ဖဲနသးပှၢ်ထီၣ်အခါ နဆဲးအိၣ်ဒီး တၢ်သးခု ကသ့ဒ်လဲၣ်

၁-၂. ယဟိဝၤယွၤ အခ့အပှၤလၢ အသးပှၢ်ထီၣ် ဒီးအတီဒီးအီၤ တဖၣ်န့ၣ် ယဟိဝၤယွၤ ထံၣ်အဝဲသ့ၣ်ဒ်လဲၣ်. (စံးထီၣ်ပတြၢၤ ၉၂:၁၂-၁၄; ကွၢ်စ့ၢ်ကီးတၢ်ဂီၤ.)

လၢထံကီၢ်တနီၤ ပှၤတနီၤဆိကမိၣ်ဝဲလၢ အမ့ၢ်သးပှၢ်ထီၣ်န့ၣ် အလီၤဂာ်ဒ်သိးဒီး တၢ်လၤကပီၤ. မ့မ့ၢ်အဂၤတနီၤန့ၣ် တအဲၣ်ဒိးသးပှၢ်ထီၣ် နီတစဲးဘၣ်. အဃိ ဖဲပှၤတနီၤ ထံၣ်ဘၣ် အခိၣ်ဆူၣ်ဝါ အဆိကတၢၢ်တဘိအခါ ဘၣ်သ့ၣ်သ့ၣ် အတအဲၣ်ဒိးလၢ ပှၤဂၤကထံၣ်ဝဲဘၣ်အဃိ အကထဲးထီၣ်ကွံာ်ဝဲ. ဘၣ်ဆၣ် ပသ့ၣ်ညါလၢ ပဂုာ်ကျဲးစၢး ထဲးထီၣ်ကွံာ် ပခိၣ်ဆူၣ်ဝါ ထဲလဲၣ်သနာ်က့ လၢခံအဟဲအါထီၣ်ဒံး. အဃိ ပထံၣ်ဘၣ်လၢ ဒ်သိးပှၤတဂၤ တသးပှၢ်ထီၣ် တဂ့ၤအဂီၢ် အမ့ၢ်ဂုာ်ကျဲးစၢး ထဲလဲၣ် ဘၣ်ဆၣ် အမၤဝဲတန့ၢ်ဘၣ်.

^၂ ယဟိဝၤယွၤ အခ့အပှၤလၢ အသးပှၢ်ထီၣ် ဒီးအတီဒီးအီၤ တဖၣ်န့ၣ် ယဟိဝၤယွၤ ထံၣ်အဝဲသ့ၣ်ဒ်လဲၣ်. (ကတိၤ ၁၆:၃၁) ယဟိဝၤယွၤ ထိၣ်သတြီၤ အဝဲသ့ၣ် ဒ်သိးဒီး သ့ၣ်လၢအဃံလၤဒိၣ်မး. (ဖး စံးထီၣ်ပတြၢၤ ၉၂:၁၂-၁၄.) ဘၣ်မနုၤအဃိ ယဟိဝၤယွၤ ထိၣ်သတြီၤဝဲ ဒ်န့ၣ်လဲၣ်. သ့ၣ်ထူၣ်လၢ အပှၢ်ထီၣ်န့ၣ် ညီနုၢ် အလၣ်ဒီးအဖီ အိၣ်အါမးအဃိ အဖျါဃံလၤဒိၣ်မး. အဒိ လၢကီၢ်ယပၣ်န့ၣ် သ့ၣ်ထူၣ်အိၣ်ဝဲ တကလုာ်လၢ အအိၣ်မူဝဲ အနံၣ်ယံာ်မး. သ့ၣ်ထူၣ်တဖၣ်န့ၣ် အိၣ်မူဝဲအနံၣ် တကထိဘျဲၣ် ဒီးအဖျါဃံလၤဒိၣ်မး. ဒ်န့ၣ်အသိး ယဟိဝၤယွၤ အခ့အပှၤ လၢအသးပှၢ်ထီၣ်တဖၣ်န့ၣ် အဝဲသ့ၣ် ဖျါဃံလၤဒိၣ်မး. အဝဲသ့ၣ် အိၣ်ဒီး တၢ်ဂ့ၤတၢ်ဝါအါမးလၢ ယဟိဝၤယွၤ ပာ်လုၢ်ပာ်ပှ့ၤဝဲ. တကးဒံးဘၣ် အဝဲသ့ၣ် မၤယဟိဝၤယွၤ အတၢ်မၤ လၢအနံၣ်အါမး ဒီးတၢ်အိၣ်သး ညီမ့ၢ်ဂ့ၤ ကီမ့ၢ်ဂ့ၤ အဝဲသ့ၣ်ဆဲးတီဒီး ယဟိဝၤယွၤထီဘိအဃိ ယဟိဝၤယွၤ ပာ်လုၢ်ပာ်ပှ့ၤ အဝဲသ့ၣ်ဒိၣ်မး.

၃. ဒ်သိး ယဟိဝၤယွၤ ကမၤလၢပှဲၤ အတၢ်တိာ်ပာ်အဂီၢ် အသူဝဲ ပှၤသးပှၢ်တဖၣ်ဒ်လဲၣ်. တဲဖျါထီၣ် တၢ်အဒိ.

^၃ လၢညါ ဒ်သိး ယဟိဝၤယွၤ ကမၤလၢပှဲၤ အတၢ်တိာ်ပာ်အဂီၢ် အါဘျီန့ၣ် အသူဝဲ ပှၤသးပှၢ်တဖၣ်. အဒိ ယဟိဝၤယွၤ တဲဘၣ် နီၢ်စၤရါလၢ အကအိၣ်ဖျဲၣ်ထီၣ် ဖိခွါတဂၤ ဒီးပှၤကလုာ်တဖၣ် ဒီးမ့းၡံအၤ ကဟဲလီၤစၢၤလၢ ဖိခွါတဂၤအံၤ. ဖဲယဟိဝၤယွၤ တဲဘၣ်အီၤ ဒ်န့ၣ်အခါ နီၢ်စၤရါ သးပှၢ်ဒိၣ်မးလံ. (၁ မိၤ ၁၇:၁၅-၁၉) စီၤမိၤၡ့စ့ၢ်ကီး ဖဲယဟိဝၤယွၤ မၢအလဲၤ မၤထူၣ်ဖျဲးထီၣ် ပှၤအံၣ်စရ့လးဖိလၢ ကီၢ်အဲၤကူပတူးအခါ အသးပှၢ်ထီၣ် ဒိၣ်မးလံ. (၂ မိၤ ၇:၆, ၇) တကးဒံးဘၣ် ဖဲယဟိဝၤယွၤ ထိၣ်ဟူးထိၣ်ဂဲၤထီၣ် တၢ်မၢဖိယိၤဟၣ်လၢ ကကွဲးဝဲ လံာ်စီဆှံ ယဲၢ်ကတြူၢ်အခါ အသးပှၢ်ဒိၣ်မးလံ. အဃိ ပထံၣ်ဘၣ်လၢ ပသးမ့ၢ်ပှၢ်ထီၣ် သနာ်က့ ယဟိဝၤယွၤ ဆဲးပာ်လုၢ်ပာ်ပှ့ၤပှၤဒံး.a

၄. ဒ်သိး ပှၤသးပှၢ်တဖၣ် လဲၤခီဖျိ အတၢ်ကီတၢ်ခဲ ကန့ၢ်အဂီၢ် ကတိၤဒိ ၁၅:၁၅ မၤစၢၤအီၤ ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၄ ဖဲပသးပှၢ်ထီၣ်အခါ ညီနုၢ်န့ၢ် ပထံၣ်ဘၣ်အါထီၣ် တၢ်ကီတၢ်ခဲလၢ တၢ်အိၣ်ဆူၣ်အိၣ်ချ့ တကပၤအဃိ ပလဲၤခီဖျိအီၤ တညီဘၣ်. ဒီပုၢ်ဝဲၢ်မုၣ် သးပှၢ်တဂၤ တဲဝဲလၢ “ပကဲပှၤသးပှၢ်န့ၣ် အတညီဘၣ်.” ပှၤသးပှၢ်တဖၣ် ထံၣ်ဘၣ် တၢ်ကီတၢ်ခဲ လၢအတၢ်အိၣ်မူပူၤ ဘၣ်ဆၣ် ဒ်သိး အကဆဲးအိၣ်ဒီး တၢ်သူၣ်ခုသးခုb အဂီၢ် ယဟိဝၤယွၤ မၤစၢၤအီၤသ့. (ဖး ကတိၤဒိ ၁၅:၁၅.) အဃိ ဒ်သိး ပှၤသးပှၢ်တဖၣ် ကဆဲးအိၣ်ဒီး တၢ်သးခုအဂီၢ် အမၤမနုၤသ့လဲၣ်. ဒီးဒီပုၢ်ဝဲၢ်မုၣ်ခွါ သးပှၢ်တဖၣ်လၢ ပတၢ်အိၣ်ဖှိၣ်အပူၤန့ၣ် ပမၤစၢၤအီၤ ကသ့ဒ်လဲၣ်. ပကတဲသကိး တၢ်စံးဆၢလၢ တၢ်မၤလိတခါအံၤ. အဆိကတၢၢ် ပကတဲသကိး ဘၣ်ဃးဒီး ဖဲပသးပှၢ်ထီၣ်အခါ ပကဆဲးအိၣ်ဒီး တၢ်သးခုအဂီၢ် ဘၣ်မနုၤအဃိ အတညီဘၣ်လဲၣ်.

တၢ်ကီတၢ်ခဲလၢ ပှၤသးပှၢ်တဖၣ် ထံၣ်ဘၣ်ဝဲ

၅. ဘၣ်မနုၤအဃိ ပှၤသးပှၢ်တနီၤ အသးဟးဂီၤလဲၣ်.

^၅ ဘၣ်မနုၤအဃိ ပှၤသးပှၢ်တနီၤ အသးဟးဂီၤလဲၣ်. အဝဲသ့ၣ်တနီၤန့ၣ် မၤတၢ်ဒ်သိးလၢညါ တန့ၢ်အါအါ လၢၤဘၣ်အဃိ ဘၣ်သ့ၣ်သ့ၣ် အသးကဟးဂီၤ. ဘၣ်သ့ၣ်သ့ၣ် အဝဲသ့ၣ် ကလီကီက့ၤ တၢ်ဆၢကတီၢ်ဖဲ အသးစၢ် ဒီးအိၣ်ပှဲၤဒီးတၢ်ဂံၢ်တၢ်ဘါအခါ. (စံၣ် ၇:၁၀) အဒိ ဒီပုၢ်ဝဲၢ်မုၣ် ရူဘံၤ တဲဝဲလၢ “ယဟူးယဂဲၤ ဒ်သိးလၢညါ တန့ၢ်အါအါ လၢၤဘၣ်အဃိ ဖဲယကူထီၣ်ကၤထီၣ် ဒီးဖျီၣ်ထီၣ် ခီၣ်ဖျီၣ်အခါ ယလိၤဆါ ဒီးအကီဘၣ်ယၤ ဒိၣ်မး. ယအိၣ်ဒီး စုကမဲာ်ခီၣ်ကမဲာ် တၢ်ဆါအဃိ ယစုတီၣ်တုၤ ဒီးအဆါထီဘိ. တၢ်မၤယိယိဖိ တခါဒၣ်လဲာ် ယမၤအီၤ တညီဘၣ်.” ဒီပုၢ်ဝဲၢ်ခွါ ဟဲရိၤ လၢအမၤတ့ၢ်တၢ်လၢ ဘ့ၤသ့လးန့ၣ် တဲဝဲလၢ “ယမၤတၢ်လၢ ယအဲၣ်ဒိးမၤ ဒ်သိးလၢညါ တန့ၢ်အါအါလၢၤဘၣ် အဃိ တဘျီတခီၣ်န့ၣ် ယသးထီၣ်တၢ်. ဖဲယသးစၢ်ခါန့ၣ် ယဂံၢ်ဆူၣ်ဒိၣ်မး ဒီးယလိာ်ကွဲ ဖျၢၣ်တီၢ်မုာ်မး. ဖဲပလိာ်ကွဲအခါ ပှၤတနီၤ တဲဝဲလၢ ‘နမ့ၢ်အဲၣ်ဒိးနၢၤန့ၣ် ဟ့ၣ်ဘီၤလိလၢ ဟဲရိၤအအိၣ်.’ မ့မ့ၢ်ခဲအံၤန့ၣ် ယဆိကမိၣ် ယကွံာ်ဘီၤလိမး တကဲလၢၤဘၣ်.”

၆. (က) ပှၤသးပှၢ်တနီၤ အသးဟးဂီၤလၢ တၢ်ဂ့ၢ်အဂၤ မနုၤလဲၣ်. (ခ) ပှၤသးပှၢ်တဖၣ် ကြၢးနီကါ မ့တမ့ၢ် နီစဲးကဲး ဒံးဧါန့ၣ် အဝဲသ့ၣ် ဆၢတဲာ်ဝဲ ကသ့ဒ်လဲၣ်. (ကွၢ်တၢ်ဂ့ၢ် လၢအမ့ၢ် “မ့ၢ်ယကြၢးနီကါ မ့တမ့ၢ် နီစဲးကဲးဒံးဧါ.”)

^၆ ခီဖျိလၢ နမၤတၢ်လၢ နနီၢ်ကစၢ် တန့ၢ်အါအါလၢၤဘၣ် ဒီးနလိၣ်ဘၣ် ပှၤဂၤ အတၢ်မၤစၢၤအဃိ ဘၣ်သ့ၣ်သ့ၣ် နသးကဟးဂီၤ. အဒိ ဘၣ်သ့ၣ်သ့ၣ် နလိၣ်ဘၣ် တၢ်မၤစၢၤလၢ နကမၤ တၢ်တမံၤမံၤအဃိ ပှၤတဂၤဂၤ ကဘၣ်ဟဲ လၢနဟံၣ် မ့တမ့ၢ် နဘၣ်လဲၤအိၣ်လၢ နဖိတဂၤဂၤအဟံၣ်. ဒီးဘၣ်သ့ၣ်သ့ၣ် ခီဖျိလၢ နတၢ်အိၣ်ဆူၣ်အိၣ်ချ့ တဂ့ၤလၢၤဘၣ် ဒီးနတထံၣ်တၢ် ဂ့ၤဂ့ၤလၢၤဘၣ်အဃိ နနီကါ မ့တမ့ၢ် နီစဲးကဲး တသ့လၢၤဘၣ်. ခီဖျိလၢ တၢ်အိၣ်သးတဖၣ်အံၤအဃိ နသးကဟးဂီၤဒိၣ်မး. နမၤတၢ် မ့ၢ်တန့ၢ်ဒ်သိး လၢညါလၢၤဘၣ် သနာ်က့ သ့ၣ်နီၣ်ထီၣ်လၢ ယဟိဝၤယွၤ ဒီးပှၤဂၤတဖၣ် ပာ်လုၢ်ပာ်ပှ့ၤနၤဒံး. ဒီးနာ်သပှၢ်တၢၢ်လၢ ယဟိဝၤယွၤ နၢ်ပၢၢ်စၢၤ နတၢ်တူၢ်ဘၣ်. နအဲၣ်ယဟိဝၤယွၤ ဒီးဒီပုၢ်ဝဲၢ်မုၣ်ခွါ ထဲလဲၣ်န့ၣ် ယဟိဝၤယွၤ သ့ၣ်ညါဝဲ ဒီးအပာ်လုၢ်ပာ်ပှ့ၤနၤဒိၣ်မး.—၁ မူၤ ၁၆:၇.

၇. နမ့ၢ်ဆိကမိၣ်လၢ နတထံၣ်ဘၣ် တၢ်အကတၢၢ် ဟဲတုၤဘၣ် ဒီးနသးမ့ၢ်ဟးဂီၤန့ၣ် တၢ်မနုၤ မၤစၢၤနၤသ့လဲၣ်.

^၇ ဘၣ်သ့ၣ်သ့ၣ် နကဆိကမိၣ်လၢ နတအိၣ်မူဘၣ် ယံာ်ယံာ်လၢၤဘၣ် ဒီးတထံၣ်ဘၣ် တၢ်အကတၢၢ် ဟဲတုၤဘၣ်အဃိ နသးကဟးဂီၤ. နမ့ၢ်တူၢ်ဘၣ် ဒ်န့ၣ်န့ၣ် တၢ်မနုၤ မၤစၢၤနၤသ့လဲၣ်. ဂုာ်ကျဲးစၢး သ့ၣ်နီၣ်ထီၣ်လၢ တၢ်အကတၢၢ် ကဟဲတုၤအဂီၢ် ယဟိဝၤယွၤစ့ၢ်ကီး အိၣ်ခိးဝဲလၢ တၢ်ဝံသးစူၤအပူၤ. (ၡါ ၃၀:၁၈) ဘၣ်ဆၣ် ဘၣ်မနုၤအဃိ ယဟိဝၤယွၤ အိၣ်ခိးဝဲလၢ တၢ်ဝံသးစူၤအပူၤလဲၣ်. ခီဖျိလၢ အတၢ်ဝံသးစူၤအဃိ အမုၢ်လၢ်ဝဲလၢ ပှၤအါဂၤ ကန့ၢ်ဘၣ် တၢ်ခွဲးတၢ်ယာ်လၢ ကသ့ၣ်ညါထီၣ်အဂ့ၢ် ဒီးဘူၣ်ထီၣ်ဘါထီၣ်အီၤ. (၂ ပ့း ၃:၉) အဃိ ဖဲနသးလီၤစၢ်အခါ သ့ၣ်နီၣ်ထီၣ်လၢ ယဟိဝၤယွၤ အတၢ်ဝံသးစူၤန့ၣ် ကမၤစၢၤဝဲ ပှၤအါဂၤဒ်သိး အဝဲသ့ၣ် ကသ့ၣ်ညါထီၣ်အီၤ. ဒီးတချုးလၢ တၢ်အကတၢၢ် ဟဲတုၤဒံးဘၣ်န့ၣ် အဝဲသ့ၣ် ကန့ၢ်ဘၣ် တၢ်ခွဲးတၢ်ယာ်လၢ ကပူၤဖျဲး. ဒီးလၢပှၤတဖၣ်အံၤ အကျါန့ၣ် မ့ၢ်အကပၣ်ဃုာ်ဒီး နဟံၣ်ဖိဃီဖိ တဂၤဂၤဧါ.

၈. ဖဲပှၤသးပှၢ်တဖၣ် အိၣ်တဆူၣ်ဘၣ် ဒီးအိၣ်တမုာ်ဘၣ်အခါ ဘၣ်သ့ၣ်သ့ၣ် အကတဲတၢ် ဒီးမၤဘၣ်တၢ် ဒ်လဲၣ်.

^၈ ပသးပှၢ်မ့ၢ်ဂ့ၤ ပသးစၢ်မ့ၢ်ဂ့ၤ ဖဲပအိၣ်တဆူၣ်ဘၣ် ဒီးအိၣ်တမုာ်ဘၣ်အခါ အါဘျီန့ၣ် ပတဲဘၣ်တၢ် ဒီးမၤဘၣ်တၢ်လၢ ပတကြၢးတဲဒီးမၤဘၣ်. (စံၣ် ၇:၇; ယၤ ၃:၂) အဒိ ဖဲစီၤယိၤဘး လၢအကဲပှၤသးတီတဂၤ တူၢ်ဘၣ်တၢ် နးမးအခါ အ “ဟးတဲကြီတၢ်.” (ဘး ၆:၁-၃) တကးဒံးဘၣ် ပှၤသးပှၢ်တနီၤန့ၣ် ခီဖျိလၢ အတၢ်ဆူးတၢ်ဆါ တမံၤမံၤ ဒီးအဘၣ်အီ ကသံၣ်အဃိ တၢ်လၢအတတဲညီနုၢ် ဒီးမၤညီနုၢ်ဝဲန့ၣ် အတဲဝဲ ဒီးမၤဘၣ်ဝဲ. ပသးမ့ၢ်ပှၢ်ထီၣ် ဒီးပတၢ်အိၣ်ဆူၣ်အိၣ်ချ့ မ့ၢ်တဂ့ၤဘၣ် သနာ်က့ ပကြၢးဂုာ်ကျဲးစၢး ရ့ဒီးပှၤဂၤ ဂ့ၤဂ့ၤထီဘိ ဒီးပတဘၣ် မုၢ်လၢ်ထဲလၢ ပှၤဂၤကမၤန့ၢ်တၢ် လၢပဂီၢ်ဘၣ်. ဒီးပမ့ၢ်သ့ၣ်ညါလၢ ပတဲဘၣ်တၢ် လၢအမၤဘၣ်ဒိ ပှၤတဂၤဂၤ အသးအခါ ပကြၢးဃ့ဝံသးစူၤက့ၤအီၤ တဘျီဃီ.—မး ၅:၂၃, ၂၄.

နဆဲးအိၣ်ဒီး တၢ်သးခု ကသ့ဒ်လဲၣ်

၉. ဘၣ်မနုၤအဃိ နကြၢးတူၢ်လိာ် ပှၤဂၤအတၢ်မၤစၢၤလဲၣ်. (ကွၢ်စ့ၢ်ကီးတၢ်ဂီၤ.)

^၉ တူၢ်လိာ် ပှၤဂၤအတၢ်မၤစၢၤ. (ကလၤ ၆:၂) ဘၣ်သ့ၣ်သ့ၣ် နကတူၢ်လိာ် ပှၤဂၤအတၢ်မၤစၢၤအဂီၢ် ခီၣ်ထံးခါန့ၣ် အကကီဘၣ်နၤ. ဒီပုၢ်ဝဲၢ်မုၣ် ကြဲဒၢၤ တဲဝဲလၢ “တဘျီတခီၣ် ယတူၢ်ဘၣ်လၢ ယကဲတၢ်ဝံဃၢ ဒီးမၤတံာ်တာ် ပှၤဂၤအဃိ ယကတူၢ်လိာ် ပှၤဂၤအတၢ်မၤစၢၤအဂီၢ် အကီဘၣ်ယၤဒိၣ်မး. ယကဆီတလဲ ယတၢ်ထံၣ် ဒီးအၢၣ်လီၤတူၢ်လိာ်လၢ ယလိၣ်ဘၣ် တၢ်မၤစၢၤအဂီၢ် တၢ်ဆၢကတီၢ်ယံာ်ဝဲ တတီၤဖိညါ.” သ့ၣ်နီၣ်ထီၣ်လၢ ဖဲပှၤဂၤမၤစၢၤနၤ ဒီးနတူၢ်လိာ် အတၢ်မၤစၢၤအခါ လီၤဂာ်ဒ်သိးဒီး နပျဲလၢ အဝဲသ့ၣ် ကဒိးန့ၢ်ဘၣ် တၢ်သးခု. (မၤတၢ် ၂၀:၃၅) ဒီးနကသ့ၣ်ညါဘၣ်လၢ ပှၤဂၤအဲၣ်နၤ ဒီးသူၣ်အိၣ်သးအိၣ်နၤ ဒိၣ်မးအဃိ နကသးခုဒိၣ်မး.

၁၀. ဘၣ်မနုၤအဃိ ပကြၢးပာ်ဖျါထီၣ် တၢ်စံးဘျုးစံးဖှိၣ်လဲၣ်. (ကွၢ်စ့ၢ်ကီးတၢ်ဂီၤ.)

^၁၀ ပာ်ဖျါထီၣ် တၢ်စံးဘျုးစံးဖှိၣ်. (ကလီး ၃:၁၅; ၁ သ့း ၅:၁၈) ဖဲပှၤဂၤ မၤန့ၢ်တၢ်လၢ ပဂီၢ်အခါ ပသးခု. ဘၣ်ဆၣ် တဘျီတခီၣ်န့ၣ် ပသးပ့ၤနီၣ် ပာ်ဖျါထီၣ်က့ၤ ပတၢ်စံးဘျုးစံးဖှိၣ်. အဃိ ပမ့ၢ်ရ့အီၤဂ့ၤဂ့ၤ ဒီးတဲအီၤလၢ တၢ်ဘျုးန့ၣ် ပသကိးလၢ အမၤစၢၤပှၤန့ၣ် ကသ့ၣ်ညါဝဲလၢ ပပာ်လုၢ်ပာ်ပှ့ၤ တၢ်လၢအမၤန့ၢ် လၢပဂီၢ်. ဒီပုၢ်ဝဲၢ်မုၣ် လံအါ လၢအကွၢ်ထွဲမၤစၢၤ ပှၤသးပှၢ်တဖၣ်လၢ ဘ့ၤသ့လးန့ၣ် အတဲဝဲလၢ “ဒီပုၢ်ဝဲၢ်မုၣ်သးပှၢ်လၢ ယကွၢ်ထွဲမၤစၢၤအီၤ တဂၤန့ၣ် စံးဘျုးယၤထီဘိ ဒီးအကွဲးလီၤစ့ၢ်ကီးလၢ လံာ်က့ဖိအလိၤ. အတကွဲး တၢ်ဂ့ၢ်အါအါဘၣ် သနာ်က့ တၢ်လၢအကွဲးဝဲန့ၣ် ထိးဘၣ်ယသးညါ. လံာ်က့ဖိလၢ အကွဲးန့ၢ်ယၤန့ၣ် ယဖးမုာ်မး ဒီးယသ့ၣ်ညါဘၣ်လၢ အပာ်လုၢ်ပာ်ပှ့ၤ ယတၢ်မၤစၢၤအဃိ ယသးခုဒိၣ်မး.”

၁၁. နမၤစၢၤပှၤဂၤ ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၁ ဂုာ်ကျဲးစၢး မၤစၢၤပှၤဂၤ. နမ့ၢ်ဆိကမိၣ်န့ၢ်တၢ်လၢ ပှၤဂၤအဂီၢ် ဒီးမၤစၢၤပှၤဂၤန့ၣ် နတဆိကမိၣ် နနီၢ်ကစၢ် တၢ်ကီတၢ်ခဲ အါအါလၢၤဘၣ်. ပှၤအၤဖြံၤကၤဖိ အတၢ်ကတိၤဒိတခါ ထိၣ်သတြီၤဝဲ ပှၤသးပှၢ် ဒ်သိးဒီး လံာ်ရိဒၢးလၢ အအိၣ်ထဲ လံာ်လဲၢ်လၢ အအိၣ်ဒီး တၢ်ကူၣ်သ့လၢ အလုၢ်ဒိၣ်ပှ့ၤဒိၣ်. ဘၣ်ဆၣ် ပှၤမ့ၢ်တန့ၢ်ဘၣ် တၢ်ခွဲးတၢ်ယာ်လၢ ကဖးလံာ်လဲၢ် တဖၣ်အံၤဘၣ်န့ၣ် ပှၤတဒိးန့ၢ်ဘၣ် အဘျုးဘၣ်. ဒ်န့ၣ်အသိး နမ့ၢ်တတဲတၢ်ဒီး ပှၤသးစၢ် ဒီးတဲဘၣ်အဝဲသ့ၣ် နတၢ်လဲၤခီဖျိဘၣ်န့ၣ် အဝဲသ့ၣ် တမၤလိန့ၢ်ဘၣ် တၢ်ကူၣ်သ့ အလုၢ်ဒိၣ်ပှ့ၤဒိၣ် လၢနအိၣ်ဘၣ်. ဖဲနတဲတၢ်ဒီး ပှၤသးစၢ်အခါ သံကွၢ်အဝဲသ့ၣ် တၢ်သံကွၢ် ဒီးဖဲအဝဲသ့ၣ် တဲတၢ်အခါ ဒိကနၣ်န့ၢ်အီၤ. ဝံၤဒီး တဲဘၣ်အဝဲသ့ၣ်လၢ ယဟိဝၤယွၤ မၤစၢၤနၤလၢ နတၢ်အိၣ်မူပူၤဒ်လဲၣ် ဒီးအဝဲသ့ၣ် မ့ၢ်ဒိကနၣ် ယဟိဝၤယွၤ အကလုၢ်န့ၣ် အဝဲသ့ၣ် ကဒိးန့ၢ်ဘၣ် တၢ်သးခု. နမ့ၢ်ဟ့ၣ်ဂံၢ်ဟ့ၣ်ဘါ ဒီးမၤမုာ်ထီၣ် နသကိးလၢ အသးစၢ်တဖၣ် ဒ်န့ၣ်န့ၣ် နကဒိးန့ၢ်ဘၣ် တၢ်သးခု သပှၢ်တၢၢ်.—စံး ၇၁:၁၈.

၁၂. ဒ် ယၡါယၤ ၄၆:၄ ပာ်ဖျါထီၣ်ဝဲအသိး ယဟိဝၤယွၤ အၢၣ်လီၤဝဲလၢ အကမၤစၢၤ ပှၤသးပှၢ်တဖၣ် ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၂ ဃ့လၢ ယဟိဝၤယွၤ ကဟ့ၣ်နၤ တၢ်ဂံၢ်တၢ်ဘါ. တဘျီတခီၣ်န့ၣ် နကတူၢ်ဘၣ်လၢ နဂံၢ်နဘါ တအိၣ်လၢၤဘၣ် ဒီးနသးလီၤဘှံးအဃိ နသးကဟးဂီၤ. ဘၣ်ဆၣ် သ့ၣ်နီၣ်ထီၣ်လၢ ယဟိဝၤယွၤန့ၣ် အဂံၢ်အဘါ အိၣ်ဝဲအါမး. လံာ်စီဆှံ တဲဝဲလၢ “အဝဲတလီၤဘှံး ဒီးအဂံၢ်ဘါတလီၤစၢ် နီတဘျီဘၣ်.” (ၡါ ၄၀:၂၈) အဃိ ယဟိဝၤယွၤ ကဟ့ၣ်နၤ တၢ်ဂံၢ်တၢ်ဘါ လၢနလိၣ်ဘၣ်တဖၣ်. (ၡါ ၄၀:၂၉-၃၁) ယဟိဝၤယွၤ အၢၣ်လီၤဝဲလၢ အကမၤစၢၤနၤ နီၢ်ကီၢ်. (ဖး ယၡါယၤ ၄၆:၄.) ဒီးယဟိဝၤယွၤန့ၣ် အမၤလၢပှဲၤ အတၢ်အၢၣ်လီၤ ထီဘိလီၤ. (ၡူ ၂၃:၁၄; ၡါ ၅၅:၁၀, ၁၁) အဃိ ဖဲနဃ့ထုကဖၣ်အခါ ယဟိဝၤယွၤ ကဟ့ၣ်နၤ တၢ်မၤစၢၤ လၢနလိၣ်ဘၣ်. ဒီးနကသ့ၣ်ညါဘၣ်လၢ အအဲၣ်နၤဒိၣ်မးအဃိ နကသးခုဒိၣ်မး.

၁၃. ဒ် ၂ ကရံၣ်သူး ၄:၁၆-၁၈ ပာ်ဖျါထီၣ်ဝဲအသိး ပကြၢးသ့ၣ်နီၣ်ထီၣ် တၢ်ဂ့ၢ်မနုၤလဲၣ်. (ကွၢ်စ့ၢ်ကီးတၢ်ဂီၤ.)

^၁၃ သ့ၣ်နီၣ်ထီၣ်လၢ နတၢ်အိၣ်သး ခဲအံၤန့ၣ် အကဲဝဲ တၢ်တစိၢ်တလီၢ်. ပသ့ၣ်ညါဘၣ်လၢ တၢ်အိၣ်သးကီခဲတဖၣ် တအိၣ်ဝဲ လီၤစိၤဘၣ်အဃိ ပလဲၤခီဖျိ ပတၢ်ကီတၢ်ခဲ ကညီ. ဒီးလံာ်စီဆှံ အၢၣ်လီၤဝဲလၢ ခါဆူညါန့ၣ် ပှၤတသးပှၢ်ထီၣ် ဒီးတဆိးက့လၢၤဘၣ်. (ဘး ၃၃:၂၅; ၡါ ၃၃:၂၄) နသ့ၣ်ညါလၢ ခါဆူညါန့ၣ် နတၢ်အိၣ်ဆူၣ်အိၣ်ချ့ကဂ့ၤ, နဂံၢ်နဘါကအါထီၣ် ဒီးနဒိၣ်တၢ်ကဂ့ၤ ဒိၣ်န့ၢ်ဒံး ခဲအံၤအဃိ နအိၣ်ဒီး တၢ်သးခုသ့. (၂ ကရံၣ်သူး ၄:၁၆-၁၈.) ဘၣ်ဆၣ် ဒ်သိး ပှၤသးပှၢ်တဖၣ် ကဆဲးအိၣ်ဒီး တၢ်သးခုအဂီၢ် ပမၤစၢၤ ကသ့ဒ်လဲၣ်.

ပမၤစၢၤ ပှၤသးပှၢ် ကသ့ဒ်လဲၣ်

၁၄. ဘၣ်မနုၤအဃိ အရ့ဒိၣ်လၢ ပကလဲၤဟး ဒီးကိးအိၣ်သကိး ပှၤသးပှၢ်တဖၣ် လၢလီတဲစိလဲၣ်.

^၁၄ လဲၤဟး ဒီးကိးအိၣ်သကိး ဒီပုၢ်ဝဲၢ်မုၣ်ခွါသးပှၢ်တဖၣ်လၢ လီတဲစိထီဘိ. (ဧ့ၤ ၁၃:၁၆) ပှၤသးပှၢ်တဖၣ်န့ၣ် ကတူၢ်ဘၣ်လၢ အအိၣ်သယုၢ် ထဲတဂၤအဃိ အသးကဆံး. ဒီပုၢ်ဝဲၢ်ခွါ ခမံ လၢအဘၣ်အိၣ်လၢ ဟံၣ်ပူၤထီဘိန့ၣ် အတဲဝဲလၢ “ယဘၣ်အိၣ်လၢ ဟံၣ်ပူၤ ဒီတနံၤကျၢၤ အဃိ တၢ်ကၢၣ်ယသးဒိၣ်မး. တဘျီတခီၣ်န့ၣ် ယတူၢ်ဘၣ်လၢ ယကဲခ့ယုၢ်လၢ အဘၣ်အိၣ်လၢ အကပိၤပူၤ. တဘျီတခီၣ်န့ၣ် ယသူၣ်ကိၢ်သးဂီၤတၢ် ဒီးသးပှံၢ်ထီၣ်တၢ်.” ဖဲပလဲၤအိၣ်သကိး ဒီပုၢ်ဝဲၢ်မုၣ်ခွါ သးပှၢ်တဖၣ်အခါ အဝဲသ့ၣ် ကတူၢ်ဘၣ်ဝဲလၢ ပပာ်လုၢ်ပာ်ပှ့ၤ ဒီးပအဲၣ်အဝဲသ့ၣ်ဒိၣ်မး. ဘၣ်သ့ၣ်သ့ၣ် ပကနီၣ်ဘၣ်က့ၤ ဆၢကတီၢ်ဖဲ ပပာ်လီၤသးလၢ ပကလဲၤဟး ဒီးကိးအိၣ်သကိး ပှၤသးပှၢ်တဖၣ် လၢလီတဲစိ ဘၣ်ဆၣ် ပတမၤဘၣ်. ပတၢ်မၤအိၣ်အါ သနာ်က့ ဒ်သိးပကမၤ “တၢ်လၢအရ့ဒိၣ်ကတၢၢ်တဖၣ်” လၢအပၣ်ဃုာ်ဒီး ပလဲၤဟးအိၣ်သကိး ပှၤသးပှၢ်အဂီၢ် ပမၤမနုၤသ့လဲၣ်. (ဖံလံး ၁:၁၀) ပပာ်လီၤဃာ် တၢ်ဆၢကတီၢ်လၢ ကဆှၢန့ၢ် အဝဲသ့ၣ် မဲးစ့း, ကိးအိၣ်သကိး အဝဲသ့ၣ်တဂၤဂၤ လၢလီတဲစိ ဒီးရဲၣ်ကျဲၤလၢ ကလဲၤဟး အိၣ်သကိး အဝဲသ့ၣ်သ့. ဒီးဒ်သိး ပတသးပ့ၤနီၣ် တဂ့ၤအဂီၢ် ပကွဲးနီၣ်ဃာ် မုၢ်နံၤမုၢ်သီ လီၤတံၢ်လီၤဆဲးသ့.

၁၅. တၢ်လၢ ပှၤသးစၢ် ဒီးပှၤသးပှၢ် မၤသကိးဝဲသ့န့ၣ် မ့ၢ်မနုၤလဲၣ်.

^၁၅ နကဘၣ် တဲသကိးတၢ်ဒီး ပှၤသးပှၢ်ဒ်လဲၣ် ဒီးမၤသကိး တၢ်မနုၤလဲၣ်န့ၣ် ဘၣ်သ့ၣ်သ့ၣ် နတသ့ၣ်ညါဘၣ်အဃိ နကဘၣ်ယိၣ်တၢ်. ဘၣ်ဆၣ် နတလိၣ် ဘၣ်ယိၣ်တၢ်ဘၣ်. ပာ်အီၤဒ်သိး အကဲနသကိး လၢအဂ့ၤတဂၤ. (ကတိၤ ၁၇:၁၇) တချုးလၢ တၢ်အိၣ်ဖှိၣ်စးထီၣ် မ့တမ့ၢ် တၢ်အိၣ်ဖှိၣ် ဝံၤအခါ တဲသကိးတၢ်ဒီး ပှၤသးပှၢ်တဖၣ်. ဒီးဖဲနတဲတၢ် ဒီးအဝဲသ့ၣ်အခါ မၢအတဲဘၣ်နၤ လံာ်စီဆှံအဆၢလၢ အဝဲသ့ၣ် ဘၣ်သူၣ်ဘၣ်သးဝဲ မ့တမ့ၢ် အတၢ်လဲၤခီဖျိလၢ အမၤဝဲဖဲအနီၢ်ဆံးခါ. နကွဲမုာ်အီၤလၢ ကကွၢ်သကိး JW တၢ်ဂီၤမူဒီးနၤသ့. ဒီးတၢ်လၢ အဝဲသ့ၣ် မၤဝဲတသ့ဘၣ်န့ၣ် နမၤစၢၤအီၤသ့. အဒိ မၤစၢၤအီၤလၢ အကဒီလိး လံာ်လဲၢ်လၢ အဟဲထီၣ်သီတဖၣ်. ဒီပုၢ်ဝဲၢ်မုၣ် ခဲရိၤ တဲဝဲလၢ “တၢ်လၢ နမၤမုာ်တဖၣ်န့ၣ် ကွဲမုာ်ပှၤသးပှၢ်လၢ ကမၤသကိးဒီးနၤ. ယသးပှၢ်ထီၣ်လံ သနာ်က့ ယအဲၣ်ဒိးအိၣ် သူၣ်ဖှံသးညီဒံး. ယလဲၤပှ့ၤတၢ်, လဲၤအီၣ်တၢ်ဒီးယသကိး ဒီးဟးလိာ်ကွဲလၢ တၢ်ချၢမုာ်မး.” ဒီပုၢ်ဝဲၢ်မုၣ် မါရၤ တဲဝဲလၢ “ယသကိးမုၣ်တဂၤန့ၣ် အအိၣ်အနံၣ် ၉၀. အသးနံၣ် ပှၢ်န့ၢ်ယၤ ၅၇ နံၣ်ညါ. ဘၣ်ဆၣ် ပကွၢ်သကိး တၢ်ဂီၤမူ ဒီးပတဲသကိး တၢ်လီၤနံၤ ထီဘိအဃိ ယသးစၢ် န့ၢ်ဒံးအီၤန့ၣ် ယသးပ့ၤနီၣ်. ဒီးဖဲပထံၣ်ဘၣ် တၢ်အိၣ်သး ကီခဲအခါ ပဟ့ၣ်ကူၣ်လိာ်သး ဒီးမၤစၢၤလိာ်သး.”

၁၆. ဖဲပှၤသးပှၢ်တဖၣ် လဲၤထံၣ်လိာ်သးဒီး ကသံၣ်သရၣ်အခါ ပမ့ၢ်လဲၤဒီးအီၤန့ၣ် ကကဲထီၣ် တၢ်မၤစၢၤ လၢအဂီၢ်ဒ်လဲၣ်.

^၁၆ ဖဲပှၤသးပှၢ်တဖၣ် လဲၤထံၣ်လိာ်သးဒီး ကသံၣ်သရၣ်အခါ လဲၤဒီးအီၤ. နလဲၤဆှၢ ဒီပုၢ်ဝဲၢ်မုၣ်ခွါသးပှၢ်လၢ တၢ်ဆါဟံၣ်သ့. ဒီးဒ်သိး ကသံၣ်သရၣ် သရၣ်မုၣ် ကကွၢ်ထွဲ ဒီးမၤစၢၤ အဝဲသ့ၣ် ဂ့ၤဂ့ၤအဂီၢ် နအိၣ်စၢၤ အဝဲသ့ၣ် သ့စ့ၢ်ကီး. (ၡါ ၁:၁၇) ဒီးဖဲကသံၣ်သရၣ် တဲတၢ်အခါ နဒိကနၣ်စၢၤအီၤသ့. ဒီပုၢ်ဝဲၢ်မုၣ်သးပှၢ် လၢအမံၤမ့ၢ် ရူၣ် တဲဝဲလၢ “ညီနုၢ်န့ၣ် ဖဲယလဲၤထံၣ်လိာ်သးဒီး ကသံၣ်သရၣ်အခါ ယမ့ၢ်လဲၤထဲတဂၤန့ၣ် ကသံၣ်သရၣ် တကနၣ်ယၤ ဂ့ၤဂ့ၤဘၣ်. ကသံၣ်သရၣ် တဲယၤလၢ ‘နတဆိးက့ဘၣ်. အိၣ်ဒၣ် နဟးဆိကမိၣ်ကြီတၢ်လီၤ.’ ဘၣ်ဆၣ် ပှၤမ့ၢ်ဟဲဒီးယၤ တဂၤဂၤန့ၣ် ကသံၣ်သရၣ် ရ့ယၤဂ့ၤဂ့ၤ. ဒီပုၢ်ဝဲၢ်မုၣ်ခွါလၢ အဟံးန့ၢ် တၢ်ဆၢကတီၢ်လၢ ကမၤစၢၤယၤန့ၣ် ယစံးဘျုး အဝဲသ့ၣ်ဒိၣ်မး.”

၁၇. ပမၤသကိးတၢ်ဒီး ပှၤသးပှၢ်တဖၣ်လၢ တၢ်စံၣ်တဲၤတဲလီၤ တၢ်မၤအပူၤ ကသ့ဒ်လဲၣ်.

^၁၇ လဲၤစံၣ်တဲၤတဲလီၤတၢ်ဒီး အဝဲသ့ၣ်. ခီဖျိလၢ ပှၤသးပှၢ်တနီၤန့ၣ်အဂံၢ်ဘါ လီၤစၢ်အဃိ အဝဲသ့ၣ် လဲၤစံၣ်တဲၤတဲလီၤတၢ်လၢ တဟံၣ်ဘၣ်တဟံၣ် တကဲအါအါလၢၤဘၣ်. အဃိ ပပာ်ဖျါထီၣ် တၢ်အဲၣ် ဒီးတၢ်ပာ်ကဲလၢ အဝဲသ့ၣ်အဖီခိၣ် ကသ့ဒ်လဲၣ်. အဒိ ဖဲနမၤ လ့ၣ်ဆီၣ် တၢ်စံၣ်တဲၤတဲလီၤအခါ နကွဲမုာ်ဃုာ်ဒီး ပှၤသးပှၢ်တဂၤဂၤ ကသ့ဧါ. မ့ၢ်သ့န့ၣ် ဟဲစိာ်ဃုာ်ဒီး လီၢ်ဆ့ၣ်နီၤ လၢအကဆ့ၣ်နီၤဝဲအဂီၢ်. မ့တမ့ၢ် နကွဲမုာ် အဝဲသ့ၣ်လၢ ကလဲၤဒီးနၤလၢ နတၢ်မၤလိလံာ်စီဆှံသ့. ဒီးမ့ၢ်သ့န့ၣ် နဟဲကိး နပှၤမၤလိ လံာ်စီဆှံဖိလၢ ပှၤသးပှၢ်အဟံၣ် ဒီးမၤလိလံာ်စီဆှံ ဖဲန့ၣ်သ့စ့ၢ်ကီး. ပမ့ၢ်မၤ တၢ်ထံၣ်ဖှိၣ်လိာ်သးလၢ တၢ်စံၣ်တဲၤတဲလီၤတၢ်အဂီၢ် လၢဒီပုၢ်ဝဲၢ်မုၣ်ခွါသးပှၢ် အဟံၣ်န့ၣ် ကညီလၢ အဝဲသ့ၣ် ကလဲၤစံၣ်တဲၤတဲလီၤတၢ်စ့ၢ်ကီး. အဃိ တၢ်အိၣ်ဖှိၣ်သးပှၢ်တဖၣ် မ့ၢ်ဆိကမိၣ်လၢ အကြၢးဝဲဘၣ်ဝဲန့ၣ် အဝဲသ့ၣ် ရဲၣ်ကျဲၤဝဲသ့. ပမ့ၢ်ပာ်ဖျါထီၣ် တၢ်အဲၣ် ဒီးတၢ်ပာ်ကဲ ဒ်အံၤန့ၣ် ပမၤသးခု ယဟိဝၤယွၤအသး.—ကတိၤ ၃:၂၇; ရိ ၁၂:၁၀.

၁၈. တၢ်မၤလိ လၢခံတခါန့ၣ် ပကတဲသကိး တၢ်ဂ့ၢ်မနုၤလဲၣ်.

^၁၈ တၢ်မၤလိအံၤ ဒုးသ့ၣ်နီၣ်ထီၣ်ပှၤလၢ ယဟိဝၤယွၤ အဲၣ်ဝဲ ဒီးပာ်လုၢ်ပာ်ပှ့ၤ ပှၤသးပှၢ်တဖၣ်ဒိၣ်မး. ဒီးပဝဲစ့ၢ်ကီး ပအဲၣ်အဝဲသ့ၣ်ဒိၣ်မး. ခီဖျိလၢ နသးပှၢ်ထီၣ်အဃိ နထံၣ်ဘၣ် တၢ်ကီတၢ်ခဲအါမး. ဘၣ်ဆၣ် ဒ်သိး နကဆဲးအိၣ်ဒီး တၢ်သးခုအဂီၢ် ယဟိဝၤယွၤ ကမၤစၢၤနၤ. (စံး ၃၇:၂၅) ဒီးယဟိဝၤယွၤ အဲၣ်ဒိးဒုးသ့ၣ်နီၣ်ထီၣ်နၤလၢ ခါဆူညါန့ၣ် နတၢ်အိၣ်မူ ကပှဲၤဒီးတၢ်သးခု. ဘၣ်ဆၣ် ဒီပုၢ်ဝဲၢ်မုၣ်ခွါတနီၤန့ၣ် ထံၣ်ဘၣ်တၢ်ကီတၢ်ခဲ လၢအဂၤတဖၣ်. အဝဲသ့ၣ် ဘၣ်ကွၢ်ထွဲ အမိပါဖံဖု လၢအသးပှၢ်, အဖိ မ့တမ့ၢ် အသကိး လၢအဆိးက့. အဃိ ဒ်သိး အဝဲသ့ၣ် ကဆဲးအိၣ်ဒီး တၢ်သးခုအဂီၢ် အမၤမနုၤသ့လဲၣ်. ပကတဲသကိး တၢ်သံကွၢ်အံၤ အတၢ်စံးဆၢလၢ တၢ်မၤလိ လၢခံတခါ.