ဒီပုၢ်ဝဲၢ်ခွါသးစၢ်ဧၢ ကွၢ်လိ စီၤမၢ်ကူး ဒီးစီၤတံၤမသ့း

၁-၂. စီၤမၢ်ကူး ဒီးစီၤတံၤမသ့း ကမၤအါထီၣ် ယဟိဝၤယွၤ အတၢ်မၤအဂီၢ် ဘၣ်သ့ၣ်သ့ၣ် အဝဲသ့ၣ် ကထံၣ်ဘၣ် တၢ်ကီတၢ်ခဲ မနုၤလဲၣ်.

ဒီပုၢ်ဝဲၢ်ခွါသးစၢ်ဧၢ မ့ၢ်နအဲၣ်ဒိး မၤအါထီၣ် ယဟိဝၤယွၤ အတၢ်မၤ ဒီးမၤစၢၤအါထီၣ်တၢ်လၢ တၢ်အိၣ်ဖှိၣ်အပူၤဧါ. ပသ့ၣ်ညါလၢ နအဲၣ်ဒိးမၤဒ်န့ၣ် သပှၢ်တၢၢ်. ပထံၣ်ဘၣ်လၢ ဒီပုၢ်ဝဲၢ်ခွါသးစၢ်အါဂၤ သးအိၣ်မၤစၢၤ ပှၤဂၤအဃိ ပသးခုဒိၣ်မး. (စံး ၁၁၀:၃) သနာ်က့ နကမၤအါထီၣ် ယဟိဝၤယွၤ အတၢ်မၤအဂီၢ် ဘၣ်သ့ၣ်သ့ၣ် အတညီလၢနဂီၢ် ထီဘိဘၣ်. ခါဆူညါ နကန့ၢ်ဘၣ်မူဒါဒ်လဲၣ် ဒီးယဟိဝၤယွၤ ကဆှၢနၤဖဲလဲၣ်န့ၣ် နတသ့ၣ်ညါလီၤတံၢ်ဘၣ်အဃိ နကမၤအါထီၣ် ယဟိဝၤယွၤ အတၢ်မၤအဂီၢ် မ့ၢ်နထုးယံာ် တၢ်ဆၢကတီၢ်ဧါ. မ့တမ့ၢ်ဘၣ်န့ၣ် ခီဖျိလၢ နဆိကမိၣ်လၢ နမၤမူဒါတခါခါ တသ့ဂ့ၤဂ့ၤဘၣ်အဃိ နတအဲၣ်ဒိး တူၢ်လိာ်အါထီၣ် မူဒါဘၣ်ဧါ. ပှၤလၢအတူၢ်ဘၣ်တၢ် ဒ်အံၤန့ၣ် တမ့ၢ်ထဲနၤတဂၤဘၣ်.

^၂ စီၤမၢ်ကူး ဒီးစီၤတံၤမသ့း တူၢ်ဘၣ်ဒ်န့ၣ်စ့ၢ်ကီး. အဝဲသ့ၣ် တၢ်အိၣ်သး ကဆီတလဲ ဒ်လဲၣ်န့ၣ် အတသ့ၣ်ညါဝဲလီၤတံၢ်ဘၣ် ဒီးကတူၢ်ဘၣ်ဝဲလၢ အမၤမူဒါ တသ့ဂ့ၤဂ့ၤဘၣ် သနာ်က့ အဝဲသ့ၣ် ပာ်လီၤသးလၢ ကမၤအါထီၣ် ယဟိဝၤယွၤ အတၢ်မၤဒံး. ဖဲတၢ်မၢဖိပီလူး ဒီးစီၤဘၢ်နါဘၤ ကွဲမုာ် စီၤမၢ်ကူးလၢ ကလဲၤမံၤၡၢၤနရံၤအတၢ်လဲၤ တၢတဘျီအခါ ဘၣ်သ့ၣ်သ့ၣ် စီၤမၢ်ကူးန့ၣ် အအိၣ်ဘၣ်လၢ ဟံၣ်ဂ့ၤဂ့ၤ တပူၤဃီဒီးအမိဒံး. (မၤတၢ် ၁၂:၁၂, ၁၃, ၂၅) သနာ်က့ ဒ်သိးစီၤမၢ်ကူး ကမၤအါထီၣ် ယဟိဝၤယွၤ အတၢ်မၤအဂီၢ် အသးအိၣ် ပာ်တ့ၢ်ကွံာ်အဟံၣ်. အဆိကတၢၢ်န့ၣ် အလဲၤအိၣ်လၢ ဝ့ၢ်အၣ်တံၤအီာ်. လၢခံ အလဲၤတၢ်ဒီး စီၤပီလူး ဒီးစီၤဘၢ်နါဘၤ လၢတၢ်လီၢ်ဖးယံၤ. (မၤတၢ် ၁၃:၁-၅) စီၤတံၤမသ့းစ့ၢ်ကီး ဖဲစီၤပီလူး ကွဲမုာ်အီၤလၢ ကလဲၤစံၣ်တဲၤတဲလီၤတၢ် ဒီးအီၤအခါ ဘၣ်သ့ၣ်သ့ၣ် စီၤတံၤမသ့းန့ၣ် အိၣ်ဒီးအမိအပါဒံး. အကဲပှၤသးစၢ်အဃိ ဘၣ်သ့ၣ်သ့ၣ် အကဆိကမိၣ်ဝဲလၢ အမၤစၢၤ စီၤပီလူး တသ့အါအါဘၣ်. (ထိၣ်သတြီၤဒီး ၁ ကရံၣ်သူး ၁၆:၁၀, ၁၁ ဒီး ၁ တံၤမသ့း ၄:၁၂.) သနာ်က့ အလဲၤတၢ်ဒီး စီၤပီလူး အဃိ အဒိးန့ၢ်ဘၣ် တၢ်ဆိၣ်ဂ့ၤအါမး.—မၤတၢ် ၁၆:၃-၅.

၃. (က) စီၤပီလူး ပာ်လုၢ်ပာ်ပှ့ၤ စီၤမၢ်ကူး ဒီးစီၤတံၤမသ့းန့ၣ် ပသ့ၣ်ညါဘၣ်ဒ်လဲၣ်. (၂ တံၤမသ့း ၄:၆, ၉, ၁၁) (ကွၢ်စ့ၢ်ကီးတၢ်ဂီၤ.) (ခ) လၢတၢ်မၤလိအံၤ ပကတဲသကိး တၢ်သံကွၢ် မနုၤလဲၣ်.

^၃ စီၤမၢ်ကူး ဒီးစီၤတံၤမသ့း ကဘၣ်မၤ မူဒါအရ့ဒိၣ် လၢတၢ်အိၣ်ဖှိၣ်ပူၤဒ်လဲၣ်န့ၣ် အဝဲသ့ၣ် မၤလိဘၣ်ဝဲ ဖဲအသးစၢ်ဒံးအခါ. စီၤပီလူး ပာ်လုၢ်ပာ်ပှ့ၤ ပှၤသးစၢ်ခံဂၤအံၤဒိၣ်မး ဒီးဖဲစီၤပီလူး သ့ၣ်ညါလၢ အကသံ ဘူးထီၣ်အခါ အမၢအဝဲသ့ၣ် ဟဲလၢအအိၣ်. (ဖး ၂ တံၤမသ့း ၄:၆, ၉, ၁၁.) ဘၣ်မနုၤအဃိ စီၤပီလူး ဘၣ်သူၣ်ဘၣ်သး စီၤမၢ်ကူး ဒီးစီၤတံၤမသ့း ဒိၣ်မးလဲၣ်. ဒီပုၢ်ဝဲၢ်ခွါသးစၢ်တဖၣ် ကွၢ်လိ အဝဲသ့ၣ် အတၢ်ပာ်သူၣ်ပာ်သး ကသ့ဒ်လဲၣ်. ဒီးစီၤပီလူး အတၢ်ဟ့ၣ်ကူၣ် လၢအပှဲၤဒီးတၢ်အဲၣ်န့ၣ် မၤစၢၤ ဒီပုၢ်ဝဲၢ်ခွါသးစၢ် လၢဆၢကတီၢ်ခဲအံၤ ကသ့ဒ်လဲၣ်.

ကွၢ်လိစီၤမၢ်ကူး ဒီးသးအိၣ်မၤစၢၤပှၤဂၤ

၄-၅. စီၤမၢ်ကူး သးအိၣ်မၤစၢၤပှၤဂၤန့ၣ် အပာ်ဖျါထီၣ်ဝဲဒ်လဲၣ်.

^၄ လံာ်တဘ့ၣ် ပာ်ဖျါထီၣ်ဝဲလၢ တၢ်မၤစၢၤပှၤဂၤ မ့တမ့ၢ် မၤန့ၢ်တၢ်လၢ အဝဲသ့ၣ်အဂီၢ်န့ၣ် အဲၣ်ဒိးတဲဝဲ “ပမၤတၢ်ဆူၣ်ဆူၣ် ဒီးမ့ၢ်ကီသနာ်က့ ပဆဲးမၤဒံး.” ဘၣ်ဃးဒီး တၢ်မၤစၢၤပှၤဂၤန့ၣ် စီၤမၢ်ကူး ပာ်လီၤအဒိအတဲာ်ဂ့ၤမး. ဖဲစီၤပီလူး တအဲၣ်ဒိးလဲၤကိး စီၤမၢ်ကူးလၢ မံၤၡၢၤနရံၤတၢ်လဲၤ ခံဘျီတဘျီဘၣ်အခါ ဘၣ်သ့ၣ်သ့ၣ် စီၤမၢ်ကူး သးကဘၣ်ဒိ ဒီးအသးတမုာ်ဘၣ်. (မၤတၢ် ၁၅:၃၇, ၃၈) ဘၣ်ဆၣ် စီၤမၢ်ကူး တဟ့ၣ်အၡူဘၣ်. အသးအိၣ် မၤစၢၤပှၤဂၤဒံး.

^၅ အဒိ စီၤမၢ်ကူး လဲၤတၢ်ဒီး အတခွါစီၤဘၢ်နါဘၤ ဒီးမၤစၢၤတၢ်လၢ တၢ်လီၢ်အဂၤ. လၢခံ ၁၁ ဝံၤအလီၢ်ခံ ဖဲစီၤပီလူး အိၣ်လၢ ဝ့ၢ်ရိမ့ၤအဃိာ်ပူၤ အဆိကတၢၢ် တဘျီအခါ စီၤမၢ်ကူး အိၣ်ဒီးအီၤဖဲန့ၣ် ဒီးမၤစၢၤအီၤ. (ဖံၤ ၂၃, ၂၄) စီၤပီလူး ပာ်လုၢ်ပာ်ပှ့ၤ စီၤမၢ်ကူး အတၢ်မၤစၢၤ ဒိၣ်မးအဃိ အတဲဝဲလၢ စီၤမၢ်ကူးန့ၣ် အကဲထီၣ် “တၢ်ဟ့ၣ်ဂံၢ်ဟ့ၣ်ဘါလၢ ယဂီၢ်ဒိၣ်မး.”—ကလီး ၄:၁၀, ၁၁.

၆. စီၤမၢ်ကူး ရ့လိာ်သးဒီး ဒီပုၢ်ဝဲၢ်ခွါလၢ အသးတီတဖၣ်အဃိ အဒိးန့ၢ်ဘၣ် အဘျုးဒ်လဲၣ်. (ကွၢ်တၢ်ဂ့ၢ်အဘျဲၣ်.)

^၆ စီၤမၢ်ကူး ရ့လိာ်သးဒီး ဒီပုၢ်ဝဲၢ်ခွါလၢ အသးတီတဖၣ်အဃိ အဒိးန့ၢ်ဘၣ် အဘျုးအါမး. စီၤမၢ်ကူး အိၣ်ဒီး စီၤပီလူး လၢဝ့ၢ်ရိမ့ၤ တတီၤဖိ ဝံၤအလီၢ်ခံ အလဲၤမၤသကိးတၢ်ဒီး တၢ်မၢဖိပ့းတရူး လၢဝ့ၢ်ဘၤဘူၤလိၣ်. အဝဲသ့ၣ်ကဲထီၣ် သကိးလၢ အမုာ်လိာ်သးဒိၣ်မး အဃိ စီၤပ့းတရူး တဲဝဲလၢ စီၤမၢ်ကူးန့ၣ် “ယပာ်အီၤဒ် ယဖိခွါ.” (၁ ပ့း ၅:၁၃) ဖဲအဝဲသ့ၣ် မၤသကိးတၢ်အခါ ဘၣ်သ့ၣ်သ့ၣ် စီၤပ့းတရူး တဲဘၣ်အသကိး စီၤမၢ်ကူး ဘၣ်ဃးဒီး ယ့ၣ်ၡူး အတၢ်အိၣ်မူ ဒီးအတၢ်စံၣ်တဲၤတဲလီၤ တၢ်မၤအဂ့ၢ်အါမး. ဒီးလၢခံ စီၤမၢ်ကူးကွဲးလီၤဝဲ တၢ်ဂ့ၢ်တဖၣ်အံၤ လၢလံာ်မၢ်ကူးအပူၤ.a

၇. ဒီပုၢ်ဝဲၢ်ခွါစီဝူ ကွၢ်လိ စီၤမၢ်ကူး အဒိအတဲာ်ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၇ စီၤမၢ်ကူး ဆဲးမၤယဟိဝၤယွၤ အတၢ်မၤဆူၣ်ဆူၣ် ဒီးအရ့လိာ်သးဒီး ဒီပုၢ်ဝဲၢ်ခွါလၢ အသးတီတဖၣ်. နကွၢ်လိ စီၤမၢ်ကူး အဒိအတဲာ် ကသ့ဒ်လဲၣ်. ဘၣ်သ့ၣ်သ့ၣ် နကအဲၣ်ဒိး မၤအါထီၣ် ယဟိဝၤယွၤ အတၢ်မၤ ဘၣ်ဆၣ် နတတုၤထီၣ်ထီၣ်ဘးဒံးဘၣ်. သနာ်က့ သးဆံးတဂ့ၤ. ဒ်သိး နကမၤအါထီၣ် ယဟိဝၤယွၤ အတၢ်မၤ ဒီးမၤစၢၤ ဒီပုၢ်ဝဲၢ်မုၣ်ခွါအဂီၢ် ဆဲးမၤတၢ်လၢ နမၤသ့. ဆိကမိၣ်ကွၢ် ဒီပုၢ်ဝဲၢ်ခွါစီဝူ လၢအကဲ တၢ်အိၣ်ဖှိၣ်သးပှၢ်တဂၤအဂ့ၢ်. ဖဲအသးစၢ်အခါ အထိၣ်သတြီၤအသးဒီး ဒီပုၢ်ဝဲၢ်ခွါသးစၢ် အဂၤတဖၣ်. ဖဲဒီပုၢ်ဝဲၢ်ခွါ အဂၤတနီၤ န့ၢ်ဘၣ်ဆိမူဒါလၢ အမဲာ်ညါအခါ အသးဘၣ်ဒိ ဒီးအသးတမုာ်ဘၣ်. အဃိ အတဲဘၣ် တၢ်အိၣ်ဖှိၣ်သးပှၢ်တဖၣ်လၢ အတၢ်တူၢ်ဘၣ်. တၢ်အိၣ်ဖှိၣ်သးပှၢ်တဂၤ ဟ့ၣ်ကူၣ်အီၤလၢ တၢ်လၢအမၤဝဲတဖၣ် ပှၤဂၤမ့ၢ်တထံၣ်ဝဲဘၣ် သနာ်က့ ဆဲးမၤစၢၤပှၤဂၤ လၢအဂ့ၤကတၢၢ်. စီဝူ မၤထွဲတၢ်ဟ့ၣ်ကူၣ်အံၤ ဒီးအမၤစၢၤဝဲ ဒီပုၢ်ဝဲၢ်သးပှၢ်တဖၣ် ဒီးပှၤအဂၤလၢ အလိၣ်ဘၣ် တၢ်မၤစၢၤလၢ ကလဲၤထီၣ် တၢ်အိၣ်ဖှိၣ်အဂီၢ်. ဖဲအဆိကမိၣ်ထီၣ်က့ၤ တၢ်ဂ့ၢ်အံၤအခါ အတဲဝဲလၢ “ယကဘၣ် မၤစၢၤပှၤဂၤ ဒ်လဲၣ်န့ၣ် ယနၢ်ပၢၢ်ထီၣ်ဘၣ်ဂ့ၤဂ့ၤ. ဖဲယမၤစၢၤ ပှၤလၢအလိၣ်ဘၣ် တၢ်မၤစၢၤအခါ ယသးခုဒိၣ်မး.”

ကွၢ်လိစီၤတံၤမသ့း ဒီးပာ်ဖျါထီၣ်လၢ နသးအိၣ်ပှၤဂၤနီၢ်ကီၢ်

၈. ဘၣ်မနုၤအဃိ စီၤပီလူး ဘၣ်သးလၢ စီၤတံၤမသ့း ကလဲၤတၢ်ဒီးအီၤလဲၣ်. (ဖံလံးပံၤ ၂:၁၉-၂၂)

^၈ ဒ်သိး စီၤပီလူး ကက့ၤကဒါလၢ ဝ့ၢ်လၢပှၤထီဒါအီၤ အပူၤအဂီၢ် အလိၣ်ဘၣ် ဒီပုၢ်ဝဲၢ်လၢ အသးဒူ လၢကလဲၤတၢ်ဒီးအီၤ. ခီၣ်ထံးခါန့ၣ် အမၢစီၤစံလၤ လၢအမၤ ယဟိဝၤယွၤ အတၢ်မၤ လၢအနံၣ်အါမးတဂၤ လဲၤတၢ်ဒီးအီၤ. (မၤတၢ် ၁၅:၂၂, ၄၀) ဒီးလၢခံန့ၣ် အမၢစီၤတံၤမသ့း လဲၤတၢ်ဒီးအီၤစ့ၢ်ကီး. ဘၣ်မနုၤအဃိ စီၤပီလူး ဘၣ်သးလဲၤကိး စီၤတံၤမသ့းလဲၣ်. ခီဖျိလၢ စီၤတံၤမသ့း အိၣ်ဒီးမံၤဂ့ၤသၣ်ဂ့ၤ လၢဒီပုၢ်ဝဲၢ်မုၣ်ခွါ အကျါအဃိ. (မၤတၢ် ၁၆:၁, ၂) တကးဒံးဘၣ် အပာ်ဖျါထီၣ်လၢ အသးအိၣ်ပှၤဂၤနီၢ်ကီၢ်.—ဖး ဖံလံးပံၤ ၂:၁၉-၂၂.

၉. စီၤတံၤမသ့း သူၣ်အိၣ်သးအိၣ် ဒီပုၢ်ဝဲၢ်မုၣ်ခွါ နီၢ်ကီၢ်န့ၣ် အပာ်ဖျါထီၣ်ဝဲဒ်လဲၣ်.

^၉ စးထီၣ်လၢ စီၤတံၤမသ့း မၤသကိးတၢ်ဒီး စီၤပီလူးန့ၣ် အပာ်ဖျါထီၣ်လၢ အသးအိၣ်ပှၤဂၤ အါန့ၢ်ဒံး အနီၢ်ကစၢ်. အဃိ ဖဲစီၤပီလူး ဟးထီၣ်လၢ ဝ့ၢ်ဘ့းရံၤအခါ အမၢစီၤတံၤမသ့း အိၣ်တ့ၢ်ဖဲန့ၣ် ခီဖျိလၢ အသ့ၣ်ညါဝဲလၢ စီၤတံၤမသ့း ကကွၢ်ထွဲဝဲ ဒီပုၢ်ဝဲၢ်မုၣ်ခွါ အသီတဖၣ်ဂ့ၤဂ့ၤ. (မၤတၢ် ၁၇:၁၃, ၁၄) ဖဲန့ၣ်အခါ စီၤစံလၤ အိၣ်တ့ၢ်စ့ၢ်ကီးလၢ ဝ့ၢ်ဘ့းရံၤအဃိ ဘၣ်သ့ၣ်သ့ၣ် စီၤတံၤမသ့း ကမၤလိန့ၢ်တၢ် လၢအအိၣ်ဒီဒူၣ်ညါ. သနာ်က့ လၢခံန့ၣ် စီၤပီလူး မၢစီၤတံၤမသ့း လဲၤလၢဝ့ၢ်သ့းစၤလနံ ထဲတဂၤ ဒီးဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါဖဲန့ၣ်. (၁ သ့း ၃:၂) ဒီးလၢခံ ၁၅ နံၣ် အတီၢ်ပူၤန့ၣ် စီၤတံၤမသ့း အတၢ်အဲၣ်လၢ ဒီပုၢ်ဝဲၢ်မုၣ်ခွါအဂီၢ် ဒိၣ်ထီၣ်မးဒိၣ်ထီၣ်. အအဲၣ်ဒီပုၢ်ဝဲၢ်မုၣ်ခွါ ဒိၣ်မးအဃိ ဖဲအဝဲသ့ၣ် ထံၣ်ဘၣ် တၢ်ကီတၢ်ခဲအခါ အပာ်ဖျါထီၣ် တၢ်ဒိသူၣ်ဒိသး ဒီး “ဟီၣ်ဃုာ်ဒီး” အဝဲသ့ၣ်. (ရိ ၁၂:၁၅; ၂ တံၤ ၁:၄) ဒီပုၢ်ဝဲၢ်ခွါသးစၢ်တဖၣ် ကွၢ်လိစီၤတံၤမသ့း ကသ့ဒ်လဲၣ်.

၁၀. ဒီပုၢ်ဝဲၢ်ခွါဝူကၠ့ သးအိၣ်ပှၤဂၤ နီၢ်ကီၢ်န့ၣ် အပာ်ဖျါထီၣ်ဝဲဒ်လဲၣ်.

^၁၀ ဒီပုၢ်ဝဲၢ်ခွါဝူကၠ့ ပာ်ဖျါထီၣ်လၢ အသးအိၣ်ပှၤဂၤနီၢ်ကီၢ် ဒ်လဲၣ်န့ၣ် ပကကွၢ်သကိး. ဖဲအသးစၢ်အခါ အကဘၣ် တဲသကိးတၢ်ဒီး ဒီပုၢ်ဝဲၢ်မုၣ်ခွါသးပှၢ် ဒ်လဲၣ်န့ၣ် အတသ့ၣ်ညါဝဲဘၣ်. အဃိ ဖဲအထံၣ် ဒီပုၢ်ဝဲၢ်မုၣ်ခွါသးပှၢ်လၢ တၢ်အိၣ်ဖှိၣ်လီၢ်အခါ အဆၢဂ့ၤဆၢဝါ အဝဲသ့ၣ်ဝံၤဒီး အလဲၤလၢ အကျိာ်အကျာ်. အဃိ တၢ်အိၣ်ဖှိၣ်သးပှၢ်တဂၤ ဟ့ၣ်ကူၣ်အီၤလၢ ကစးထီၣ် တဲသကိးတၢ်ဒီး ဒီပုၢ်ဝဲၢ်မုၣ်ခွါ ဒီးတဲအဝဲသ့ၣ် ဘၣ်ဃးဒီး အဝဲသ့ၣ် တၢ်ဂ့ၤတၢ်ဝါလၢ အဘၣ်သူၣ်ဘၣ်သးဝဲ တခါခါ. တၢ်အိၣ်ဖှိၣ်သးပှၢ် ဟ့ၣ်ကူၣ်စ့ၢ်ကီးအီၤလၢ ကဆိကမိၣ်ဝဲ ဘၣ်ဃးဒီး တၢ်လၢ ပှၤဂၤဘၣ်သူၣ်ဘၣ်သးဝဲ. ဖဲဝူကၠ့ ရ့လိာ်သးဒီး ဒီပုၢ်ဝဲၢ်မုၣ်ခွါအခါ အမၤထွဲ တၢ်ဟ့ၣ်ကူၣ်အံၤ. ခဲအံၤ ဝူကၠ့ကဲထီၣ် တၢ်အိၣ်ဖှိၣ်သးပှၢ် ဒီးအတဲဝဲလၢ “ယကဘၣ် တဲသကိးတၢ်ဒီး ဒီပုၢ်ဝဲၢ်မုၣ်ခွါ သးစၢ်မ့ၢ်ဂ့ၤ သးပှၢ်မ့ၢ်ဂ့ၤ ဒ်လဲၣ်န့ၣ် ခဲအံၤ ယသ့ၣ်ညါလံ. ပှၤဂၤအတၢ်အိၣ်သး ဒီးတၢ်ကီတၢ်ခဲ အိၣ်ဒ်လဲၣ်န့ၣ် ယနၢ်ပၢၢ်အါထီၣ်. အဃိ အဝဲသ့ၣ် လိၣ်ဘၣ်တၢ်မၤစၢၤဒ်လဲၣ် ဒီးယကဘၣ်မၤစၢၤ အဝဲသ့ၣ်ဒ်လဲၣ်န့ၣ် ယသ့ၣ်ညါထီၣ်စ့ၢ်ကီး.”

၁၁. ဒ်သိး ဒီပုၢ်ဝဲၢ်ခွါသးစၢ်တဖၣ် ကပာ်ဖျါထီၣ်လၢ အသးအိၣ် ပှၤဂၤအဂီၢ် အမၤလိထီၣ်အသး သ့ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၁ ဒီပုၢ်ဝဲၢ်ခွါသးစၢ်ဧၢ ဒ်သိးနကပာ်ဖျါထီၣ်လၢ နသးအိၣ် ပှၤဂၤအဂီၢ် နမၤလိထီၣ်နသး သ့စ့ၢ်ကီး. ဖဲနလဲၤထီၣ် တၢ်အိၣ်ဖှိၣ်အခါ နမ့ၢ်ထံၣ် ပှၤသးပှၢ်မ့ၢ်ဂ့ၤ, ပှၤသးစၢ်မ့ၢ်ဂ့ၤ, ကလုာ်ဒူၣ်လၢ အလီၤဆီဒီးနၤမ့ၢ်ဂ့ၤ တဲသကိးတၢ်ဒီး အဝဲသ့ၣ်ခဲလၢာ်. သံကွၢ်အဝဲသ့ၣ် တၢ်အိၣ်သး ဒီးဒိကနၣ်န့ၢ် အဝဲသ့ၣ်ဂ့ၤဂ့ၤ. ဒီးလၢခံ နကဘၣ် မၤစၢၤအဝဲသ့ၣ် ဒ်လဲၣ်န့ၣ် နကသ့ၣ်ညါထီၣ်. အဒိ ဘၣ်သ့ၣ်သ့ၣ် နကသ့ၣ်ညါဘၣ်လၢ ဒီပုၢ်ဝဲၢ်မုၣ်ခွါသးပှၢ် ဒီမိၢ်ဝၤခံဂၤ သူဝဲ JW Library^® app တဘၣ်ဂ့ၤဂ့ၤဘၣ်. မ့တမ့ၢ် အဝဲသ့ၣ် ကလဲၤစံၣ်တဲၤတဲလီၤတၢ်ဒီး ပှၤဂၤအဂီၢ် အတၢ်ရဲၣ်တၢ်ကျဲၤ တအိၣ်ဒံးဘၣ်. ဒ်သိး အဝဲသ့ၣ်သူ ထဲးဘလဲး မ့တမ့ၢ် လီတဲစိ ကဘၣ်အဂီၢ် နမၤစၢၤ အဝဲသ့ၣ်သ့ဧါ. မ့တမ့ၢ် နရဲၣ်ကျဲၤလၢ ကလဲၤစံၣ်တဲၤတဲလီၤတၢ်ဒီး အဝဲသ့ၣ်သ့ဧါ. နမ့ၢ်မၤစၢၤဆိ ဒီပုၢ်ဝဲၢ်မုၣ်ခွါ ဒ်အံၤန့ၣ် နကကဲထီၣ် တၢ်ဒိတၢ်တဲာ်အဂ့ၤ လၢတၢ်အိၣ်ဖှိၣ်အပူၤ.

စီၤပီလူး အတၢ်ဟ့ၣ်ကူၣ်န့ၣ် မၤစၢၤနၤသ့

၁၂. စီၤပီလူးဟ့ၣ်ကူၣ် စီၤတံၤမသ့းန့ၣ် ကဲဘျုးလၢ ဒီပုၢ်ဝဲၢ်ခွါသးစၢ် အဂီၢ်ဒ်လဲၣ်.

^၁၂ ဒ်သိး စီၤတံၤမသ့း ကအိၣ်ဒီးတၢ်သးခု ဒီးကလဲၤထီၣ်လဲၤထီလၢ အတၢ်စံၣ်တဲၤတဲလီၤ တၢ်မၤအဂီၢ် စီၤပီလူး အတၢ်ဟ့ၣ်ကူၣ်န့ၣ် မၤစၢၤအီၤအါမး. (၁ တံၤ ၁:၁၈; ၂ တံၤ ၄:၅) အဃိ ဒီပုၢ်ဝဲၢ်ခွါသးစၢ်ဧၢ စီၤပီလူး အတၢ်ဟ့ၣ်ကူၣ်န့ၣ် မၤစၢၤနၤ သ့စ့ၢ်ကီး. အမၤစၢၤနၤ ကသ့ဒ်လဲၣ်. ဖဲနဖး လံာ်ပရၢခံဘ့ၣ်လၢ စီၤပီလူးကွဲးန့ၢ် စီၤတံၤမသ့းအခါ ဖးအီၤဒ်သိးဒီး စီၤပီလူး ကွဲးန့ၢ်နၤ. တကးဒံးဘၣ် ဂုာ်ကျဲးစၢး ဆိကမိၣ်ထံလၢ နကမၤထွဲ အတၢ်ဟ့ၣ်ကူၣ် လၢနတၢ်အိၣ်မူအပူၤဒ်လဲၣ်. ခဲအံၤ ပကကွၢ် တၢ်အဒိတနီၤ.

၁၃. ဒ်သိး ပကမၤအါထီၣ် ပတၢ်သးတီဒီး ယဟိဝၤယွၤအဂီၢ် ပကဘၣ်မၤဒ်လဲၣ်.

^၁၃ “သိၣ်လိမၤသ့ထီၣ်နသး ဒ်သိး နကတုၤလၢ နဖီတၢၣ်လၢအမ့ၢ် တၢ်သးတီဒီးကစၢ်ယွၤ.” (၁ တံၤ ၄:၇, တၢ်ဂ့ၢ်အဘျဲၣ်) တၢ်သးတီဒီး ကစၢ်ယွၤန့ၣ် အဲၣ်ဒိးတဲဝဲ မနုၤလဲၣ်. အဲၣ်ဒိးတဲဝဲ ပှၤတဂၤလၢ အသးတီဒီး ယဟိဝၤယွၤန့ၣ် အကမၤတၢ်လၢ အဘၣ်ယဟိဝၤယွၤအသး. ဖဲပအိၣ်ဖျဲၣ်လီၤအခါ ပတအိၣ်ဖျဲၣ်လီၤဃုာ်ဒီး တၢ်သးတီဘၣ်. အဃိ ဒ်သိး ပကအိၣ်ဒီး တၢ်သးတီအဂီၢ် ပကဘၣ် မၤအိၣ်ထီၣ်အီၤ. ပကဘၣ်မၤဒ်လဲၣ်. ကြံးအတၢ်ကတိၤလၢ အတဲဝဲ “သိၣ်လိမၤသ့ထီၣ်နသး” န့ၣ် ညီနုၢ် အဲၣ်ဒိးတဲဝဲ တချုးလၢ ပှၤပြၢတၢ်ဖိတဂၤ နုာ်လီၤတၢ်ပြၢ ဒံးဘၣ်န့ၣ် အကဘၣ် ဂုာ်ကျဲးစၢး ကၠီးလိအသးဆူၣ်ဆူၣ်. ဒ်သိး အကမၤနၢၤတၢ်အဂီၢ် အကဘၣ် ဟးဆှဲးတၢ်လၢ ကမၤတံာ်တာ်အီၤ. ဒီးအကဘၣ် သးစၢၢ်ဆၢထဲလၢ အဖီတၢၣ်. ပဝဲစ့ၢ်ကီး ပကဘၣ် ဟးဆှဲးတၢ်လၢ အကမၤတံာ်တာ်ပှၤ ဒီးမၤတၢ်လၢ အကမၤဂ့ၤထီၣ် ပတၢ်ရ့လိာ်သးဒီး ယဟိဝၤယွၤ.

၁၄. ဖဲပဖး လံာ်စီဆှံအခါ ပကဘၣ်အိၣ်ဒီး တၢ်တိာ်ပာ်ဒ်လဲၣ်. တဲဖျါထီၣ် တၢ်အဒိ.

^၁၄ တၢ်ဖးလံာ်စီဆှံ ကိးနံၤဒဲးန့ၣ် အရ့ဒိၣ်ဒိၣ်မး. ဒီးဖဲပဖး လံာ်စီဆှံအခါ ပတၢ်တိာ်ပာ်န့ၣ် ကဘၣ်မ့ၢ်ဝဲဒ်သိး ပကမၤဂ့ၤဒိၣ်ထီၣ် ပတၢ်ရ့လိာ်သးဒီး ယဟိဝၤယွၤ. အဒိ ဖဲပဖး ဘၣ်ဃးဒီး ယ့ၣ်ၡူး တဲသကိးတၢ်ဒီး ပိာ်ခွါသးစၢ်လၢ အထူးတီၤ ဒီးအိၣ်ဒီးလီၢ်လၤ အဂ့ၢ်အခါ ပကသ့ၣ်ညါဘၣ် ယဟိဝၤယွၤ အဂ့ၢ်ဒ်လဲၣ်. (မၢ် ၁၀:၁၇-၂၂) ပိာ်ခွါသးစၢ်တဂၤအံၤ အနာ်ဝဲလၢ ယ့ၣ်ၡူးန့ၣ် မ့ၢ်မ့းၡံအၤ ဘၣ်ဆၣ် အတၢ်နာ်စှၤအဃိ အတကဲထီၣ် ယ့ၣ်ၡူး အပျဲၢ်အဘီၣ်ဘၣ်. သနာ်က့ ယ့ၣ်ၡူး “အဲၣ်ဘၣ်အီၤ.” ယ့ၣ်ၡူးတဲတၢ်ဒီးအီၤ မုာ်မုာ် ဒီးအဲၣ်ဒိးဝဲလၢ အကဆၢတဲာ် တၢ်လၢအဘၣ်. ဒီးယ့ၣ်ၡူး ပာ်ဖျါထီၣ် အတၢ်တူၢ်ဘၣ်လၢ ပိာ်ခွါသးစၢ်တဂၤအံၤ အဖီခိၣ်န့ၣ် ဒုးသ့ၣ်ညါပှၤ ယဟိဝၤယွၤ အတၢ်တူၢ်ဘၣ်စ့ၢ်ကီး. (ယိၤ ၁၄:၉) ဖဲနဆိကမိၣ်ထံ တၢ်ဂ့ၢ်အံၤ ဒီးနတၢ်အိၣ်သးအခါ သံကွၢ်လီၤနသးလၢ ‘ဒ်သိး ယကမၤဂ့ၤဒိၣ်ထီၣ် ယတၢ်ရ့လိာ်သးဒီး ယဟိဝၤယွၤ ဒီးမၤစၢၤအါထီၣ် ပှၤဂၤအဂီၢ် ယကဘၣ်မၤ မနုၤလဲၣ်.’

၁၅. ဘၣ်မနုၤအဃိ ဒီပုၢ်ဝဲၢ်ခွါသးစၢ်တဖၣ် ကဘၣ်ပာ်လီၤ တၢ်ဒိတၢ်တဲာ်အဂ့ၤ လၢပှၤဂၤအဂီၢ်လဲၣ်. တဲဖျါထီၣ် တၢ်အဒိ. (၁ တံၤမသ့း ၄:၁၂, ၁၃)

^၁၅ “ကဲထီၣ်တၢ်ဒိတၢ်တဲာ် လၢပှၤလၢအသးတီတဖၣ် အဂီၢ်.” (ဖး ၁ တံၤမသ့း ၄:၁၂, ၁၃.) စီၤပီလူး ဟ့ၣ်ဂံၢ်ဟ့ၣ်ဘါ စီၤတံၤမသ့းလၢ ကမၤလိအါထီၣ်အသး ဘၣ်ဃးဒီး တၢ်ဖးလံာ်ဖးလဲၢ်, တၢ်သိၣ်လိတၢ် တကးဒံးဘၣ် ဟ့ၣ်ဂံၢ်ဟ့ၣ်ဘါအီၤလၢ ကမၤအါထီၣ် တၢ်ဂ့ၤတၢ်ဝါ ဒ်သိးဒီး တၢ်အဲၣ်, တၢ်နာ် ဒီးတၢ်စီဆှံ. ဘၣ်မနုၤအဃိလဲၣ်. ခီဖျိလၢ တၢ်လၢပှၤတဂၤ မၤဝဲန့ၣ် အရ့ဒိၣ်န့ၢ် တၢ်လၢအတဲဝဲဒံး. ဆိကမိၣ်ကွၢ်လၢ နဒိးန့ၢ်ဘၣ်မူဒါလၢ နကဘၣ်ဟ့ၣ် တၢ်စံၣ်တဲၤတဲလီၤတၢ် ဘၣ်ဃးဒီး ပကဘၣ် စံၣ်တဲၤတဲလီၤတၢ် ဆူၣ်ဆူၣ်အဂ့ၢ်. နမ့ၢ်ဂုာ်ကျဲးစၢး စံၣ်တဲၤတဲလီၤတၢ် ဆူၣ်ဆူၣ်န့ၣ် နဟ့ၣ်တၢ်စံၣ်တဲၤတဲလီၤ ဘၣ်ဃးဒီး တၢ်ဂ့ၢ်အံၤ ကညီဒိၣ်ထီၣ်. ဒီးခီဖျိလၢ နပာ်လီၤ တၢ်ဒိတၢ်တဲာ်အဂ့ၤ လၢတၢ်စံၣ်တဲၤတဲလီၤ တၢ်မၤအဃိ ပှၤဒိကနၣ်တၢ်ဖိတဖၣ် ကအဲၣ်ဒိးမၤထွဲ တၢ်လၢနတဲ.—၁ တံၤ ၃:၁၃.

၁၆. (က) တၢ်ဂ့ၢ်ယဲၢ်ခါလၢ ကမၤစၢၤ ဒီပုၢ်ဝဲၢ်ခွါသးစၢ် ဒ်သိး အကကဲထီၣ် တၢ်ဒိတၢ်တဲာ်အဂ့ၤ လၢပှၤဂၤအဂီၢ်န့ၣ် မ့ၢ်မနုၤလဲၣ်. (ခ) “လၢတၢ်စံးတၢ်ကတိၤ” တကပၤန့ၣ် ဒီပုၢ်ဝဲၢ်ခွါသးစၢ် ကဲထီၣ် တၢ်ဒိတၢ်တဲာ်အဂ့ၤ ကသ့ဒ်လဲၣ်.

^၁၆ ဖဲ ၁ တံၤမသ့း ၄:၁၂ န့ၣ် စီၤပီလူး တဲဖျါထီၣ်ဝဲ တၢ်ဂ့ၢ်ယဲၢ်ခါလၢ ကမၤစၢၤ ဒီပုၢ်ဝဲၢ်ခွါသးစၢ် ဒ်သိးကကဲထီၣ် တၢ်ဒိတၢ်တဲာ်အဂ့ၤ လၢပှၤဂၤအဂီၢ်. ဖဲနမၤ နီၢ်ကစၢ် တၢ်မၤလိ လံာ်စီဆှံအခါ မၤလိကွၢ် ဘၣ်ဃးဒီး တၢ်ဂ့ၢ်ယဲၢ်ခါအံၤ. အဒိ “လၢတၢ်စံးတၢ်ကတိၤ” တကပၤန့ၣ် နအဲၣ်ဒိးကဲထီၣ် တၢ်ဒိတၢ်တဲာ်အဂ့ၤ လၢပှၤဂၤအဂီၢ်ဧါ. ဒ်သိး နတၢ်ကတိၤ ကကဲထီၣ် တၢ်ဟ့ၣ်ဂံၢ်ဟ့ၣ်ဘါအဂီၢ် နကဘၣ် တဲတၢ်ဒ်လဲၣ်န့ၣ် ဆိကမိၣ်ထံအီၤ. နမ့ၢ်အိၣ်ဒံးလၢ နမိနပါ အဟံၣ်န့ၣ် စံးဘျုး အဝဲသ့ၣ်လၢ တၢ်လၢအမၤန့ၢ် လၢနဂီၢ်. ဒီးဖဲတၢ်အိၣ်ဖှိၣ် ဝံၤအခါ ဒီပုၢ်ဝဲၢ်မုၣ်ခွါလၢ အလီၤဘၣ်မူဒါန့ၣ် ပတြၢၤအီၤ ဒီးစံးဘျုးအီၤ. တကးဒံးဘၣ် ဖဲနထီၣ်တၢ်အိၣ်ဖှိၣ်အခါ ဂုာ်ကျဲးစၢး ဟ့ၣ်တၢ်စံးဆၢလၢ နနီၢ်ကစၢ် တၢ်ကတိၤ. ဖဲနဂုာ်ကျဲးစၢး ကဲထီၣ် တၢ်ဒိတၢ်တဲာ်အဂ့ၤ လၢတၢ်စံးတၢ်ကတိၤ တကပၤအခါ ဒီပုၢ်ဝဲၢ်မုၣ်ခွါ ကထံၣ်ဘၣ် နတၢ်လဲၤထီၣ်လဲၤထီ လၢနီၢ်သးတခီ.—၁ တံၤ ၄:၁၅.

၁၇. ဒ်သိး ဒီပုၢ်ဝဲၢ်ခွါသးစၢ်တဖၣ် ကမၤလၢပှဲၤထီၣ် အနီၢ်သးဖီတၢၣ်အဂီၢ် တၢ်မနုၤ ကမၤစၢၤအီၤလဲၣ်. (၂ တံၤမသ့း ၂:၂၂)

^၁၇ “ဟးဆှဲးပှၤသးစၢ် အတၢ်သူၣ်လီသးကွံတဖၣ်” ဒီး “လူၤတၢ်တီတၢ်လိၤ.” (ဖး ၂ တံၤမသ့း ၂:၂၂.) စီၤပီလူး ဟ့ၣ်ကူၣ် စီၤတံၤမသ့းလၢ ကမၤနၢၤကွံာ် တၢ်သူၣ်လီသးကွံလၢ ကမၤဘၣ်ဒိ အတၢ်ရ့လိာ်သးဒီး ယဟိဝၤယွၤ ဒီးကမၤတံာ်တာ်အီၤလၢ အကမၤအါထီၣ် ယဟိဝၤယွၤ အတၢ်မၤ. ဘၣ်သ့ၣ်သ့ၣ် နကထံၣ်ဘၣ်လၢ နသူတၢ်ဆၢကတီၢ်လၢ တၢ်မၤမုာ်မၤဖှံသးအဂီၢ် အါတလၢ အဃိ နကမၤအါထီၣ် ယဟိဝၤယွၤ အတၢ်မၤအဂီၢ် နတၢ်ဆၢကတီၢ် တအိၣ်အါအါလၢၤဘၣ်. အဒိ ဆိကမိၣ်ကွၢ် ဘၣ်ဃးဒီး နတၢ်လိာ်ခိၣ်လိာ်ကွဲ, နကွၢ်တၢ်လၢ အ့ၤထၢၤနဲၣ် မ့တမ့ၢ် နဂဲၤဝံၤဒံၤအိၤက့န့ၣ် နသူတၢ်ဆၢကတီၢ် လၢာ်ထဲလဲၣ်. နသူတၢ်ဆၢကတီၢ်လၢ နကမၤအါထီၣ် ယဟိဝၤယွၤ အတၢ်မၤ ဒီးမၤစၢၤပှၤဂၤ ကသ့ဧါ. ဘၣ်သ့ၣ်သ့ၣ် နမၤစၢၤတၢ်လၢ တၢ်ကွၢ်ထွဲဘှီဂ့ၤထီၣ်က့ၤ တၢ်အိၣ်ဖှိၣ်လီၢ် မ့တမ့ၢ် နမၤလ့ၣ်ဆီၣ်လၢ တၢ်စံၣ်တဲၤတဲလီၤတၢ်အဂီၢ် လၢနလီၢ်ကဝီၤပူၤသ့. နမ့ၢ်မၤ တၢ်သ့ၣ်တဖၣ်အံၤန့ၣ် ဘၣ်သ့ၣ်သ့ၣ် နကန့ၢ်ဘၣ် သကိးလၢ ကမၤစၢၤနၤဒ်သိး နကမၤလၢပှဲၤထီၣ် နနီၢ်သးဖီတၢၣ်.

နမ့ၢ်မၤစၢၤပှၤဂၤန့ၣ် နကဒိးန့ၢ်ဘၣ်တၢ်သးခု

၁၈. ဘၣ်မနုၤအဃိ ပတဲလၢ စီၤမၢ်ကူး ဒီးစီၤတံၤမသ့း အတၢ်အိၣ်မူ ပှဲၤဒီးတၢ်သးခုလဲၣ်.

^၁၈ ဒ်သိး စီၤမၢ်ကူး ဒီးစီၤတံၤမသ့း ကမၤစၢၤ ပှၤဂၤအဂီၢ် အဝဲသ့ၣ် တူၢ်ဆါအသးအါမး. အဃိ အဝဲသ့ၣ် အတၢ်အိၣ်မူန့ၣ် ပှဲၤဒီးတၢ်သးခု. (မၤတၢ် ၂၀:၃၅) ပမ့ၢ်ကွၢ် စီၤမၢ်ကူးန့ၣ် ဒ်သိး အကမၤစၢၤ ဒီပုၢ်ဝဲၢ်မုၣ်ခွါအဂီၢ် အသးအိၣ် လဲၤလၢတၢ်လီၢ်အဂၤ. တကးဒံးဘၣ် အကွဲးဘၣ်စ့ၢ်ကီး ယ့ၣ်ၡူး အတၢ်အိၣ်မူ ဒီးအတၢ်စံၣ်တဲၤတဲလီၤ တၢ်မၤအဂ့ၢ် လၢအလီၤထုးန့ၢ်သး. မ့မ့ၢ် စီၤတံၤမသ့းန့ၣ် အမၤစၢၤဘၣ် စီၤပီလူး ဒ်သိးကဒုးအိၣ်ထီၣ် တၢ်အိၣ်ဖှိၣ် ဒီးအဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါအါမး. ယဟိဝၤယွၤထံၣ်ဝဲ စီၤမၢ်ကူး ဒီးစီၤတံၤမသ့း အတၢ်ဟ့ၣ်လီၤသး ဒီးအဘၣ်သူၣ်ဘၣ်သး အဝဲသ့ၣ်ဒိၣ်မး.

၁၉. ဘၣ်မနုၤအဃိ ဒီပုၢ်ဝဲၢ်ခွါသးစၢ်တဖၣ် ကြၢးမၤထွဲ စီၤပီလူး အတၢ်ဟ့ၣ်ကူၣ်လၢအကွဲးန့ၢ် စီၤတံၤမသ့းလဲၣ် ဒီးအဝဲသ့ၣ် ကဒိးန့ၢ်ဘၣ် အဘျုးဒ်လဲၣ်.

^၁၉ ဖဲစီၤပီလူး ကွဲးလံာ်ပရၢလၢ စီၤတံၤမသ့း အအိၣ်အခါ အတၢ်ကတိၤန့ၣ် ပာ်ဖျါထီၣ်လၢအအဲၣ် စီၤတံၤမသ့းဒိၣ်မး. ဒီးတၢ်လၢ စီၤပီလူးကွဲးဝဲန့ၣ် ယဟိဝၤယွၤ မၢအကွဲးဝဲအဃိ ပထံၣ်ဘၣ်လၢ အတၢ်ကွဲးန့ၣ် ပာ်ဖျါထီၣ်ဝဲလၢ ယဟိဝၤယွၤအဲၣ် ဒီပုၢ်ဝဲၢ်ခွါသးစၢ်ဒိၣ်မး. ဒီပုၢ်ဝဲၢ်ခွါသးစၢ်ဧၢ ယဟိဝၤယွၤ အဲၣ်ဒိးလၢ နကအိၣ်ဒီး တၢ်သးခု လၢအတၢ်မၤအပူၤ. အဃိ ဂုာ်ကျဲးစၢး မၤထွဲ စီၤပီလူး အတၢ်ဟ့ၣ်ကူၣ် ဒီးမၤစၢၤအါထီၣ်ပှၤဂၤ. နမ့ၢ်မၤထွဲ တၢ်ဟ့ၣ်ကူၣ် တဖၣ်အံၤန့ၣ် နကအိၣ်ဒီး တၢ်သးခုလၢခဲအံၤ ဒီးနကဒိးန့ၢ်ဘၣ် “တၢ်မူနီၢ်ကီၢ်” လၢခါဆူညါ.—၁ တံၤ ၆:၁၈, ၁၉.