လံာ်စီဆှံ သိၣ်လိပှၤ ဘၣ်ဃးဒီး ပှၤလၢအဒုးအိၣ်ထီၣ် လံာ်စီဆှံတဂၤန့ၣ် အဂ့ၢ်ဒ်လဲၣ်

၁. ဘၣ်မနုၤအဃိ နပာ်လုၢ်ပာ်ပှ့ၤ လံာ်စီဆှံလဲၣ်.

ခီဖျိလၢ ယဟိဝၤယွၤ ဟ့ၣ်ပှၤလံာ်စီဆှံအဃိ ပပာ်လုၢ်ပာ်ပှ့ၤ လံာ်စီဆှံ ဒီးပစံးဘျုး ယဟိဝၤယွၤဒိၣ်မး. လၢလံာ်စီဆှံပူၤန့ၣ်​ ယဟိဝၤယွၤ ဟ့ၣ်လီၤပှၤတၢ်ဟ့ၣ်ကူၣ်ဒီဒူၣ်​ ဒ်သိး ကမၤစၢၤပှၤလၢ ပကလဲၤခီဖျိ တၢ်ကီတၢ်ခဲလၢ ပထံၣ်ဘၣ်အီၤလၢ ဆၢကတီၢ်ခဲအံၤ. အဟ့ၣ်စ့ၢ်ကီးပှၤ တၢ်မုၢ်လၢ်လၢအဂ့ၤဒိၣ်မး လၢခါဆူညါ. တကးဒံးဘၣ်​ လၢလံာ်စီဆှံပူၤန့ၣ်​ ယဟိဝၤယွၤ ပာ်ဖျါထီၣ်န့ၢ်ပှၤ အတၢ်ဂ့ၤတၢ်ဝါဒီဒူၣ်. ပမ့ၢ်ဆိမိၣ်ထံ ယဟိဝၤယွၤ အတၢ်ဂ့ၤတၢ်ဝါန့ၣ်​ ဘၣ်ပသးမုာ်ညါ. ဒီးပဘၣ်သးမၤဂ့ၤထီၣ်​ ပတၢ်ရ့လိာ်သးဒီးအီၤထီဘိ.—စံးထီၣ်ပတြၢၤ ၂၅:၁၄.

၂. လၢညါမ့ၢ်ဂ့ၤ ခဲအံၤမ့ၢ်ဂ့ၤ ယဟိဝၤယွၤ ဒုးသ့ၣ်ညါပှၤ အဂ့ၢ်ဒ်လဲၣ်.

^၂ ယဟိဝၤယွၤ ဘၣ်သးဝဲလၢ ပှၤဟီၣ်ခိၣ်ဖိ ကသ့ၣ်ညါအီၤ. အဃိ လၢညါ ယဟိဝၤယွၤ ဒုးသ့ၣ်ညါ အခ့အပှၤ လၢအဂ့ၢ်အကျိၤခီဖျိ တၢ်မံမီၢ်, တၢ်ထံၣ်လၢညါခီ ဒီးအဆှၢလီၤ မူခိၣ်ကလူးလၢ ကတဲဖျါထီၣ်​ အတၢ်ကစီၣ်. (၄ မိၤၡ့ ၁၂:၆; မၤတၢ် ၁၀:၃, ၄) ဘၣ်ဆၣ်​ တၢ်မံမီၢ်, တၢ်ထံၣ်လၢညါခီ ဒီးတၢ်ကစီၣ်လၢ မူခိၣ်ကလူးတဲဖျါထီၣ်ဝဲတဖၣ်​ ပှၤမ့ၢ်တကွဲးလီၤအီၤဘၣ်န့ၣ်​ ပမၤလိဘၣ်တသ့ဘၣ်. အဃိ တၢ်လၢ ယဟိဝၤယွၤ ဘၣ်သးလၢ ပကသ့ၣ်ညါတဖၣ်န့ၣ်​ ယဟိဝၤယွၤ မၢပှၤ “ကွဲးလီၤအီၤလၢ လံာ်ပူၤ.” (ယံးရမံယၤ ၃၀:၂) တကးဒံးဘၣ်​ “တၢ်လၢယွၤလၢအမ့ၢ်အတီတဂၤ မၤဝဲခဲလၢာ်န့ၣ်​ လၢဝဲပှဲၤဝဲ” အဃိ အဒုးသ့ၣ်ညါပှၤအဂ့ၢ် ဒ်အံၤန့ၣ်​ အကဲဘျုးလၢ ပဂီၢ်ဖးဒိၣ်.—စံးထီၣ်ပတြၢၤ ၁၈:၃၀.

၃. ဒ်သိးဒီး လံာ်စီဆှံ ကအိၣ်တုၤလၢ ပစိၤခဲအံၤအဂီၢ် ယဟိဝၤယွၤ မၤဝဲဒ်လဲၣ်. (ယၡါယၤ ၄၀:၈)

^၃ ဖး ယၡါယၤ ၄၀:၈. ကစၢ်ယွၤကလုၢ်ကထါန့ၣ်​ ဟံးစုနဲၣ်ကျဲ ပှၤတီပှၤလိၤ အိၣ်အနံၣ်လၢ အကထိတဖၣ်လံ. ဘၣ်ဆၣ်လၢညါ ပှၤကွဲးလံာ်စီဆှံလၢ တၢ်လၢအတူၢ်တယံာ်ဘၣ်အလိၤ ဒ်သိးဒီး လံာ်ထူဒီးလံာ်က့ ဒီးအဟးဂီၤသ့. အဃိ လံာ်စီဆှံလၢ ပှၤကွဲးအီၤလၢအခီၣ်ထံးတဖၣ်န့ၣ်​ တအိၣ်တုၤလၢ ပစိၤခဲအံၤဘၣ်. နာ်က့ ဘၣ်မနုၤအဃိ ပတဲလၢ လံာ်စီဆှံန့ၣ်​ အဟံးစုနဲၣ်ကျဲပှၤ အိၣ်အနံၣ်လၢ အကထိတဖၣ်လံလဲၣ်. ပတဲဒ်န့ၣ်​ ခီဖျိလၢ ယဟိဝၤယွၤမၤဝဲ ဒ်သိးဒီး ပှၤကကွဲးကူလံာ်စီဆှံ အဃိ လံာ်စီဆှံ အိၣ်ဒံးတုၤလၢ ပစိၤခဲအံၤ. ပှၤကွဲးကူလံာ်စီဆှံတဖၣ်န့ၣ်​ ကဲပှၤတလၢတပှဲၤဘၣ်​ နာ်က့ အဝဲသ့ၣ်ကျဲးစၢးကွဲးကူဝဲ လီၤတံၢ်လီၤဆဲး. ဘၣ်ဃးဒီး လံာ်စီဆှံလၢ ဧ့ၤဘြံၤကျိာ်တကတြူၢ်န့ၣ်​ ပှၤကူၣ်ဘၣ်ကူၣ်သ့လၢ လံာ်စီဆှံတကပၤတဂၤ တဲဝဲလၢ “လံာ်လၢပျၢၤလၢ ပှၤကွဲးကူက့ၤအီၤ လီၤတံၢ်ဒ်သိးဒီး လံာ်စီဆှံလၢ ဧ့ၤဘြံၤကျိာ်တကတြူၢ်န့ၣ်​ တအိၣ်နီတဘ့ၣ်ဘၣ်.” လံာ်စီဆှံန့ၣ်​ ပှၤကွဲးအီၤဖၣ်ယံာ်လံ. ပှၤကွဲးအီၤလၢ လံာ်ထူလၢအဟးဂီၤသ့ ဒီးပှၤကွဲးကူတၢ်တဖၣ်​ ကဲပှၤတလၢတပှဲၤဘၣ်. နာ်က့ ယဟိဝၤယွၤန့ၣ်​ အကဲပှၤလၢ အဒုးအိၣ်ထီၣ်လံာ်စီဆှံ. အဃိ တၢ်ဂ့ၢ်လၢ ပဖးဘၣ်လၢလံာ်စီဆှံပူၤ လၢဆၢကတီၢ်ခဲအံၤန့ၣ်​ ပနာ်သပှၢ်တၢၢ်လၢ အကဲဒံးဝဲ ယဟိဝၤယွၤ အတၢ်ဆိကမိၣ်.

၄. လၢတၢ်မၤလိအံၤ ပကတဲသကီး တၢ်မနုၤလဲၣ်.

^၄ ယဟိဝၤယွၤ ဟ့ၣ်ပှၤ “တၢ်ဟ့ၣ်လၢအဂ့ၤ ဒီးတၢ်ဟ့ၣ်လၢအလၢအပှဲၤ ခဲလၢာ်.” (ယၤကိာ် ၁:၁၇) လံာ်စီဆှံန့ၣ်​ အကဲဝဲ တၢ်ဟ့ၣ်အဂ့ၤကတၢၢ်လၢ ယဟိဝၤယွၤဟ့ၣ်ပှၤ. အဒိ ပှၤတဂၤမ့ၢ်ဟ့ၣ်ပှၤ တၢ်ဟ့ၣ်တခါခါန့ၣ်​ ပသ့ၣ်ညါဘၣ်လၢ ပှၤတဂၤအံၤ အသ့ၣ်ညါပှၤ ဒီးသ့ၣ်ညါ ပတၢ်လိၣ်ဘၣ်ဂ့ၤဂ့ၤ. ယဟိဝၤယွၤ ဟ့ၣ်ပှၤလံာ်စီဆှံအဃိ ပမ့ၢ်ဖးလံာ်စီဆှံန့ၣ်​ ပသ့ၣ်ညါထီၣ်ဘၣ်အဂ့ၢ်, ပသ့ၣ်ညါဘၣ်လၢ အသ့ၣ်ညါပှၤ ဒီးအသ့ၣ်ညါ ပတၢ်လိၣ်ဘၣ်ဂ့ၤဂ့ၤ. ဒီးလၢတၢ်မၤလိအံၤန့ၣ်​ ပကတဲသကီး ဘၣ်ဃးဒီး လံာ်စီဆှံ ပာ်ဖျါထီၣ်​ ယဟိဝၤယွၤ အတၢ်ကူၣ်သ့, အတၢ်တီတၢ်လိၤ ဒီးအတၢ်အဲၣ်ဒ်လဲၣ်. ခဲအံၤ ပကတဲသကီးဆိ လံာ်စီဆှံ ပာ်ဖျါထီၣ်​ ယဟိဝၤယွၤ အတၢ်ကူၣ်သ့ ဒ်လဲၣ်.

လံာ်စီဆှံ ပာ်ဖျါထီၣ်​ ကစၢ်ယွၤအတၢ်ကူၣ်သ့

၅. လံာ်စီဆှံ ပာ်ဖျါထီၣ်​ ကစၢ်ယွၤ အတၢ်ကူၣ်သ့ဒ်လဲၣ်.

^၅ ယဟိဝၤယွၤ သ့ၣ်ညါဝဲလၢ ပလိၣ်ဘၣ်​ အတၢ်ဟံးစုနဲၣ်ကျဲ. အဃိ ယဟိဝၤယွၤ ဟ့ၣ်ပှၤလံာ်စီဆှံ လၢအအိၣ်ဒီး အတၢ်ကူၣ်သ့အါမး. လံာ်စီဆှံ အတၢ်ဟ့ၣ်ကူၣ်န့ၣ်​ မၤစၢၤပှၤအါဂၤ ဒီးဆီတလဲပှၤတၢ်အိၣ်မူ. လၢညါ ဖဲစီၤမိၤၡ့ ကွဲးဝဲလံာ်မိၤၡ့ဝံၤအခါ အတဲဘၣ်​ ပှၤအံၣ်စရ့လးဖိတဖၣ်လၢ “တၢ်ကတိၤတဖၣ်အံၤ တမ့ၢ် တၢ်ကလီကလီဘၣ်, အမ့ၢ်ဝဲ တၢ်လၢအကဟ့ၣ်သု တၢ်မူ.” (၅ မိၤၡ့ ၃၂:၄၇) အဃိ ပှၤလၢအကနၣ်ဒီးမၤထွဲ လံာ်စီဆှံ အတၢ်ဟ့ၣ်ကူၣ်န့ၣ်​ အဝဲသ့ၣ်​ မၤတၢ်ကဲထီၣ်ဂ့ၤဂ့ၤ ဒီးအဝဲသ့ၣ်အိၣ်ဒီး တၢ်သးခုလၢအတၢ်အိၣ်မူပူၤ. (စံးထီၣ်ပတြၢၤ ၁:၂, ၃) လံာ်စီဆှံန့ၣ်​ ပှၤကွဲးအီၤဖၣ်ယံာ်လံ နာ်က့ အဘျုးအိၣ်လၢ ဆၢကတီၢ်ခဲအံၤဒံး ဒီးအမၤဂ့ၤထီၣ်​ ပှၤအါဂၤအတၢ်အိၣ်မူ. အဒိ လၢ jw.org အပူၤန့ၣ်​ တၢ်ဂ့ၢ်ပိာ်ထွဲလိာ်အခံ လၢအခိၣ်တီမ့ၢ်ဝဲ “လံာ်စီဆှံဆီတလဲ ပတၢ်အိၣ်မူ” လၢကီၤလၤဝါကျိာ်န့ၣ်​ အိၣ်ဒီး ပှၤအဂၤ ၅၀ ဘျဲၣ်​ အတၢ်လဲၤခီဖျိ. ပှၤတဖၣ်အံၤ မၤထွဲဝဲ လံာ်စီဆှံ အတၢ်ဟ့ၣ်ကူၣ်အဃိ အဝဲသ့ၣ်​ ဆီတလဲအသးန့ၢ်. အဃိ ပသ့ၣ်ညါဘၣ်လၢ လံာ်စီဆှံန့ၣ်အ “မၤတၢ်လၢ . . . ပှၤစူၢ်က့ၤနာ်က့ၤတၢ်တဖၣ်​ အပူၤ” သ့နီၢ်ကီၢ်.—၁ သ့းစၤလနံ ၂:၁၃.

၆. ဘၣ်မနုၤအဃိ လံာ်စီဆှံန့ၣ်​ တဒ်သိးဒီး လံာ်အဂၤဘၣ်လဲၣ်.

^၆ ပှၤလၢအဒုးအိၣ်ထီၣ်​ လံာ်စီဆှံန့ၣ်​ အကဲဝဲ ယဟိဝၤယွၤ. ယဟိဝၤယွၤန့ၣ်​ အသ့တၢ်လၢာ်, အအိၣ်လီၤထူလီၤယိာ် ဒီးအကူၣ်တၢ်သ့ဒိၣ်န့ၢ်ဒံး ပှၤခဲလၢာ်. အဃိ လံာ်ဒ်သိးဒီး ကစၢ်ယွၤ ကလုၢ်ကထါန့ၣ်​ တအိၣ်နီတဘ့ၣ်ဘၣ်. လံာ်တနီၤန့ၣ်​ အကစၢ်သံဖၣ်ယံာ်လံ နာ်က့ ပှၤဆဲးဖးအလံာ်ဒံး. လၢခံယံာ်ထီၣ်ဘျီ အတၢ်ဟ့ၣ်ကူၣ်လၢလံာ်ပူၤန့ၣ်​ ပှၤသူအီၤတသ့လၢၤဘၣ်. မ့မ့ၢ် လံာ်စီဆှံ အတၢ်ဟ့ၣ်ကူၣ်န့ၣ်​ တၢ်ဆၢကတီၢ် မ့ၢ်ပူၤကွံာ် တစိၤဝံၤတစိၤနာ်က့ အကဲဘျုးဒံး. အဃိ ဖဲပဖးလံာ်စီဆှံ ဒီးဆိမိၣ်ထံ တၢ်ဂ့ၢ်လၢပဖးအခါ ယဟိဝၤယွၤ သူဝဲအသးစီဆှံ လၢကမၤစၢၤပှၤ ဒ်သိးဒီး ပကမၤထွဲ လံာ်စီဆှံ အတၢ်ဟ့ၣ်ကူၣ်လၢ ပတၢ်အိၣ်မူပူၤ. (စံးထီၣ်ပတြၢၤ ၁၁၉:၂၇; မၤလကံ ၃:၁၆; ဧ့ၤဘြံၤ ၄:၁၂) ယဟိဝၤယွၤ လၢအဒုးအိၣ်ထီၣ်​ လံာ်စီဆှံန့ၣ်​ ဘၣ်သးမၤစၢၤပှၤ သပှၢ်တၢၢ်. ပသ့ၣ်ညါဘၣ်​ ဒ်အံၤအဃိ မၤစၢၤပှၤလၢ ပဘၣ်သးဖး လံာ်စီဆှံထီဘိ.

၇. လံာ်စီဆှံမၤစၢၤ ကစၢ်ယွၤအပှၤဂီၢ်မုၢ် လၢညါဒ်လဲၣ်.

^၇ လံာ်စီဆှံအိၣ်ဒီး ယဟိဝၤယွၤ အတၢ်ကူၣ်သ့န့ၣ်​ ပထံၣ်ဘၣ်​ တၢ်အုၣ်သး လၢအဂၤတခါဒံး. အဒိ လံာ်စီဆှံမၤစၢၤဝဲ ကစၢ်ယွၤအပှၤဂီၢ်မုၢ် ဒ်သိးအဝဲသ့ၣ်​ ကအိၣ်ဘၣ်​ ဃူဃူဖိးဖိး. ဖဲပှၤအံၣ်စရ့လးဖိတဖၣ်​ နုာ်လီၤအိၣ်လၢ ကီၢ်တၢ်စံးပာ်အခါ ခီဖျိလၢ တၢ်လီၢ်လဲၢ်မးအဃိ အဝဲသ့ၣ်လဲၤအိၣ်ဝဲ လၢအံၤတဒူၣ်​ လၢန့ၣ်တဒူၣ်. အဝဲသ့ၣ်တနီၤန့ၣ်​ မၤအီၣ်ညၣ်, တနီၤန့ၣ်ဘုၣ်ကျီၢ် ဒီးအဂၤတနီၤန့ၣ်​ သူၣ်အီၣ်ဖျးအီၣ်တၢ်. ပှၤအံၣ်စရ့လးဖိ တဒူၣ်ဘၣ်တဒူၣ်န့ၣ်​ အိၣ်လၢ အကစၢ် တၢ်လီၢ်တၢ်ကျဲအဃိ ပှၤအံၣ်စရ့လးဖိအဒူၣ်​ လၢအဂၤတဖၣ်​ မၤဒ်လဲၣ်အီၣ်ဒ်လဲၣ်န့ၣ်​ ဘၣ်သ့ၣ်သ့ၣ်​ အဝဲသ့ၣ်​ တနီၣ်ဘၣ်လိာ်သးဘၣ်. အဃိ ယဟိဝၤယွၤ ရဲၣ်ကျဲၤဝဲလၢ ပှၤအံၣ်စရ့လးဖိတဖၣ်​ ကဟဲထံၣ်ဖှိၣ်လိာ်သး ဒ်သိးဒီး ကနၢ်ဟူဘၣ်​ ပှၤဖးဒီးတဲပၠးအဝဲသ့ၣ်လၢ ကစၢ်ယွၤကလုၢ်ကထါ. (၅ မိၤၡ့ ၃၁:၁၀-၁၃; နဃ့မယၤ ၈:၂, ၈, ၁၈) ထံၣ်တမှံကွၢ် ဖဲပှၤအံၣ်စရ့လးဖိ လၢအသးတီတဂၤ လဲၤတုၤလၢ ဝ့ၢ်ယရူၤၡလ့ၣ်​ ဒီးအထံၣ်ဘၣ်​ ပှၤအံၣ်စရ့လးဖိ လၢအကကွဲၢ် ဟဲဘူၣ်ထီၣ်ဘါထီၣ်​ ယဟိဝၤယွၤ တပူၤဃီဒီးအီၤအခါ အကသးခုထဲလဲၣ်. ယဟိဝၤယွၤ ရဲၣ်ကျဲၤဝဲ ဒ်အံၤအဃိ အဝဲသ့ၣ်အိၣ်ဘၣ်​ ဃူဃူဖိးဖိး. လၢခံ ဖဲခရံာ်ဖိတၢ်အိၣ်ဖှိၣ်​ အိၣ်ထီၣ်အခါ လၢတၢ်အိၣ်ဖှိၣ်ပူၤန့ၣ်​ ပှၤအိၣ်ဝဲအကလုာ်ကလုာ်. အဝဲသ့ၣ်​ တဲကျိာ်တဒ်သိးဘၣ်, တနီၤန့ၣ်ကဲဒိၣ်​ ဒီးတနီၤန့ၣ်အဖှီၣ်. ဘၣ်ဆၣ်​ ခီဖျိလၢ အဝဲသ့ၣ်ခဲလၢာ်န့ၣ်​ အဲၣ်ကစၢ်ယွၤကလုၢ်ကထါ အဃိ အဝဲသ့ၣ်​ ဘူၣ်ထီၣ်ဘါထီၣ်​ ကစၢ်ယွၤလၢအမ့ၢ်အတီ ဒီးအဝဲသ့ၣ်အိၣ်ဃူဃူဖိးဖိး. ပှၤလၢအကဲထီၣ်​ ပှၤစူၢ်က့ၤနာ်က့ၤတၢ်န့ၣ်​ ခီဖျိလၢ ဒီပုၢ်ဝဲၢ်မုၣ်ခွါမၤစၢၤအဝဲသ့ၣ်​ ဒီးအဝဲသ့ၣ်​ ထီၣ်သကီးတၢ်အိၣ်ဖှိၣ်​ တပူၤဃီအဃိ အဝဲသ့ၣ်နၢ်ပၢၢ်ထီၣ်​ ကစၢ်ယွၤကလုၢ်ကထါ.—မၤတၢ် ၂:၄၂; ၈:၃၀, ၃၁.

၈. လံာ်စီဆှံမၤစၢၤ ကစၢ်ယွၤအပှၤဂီၢ်မုၢ် လၢဆၢကတီၢ်ခဲအံၤဒ်လဲၣ်.

^၈ ပကစၢ်ယွၤလၢ အကူၣ်တၢ်သ့ဒိၣ်ကတၢၢ်န့ၣ်​ အသူဝဲလံာ်စီဆှံလၢ ကသိၣ်လိ ဒီးမၤစၢၤအပှၤဂီၢ်မုၢ်လၢ ကအိၣ်ဃူအိၣ်ဖိး. တကးဒံးဘၣ်​ လံာ်စီဆှံ ပာ်ဖျါထီၣ်န့ၢ်ပှၤ တၢ်မ့ၢ်တၢ်တီ ဘၣ်ဃးဒီး ယဟိဝၤယွၤအဂ့ၢ်. ဒီးယဟိဝၤယွၤ သူဝဲလံာ်စီဆှံ ဒ်သိးပ ‘ကဘူၣ်ထီၣ်ဘါထီၣ်အီၤ ဃူဃူဖိးဖိး.’ (စဖါနယၤ ၃:၉) အဃိ ဒ်သိးပကနၢ်ဟူဘၣ်​ ပှၤဖးလံာ်စီဆှံ, ပှၤၡဲပၠးလံာ်စီဆှံအဆၢ ဒီးတဲသကီးလံာ်စီဆှံအဂီၢ် ပလဲၤထံၣ်ဖှိၣ်လိာ်သးလၢ တၢ်အိၣ်ဖှိၣ်လီၢ်, ကဝီၤတၢ်အိၣ်ဖှိၣ်​ ဒီးတၢ်အိၣ်ဖှိၣ်ဖးဒိၣ်မၢ်မၢ်.

၉. ပကနၢ်ပၢၢ် လံာ်စီဆှံအဂီၢ် ပကဘၣ်အိၣ်ဒီး တၢ်ပာ်သူၣ်ပာ်သးဒ်လဲၣ်. (လူၤကၣ်​ ၁၀:၂၁)

^၉ ပကကွၢ် တၢ်အုၣ်သးလၢအသီတခါ လၢအဘၣ်ဃးဒီး ယဟိဝၤယွၤ အတၢ်ကူၣ်သ့. ကစၢ်ယွၤ မၢပှၤကွဲး လံာ်စီဆှံ ဒ်သိးဒီး ပှၤကဖးဘၣ်ဝဲ ကီးဂၤဒဲး. နာ်က့ ထဲဒၣ်​ ပှၤဆီၣ်လီၤသးတဖၣ်​ နၢ်ပၢၢ်ဝဲ လံာ်စီဆှံ. (ဖး လူၤကၣ်​ ၁၀:၂၁.) ပှၤကူၣ်ဘၣ်ကူၣ်သ့လၢ လံာ်စီဆှံတကပၤတဂၤ တဲဝဲလၢ လံာ်စီဆှံန့ၣ်​ “အကဲလံာ်တဘ့ၣ်လၢ ပှၤဖးအီၤအါကတၢၢ် ဒီးပှၤဖးအီၤလီၤတံၢ်ဒိၣ်န့ၢ်ဒံး လံာ်အဂၤ.” နာ်က့ တၢ်လၢလံာ်စီဆှံ တဲဝဲန့ၣ်​ ထဲဒၣ်​ ပှၤဆီၣ်လီၤသးတဖၣ်​ နၢ်ပၢၢ်ဝဲ ဒီးမၤထွဲဝဲ.—၂ ကရံၣ်သူး ၃:၁၅, ၁၆.

၁၀. ယဟိဝၤယွၤ အိၣ်ဒီးတၢ်ကူၣ်သ့န့ၣ်​ လံာ်စီဆှံပာ်ဖျါထီၣ်န့ၢ်ပှၤ တၢ်အုၣ်သး မနုၤဒံးလဲၣ်.

^၁၀ ယဟိဝၤယွၤ အိၣ်ဒီးတၢ်ကူၣ်သ့န့ၣ်​ လံာ်စီဆှံပာ်ဖျါထီၣ်န့ၢ်ပှၤ တၢ်အုၣ်သးလၢ အဂၤတခါဒံး. ယဟိဝၤယွၤ ဟ့ၣ်ပှၤလံာ်စီဆှံလၢ ကသိၣ်လိအပှၤဂီၢ်မုၢ်. တကးဒံးဘၣ်​ အသိၣ်လိ ဒီးအမၤမုာ်ထီၣ်ပသး တဂၤဘၣ်တဂၤ. အဃိ ဖဲပဖးလံာ်စီဆှံအခါ ပသ့ၣ်ညါဘၣ်လၢ ယဟိဝၤယွၤ သးအိၣ်ပဝဲ တဂၤဘၣ်တဂၤ. (ယၡါယၤ ၃၀:၂၁) အဒိ ဖဲနထံၣ်ဘၣ်​ တၢ်ကီတၢ်ခဲအခါ နအိးထီၣ်ဖးလံာ်စီဆှံ ဒီးနထံၣ်ဘၣ်လၢ လံာ်စီဆှံတဆၢအံၤ ပှၤကွဲးန့ၢ်လၢနဂီၢ်လီၤန့ၣ်​ ဘၣ်သ့ၣ်သ့ၣ်​ ကအိၣ်တဘျုးဘျီညါ. တကးဒံးဘၣ်​ လံာ်စီဆှံန့ၣ်​ အကဲဘျုးလၢ ပှၤလၢအကကွဲၢ်တဖၣ်အဂီၢ်. ဒီးပှၤလၢအဒုးအိၣ်ထီၣ်​ လံာ်စီဆှံတဂၤန့ၣ်​ အကဲပှၤကူၣ်တၢ်သ့ဒိၣ်ကတၢၢ် လၢမူခိၣ်ဟီၣ်ခိၣ်. အဃိ လံာ်စီဆှံ ကကဲဘျုး လၢနဂီၢ် ဖဲလဲၣ်တဆၢလဲၣ်​ ဒီးနလိၣ်ဘၣ်အီၤ အဒိၣ်ကတၢၢ် လၢအဆၢကတီၢ်ဖဲလဲၣ်န့ၣ်​ အသ့ၣ်ညါဝဲ.—၂ တံၤမသ့း ၃:၁၆, ၁၇.

လံာ်စီဆှံ ပာ်ဖျါထီၣ်​ ကစၢ်ယွၤအတၢ်တီတၢ်လိၤ

၁၁. ကစၢ်ယွၤ တကွၢ်ဒိၣ်ဆံးအါစှၤတၢ်ဘၣ်န့ၣ်​ ပသ့ၣ်ညါဒ်လဲၣ်.

^၁၁ ယဟိဝၤယွၤ အတၢ်ဂ့ၤတၢ်ဝါ လၢအဂၤတခါန့ၣ်​ ကဲဝဲ တၢ်တီတၢ်လိၤ. (၅ မိၤၡ့ ၃၂:၄) ပှၤလၢအတီအလိၤန့ၣ်​ တကွၢ်ဒိၣ်ဆံးအါစှၤတၢ်ဘၣ်. ယဟိဝၤယွၤန့ၣ်​ အကဲပှၤလၢ အတီအလိၤအဃိ အတကွၢ်ဒိၣ်ဆံးအါစှၤတၢ်ဘၣ်. (မၤတၢ် ၁၀:၃၄, ၃၅; ရိမ့ၤ ၂:၁၁) ဖဲပှၤကွဲး လံာ်စီဆှံအခါ ယဟိဝၤယွၤ မၢပှၤကွဲးဝဲလၢ ကျိာ်လၢပှၤအါဂၤတဲဝဲ. အဃိ ပသ့ၣ်ညါဘၣ်လၢ ယဟိဝၤယွၤန့ၣ်​ တကွၢ်ဒိၣ်ဆံးအါစှၤတၢ်ဘၣ်. လၢညါ ကစၢ်ယွၤ အပှၤဂီၢ်မုၢ်တဖၣ်​ နၢ်ပၢၢ်လၢ ဧ့ၤဘြံၤကျိာ်အဃိ လံာ်စီဆှံအဆိကတၢၢ် ၃၉ ကတြူၢ်န့ၣ်​ ပှၤကွဲးဝဲ အါတက့ၢ်လၢ ဧ့ၤဘြံၤကျိာ်. ဘၣ်ဆၣ်​ တုၤလီၤလၢ တၢ်မၢဖိအစိၤန့ၣ်​ ပှၤအါတက့ၢ် နၢ်ပၢၢ်ဝဲလၢ ကြံးကျိာ်အဃိ လံာ်စီဆှံ အလီၢ်ခံကတၢၢ် ၂၇ ကတြူၢ်န့ၣ်​ ပှၤကွဲးဝဲလၢကြံးကျိာ်. အဃိ ပထံၣ်ဘၣ်လၢ ယဟိဝၤယွၤ တမၢပှၤကွဲး လံာ်စီဆှံ ထဲကျိာ်တခါဘၣ်. ဆၢကတီၢ်ခဲအံၤ ပှၤဟီၣ်ခိၣ်ဖိအနီၣ်ဂံၢ် အိၣ်ဝဲဘူးထီၣ်လၢ အကကွဲၢ် ဃီးကထိညါ ဒီးအဝဲသ့ၣ်​ တဲကျိာ်အကလုာ်ကလုာ်. အဃိ အဝဲသ့ၣ်​ သ့ၣ်ညါထီၣ်​ ယဟိဝၤယွၤအဂ့ၢ် ကသ့ဒ်လဲၣ်.

၁၂. ဒၤနံးယ့လး ၁၂:၄ ဟဲလၢပှဲၤထီၣ်​ ဖဲတၢ်အကတၢၢ် အဆၢကတီၢ် ဒ်လဲၣ်.

^၁၂ ယဟိဝၤယွၤ တဲဘၣ်ဝံဒၤနံးယ့လး ဒီးအၢၣ်လီၤဝဲလၢ ဖဲတၢ်အကတၢၢ် အဆၢကတီၢ် “တၢ်သ့ၣ်ညါတၢ်မ့ၢ်တၢ်တီ” ဘၣ်ဃးဒီး လံာ်စီဆှံန့ၣ်​ “ကအါထီၣ်ဝဲ.” (ဖး ဒၤနံးယ့လး ၁၂:၄.) တၢ်သ့ၣ်ညါ တၢ်မ့ၢ်တၢ်တီ ဘၣ်ဃးဒီး လံာ်စီဆှံ အါထီၣ်ဝဲ ခီဖျိလၢ ပှၤကွဲးကျိာ်ထံ လံာ်စီဆှံ ဒီးလံာ်လဲၢ်လၢ အသန့ၤထီၣ်သးလၢ လံာ်စီဆှံ. ဘၣ်ဆၣ်​ လံာ်စီဆှံန့ၣ်​ မ့ၢ်ဝဲလံာ်တဘ့ၣ်လၢ ပှၤကွဲးကျိာ်ထံ ဒီးထုးထီၣ်ရၤလီၤအီၤ အါကတၢၢ်. နာ်က့ လံာ်စီဆှံလၢ တၢ်ကရၢကရိတနီၤ ထုးထီၣ်ဝဲန့ၣ်​ အပှ့ၤဒိၣ်မး. မ့မ့ၢ် ယဟိဝၤပှၤအုၣ်အသးတဖၣ်န့ၣ်​ အဝဲသ့ၣ်​ ထုးထီၣ်ရၤလီၤဝဲ လံာ်စီဆှံဒီဘ့ၣ်​ မ့တမ့ၢ် အကတြူၢ်တနီၤ လၢကျိာ် ၂၄၀ ဘျဲၣ်ညါ. ပှၤမ့ၢ်လီကီဝဲန့ၣ်​ ပှၤဟံန့ၢ်ဝဲသ့ကီးဂၤဒဲး ဒီးတလိၣ်ဟ့ၣ်အပှ့ၤဘၣ်. ယဟိဝၤပှၤအုၣ်အသးတဖၣ်​ မၤဝဲဒ်အံၤအဃိ တချုး တၢ်အကတၢၢ် ဟဲဒံးဘၣ်န့ၣ်​ ပှၤကိးကလုာ်ဒဲး သ့ၣ်ညါဘၣ်ဝဲ “ဘီမုၢ်တၢ်သးခုကစီၣ်” အဂ့ၢ်သ့. (မးသဲ ၂၄:၁၄) ပထံၣ်ဘၣ်လၢ ပကစၢ်ယွၤန့ၣ်​ အကဲပှၤတီပှၤလိၤ အဃိ အအဲၣ်ပှၤကီးဂၤဒဲး. တကးဒံးဘၣ်​ အဘၣ်သးဟ့ၣ်​ ပှၤကီးဂၤဒဲး တၢ်ခွဲးတၢ်ယာ်လၢ ကသ့ၣ်ညါဘၣ်အဂ့ၢ် လၢလံာ်စီဆှံအပူၤ.

လံာ်စီဆှံ ပာ်ဖျါထီၣ်​ ကစၢ်ယွၤအတၢ်အဲၣ်

၁၃. ကစၢ်ယွၤ အဲၣ်ပှၤဒိၣ်မးန့ၣ်​ လံာ်စီဆှံ ပာ်ဖျါထီၣ်ဝဲဒ်လဲၣ်. (ယိၤဟၣ်​ ၂၁:၂၅)

^၁၃ လံာ်စီဆှံ ပာ်ဖျါထီၣ်န့ၢ်ပှၤ ကစၢ်ယွၤ အတၢ်ဂ့ၤတၢ်ဝါ အရ့ဒိၣ်ကတၢၢ် တခါန့ၣ်​ မ့ၢ်ဝဲတၢ်အဲၣ်တၢ်ကွံ. (၁ ယိၤဟၣ်​ ၄:၈) ဆိမိၣ်ကွၢ်မီၤ ဒ်သိးဒီး ပကကဲထီၣ်​ ကစၢ်ယွၤ အသကီး, ပကအိၣ်ဒီး တၢ်သးခု ဒီးပကန့ၢ်ဘၣ်​ တၢ်မူထူယိာ်အဂီၢ် ကစၢ်ယွၤ မၢပှၤကွဲးလီၤထဲ တၢ်ဂ့ၢ်လၢ ပဘၣ်သ့ၣ်ညါတဖၣ်လီၤ. ခီဖျိလၢ ကစၢ်ယွၤ အဲၣ်ပှၤဒိၣ်မးအဃိ တၢ်ဂ့ၢ်လၢ ပတလိၣ်သ့ၣ်ညါဘၣ်န့ၣ်​ အတမၢပှၤကွဲးလီၤဝဲဘၣ်.—ဖး ယိၤဟၣ်​ ၂၁:၂၅.

၁၄. တၢ်ဂ့ၢ်လၢ လံာ်စီဆှံပူၤန့ၣ်​ ပာ်ဖျါထီၣ်လၢ ကစၢ်ယွၤအဲၣ်ပှၤဒ်လဲၣ်.

^၁၄ ယဟိဝၤယွၤအဲၣ်ပှၤန့ၣ်​ အပာ်ဖျါထီၣ်ဝဲခီဖျိ အရ့ဒီးပှၤလၢ တၢ်ပာ်ကဲ. လၢလံာ်စီဆှံပူၤန့ၣ်​ ပထံၣ်ဘၣ်လၢ ယဟိဝၤယွၤ ဟ့ၣ်ပှၤတၢ်သိၣ်တၢ်သီဒီဒူၣ်​ ဘၣ်ဆၣ်​ အတဖီၣ်ဃံးပှၤ ဒီးမၢဆူၣ်ပှၤလၢ ပကဘၣ်မၤ ဒ်အံၤဒ်န့ၣ်ဘၣ်. လၢလံာ်စီဆှံပူၤန့ၣ်​ ယဟိဝၤယွၤ ပာ်ဖျါထီၣ်ဝဲ ပှၤတၢ်လဲၤခီဖျိနီၢ်ကီၢ်, ဝံအတၢ်စံးပာ်လၢ အမၤဆူၣ်ထီၣ်ပသး ဒီးတၢ်ဟ့ၣ်ကူၣ်​ လၢအကဲဘျုး ဒ်သိး ကမၤစၢၤပှၤလၢ ပကဆၢတဲာ်တၢ်လၢအဘၣ်. လံာ်စီဆှံ ပာ်ဖျါထီၣ်န့ၢ်ပှၤ တၢ်ဂ့ၢ်တဖၣ်အံၤအဃိ အမၤစၢၤပှၤလၢ ပကအဲၣ်​ ယဟိဝၤယွၤ လၢပသးဒီဖျၢၣ်​ ဒီးကနၣ်အကလုၢ်.

၁၅. (က) ယဟိဝၤယွၤ သးအိၣ်ပှၤန့ၣ်​ အပာ်ဖျါထီၣ်ဝဲဒ်လဲၣ်. (ခ) လၢတၢ်ဂီၤပူၤန့ၣ်​ ဒီပုၢ်ဝဲၢ်မုၣ်ဖိ, ဒီပုၢ်ဝဲၢ်ခွါ ဒီးဒီပုၢ်ဝဲၢ်မုၣ်သးပှၢ်တဂၤ ဆိကမိၣ်​ မတဂၤအဂ့ၢ်လဲၣ်. (၁ မိၤၡ့ ၃၉:၁, ၁၀-၁၂; ၂ စီၤပၤ ၅:၁-၃; လူၤကၣ်​ ၂:၂၅-၃၈)

^၁၅ လံာ်စီဆှံ ပာ်ဖျါထီၣ်ဝဲလၢ ယဟိဝၤယွၤန့ၣ်​ အသးအိၣ်ပှၤ ဖးဒိၣ်ညါ. ကစၢ်ယွၤသးအိၣ်ပှၤန့ၣ်​ ပသ့ၣ်ညါဘၣ်ခီဖျိ အပာ်ဖျါထီၣ်ဝဲ ပှၤအါဂၤအတၢ်တူၢ်ဘၣ်​ လၢလံာ်စီဆှံပူၤ. ပှၤလၢပဖးဘၣ်​ အဝဲသ့ၣ်အဂ့ၢ်လၢ လံာ်စီဆှံအပူၤန့ၣ်​ “အအိၣ်ဒီးတၢ်တူၢ်ဘၣ်​ ဒ်ပှၤအသိးလီၤ.” (ယၤကိာ် ၅:၁၇) တကးဒံးဘၣ်​ ပမ့ၢ်ဆိမိၣ်ထံ ယဟိဝၤယွၤ ရ့ဒီးပှၤဟီၣ်ခိၣ်ဖိ ဒ်လဲၣ်န့ၣ်​ ပကသ့ၣ်ညါအါထီၣ်လၢ “ယဟိဝၤယွၤန့ၣ်​ ပှဲၤဝဲဒီးတၢ်အဲၣ်​ တၢ်ကဟုကယာ် ဒီးတၢ်သးကညီၤ.”—ယၤကိာ် ၅:၁၁.

၁၆. ဖဲပဖး ဘၣ်ဃးဒီး ပှၤမၤကမၣ်တၢ်အဂ့ၢ် လၢလံာ်စီဆှံပူၤန့ၣ်​ ပသ့ၣ်ညါဘၣ်​ ယဟိဝၤယွၤ အဂ့ၢ်ဒ်လဲၣ်. (ယၡါယၤ ၅၅:၇)

^၁၆ ယဟိဝၤယွၤ အဲၣ်ပှၤန့ၣ်​ လံာ်စီဆှံပာ်ဖျါထီၣ်န့ၢ်ပှၤ တၢ်အုၣ်သးအဂၤအိၣ်ဒံး. ပမ့ၢ်မၤကမၣ်တၢ်နာ်က့ လံာ်စီဆှံအၢၣ်လီၤပှၤလၢ ကစၢ်ယွၤ တပာ်တ့ၢ်ပှၤဘၣ်. အဒိ ပှၤအံၣ်စရ့လးဖိ မၤကမၣ်​ ယဟိဝၤယွၤ တဘျီဝံၤတဘျီ. နာ်က့ ခီဖျိလၢ အဝဲသ့ၣ်​ ပီၢ်ယၢ်လီၤသးနီၢ်ကီၢ်အဃိ ယဟိဝၤယွၤ ပျၢ်ကွံာ်အဝဲသ့ၣ်တၢ်ကမၣ်. (ဖး ယၡါယၤ ၅၅:၇.) ခရံာ်ဖိလၢ တၢ်မၢဖိအစိၤစ့ၢ်ကီး သ့ၣ်ညါဝဲလၢ ကစၢ်ယွၤ အဲၣ်အဝဲသ့ၣ်​ နီၢ်ကီၢ်. အဃိန့ၣ်​ တၢ်မၢဖိပီလူးဟ့ၣ်ကူၣ်​ ဒီပုၢ်ဝဲၢ်မုၣ်ခွါတဖၣ်လၢ ပှၤတဂၤလၢ အမၤကမၣ်တၢ်ဖးဒိၣ်​ ဒီးပီၢ်ယၢ်လီၤသးနီၢ်ကီၢ်န့ၣ်​ အဝဲသ့ၣ်ကဘၣ်​ “ပျၢ်အတၢ်ကမၣ်​ လၢသးဒီဖျၢၣ်​ ဒီးမၤမုာ်ထီၣ်က့ၤအီၤ.” (၂ ကရံၣ်သူး ၂:၆, ၇; ၁ ကရံၣ်သူး ၅:၁-၅) ပှၤလၢ အဘူၣ်ထီၣ်ဘါထီၣ်​ ယဟိဝၤယွၤတဂၤ မ့ၢ်မၤကမၣ်တၢ်နာ်က့ ပသ့ၣ်ညါလၢ ယဟိဝၤယွၤ တပာ်တ့ၢ် အဝဲသ့ၣ်ဘၣ်. ယဟိဝၤယွၤ ကဘှီဘၣ်ထီၣ်အဝဲသ့ၣ်​ ဒီးမၤစၢၤအဝဲသ့ၣ်လၢ ကကဲထီၣ်က့ၤအသကီး. ပသ့ၣ်ညါဘၣ်​ ဒ်အံၤအဃိ ပသးမုာ်ထီၣ်ညါ. ဆၢကတီၢ်ခဲအံၤ ပှၤမၤကမၣ်တၢ်လၢ အပီၢ်ယၢ်လီၤသးန့ၣ်​ ယဟိဝၤယွၤ အၢၣ်လီၤလၢ အကမၤစၢၤအဝဲသ့ၣ်ဒ်န့ၣ်.—ယၤကိာ် ၄:၈-၁၀.

ပာ်လုၢ်ပာ်ပှ့ၤလံာ်စီဆှံ လၢအမ့ၢ် “တၢ်ဟ့ၣ်လၢအဂ့ၤ”

၁၇. ဘၣ်မနုၤအဃိ လံာ်စီဆှံန့ၣ်​ အကဲတၢ်ဟ့ၣ်လၢအဂ့ၤ ဒီးအထုးန့ၢ်ပသးလဲၣ်.

^၁၇ လံာ်စီဆှံန့ၣ်​ အကဲဝဲ ယဟိဝၤယွၤ အတၢ်ဟ့ၣ်တခါလၢ အဂ့ၤဒိၣ်မး ဒီးအလီၤဆီန့ၢ်လံာ်အဂၤ. ပမၤလိဘၣ်လၢ လံာ်စီဆှံ ပာ်ဖျါထီၣ်လၢ ကစၢ်ယွၤန့ၣ်​ အကူၣ်တၢ်သ့, အတီအလိၤ ဒီးအအဲၣ်ပှၤဖးဒိၣ်. တကးဒံးဘၣ်​ လံာ်စီဆှံပာ်ဖျါထီၣ်ဝဲလၢ ယဟိဝၤယွၤ ဘၣ်သးလၢ ပကသ့ၣ်ညါထီၣ်အဂ့ၢ် ဒီးကဲထီၣ်အသကီး.

၁၈. ပပာ်လုၢ်ပာ်ပှ့ၤ လံာ်စီဆှံလၢ အကဲ “တၢ်ဟ့ၣ်လၢအဂ့ၤ” ကသ့ဒ်လဲၣ်.

^၁၈ လံာ်စီဆှံန့ၣ်​ အကဲ “တၢ်ဟ့ၣ်လၢအဂ့ၤ” အဃိ ပကဘၣ်​ ပာ်လုၢ်ပာ်ပှ့ၤအီၤ ထီဘိ. (ယၤကိာ် ၁:၁၇) ပပာ်လုၢ်ပာ်ပှ့ၤ တၢ်ဟ့ၣ်လၢအဂ့ၤအံၤ သ့ခီဖျိ ပဖးဒီးဆိမိၣ်ထံ တၢ်ကွဲးအသး လၢလံာ်စီဆှံအပူၤ လီၤတံၢ်လီၤဆဲး. ပမ့ၢ်ကျဲးစၢးမၤ ဒ်န့ၣ်န့ၣ်​ ပသ့ၣ်ညါလၢ ကစၢ်ယွၤ လၢအဒုးအိၣ်ထီၣ်​ လံာ်စီဆှံန့ၣ်​ ကဆိၣ်ဂ့ၤပှၤ ဒီးပ “ကထံၣ်န့ၢ် တၢ်သ့ၣ်ညါ ဘၣ်ဃးဒီး ကစၢ်ယွၤ.”—ကတိၤဒိ ၂:၅.