နာ်သပှၢ်တၢၢ်လၢ ယဟိဝၤယွၤ မၤစၢၤနၤသ့ထီဘိ

၁. ဖဲစီၤမိၤၡ့ ဘၣ်တီခိၣ်ရိၤမဲ ပှၤအံၣ်စရ့လးဖိလၢ ကဟးထီၣ်လၢ ကီၢ်အဲၤကူပတူးအခါ အနာ်န့ၢ် ယဟိဝၤယွၤန့ၣ် အပာ်ဖျါထီၣ်ဝဲဒ်လဲၣ်.

လံာ်ဧ့ၤဘြံၤ တကတြူၢ် ပာ်ဖျါထီၣ် ဘၣ်ဃးဒီး ပှၤလၢအနာ် ယဟိဝၤယွၤန့ၣ် အိၣ်အါမး. လၢအဝဲသ့ၣ်အကျါ တဂၤန့ၣ်မ့ၢ်ဝဲ စီၤမိၤၡ့ လၢအအိၣ်ဒီး တၢ်နာ်လၢ အလီၤကွၢ်လိဒိၣ်မး. (ဧ့ၤ ၃:၂-၅; ၁၁:၂၃-၂၅) ဖဲစီၤမိၤၡ့ ဘၣ်တီခိၣ်ရိၤမဲ ပှၤအံၣ်စရ့လးဖိလၢ ကဟးထီၣ်လၢ ကီၢ်အဲၤကူပတူးအခါ အပာ်ဖျါထီၣ် တၢ်နာ်နီၢ်ကီၢ်. စီၤမိၤၡ့ တပျံၤ ဖၤရိၤ ဒီးအသုးမုၢ်တဖၣ်ဘၣ်. အနာ်န့ၢ် ယဟိဝၤယွၤ လၢအသးဒီဖျၢၣ်, အဆှၢပှၤအံၣ်စရ့လးဖိ လၢပီၣ်လဲၣ်ဂီၤ ဒီးလၢခံ တုၤလၢပှၢ်မုၢ်ကနၢ. (ဧ့ၤ ၁၁:၂၇-၂၉) ပှၤအံၣ်စရ့လးဖိ အါတက့ၢ်န့ၣ် တနာ်ဝဲလၢ ယဟိဝၤယွၤ ကကွၢ်ထွဲအီၤလၢၤဘၣ်, ဘၣ်ဆၣ် စီၤမိၤၡ့ ဆဲးနာ်န့ၢ် ယဟိဝၤယွၤ. ပမ့ၢ်ကွၢ် ဖဲပှၤအံၣ်စရ့လးဖိ အိၣ်လၢ ပှၢ်မုၢ်ကနၢအခါ ဒ်သိး အဝဲသ့ၣ် ကဆဲးမူအဂီၢ် ယဟိဝၤယွၤ မၤတၢ်လီၤလး ဒီးဟ့ၣ်အဝဲသ့ၣ် တၢ်အီၣ်ဒီးထံ အဃိ စီၤမိၤၡ့ နာ်န့ၢ် ယဟိဝၤယွၤန့ၣ် တကမၣ်ဘၣ်.a—၂ မိၤ ၁၅:၂၂-၂၅; စံး ၇၈:၂၃-၂၅.

၂. ဘၣ်မနုၤအဃိ ယဟိဝၤယွၤ သံကွၢ်စီၤမိၤၡ့လၢ “ယၤ ယဟိဝၤယွၤန့ၣ် မ့ၢ်ယစုဖုၣ်တလၢဧါ” လဲၣ်. (၄ မိၤၡ့ ၁၁:၂၁-၂၃)

^၂ စီၤမိၤၡ့န့ၣ် အနာ်န့ၢ် ယဟိဝၤယွၤ သပှၢ်တၢၢ်. ဘၣ်ဆၣ် ဖဲယဟိဝၤယွၤ မၤပူၤဖျဲး ပှၤအံၣ်စရ့လးဖိလၢ ကီၢ်အဲၤကူပတူးအပူၤ တနံၣ်ဝံၤအလီၢ်ခံ စီၤမိၤၡ့ ဆိကမိၣ်ထီၣ်ဝဲလၢ မ့ၢ်ယဟိဝၤယွၤ ဒုးအီၣ်အပှၤဂီၢ်မုၢ် လၢတၢ်ညၣ် ဒ်အအၢၣ်လီၤဝဲအသိး ကသ့နီၢ်ကီၢ်ဧါ. အဃိ ယဟိဝၤယွၤ တဲစီၤမိၤၡ့လၢ “ယၤ ယဟိဝၤယွၤန့ၣ် မ့ၢ်ယစုဖုၣ်တလၢဧါ.” (ဖး ၄ မိၤၡ့ ၁၁:၂၁-၂၃.) လၢဧ့ၤဘြံၤကျိာ် တၢ်ကတိၤ လၢအမ့ၢ် ‘ယဟိဝၤယွၤအစု’ န့ၣ် အဲၣ်ဒိးတဲဝဲ ယဟိဝၤယွၤ အသးစီဆှံ မ့တမ့ၢ် အတၢ်စိတၢ်ကမီၤ လၢအသူဝဲဒ်သိး အကမၤလၢပှဲၤထီၣ် အတၢ်ဘၣ်သး. အဃိ လီၤဂာ် ဒ်သိးဒီး ယဟိဝၤယွၤ တဲစီၤမိၤၡ့လၢ ‘ယမ့ၢ်တဲလၢ ယကမၤတၢ် တမံၤမံၤန့ၣ် ယမၤသ့ သပှၢ်တၢၢ်.’

၃. ဘၣ်မနုၤအဃိ ပကြၢးဆိကမိၣ်ထံ စီၤမိၤၡ့ ဒီးပှၤအံၣ်စရ့လးဖိ အတၢ်လဲၤခီဖျိလဲၣ်.

^၃ ဒ်သိး နၤဒီးနဟံၣ်ဖိဃီဖိ ကဆဲးမူအဂီၢ် မ့ၢ်နဘၣ်ယိၣ်လၢ ယဟိဝၤယွၤ ဆဲးမၤလၢပှဲၤန့ၢ် သုတၢ်လိၣ်ဘၣ် တန့ၢ်ဘၣ်န့ၣ် အိၣ်တဘျီဘျီဧါ. ဘၣ်မနုၤအဃိ စီၤမိၤၡ့ ဒီးပှၤအံၣ်စရ့လးဖိတဖၣ် ဆိကမိၣ်ဝဲလၢ ယဟိဝၤယွၤ မၤလၢပှဲၤန့ၢ် အဝဲသ့ၣ်တၢ်လိၣ်ဘၣ် တသ့လၢၤဘၣ်လဲၣ်န့ၣ် ပကတဲသကိး လၢတၢ်မၤလိ တခါအံၤ. ဒီးပကကွၢ်သကိး လံာ်စီဆှံ အတၢ်ဟံးစုနဲၣ်ကျဲ တနီၤလၢ ကမၤစၢၤပှၤဒ်သိး ပကနာ် သပှၢ်တၢၢ်လၢ ယဟိဝၤယွၤ မၤစၢၤပှၤ သ့ထီဘိ.

မၤလိန့ၢ်တၢ်လၢ စီၤမိၤၡ့ ဒီးပှၤအံၣ်စရ့လးဖိအအိၣ်

၄. ဘၣ်မနုၤအဃိ ပှၤအံၣ်စရ့လးဖိတဖၣ် ဆိကမိၣ်ဝဲလၢ ယဟိဝၤယွၤ မၤလၢပှဲၤန့ၢ် အဝဲသ့ၣ် အတၢ်လိၣ်ဘၣ် တသ့လၢၤဘၣ်လဲၣ်.

^၄ ဘၣ်မနုၤအဃိ ပှၤအံၣ်စရ့လးဖိတဖၣ် ဆိကမိၣ်ဝဲလၢ ယဟိဝၤယွၤ မၤလၢပှဲၤန့ၢ် အဝဲသ့ၣ်တၢ်လိၣ်ဘၣ် တသ့လၢၤဘၣ်လဲၣ်. ပှၤအံၣ်စရ့လးဖိ ဒီး “ပှၤအကလုာ်ကလုာ်ဂီၢ်မုၢ်” လၢတကဲ ပှၤအံၣ်စရ့လးဖိဘၣ်န့ၣ် ဒ်သိး အဝဲသ့ၣ် ကလဲၤတုၤလၢ ကီၢ်တၢ်စံးပာ်အဂီၢ် အဝဲသ့ၣ် ဘၣ်လဲၤတၢ်လၢ ပှၢ်မုၢ်ကနၢ အိၣ်တတီၤဖိလံ. (၂ မိၤ ၁၂:၃၈; ၅ မိၤ ၈:၁၅) ပှၤအံၣ်စရ့လးဖိမ့ၢ်ဂ့ၤ ပှၤလၢတကဲ ပှၤအံၣ်စရ့လးဖိဘၣ်မ့ၢ်ဂ့ၤ အဝဲသ့ၣ် အီၣ်ကိၣ်မၤနၤ တကဲလၢၤဘၣ်အဃိ အဝဲသ့ၣ် ကဒူးကဒ့ၣ်တၢ်. (၄ မိၤ ၁၁:၄-၆) တကးဒံးဘၣ် အဝဲသ့ၣ် ဘၣ်သးအီၣ် တၢ်အီၣ်လၢ အအိၣ်လၢ ကီၢ်အဲၤကူပတူးအပူၤ. ခီဖျိလၢ အဝဲသ့ၣ် ဟဲကဒူးကဒ့ၣ်တၢ်လၢ စီၤမိၤၡ့အအိၣ်အဃိ စီၤမိၤၡ့ ဆိကမိၣ်ဝဲလၢ အကဘၣ်ဃုန့ၢ် အဝဲသ့ၣ် တၢ်ဖံးတၢ်ညၣ် ဘၣ်ဆၣ် အကဘၣ်ဃုဝဲ ဒ်လဲၣ်န့ၣ် အတသ့ၣ်ညါဝဲဘၣ်.—၄ မိၤ ၁၁:၁၃, ၁၄.

၅-၆. ပှၤလၢတကဲ ပှၤအံၣ်စရ့လးဖိဘၣ် အတၢ်ပာ်သူၣ်ပာ်သး လၢအတဂ့ၤဘၣ်န့ၣ် မၤစှၤလီၤ ပှၤအံၣ်စရ့လးဖိ အတၢ်နာ်ဒ်လဲၣ် ဒီးအကဲထီၣ် တၢ်ဟ့ၣ်ပလီၢ် လၢပဂီၢ်ဒ်လဲၣ်.

^၅ ပှၤလၢတကဲ ပှၤအံၣ်စရ့လးဖိဘၣ် တဖၣ်အံၤ ယဟိဝၤယွၤ မၤန့ၢ်တၢ်လၢ အဝဲသ့ၣ်အဂီၢ်အါမး ဘၣ်ဆၣ် အဝဲသ့ၣ် တသ့ၣ်ညါ စံးဘျုးစံးဖှိၣ်တၢ်ဘၣ်. အဃိ ပှၤအံၣ်စရ့လးဖိစ့ၢ်ကီး ကွၢ်လိအဝဲသ့ၣ် အတၢ်ပာ်သူၣ်ပာ်သး. ပဝဲစ့ၢ်ကီး ပမ့ၢ်တပလီၢ်သးဘၣ်န့ၣ် တၢ်ကကဲထီၣ်သးဒီးပှၤဒ်န့ၣ်. ဖဲပှၤလၢပဃၢၤတဖၣ် တပာ်ဖျါထီၣ် တၢ်စံးဘျုးစံးဖှိၣ်ဘၣ်အခါ ပကကွၢ်လိဘၣ် အဝဲသ့ၣ် ဒီးပတပာ်လုၢ်ပာ်ပှ့ၤ တၢ်လၢယဟိဝၤယွၤ မၤန့ၢ်ပှၤလၢၤဘၣ်. ဘၣ်သ့ၣ်သ့ၣ် ပကလီကီထွဲက့ၤ တၢ်လၢအအိၣ်ဒီးပှၤ လၢအပူၤကွံာ် ဒီးပကသးက့ၣ်ပှၤဂၤ ခီဖျိလၢ တၢ်လၢအဝဲသ့ၣ် န့ၢ်ဘၣ်ဝဲအဃိ. ဘၣ်ဆၣ် ပတၢ်အိၣ်သး မ့ၢ်အိၣ် ဒ်လဲၣ်ဂ့ၤဒ်လဲၣ်ဂ့ၤ ပမ့ၢ်သးမံဒီး တၢ်လၢအအိၣ်ဒီးပှၤန့ၣ် ပကသးခုနီၢ်ကီၢ်.

^၆ ပှၤအံၣ်စရ့လးဖိတဖၣ် ကြၢးနီၣ်ဘၣ်က့ၤ တၢ်လၢယဟိဝၤယွၤ အၢၣ်လီၤအဝဲသ့ၣ်. ယဟိဝၤယွၤ တဲဝဲလၢ အဝဲသ့ၣ် လဲၤမ့ၢ်တုၤလၢ ကီၢ်တၢ်စံးပာ်န့ၣ် ယဟိဝၤယွၤ ကဟ့ၣ်အဝဲသ့ၣ် တၢ်အါန့ၢ်ဒံး တၢ်လၢအဝဲသ့ၣ် လိၣ်ဘၣ်ဝဲ. ပဝဲစ့ၢ်ကီး ပမ့ၢ်ဆိကမိၣ်ထံ တၢ်လၢယဟိဝၤယွၤ အၢၣ်လီၤလၢ အကဟ့ၣ်ပှၤ လၢဟီၣ်ခိၣ်သီ ဒီးပမ့ၢ်တသးစၢၢ်ဆၢထဲ တၢ်လၢပတဒိးန့ၢ်ဘၣ် လၢခဲအံၤဘၣ်န့ၣ် ပကသးခုနီၢ်ကီၢ်. တကးဒံးဘၣ် ပမ့ၢ်ဆိကမိၣ်ထံ လံာ်စီဆှံအဆၢတဖၣ်န့ၣ် ကမၤစၢၤပှၤဒ်သိး ပကနာ်န့ၢ်အါထီၣ် ယဟိဝၤယွၤ.

၇. ယဟိဝၤယွၤ မၤစၢၤပှၤသ့ထီဘိန့ၣ် ဘၣ်မနုၤအဃိ ပနာ်န့ၢ်အီၤသ့လဲၣ်.

^၇ ဖဲယဟိဝၤယွၤ သံကွၢ်စီၤမိၤၡ့လၢ “ယၤ ယဟိဝၤယွၤန့ၣ် မ့ၢ်ယစု ဖုၣ်တလၢဧါ” အခါ အအဲၣ်ဒိးသိၣ်လိ စီၤမိၤၡ့ တၢ်ဂ့ၢ်မနုၤလဲၣ်. ဘၣ်သ့ၣ်သ့ၣ် ယဟိဝၤယွၤ အဲၣ်ဒိးလၢ စီၤမိၤၡ့ ကဆိကမိၣ်ထံဝဲ တၢ်ဂ့ၢ်ခံထံၣ်အံၤ. တၢ, ယဟိဝၤယွၤ အတၢ်စိတၢ်ကမီၤန့ၣ် တကတၢၢ် နီတဘျီဘၣ်. ခံ, ယဟိဝၤယွၤ သူဝဲအတၢ်စိတၢ်ကမီၤ သ့လၢတၢ်လီၢ်ကိးတီၤဒဲး. အဒိ ပှၤအံၣ်စရ့လးဖိ မ့ၢ်အိၣ်လၢ ပှၢ်မုၢ်ကနၢသနာ်က့ ယဟိဝၤယွၤ ဒုးအီၣ်အဝဲသ့ၣ် တၢ်ညၣ် သ့ဒီဒူၣ်. အဃိ ယဟိဝၤယွၤ ပာ်ဖျါထီၣ်လၢ အမၤစၢၤ အပှၤဂီၢ်မုၢ် ခီဖျိ “အစုဆူၣ် ဒီးအစုလၢ အယူာ်ဃီၤအသး” သ့လၢ တၢ်လီၢ်ကိးတီၤဒဲး. (စံး ၁၃၆:၁၁, ၁၂) ပသ့ၣ်ညါဘၣ်လၢ ပမ့ၢ်ထံၣ်ဘၣ် တၢ်အိၣ်သးကီခဲ ဒီးပမ့ၢ်အိၣ် ဖဲလဲၣ်ဂ့ၤ ဖဲလဲၣ်ဂ့ၤ သနာ်က့ ပနာ်သ့သပှၢ်တၢၢ်လၢ ယဟိဝၤယွၤ ကမၤစၢၤပှၤ.—စံး ၁၃၈:၆, ၇.

၈. ပတမၤကမၣ်ဘၣ်တၢ် ဒ်သိးဒီး ပှၤအါဂၤလၢ ပှၢ်မုၢ်ကနၢ မၤဝဲတဂ့ၤအဂီၢ် ပကဘၣ် ပလီၢ်သးဒ်လဲၣ်. (ကွၢ်စ့ၢ်ကီးတၢ်ဂီၤ.)

^၈ လၢခံတယံာ်ဘၣ်န့ၣ် ယဟိဝၤယွၤ မၤလၢပှဲၤ အတၢ်အၢၣ်လီၤ ဒီးဆှၢလီၤန့ၢ် အပှၤဂီၢ်မုၢ်လၢ ထိၣ်ပဝံဒီဒူၣ်. သနာ်က့ ပှၤအံၣ်စရ့လးဖိတဖၣ် တစံးဘျုးက့ၤ ယဟိဝၤယွၤ လၢတၢ်လီၤလး တခါအံၤ အဃိဘၣ်. အဝဲသ့ၣ်အါဂၤန့ၣ် သူၣ်လီသးကွံတၢ်အဃိ အဝဲသ့ၣ် လီကီထိၣ်ပဝံ အါန့ၢ်ဒံး အလိၣ်ဘၣ်ဝဲ. တကးဒံးဘၣ် အဝဲသ့ၣ် ဂုာ်ကျဲးစၢး ထၢဝဲထိၣ်ပဝံအါမး ဒီးထၢဝဲဒီနံၤဒီနၤ. ယဟိဝၤယွၤ သးပှံၢ်ထီၣ် “ပှၤလၢအသူၣ်လီသးကွံ တၢ်အီၣ်တဖၣ်” အဃိ အစံၣ်ညီၣ်အဝဲသ့ၣ်. (၄ မိၤ ၁၁:၃၁-၃၄) ပှၤအံၣ်စရ့လးဖိ အဒိအတဲာ်အံၤ ကဲထီၣ်တၢ်ဟ့ၣ်ပလီၢ် လၢပဂီၢ်စ့ၢ်ကီး. ပမၤလိဘၣ်လၢ ပတဘၣ်ကဲထီၣ် ပှၤလၢအသူၣ်လီသးကွံတၢ်ဘၣ်. ပတၢ်အိၣ်မ့ၢ်ဂ့ၤ တအိၣ်ဘၣ်မ့ၢ်ဂ့ၤ တၢ်လၢအရ့ဒိၣ်လၢပဂီၢ်န့ၣ် ပကဘၣ်ပာ်ဆိ “တၢ်လုၢ်ဒိၣ်ပှ့ၤဒိၣ်တဖၣ် လၢမူခိၣ်.” ပကမၤ ဒ်အံၤအဂီၢ် ပကဘၣ်မၤဂ့ၤထီၣ် ပတၢ်ရ့လိာ်သးဒီး ယဟိဝၤယွၤ ဒီးယ့ၣ်ၡူး. (မး ၆:၁၉, ၂၀; လူၤ ၁၆:၉) ပမ့ၢ်ဆဲးမၤဒ်အံၤန့ၣ် ပနာ်သ့သပှၢ်တၢၢ်လၢ ယဟိဝၤယွၤ ကမၤလၢပှဲၤန့ၢ် ပတၢ်လိၣ်ဘၣ်.

၉. ယဟိဝၤယွၤ ကမၤစၢၤပှၤ နီၢ်ကီၢ်န့ၣ် ဘၣ်မနုၤအဃိ ပနာ်န့ၢ်အီၤသ့လဲၣ်.

^၉ ဆၢကတီၢ် ခဲအံၤစ့ၢ်ကီး ယဟိဝၤယွၤ သးအိၣ်မၤစၢၤ အပှၤဂီၢ်မုၢ် ဒီးအမၤစၢၤ အဝဲသ့ၣ်ထီဘိ. အဃိ မ့ၢ်ပတလိၣ် ဘၣ်ယိၣ်တၢ်လၢ ကျိၣ်စ့ ဒီးတၢ်အီၣ်တၢ်အီ အဂီၢ်လၢၤဘၣ်ဧါ. ပကဘၣ်ယိၣ်တၢ်ဒံး.b ဘၣ်ဆၣ် ပနာ်သပှၢ်တၢၢ်လၢ ယဟိဝၤယွၤ တပာ်တ့ၢ်ပှၤ နီတဘျီဘၣ်. ဒီးပမ့ၢ်ထံၣ်ဘၣ် တၢ်ကီတၢ်ခဲ ဒ်လဲၣ်သနာ်က့ ပနာ်သပှၢ်တၢၢ်လၢ ယဟိဝၤယွၤ ကမၤစၢၤပှၤ ဒီးဟ့ၣ်ပှၤ တၢ်ဂံၢ်တၢ်ဘါ ဒ်သိးပလဲၤခီဖျိအီၤကန့ၢ်. အဃိ ပနာ်လၢ ယဟိဝၤယွၤ ကမၤစၢၤပှၤန့ၣ် ပပာ်ဖျါထီၣ် သ့ဒ်လဲၣ်. ပကကွၢ်သကိး တၢ်ဂ့ၢ်ခံထံၣ်. (၁) ဖဲပထံၣ်ဘၣ် ကျိၣ်စ့တၢ်ကီတၢ်ခဲအခါ. (၂) ဖဲပရဲၣ်ကျဲၤ ကျိၣ်စ့တၢ်လိၣ်ဘၣ် လၢခါဆူညါအဂီၢ်အခါ.

ဖဲပထံၣ်ဘၣ် ကျိၣ်စ့တၢ်ကီတၢ်ခဲအခါ

၁၀. ဘၣ်သ့ၣ်သ့ၣ် ပကထံၣ်ဘၣ် ကျိၣ်စ့တၢ်ကီတၢ်ခဲ လၢတၢ်ဂ့ၢ် မနုၤအဃိလဲၣ်.

^၁၀ တၢ်အကတၢၢ် ဒံးဘူးထီၣ်ဒီး ဖျါလၢ ပကထံၣ်ဘၣ် ကျိၣ်စ့တၢ်ကီတၢ်ခဲ ဒံးအါထီၣ်. ခီဖျိလၢ ထံလီၢ်ကီၢ်ပူၤ တၢ်သဘံၣ်သဘုၣ်, တၢ်ဒုးတၢ်ယၤ, န့ဆၢၣ် တၢ်ဘၣ်ဒိဘၣ်ထံး မ့တမ့ၢ် တၢ်ဆူးတၢ်ဆါအသီ ဟဲအိၣ်ထီၣ်အဃိ ဘၣ်သ့ၣ်သ့ၣ် ပကထံၣ်ဘၣ် တၢ်ကီတၢ်ခဲ ဒ်သိးဒီး ပတၢ်မၤ, ပဟံၣ်ပဃီ ဒီးတၢ်ဖိတၢ်လံၤ တအိၣ်လၢၤဘၣ်. ဒီးဒ်သိး ပကလုၢ်အီၣ်လုၢ်အီ ပဟံၣ်ဖိဃီဖိအဂီၢ် ဘၣ်သ့ၣ်သ့ၣ် ပကဘၣ် ဃုတၢ်မၤ လၢအသီ မ့တမ့ၢ် ပကဘၣ် လဲၤပၠီလၢ တၢ်လီၢ်အဂၤ. အဃိ ဖဲပဘၣ်ဆၢတဲာ်တၢ်အခါ ပပာ်ဖျါထီၣ်လၢ ပနာ်န့ၢ်ယဟိဝၤယွၤ ကသ့ဒ်လဲၣ်.

၁၁. ဖဲပထံၣ်ဘၣ် ကျိၣ်စ့ တၢ်ကီတၢ်ခဲအခါ ပကဘၣ်မၤဒ်လဲၣ်. (လူၤကၣ် ၁၂:၂၉-၃၁)

^၁၁ ဖဲပထံၣ်ဘၣ် ကျိၣ်စ့ တၢ်ကီတၢ်ခဲအခါ ပမ့ၢ်တဲဖျါထီၣ် ပတၢ်ဘၣ်ယိၣ်လၢ ယဟိဝၤယွၤ အအိၣ်န့ၣ် ကကဲထီၣ် တၢ်မၤစၢၤ လၢပဂီၢ်ဒိၣ်မး. (ကတိၤ ၁၆:၃) အဃိ ဒ်သိး ပဆၢတဲာ်တၢ် လၢအဘၣ် ကသ့အဂီၢ် ပကဘၣ်ဃ့အီၤ တၢ်ကူၣ်သ့. ဒီးဒ်သိး ပတ “ဘၣ်ယိၣ်တၢ် တလၢကွံာ်အခၢး” တဂ့ၤအဂီၢ် ပကဘၣ်ဃ့အီၤလၢ အကမၤစၢၤပှၤဒ်သိး ပကပာ်သးမုာ်မုာ်. (ဖး လူၤကၣ် ၁၂:၂၉-၃၁.) ဆဲးဃ့အီၤ လၢကမၤစၢၤပှၤ ဒ်သိး ပကသးမံဒီး တၢ်လၢအအိၣ်ဒီးပှၤ. (၁ တံၤ ၆:၇, ၈) တကးဒံးဘၣ် ဖဲပထံၣ်ဘၣ် ကျိၣ်စ့ တၢ်ကီတၢ်ခဲအခါ ပကဘၣ် မၤဒ်လဲၣ်န့ၣ် ပဃုကွၢ် တၢ်ဟ့ၣ်ကူၣ်လၢ လံာ်လဲၢ်လၢ ပတၢ်ကရၢကရိ ထုးထီၣ်ဝဲ အပူၤသ့. ပှၤအါဂၤ တဲဝဲလၢ တၢ်ဂီၤမူ ဒီးတၢ်ဂ့ၢ်လၢ အအိၣ်လၢ jw.org ဝဲးပဆဲးအပူၤ လၢအဘၣ်ဃးဒီး ကျိၣ်စ့တၢ်ကီတၢ်ခဲန့ၣ် မၤစၢၤအဝဲသ့ၣ်အါမး.

၁၂. ဒ်သိး ခရံာ်ဖိတဂၤ ကဆၢတဲာ်တၢ် အဂ့ၤကတၢၢ် လၢအဟံၣ်ဖိဃီဖိအဂီၢ် အသံကွၢ်လီၤသး သ့ဒ်လဲၣ်.

^၁၂ ပှၤတနီၤန့ၣ် လဲၤမၤတၢ်လၢ တၢ်လီၢ်အဂၤ ဒီးဘၣ်အိၣ်ယံၤဒီး အဟံၣ်ဖိဃီဖိ. ဘၣ်ဆၣ် လၢခံ အဝဲသ့ၣ် သ့ၣ်ညါဝဲလၢ အတၢ်ဆၢတဲာ်န့ၣ် တဘၣ်ဘၣ်. အဃိ တချုးလၢ ပတူၢ်လိာ်တၢ်မၤ တမံၤမံၤဒံးဘၣ်အခါ ပတဘၣ် ဆိကမိၣ်ထဲလၢ ပကန့ၢ်ဘၣ်စ့ ထဲလဲၣ်ဘၣ်. အဆိကတၢၢ်န့ၣ် ပကဘၣ် ဆိကမိၣ်လၢ မ့ၢ်တၢ်မၤအံၤ ကမၤဘၣ်ဒိ ပတၢ်ရ့လိာ်သးဒီး ပဟံၣ်ဖိဃီဖိ ဒီးယဟိဝၤယွၤဧါ. (လူၤ ၁၄:၂၈) အဃိ ပကြၢးသံကွၢ်လီၤပသးလၢ ‘ယမ့ၢ်လဲၤမၤတၢ်လၢ တၢ်လီၢ်အဂၤ ဒီးအိၣ်ယံၤဒီး ယသးသမူတံၤသကိးန့ၣ် တၢ်လၢ ကမၤဘၣ်ဒိ ယတၢ်ဆီဟံၣ်ဆီဃီ အိၣ်ဧါ. ယလဲၤထီၣ်တၢ်အိၣ်ဖှိၣ်, ဟးစံၣ်တဲၤတဲလီၤတၢ် ဒီးရ့လိာ်သးဒီး ဒီပုၢ်ဝဲၢ်မုၣ်ခွါ ကချုးဧါ.’ တကးဒံးဘၣ် နဖိမ့ၢ်အိၣ်န့ၣ် နကဘၣ် သံကွၢ်လီၤနသးလၢ တၢ်သံကွၢ် အရ့ဒိၣ်တဖျၢၣ်အံၤ. ‘ယမ့ၢ်အိၣ်ယံၤဒီး ယဖိန့ၣ် ယလုၢ်ဒိၣ်ထီၣ်အီၤလၢ “ယဟိဝၤယွၤ အတၢ်သိၣ်လိနဲၣ်လိ ဒီးအတၢ်ဟံးစုနဲၣ်ကျဲ” ကသ့ဧါ. (အ့း ၆:၄) အဃိ ဖဲပဘၣ် ဆၢတဲာ်တၢ်အခါ ပကဘၣ်မၤထွဲ ယဟိဝၤယွၤ အတၢ်ဟံးစုနဲၣ်ကျဲ ဒီးတဘၣ်မၤဒ် ပဘူးပတံၢ် ဒီးပသကိးတဖၣ် တဲပှၤအသိးဘၣ်.c ထိနံၤ လၢအအိၣ်လၢ ကီၢ်အ့ၡၢၣ် မုၢ်နုာ်တခီန့ၣ် ပှၤကိးအီၤလၢ အကလဲၤမၤတၢ်လၢ ထံကီၢ်အဂၤ လၢအကဒိးန့ၢ်ဘၣ်အလဲ ဂ့ၤမးန့ၣ် တဘျုးဘျီညါ. ဘၣ်ဆၣ် အဃ့ထုကဖၣ် ဘၣ်ဃးဒီး တၢ်ဂ့ၢ်အံၤ ဒီးအတဲသကိးတၢ်ဒီး အမါဝံၤအလီၢ်ခံ အဆၢတဲာ်လီၤသးလၢ အတလဲၤမၤတၢ်လၢ ထံကီၢ်အဂၤဘၣ်. ထိနံၤ ဒီးအဟံၣ်ဖိဃီဖိ ဃုကျဲလၢ ကအိၣ်မူက့ၤ ယိယိဖိ ဒီးသူစှၤလီၤစ့. ခဲအံၤ ထိနံၤ တဲဝဲလၢ “ယမၤစၢၤဘၣ် ပှၤအါဂၤလၢ ကသ့ၣ်ညါထီၣ် ယဟိဝၤယွၤ ဒီးယထံၣ်ဘၣ်လၢ ပဖိတဖၣ် အဲၣ်ယဟိဝၤယွၤ ဒီးသးဆူၣ်လၢ တၢ်မ့ၢ်တၢ်တီ အဂီၢ်ဒိၣ်မး. ယၤဒီးယဟံၣ်ဖိဃီဖိန့ၣ် ပသ့ၣ်ညါဘၣ်လၢ ပမ့ၢ်မၤထွဲ ယ့ၣ်ၡူး အတၢ်ကတိၤ ဖဲ မးသဲ ၆:၃၃ န့ၣ် ယဟိဝၤယွၤ ကကွၢ်ထွဲပှၤ သပှၢ်တၢၢ်.”

ဖဲပရဲၣ်ကျဲၤ ကျိၣ်စ့တၢ်လိၣ်ဘၣ် လၢခါဆူညါအဂီၢ်အခါ

၁၃. ခါဆူညါ ဒ်သိး ပကျိၣ်စ့ ကအိၣ်ဝဲ လၢလၢလီၢ်လီၢ်အဂီၢ် ခဲအံၤ ပမၤမနုၤသ့လဲၣ်.

^၁၃ ဖဲပရဲၣ်ကျဲၤ ကျိၣ်စ့တၢ်လိၣ်ဘၣ် လၢခါဆူညါအဂီၢ်အခါ ပကဘၣ် ပာ်ဖျါထီၣ်လၢ ပနာ်န့ၢ် ယဟိဝၤယွၤစ့ၢ်ကီး. ဒ်သိး ပကျိၣ်စ့ ကအိၣ်ဝဲ လၢလၢလီၢ်လီၢ်အဂီၢ် လံာ်စီဆှံ ဟ့ၣ်ကူၣ်ပှၤလၢ ပကမၤတၢ်ဆူၣ်ဆူၣ်. (ကတိၤ ၆:၆-၁၁) ဒီးပစ့မ့ၢ်အိၣ်ပာ်စၢၤ တနီၤန့ၣ် ကကဲထီၣ် တၢ်မၤစၢၤ လၢပဂီၢ်အဃိ ပမ့ၢ်စူးပာ်စ့ လၢခါဆူညါ အဂီၢ်န့ၣ် တကမၣ်ဘၣ်. (စံၣ် ၇:၁၂) ဘၣ်ဆၣ် ပတဘၣ်ပာ်ဆိ တၢ်ဃုကျိၣ်ဃုစ့ လၢနီၣ်ဂံၢ်တၢ လၢပတၢ်အိၣ်မူ အပူၤဘၣ်.

၁၄. ဖဲပရဲၣ်ကျဲၤ ကျိၣ်စ့တၢ်လိၣ်ဘၣ် လၢခါဆူညါ အဂီၢ်အခါ ဒ်သိး ပတဘၣ်ယိၣ်တၢ် အါတလၢတဂ့ၤအဂီၢ် ဧ့ၤဘြံၤ ၁၃:၅ မၤစၢၤပှၤ သ့ဒ်လဲၣ်.

^၁၄ ယ့ၣ်ၡူး တဲတၢ်ကတိၤဒိ ဘၣ်ဃးဒီး ပှၤတဂၤလၢ အစူးပာ်စ့အါအါ ဘၣ်ဆၣ် “ကစၢ်ယွၤမ့ၢ်တထံၣ်အီၤလၢ ပှၤထူးပှၤတီၤတဂၤဘၣ်” န့ၣ် အတအိၣ်ဒီး တၢ်ကူၣ်သ့ဘၣ်. (လူၤ ၁၂:၁၆-၂၁) ခဲမုၢ်ဆ့ၣ် တၢ်ကမၤအသး ဒ်လဲၣ်န့ၣ် ပှၤတသ့ၣ်ညါဝဲ နီတဂၤဘၣ်. (ကတိၤ ၂၃:၄, ၅; ယၤ ၄:၁၃-၁၅) တကးဒံးဘၣ် ယ့ၣ်ၡူး တဲဝဲလၢ ပှၤကိးဂၤဒဲးလၢ အအဲၣ်ဒိးကဲထီၣ် အပျဲၢ်အဘီၣ်န့ၣ် ကဘၣ်သးအိၣ် “ပာ်တ့ၢ်ကွံာ်” တၢ်လၢအအိၣ်ဒီးအီၤ ခဲလၢာ်. (လူၤ ၁၄:၃၃) လၢညါ ဖဲတၢ်မၢဖိအစိၤန့ၣ် ခရံာ်ဖိလၢ အအိၣ်လၢ ကီၢ်ယူဒၤတဖၣ် မ့ၢ်ဘၣ်တူၢ်ၡူကွံာ် တၢ်လၢ အအိၣ်ဒီးအီၤခဲလၢာ် သနာ်က့ အဝဲသ့ၣ် သးအိၣ်တူၢ်ၡူကွံာ်ဝဲ. (ဧ့ၤ ၁၀:၃၄) မ့မ့ၢ်လၢ ဆၢကတီၢ် ခဲအံၤန့ၣ် ခီဖျိလၢ ဒီပုၢ်ဝဲၢ်မုၣ်ခွါအါဂၤ တမၤဘၣ်ဃးသးဒီး ထံဂ့ၢ်ကီၢ်ဂ့ၢ်ဘၣ်အဃိ အဝဲသ့ၣ် တၢ်မၤတအိၣ်လၢၤဘၣ်. (လီၣ် ၁၃:၁၆, ၁၇) ဘၣ်ဆၣ် ဒ်သိး အဝဲသ့ၣ် တဘၣ်ယိၣ်တၢ် အါတလၢ တဂ့ၤအဂီၢ် တၢ်မနုၤ မၤစၢၤအဝဲသ့ၣ်လဲၣ်. ယဟိဝၤယွၤ အတၢ်အၢၣ်လီၤ လၢအတဲဝဲလၢ “ယတလဲၤသဒၣ်နၤ နီတဘျီဘၣ် ဒီးယတပာ်တ့ၢ်နၤ နီတဘျီဘၣ်” န့ၣ် အဝဲသ့ၣ် နာ်ဝဲသပှၢ်တၢၢ်. (ဖး ဧ့ၤဘြံၤ ၁၃:၅.) အဃိ ခဲအံၤ ပဂုာ်ကျဲးစၢး လၢအဂ့ၤကတၢၢ် ဒ်သိးကရဲၣ်ကျဲၤပာ်စၢၤ ကျိၣ်စ့တၢ်လိၣ်ဘၣ် လၢခါဆူညါအဂီၢ် ဒီးတၢ်မ့ၢ်ကဲထီၣ်သးဒီးပှၤ တမံၤဂ့ၤ တမံၤဂ့ၤ သနာ်က့ ပနာ်သပှၢ်တၢၢ်လၢ ယဟိဝၤယွၤ ကမၤစၢၤပှၤ.

၁၅. မိပါတဖၣ် ကြၢးအိၣ်ဒီး တၢ်ထံၣ်အကြၢးအဘၣ် လၢအဖိအဖီခိၣ်ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၅ လၢတၢ်လီၢ်တနီၤန့ၣ် မိပါတဖၣ် တိာ်ပာ်ဝဲလၢ ဖဲအသးပှၢ်ထီၣ်အခါ အဖိကလုၢ်အီၣ်လုၢ်အီ ဒီးကွၢ်ထွဲက့ၤအီၤ အဃိအဝဲသ့ၣ် ဟံးအဖိ. ဘၣ်ဆၣ် လံာ်စီဆှံ တဲဝဲလၢ မိပါတဖၣ်န့ၣ် ကဘၣ်မၤလၢပှဲၤန့ၢ် အဖိတၢ်လိၣ်ဘၣ်. (၂ ကရံၣ် ၁၂:၁၄) ဖဲမိပါတဖၣ် သးပှၢ်ထီၣ်အခါ ဘၣ်သ့ၣ်သ့ၣ် အဝဲသ့ၣ် ကလိၣ်ဘၣ် ကျိၣ်စ့တၢ်မၤစၢၤ ဒီးတၢ်မၤစၢၤ အဂၤတဖၣ် လၢအဖိအအိၣ် ဒီးဖိအါဂၤန့ၣ် သးအိၣ်မၤစၢၤ အမိအပါ. (၁ တံၤ ၅:၄) ဘၣ်ဆၣ် မိပါလၢ အနာ်န့ၢ်ယဟိဝၤယွၤန့ၣ် သ့ၣ်ညါဝဲလၢ အဝဲသ့ၣ် မ့ၢ်လုၢ်ဒိၣ်ထီၣ်အဖိ ဒ်သိးအဖိ ကကဲထီၣ် ပှၤလၢအဘူၣ်ထီၣ်ဘါထီၣ် ယဟိဝၤယွၤန့ၣ် အဝဲသ့ၣ် ကဒိးန့ၢ်ဘၣ် တၢ်သးခုအါန့ၢ်ဒံး အလုၢ်ဒိၣ်ထီၣ်အဖိ ဒ်သိး အဖိကကွၢ်ထွဲက့ၤအီၤဒံး.—၃ ယိၤ ၄.

၁၆. မိပါတဖၣ် မၤစၢၤအဖိလၢ ကရဲၣ်ကျဲၤ ကျိၣ်စ့တၢ်လိၣ်ဘၣ် လၢခါဆူညါအဂီၢ် ကသ့ဒ်လဲၣ်. (အ့းဖ့းစူး ၄:၂၈)

^၁၆ ဖဲမိပါတဖၣ် ရဲၣ်ကျဲၤ ကျိၣ်စ့တၢ်လိၣ်ဘၣ် လၢခါဆူညါ အဂီၢ်အခါ အဝဲသ့ၣ် မ့ၢ်နာ်န့ၢ် ယဟိဝၤယွၤန့ၣ် ကကဲထီၣ် တၢ်မၤစၢၤလၢ အဖိကနာ်န့ၢ် ယဟိဝၤယွၤစ့ၢ်ကီး. အဃိ ဖဲသုဖိ နီၢ်ဆံးဒံးအခါ သိၣ်လိအဝဲသ့ၣ်လၢ အဝဲသ့ၣ် မ့ၢ်မၤတၢ်ဆူၣ်ဆူၣ်န့ၣ် အကဒိးန့ၢ်ဘၣ်အဘျုး. (ကတိၤ ၂၉:၂၁; ဖး အ့းဖ့းစူး ၄:၂၈.) ဒီးဖဲအဝဲသ့ၣ် ထီၣ်ကၠိအခါ မၤစၢၤအဝဲသ့ၣ်ဒ်သိး ကကျဲးစၢး တၢ်မၤလိ လၢအဂ့ၤကတၢၢ်. တကးဒံးဘၣ် ဖဲသုမၤစၢၤသုဖိဒ်သိး အကဆၢတဲာ်လီၤသးလၢ အကဃုတၢ်ကူၣ်ဘၣ်ကူၣ်သ့ ထဲလဲၣ်အခါ ဃုကွၢ်လံာ်စီဆှံ အတၢ်ဟံးစုနဲၣ်ကျဲ ဒီးမၤထွဲအီၤ. သုတၢ်တိာ်ပာ်န့ၣ် ကဘၣ်မ့ၢ်ဝဲလၢ သုကမၤစၢၤသုဖိ ဒ်သိး ခါဆူညါ အကွၢ်ထွဲလီၤက့ၤအသးကသ့, စံၣ်တဲၤတဲလီၤတၢ်ကချုး ဒီးလၢခံ မ့ၢ်သ့န့ၣ် ကမၤပှၤလဲၤလၢညါ.

၁၇. ပနာ်န့ၢ် တၢ်မနုၤသ့လဲၣ်.

^၁၇ ယဟိဝၤယွၤ အိၣ်ဒီးတၢ်သ့တၢ်ဘၣ် ဒီးအသးအိၣ် မၤလၢပှဲၤန့ၢ် ပနီၢ်ခိ တၢ်လိၣ်ဘၣ်န့ၣ် ပနာ်န့ၢ်အီၤသ့. ဒီးဒ်တၢ်အကတၢၢ် ဒံးဘူးထီၣ်အသိး ပကထံၣ်ဘၣ် တၢ်မၤကွၢ် ဒံးအါထီၣ်အဃိ ပကဘၣ်နာ်န့ၢ် ယဟိဝၤယွၤ အါန့ၢ်ခဲအံၤဒံး. တၢ်မ့ၢ်ကဲထီၣ်သး ဒ်လဲၣ်ဒ်လဲၣ် သနာ်က့ ပကဘၣ်နာ် နီၢ်ကီၢ်လၢ ယဟိဝၤယွၤ ကသူဝဲ အတၢ်စိတၢ်ကမီၤ လၢကမၤလၢပှဲၤန့ၢ် ပတၢ်လိၣ်ဘၣ်. တကးဒံးဘၣ် ပမ့ၢ်အိၣ် ဖဲလဲၣ်ဂ့ၤဖဲလဲၣ်ဂ့ၤ သနာ်က့ ပနာ်သ့သပှၢ်တၢၢ်လၢ ယဟိဝၤယွၤ ကသူဝဲ အစုလၢအဆူၣ် ဒီးအစုလၢ အယူာ်ဃီၤအသး ဒ်သိးကမၤစၢၤပှၤ.