ဂုာ်ကျဲးစၢး ဆိကမိၣ်တၢ်ဒ် ယဟိဝၤယွၤ ဒီးယ့ၣ်ၡူးအသိး

၁-၂. (က) ပကဘၣ်အဲၣ် ယဟိဝၤယွၤန့ၣ် အဲၣ်ဒိးတဲဝဲ အခီပညီဒ်လဲၣ်. (ခ) ယ့ၣ်ၡူး ပာ်ဖျါထီၣ်လၢ အအဲၣ်ယဟိဝၤယွၤ ဒ်လဲၣ်.

“နကဘၣ်အဲၣ် နကစၢ် ယဟိဝၤယွၤ လၢနသးဒီဖျၢၣ်, လၢနတၢ်အိၣ်မူ ကိးသနၢၣ်ဒဲးအပူၤ, လၢနဂံၢ်နဘါခဲလၢာ်, လၢနတၢ်ကူၣ်တၢ်ဆးခဲလၢာ်.” (လူၤ ၁၀:၂၇) ယ့ၣ်ၡူး သ့ၣ်ညါဝဲလၢ တၢ်မၤလိာ်လၢ အအိၣ်လၢ စီၤမိၤၡ့အတၢ်သိၣ်တၢ်သီအံၤ မ့ၢ်တၢ်မၤလိာ်လၢ အရ့ဒိၣ်ကတၢၢ်. အဃိ ပအဲၣ် ယဟိဝၤယွၤ လၢပသးဒီဖျၢၣ်န့ၣ် အပၣ်ဃုာ်ဒီး ပတၢ်သူၣ်လီသးကွံ ဒီးပသးအတၢ်တူၢ်ဘၣ်. တကးဒံးဘၣ် အပၣ်ဃုာ်ဒီး ပအဲၣ်ယဟိဝၤယွၤ လၢပတၢ်အိၣ်မူ ကိးသနၢၣ်ဒဲး ဒီးပတၢ်ဂံၢ်တၢ်ဘါခဲလၢာ်. ဘၣ်ဆၣ် အကဘၣ် ပၣ်ဃုာ်စ့ၢ်ကီးဒီး ပတၢ်ကူၣ်တၢ်ဆး လၢအမ့ၢ် တၢ်လၢ ပဆိကမိၣ်အီၤခဲလၢာ်. ယဟိဝၤယွၤ အတၢ်ဆိကမိၣ် အိၣ်ဒ်လဲၣ်န့ၣ် ပနၢ်ပၢၢ်အီၤ တသ့ခဲလၢာ်ဘၣ်. သနာ်က့ ပမ့ၢ်အဲၣ်ဒိး သ့ၣ်ညါနၢ်ပၢၢ်အါထီၣ် ယဟိဝၤယွၤ အတၢ်ဆိကမိၣ်န့ၣ် ပကဘၣ်အိၣ်ဒီး “ခရံာ်အသး,” မ့ၢ်လၢ ယ့ၣ်ၡူးခရံာ်န့ၣ် အဆိကမိၣ်တၢ် ဒ်အပါအသိးထီဘိ.—၁ ကရံၣ် ၂:၁၆.

^၂ ယ့ၣ်ၡူးန့ၣ် အအဲၣ်ယဟိဝၤယွၤ လၢအတၢ်ကူၣ်တၢ်ဆး ခဲလၢာ်. ယ့ၣ်ၡူးသ့ၣ်ညါဝဲ အပါတၢ်ဘၣ်သး ဒီးဒ်သိး အကမၤလၢပှဲၤ အပါတၢ်ဘၣ်သးအဂီၢ် အကထံၣ်ဘၣ် တၢ်မၤနးမၤဖှီၣ် သနာ်က့ အပာ်လီၤသး ဂၢၢ်ဂၢၢ်ကျၢၤကျၢၤလၢ အကမၤလၢပှဲၤဝဲဒံး. ဒီးခီဖျိလၢ အပာ်လီၤသး ဒ်န့ၣ်အဃိ အတပျဲလၢ တၢ်ကမၤတံာ်တာ်အီၤ နီတမံၤဘၣ်.

၃. စီၤပ့းတရူး မၤလိန့ၢ်တၢ်လၢ ယ့ၣ်ၡူးအအိၣ်ဒ်လဲၣ် ဒီးစီၤပ့းတရူး ဟ့ၣ်ဂံၢ်ဟ့ၣ်ဘါ ခရံာ်ဖိတဖၣ်လၢ ကမၤမနုၤလဲၣ်. (၁ ပ့းတရူး ၄:၁)

^၃ စီၤပ့းတရူး ဒီးတၢ်မၢဖိအဂၤတဖၣ် န့ၢ်ဘၣ်တၢ်ခွဲးတၢ်ယာ်လၢ ကရ့ဘၣ်ဒီး ယ့ၣ်ၡူးဘူးဘူးတံၢ်တံၢ် အဃိ ယ့ၣ်ၡူး ဆိကမိၣ်တၢ် ဒ်လဲၣ်န့ၣ် အဝဲသ့ၣ် သ့ၣ်ညါဘၣ်ဝဲ. ဖဲစီၤပ့းတရူး ကွဲးလံာ် အဆိကတၢၢ်တဘ့ၣ်အခါ အဟ့ၣ်ဂံၢ်ဟ့ၣ်ဘါ ခရံာ်ဖိတဖၣ်လၢ ကအိၣ်ကတဲာ်ကတီၤသးလၢ ကအိၣ်ဒီး တၢ်ပာ်သူၣ်ပာ်သးဒ် ခရံာ်အသိး. (ဖး ၁ ပ့းတရူး ၄:၁.) ဖဲစီၤပ့းတရူး ကွဲးဝဲတၢ်ကတိၤ လၢအမ့ၢ် “ကတဲာ်ကတီၤထီၣ်သုသး” အခါ အအဲၣ်ဒိးတဲဝဲ ဘၣ်ဃးဒီး သုးဖိတဖၣ် ကဘၣ်အိၣ် ကတဲာ်ကတီၤသးလၢ ကသူဝဲတၢ်စုကဝဲၤ ဒ်သိးအဒုးတၢ် ကသ့ဂ့ၤဂ့ၤအဂီၢ်. အဃိ ခရံာ်ဖိတဖၣ် မ့ၢ်အိၣ်ဒီး တၢ်စုကဝဲၤ လၢအမ့ၢ် တၢ်ပာ်သူၣ်ပာ်သး ဒ်ယ့ၣ်ၡူးအသိးန့ၣ် အဝဲသ့ၣ် ကမၤနၢၤကွံာ် ဟီၣ်ခိၣ်လၢ မုၣ်ကီၤလံၢ်ပၢဝဲအံၤ ဒီးတၢ်သူၣ်လီသးကွံ လၢအတဂ့ၤဘၣ်တဖၣ်.—၂ ကရံၣ် ၁၀:၃-၅; အ့း ၆:၁၂.

၄. လၢတၢ်မၤလိအံၤ ပကတဲသကိး တၢ်ဂ့ၢ်မနုၤလဲၣ်.

^၄ လၢတၢ်မၤလိအံၤ ပကထံၣ်ဘၣ်လၢ ယ့ၣ်ၡူး ဆိကမိၣ်တၢ်ဒ်လဲၣ် ဒီးပကွၢ်လိအီၤ ကသ့ဒ်လဲၣ်. ဒီးပကမၤလိဘၣ်စ့ၢ်ကီးလၢ ပကဘၣ် (၁) ဆိကမိၣ်တၢ်ဒ် ယဟိဝၤယွၤအသိး, (၂) အိၣ်ဒီး တၢ်ဆီၣ်လီၤသး ဒီး (၃) ကဲထီၣ်ပှၤလၢ အဆိကမိၣ်ထံတၢ် သ့ဂ့ၤဂ့ၤ.

ဆိကမိၣ်တၢ်ဒ် ယဟိဝၤယွၤအသိး

၅. ဘၣ်တဘျီ စီၤပ့းတရူး ပာ်ဖျါထီၣ်လၢ အတဆိကမိၣ်တၢ်ဒ် ယဟိဝၤယွၤ ဆိကမိၣ်ဝဲ အသိးဘၣ်ဒ်လဲၣ်.

^၅ ဆိကမိၣ်ကွၢ် ဘၣ်တဘျီ ဖဲစီၤပ့းတရူး တဆိကမိၣ်တၢ်ဒ် ယဟိဝၤယွၤဘၣ်အခါ တၢ်ကဲထီၣ်အသးဒ်လဲၣ်. ယ့ၣ်ၡူး တဲဘၣ်အတၢ်မၢဖိတဖၣ်လၢ အကဘၣ်လဲၤလၢ ဝ့ၢ်ယရူၤၡလ့ၣ်, ပှၤကဟ့ၣ်လီၤအီၤလၢ တၢ်ဘူၣ်တၢ်ဘါခိၣ်နၢ်တဖၣ် အစုပူၤ, ပှၤကမၤနးမၤဖှီၣ်အီၤ ဒီးပှၤကမၤသံအီၤ. (မး ၁၆:၂၁) စီၤပ့းတရူး သ့ၣ်ညါဝဲလၢ ယ့ၣ်ၡူးန့ၣ် အကဲဝဲ မ့းၡံအၤ လၢအကမၤပူၤဖျဲး ယဟိဝၤယွၤ အပှၤဂီၢ်မုၢ်. ဘၣ်ဆၣ် ယဟိဝၤယွၤ ကပျဲလၢ ပှၤကမၤသံယ့ၣ်ၡူးန့ၣ် စီၤပ့းတရူး ဆိကမိၣ်ဝဲ တဘၣ်ဘၣ်. (မး ၁၆:၁၆) ဖဲန့ၣ် စီၤပ့းတရူး ကိးဃီၤယ့ၣ်ၡူးလၢ တၢ်ကပၤ ဒီးတဲအီၤလၢ “ကစၢ်ဧၢ, သးကညီၤလီၤနသးသၢၤ. တၢ်သ့ၣ်တဖၣ်န့ၣ် တဘၣ် ကဲထီၣ်အသးဒီးနၤ နီတစဲးဘၣ်.” (မး ၁၆:၂၂) ခီဖျိလၢ စီၤပ့းတရူး တဆိကမိၣ်တၢ်ဒ် ယဟိဝၤယွၤဘၣ်အဃိ အတဆိကမိၣ်တၢ် တမံၤဃီ ဒ်သိးဒီး ယ့ၣ်ၡူးစ့ၢ်ကီးဘၣ်.

၆. ယ့ၣ်ၡူး ဆိကမိၣ်တၢ် ဒ်ယဟိဝၤယွၤ အသိးန့ၣ် အပာ်ဖျါထီၣ်ဝဲဒ်လဲၣ်.

^၆ ယ့ၣ်ၡူး ဆိကမိၣ်တၢ်ဒ် အပါဆိကမိၣ်ဝဲအသိး လီၤတံၢ်လီၤဆဲး. အဃိ အတဲက့ၤ စီၤပ့းတရူးလၢ “စၤတၣ်ဧၢ, ယတကနၣ်ဃုာ် နတၢ်ကတိၤဘၣ်. နမ့ၢ်တၢ်လီၤဃံၢ်အလီၢ် လၢယဂီၢ်လီၤ. နတၢ်ဆိကမိၣ်န့ၣ် တမ့ၢ်ကစၢ်ယွၤ အတၢ်ဆိကမိၣ်ဘၣ်. မ့ၢ်ပှၤဟီၣ်ခိၣ်ဖိ အတၢ်ဆိကမိၣ်လီၤ.” (မး ၁၆:၂၃) ယ့ၣ်ၡူး သ့ၣ်ညါဝဲလၢ ဒ်သိး အကမၤ ယဟိဝၤယွၤ အတၢ်ဘၣ်သးအဂီၢ် အကဘၣ်တူၢ် တၢ်နးတၢ်ဖှီၣ် ဒီးအကဘၣ်သံ. အဃိ စီၤပ့းတရူး ဟ့ၣ်ကူၣ်ယ့ၣ်ၡူး လၢတၢ်သးဘျၢအပူၤ သနာ်က့ ယ့ၣ်ၡူး တတူၢ်လိာ်ဝဲဘၣ်. ဘၣ်ဃးဒီး တၢ်ကဲထီၣ်သးအံၤ စီၤပ့းတရူး န့ၢ်ဘၣ်တၢ်မၤလိ အရ့ဒိၣ်လၢ အကဘၣ် ဆိကမိၣ်တၢ်ဒ် ယဟိဝၤယွၤအသိး. တၢ်မၤလိအံၤ အရ့ဒိၣ်လၢပဂီၢ်စ့ၢ်ကီး.

၇. စီၤပ့းတရူး ဘၣ်သး ဆိကမိၣ်တၢ်ဒ် ယဟိဝၤယွၤအသိးန့ၣ် အပာ်ဖျါထီၣ်ဝဲဒ်လဲၣ်. (ကွၢ်တၢ်ဂီၤ.)

^၇ လၢခံန့ၣ် စီၤပ့းတရူး ပာ်ဖျါထီၣ်လၢ အဘၣ်သး ဆိကမိၣ်တၢ်ဒ် ယဟိဝၤယွၤအသိး. ဖဲန့ၣ်အခါ ပှၤကလုာ် အဂၤတဖၣ်လၢ အတဒိးတၢ်ကူးတရံးဘၣ်န့ၣ် တကဲထီၣ်ခရံာ်ဖိ နီတဂၤဒံးဘၣ်. သနာ်က့ ယဟိဝၤယွၤ ပာ်ဖျါထီၣ် အတၢ်ဘၣ်သးလၢ အဝဲသ့ၣ် ကကဲထီၣ်စ့ၢ်ကီး အပှၤဂီၢ်မုၢ်. အဃိ ယဟိဝၤယွၤ မၢစီၤပ့းတရူး စံၣ်တဲၤတဲလီၤဝဲ စီၤကန့လံး. ညီနုၢ်န့ၣ် ပှၤယူဒၤဖိ တရ့လိာ်သးဒီး ပှၤကလုာ် အဂၤတဖၣ်ဘၣ်. အဃိ ဒ်သိး စီၤပ့းတရူး ကမၤလၢပှဲၤ မူဒါအံၤအဂီၢ် အကဘၣ် ဆိကမိၣ်တၢ်ဒ် ယဟိဝၤယွၤအသိး. ဒီးဖဲစီၤပ့းတရူး သ့ၣ်ညါထီၣ် ယဟိဝၤယွၤ အတၢ်ဘၣ်သးအခါ အမၤဘၣ်ထီၣ်က့ၤ အတၢ်ဆိကမိၣ်. အဃိ ဖဲစီၤကန့လံး မၢစီၤပ့းတရူး ဟဲအိၣ်သကိးအီၤအခါ အလဲၤဝဲ ဒီးအ “သးတဒ့ဒီ နီတစဲးဘၣ်.” (မၤတၢ် ၁၀:၂၈, ၂၉) စီၤပ့းတရူး စံၣ်တဲၤတဲလီၤဝဲ စီၤကန့လံး ဒီးပှၤလၢအအိၣ် ဟံၣ်တဖျၢၣ်ဃီဒီးအီၤ ဒီးအဝဲသ့ၣ် ဒိးဘျၢထံ.—မၤတၢ် ၁၀:၂၁-၂၃, ၃၄, ၃၅, ၄၄-၄၈.

၈. ပဆိကမိၣ်တၢ်ဒ် ယဟိဝၤယွၤအသိးန့ၣ် ပပာ်ဖျါထီၣ် သ့ဒ်လဲၣ်. (၁ ပ့းတရူး ၃:၈)

^၈ လၢခံတဘျုးနံၣ်န့ၣ် စီၤပ့းတရူး ဟ့ၣ်ကူၣ်ဝဲ ဒီပုၢ်ဝဲၢ်မုၣ်ခွါလၢ က “အိၣ်ဒီးတၢ်သးတဖျၢၣ်ဃီ.” (ဖး ၁ ပ့းတရူး ၃:၈.) အဃိ ပမ့ၢ်ဆိကမိၣ်တၢ် ဒ်ယဟိဝၤယွၤ ပာ်ဖျါထီၣ်န့ၢ်ပှၤ လၢလံာ်စီဆှံပူၤန့ၣ် ကမၤစၢၤပှၤလၢ ပကအိၣ်ဒီး တၢ်သးတဖျၢၣ်ဃီဒီး ဒီပုၢ်ဝဲၢ်မုၣ်ခွါ. အဒိ ယ့ၣ်ၡူး ဟ့ၣ်ကူၣ် အပျဲၢ်အဘီၣ်လၢ ကပာ်ဆိ ယွၤအဘီအမုၢ် လၢအတၢ်အိၣ်မူအပူၤ. (မး ၆:၃၃) အဃိ ဘၣ်သ့ၣ်သ့ၣ် ပှၤလၢပတၢ်အိၣ်ဖှိၣ်ပူၤ တဂၤဂၤ ကပာ်လီၤသးလၢ အကမၤထွဲ တၢ်ဟ့ၣ်ကူၣ်အံၤ ဒီးမၤကစၢ်ယွၤအတၢ်မၤ လၢဆၢကတီၢ်လၢပှဲၤ. အမ့ၢ်ဆၢတဲာ်လီၤသး ဒ်န့ၣ်န့ၣ် မ့ၢ်ပကတဲအီၤလၢ မၤဘၣ်ဒးဘၣ်ဒးဧါ. ပတတဲဒ်န့ၣ်ဘၣ်. ပကဆိကမိၣ်တၢ် ဒ်ယဟိဝၤယွၤအသိး ဒီးကဟ့ၣ်ဂံၢ်ဟ့ၣ်ဘါအါထီၣ် ပဒီပုၢ်ဝဲၢ် ဒီးဃုကျဲလၢ ကမၤစၢၤအီၤ.

အိၣ်ဒီး တၢ်ဆီၣ်လီၤသး

၉-၁၀. ယ့ၣ်ၡူး အိၣ်ဒီး တၢ်ဆီၣ်လီၤသးဒိၣ်မးန့ၣ် အပာ်ဖျါထီၣ်ဝဲဒ်လဲၣ်.

^၉ တချုးလၢ ယ့ၣ်ၡူးကသံ အနၤန့ၣ် အသိၣ်လိ စီၤပ့းတရူး ဒီးတၢ်မၢဖိအဂၤတဖၣ်လၢ တၢ်မၤလိအရ့ဒိၣ် ဘၣ်ဃးဒီး တၢ်ဆီၣ်လီၤသး. ဖဲမုၢ်အိၣ်ဒံးအခါန့ၣ် ယ့ၣ်ၡူးမၢ စီၤပ့းတရူး ဒီးစီၤယိၤဟၣ် လဲၤကတဲာ်ကတီၤတၢ်လၢ ကအီၣ်ဟါတၢ်အီၣ်ဒီး အဝဲသ့ၣ် တချုးအသံအခါ. တၢ်လၢအဝဲသ့ၣ် ဘၣ်ကတဲာ်ကတီၤဝဲ အကျါန့ၣ် ဘၣ်သ့ၣ်သ့ၣ် ကပၣ်ဃုာ်ဒီး ခွးဖးဒိၣ် ဒီးခိၣ်ဖၢၣ် လၢပှၤကသ့န့ၢ် ပှၤတမှံၤအခီၣ် တချုးအဝဲသ့ၣ် အီၣ်ဟါတၢ်အီၣ်အခါ. ဘၣ်ဆၣ် ဖဲတၢ်တနၤန့ၣ် မတဂၤ ကပာ်ဖျါထီၣ် တၢ်ဆီၣ်လီၤသး ဒီးသ့န့ၢ်ပှၤဂၤအခီၣ်လဲၣ်.

^၁၀ ယ့ၣ်ၡူးအိၣ်ဒီး တၢ်ဆီၣ်လီၤသး ဒိၣ်မးအဃိ အပာ်ဖျါထီၣ်ဝဲလၢ အတၢ်မၤ တဘျီဃီ. ယ့ၣ်ၡူး ပာ်လီၤဝဲအဆ့ကၤ အဖီခိၣ်တဘ့ၣ်လၢ တၢ်ကပၤ, အဟံးန့ၢ်ဝဲ ခိၣ်ဖၢၣ် ဒီးစၢဃာ်ဝဲလၢ အယီၢ်ဒ့လိၤ, အလူလီၤထံလၢ ခွးဖးဒိၣ်အပူၤ ဒီးသ့န့ၢ်ဝဲ အပျဲၢ်အဘီၣ်တဖၣ်အခီၣ်. (ယိၤ ၁၃:၄, ၅) ဖဲယ့ၣ်ၡူးမၤဝဲ တၢ်မၤလၢ ညီနုၢ် တၢ်ခ့တၢ်ပှၤ မၤဝဲအခါ အတၢ်မၢဖိတဖၣ် ကမၢကမၣ်ဒိၣ်မး. ယ့ၣ်ၡူး သ့န့ၢ်ဝဲ အပျဲၢ်အဘီၣ် ၁၂ ဂၤလၢာ်အခီၣ် အဃိ တၢ်ဆၢကတီၢ် ကလၢာ်ဝဲဖးအါညါ. တကးဒံးဘၣ် စီၤယူဒၤ လၢအကဲပှၤလၢ ကဟ့ၣ်လီၤကွံာ်ယ့ၣ်ၡူးန့ၣ် ယ့ၣ်ၡူး သ့န့ၢ်အခီၣ်စ့ၢ်ကီး. ယ့ၣ်ၡူးမၤဝဲ တၢ်မၤလၢ အပတီၢ်ဖုၣ်အံၤအဃိ အအိၣ်ဒီး တၢ်ဆီၣ်လီၤသးဒိၣ်မး. ဝံၤဒီး ယ့ၣ်ၡူး တဲနၢ်ပၢၢ် အဝဲသ့ၣ်လၢ “ဘၣ်မနုၤအဃိ ယမၤန့ၢ်သု ဒ်န့ၣ်လဲၣ်န့ၣ် သုနၢ်ပၢၢ်ဧါ. သုကိးယၤလၢ ‘သရၣ်’ ဒီး ‘ကစၢ်’ လီၤ. ဒီးမ့ၢ်လၢ ယမ့ၢ်သရၣ်ဒီးကစၢ်အဃိ သုတဲတၢ်န့ၣ် ဘၣ်ဝဲလီၤ. အဃိ ယမ့မ့ၢ်သရၣ်ဒီးကစၢ် သနာ်က့ ယမ့ၢ်သ့န့ၢ်သုခီၣ်န့ၣ် သုဝဲစ့ၢ်ကီး သုကြၢး သ့န့ၢ်လိာ်သးသုခီၣ် ကဒဲကဒဲလီၤ.”—ယိၤ ၁၃:၁၂-၁၄.

၁၁. စီၤပ့းတရူး ဟံးန့ၢ်တၢ်မၤလိလၢ ယ့ၣ်ၡူး အတၢ်ဆီၣ်လီၤသးန့ၣ် အပာ်ဖျါထီၣ်ဝဲဒ်လဲၣ်. (၁ ပ့းတရူး ၅:၅) (ကွၢ်စ့ၢ်ကီးတၢ်ဂီၤ.)

^၁၁ စီၤပ့းတရူး ဟံးန့ၢ် တၢ်မၤလိလၢ ယ့ၣ်ၡူးအအိၣ် ဒီးအကွၢ်လိ ယ့ၣ်ၡူး အတၢ်ဆီၣ်လီၤသး. အဒိ ဖဲယ့ၣ်ၡူး က့ၤထီၣ်လၢမူခိၣ် ဝံၤအလီၢ်ခံ စီၤပ့းတရူး မၤဘျါက့ၤ ပှၤလၢ အခီၣ်ဟးဂီၤလၢ အအိၣ်ဖျဲၣ်ထီၣ် လံၤလံၤတဂၤ. (မၤတၢ် ၁:၈, ၉; ၃:၂, ၆-၈) ဖဲပှၤဂီၢ်မုၢ်ထံၣ်ဝဲ တၢ်လီၤလးအံၤအခါ အဝဲသ့ၣ် အိၣ်ဝးတရံး စီၤပ့းတရူး. (မၤတၢ် ၃:၁၁) ပမ့ၢ်ကွၢ် စီၤပ့းတရူးန့ၣ် အဒိၣ်ထီၣ်ဘၣ် တၢ်လီၢ်လၢ ပှၤအါဂၤဘၣ်သးလၢ ပှၤကဆိကမိၣ်ဒိၣ် အဝဲသ့ၣ်. ဘၣ်ဆၣ် စီၤပ့းတရူး တဘၣ်သးလၢ ပှၤကဆိကမိၣ်ဒိၣ်အီၤဘၣ်. ပထံၣ်ဘၣ်လၢ စီၤပ့းတရူး အိၣ်ဒီးတၢ်ဆီၣ်လီၤသး ဒီးတဲဘၣ် ပှၤဂီၢ်မုၢ်လၢ ကစံးထီၣ်ပတြၢၤ ယဟိဝၤယွၤ ဒီးယ့ၣ်ၡူး. အတဲအဝဲသ့ၣ်လၢ “ခီဖျိလၢ ယ့ၣ်ၡူးအမံၤ ဒီးပနာ်အမံၤအဃိ ပှၤလၢသုထံၣ်ဒီး သုသ့ၣ်ညါအီၤတဂၤအံၤန့ၣ် အဂံၢ်ဆူၣ်ထီၣ်ဝဲလံ.” (မၤတၢ် ၃:၁၂-၁၆) လၢခံ စီၤပ့းတရူး ကွဲးန့ၢ် ခရံာ်ဖိတဖၣ် ဘၣ်ဃးဒီး ပကဘၣ်အိၣ်ဒီး တၢ်ဆီၣ်လီၤသး. ဒီးတၢ်ကတိၤလၢ အကွဲးဝဲ ဘၣ်ဃးဒီး တၢ်ဆီၣ်လီၤသးန့ၣ် အဲၣ်ဒိးတဲဝဲ ပကဘၣ် ကူထီၣ်သိးထီၣ် တၢ်ဆီၣ်လီၤသး ဒ်သိးဒီး ပကူထီၣ်သိးထီၣ် မ့တမ့ၢ် စၢဃာ်တၢ်တမံၤမံၤ လၢပလိၤ. ဒီးတၢ်ကတိၤလၢ အသူဝဲအံၤ ဒုးသ့ၣ်နီၣ်ထီၣ်ပှၤ ဘၣ်ဃးဒီး ယ့ၣ်ၡူး စၢဃာ်ခိၣ်ဖၢၣ် လၢအယီၢ်ဒ့လိၤ ဒီးသ့န့ၢ် တၢ်မၢဖိတဖၣ်အခီၣ် လၢတၢ်ဆီၣ်လီၤသးအပူၤ.—ဖး ၁ ပ့းတရူး ၅:၅.

၁၂. ပကွၢ်လိ စီၤပ့းတရူး ဒီးဆဲးမၤအါထီၣ် တၢ်ဆီၣ်လီၤသး ကသ့ဒ်လဲၣ်.

^၁၂ ပဝဲစ့ၢ်ကီး ပကွၢ်လိ စီၤပ့းတရူး အဒိအတဲာ် ဒီးမၤအါထီၣ် တၢ်ဆီၣ်လီၤသးသ့. ပပာ်ဖျါထီၣ်လၢ ပအိၣ်ဒီး တၢ်ဆီၣ်လီၤသးန့ၣ် တမ့ၢ်ထဲ ပတဲတၢ်ကတိၤလၢ ကဒုးဆိကမိၣ်ပှၤဂၤလၢ ပအိၣ်ဒီး တၢ်ဆီၣ်လီၤသးဘၣ်. စီၤပ့းတရူး သူဝဲတၢ်ကတိၤ “တၢ်ဆီၣ်လီၤသး” န့ၣ် အဲၣ်ဒိးတဲဝဲ လၢပသးပူၤဒၣ်လဲာ် ပအိၣ်ဒီး တၢ်ထံၣ်အကြၢးအဘၣ်လၢ ပနီၢ်ကစၢ် ဒီးပှၤဂၤအဖီခိၣ်. ဒီးပမၤဂ့ၤတၢ်လၢ ပှၤဂၤအဂီၢ်န့ၣ် တမ့ၢ်လၢ ပဘၣ်သးလၢ ပှၤကစံးပတြၢၤပှၤဘၣ်. ဘၣ်ဆၣ် ခီဖျိလၢ ပအဲၣ်ယဟိဝၤယွၤ ဒီးပအဲၣ်ပှၤဂၤအဃိ ပမၤဂ့ၤတၢ်လၢ ပှၤဂၤအဂီၢ်. ဒီးဖဲပမၤ ယဟိဝၤယွၤ အတၢ်မၤ ဒီးမၤစၢၤ ဒီပုၢ်ဝဲၢ်မုၣ်ခွါအခါ ပှၤဂၤမ့ၢ်တထံၣ် ပတၢ်ဂုာ်ကျဲးစၢးဘၣ် သနာ်က့ ပမ့ၢ်ဆဲးမၤလၢ တၢ်သးခုန့ၣ် ပပာ်ဖျါထီၣ်လၢ ပအိၣ်ဒီး တၢ်ဆီၣ်လီၤသး နီၢ်ကီၢ်.—မး ၆:၁-၄.

ကဲထီၣ်ပှၤလၢ “အဆိကမိၣ်ထံတၢ် သ့ဂ့ၤဂ့ၤ”

၁၃. ပကဲပှၤလၢ “အဆိကမိၣ်ထံတၢ် သ့ဂ့ၤဂ့ၤ” န့ၣ် အခီပညီဒ်လဲၣ်.

^၁၃ ပကဲပှၤလၢ “အဆိကမိၣ်ထံတၢ် သ့ဂ့ၤဂ့ၤ” န့ၣ် အခီပညီဒ်လဲၣ်. (၁ ပ့း ၄:၇) ပမ့ၢ်ကဲပှၤလၢ အဆိကမိၣ်ထံတၢ် သ့ဂ့ၤဂ့ၤန့ၣ် ဖဲပဘၣ်ဆၢတဲာ်တၢ်အခါ ပဆိကမိၣ်ထံဆိ ယဟိဝၤယွၤ အတၢ်ထံၣ် ဒီးဆၢတဲာ်တၢ်လၢ အဘၣ်လိာ်သးဒီး အတၢ်ထံၣ်. ဒီးပသ့ၣ်ညါလၢ တၢ်လၢအရ့ဒိၣ်န့ၢ်ဒံး ပတၢ်ရ့လိာ်သးဒီး ယဟိဝၤယွၤန့ၣ် တအိၣ်နီတမံၤဘၣ်. တကးဒံးဘၣ် ပတဆိကမိၣ်ဒိၣ်လီၤပသး ဒီးဆိကမိၣ်လၢ ပသ့ၣ်ညါတၢ် ကိးမံၤဒဲးဘၣ်. ဒီးပမ့ၢ်ကဲပှၤလၢ အဆိကမိၣ်ထံတၢ် သ့ဂ့ၤဂ့ၤန့ၣ် ပကသန့ၤသးလၢ ယဟိဝၤယွၤ ခီဖျိတၢ်ထုကဖၣ် ဒီးဃ့အတၢ်ဟံးစုနဲၣ်ကျဲ ထီဘိ.a

၁၄. ဘၣ်တဘျီ စီၤပ့းတရူး တသန့ၤသးလၢ ယဟိဝၤယွၤဘၣ်န့ၣ် ပသ့ၣ်ညါဘၣ်ဒ်လဲၣ်.

^၁၄ တချုးလၢ ယ့ၣ်ၡူးကသံ အနၤန့ၣ် အဟ့ၣ်ပလီၢ် အပျဲၢ်အဘီၣ် ဒီးတဲဝဲလၢ “တနၤအံၤ သုကလီၤဃံၢ်ကိးဂၤဒဲး ခီဖျိတၢ်လၢ ကကဲထီၣ်အသးဒီးယၤ အဃိလီၤ.” စီၤပ့းတရူး နာ်န့ၢ်လီၤသး ဒီးတဲဝဲလၢ “ပှၤအဂၤခဲလၢာ် မ့ၢ်လီၤဃံၢ် ခီဖျိ တၢ်လၢကကဲထီၣ် အသးဒီးနၤ အဃိဘၣ်ဆၣ် မ့မ့ၢ်ယၤန့ၣ် ယတလီၤဃံၢ် နီတဘျီဘၣ်.” တကးဒံးဘၣ် ဖဲတၢ်တနၤန့ၣ် ယ့ၣ်ၡူးဟ့ၣ်ကူၣ် အပျဲၢ်အဘီၣ်တနီၤ ဒီးတဲဝဲလၢ “ဆိးသီ ဒီးဃ့ထုကဖၣ်တၢ် ထီဘိတက့ၢ်.” (မး ၂၆:၃၁, ၃၃, ၄၁) စီၤပ့းတရူး မ့ၢ်မၤထွဲ တၢ်ဟ့ၣ်ကူၣ်အံၤန့ၣ် ဘၣ်သ့ၣ်သ့ၣ် အကအိၣ်ဒီး တၢ်သးဒူလၢ အကတဲလီၤအသးလၢ အကဲယ့ၣ်ၡူး အပျဲၢ်အဘီၣ်. ဘၣ်ဆၣ် စီၤပ့းတရူး တဲဝဲလၢ အတသ့ၣ်ညါ ယ့ၣ်ၡူးဘၣ် ဒီးလၢခံန့ၣ် အသးဘၣ်ဒိက့ၤ ဖးနးညါ.—မး ၂၆:၆၉-၇၅.

၁၅. တချုးလၢ ယ့ၣ်ၡူးကသံ အနၤန့ၣ် အပာ်ဖျါထီၣ်လၢ အကဲပှၤလၢ “အဆိကမိၣ်ထံတၢ် သ့ဂ့ၤဂ့ၤ” ဒ်လဲၣ်.

^၁၅ ယ့ၣ်ၡူးန့ၣ် အသန့ၤအသးလၢ ယဟိဝၤယွၤ လၢအသးဒီဖျၢၣ်. အကဲပှၤလၢပှၤပှဲၤ သနာ်က့ တချုးလၢ အကသံ အနၤန့ၣ် အဃ့ထုကဖၣ်တၢ် ခဲအံၤခဲအံၤ. ခီဖျိလၢ အမၤဝဲဒ်န့ၣ်အဃိ အအိၣ်ဒီး တၢ်သးဒူလၢ အကမၤ ယဟိဝၤယွၤ အတၢ်ဘၣ်သး. (မး ၂၆:၃၉, ၄၂, ၄၄; ယိၤ ၁၈:၄, ၅) အဃိ ဖဲစီၤပ့းတရူး ထံၣ်ဝဲလၢ ယ့ၣ်ၡူး ဃ့ထုကဖၣ်တၢ် ခဲအံၤခဲအံၤ အခါ အန့ၢ်ဘၣ် တၢ်မၤလိအရ့ဒိၣ် တခါလၢ အတသးပ့ၤနီၣ်ဝဲ နီတဘျီဘၣ်.

၁၆. စီၤပ့းတရူး ကဲထီၣ်ပှၤလၢ အဆိကမိၣ်ထံတၢ် သ့ဂ့ၤဂ့ၤန့ၣ် အပာ်ဖျါထီၣ်ဝဲဒ်လဲၣ်. (၁ ပ့းတရူး ၄:၇)

^၁၆ လၢခံယံာ်ထီၣ်ဒီး စီၤပ့းတရူး သန့ၤအါထီၣ်အသး လၢယဟိဝၤယွၤ ဒီးဃ့ထုကဖၣ်လၢအအိၣ်. ယ့ၣ်ၡူး ဂဲၤဆၢထၢၣ် သမူထီၣ်က့ၤ ဝံၤအလီၢ်ခံ အအၢၣ်လီၤ စီၤပ့းတရူး ဒီးတၢ်မၢဖိ အဂၤတဖၣ်လၢ အဝဲသ့ၣ် ကဒိးန့ၢ်ဘၣ် သးစီဆှံ လၢကမၤစၢၤ အဝဲသ့ၣ်ဒ်သိး ကစံၣ်တဲၤတဲလီၤ တၢ်သးခုကစီၣ်အဂီၢ်. ဘၣ်ဆၣ် ယ့ၣ်ၡူး မၢအဝဲသ့ၣ် အိၣ်ခိးတၢ်လၢ ဝ့ၢ်ယရူၤၡလ့ၣ် တုၤလၢ အဝဲသ့ၣ် ဒိးန့ၢ်ဘၣ်သးစီဆှံ. (လူၤ ၂၄:၄၉; မၤတၢ် ၁:၄, ၅) ဖဲစီၤပ့းတရူး အိၣ်ခိးတၢ်အခါ အမၤမနုၤလဲၣ်. စီၤပ့းတရူး ဒီးခရံာ်အပျဲၢ်အဘီၣ် အဂၤတဖၣ် “ဆဲးဃ့ထုကဖၣ်တၢ် တလီၢ်လီၢ်လၢ တၢ်သးတဖျၢၣ်ဃီ.” (မၤတၢ် ၁:၁၃, ၁၄) ဒီးလၢခံ ဖဲစီၤပ့းတရူး ကွဲးအလံာ်ပရၢ အဆိကတၢၢ်တဘ့ၣ်အခါ အဟ့ၣ်ဂံၢ်ဟ့ၣ်ဘါ ခရံာ်အပျဲၢ်အဘီၣ် အဂၤတဖၣ်လၢ ကကဲထီၣ်ပှၤလၢ အဆိကမိၣ်ထံတၢ် သ့ဂ့ၤဂ့ၤ, သန့ၤသးလၢ ယဟိဝၤယွၤ ဒီးဃ့ထုကဖၣ် လၢအအိၣ်. (ဖး ၁ ပ့းတရူး ၄:၇.) စီၤပ့းတရူး သန့ၤအါထီၣ်အသး လၢယဟိဝၤယွၤအဃိ အမၤစၢၤ ဒီပုၢ်ဝဲၢ်မုၣ်ခွါ ဒီးဟ့ၣ်ဂံၢ်ဟ့ၣ်ဘါ အဝဲသ့ၣ် သ့အါထီၣ်.—ကလၤ ၂:၉.

၁၇. ပတၢ်သ့တၢ်ဘၣ် မ့ၢ်အိၣ်အါထဲလဲၣ် ဘၣ်ဆၣ် ပကဘၣ် ဆဲးမၤဒံး မနုၤလဲၣ်. (ကွၢ်စ့ၢ်ကီးတၢ်ဂီၤ.)

^၁၇ ဒ်သိး ပကကဲထီၣ်ပှၤလၢ အဆိကမိၣ်ထံတၢ် သ့ဂ့ၤဂ့ၤအဂီၢ် ပကဘၣ် ဃ့ထုကဖၣ် လၢယဟိဝၤယွၤအအိၣ်ထီဘိ. ပတၢ်သ့တၢ်ဘၣ် မ့ၢ်အိၣ်အါထဲလဲၣ် သနာ်က့ ပကဘၣ် ဆဲးဃ့ထုကဖၣ် ဒီးဃ့ယဟိဝၤယွၤ အတၢ်မၤစၢၤ ခဲအံၤခဲအံၤ. ဒီးလီၤဆီဒၣ်တၢ် ဖဲပဘၣ် ဆၢတဲာ်တၢ်လၢ အရ့ဒိၣ်အခါ ပကဘၣ် ဃ့ယဟိဝၤယွၤ အတၢ်ဟံးစုနဲၣ်ကျဲ ဒီးနာ်သပှၢ်တၢၢ်လၢ အသ့ၣ်ညါ တၢ်အဂ့ၤကတၢၢ် လၢပဂီၢ်.

၁၈. နပာ်လီၤသးလၢ နကမၤ မနုၤလဲၣ်.

^၁၈ ယဟိဝၤယွၤ တ့လီၤပှၤဃုာ်ဒီး တၢ်သ့တၢ်ဘၣ်လၢ ပကကွၢ်လိအီၤ ဒီးပာ်ဖျါထီၣ်က့ၤ အတၢ်ဂ့ၤတၢ်ဝါအဃိ ပသးခုဒိၣ်မး. (၁ မိၤ ၁:၂၆) ပသ့ၣ်ညါလၢ ပကွၢ်လိ ယဟိဝၤယွၤ လၢလၢပှဲၤပှဲၤ တသ့ဘၣ်. (ၡါ ၅၅:၉) ဘၣ်ဆၣ် ဒ်စီၤပ့းတရူးအသိး မ်ပဂုာ်ကျဲးစၢး မၤလိအါထီၣ်ပသးလၢ ပကဆိကမိၣ်တၢ်ဒ် ယဟိဝၤယွၤအသိး, အိၣ်ဒီး တၢ်ဆီၣ်လီၤသး ဒီးကဲထီၣ်ပှၤလၢ “အဆိကမိၣ်ထံတၢ် သ့ဂ့ၤဂ့ၤ” ထီဘိ.