ပာ်ဖျါထီၣ် တၢ်ပာ်ကဲပှၤဂၤ

၁. ဖဲပှၤဂၤ ပာ်ဖျါထီၣ်လၢ အပာ်ကဲပှၤအခါ ပတူၢ်ဘၣ်ဒ်လဲၣ်. (ကတိၤဒိ ၂၂:၁)

ဖဲပှၤဂၤ ပာ်ကဲနၤအခါ နတူၢ်ဘၣ်ဒ်လဲၣ်. နကသးခု သပှၢ်တၢၢ်. ပဝဲပှၤဟီၣ်ခိၣ်ဖိ ခဲလၢာ်န့ၣ် ပအဲၣ်ဒိးလၢ ပှၤကပာ်ကဲပှၤ ဒီးပှၤမ့ၢ်ပာ်ကဲပှၤန့ၣ် ပသးခုဒိၣ်မး. အဃိ လံာ်စီဆှံ တဲဝဲလၢ “ပှၤမ့ၢ်ပာ်ကဲနၤန့ၣ် ဂ့ၤဒိၣ်န့ၢ်ဒံး နအိၣ်ဒီး စ့ညၣ်ဒီးထူလီၤ.”—ဖး ကတိၤဒိ ၂၂:၁.

၂-၃. (က) ပကပာ်ဖျါထီၣ် တၢ်ပာ်ကဲအဂီၢ် ဘၣ်မနုၤအဃိ အတညီ ထီဘိဘၣ်လဲၣ်. (ခ) လၢတၢ်မၤလိအံၤ ပကတဲသကိး တၢ်ဂ့ၢ်မနုၤလဲၣ်.

^၂ ဘၣ်ဆၣ် ပကပာ်ဖျါထီၣ် တၢ်ပာ်ကဲအဂီၢ် အတညီ ထီဘိဘၣ်. တၢ်ဂ့ၢ်တမံၤန့ၣ် မ့ၢ်ဝဲခီဖျိလၢ ပထံၣ်ဘၣ်ပှၤဂၤ အတၢ်လီၤတူာ်လီၤကာ်. တကးဒံးဘၣ် ခဲအံၤန့ၣ် ပှၤအါဂၤ အတၢ်ပာ်ကဲ တအိၣ်လၢၤဘၣ်. မ့မ့ၢ်ပှၤန့ၣ် ယဟိဝၤယွၤ အဲၣ်ဒိးလၢ ပက “ယူးယီၣ်ပာ်ကဲ ပှၤအကလုာ်ကလုာ်” အဃိ ပကဘၣ် ပာ်ဖျါထီၣ် တၢ်ပာ်ကဲထီဘိ.—၁ ပ့း ၂:၁၇.

^၃ ပပာ်ဖျါထီၣ် တၢ်ပာ်ကဲန့ၣ် အဲၣ်ဒိးတဲဝဲ မနုၤလဲၣ်. ပပာ်ဖျါထီၣ် တၢ်ပာ်ကဲလၢ (၁) ဟံၣ်ပူၤ, (၂) ဒီပုၢ်ဝဲၢ်မုၣ်ခွါအကျါ, (၃) ပှၤတၢ်ချၢအဖီခိၣ် ကသ့ဒ်လဲၣ်. ဒီးအမ့ၢ်ကီလၢ ပကပာ်ဖျါထီၣ် တၢ်ပာ်ကဲ သနာ်က့ ပပာ်ဖျါထီၣ် ကသ့ဒ်လဲၣ်န့ၣ် ပကတဲသကိး လၢတၢ်မၤလိအံၤ.

ပပာ်ဖျါထီၣ် တၢ်ပာ်ကဲန့ၣ် အဲၣ်ဒိးတဲဝဲ မနုၤလဲၣ်

၄. ပပာ်ဖျါထီၣ် တၢ်ပာ်ကဲန့ၣ် အဲၣ်ဒိးတဲဝဲ မနုၤလဲၣ်

^၄ တၢ်ပာ်ကဲန့ၣ် အဲၣ်ဒိးတဲဝဲ မနုၤလဲၣ်. တၢ်ကတိၤ “တၢ်ပာ်ကဲ” န့ၣ် အဲၣ်ဒိးတဲ ဘၣ်ဃးဒီး ပတၢ်ထံၣ်လၢ ပှၤတဂၤအဖီခိၣ် ဒီးပရ့အီၤဒ်လဲၣ်. ဖဲပထံၣ်လၢ ပှၤတဂၤ အိၣ်ဒီး တၢ်ဂ့ၤတၢ်ဝါတဖၣ်, မၤတ့ၢ်တၢ်လၢ အဂ့ၤမးတမံၤမံၤ မ့တမ့ၢ် အအိၣ်ဒီး တၢ်စိတၢ်ကမီၤ လၢပဖီခိၣ်န့ၣ် ပရ့ဒီးအီၤလၢ တၢ်ပာ်ကဲ. ဒီးပပာ်ဖျါထီၣ်လၢ ပပာ်ကဲအီၤန့ၣ် မ့ၢ်ဝဲခီဖျိလၢ ပအဲၣ်ဒိး ပာ်ကဲအီၤနီၢ်ကီၢ်.—မး ၁၅:၈.

၅. ဘၣ်မနုၤအဃိ ပပာ်ကဲပှၤဂၤလဲၣ်.

^၅ ယဟိဝၤယွၤ အဲၣ်ဒိးလၢ ပကပာ်ကဲပှၤဂၤ. အဒိ အအဲၣ်ဒိးလၢ ပကပာ်ကဲ “ပှၤလၢအအိၣ်ဒီး တၢ်စိတၢ်ကမီၤလၢ အပၢတၢ်လၢ ပဖီခိၣ်.” (ရိ ၁၃:၁, ၇) ဘၣ်ဆၣ် ဘၣ်သ့ၣ်သ့ၣ် ပှၤတနီၤ ကဆိကမိၣ်ဝဲလၢ “ပှၤတဂၤ မ့ၢ်မၤတၢ်လၢ အလီၤပာ်ကဲန့ၣ် ယကပာ်ကဲအီၤ.” တၢ်ဆိကမိၣ်အံၤ အဘၣ်ဧါ. တဘၣ်ဘၣ်. ပသ့ၣ်ညါလၢ ပကဘၣ် ပာ်ဖျါထီၣ် တၢ်ပာ်ကဲပှၤတဂၤန့ၣ် တမ့ၢ်ခီဖျိလၢ တၢ်လၢအဝဲသ့ၣ် မၤဝဲ ဒီးတမၤဝဲ အဃိန့ၣ်ဘၣ်. ပပာ်ကဲပှၤဂၤန့ၣ် ခီဖျိလၢ ယဟိဝၤယွၤအဲၣ်ဒိးလၢ ပကမၤဒ်န့ၣ် ဒီးပအဲၣ်ဒိး မၤသးခုအသး.—ၡူ ၄:၁၄; ၁ ပ့း ၃:၁၅.

၆. ပှၤမ့ၢ်တပာ်ကဲပှၤဘၣ် သနာ်က့ ဘၣ်မနုၤအဃိ ပပာ်ဖျါထီၣ်ဒံး တၢ်ပာ်ကဲလၢ အဝဲသ့ၣ် အဖီခိၣ်လဲၣ်. (ကွၢ်စ့ၢ်ကီးတၢ်ဂီၤ.)

^၆ ပှၤတနီၤ ကဆိကမိၣ်ဝဲလၢ ‘ပှၤတဂၤ မ့ၢ်တပာ်ကဲပှၤဘၣ်န့ၣ် ပပာ်ကဲအီၤ ကညီ စ့ၢ်ကီးဧါ.’ ပပာ်ကဲအီၤညီ. ပကကွၢ်သကိး တၢ်အဒိတနီၤ. စီၤပၤစီလူးန့ၣ် အတဲတၢ်ဒီး အဖိခွါ စီၤယိနၤသၣ် ဆူၣ်ဆူၣ်ကိၤကိၤ လၢပှၤဂၤအမဲာ်ညါ. (၁ မူၤ ၂၀:၃၀-၃၄) သနာ်က့ စီၤယိနၤသၣ် ပာ်ကဲဒံးအပါ လၢအကဲစီၤပၤ ဒီးဒုးသကိးတၢ်ဒီးအီၤ တုၤလၢအပါသံ. (၂ မိၤ ၂၀:၁၂; ၂ မူၤ ၁:၂၃) ပှၤလုၢ်တၢ်ခိၣ်အဒိၣ်ကတၢၢ် စီၤဧ့လံၤ တဲအၢတဲသီ နီၢ်ဃးနၤ လၢအမူၤ စပံးထံ. (၁ မူၤ ၁:၁၂-၁၄) တကးဒံးဘၣ် နီၢ်ဃးနၤ ဒီးပှၤအံၣ်စရ့လးဖိတဖၣ် သ့ၣ်ညါဝဲလၢ စီၤဧ့လံၤအဖိခွါတဖၣ် မၤအၢတၢ် ဘၣ်ဆၣ် အပါတသိၣ် အဝဲသ့ၣ်ဘၣ်. သနာ်က့ နီၢ်ဃးနၤ တဲတၢ်ဒီးစီၤဧ့လံၤ လၢတၢ်ပာ်ကဲဒံး. (၁ မူၤ ၁:၁၅-၁၈; ၂:၂၂-၂၄) ဒီးပှၤပိာ်ခွါတနီၤလၢ ဝ့ၢ်အၤသ့ၣ်န့ၣ် အဝဲသ့ၣ်တဲဆါ စီၤပီလူး ဒီးတဲဝဲလၢအကဲ “ပှၤလၢအဟး တဲကြီတၢ်.” (မၤတၢ် ၁၇:၁၈) ပှၤတဲဆါ စီၤပီလူး ဒ်အံၤသနာ်က့ အတဲတၢ်ဒီး ပှၤဂၤလၢ တၢ်ပာ်ကဲဒံး. (မၤတၢ် ၁၇:၂၂) တၢ်အဒိတဖၣ်အံၤ ပာ်ဖျါထီၣ်လၢ ခီဖျိလၢ ပအဲၣ်ယဟိဝၤယွၤ ဒီးပတဘၣ်သး မၤဘၣ်ဒိ အသးဘၣ်အဃိ ပပာ်ဖျါထီၣ် တၢ်ပာ်ကဲပှၤဂၤ. ဒီးအမ့ၢ်ကီဘၣ်ဆၣ် ပကြၢးပာ်ဖျါထီၣ် တၢ်ပာ်ကဲပှၤဂၤဒံး. အဃိ ပကြၢးပာ်ဖျါထီၣ် တၢ်ပာ်ကဲလၢ မတဂၤအဖီခိၣ်လဲၣ် ဒီးဘၣ်မနုၤအဃိလဲၣ်. ပကဆဲးကွၢ်သကိး.

ပာ်ဖျါထီၣ်တၢ်ပာ်ကဲ လၢဟံၣ်ပူၤ

၇. ပကပာ်ဖျါထီၣ်တၢ်ပာ်ကဲ လၢဟံၣ်ပူၤအဂီၢ် ဘၣ်မနုၤအဃိ အတညီဘၣ်လဲၣ်.

^၇ ဘၣ်မနုၤအဃိ အတညီဘၣ်လဲၣ်. ပအိၣ်ဘၣ်ဒီး ပဟံၣ်ဖိဃီဖိ ထီဘိအဃိ ပသ့ၣ်ညါလိာ်သး တၢ်ဂ့ၤတၢ်ဝါ ဒီးတၢ်ဂံၢ်စၢ်ဘါစၢ်. ပဟံၣ်ဖိဃီဖိ တနီၤန့ၣ် အိၣ်ဒီးတၢ်ဆါလၢ ပကွၢ်ထွဲဘၣ်အီၤကီ မ့တမ့ၢ် အဝဲသ့ၣ် သးကိၢ်တၢ် အါတလၢ. အဂၤတနီၤန့ၣ် တဲတၢ် ဒီးမၤတၢ်လၢ အမၤဘၣ်ဒိပသး. ဖဲပအိၣ်ဒီး ပဟံၣ်ဖိဃီဖိအခါ ပကြၢးတူၢ်ဘၣ် တၢ်မုာ်တၢ်ခုၣ်. ဘၣ်ဆၣ် ဟံၣ်ဖိဃီဖိ မ့ၢ်တပာ်ကဲလိာ်သးဘၣ်န့ၣ် အဝဲသ့ၣ် ကသးထီၣ်လိာ်သး ဒီးလၢခံန့ၣ် တၢ်ဃူတၢ်ဖိး တအိၣ်လၢၤဘၣ်. ဟံၣ်ဖိဃီဖိန့ၣ် အလီၤဂာ်ဒီး နီၢ်ခိမိၢ်ပှၢ်. အဒိ ပမ့ၢ်အိၣ်ဒီး တၢ်ဆါတခါခါန့ၣ် ပမိၢ်ပှၢ်တမၤတၢ် ဂ့ၤဂ့ၤလၢၤဘၣ်. ဒ်န့ၣ်အသိး ဟံၣ်ဖိဃီဖိ မ့ၢ်တပာ်ကဲလိာ်သးဘၣ်န့ၣ် အဝဲသ့ၣ် တၢ်ဃူတၢ်ဖိး တအိၣ်လၢၤဘၣ်. ဘၣ်ဆၣ် တၢ်ဆါအါတက့ၢ်န့ၣ် ပှၤကူစါအီၤသ့အဃိ ဟံၣ်ဖိဃီဖိစ့ၢ်ကီး မၤလိသးလၢ ကအိၣ်ဒီးတၢ်ပာ်ကဲ ဒီးပာ်ဖျါထီၣ် တၢ်ပာ်ကဲလိာ်သးသ့.

၈. ဘၣ်မနုၤအဃိ ပကဘၣ်ပာ်ဖျါထီၣ် တၢ်ပာ်ကဲလၢ ဟံၣ်ပူၤလဲၣ်. (၁ တံၤမသ့း ၅:၄, ၈)

^၈ ဘၣ်မနုၤအဃိ ပကဘၣ်ပာ်ဖျါထီၣ် တၢ်ပာ်ကဲလဲၣ်. (ဖး ၁ တံၤမသ့း ၅:၄, ၈.) ဖဲစီၤပီလူးကွဲးန့ၢ် စီၤတံၤမသ့း လံာ်ပရၢ အဆိကတၢၢ် တဘ့ၣ်အခါ အကွဲးဖျါထီၣ် ဘၣ်ဃးဒီး ဟံၣ်ဖိဃီဖိ ကဘၣ်ရ့လိာ်သး ဒီးကဟုကယာ်လိာ်သးဒ်လဲၣ်. စီၤပီလူး တဲဝဲလၢ ပပာ်ဖျါထီၣ် တၢ်ပာ်ကဲလၢ ဟံၣ်ပူၤန့ၣ် တမ့ၢ်လၢ ပကဘၣ်မၤအီၤ အဃိဘၣ်. ဘၣ်ဆၣ် ပအိၣ်ဒီး “တၢ်သးတီဒီးကစၢ်ယွၤ” အဃိ ပသးအိၣ်မၤအီၤ. တၢ်ကတိၤအံၤ အဲၣ်ဒိးတဲဝဲလၢ ပပာ်ဖျါထီၣ် တၢ်ပာ်ကဲန့ၣ် ခီဖျိလၢ ပအဲၣ်ယဟိဝၤယွၤ ဒီးအဘၣ်ထွဲလိာ်သးဒီး ပဘူၣ်ထီၣ်ဘါထီၣ်အီၤ. ယဟိဝၤယွၤန့ၣ် အဒုးအိၣ်ထီၣ် ဟံၣ်ဖိဃီဖိ. (အ့း ၃:၁၄, ၁၅) အဃိ ဖဲပပာ်ကဲ ပဟံၣ်ဖိဃီဖိအခါ မ့ၢ်ဝဲပပာ်ကဲ ယဟိဝၤယွၤ. (၁ တံၤ ၅:၄) ပသ့ၣ်ညါဘၣ် ဒ်အံၤအဃိ အရ့ဒိၣ်ဒိၣ်မးလၢ ပကပာ်ဖျါထီၣ် တၢ်ပာ်ကဲလၢ ဟံၣ်ပူၤ.

၉. ပှၤဒီမိၢ်ဝၤ ပာ်ဖျါထီၣ် တၢ်ပာ်ကဲလိာ်သး ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၉ ပပာ်ဖျါထီၣ် တၢ်ပာ်ကဲ ကသ့ဒ်လဲၣ်. ဝၤတဂၤလၢ အပာ်လုၢ်ပာ်ပှ့ၤအမါန့ၣ် လၢပှၤမဲာ်ညါမ့ၢ်ဂ့ၤ ပှၤလီၢ်ခံမ့ၢ်ဂ့ၤ အပာ်ကဲအမါထီဘိ. (ကတိၤ ၃၁:၂၈; ၁ ပ့း ၃:၇) အတမၤဒၢၣ်အမါ, မၤမဲာ်ဆှးအီၤ မ့တမ့ၢ် တဒုးတူၢ်ဘၣ်အီၤလၢ အလုၢ်အပှ့ၤ တအိၣ်ဘၣ်န့ၣ်ဘၣ်. ဒီပုၢ်ဝဲၢ်ခွါအဲရံၤယိၤa လၢအအိၣ်လၢ ကီၢ်အၣ်ကၠ့ၣ်တံနါ တဲဝဲလၢ “ယမါန့ၣ် အအိၣ်တဆူၣ်ဘၣ် အဃိ တဘျီတခီၣ် အတဲတၢ်လၢ အမၤဆါယသး. ဖဲန့ၣ်အခါ ယဂုာ်ကျဲးစၢး ဆိကမိၣ်လၢ အတအဲၣ်ဒိး တဲတၢ်လၢ အမၤဆါယသး ဒ်န့ၣ်ဘၣ်. ဒီးယသ့ၣ်နီၣ်ထီၣ်က့ၤ ၁ ကရံၣ်သူး ၁၃:၅ အဃိ အမၤစၢၤယၤလၢ ယကတဲတၢ်ဒီးအီၤ လၢတၢ်ပာ်ကဲ ဒီးတသးထီၣ်အီၤဘၣ်.” (ကတိၤ ၁၉:၁၁) မါစ့ၢ်ကီး ပာ်ကဲအဝၤ သ့ခီဖျိ အတဲအဝၤအဂ့ၢ် လၢအဂ့ၤတခီ. (အ့း ၅:၃၃) အတတဲအၢတဲသီ အဝၤအဂ့ၢ်, တတဲလီၤနံၤအဂ့ၢ် မ့တမ့ၢ် တတဲတၢ်လၢ ကမၤဆါအဝၤအသးဘၣ်. အသ့ၣ်ညါလၢ အမ့ၢ်မၤဝဲဒ်န့ၣ်န့ၣ် အကမၤဘၣ်ဒိ အတၢ်ဆီဟံၣ်ဆီဃီ. (ကတိၤ ၁၄:၁) ဒီပုၢ်ဝဲၢ်မုၣ်တဂၤလၢ ကီၢ်အံၤတလံန့ၣ် တဲဝဲလၢ “ယဝၤန့ၣ် အသးကိၢ်တၢ်ဆူၣ်မး. လၢညါ တၢ်လၢယတဲ ဒီးယတၢ်ပာ်မဲာ်ပာ်နါန့ၣ် ဖျါလၢ ယတပာ်ကဲအီၤဘၣ်. ဘၣ်ဆၣ် ဖဲယရ့အါထီၣ်ဒီး ဒီပုၢ်ဝဲၢ်မုၣ်ခွါလၢ အတဲပှၤဂၤအဂ့ၢ် လၢအဂ့ၤတခီအခါ မၤစၢၤယၤဒ်သိး ယကပာ်ဖျါအါထီၣ် တၢ်ပာ်ကဲလၢ ယဝၤအဖီခိၣ်.”

၁၀. သးစၢ်တဖၣ် ပာ်ဖျါထီၣ်လၢ အပာ်ကဲ အမိအပါ ကသ့ဒ်လဲၣ်.

^၁၀ သးစၢ်တဖၣ် ပာ်ကဲအမိအပါသ့ခီဖျိ အမၤထွဲ တၢ်ဘျၢလၢ အမိအပါ ပာ်လီၤန့ၢ်အီၤ. (အ့း ၆:၁-၃) အဝဲသ့ၣ် ကြၢးတဲတၢ်ဒီး အမိအပါလၢ တၢ်ပာ်ကဲ. (၂ မိၤ ၂၁:၁၇) ဒီးဖဲအမိအပါ သးပှၢ်ထီၣ်အခါ အပာ်ဖျါထီၣ် တၢ်ပာ်ကဲ သ့ခီဖျိ အဂုာ်ကျဲးစၢး မၤစၢၤအမိအပါ. ဆိကမိၣ်ကွၢ် မရံယၤ အတၢ်အိၣ်သး. မရံယၤန့ၣ် အပါတကဲ ယဟိဝၤပှၤအုၣ်အသးဘၣ်. ဖဲအပါ အိၣ်တဆူၣ်ဘၣ်အခါ အပါတရ့ဒီးအီၤ ဂ့ၤဂ့ၤဘၣ်အဃိ ကီဒိၣ်မးလၢ အကကွၢ်ထွဲအပါ. အတဲဝဲလၢ “ယဃ့ထုကဖၣ်လၢ ယကအိၣ်ဒီး တၢ်ပာ်ကဲ တကးဒံးဘၣ် ယကပာ်ဖျါထီၣ်လၢ ယပာ်ကဲယပါ. ယဆိကမိၣ်လၢ ယဟိဝၤယွၤ မ့ၢ်မၢယပာ်ကဲ ယမိယပါန့ၣ် ဒ်သိးယမၤကန့ၢ်အဂီၢ် အကဟ့ၣ်ယၤ တၢ်ဂံၢ်တၢ်ဘါ. ယသ့ၣ်ညါလၢ ယပါမ့ၢ်တဆီတလဲ အတၢ်ပာ်သးဘၣ် သနာ်က့ ယကြၢးပာ်ကဲအီၤဒံး.” ပပာ်ဖျါထီၣ် တၢ်ပာ်ကဲလၢ ပဟံၣ်ဖိဃီဖိ အဖီခိၣ် မ့ၢ်ကီသနာ်က့ ပမ့ၢ်ဆဲးပာ်ဖျါထီၣ်ဒံးန့ၣ် မ့ၢ်ဝဲ ပပာ်ကဲ ယဟိဝၤယွၤ လၢအဒုးအိၣ်ထီၣ် ဟံၣ်ဖိဃီဖိ.

ပာ်ဖျါထီၣ်တၢ်ပာ်ကဲလၢ ဒီပုၢ်ဝဲၢ်မုၣ်ခွါအကျါ

၁၁. ပကရ့ဒီး ဒီပုၢ်ဝဲၢ်မုၣ်ခွါလၢ တၢ်ပာ်ကဲအဂီၢ် ဘၣ်မနုၤအဃိ အတညီဘၣ်လဲၣ်.

^၁၁ ဘၣ်မနုၤအဃိ အတညီဘၣ်လဲၣ်. ဒီပုၢ်ဝဲၢ်မုၣ်ခွါတဖၣ် ဂုာ်ကျဲးစၢး အိၣ်မူမၤထွဲ ဒ်လံာ်စီဆှံ သိၣ်လိဝဲအသိး. ဘၣ်ဆၣ် တဘျီတခီၣ်န့ၣ် အဝဲသ့ၣ် တရ့ပှၤဂ့ၤဂ့ၤဘၣ်, ဆိကမိၣ်ကမၣ်ပှၤ မ့တမ့ၢ် မၤအ့န့ပသး. ဒီးဖဲပရ့လိာ်သးအခါ “တၢ်ပာ်ဒ့ၣ်ပာ်ကမၣ် အလီၢ်” အိၣ်ထီၣ်ဝဲသ့အဃိ တညီလၢ ပကပာ်ဖျါထီၣ် တၢ်ပာ်ကဲလိာ်သးဘၣ်. (ကလီး ၃:၁၃) ဘၣ်ဆၣ် ဒ်သိး ပကဆဲးပာ်ဖျါထီၣ် တၢ်ပာ်ကဲအဂီၢ် တၢ်မနုၤ ကမၤစၢၤပှၤလဲၣ်.

၁၂. ဘၣ်မနုၤအဃိ ပကြၢးပာ်ဖျါထီၣ် တၢ်ပာ်ကဲလၢ ဒီပုၢ်ဝဲၢ်မုၣ်ခွါ အဖီခိၣ်လဲၣ်. (၂ ပ့းတရူး ၂:၉-၁၂)

^၁၂ ဘၣ်မနုၤအဃိ ပကဘၣ်ပာ်ဖျါထီၣ် တၢ်ပာ်ကဲလဲၣ်. (ဖး ၂ ပ့းတရူး ၂:၉-၁၂.) ဖဲစီၤပ့းတရူး ကွဲးဝဲလံာ်ပရၢ ခံဘ့ၣ်တဘ့ၣ်အခါ အတဲဝဲလၢ ပှၤတနီၤလၢ တၢ်အိၣ်ဖှိၣ်ပူၤန့ၣ် တပာ်ကဲ “ပှၤလၢအအိၣ်ဒီး တၢ်စိတၢ်ကမီၤတဖၣ်” လၢအမ့ၢ် ခရံာ်ဖိ တၢ်အိၣ်ဖှိၣ်သးပှၢ်ဘၣ် ဒီးတတဲ အဝဲသ့ၣ်အဂ့ၢ်လၢ တၢ်ပာ်ကဲဘၣ်. မူခိၣ်ကလူးလၢ အသးတီတဖၣ် လၢအထံၣ် တၢ်ကဲထီၣ်သးန့ၣ် အဝဲသ့ၣ် မၤဝဲဒ်လဲၣ်. အဝဲသ့ၣ် “ပာ်ကဲ ယဟိဝၤယွၤ” အဃိ အဝဲသ့ၣ် တတဲအၢတဲသီ ပှၤမၤကမၣ်တၢ် တဖၣ်န့ၣ် နီတစဲးဘၣ်. အလီၤကမၢကမၣ်ဒိၣ်မး တမ့ၢ်ဧီၤ. မူခိၣ်ကလူးလၢ အသးတီတဖၣ်အံၤ တတဲအၢတဲသီ ပှၤပာ်ထီၣ်ထီသးတဖၣ်န့ၣ် နီတစဲးဘၣ်. မူခိၣ်ကလူးတဖၣ်အံၤ ပျဲဝဲလၢ ယဟိဝၤယွၤ ကစံၣ်ညီၣ် ဒီးသိၣ်က့ၤသီက့ၤ ပှၤတဖၣ်န့ၣ်. (ရိ ၁၄:၁၀-၁၂; ထိၣ်သတြီၤဒီး ယူဒၤ ၉.) ပမၤလိန့ၢ်တၢ်လၢ မူခိၣ်ကလူးလၢ အသးတီတဖၣ်အံၤ အအိၣ်သ့. မူခိၣ်ကလူးတဖၣ်အံၤ မ့ၢ်ပာ်ကဲ ပှၤလၢအထီဒါတၢ် ထဲထဲအံၤန့ၣ် ပဝဲစ့ၢ်ကီး ပကြၢးပာ်ကဲ ဒီပုၢ်ဝဲၢ်မုၣ်ခွါ လၢအအဲၣ်ယဟိဝၤယွၤဒိၣ်မး. ဒီးပကြၢး “ပာ်ဖျါထီၣ်ဆိ” တၢ်ပာ်ကဲ လၢပဒီပုၢ်ဝဲၢ်မုၣ်ခွါ အဖီခိၣ်. (ရိ ၁၂:၁၀) ပမ့ၢ်မၤဒ်န့ၣ်န့ၣ် မ့ၢ်ဝဲ ပပာ်ကဲ ယဟိဝၤယွၤ.

၁၃-၁၄. ပပာ်ဖျါထီၣ် တၢ်ပာ်ကဲလၢ တၢ်အိၣ်ဖှိၣ်ပူၤ ကသ့ဒ်လဲၣ်. တဲဖျါထီၣ် တၢ်အဒိ. (ကွၢ်စ့ၢ်ကီးတၢ်ဂီၤ.)

^၁၃ ပပာ်ဖျါထီၣ် တၢ်ပာ်ကဲ ကသ့ဒ်လဲၣ်. ဖဲတၢ်အိၣ်ဖှိၣ်သးပှၢ်တဖၣ် သိၣ်လိပှၤဂၤအခါ အဝဲသ့ၣ် ကြၢးပာ်ဖျါထီၣ် တၢ်အဲၣ်ထီဘိ. (ဖံၤ ၈, ၉) ဒီးဖဲအသိၣ်က့ၤသီက့ၤ ပှၤတဂၤဂၤအခါ အကြၢး ပာ်ဖျါထီၣ်တၢ်အဲၣ် ဒီးတဘၣ်ပာ်ဖျါထီၣ် တၢ်သးဒိၣ်ဘၣ်. ဒီပုၢ်ဝဲၢ်မုၣ်စ့ၢ်ကီး ပာ်ဖျါထီၣ် တၢ်ပာ်ကဲ လၢတၢ်အိၣ်ဖှိၣ်ပူၤ ဒီးမၤစၢၤပှၤဂၤဒ်သိး ကပာ်ကဲလိာ်သး သ့ခီဖျိ အဝဲသ့ၣ် တတဲအီၣ်ပှၤဂ့ၢ် ဒီးတဲဟးဂီၤပှၤဂၤဘၣ်. (တံ ၂:၃-၅) တၢ်အိၣ်ဖှိၣ်သးပှၢ်တဖၣ်န့ၣ် မၤတၢ်ဆူၣ်မး. အဝဲသ့ၣ် ဖီၣ်မူဒါလၢ တၢ်အိၣ်ဖှိၣ်ပူၤ, ရဲၣ်ကျဲၤ ဒီးလဲၤစံၣ်တဲၤတဲလီၤတၢ် ဒီးအဝဲသ့ၣ် မၤစၢၤ ပှၤလၢ အ ‘ခါထီၣ်အခီၣ်ခါ လၢကမၣ်.’ (ကလၤ ၆:၁) အဃိ ပဝဲခဲလၢာ် ပာ်ကဲ တၢ်အိၣ်ဖှိၣ်သးပှၢ် သ့ခီဖျိ ပဒိကနၣ် အဝဲသ့ၣ်ကလုၢ် ဒီးစံးဘျုးအဝဲသ့ၣ်.—၁ တံၤ ၅:၁၇.

^၁၄ ဒီပုၢ်ဝဲၢ်မုၣ်ရိၤစံအိၤ တဲဝဲလၢ ဘၣ်တဘျီ အကီဘၣ်အီၤလၢ ကပာ်ဖျါထီၣ် တၢ်ပာ်ကဲလၢ တၢ်အိၣ်ဖှိၣ်သးပှၢ်လၢ အဟ့ၣ်ကူၣ်အီၤတဂၤ အဖီခိၣ်. အတဲဝဲလၢ “ယတူၢ်ဘၣ်လၢ အတတဲတၢ်ဒီးယၤ ဂ့ၤဂ့ၤဘၣ်အဃိ ယသးထီၣ်တၢ်. လၢယဟံၣ်န့ၣ် ယတဲအဂ့ၢ်လၢ အတဂ့ၤဘၣ်. ယတပာ်ဖျါထီၣ် ယတၢ်တူၢ်ဘၣ်ဘၣ် သနာ်က့ လၢယသးပူၤန့ၣ် ယတူၢ်ဘၣ်လၢ အတဘၣ်သး မၤစၢၤယၤ နီၢ်ကီၢ်ဘၣ်. အဃိ ယတမၤထွဲ အတၢ်ဟ့ၣ်ကူၣ်ဘၣ်.” တၢ်မနုၤမၤစၢၤ ရိၤစံအိၤလဲၣ်. အတဲဝဲလၢ “ယဖး ၁ သ့းစၤလနံ ၅:၁၂, ၁၃. ဒီးဖဲယသ့ၣ်ညါလီၤသးလၢ ယတပာ်ကဲ တၢ်အိၣ်ဖှိၣ်သးပှၢ် တဂၤအံၤဘၣ်အခါ ယသးလၢအသ့ၣ်ညါဒၣ်တၢ် မၤတံာ်တာ်ယၤ. ယဃ့ထုကဖၣ် ဒီးဃုသ့ၣ်ညါအါထီၣ် တၢ်ဂ့ၢ်လီၤတံၢ်လီၤဆဲးလၢ ကမၤစၢၤယၤဒ်သိး ယကဆီတလဲ ယတၢ်ပာ်သး. လၢခံ ယနၢ်ပၢၢ်ထီၣ်လၢ တၢ်ကီတၢ်ခဲန့ၣ် တမ့ၢ်တၢ်အိၣ်ဖှိၣ်သးပှၢ် တဂၤန့ၣ်ဘၣ်, အကဲဝဲ ယတၢ်ပာ်ထီၣ်ထီသး. ခဲအံၤ ယသ့ၣ်ညါလၢ ခီဖျိလၢ ယတအိၣ်ဒီး တၢ်ဆီၣ်လီၤသးဘၣ်အဃိ ကီလၢယကပာ်ကဲပှၤဂၤ. ယဂုာ်ကျဲးစၢး ဒ်သိး ကပာ်ဖျါထီၣ် တၢ်ပာ်ကဲပှၤဂၤ ဒီးယဆဲးမၤဒ်န့ၣ်အဃိ ယဟိဝၤယွၤသးခု.”

ပာ်ဖျါထီၣ် တၢ်ပာ်ကဲလၢ ပှၤတၢ်ချၢအဖီခိၣ်

၁၅. ဘၣ်မနုၤအဃိ အကီလၢပကပာ်ဖျါထီၣ် တၢ်ပာ်ကဲလၢ ပှၤတၢ်ချၢအဖီခိၣ်လဲၣ်.

^၁၅ ဘၣ်မနုၤအဃိ အတညီဘၣ်လဲၣ်. ဖဲပလဲၤစံၣ်တဲၤတဲလီၤတၢ်အခါ အါဘျီန့ၣ် ပထံၣ်လိာ်သးဒီး ပှၤလၢအတသးအိၣ် လံာ်စီဆှံ တၢ်မ့ၢ်တၢ်တီ ဒီးတသးအိၣ် ကစၢ်ယွၤဘၣ်. (အ့း ၄:၁၈) ဒီးပှၤတနီၤန့ၣ် ဖဲအဝဲသ့ၣ် အနီၢ်ဆံးခါ ပှၤသိၣ်လိအီၤလၢ ကနာ်တၢ် ဒ်အံၤဒ်န့ၣ်အဃိ အတအဲၣ်ဒိး ဒိကနၣ် တၢ်ကစီၣ်လၢပတဲဘၣ်. ပှၤတနီၤလၢကၠိ မ့တမ့ၢ် လၢပတၢ်မၤလီၢ်န့ၣ် အတၢ်ပာ်ကဲတအိၣ်ဘၣ်. ဒီးဘၣ်သ့ၣ်သ့ၣ် ပတၢ်မၤခိၣ် မ့တမ့ၢ် ကၠိသရၣ်တဖၣ်န့ၣ် တဘၣ်သူၣ်ဘၣ်သးပှၤဘၣ် ဒီးတပာ်လုၢ်ပာ်ပှ့ၤ ပတၢ်မၤဘၣ်. လၢခံကယီကယီန့ၣ် ပတအဲၣ်ဒိးပာ်ကဲ ပှၤဒ်အံၤလၢၤဘၣ် ဒီးတအဲၣ်ဒိးရ့ဒီးအီၤ ဂ့ၤဂ့ၤလၢၤဘၣ်.

၁၆. ဘၣ်မနုၤအဃိ ပကြၢးပာ်ဖျါထီၣ် တၢ်ပာ်ကဲလၢ ပှၤတၢ်ချၢအဖီခိၣ်လဲၣ်. (၁ ပ့းတရူး ၂:၁၂; ၃:၁၅)

^၁၆ ဘၣ်မနုၤအဃိ ပကဘၣ်ပာ်ဖျါထီၣ် တၢ်ပာ်ကဲလဲၣ်. သ့ၣ်နီၣ်ထီၣ်လၢ ပရ့ဒီး ပှၤတၢ်ချၢဒ်လဲၣ်န့ၣ် ယဟိဝၤယွၤ ပာ်သူၣ်ပာ်သးဝဲ. တၢ်မၢဖိ ပ့းတရူး ဒုးသ့ၣ်နီၣ်ထီၣ် ခရံာ်ဖိတဖၣ်လၢ ဖဲပှၤဂၤထံၣ်ဘၣ် အဝဲသ့ၣ် သကဲာ်ပဝးလၢအဂ့ၤအခါ ပှၤက “မၤလၤကပီၤ ကစၢ်ယွၤ.” အဃိ စီၤပ့းတရူး တဲဘၣ်အဝဲသ့ၣ်လၢ ကတဲဖျါထီၣ် အတၢ်စူၢ်တၢ်နာ်လၢ “တၢ်သးစူၤ ဒီးတၢ်ပာ်ကဲဒိၣ်မး.” (ဖး ၁ ပ့းတရူး ၂:၁၂; ၃:၁၅.) ဖဲပလဲၤထီၣ်တၢ်မူး လၢပတၢ်စူၢ်တၢ်နာ်အဃိ, ဖဲပတဲဘၣ် ပှၤလၢပဃၢၤ ဘၣ်ဃးဒီး ပတၢ်စူၢ်တၢ်နာ် အဂ့ၢ်အခါ ပဘၣ်တဲတၢ်လၢ တၢ်ပာ်ကဲထီဘိ. ပတဲတၢ်ဒ်လဲၣ် ဒီးပတဲမနုၤလဲၣ်န့ၣ် ယဟိဝၤယွၤ ပာ်သူၣ်ပာ်သးဝဲ ဒီးအနၢ်ဟူဝဲ. ခီဖျိလၢ တၢ်ဂ့ၢ်အံၤအဃိ ပကြၢးပာ်ဖျါထီၣ် တၢ်ပာ်ကဲလၢ ပှၤတၢ်ချၢအဖီခိၣ် ထီဘိ.

၁၇. ပပာ်ဖျါထီၣ် တၢ်ပာ်ကဲလၢ ပှၤတၢ်ချၢအဖီခိၣ် ကသ့ဒ်လဲၣ်.

^၁၇ ပပာ်ဖျါထီၣ် တၢ်ပာ်ကဲ ကသ့ဒ်လဲၣ်. ဖဲပလဲၤစံၣ်တဲၤတဲလီၤတၢ်အခါ ပှၤလၢအသ့ၣ်ညါ လံာ်စီဆှံ တၢ်မ့ၢ်တၢ်တီအဂ့ၢ် ထဲတစဲးမ့ၢ်ဂ့ၤ တသ့ၣ်ညါဝဲ နီတစဲးဘၣ်မ့ၢ်ဂ့ၤ ပတဘၣ် ဆိကမိၣ်ဆံး အဝဲသ့ၣ်ဘၣ်. ပကဘၣ် သ့ၣ်နီၣ်ထီၣ်လၢ ကစၢ်ယွၤထံၣ် အဝဲသ့ၣ်ဒ် ပှၤလုၢ်ဒိၣ်ပှ့ၤဒိၣ် ဒီးအဝဲသ့ၣ် ဂ့ၤဒိၣ်န့ၢ်ဒံးပှၤ. (ဃး ၂:၇; ဖံလံး ၂:၃) ဒီးပှၤမ့ၢ်တဲဆါ ပတၢ်စူၢ်တၢ်နာ် အဂ့ၢ်န့ၣ် ပတဘၣ်မၤဆၢက့ၤတၢ်ဘၣ်. အဒိ ပတဘၣ်တဲတၢ်လၢ အပာ်ဖျါထီၣ်လၢ ပဖၠဲးန့ၢ်အဝဲသ့ၣ် ဒီးတဲတၢ်လၢ အမၤသးထီၣ်အဝဲသ့ၣ်ဘၣ်. (၁ ပ့း ၂:၂၃) ဒီးပမ့ၢ်တဲကမၣ်ဘၣ်တၢ် တမံၤမံၤန့ၣ် ပကဘၣ် ဃ့ဝံသးစူၤက့ၤ တဘျီဃီ. လၢတၢ်မၤလီၢ်န့ၣ် ပပာ်ဖျါထီၣ် တၢ်ပာ်ကဲကသ့ဒ်လဲၣ်. ပပာ်ဖျါထီၣ် သ့ခီဖျိ ပကဲပှၤမၤတၢ်ဖိ လၢအဂ့ၤ ဒီးအိၣ်ဒီး တၢ်ထံၣ်အဂ့ၤလၢ ပတၢ်မၤခိၣ် ဒီးပှၤမၤတၢ်ဖိ အဂၤတဖၣ် အဖီခိၣ်. (တံ ၂:၉, ၁၀) ပမ့ၢ်ကဲ ပှၤမၤတၢ်ဖိလၢ အမၤတၢ် တီတီလိၤလိၤ, မၤတၢ်ဆူၣ် ဒီးမၤတၢ်လၢ သးဒီဖျၢၣ်န့ၣ် ဘၣ်သ့ၣ်သ့ၣ် ပှၤကဘၣ်သူၣ်ဘၣ်သး မ့တမ့ၢ် တဘၣ်သူၣ်ဘၣ်သးပှၤဘၣ်. ဘၣ်ဆၣ် ပမၤသးခု ယဟိဝၤယွၤအသး.—ကလီး ၃:၂၂, ၂၃.

၁၈. ဘၣ်မနုၤအဃိ အရ့ဒိၣ်လၢ ပကပာ်ဖျါထီၣ် တၢ်ပာ်ကဲထီဘိလဲၣ်.

^၁၈ ဘၣ်မနုၤအဃိ အရ့ဒိၣ်လၢ ပကပာ်ဖျါထီၣ် တၢ်ပာ်ကဲလဲၣ်န့ၣ် တၢ်ဂ့ၢ်အိၣ်ဝဲအါမး. ပသ့ၣ်ညါဘၣ်လၢ ဖဲပပာ်ဖျါထီၣ် တၢ်ပာ်ကဲလၢဟံၣ်ပူၤ ဒီးပပာ်ဖျါထီၣ် တၢ်ပာ်ကဲလၢ ဒီပုၢ်ဝဲၢ်မုၣ်ခွါ အကျါအခါ ပပာ်ကဲ ယဟိဝၤယွၤ လၢအမ့ၢ် ပဟံၣ်ခိၣ်. ဒီးဖဲပပာ်ဖျါထီၣ် တၢ်ပာ်ကဲလၢ ပှၤတၢ်ချၢ အဖီခိၣ်အခါ ပမၤစၢၤ အဝဲသ့ၣ်ဒ်သိး ကမၤလၤကပီၤ ဒီးယူးယီၣ်ပာ်ကဲ ပကစၢ်ယွၤလၢ အကဲပှၤလၢအဒိၣ်ကတၢၢ်. ပှၤဂၤမ့ၢ်တပာ်ကဲပှၤဘၣ် သနာ်က့ အရ့ဒိၣ်လၢ ပကပာ်ဖျါထီၣ် တၢ်ပာ်ကဲထီဘိ. ယဟိဝၤယွၤ ကဆိၣ်ဂ့ၤက့ၤပှၤ ဒီးအအၢၣ်လီၤပှၤလၢ “ပှၤလၢအပာ်ဖျါထီၣ် တၢ်ပာ်ကဲလၢ ယဖီခိၣ်န့ၣ် ယကပာ်ဖျါထီၣ် တၢ်ပာ်ကဲလၢ အဝဲသ့ၣ်အဖီခိၣ်.”—၁ မူၤ ၂:၃၀.