ပတအိၣ်ထဲတဂၤ နီတဘျီဘၣ်

၁-၂. (က) ပမ့ၢ်ထံၣ်ဘၣ် တၢ်ကီတၢ်ခဲသနာ်က့ ဘၣ်မနုၤအဃိ ပနာ်သ့လၢ ပတအိၣ်ထဲတဂၤ နီတဘျီဘၣ်လဲၣ်. (ခ) လၢတၢ်မၤလိအံၤ ပကတဲသကိး တၢ်ဂ့ၢ်မနုၤလဲၣ်.

ဖဲပထံၣ်ဘၣ် တၢ်အိၣ်သးကီခဲအခါ ပကတူၢ်ဘၣ် ဒ်သိးဒီး ပအိၣ်လၢ ပှၢ်ဒိၣ်ပှၢ်ယိာ်အပူၤ ဒီးပဟးဃုကျဲ တဘၣ်ဘၣ်. ဘၣ်ဆၣ် ပတအိၣ်ထဲတဂၤဘၣ်. တၢ်ကီတၢ်ခဲလၢ ပထံၣ်ဘၣ်န့ၣ် ပပၢ်ယဟိဝၤယွၤ သ့ၣ်ညါဝဲ ဒီးအအၢၣ်လီၤလၢ အကမၤစၢၤပှၤ. အမၤမုာ်ထီၣ်ပသး ဒီးအတဲပှၤလၢ “ယကမၤစၢၤသု သပှၢ်တၢၢ်.”—ၡါ ၄၁:၁၀.

^၂ လၢတၢ်မၤလိအံၤ ပကတဲသကိး ဘၣ်ဃးဒီး ယဟိဝၤယွၤ မၤစၢၤပှၤ ခီဖျိ (၁) အဟံးစုနဲၣ်ကျဲပှၤ, (၂) အဟ့ၣ်ပှၤ တၢ်လၢပလိၣ်ဘၣ်, (၃) အဒီသဒၢပှၤ, (၄) အမၤမုာ်ထီၣ်ပသး. ပမ့ၢ်ထံၣ်ဘၣ် တၢ်ကီတၢ်ခဲ ဒ်လဲၣ်ဂ့ၤဒ်လဲၣ်ဂ့ၤ သနာ်က့ ယဟိဝၤယွၤ အၢၣ်လီၤပှၤလၢ အတသးပ့ၤနီၣ်ပှၤ ဒီးအတပာ်တ့ၢ်ပှၤ နီတဘျီဘၣ်. အဃိ ပတအိၣ်ထဲတဂၤ နီတဘျီဘၣ်.

ယဟိဝၤယွၤ ဟံးစုနဲၣ်ကျဲပှၤ

၃-၄. ယဟိဝၤယွၤ ဟံးစုနဲၣ်ကျဲပှၤဒ်လဲၣ်. (စံးထီၣ်ပတြၢၤ ၄၈:၁၄)

^၃ ဖး စံးထီၣ်ပတြၢၤ ၄၈:၁၄. ယဟိဝၤယွၤ သ့ၣ်ညါဝဲလၢ ပဟံးစုနဲၣ်ကျဲလီၤ ပနီၢ်ကစၢ်သး တသ့ဘၣ် ဒီးပလိၣ်ဘၣ် အတၢ်မၤစၢၤ. ဆၢကတီၢ်ခဲအံၤ ယဟိဝၤယွၤ ဟံးစုနဲၣ်ကျဲ အခ့အပှၤလၢ အသးတီတဖၣ် ဒ်လဲၣ်. အဟံးစုနဲၣ်ကျဲ အဝဲသ့ၣ်ခီဖျိ လံာ်စီဆှံ. (စံး ၁၁၉:၁၀၅) ယဟိဝၤယွၤ သူဝဲလံာ်စီဆှံဒ်သိး ကမၤစၢၤပှၤလၢ ပကဆၢတဲာ် တၢ်လၢအဘၣ် ဒီးမၤအါထီၣ် တၢ်ဂ့ၤတၢ်ဝါလၢ ကမၤစၢၤပှၤဒ်သိး ပကဒိးန့ၢ်ဘၣ် တၢ်သးခုနီၢ်ကီၢ် လၢခဲအံၤ ဒီးခါဆူညါ လီၤထူလီၤယိာ်.a အဒိ အသိၣ်လိပှၤလၢ ပကပျၢ်ကွံာ် ပှၤဂၤတၢ်ကမၣ် ဒီးတဆဲးသးပှံၢ်ထီၣ်တၢ် လၢၤဘၣ်, ပကမၤတၢ် တီတီလိၤလိၤ လၢတၢ်ခဲလၢာ်အပူၤ ဒီးပကအဲၣ်လိာ်သးဒိၣ်ဒိၣ် လၢပသးဒီဖျၢၣ်. (စံး ၃၇:၈; ဧ့ၤ ၁၃:၁၈; ၁ ပ့း ၁:၂၂) ပမ့ၢ်ပာ်ဖျါထီၣ် တၢ်ဂ့ၤတၢ်ဝါ တဖၣ်အံၤန့ၣ် ပကကဲထီၣ် မိပါလၢအဂ့ၤ, သးသမူတံၤသကိး လၢအဂ့ၤ ဒီးသကိးလၢအဂ့ၤ.

^၄ တကးဒံးဘၣ် လၢလံာ်စီဆှံပူၤန့ၣ် ယဟိဝၤယွၤ ပာ်ဖျါထီၣ်န့ၢ်ပှၤ ဘၣ်ဃးဒီး ပှၤလၢအထံၣ်ဘၣ် တၢ်ကီတၢ်ခဲ ဒီးအိၣ်ဒီးတၢ်တူၢ်ဘၣ် ဒ်သိးဒီးပှၤ အဂ့ၢ်အါမး. (၁ ကရံၣ် ၁၀:၁၃; ယၤ ၅:၁၇) ပမ့ၢ်ဖး ပှၤတဖၣ်အံၤအဂ့ၢ် ဒီးမၤထွဲ တၢ်လၢ ပမၤလိဘၣ်လၢ အဝဲသ့ၣ်အအိၣ်န့ၣ် ပကသ့ၣ်ညါဘၣ် တၢ်ဂ့ၢ်အရ့ဒိၣ်ခံထံၣ်. တၢ, ပသ့ၣ်ညါဘၣ်လၢ ပတအိၣ်ထဲတဂၤဘၣ်. ပှၤဂၤတူၢ်ဘၣ်စ့ၢ်ကီး တၢ်နးတၢ်ဖှီၣ် ဒ်သိးဒီးပှၤ ဒီးခီဖျိလၢ ယဟိဝၤယွၤ အတၢ်မၤစၢၤအဃိ အဝဲသ့ၣ် လဲၤခီဖျိဝဲန့ၢ်. (၁ ပ့း ၅:၉) ခံ, ပလဲၤခီဖျိ ပတၢ်ကီတၢ်ခဲ ကန့ၢ်အဂီၢ် ပကဘၣ်မၤဒ်လဲၣ်န့ၣ် ပသ့ၣ်ညါဘၣ် စ့ၢ်ကီး.—ရိ ၁၅:၄.

၅. ယဟိဝၤယွၤ ကဟံးစုနဲၣ်ကျဲပှၤအဂီၢ် အသူမတဂၤလဲၣ်.

^၅ ယဟိဝၤယွၤ သူစ့ၢ်ကီး ဒီပုၢ်ဝဲၢ်မုၣ်ခွါလၢ ကဟံးစုနဲၣ်ကျဲပှၤ.b အဒိ ဖဲကဝီၤအပှၤကွၢ်တၢ်တဖၣ် လဲၤဟးအိၣ်သကိး တၢ်အိၣ်ဖှိၣ်အခါ ပန့ၢ်ဂံၢ်န့ၢ်ဘါထီဘိ. အဝဲသ့ၣ် ဟ့ၣ်တၢ်စံၣ်တဲၤတဲလီၤတၢ်န့ၣ် မၤဂၢၢ်ကျၢၤထီၣ် ပတၢ်နာ် ဒီးမၤစၢၤပှၤဒ်သိး ပကဆဲးအိၣ်ဒီး တၢ်ဃူတၢ်ဖိး. (မၤတၢ် ၁၅:၄၀–၁၆:၅) တၢ်အိၣ်ဖှိၣ်သးပှၢ်တဖၣ်စ့ၢ်ကီး မၤတၢ်ဆူၣ်ဒိၣ်မး ဒီးဒ်သိး ပတၢ်ရ့လိာ်သးဒီး ယဟိဝၤယွၤ ကဂ့ၤအဂီၢ် အဝဲသ့ၣ်မၤစၢၤပှၤ လၢတၢ်သူၣ်အိၣ်သးအိၣ်. (၁ ပ့း ၅:၂, ၃) မိပါတဖၣ် သိၣ်လိအဖိလၢ ကအဲၣ်ယဟိဝၤယွၤ, မၤစၢၤအဝဲသ့ၣ်ဒ်သိး ကဆၢတဲာ်တၢ် လၢအဘၣ်, အိၣ်ဒီး လုၢ်လၢ်သကဲာ်ပဝး လၢအဂ့ၤ ဒီးမၤနီၢ်သးအတၢ်ဖံးတၢ်မၤထီဘိ. (ကတိၤ ၂၂:၆) ဒီးဒီပုၢ်ဝဲၢ်မုၣ်လၢ အဒိၣ်တုာ်ခိၣ်ပှဲၤလၢ နီၢ်သးတခီန့ၣ် အဝဲသ့ၣ် မၤစၢၤဒီပုၢ်ဝဲၢ်မုၣ်သးစၢ်တဖၣ် ခီဖျိ အဒိအတဲာ် လၢအဂ့ၤ, ဟ့ၣ်ကူၣ်ဟ့ၣ်ဖး ဒီးဟ့ၣ်ဂံၢ်ဟ့ၣ်ဘါ အဝဲသ့ၣ်လၢ တၢ်အဲၣ်တၢ်ကွံ.—တံ ၂:၃-၅.

၆. ဒ်သိး ပကဒိးန့ၢ်ဘၣ် အဘျုးလၢ ယဟိဝၤယွၤ အတၢ်ဟံးစုနဲၣ်ကျဲအဂီၢ် ပကဘၣ်မၤဒ်လဲၣ်.

^၆ ဒ်သိး ပကဆၢတဲာ် တၢ်လၢအဘၣ် ဒီးအိၣ်ဒီး တၢ်သးခုလၢ ပတၢ်အိၣ်မူပူၤအဂီၢ် ယဟိဝၤယွၤ ဟ့ၣ်ပှၤအတၢ်ဟံးစုနဲၣ်ကျဲလံ. ဘၣ်ဆၣ် ဒ်သိး ပကဒိးန့ၢ်ဘၣ် အဘျုးအဂီၢ် ပကဘၣ်မၤဒ်လဲၣ်. ကတိၤဒိ ၃:၅, ၆ တဲဝဲလၢ “နာ်န့ၢ် ယဟိဝၤယွၤလၢ နသးဒီဖျၢၣ် ဒီးတဘၣ် သန့ၤနသးလၢ နနီၢ်ကစၢ် အတၢ်နၢ်ပၢၢ်တဂ့ၤ.” ပမ့ၢ်မၤထွဲ အတၢ်ဟံးစုနဲၣ်ကျဲန့ၣ် “အဝဲ ကဒုးနဲၣ်[ပ] ကျဲလၢအဘၣ်.” အဲၣ်ဒိးတဲဝဲလၢ ယဟိဝၤယွၤ ကမၤစၢၤပှၤဒ်သိး ပကဟးဆှဲး တၢ်ကီတၢ်ခဲ ဒီးအိၣ်ဒီးတၢ်သးခုအါထီၣ် လၢပတၢ်အိၣ်မူပူၤ. ယဟိဝၤယွၤ သ့ၣ်ညါ ပဝဲတဂၤဘၣ်တဂၤ ဂ့ၤဂ့ၤ, အအဲၣ်ပှၤဒိၣ်မး ဒီးအဟ့ၣ်ပှၤ တၢ်ဟ့ၣ်ကူၣ် လၢပလိၣ်ဘၣ်အဃိ ပစံးဘျုးအီၤဒိၣ်မး.—စံး ၃၂:၈.

ယဟိဝၤယွၤဟ့ၣ်ပှၤ တၢ်လၢပလိၣ်ဘၣ်

၇. ယဟိဝၤယွၤ ကဟ့ၣ်ပှၤ တၢ်လၢပလိၣ်ဘၣ်န့ၣ် ဘၣ်မနုၤအဃိ ပနာ်န့ၢ်အီၤသ့လဲၣ်. (ဖံလံးပံၤ ၄:၁၉)

^၇ ဖး ဖံလံးပံၤ ၄:၁၉. ယဟိဝၤယွၤ ဟံးစုနဲၣ်ကျဲပှၤ တကးဒံးဘၣ် ဖဲပဂုာ်ကျဲးစၢး မၤတၢ်ဆူၣ်ဆူၣ် ဒ်သိးပကဒိးန့ၢ်ဘၣ် တၢ်အီၣ်တၢ်အီ, တၢ်ကူတၢ်ကၤ ဒီးတၢ်အိၣ်တၢ်ဆိးအလီၢ်အခါ အမၤစၢၤပှၤစ့ၢ်ကီး. (မး ၆:၃၃; ၂ သ့း ၃:၁၂) ဒ်သိး ပကဒိးန့ၢ်ဘၣ် နီၢ်ခိတၢ်လိၣ်ဘၣ် တဖၣ်အံၤအဂီၢ် ပကဘၣ်ယိၣ်တၢ် ဘၣ်ဆၣ် ယဟိဝၤယွၤ တအဲၣ်ဒိးလၢ ပကဘၣ်ယိၣ်တၢ် အါတလၢဘၣ်. (မး ၆:၂၅) ဘၣ်မနုၤအဃိလဲၣ်. ပသ့ၣ်ညါလၢ ပပၢ် ယဟိဝၤယွၤန့ၣ် အတပာ်တ့ၢ် အခ့အပှၤလၢ အတီဒီးအီၤ နီတဘျီဘၣ်. (မး ၆:၈; ဧ့ၤ ၁၃:၅) ဖဲအတဲလၢ အကဟ့ၣ်ပှၤ တၢ်လၢပလိၣ်ဘၣ်အခါ ပနာ်န့ၢ်အီၤသ့နီၢ်ကီၢ်.

၈. ယဟိဝၤယွၤ မၤစၢၤစီၤဒၤဝံး ဒ်လဲၣ်.

^၈ ဆိကမိၣ်ကွၢ် ဘၣ်ဃးဒီး ယဟိဝၤယွၤ မၤစၢၤစီၤဒၤဝံး ဒ်လဲၣ်အဂ့ၢ်. ဖဲစီၤဒၤဝံး ထံၣ်ဘၣ် တၢ်ကီတၢ်ခဲ တဘျုးနံၣ် ခီဖျိလၢ အဘၣ်ဃ့ၢ်ပူၤဖျဲး အသးအခါ ဒ်သိး အီၤဒီးအပှၤတဖၣ် ကဆဲးမူအဂီၢ် ယဟိဝၤယွၤ ဟ့ၣ်အဝဲသ့ၣ် တၢ်လၢအလိၣ်ဘၣ်ဝဲ. ဖဲစီၤဒၤဝံး ဆိကမိၣ်ထီၣ်က့ၤ တၢ်ဆၢကတီၢ်ဖဲ ယဟိဝၤယွၤ ကွၢ်ထွဲအီၤအခါ အတဲဝဲ “လၢညါ ယမ့ၢ်ပှၤသးစၢ် ဒီးခဲအံၤယသးပှၢ်လံ. ဘၣ်ဆၣ် ပှၤတီပှၤလိၤ ဘၣ်တၢ်ပာ်တ့ၢ်ကွံာ်အီၤ မ့တမ့ၢ် အဖိတဖၣ် ဘၣ်ဟးဃ့အီၣ်တၢ်န့ၣ် ယတထံၣ်ဘၣ် နီတဂၤဘၣ်.” (စံး ၃၇:၂၅) ဒ်စီၤဒၤဝံးအသိး ဘၣ်သ့ၣ်သ့ၣ် နထံၣ်ဘၣ်လၢ နနီၢ်ကစၢ်လၢ ယဟိဝၤယွၤ ဟ့ၣ်အခ့အပှၤ တၢ်လၢအဝဲသ့ၣ် လိၣ်ဘၣ်ဝဲထီဘိ.

၉. ဆၢကတီၢ်ခဲအံၤ ဖဲတၢ်ကီတၢ်ခဲ အိၣ်ထီၣ်အခါ ယဟိဝၤယွၤ မၤစၢၤအပှၤဂီၢ်မုၢ် ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၉ ဖဲတၢ်ကီတၢ်ခဲ အိၣ်ထီၣ်အခါ ယဟိဝၤယွၤ မၤစၢၤအပှၤဂီၢ်မုၢ်စ့ၢ်ကီး. အဒိ လၢညါ ဖဲတၢ်သၣ်ဝံၤလီၤဒိ အိၣ်ထီၣ်လၢ ဝ့ၢ်ယရူၤၡလ့ၣ်အခါ ဒီပုၢ်ဝဲၢ်မုၣ်ခွါလၢ အအိၣ်လၢ တၢ်လီၢ်အဂၤတဖၣ် ဆှၢန့ၢ်ဝဲ ခရံာ်ဖိလၢ အအိၣ်ဖဲန့ၣ်တဖၣ်လၢ တၢ်လၢအဝဲသ့ၣ် လိၣ်ဘၣ်ဝဲ. (မၤတၢ် ၁၁:၂၇-၃၀; ရိ ၁၅:၂၅, ၂၆) ဆၢကတီၢ်ခဲအံၤ စ့ၢ်ကီး ဒီပုၢ်ဝဲၢ်မုၣ်ခွါတဖၣ် မၤစၢၤဝဲ ဒီပုၢ်ဝဲၢ်မုၣ်ခွါအဂၤလၢ အလိၣ်ဘၣ် တၢ်မၤစၢၤ. ဖဲတၢ်ဘၣ်ဒိဘၣ်ထံး အိၣ်ထီၣ်အခါ ယဟိဝၤယွၤ သူဝဲအခ့အပှၤလၢ ကဟ့ၣ်မၤစၢၤ ဒီပုၢ်ဝဲၢ်မုၣ်ခွါလၢ တၢ်လၢအဝဲသ့ၣ် လိၣ်ဘၣ်ဝဲ ဒ်သိးဒီး တၢ်အီၣ်တၢ်အီ, ထံ, တၢ်ကူတၢ်ကၤ ဒီးကသံၣ်ကသီ. မ့မ့ၢ် ဒီပုၢ်ဝဲၢ်လၢ အမၤစၢၤတၢ်လၢ တၢ်သူၣ်ထီၣ်ဘှီထီၣ်န့ၣ် အဝဲသ့ၣ် ဘှီဂ့ၤထီၣ်က့ၤ ဟံၣ်ဒီးတၢ်အိၣ်ဖှိၣ်လီၢ်. တကးဒံးဘၣ် ယဟိဝၤယွၤ သူဝဲအခ့အပှၤလၢ ကဟ့ၣ်ဂံၢ်ဟ့ၣ်ဘါ ဒီးမၤမုာ်ထီၣ် ဒီပုၢ်ဝဲၢ်မုၣ်ခွါလၢ အဟံၣ်အဃီ တအိၣ်လၢၤဘၣ် ဒီးပှၤလၢ အဟံၣ်ဖိဃီဖိတဂၤဂၤ သံသဒၣ်အီၤ.

၁၀-၁၁. လၢဘီရဲး အတၢ်လဲၤခီဖျိန့ၣ် ပဒိးန့ၢ်ဘၣ် တၢ်မၤလိဒ်လဲၣ်.

^၁၀ ပှၤလၢ အတဘူၣ်ထီၣ်ဘါထီၣ် ယဟိဝၤယွၤ ဒံးဘၣ်တဖၣ်န့ၣ် ယဟိဝၤယွၤ ဟ့ၣ်စ့ၢ်ကီး အဝဲသ့ၣ်တၢ်လၢ အဝဲသ့ၣ်လိၣ်ဘၣ်ဝဲ. အဃိ ပကြၢးကွၢ်လိ ယဟိဝၤယွၤ ဒီးဃုကျဲလၢ ကမၤဂ့ၤတၢ်လၢ ပှၤလၢ တဘူၣ်ထီၣ်ဘါထီၣ်အီၤဘၣ် အဖီခိၣ်စ့ၢ်ကီး. (ကလၤ ၆:၁၀) ပမ့ၢ်မၤဒ်န့ၣ်န့ၣ် ပကမၤစၢၤဘၣ် အဝဲသ့ၣ်လၢ အကသ့ၣ်ညါအါထီၣ်ပဂ့ၢ် ဒီးအကအဲၣ်ဒိး မၤလိအါထီၣ် ယဟိဝၤယွၤအဂ့ၢ်. ဆိကမိၣ်ကွၢ် ဘီရဲး အတၢ်လဲၤခီဖျိ. ဘီရဲၣ်န့ၣ် အအိၣ်လၢ ကီၢ်ယူၣ်ခြ့ ဒီးအကဲဝဲ ကၠိခိၣ်တဂၤ. အတကဲ ယဟိဝၤပှၤအုၣ်အသးဘၣ် သနာ်က့ အပှၤကၠိဖိလၢ အကဲ ယဟိဝၤပှၤအုၣ်အသးန့ၣ် အရ့ဝဲဂ့ၤဂ့ၤ ဒီးအပာ်ကဲ အဝဲသ့ၣ် တၢ်စူၢ်တၢ်နာ်. ဖဲတၢ်ဒုးကဲထီၣ်အခါ ဘီရဲး ဆၢတဲာ်လီၤအသးလၢ အကဟးထီၣ်လၢ အသဝီ, လဲၤဃ့ၢ်ပူၤဖျဲးအသးလၢ တၢ်လီၢ်အဂၤတတီၤ လၢကီၢ်ပူၤ ဒီးဒီပုၢ်ဝဲၢ်မုၣ်ခွါ မၤစၢၤအီၤ. လၢခံ ဘီရဲး လဲၤထီၣ်ဝဲ တၢ်သ့ၣ်နီၣ်ထီၣ်က့ၤ ယ့ၣ်ၡူးအတၢ်သံအမူး. ဖဲအဆိကမိၣ်ထံက့ၤ ဒီပုၢ်ဝဲၢ်မုၣ်ခွါ အတၢ်မၤစၢၤအခါ အတဲဝဲလၢ “ယစံးဘျုးဘၣ် ယဟိဝၤပှၤအုၣ်အသးဒိၣ်မး. အဝဲသ့ၣ်န့ၣ် အသးဂ့ၤလၢယဖီခိၣ် ဒီးအကွၢ်ထွဲယၤ ဂ့ၤမး.”

^၁၁ ပှၤလၢအတၢ်နာ် ဒ်သိးဒီးပှၤမ့ၢ်ဂ့ၤ တဒ်သိးဒီးပှၤမ့ၢ်ဂ့ၤ ဖဲအဝဲသ့ၣ် လိၣ်ဘၣ် တၢ်မၤစၢၤအခါ ပမ့ၢ်ပာ်ဖျါထီၣ် တၢ်အဲၣ် ဒီးမၤစၢၤအဝဲသ့ၣ်န့ၣ် ပပာ်ဖျါထီၣ်လၢ ပကွၢ်လိ ပပၢ်လၢ အအိၣ်ဒီး တၢ်သးကညီၤ. (လူၤ ၆:၃၁, ၃၆) ပမုၢ်လၢ်လၢ တၢ်အဲၣ်လၢ ပပာ်ဖျါထီၣ်လၢ အဝဲသ့ၣ် အဖီခိၣ်န့ၣ် ကမၤစၢၤအီၤဒ်သိး အကအဲၣ်ဒိး မၤလိအါထီၣ် ယဟိဝၤယွၤအဂ့ၢ် ဒီးဘူၣ်ထီၣ်ဘါထီၣ်အီၤ. (၁ ပ့း ၂:၁၂) ဘၣ်ဆၣ် အဝဲသ့ၣ် ဘူၣ်ထီၣ်ဘါထီၣ် ယဟိဝၤယွၤမ့ၢ်ဂ့ၤ တဘူၣ်ထီၣ်ဘါထီၣ်ဘၣ်မ့ၢ်ဂ့ၤ ခီဖျိလၢ ပဟ့ၣ်တၢ်အဃိ ပကဒိးန့ၢ်ဘၣ် တၢ်သးခုနီၢ်ကီၢ်.—မၤတၢ် ၂၀:၃၅.

ယဟိဝၤယွၤ ဒီသဒၢပှၤ

၁၂. ယဟိဝၤယွၤ အၢၣ်လီၤပာ်စၢၤဝဲလၢ အကဒီသဒၢ အပှၤဂီၢ်မုၢ်ဒ်လဲၣ်. (စံးထီၣ်ပတြၢၤ ၉၁:၁, ၂, ၁၄)

^၁၂ ဖး စံးထီၣ်ပတြၢၤ ၉၁:၁, ၂, ၁၄. ဆၢကတီၢ်ခဲအံၤ ယဟိဝၤယွၤ အၢၣ်လီၤဝဲလၢ အကဒီသဒၢပှၤလၢ တၢ်လၢအကမၤဟးဂီၤ ပတၢ်ရ့လိာ်သးဒီးအီၤ ကိးမံၤဒဲး. ဒ်သိးယဟိဝၤယွၤ အပှၤဂီၢ်မုၢ် ကဆဲးဘူၣ်ထီၣ်ဘါထီၣ်အီၤလၢ ကျဲလၢအဘၣ်အဂီၢ် ယဟိဝၤယွၤ တပျဲလၢ မုၣ်ကီၤလံၢ် ကမၤတံာ်တာ်အဝဲသ့ၣ် နီတဘျီဘၣ်. (ယိၤ ၁၇:၁၅) ဒီးဖဲ “တၢ်နးတၢ်ဖှီၣ်ဖးဒိၣ်” စးထီၣ်အခါ ဒ်သိး ပကအိၣ်ဒီး တၢ်နာ်လၢ အဂၢၢ်ကျၢၤအဂီၢ် ပနာ်သ့သပှၢ်တၢၢ်လၢ ယဟိဝၤယွၤ ကမၤစၢၤပှၤ ဒီးကမၤပူၤဖျဲးပှၤ.—လီၣ် ၇:၉, ၁၄.

၁၃. ယဟိဝၤယွၤ ဒီသဒၢပဝဲ တဂၤဘၣ်တဂၤဒ်လဲၣ်.

^၁၃ ယဟိဝၤယွၤ ဒီသဒၢပဝဲ တဂၤဘၣ်တဂၤဒ်လဲၣ်. ဒ်သိးပပဲာ်ထံနီၤဖး တၢ်ဂ့ၤဒီးတၢ်အၢ ကဘၣ်အဂီၢ် ယဟိဝၤယွၤဟ့ၣ်ပှၤ အကလုၢ်ကထါ လံာ်စီဆှံ. (ဧ့ၤ ၅:၁၄) ဖဲပအိၣ်မူမၤထွဲ လံာ်စီဆှံတၢ်ဟံးစုနဲၣ်ကျဲအခါ ပဒီသဒၢပသးလၢ တၢ်လၢကမၤဟးဂီၤ ပတၢ်ရ့လိာ်သးဒီး ယဟိဝၤယွၤ ဒီးတၢ်လၢကမၤဘၣ်ဒိ ပတၢ်အိၣ်ဆူၣ်အိၣ်ချ့. (စံး ၉၁:၄) တကးဒံးဘၣ် ယဟိဝၤယွၤ ရဲၣ်ကျဲၤန့ၢ်ပှၤ တၢ်အိၣ်ဖှိၣ် လၢကမၤစၢၤပှၤဒ်သိး ပကဆဲးတီဒီးအီၤ. (ၡါ ၃၂:၁, ၂) ပဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်ပူၤန့ၣ် အဲၣ်ယဟိဝၤယွၤ ဒီးဒိကနၣ်အကလုၢ်. အဃိ ပမ့ၢ်ရ့လိာ်သးဒီး အဝဲသ့ၣ်အါအါန့ၣ် ပကဒိးန့ၢ်ဘၣ် တၢ်ဟ့ၣ်ဂံၢ်ဟ့ၣ်ဘါ ဒီးကမၤစၢၤပှၤ ဒ်သိး ပကဟးဆှဲး တၢ်လၢအတဂ့ၤဘၣ်.—ကတိၤ ၁၃:၂၀.

၁၄. (က) ဘၣ်မနုၤအဃိ ယဟိဝၤယွၤ ပျဲဝဲလၢ ပကထံၣ်ဘၣ် တၢ်ကီတၢ်ခဲလဲၣ်. (ခ) စံးထီၣ်ပတြၢၤ ၉:၁၀ မၤမုာ်ထီၣ်ပသးဒ်လဲၣ်. (ကွၢ်စ့ၢ်ကီး တၢ်ဂ့ၢ်အဘျဲၣ်.)

^၁၄ လၢညါဒ်သိး ယဟိဝၤယွၤအပှၤဂီၢ်မုၢ် တဘၣ်ဒိဘၣ်ထံး ဒီးပှၤတမၤသံ အဝဲသ့ၣ်တဂ့ၤအဂီၢ် တဘျီတခီၣ် ယဟိဝၤယွၤ ဒီသဒၢအဝဲသ့ၣ်. သနာ်က့ ယဟိဝၤယွၤ တဒီသဒၢ အဝဲသ့ၣ်ဒ်န့ၣ် ကိးဘျီဒဲးဘၣ်. တဘျီတခီၣ် ခီဖျိလၢ “တၢ်ဘၣ်န့ၢ်အတီၤ” အဃိ ပကထံၣ်ဘၣ် တၢ်ကီတၢ်ခဲ. (စံၣ် ၉:၁၁) တကးဒံးဘၣ် ဒ်သိးယဟိဝၤယွၤ ကပာ်ဖျါထီၣ်ဝဲလၢ မုၣ်ကီၤလံၢ် ကဲပှၤလၢ အလံၣ်တၢ်အဂီၢ် တဘျီတခီၣ်န့ၣ် ယဟိဝၤယွၤ ပျဲဝဲလၢ အခ့အပှၤတဖၣ် ကထံၣ်ဘၣ် တၢ်မၤအၢမၤနး ဒီးပှၤကမၤသံ အဝဲသ့ၣ်. (ဘး ၂:၄-၆; မး ၂၃:၃၄) ဆၢကတီၢ်ခဲအံၤစ့ၢ်ကီး ဘၣ်သ့ၣ်သ့ၣ် ယဟိဝၤယွၤ တမၤလီၤမၢ်န့ၢ် ပတၢ်ကီတၢ်ခဲဘၣ်. ဘၣ်ဆၣ် ပနာ်သပှၢ်တၢၢ်လၢ ယဟိဝၤယွၤ တပာ်တ့ၢ် ပှၤလၢအအဲၣ်အီၤ နီတဘျီဘၣ်.c—စံး ၉:၁၀.

ယဟိဝၤယွၤ မၤမုာ်ထီၣ်ပသး

၁၅. ဖဲပဃ့ထုကဖၣ်, ဖးလံာ်စီဆှံ ဒီးရ့လိာ်သးဒီး ဒီပုၢ်ဝဲၢ်မုၣ်ခွါအခါ ပဒိးန့ၢ်ဘၣ် တၢ်မၤမုာ်ထီၣ်သးဒ်လဲၣ်. (၂ ကရံၣ်သူး ၁:၃, ၄)

^၁၅ ဖး ၂ ကရံၣ်သူး ၁:၃, ၄. တဘျီတခီၣ် ပကသးအုး, ပကဘၣ်ယိၣ်တၢ် ဒီးပသးကဟးဂီၤ. ခဲအံၤန့ၣ် ဘၣ်သ့ၣ်သ့ၣ် ပကထံၣ်ဘၣ် တၢ်အိၣ်သးလၢ အမၤသးအုးပှၤ ဒီးပကတူၢ်ဘၣ်လၢ ပအိၣ်ထဲတဂၤ. ပတၢ်တူၢ်ဘၣ်န့ၣ် ပှၤနၢ်ပၢၢ်စၢၤပှၤ အိၣ်တဂၤဂၤဧါ. ယဟိဝၤယွၤ နၢ်ပၢၢ်စၢၤပှၤ. ထဲန့ၣ်တကးဒံးဘၣ် အ “မၤမုာ်ထီၣ်က့ၤ ပှၤလၢ တၢ်မၤကွၢ် ခဲလၢာ်အပူၤ.” ပသ့ၣ်ညါဘၣ်ဒ်လဲၣ်. ဖဲပဃ့ထုကဖၣ် လၢပသးဒီဖျၢၣ်အခါ ပဒိးန့ၢ်ဘၣ် “တၢ်သူၣ်မံသးမုာ်လၢ အဟဲလၢ ကစၢ်ယွၤအအိၣ် လၢအဒိၣ်န့ၢ်ယိာ်န့ၢ်တၢ်လၢ ပနၢ်ပၢၢ်အီၤသ့.” (ဖံလံး ၄:၆, ၇) တကးဒံးဘၣ် လၢလံာ်စီဆှံပူၤန့ၣ် ယဟိဝၤယွၤ တဲဘၣ်ပှၤလၢ အအဲၣ်ပှၤဒိၣ်မး, အသိၣ်လိပှၤဒ်သိး ပကကဲထီၣ် ပှၤကူၣ်တၢ်သ့ ဒီးအဟ့ၣ်ပှၤတၢ်မုၢ်လၢ်. အဃိ ဖဲပဖးယဟိဝၤယွၤ အတၢ်ကတိၤလၢ လံာ်စီဆှံပူၤအခါ ပဒိးန့ၢ်ဘၣ် တၢ်မၤမုာ်ထီၣ်က့ၤသး. ဒီးဖဲပလဲၤထီၣ်တၢ်အိၣ်ဖှိၣ်အခါ ပမၤလိဘၣ်တၢ်ဂ့ၢ်လၢ အဟ့ၣ်ဂံၢ်ဟ့ၣ်ဘါပှၤ ဒီးပအိၣ်ဘၣ်ဒီး ဒီပုၢ်ဝဲၢ်မုၣ်ခွါလၢ အအဲၣ်ပှၤအဃိ အမၤမုာ်ပသးဒိၣ်မး.

၁၆. လၢဒီပုၢ်ဝဲၢ်ခွါန့သၢၤ ဒီးအမါဖြံၤစံလၤ အတၢ်လဲၤခီဖျိန့ၣ် ပန့ၢ်ဘၣ် တၢ်မၤလိဒ်လဲၣ်.

^၁၆ ယဟိဝၤယွၤ မၤမုာ်ထီၣ်ပသး ဒီးဟ့ၣ်ဂံၢ်ဟ့ၣ်ဘါပှၤလၢ အကလုၢ်ကထါဒ်လဲၣ်န့ၣ် ပကကွၢ်သကိး တၢ်လဲၤခီဖျိတခါ. အဒိ ဒီပုၢ်ဝဲၢ်ခွါန့သၢၤ ဒီးအမါဖြံၤစံလၤန့ၣ် အိၣ်လၢကီၢ်အမဲရကၤ. ပူၤကွံာ်စှၤကိာ်နံၣ်န့ၣ် အဝဲသ့ၣ် ပာ်လီၤသးလၢ ကလဲၤမၤစၢၤတၢ်လၢ တၢ်လီၢ်လၢ ပှၤလိၣ်ဘၣ်အါထီၣ် ပှၤစံၣ်တဲၤတဲလီၤတၢ်ဖိ. ဒီပုၢ်ဝဲၢ်ခွါန့သၢၤ တဲဝဲလၢ “ပနာ်လၢ ယဟိဝၤယွၤ ကဆိၣ်ဂ့ၤ ပတၢ်ကျဲးစၢး.” သနာ်က့ ဖဲအဝဲသ့ၣ် လဲၤတုၤလၢ တၢ်လီၢ်လၢ အဝဲသ့ၣ် လီၤဘၣ်မူဒါအခါ အဝဲသ့ၣ်ထံၣ်ဘၣ်ဒီး တၢ်အိၣ်ဆူၣ်အိၣ်ချ့ ဒီးကျိၣ်စ့တၢ်ကီတၢ်ခဲ. လၢခံ အဝဲသ့ၣ် ဘၣ်က့ၤကဒါလၢအဟံၣ် ဘၣ်ဆၣ် အဝဲသ့ၣ်ထံၣ်ဘၣ်ဒံး ကျိၣ်စ့တၢ်ကီတၢ်ခဲ. န့သၢၤ တဲဝဲလၢ “ယဆိကမိၣ်ထီၣ်လၢ ဘၣ်မနုၤအဃိ ကစၢ်ယွၤ တမၤစၢၤပှၤ ဒ်ပဆိကမိၣ်ပာ်စၢၤ အသိးဘၣ်လဲၣ်. ဒီးယဆိကမိၣ်လၢ မ့ၢ်ယမၤကမၣ်တၢ် တမံၤမံၤဟီဧါ.” လၢခံ န့သၢၤ ဒီးဖြံၤစံလၤ သ့ၣ်ညါထီၣ်ဝဲလၢ ဖဲအဝဲသ့ၣ် လိၣ်ဘၣ်တၢ်မၤစၢၤအခါ ယဟိဝၤယွၤ တပာ်တ့ၢ်အဝဲသ့ၣ်ဘၣ်. န့သၢၤ ဆဲးတဲဝဲလၢ “ဖဲပထံၣ်ဘၣ် တၢ်အိၣ်သးကီခဲအခါ လံာ်စီဆှံန့ၣ် အလီၤဂာ်ဒီး သကိးအဂ့ၤတဂၤ လၢအဟ့ၣ်ဂံၢ်ဟ့ၣ်ဘါပှၤ ဒီးဟံးစုနဲၣ်ကျဲပှၤ.” အဆဲးတဲဝဲလၢ “ပဆိကမိၣ်ထံက့ၤ ဘၣ်ဃးဒီး ယဟိဝၤယွၤ မၤစၢၤပှၤဒ်သိး ပလဲၤခီဖျိတၢ်ကန့ၢ် ဒီးပတသးစၢၢ်ဆၢ ထဲလၢ ပတၢ်ကီတၢ်ခဲဘၣ်အဃိ မၤစၢၤပှၤဒ်သိး ပကနာ်သပှၢ်တၢၢ်လၢ ခါဆူညါန့ၣ် ယဟိဝၤယွၤ ကဆဲးမၤစၢၤပှၤဒံး.”

၁၇. ဒီပုၢ်ဝဲၢ်မုၣ်ဟဲကၤ ဒိးန့ၢ်ဘၣ် တၢ်မၤမုာ်ထီၣ်သးဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၇ ယဟိဝၤယွၤ သူစ့ၢ်ကီး ဒီပုၢ်ဝဲၢ်မုၣ်ခွါတဖၣ်လၢ ကမၤမုာ်ထီၣ်ပသး. အမၤဝဲဒ်လဲၣ်န့ၣ် ပကကွၢ်သကိး ဒီပုၢ်ဝဲၢ်မုၣ်ဟဲကၤ လၢအအိၣ်လၢ ကီၢ်ဟါကၢၤရံၤ အတၢ်လဲၤခီဖျိ. ဟဲကၤ ထံၣ်ဘၣ်တၢ်ကီတၢ်ခဲ လၢအမၤကိၢ်မၤဂီၤအသး ဒီးအတူၢ်ဘၣ်လၢ အဘျုးတအိၣ်ဘၣ်န့ၣ် တဘျုးနံၣ်ညါ. ဘၣ်ဆၣ် ဖဲအဆိကမိၣ်ထီၣ်က့ၤ အတၢ်လဲၤခီဖျိအခါ အသ့ၣ်ညါဘၣ်ဝဲလၢ ယဟိဝၤယွၤ သူဝဲဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်ပူၤလၢ ကမၤမုာ်ထီၣ်က့ၤအသး. ဟဲကၤ တဲဝဲလၢ “ခီဖျိလၢ ယတၢ်ဖံးတၢ်မၤ, ယဘၣ်ကွၢ်ထွဲ ယဖိလၢအဆိးက့ ဒီးတၢ်ကီတၢ်ခဲ အဂၤအဃိ ဖဲယဟိဝၤယွၤ ထံၣ်ဝဲလၢ ယသးလီၤစၢ်အခါ အမၤစၢၤယၤထီဘိ. လၢအနံၣ် ၃၀ အတီၢ်ပူၤန့ၣ် ယထံၣ်ဘၣ်လၢ ယဟိဝၤယွၤ မၤစၢၤယၤ ကိးနံၤဒဲး. အါဘျီန့ၣ် ယဟိဝၤယွၤ မၤဆူၣ်ထီၣ် ယဂံၢ်ယဘါခီဖျိ ဒီပုၢ်ဝဲၢ်မုၣ်ခွါ အတၢ်ကတိၤလၢ အကဲထီၣ် တၢ်ဟ့ၣ်ဂံၢ်ဟ့ၣ်ဘါ. ဒီးဖဲယလိၣ်ဘၣ် တၢ်ဟ့ၣ်ဂံၢ်ဟ့ၣ်ဘါ အဒိၣ်ကတၢၢ်အခါ ဒီပုၢ်ဝဲၢ်မုၣ်ခွါတဖၣ် ဆှၢန့ၢ်ယၤ မဲးစ့း, ကွဲးန့ၢ်ယၤခးက့ မ့တမ့ၢ် ပတြၢၤယၤထီဘိ.”

၁၈. ပမၤမုာ်ထီၣ် ပှၤဂၤအသး ကသ့ဒ်လဲၣ်.

^၁၈ ပအိၣ်ဒီး တၢ်ခွဲးတၢ်ယာ်လၢ ပကကွၢ်လိ ယဟိဝၤယွၤ လၢအမၤမုာ်ထီၣ် ပှၤဂၤအသး. ပမၤမုာ်ထီၣ် ပှၤဂၤအသး ကသ့ဒ်လဲၣ်. ဖဲအဝဲသ့ၣ် တဲတၢ်ဒီးပှၤအခါ ပကဒိကနၣ်န့ၢ်အီၤလၢ တၢ်သးစူၤ, တဲတၢ်ဒီးအီၤမုာ်မုာ် ဒီးဖဲအဝဲသ့ၣ်လိၣ်ဘၣ် တၢ်မၤစၢၤအခါ ပကမၤစၢၤ အဝဲသ့ၣ်. (ကတိၤ ၃:၂၇) ပဂုာ်ကျဲးစၢး မၤမုာ်ထီၣ် ပှၤခဲလၢာ်အသး ဃုာ်ဒီးပှၤလၢ အတဘူၣ်ထီၣ်ဘါထီၣ် ယဟိဝၤယွၤဘၣ်စ့ၢ်ကီး. ဖဲပှၤလၢပဃၢၤ ထံၣ်ဘၣ် တၢ်သးအုး, တၢ်ဆူးတၢ်ဆါ ဒီးတၢ်ကိၢ်တၢ်ဂီၤအခါ ပလဲၤဟးလၢ အဝဲသ့ၣ်အအိၣ်, ဒိကနၣ်န့ၢ်အဝဲသ့ၣ် ဒီးတဲပၠးအီၤ လံာ်စီဆှံအဆၢလၢ ကဟ့ၣ်ဂံၢ်ဟ့ၣ်ဘါ အဝဲသ့ၣ်. ဖဲပကွၢ်လိ ယဟိဝၤယွၤ လၢအမ့ၢ် “တၢ်မၤမုာ်ခဲလၢာ် အကစၢ်” အခါ ပမၤစၢၤ ပဒီပုၢ်ဝဲၢ်မုၣ်ခွါဒ်သိး အလဲၤခီဖျိ အတၢ်ကီတၢ်ခဲကန့ၢ်. တကးဒံးဘၣ် ပှၤလၢ အတဘူၣ်ထီၣ်ဘါထီၣ် ယဟိဝၤယွၤ ဒံးဘၣ်တဖၣ်န့ၣ် ပကမၤစၢၤဘၣ် အဝဲသ့ၣ်ဒ်သိး ကအဲၣ်ဒိးမၤလိအါထီၣ် ယဟိဝၤယွၤအဂ့ၢ်.—မး ၅:၁၆.

ယဟိဝၤယွၤ ကမၤစၢၤပှၤထီဘိ

၁၉. ယဟိဝၤယွၤ မၤန့ၢ်တၢ်လၢပဂီၢ်ဒ်လဲၣ် ဒီးပကွၢ်လိအီၤ ကသ့ဒ်လဲၣ်.

^၁၉ ယဟိဝၤယွၤန့ၣ် အသးအိၣ် ပှၤကိးဂၤဒဲးလၢ အအဲၣ်အီၤဒိၣ်မး. အဃိ ဖဲပထံၣ်ဘၣ် တၢ်ကီတၢ်ခဲအခါ အတပာ်တ့ၢ်ပှၤဘၣ်. ဒ်မိပါလၢ အသးအိၣ်အဖိအသိး ယဟိဝၤယွၤ သးအိၣ် အခ့အပှၤလၢ အသးတီအီၤဒိၣ်မး. ယဟိဝၤယွၤ ဟံးစုနဲၣ်ကျဲပှၤ, ဟ့ၣ်ပှၤ တၢ်လၢပလိၣ်ဘၣ်, ဒီသဒၢပှၤ ဒီးမၤမုာ်ထီၣ်ပသး. အဃိ ဖဲပမၤစၢၤ ဒီးဟ့ၣ်ဂံၢ်ဟ့ၣ်ဘါ ပှၤလၢအထံၣ်ဘၣ် တၢ်ကီတၢ်ခဲတဖၣ်အခါ မ့ၢ်ဒၣ် ပကွၢ်လိ ပပၢ်ယဟိဝၤယွၤ. ဆၢကတီၢ်ခဲအံၤ ပမ့ၢ်ထံၣ်ဘၣ် တၢ်ကီတၢ်ခဲ ဒီးတၢ်သူၣ်အုးသးအုး သနာ်က့ ပနာ်သပှၢ်တၢၢ်လၢ ယဟိဝၤယွၤ ကမၤစၢၤပှၤထီဘိ. ယဟိဝၤယွၤ အၢၣ်လီၤပှၤလၢ “ယအိၣ်ဒီးသုအဃိ တဘၣ်ပျံၤတၢ်တဂ့ၤ.” (ၡါ ၄၁:၁၀) အဃိ ပနာ်သ့နီၢ်ကီၢ်လၢ ပတအိၣ်ထဲတဂၤ နီတဘျီဘၣ်.