအတၢ်အိၣ်ဖှိၣ်အပူၤန့ၣ် ပာ်ကဲအီၤ. တၢ်အိၣ်ဖှိၣ်သးပှၢ်တဖၣ် နာ်န့ၢ်အီၤလၢ အဝဲတပာ်ဖျါထီၣ် တၢ်ဂ့ၢ်ခူသူၣ်လၢ ပှၤဂၤတဖၣ်အအိၣ်ဘၣ်.
၁၅. ပမ့ၢ်တဲတၢ် တီတီလိၤလိၤန့ၣ် ဘၣ်မနုၤအဃိ ပှၤနာ်န့ၢ်ပှၤသ့လဲၣ်.
၁၅ ပမ့ၢ်အိၣ်မူတီတီလိၤလိၤန့ၣ် ပကကဲထီၣ်ပှၤလၢ ပှၤနာ်န့ၢ်အီၤသ့. ပှၤလၢအအိၣ်မူ တီတီလိၤလိၤတဂၤန့ၣ် ကတဲဝဲတၢ်မ့ၢ်တၢ်တီထီဘိ အဃိ ပနာ်န့ၢ်အီၤသ့. (အ့းဖ့းစူး ၄:၂၅; ဧ့ၤဘြံၤ ၁၃:၁၈) အဒိ နကအဲၣ်ဒိးမၤအါထီၣ် နတၢ်သ့တၢ်ဘၣ်လၢ တၢ်စံၣ်တဲၤတဲလီၤတၢ်မၤ တကပၤ အဃိ နကမၢပှၤတဂၤဒိကနၣ်န့ၢ်နၤ နတၢ်စံၣ်တဲၤတဲလီၤ ဒီးနမၢအတဲဖျါထီၣ် အတၢ်ထံၣ်ဒ်သိးဒီး ကမၤစၢၤနၤလၢ နကလဲၤထီၣ်လဲၤထီအဂီၢ်. ဖဲန့ၣ်အခါန့ၣ် နကနာ်န့ၢ်ပှၤလၢ အတဲဖျါထီၣ်အတၢ်ထံၣ် တီတီလိၤလိၤဧါ မ့တမ့ၢ် နကနာ်န့ၢ်ပှၤလၢ အတဲဘၣ်နၤတၢ်လၢ နအဲၣ်ဒိးနၢ်ဟူတဖၣ်ဧါ. နကအဲၣ်ဒိးနၢ်ဟူ ပှၤလၢအတဲဖျါထီၣ်အတၢ်ထံၣ် တီတီလိၤလိၤလီၤနီၤ. လံာ်စီဆှံ တဲဖျါထီၣ်ဝဲလၢ “ပှၤသိၣ်ဃီၣ်တၢ် ပျီပျီန့ၣ် ဂ့ၤဒိၣ်န့ၢ်ဒံး ပှၤလၢအအိၣ်ဒီးတၢ်အဲၣ် ဘၣ်ဆၣ် တပာ်ဖျါထီၣ်ဝဲဘၣ်လီၤ. နမ့ၢ်ကဘၣ်ဒိ သနာ်က့ နသကိးတဂၤလၢ အသးတီဒီးနၤန့ၣ် ကသိၣ်ဃီၣ်နၤ.” (ကတိၤဒိ ၂၇:၅, ၆) ပသကီးလၢ အတဲဘၣ်ပှၤတၢ် တီတီလိၤလိၤတဂၤန့ၣ် ခီၣ်ထံးခါ ပကနၣ်အတၢ်တဲမ့ၢ်တမုာ်ဘၣ် သနာ်က့ လၢခံန့ၣ် အကဲဘျုးက့ၤဝဲ လၢပဂီၢ်သ့.
၁၆. ဘၣ်ဃးဒီး တၢ်ပၢၤသူၣ်ပၢၤသးန့ၣ် ကတိၤဒိ ၁၀:၁၉ ဟ့ၣ်ကူၣ်ပှၤဒ်လဲၣ်.
၁၆ ပမ့ၢ်အဲၣ်ဒိးလၢ ပှၤဂၤကနာ်န့ၢ်ပှၤန့ၣ် အရ့ဒိၣ်ဒိၣ်မးလၢ ပကဘၣ်အိၣ်ဒီး တၢ်ပၢၤသူၣ်ပၢၤသး. ဖဲပအဲၣ်ဒိးတဲဖျါထီၣ် တၢ်ဂ့ၢ်ခူသူၣ်တမံၤမံၤအခါန့ၣ် တၢ်ပၢၤသူၣ်ပၢၤသးတခါအံၤန့ၣ် ကမၤစၢၤပှၤလၢ ပကပၢၤပထးခိၣ်. (ဖး ကတိၤဒိ ၁၀:၁၉.) ဖဲပသူအ့ၤထၢၤနဲၣ်အခါန့ၣ် တဘျီတခီၣ် ကီလၢပကအိၣ်ဒီး တၢ်ပၢၤသး. ပမ့ၢ်တပလီၢ်သးဘၣ်န့ၣ် ဘၣ်သ့ၣ်သ့ၣ် ပကတဲဖျါထီၣ်ဘၣ် တၢ်ဂ့ၢ်ခူသူၣ် အဃိ ပှၤအါဂၤကသ့ၣ်ညါဝဲ. ဒီးပမ့ၢ်တဲဖျါထီၣ်ဘၣ် တၢ်ဂ့ၢ်ခူသူၣ်လၢ အ့ၤထၢၤနဲၣ်အပူၤလံန့ၣ် ပမၤလီၤမၢ်က့ၤအီၤ တသ့လၢၤဘၣ်. တၢ်ဂ့ၢ်လၢပတဲအီၤန့ၣ် ကဒုးအိၣ်ထီၣ် တၢ်ကီတၢ်ခဲထဲလဲၣ်န့ၣ် ပတသ့ၣ်ညါဘၣ် ဒီးပမၤတဘၣ်လၢၤဘၣ်. တကးဒံးဘၣ် ပှၤလၢအထီဒါပှၤတဖၣ် မ့ၢ်အဲၣ်ဒိးလၢ ပကတဲဖျါထီၣ် တၢ်ဂ့ၢ်ခူသူၣ်လၢ ကမၤဘၣ်ဒိ ပဒီပုၢ်ဝဲၢ်မုၣ်ခွါတဖၣ်န့ၣ် ပမ့ၢ်အိၣ်ဒီး တၢ်ပၢၤသူၣ်ပၢၤသးန့ၣ် ပတတဲဖျါထီၣ် တၢ်ဂ့ၢ်သ့ၣ်တဖၣ်န့ၣ်ဘၣ်. ပမ့ၢ်အိၣ်ဘၣ်တၢ်လီၢ်လၢ ပှၤတြီဃာ်ပတၢ်စံၣ်တဲၤတဲလီၤတၢ်မၤ မ့တမ့ၢ် ပဒိၣ်တဟ့ၣ်အခွဲးနီတစဲးဘၣ်န့ၣ် ပလံးတဖၣ် ကမၢပတဲဖျါထီၣ် တၢ်ဂ့ၢ်ခူသူၣ်သ့. အဃိ ဖဲန့ၣ်အဆၢကတီၢ်မ့ၢ်ဂ့ၤ, လၢတၢ်အိၣ်သးလၢအဂၤတနီၤမ့ၢ်ဂ့ၤ ပမၤထွဲလံာ်စီဆှံ အတၢ်ဟံးစုနဲၣ်ကျဲဒီး ပ “ပၢၤဃာ်[ပ]ထးခိၣ်” သ့. (စံးထီၣ်ပတြၢၤ ၃၉:၁) အဃိ လၢဟံၣ်ဖိဃီဖိအကျါမ့ၢ်ဂ့ၤ, လၢပသကီးအကျါမ့ၢ်ဂ့ၤ, လၢပဒီပုၢ်ဝဲၢ်မုၣ်ခွါ အကျါမ့ၢ်ဂ့ၤ ဒီးလၢပှၤတဂၤဂ့ၤတဂၤဂ့ၤ အကျါမ့ၢ်ဂ့ၤ ပအဲၣ်ဒိး ဂုာ်ကျဲးစၢးကဲထီၣ် ပှၤလၢပှၤနာ်န့ၢ်အီၤသ့. ဒီးဒ်သိးပကကဲထီၣ် ပှၤလၢပှၤနာ်န့ၢ်အီၤသ့အဂီၢ်န့ၣ် ပကဘၣ်အိၣ်ဒီး တၢ်ပၢၤသူၣ်ပၢၤသး.
၁၇. လၢတၢ်အိၣ်ဖှိၣ်အပူၤန့ၣ် ဒ်သိးပတၢ်နာ်န့ၢ်လိာ်သး ကအိၣ်အဂီၢ် ပကဘၣ်မၤဒ်လဲၣ်.
၁၇ ပအိၣ်ဒီး ဒီပုၢ်ဝဲၢ်မုၣ်ခွါလၢ အအဲၣ်လိာ်သးဒီး ပနာ်န့ၢ်အဝဲသ့ၣ်သ့အဃိ ပသးခုစံးဘျုးဘၣ် ယဟိဝၤယွၤဒိၣ်မး. ပဝဲခဲလၢာ်န့ၣ် ပအိၣ်ဒီးမူဒါလၢ ပကဘၣ်မၤဒ်သိး ပဒီပုၢ်ဝဲၢ်မုၣ်ခွါတဖၣ် နာ်န့ၢ်ပှၤကသ့အဂီၢ်. ဖဲပဝဲတဂၤဘၣ်တဂၤ ဂုာ်ကျဲးစၢးပာ်ဖျါထီၣ် တၢ်အဲၣ်, တၢ်ဆီၣ်လီၤသး, တၢ်သ့ပဲာ်ထံနီၤဖးတၢ်, အိၣ်မူတီတီလိၤလိၤ ဒီးတၢ်ပၢၤသူၣ်ပၢၤသးအခါန့ၣ် မ့ၢ်ဒၣ်ပဒုးအိၣ်ထီၣ် တၢ်နာ်န့ၢ်လိာ်သးလၢ ပဒီပုၢ်ဝဲၢ်မုၣ်ခွါတဖၣ် အကျါ. ပဝဲခဲလၢာ် ပကဘၣ်ဂုာ်ကျဲးစၢး ပာ်ဖျါထီၣ်လၢ ပကဲပှၤလၢပှၤနာ်န့ၢ်အီၤသ့. မ်ပဂုာ်ကျဲးစၢးကွၢ်လိ ယဟိဝၤယွၤ ဒီးဂုာ်ကျဲးစၢးဒ်သိး ပှၤနာ်န့ၢ်ပှၤကသ့အဂီၢ်.
တၢ်သးဝံၣ် ၁၂၃ မၤထွဲယွၤ အတၢ်ရဲၣ်တၢ်ကျဲၤ
a ပမ့ၢ်အဲၣ်ဒိးလၢ ပှၤကနာ်န့ၢ်ပှၤန့ၣ် အဆိကတၢၢ် ပကဘၣ်ကဲထီၣ် ပှၤလၢပှၤနာ်န့ၢ်အီၤသ့. လၢတၢ်မၤလိအံၤအပူၤ ပကတဲသကီး ဘၣ်မနုၤအဃိ အရ့ဒိၣ်ဒိၣ်မးလၢ ပကဘၣ်နာ်န့ၢ်လိာ်သး တဂၤဒီးတဂၤလဲၣ်. ဒီးဒ်သိး ပှၤဂၤနာ်န့ၢ်ပှၤကသ့အဂီၢ် ပကဘၣ်အိၣ်ဒီးတၢ်ဂ့ၤတၢ်ဝါ မနုၤတဖၣ်လဲၣ်.
b ဖဲဒီပုၢ်ဝဲၢ်မုၣ်ခွါတဂၤဂၤ မၤတၢ်ကမၣ်ဖးဒိၣ်န့ၣ် ပကြၢးဟ့ၣ်ဂံၢ်ဟ့ၣ်ဘါအီၤလၢ အကလဲၤတဲဘၣ် တၢ်အိၣ်ဖှိၣ်သးပှၢ်တဖၣ် ဘၣ်ဆၣ် အဝဲသ့ၣ်မ့ၢ်တမၤဝဲဘၣ်န့ၣ် ပကြၢးပာ်ဖျါထီၣ်လၢ ပတီဒီးယဟိဝၤယွၤ ဒီးတၢ်အိၣ်ဖှိၣ် ဒီးပကတဲဘၣ် တၢ်အိၣ်ဖှိၣ်သးပှၢ်တဖၣ်.
c တၢ်ဂီၤ အခီပညီ– တၢ်အိၣ်ဖှိၣ်သးပှၢ်တဂၤ အတတဲဖျါထီၣ် တၢ်ဂ့ၢ်ခူသူၣ်လၢ အဟံၣ်ဖိဃီဖိအအိၣ်ဘၣ်.