တၢ်မၤလိ ၄၈
တၢ်သးဝံၣ် ၁၂၉ ပကဆဲးတူၢ်တၢ်လၢ တၢ်သးတီအပူၤ
ဖဲပထံၣ်ဘၣ် တၢ်နးတၢ်ဖှီၣ်အခါ လံာ်ယိၤဘး မၤစၢၤပှၤသ့
“ကစၢ်ယွၤ တမၤတၢ်အၢတၢ်သီဘၣ်န့ၣ် လီၤတံၢ်လံ.”—ယိၤဘး ၃၄:၁၂.
တၢ်ဂ့ၢ်မိၢ်ပှၢ်
ဘၣ်မနုၤအဃိ ယဟိဝၤယွၤပျဲလၢ တၢ်နးတၢ်ဖှီၣ် ကကဲထီၣ်သးလဲၣ်. ဒီးဖဲပထံၣ်ဘၣ် တၢ်နးတၢ်ဖှီၣ်အခါ ဒ်သိးပလဲၤခီဖျိအီၤ ကန့ၢ်အဂီၢ် တၢ်မနုၤ ကမၤစၢၤပှၤလဲၣ်. ပကကွၢ်သကိး တၢ်မၤလိတနီၤလၢ လံာ်ယိၤဘးအပူၤ.
၁-၂. ပမ့ၢ်ဖးလံာ်ယိၤဘးန့ၣ် ပကသ့ၣ်ညါဘၣ် တၢ်ဂ့ၢ်မနုၤလဲၣ်.
ဖဲအပူၤကွံာ် တယံာ်ဒံးဘၣ်န့ၣ် မ့ၢ်နဖးဘၣ် လံာ်ယိၤဘးဧါ. လံာ်တဘ့ၣ်အံၤ ပှၤကွဲးဝဲပူၤကွံာ်အနံၣ် ၃,၅၀၀ ဃၣ်ဃၣ်လံ သနာ်က့ ပှၤအါဂၤဖးဝဲမုာ်ဒံး. လံာ်ယိၤဘးန့ၣ် ပှၤနၢ်ပၢၢ်ဘၣ်အီၤညီ, အအိၣ်ဒီး တၢ်ကတိၤဃံလၤ ဒီးအိၣ်ဒီးအခီပညီအဃိ ပှၤအါဂၤပတြၢၤဝဲ ပှၤလၢအကွဲး လံာ်ယိၤဘး. စီၤမိၤၡ့န့ၣ် အကဲပှၤကွဲးလံာ်ယိၤဘး သနာ်က့ ပှၤလၢအမၢအီၤန့ၣ် မ့ၢ်ဝဲယဟိဝၤယွၤ.—၂ တံၤ ၃:၁၆.
၂ လၢလံာ်စီဆှံအပူၤန့ၣ် လံာ်ယိၤဘး ကဲဝဲလံာ်လၢ အရ့ဒိၣ်တဘ့ၣ်. ဘၣ်မနုၤအဃိလဲၣ်. လံာ်ယိၤဘး မၤစၢၤပှၤဒ်သိး ပကနၢ်ပၢၢ်လၢ ပှၤဟီၣ်ခိၣ်ဖိ ဒီးမူခိၣ်ကလူးတဖၣ် ဆၢတဲာ်လီၤသးလၢ ကဘူၣ်ထီၣ်ဘါထီၣ် ယဟိဝၤယွၤန့ၣ် မ့ၢ်ဝဲခီဖျိလၢ အဝဲသ့ၣ်အဲၣ်အီၤ ဒီးအဲၣ်အမံၤအဃိ. အပာ်ဖျါထီၣ်စ့ၢ်ကီး ယဟိဝၤယွၤ အတၢ်ဂ့ၤတၢ်ဝါတဖၣ်လၢ အလီၤလိၢ်လီၤလး ဒ်သိးဒီး အတၢ်အဲၣ်, တၢ်ကူၣ်သ့, တၢ်တီတၢ်လိၤ ဒီးတၢ်စိတၢ်ကမီၤ. အဒိ လၢလံာ်ယိၤဘးအပူၤ တၢ်ကတိၤ “သ့တၢ်လၢာ်ကစၢ်” န့ၣ် အိၣ်ဝဲတဘျုးဘျီညါ. တကးဒံးဘၣ် လံာ်တဘ့ၣ်အံၤ ပာ်ဖျါထီၣ်ဝဲလၢ ဘၣ်မနုၤအဃိ ကစၢ်ယွၤပျဲလၢ တၢ်နးတၢ်ဖှီၣ် ကကဲထီၣ်သးလဲၣ် ဒီးအပာ်ဖျါထီၣ် တၢ်သံကွၢ်တဖၣ် အတၢ်စံးဆၢလၢ ပှၤအါဂၤအဲၣ်ဒိးသ့ၣ်ညါဝဲ.
၃. ပမ့ၢ်ဖးလံာ်ယိၤဘးန့ၣ် ပကန့ၢ်ဘၣ် အဘျုးဒ်လဲၣ်.
၃ ဖဲပဖးလံာ်ယိၤဘးအခါ ပထိၣ်သတြီၤလီၤပသး ဒ်သိးဒီး ပလဲၤထီၣ်ကစၢၢ်သ့. အဒိ ဖဲပလဲၤတုၤလၢ ကစၢၢ်ဒီခိၣ်အခါ ပထံၣ်ဘၣ် တၢ်အိၣ်လၢ ပခိၣ်ပဃၢၤၡဲၡဲ. အဃိ ဖဲပဖးလံာ်ယိၤဘးအခါ ပကထံၣ်ဘၣ် ဒီးနၢ်ပၢၢ်အါထီၣ် ယဟိဝၤယွၤ အတၢ်ထံၣ် ဘၣ်ဃးဒီး တၢ်နးတၢ်ဖှီၣ်လၢ ပတူၢ်ဘၣ်ၡဲၡဲ. ဒီးပကထံၣ်ဘၣ်လၢ ပှၤအံၣ်စရ့လးဖိတဖၣ် မ့ၢ်သ့ၣ်ညါဘၣ် စီၤယိၤဘး အတၢ်လဲၤခီဖျိန့ၣ် အဝဲသ့ၣ် ကန့ၢ်ဘၣ်အဘျုးဒ်လဲၣ် ဒီးဆၢကတီၢ်ခဲအံၤ ပကန့ၢ်ဘၣ် အဘျုးဒ်လဲၣ်. တကးဒံးဘၣ် ပသူလံာ်ယိၤဘး ဒီးမၤစၢၤပှၤဂၤ ကသ့ဒ်လဲၣ်န့ၣ် ပကသ့ၣ်ညါဘၣ်စ့ၢ်ကီး.
ကစၢ်ယွၤပျဲ စီၤယိၤဘး ထံၣ်ဘၣ်တၢ်နးတၢ်ဖှီၣ်
၄. စီၤယိၤဘးန့ၣ် အလီၤဆီဒီး ပှၤအံၣ်စရ့လးဖိလၢ အအိၣ်လၢ ကီၢ်အဲၤကူပတူးဒ်လဲၣ်.
၄ ဖဲပှၤအံၣ်စရ့လးဖိ အိၣ်လၢကီၢ်အဲၤကူပတူး ဒီးဘၣ်ကဲကုၢ်အခါ စီၤယိၤဘး အိၣ်လၢကီၢ်ဧူစး. ဖျါလၢကီၢ်ဧူစးန့ၣ် အအိၣ်ဘူးဒီး တၢ်လီၢ်လၢ အရ့ဘံယါကလံၤစိး တတီၤတီၤ. ဒီးဖဲပှၤအံၣ်စရ့လးဖိ အိၣ်လၢ ကီၢ်အဲၤကူပတူးအခါ အဝဲသ့ၣ်တနီၤ ဘူၣ်ထီၣ်ဘါထီၣ် တၢ်ဂီၤတၢ်ဖှီၣ်. မ့မ့ၢ် စီၤယိၤဘးန့ၣ် တမၤဝဲဒ်န့ၣ်ဘၣ်. အအိၣ်ဒီး တၢ်သးတီ ဒီးအဘူၣ်ထီၣ်ဘါထီၣ် ထဲယဟိဝၤယွၤ. (ၡူ ၂၄:၁၄; ဃ့း ၂၀:၈) အဃိ ဘၣ်ဃးဒီး စီၤယိၤဘးန့ၣ် ယဟိဝၤယွၤ တဲဝဲဒ်အံၤ. “လၢဟီၣ်ခိၣ်ချၢန့ၣ် ပှၤလီၤဂာ်ဒ်သိးဒီးအီၤ တအိၣ်နီတဂၤဘၣ်.”a (ဘး ၁:၈) စီၤယိၤဘးန့ၣ် အကဲပှၤထူးပှၤတီၤ ဒီးဖဲအအိၣ်တၢ်လီၢ်န့ၣ် ပှၤပာ်ကဲအီၤအါမး. (ဘး ၁:၃) အဃိ စီၤယိၤဘး လၢအကဲပှၤလၢ အတီဒီးယဟိဝၤယွၤ ဒီးပှၤပာ်ကဲအီၤ အါမးန့ၣ် မုၣ်ကီၢ်လံၢ် ကသးဒိၣ်ထီၣ်အီၤဒိၣ်မး.
၅. ဘၣ်မနုၤအဃိ ယဟိဝၤယွၤပျဲ စီၤယိၤဘး ထံၣ်ဘၣ် တၢ်နးတၢ်ဖှီၣ်လဲၣ်. (ယိၤဘး ၁:၂၀-၂၂; ၂:၉, ၁၀)
၅ မုၣ်ကီၤလံၢ် တဲဝဲလၢ စီၤယိၤဘး မ့ၢ်ထံၣ်ဘၣ် တၢ်နးတၢ်ဖှီၣ်န့ၣ် အတဘူၣ်ထီၣ်ဘါထီၣ် ယဟိဝၤယွၤလၢၤဘၣ်. (ဘး ၁:၇-၁၁; ၂:၂-၅) ယဟိဝၤယွၤ အဲၣ်စီၤယိၤဘးဒိၣ်မး. ဘၣ်ဆၣ် တၢ်ဂ့ၢ်လၢ မုၣ်ကီၤလံၢ် တဲဝဲတဖၣ် အဘၣ်ဧါ တဘၣ်ဧါန့ၣ် ယဟိဝၤယွၤပျဲလၢ မုၣ်ကီၤလံၢ် ကပာ်ဖျါထီၣ်ဝဲ. (ဘး ၁:၁၂-၁၉; ၂:၆-၈) အဃိ မုၣ်ကီၤလံၢ် မၤဝဲဒ်သိး ပှၤကဟံးန့ၢ် စီၤယိၤဘး အဆၣ်ဖိကီၢ်ဖိ, မၤသံအဖိ အဂၤတဆံ ဒီးမၤနးမၤဖှီၣ် စီၤယိၤဘးလၢ တၢ်ဝ့ဒီတဂၤညါ. မုၣ်ကီၤလံၢ် မၤဝဲဒ်သိး စီၤယိၤဘး ကထံၣ်ဘၣ် တၢ်နးတၢ်ဖှီၣ်နးမး သနာ်က့ စီၤယိၤဘး ဆဲးတီဒီး ယဟိဝၤယွၤ ဒီးဘူၣ်ထီၣ်ဘါထီၣ်အီၤဒံး. (ဖး ယိၤဘး ၁:၂၀-၂၂; ၂:၉, ၁၀.) လၢခံ ပထံၣ်ဘၣ်လၢ ယဟိဝၤယွၤ မၤဘျါက့ၤ စီၤယိၤဘး, ဟ့ၣ်က့ၤအီၤ တၢ်ထူးတၢ်တီၤ ဒီးဟ့ၣ်အါထီၣ်အီၤ အဖိအဂၤတဆံ. တကးဒံးဘၣ် ယဟိဝၤယွၤ ဒုးအိၣ်မူဒံးအီၤ အနံၣ် ၁၄၀ အဃိ အထံၣ်ဘၣ် အစၢၤအသွဲၣ် လွံၢ်စိၤညါ. (ဘး ၄၂:၁၀-၁၃, ၁၆) ကစၢ်ယွၤ အခ့အပှၤလၢညါတဖၣ် န့ၢ်ဘၣ်အဘျုးလၢ စီၤယိၤဘး အတၢ်လဲၤခီဖျိဒ်လဲၣ် ဒီးဆၢကတီၢ်ခဲအံၤ ပန့ၢ်ဘၣ်အဘျုးဒ်လဲၣ်.
၆. ပှၤအံၣ်စရ့လးဖိ မ့ၢ်သ့ၣ်ညါပာ်စၢၤ စီၤယိၤဘး အတၢ်လဲၤခီဖျိန့ၣ် အဝဲသ့ၣ် ကန့ၢ်ဘၣ်အဘျုးဒ်လဲၣ်. (ကွၢ်စ့ၢ်ကီးတၢ်ဂီၤ.)
၆ ပှၤအံၣ်စရ့လးဖိတဖၣ် န့ၢ်ဘၣ်အဘျုးဒ်လဲၣ်. ဖဲပှၤအံၣ်စရ့လးဖိ အိၣ်လၢကီၢ်အဲၤကူပတူးအခါ အဝဲသ့ၣ် ထံၣ်ဘၣ် တၢ်နးတၢ်ဖှီၣ်အါမး. အဒိ စီၤယိၤၡူ ဒီးစီၤကၤလ့းန့ၣ် အဝဲသ့ၣ် ဘၣ်ကဲကုၢ် စးထီၣ်လၢ အသးစၢ်အခါလံ. တကးဒံးဘၣ် ခီဖျိလၢ ပှၤအံၣ်စရ့လးဖိတနီၤ တဒိကနၣ် ယဟိဝၤယွၤ အကလုၢ်ဘၣ်အဃိ စီၤယိၤၡူ ဒီးစီၤကၤလ့း ဘၣ်ဟးဝ့ၤဝီၤဃုာ်ဒီး အဝဲသ့ၣ်လၢ ပှၢ်မုၢ်ကနၢအနံၣ် ၄၀ ညါ. အဃိ ပှၤအံၣ်စရ့လးဖိတဖၣ် မ့ၢ်သ့ၣ်ညါပာ်စၢၤ စီၤယိၤဘး အတၢ်လဲၤခီဖျိန့ၣ် အဝဲသ့ၣ် ကန့ၢ်ဘၣ်အဘျုးအါမး. အဝဲသ့ၣ် ကသ့ၣ်ညါထီၣ်လၢ ပှၤလၢအဒုးအိၣ်ထီၣ် တၢ်နးတၢ်ဖှီၣ်န့ၣ် မ့ၢ်ဝဲမုၣ်ကီၤလံၢ် ဒီးတမ့ၢ် ယဟိဝၤယွၤဘၣ်. တကးဒံးဘၣ် အဝဲသ့ၣ် ကနၢ်ပၢၢ်အါထီၣ်ဝဲလၢ ဘၣ်မနုၤအဃိ ကစၢ်ယွၤပျဲလၢ ပှၤဟီၣ်ခိၣ်ဖိ ကထံၣ်ဘၣ် တၢ်နးတၢ်ဖှီၣ်လဲၣ်. ဝံၤဒီး ကနၢ်ပၢၢ်ဝဲလၢ ပှၤလၢအတီဒီး ကစၢ်ယွၤ ဒီးဒိကနၣ် အကလုၢ်န့ၣ် အဝဲသ့ၣ် မ့ၢ်ထံၣ်ဘၣ် တၢ်နးတၢ်ဖှီၣ် သနာ်က့ ယဟိဝၤယွၤ အဲၣ်အဝဲသ့ၣ် ဒီးကဆိၣ်ဂ့ၤအီၤ.
ပှၤအံၣ်စရ့လးဖိတဖၣ် ဘၣ်ကဲကုၢ်လၢ ကီၢ်အဲၤကူပတူးအပူၤ အနံၣ်အါမး. လၢခံ အဝဲသ့ၣ် သ့ၣ်ညါထီၣ်ဘၣ် စီၤယိၤဘး အတၢ်လဲၤခီဖျိ အဃိ အဝဲသ့ၣ် ဒိးန့ၢ်ဘၣ်အဘျုး ဒီးပဝဲစ့ၢ်ကီး ပဒိးန့ၢ်ဘၣ်အဘျုးသ့ (ကွၢ်လံာ်အဆၢ ၆)
၇-၈. ပှၤလၢအထံၣ်ဘၣ် တၢ်နးတၢ်ဖှီၣ်န့ၣ် အဒိးန့ၢ်ဘၣ် အဘျုးလၢ လံာ်ယိၤဘးအပူၤ ကသ့ဒ်လဲၣ်. တဲဖျါထီၣ် တၢ်လဲၤခီဖျိ.
၇ ပန့ၢ်ဘၣ် အဘျုးဒ်လဲၣ်. ဆၢကတီၢ်ခဲအံၤ ပှၤအါဂၤ ထံၣ်ဘၣ်ဝဲလၢ ပှၤတနီၤန့ၣ် တမၤတၢ်အၢတၢ်သီဘၣ် သနာ်က့ အဝဲသ့ၣ်ထံၣ်ဘၣ်ဒံး တၢ်နးတၢ်ဖှီၣ်. ဒီးဘၣ်မနုၤအဃိ ကစၢ်ယွၤပျဲလၢ တၢ်ကကဲထီၣ်သး ဒ်အံၤလဲၣ်န့ၣ် အဝဲသ့ၣ် တနၢ်ပၢၢ်ဝဲဘၣ်အဃိ အဝဲသ့ၣ် တနာ်ကစၢ်ယွၤလၢၤဘၣ်. ဆိကမိၣ်ကွၢ် ပိာ်မုၣ်တဂၤ လၢအမံၤမ့ၢ် ဟ့စိၤb လၢအအိၣ်လၢ ကီၢ်ရဝၣ်ဒၣ် အတၢ်လဲၤခီဖျိ. ဖဲဟ့စိၤ နီၢ်ဆံးခါန့ၣ် အနာ်ကစၢ်ယွၤ, ဘၣ်ဆၣ် လၢခံန့ၣ် အထံၣ်ဘၣ် တၢ်ကီတၢ်ခဲအါမး. အမိအပါ မၤလီၤဖးသး ဝံၤအလီၢ်ခံ အမိန့ၢ်အဝၤလၢသီ ဒီးအပါယၢ် တရ့အီၤဂ့ၤဂ့ၤဘၣ်. ဒီးဖဲအညါဘီၣ်ဒံး အခါန့ၣ် ပှၤမၤတရီတပါအီၤ. တကးဒံးဘၣ် ဖဲအလဲၤလၢ အတၢ်ဘူၣ်ထီၣ်ဘါထီၣ် အလီၢ်အခါ အတဒိးန့ၢ်ဘၣ် တၢ်မၤမုာ်ထီၣ်က့ၤသး စ့ၢ်ကီးဘၣ်. အဃိလၢခံန့ၣ် ဟ့စိၤ တဲကစၢ်ယွၤလၢ “ကစၢ်ယွၤဧၢ, ယဃ့ထုကဖၣ်လၢနအိၣ် ဒီးယဂုာ်ကျဲးစၢး မၤတၢ်ဂ့ၤ. ဘၣ်ဆၣ် နဒုးထံၣ်ယၤထဲ တၢ်အၢတၢ်သီလီၤ. ခဲအံၤ ယတဘူၣ်ထီၣ်ဘါထီၣ်နၤလၢၤဘၣ် ဒီးယကမၤဖဲယသးလီၤ.” ဒ်ဟ့စိၤအသိး ပှၤအါဂၤန့ၣ် ပှၤတသိၣ်လိ အဝဲသ့ၣ် တၢ်မ့ၢ်တၢ်တီ ဘၣ်ဃးဒီး ကစၢ်ယွၤ အဂ့ၢ်ဘၣ်. ဒီးတၢ်နးတၢ်ဖှီၣ်လၢ အဝဲသ့ၣ်ထံၣ်ဘၣ်ဝဲန့ၣ် အဝဲသ့ၣ်နာ်ဝဲလၢ ကစၢ်ယွၤ ဒုးအိၣ်ထီၣ်ဝဲ. အဝဲသ့ၣ်တသ့ၣ်ညါ တၢ်မ့ၢ်တၢ်တီဘၣ်အဃိ ပသးတမုာ်ဘၣ် ဒီးပအဲၣ်ဒိး မၤစၢၤအဝဲသ့ၣ်.
၈ လၢလံာ်ယိၤဘး အပူၤန့ၣ် ပထံၣ်ဘၣ်လၢ မုၣ်ကီၤလံၢ် ကဲပှၤလၢအဒုးအိၣ်ထီၣ် တၢ်နးတၢ်ဖှီၣ် ဒီးတမ့ၢ်ကစၢ်ယွၤဘၣ်. ဒီးလံာ်စီဆှံ တဲဝဲလၢ “တၢ်ဆၢကတီၢ် ဒီးတၢ်ဘၣ်န့ၢ်အတီၤ” လီၤဘၣ်ပှၤခဲလၢာ်. (စံၣ် ၉:၁၁) အဃိ ဖဲပှၤတဂၤ ထံၣ်ဘၣ် တၢ်နးတၢ်ဖှီၣ်အခါ ပတဘၣ် ဆိကမိၣ်လၢ အကူးဘၣ်က့ၤ တၢ်လၢအဖှံလီၤဝဲဘၣ်. (ဘး ၄:၁, ၈) ပမၤလိဘၣ် စ့ၢ်ကီးလၢ ဖဲပထံၣ်ဘၣ် တၢ်နးတၢ်ဖှီၣ်အခါ ပမ့ၢ်ဆဲးတီဒီး ယဟိဝၤယွၤ ဒီးဒိကနၣ်အကလုၢ်န့ၣ် ပဟ့ၣ်အီၤ တၢ်ခွဲးတၢ်ယာ်လၢ အကပာ်ဖျါထီၣ်လၢ မုၣ်ကီၤလံၢ်န့ၣ် အကဲပှၤလံၣ်တၢ်. (ဘး ၂:၃; ကတိၤ ၂၇:၁၁) ဟ့စိၤ လၢပတဲသကိးအဂ့ၢ်န့ၣ် လၢခံအမၤလိလံာ်စီဆှံဒီး ယဟိဝၤပှၤအုၣ်အသး ဒီးအနၢ်ပၢၢ်ထီၣ်ဝဲလၢ ကစၢ်ယွၤ တဒုးအိၣ်ထီၣ် အတၢ်နးတၢ်ဖှီၣ်ဘၣ်. အတဲဝဲလၢ “ယဃ့ထုကဖၣ်ကဒီးလၢ ယဟိဝၤယွၤအအိၣ် ဒီးတဲဘၣ်အီၤ တၢ်အိၣ်လၢ ယသးပူၤခဲလၢာ်. ယတဲအီၤလၢ ခီၣ်ထံးခါန့ၣ် ယတသ့ၣ်ညါ အဂ့ၢ်ဂ့ၤဂ့ၤဘၣ်အဃိ ယတဲလၢ ယတဘူၣ်ထီၣ်ဘါထီၣ်အီၤ လၢၤဘၣ်. နီၢ်ကီၢ်န့ၣ် ယတအဲၣ်ဒိးမၤဒ်န့ၣ်ဘၣ်. ယသ့ၣ်ညါထီၣ်လၢ ယဟိဝၤယွၤ အဲၣ်ယၤအဃိ ယသးခုဒိၣ်မး.” ပဝဲစ့ၢ်ကီး ပသ့ၣ်ညါဘၣ်လၢ ကစၢ်ယွၤ တဒုးအိၣ်ထီၣ် တၢ်နးတၢ်ဖှီၣ်ဘၣ်အဃိ ပသးခုဒိၣ်မး. ခဲအံၤ ပကဆဲး မၤလိအါထီၣ် စီၤယိၤဘး အတၢ်လဲၤခီဖျိအဂ့ၢ် ဒီးအမၤစၢၤပှၤဒ်သိး ပတူၢ်တၢ်ကီတၢ်ခဲ ကန့ၢ်ဒ်လဲၣ်.
စီၤယိၤဘး အတၢ်လဲၤခီဖျိ မၤစၢၤပှၤဒ်သိး ပတူၢ်တၢ်ကန့ၢ်
၉. စီၤယိၤဘးထံၣ်ဘၣ် တၢ်နးတၢ်ဖှီၣ်ဒ်လဲၣ်. (ယၤကိာ် ၅:၁၁)
၉ ထံၣ်တမှံကွၢ် စီၤယိၤဘး အတၢ်နးတၢ်ဖှီၣ်အဂ့ၢ်. စီၤယိၤဘး ဆ့ၣ်နီၤထဲတဂၤ လၢဖၣ်ဆါကျါ ဒီးတၢ်ဝ့အီၣ်အီၤ ဒီတဂၤညါအဃိ အလိၤကဆါနးမး. ခီဖျိလၢ အတၢ်ဆါအဃိ အဖံးဘ့ၣ်ထီၣ်သူ ဒီးအဃဲၤလီၤ တုၤလၢ အအိၣ်တ့ၢ်ထဲအဃံ. အလီၤဘှံး ဒိၣ်မးအဃိ အမၤတၢ်တကဲ နီတမံၤဘၣ်. အိၣ်ဒၣ် အဆ့ၣ်နီၤ ဝာ်လီၤအလိၤဒီး သပၢၤက့ ဒီးကဒူးကဒ့ၣ်တၢ် ဘၣ်ဃးဒီး အတၢ်နးတၢ်ဖှီၣ်အဂ့ၢ်. ဘၣ်ဆၣ် တမ့ၢ်ထဲ စီၤယိၤဘး တူၢ်ဝဲ အတၢ်ကီတၢ်ခဲဘၣ်. အပာ်ဖျါထီၣ် တၢ်တူၢ်န့ၢ်ခီၣ်ကဲ နီၢ်ကီၢ်. (ဖး ယၤကိာ် ၅:၁၁.) ဘၣ်မနုၤအဃိ စီၤယိၤဘး အိၣ်ဒီး တၢ်တူၢ်န့ၢ်ခီၣ်ကဲလဲၣ်.
၁၀. စီၤယိၤဘး အိၣ်ဒီးတၢ်ရ့လိာ်သးဒီး ယဟိဝၤယွၤ လၢအဂ့ၤန့ၣ် ပသ့ၣ်ညါဘၣ်ဒ်လဲၣ်.
၁၀ စီၤယိၤဘးတဲဘၣ် ယဟိဝၤယွၤလၢ အတၢ်တူၢ်ဘၣ်ပျီပျီ. (ဘး ၁၀:၁, ၂; ၁၆:၂၀) အဒိ ဖဲယိၤဘး အဆၢဒိၣ် ၃ န့ၣ် စီၤယိၤဘး တဲဘၣ်ဃးဒီး တၢ်နးတၢ်ဖှီၣ်လၢ အထံၣ်ဘၣ်ဝဲ ဒီးအသးအုးဒိၣ်မး. တကးဒံးဘၣ် စီၤယိၤဘး ဆိကမိၣ်ဝဲလၢ ယဟိဝၤယွၤ ဒုးအိၣ်ထီၣ်ဝဲ အတၢ်နးတၢ်ဖှီၣ်. ဝံၤဒီး စီၤယိၤဘး အသကိး သၢဂၤတဲအီၤ ခဲအံၤခဲအံၤလၢ ကစၢ်ယွၤ စံၣ်ညီၣ်အီၤလၢ အတၢ်ကမၣ်အဃိ. ဘၣ်ဆၣ် စီၤယိၤဘး တဲလီၤအသးလၢ အကဲပှၤလၢ အသးတီဒီး ယဟိဝၤယွၤ. ဒီးတၢ်လၢ စီၤယိၤဘးတဲဝဲန့ၣ် ပာ်ဖျါထီၣ်ဝဲလၢ အဆိကမိၣ်လီၤသးလၢ အတီအလိၤဒိၣ်န့ၢ်ဒံး ကစၢ်ယွၤ. (ဘး ၁၀:၁-၃; ၃၂:၁, ၂; ၃၅:၁, ၂) ဘၣ်ဆၣ် စီၤယိၤဘး တဲစ့ၢ်ကီးလၢ ခီဖျိလၢ အဂုာ်ကျဲးစၢး ပာ်ဖျါထီၣ်လၢ အကဲပှၤလၢ အသးတီအဃိ တဘျီတခီၣ်န့ၣ် အ “ဟးတဲကြီတၢ်.” (ဘး ၆:၃, ၂၆) ဝံၤဒီး ဖဲယိၤဘး အဆၢဒိၣ် ၃၁ န့ၣ် စီၤယိၤဘး အဲၣ်ဒိးဝဲလၢ ကစၢ်ယွၤ ကစံးဆၢက့ၤအီၤ ဒီးကတဲအီၤလၢ အတၢ်ကမၣ် တအိၣ်ဘၣ်. (ဘး ၃၁:၃၅) ဘၣ်ဆၣ် နီၢ်ကီၢ်န့ၣ် စီၤယိၤဘး တကြၢးမၤဝဲ ဒ်န့ၣ်ဘၣ်.
၁၁. ဖဲစီၤယိၤဘး တဲဘၣ်ဃးဒီး အတၢ်သးတီ အဂ့ၢ်အခါ ယဟိဝၤယွၤ မၤစၢၤအီၤ ဒီးဘှီဘၣ်ထီၣ်က့ၤအီၤဒ်လဲၣ်.
၁၁ ပမ့ၢ်ဆိကမိၣ်ကွၢ် တၢ်ဂ့ၢ်လၢ စီၤယိၤဘးတဲဘၣ် ယဟိဝၤယွၤန့ၣ် ပသ့ၣ်ညါဘၣ်လၢ စီၤယိၤဘးအိၣ်ဒီး တၢ်ရ့လိာ်သးဒီး ယဟိဝၤယွၤ လၢအဂ့ၤ. ဒီးအနာ်ဝဲ သပှၢ်တၢၢ်လၢ ယဟိဝၤယွၤ ကစံၣ်ညီၣ်န့ၢ်တၢ် လၢအဂီၢ် တီတီလိၤလိၤ. လၢခံ ယဟိဝၤယွၤ စံးဆၢက့ၤ စီၤယိၤဘး လၢကလံၤမုၢ်အကျါ. ဘၣ်ဆၣ် ဘၣ်မနုၤအဃိ စီၤယိၤဘးတူၢ်ဘၣ် တၢ်နးတၢ်ဖှီၣ်လဲၣ်န့ၣ် ယဟိဝၤယွၤ တတဲဘၣ်အီၤဘၣ်. တကးဒံးဘၣ် စီၤယိၤဘး ကဒူးကဒ့ၣ်တၢ် ဒီးတဲလီၤအသးလၢ အတၢ်ကမၣ် တအိၣ်ဘၣ် သနာ်က့ ယဟိဝၤယွၤ တစံၣ်ညီၣ်အီၤဘၣ်. ဘၣ်ဆၣ် ဒ်ပါလၢအဂ့ၤ တဂၤအသိး ယဟိဝၤယွၤ ဘှီဘၣ်ထီၣ်က့ၤ အတၢ်ဆိကမိၣ်. ယဟိဝၤယွၤ ပာ်ဖျါထီၣ်တၢ်အဲၣ် ဒီးမၤစၢၤအီၤ ဒ်အံၤန့ၣ် အကဲဘျုးဒိၣ်မး. လၢခံ စီၤယိၤဘး ပာ်ဖျါထီၣ် တၢ်ဆီၣ်လီၤသး ဒီးအၢၣ်လီၤဝဲလၢ အတသ့ၣ်ညါတၢ် ခဲလၢာ်ဘၣ် ဒီးအတဲကမၣ်ဘၣ်တၢ်အဃိ အပီၢ်ယၢ်လီၤက့ၤသး. (ဘး ၃၁:၆; ၄၀:၄, ၅; ၄၂:၁-၆) ကစၢ်ယွၤ အခ့အပှၤလၢညါတဖၣ် န့ၢ်ဘၣ်အဘျုးလၢ စီၤယိၤဘး အတၢ်လဲၤခီဖျိဒ်လဲၣ် ဒီးဆၢကတီၢ်ခဲအံၤ ပန့ၢ်ဘၣ်အဘျုးဒ်လဲၣ်.
၁၂. လၢစီၤယိၤဘး အတၢ်လဲၤခီဖျိန့ၣ် ပှၤအံၣ်စရ့လးဖိတဖၣ် န့ၢ်ဘၣ်အဘျုး ကသ့ဒ်လဲၣ်.
၁၂ ပှၤအံၣ်စရ့လးဖိတဖၣ် န့ၢ်ဘၣ်အဘျုးဒ်လဲၣ်. ပှၤအံၣ်စရ့လးဖိတဖၣ် မ့ၢ်ဟံးန့ၢ် တၢ်မၤလိလၢ စီၤယိၤဘး အတၢ်လဲၤခီဖျိန့ၣ် အဝဲသ့ၣ် ကန့ၢ်ဘၣ်အဘျုးအါမး. ဆိကမိၣ်ကွၢ် စီၤမိၤၡ့ အတၢ်လဲၤခီဖျိ. စီၤမိၤၡ့ ဘၣ်တီခိၣ်ရိၤမဲ ပှၤအံၣ်စရ့လးဖိန့ၣ် တညီလၢအဂီၢ်ဘၣ်. ပှၤအံၣ်စရ့လးဖိတဖၣ် ထီဒါက့ၤ ယဟိဝၤယွၤ တဘျုးဘျီညါအဃိ စီၤမိၤၡ့ သးဟးဂီၤဒိၣ်မး. ပမ့ၢ်ကွၢ် ဖဲပှၤအံၣ်စရ့လးဖိ ထံၣ်ဘၣ်တၢ်အိၣ်သး ကီခဲအခါ အဝဲသ့ၣ် ကဒူးကဒ့ၣ် ယဟိဝၤယွၤ. မ့မ့ၢ်စီၤမိၤၡ့န့ၣ် အဃ့ထုကဖၣ်လၢ ယဟိဝၤယွၤအအိၣ် ဘၣ်ဃးဒီး အတၢ်ကီတၢ်ခဲ. (၂ မိၤ ၁၆:၆-၈; ၄ မိၤ ၁၁:၁၀-၁၄; ၁၄:၁-၄, ၁၁; ၁၆:၄၁, ၄၉; ၁၇:၅) တကးဒံးဘၣ် ဖဲယဟိဝၤယွၤ ဘှီဘၣ်ထီၣ်က့ၤ စီၤမိၤၡ့အခါ စီၤမိၤၡ့ မ့ၢ်ဟံးန့ၢ် တၢ်မၤလိလၢ စီၤယိၤဘး အတၢ်လဲၤခီဖျိန့ၣ် အကန့ၢ်ဘၣ် အဘျုးစ့ၢ်ကီး. အဒိ ဖဲပှၤအံၣ်စရ့လးဖိ ဘူးကနုာ်လီၤလၢ ကီၢ်တၢ်စံးပာ်အခါ စီၤမိၤၡ့ သးပှံၢ်ထီၣ် အဝဲသ့ၣ်, အ “ကရီတဲတၢ်လၢ အထးခိၣ်” ဒီးအတမၤလၤကပီၤ ယဟိဝၤယွၤဘၣ်. (စံး ၁၀၆:၃၂, ၃၃) အဃိ ယဟိဝၤယွၤ တပျဲလၢ စီၤမိၤၡ့ ကနုာ်လီၤလၢ ကီၢ်တၢ်စံးပာ် အပူၤဘၣ်. (၅ မိၤ ၃၂:၅၀-၅၂) ယဟိဝၤယွၤ သိၣ်ဃီၣ်အီၤ ဒ်အံၤအဃိ အသးကဘၣ်ဒိဒိၣ်မး. သနာ်က့ အအိၣ်ဒီးတၢ်ဆီၣ်လီၤသး ဒီးတူၢ်လိာ် တၢ်သိၣ်က့ၤသီက့ၤ. ပှၤအံၣ်စရ့လးဖိလၢ အနုာ်လီၤဘၣ်လၢ ကီၢ်တၢ်စံးပာ်အပူၤ မ့ၢ်ဆိကမိၣ်ထံ စီၤယိၤဘး အတၢ်လဲၤခီဖျိန့ၣ် အဝဲသ့ၣ် ကန့ၢ်ဘၣ် အဘျုးဒ်လဲၣ်. အဝဲသ့ၣ် ဟံးန့ၢ်တၢ်မၤလိလၢ စီၤယိၤဘး အအိၣ်ဒီး တဲဘၣ်ယဟိဝၤယွၤလၢ အတၢ်တူၢ်ဘၣ် ပျီပျီသ့. ဘၣ်ဆၣ် အဝဲသ့ၣ် ကြၢးသ့ၣ်နီၣ်ထီၣ်လၢ အဝဲသ့ၣ် တတီတလိၤ ဒိၣ်န့ၢ်ဒံး ယဟိဝၤယွၤဘၣ်. ဒီးဖဲယဟိဝၤယွၤ ဘှီဘၣ်ထီၣ်က့ၤ အဝဲသ့ၣ်အခါ အဝဲသ့ၣ် ကြၢးအိၣ်ဒီး တၢ်ဆီၣ်လီၤသး ဒီးဒိကနၣ်အကလုၢ်.
၁၃. ဒ်သိး ပကအိၣ်ဒီး တၢ်တူၢ်န့ၢ်ခီၣ်ကဲအဂီၢ် လံာ်ယိၤဘး မၤစၢၤပှၤ သ့ဒ်လဲၣ်. (ဧ့ၤဘြံၤ ၁၀:၃၆)
၁၃ ပန့ၢ်ဘၣ် အဘျုးဒ်လဲၣ်. ခဲအံၤ ပအိၣ်မူဘၣ်လၢ ဆၢကတီၢ်ကီခဲအဃိ ပလိၣ်ဘၣ် တၢ်တူၢ်န့ၢ်ခီၣ်ကဲ. (ဖး ဧ့ၤဘြံၤ ၁၀:၃၆.) အဒိ ပဝဲတနီၤန့ၣ် ဘၣ်သ့ၣ်သ့ၣ် ပဆိးက့နးမး, ပအိၣ်ဒီး တၢ်သးလီၤစၢ်တၢ်ဆါ, ပသူၣ်ကိၢ်သးဂီၤတၢ်, ပထံၣ်ဘၣ် တၢ်ကီတၢ်ခဲ လၢဟံၣ်ပူၤ, ပှၤလၢပအဲၣ် တဂၤဂၤ သံသဒၣ်ကွံာ်ပှၤ မ့တမ့ၢ် ပအိၣ်ဒီး တၢ်ကီတၢ်ခဲ လၢအဂၤတဖၣ်. ဒီးဖဲပဘၣ်တူၢ်တၢ်အခါ ခီဖျိလၢ တၢ်လၢပှၤတဲဝဲ ဒီးမၤဝဲအဃိ တဘျီတခီၣ် ပသးဟးဂီၤဒိၣ်ထီၣ်. (ကတိၤ ၁၂:၁၈) သနာ်က့ လၢလံာ်ယိၤဘး အပူၤန့ၣ် ပမၤလိဘၣ်လၢ ပတဲဘၣ် ယဟိဝၤယွၤလၢ ပတၢ်တူၢ်ဘၣ် ပျီပျီသ့ ဒီးပနာ်သ့သပှၢ်တၢၢ်လၢ အကဒိကနၣ်ပှၤ. (၁ ယိၤ ၅:၁၄) ဒီးဖဲပတဲဖျါထီၣ် ပတၢ်တူၢ်ဘၣ်အခါ တဘျီတခီၣ် ပတၢ်ကတိၤ မ့ၢ်ဖျါလီၤဂာ်လၢ ပ “ဟးတဲကြီတၢ်” သနာ်က့ ယဟိဝၤယွၤ တသးထီၣ်ပှၤဘၣ်. ဘၣ်ဆၣ် ဒ်သိး ပတူၢ်တၢ်ကန့ၢ်အဂီၢ် ယဟိဝၤယွၤ ကဟ့ၣ်ပှၤတၢ်ဂံၢ်တၢ်ဘါ ဒီးတၢ်ကူၣ်သ့. (၂ ကွဲး ၁၆:၉; ယၤ ၁:၅) ဒီးဒ်အဘှီဘၣ်ထီၣ်က့ၤ စီၤယိၤဘးအသိး မ့ၢ်လိၣ်န့ၣ် အကဘှီဘၣ်ထီၣ်က့ၤပှၤ. တကးဒံးဘၣ် ယဟိဝၤယွၤ ကသူဝဲလံာ်စီဆှံ, အတၢ်ကရၢကရိ ဒီးဒီပုၢ်ဝဲၢ်မုၣ်ခွါလၢ အဒိၣ်တုာ်ခိၣ်ပှဲၤတဖၣ် လၢကဘှီဘၣ်ထီၣ်က့ၤပှၤ. ဖဲန့ၣ်အခါ ဒ်သိးပကအိၣ်ဒီး တၢ်တူၢ်န့ၢ်ခီၣ်ကဲအဂီၢ် စီၤယိၤဘး အတၢ်လဲၤခီဖျိ မၤစၢၤပှၤ သ့စ့ၢ်ကီး. (ဧ့ၤ ၁၂: ၅-၇) ဖဲယဟိဝၤယွၤ ဘှီဘၣ်ထီၣ်က့ၤပှၤအခါ ဒ်စီၤယိၤဘးအသိး ပမ့ၢ်ဆီၣ်လီၤသး ဒီးတူၢ်လိာ် အတၢ်သိၣ်က့ၤသီက့ၤန့ၣ် ပကန့ၢ်ဘၣ်အဘျုး. (၂ ကရံၣ် ၁၃:၁၁) လၢစီၤယိၤဘး အတၢ်လဲၤခီဖျိန့ၣ် ပဒိးန့ၢ်ဘၣ်အဘျုး အါမးတမ့ၢ်ဧီၤ. ပသူလံာ်ယိၤဘး ဒီးမၤစၢၤပှၤဂၤ ကသ့ဒ်လဲၣ်န့ၣ် ပကဆဲးကွၢ်သကိး.
သူလံာ်ယိၤဘးလၢ မၤစၢၤပှၤဂၤ
၁၄. ဒ်သိး ပှၤကနၢ်ပၢၢ်လၢ ဘၣ်မနုၤအဃိ တၢ်နးတၢ်ဖှီၣ် အိၣ်ထီၣ်လဲၣ်အဂီၢ် ပၡဲးပၠးအီၤ သ့ဒ်လဲၣ်.
၁၄ ဖဲနလဲၤစံၣ်တဲၤတဲလီၤတၢ်အခါ မ့ၢ်နထံၣ်လိာ်သးဒီး ပှၤလၢအသံကွၢ်ဝဲလၢ ဘၣ်မနုၤအဃိ တၢ်နးတၢ်ဖှီၣ် ဟဲအိၣ်ထီၣ်လဲၣ်န့ၣ် တဘျီဘျီဧါ. ဖဲန့ၣ်အခါ နစံးဆၢက့ၤအီၤဒ်လဲၣ်. ညီနုၢ်န့ၣ် ပကၡဲးပၠးအီၤ ဘၣ်ဃးဒီး တၢ်ကဲထီၣ်သးလၢ ဧ့ၤဒ့ၣ်တၤသၣ်လီၢ်. ဘၣ်သ့ၣ်သ့ၣ် ပကစးထီၣ်တဲ ဘၣ်ဃးဒီး မုၣ်ကီၤလံၢ် လံၣ်န့ၢ်ဝဲ ပှၤဟီၣ်ခိၣ်ဖိ အဆိကတၢၢ်ခံဂၤ ဒ်သိးကထီဒါက့ၤ ယဟိဝၤယွၤ. (၁ မိၤ ၃:၁-၆) ဝံၤဒီး ပၡဲပၠးအဝဲသ့ၣ်လၢ ခီဖျိလၢ နီၢ်အံၣ်အု ဒီးစီၤအၤဒၣ် တဒိကနၣ် ကစၢ်ယွၤ အကလုၢ်ဘၣ်အဃိ ပှၤဟီၣ်ခိၣ်ဖိ ထံၣ်ဘၣ်တၢ်နးတၢ်ဖှီၣ် ဒီးဘၣ်သံ. (ရိ ၅:၁၂) လၢခံကတၢၢ်န့ၣ် ပၡဲပၠး အဝဲသ့ၣ်လၢ ကစၢ်ယွၤဟ့ၣ်ဝဲ တၢ်ဆၢကတီၢ်ဒ်သိး ကပာ်ဖျါထီၣ်လၢ မုၣ်ကီၤလံၢ်န့ၣ် အကဲပှၤလံၣ်တၢ်. ဒီးအဟ့ၣ်ဝဲ တၢ်ဆၢကတီၢ်ဒ်သိး ပှၤကသ့ၣ်ညါလၢ ခါဆူညါန့ၣ် အကမၤကတၢၢ်ကွံာ် တၢ်နးတၢ်ဖှီၣ်ခဲလၢာ် ဒီးပှၤဟီၣ်ခိၣ်ဖိ ကအိၣ်မူဘၣ် လီၤထူလီၤယိာ်. (လီၣ် ၂၁:၃, ၄) ပၡဲးပၠးပှၤဂၤ ဒ်အံၤန့ၣ်အဂ့ၤ ဒီးခီဖျိလၢ ပၡဲးပၠးဒ်အံၤအဃိ ပှၤအါဂၤ သ့ၣ်ညါထီၣ်ဘၣ် တၢ်စံးဆၢလံ.
၁၅. ဒ်သိး ပှၤကနၢ်ပၢၢ်လၢ ဘၣ်မနုၤအဃိ တၢ်နးတၢ်ဖှီၣ် အိၣ်ထီၣ်လဲၣ်အဂီၢ် ပသူစီၤယိၤဘး အတၢ်လဲၤခီဖျိ ဒီးၡဲးပၠးအီၤ ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၅ ဒ်သိး ပှၤကနၢ်ပၢၢ်လၢ ဘၣ်မနုၤအဃိ တၢ်နးတၢ်ဖှီၣ် အိၣ်ထီၣ်လဲၣ်အဂီၢ် ပသူစီၤယိၤဘး အတၢ်လဲၤခီဖျိ ဒီးၡဲးပၠးအီၤသ့ စ့ၢ်ကီး. အဆိကတၢၢ်န့ၣ် ပကတဲအီၤလၢ နတၢ်သံကွၢ်အံၤ အဂ့ၤဒိၣ်မး. ဝံၤဒီးၡဲပၠးအီၤလၢ စီၤယိၤဘး လၢအကဲ ပှၤလၢအသးတီန့ၣ် အတူၢ်ဘၣ် တၢ်နးတၢ်ဖှီၣ်နးမး ဒီးအသံကွၢ်ဝဲ ဒ်န့ၣ်စ့ၢ်ကီး. ဒီးအဆိကမိၣ်ဝဲလၢ ကစၢ်ယွၤ ဒုးအိၣ်ထီၣ် အတၢ်နးတၢ်ဖှီၣ်. (ဘး ၇:၁၇-၂၁) ပှၤလၢ ပတဲသကိးတၢ်ဒီးအီၤတဂၤ ကသ့ၣ်ညါထီၣ်လၢ ဘၣ်မနုၤအဃိ ပထံၣ်ဘၣ် တၢ်နးတၢ်ဖှီၣ်လဲၣ်န့ၣ် ပှၤဟီၣ်ခိၣ်ဖိ အဲၣ်ဒိးသ့ၣ်ညါဝဲ ဖးယံာ်လံ. ဝံၤဒီး ပကၡဲပၠးအီၤလၢ လံာ်ယိၤဘး ပာ်ဖျါထီၣ်ဝဲလၢ ပှၤလၢအဒုးအိၣ်ထီၣ် စီၤယိၤဘး အတၢ်နးတၢ်ဖှီၣ်န့ၣ် မ့ၢ်ဝဲမုၣ်ကီၤလံၢ် ဒီးတမ့ၢ် ကစၢ်ယွၤဘၣ်. မုၣ်ကီၤလံၢ် ပာ်ဒ့ၣ်ပာ်ကမၣ် ပှၤဟီၣ်ခိၣ်ဖိ ဒီးတဲဝဲလၢ အဝဲသ့ၣ်ဘူၣ်ထီၣ်ဘါထီၣ် ကစၢ်ယွၤန့ၣ် ခီဖျိလၢ အန့ၢ်ဘၣ်တၢ်လၢ ကစၢ်ယွၤ အအိၣ်အဃိ ဒီးအဝဲသ့ၣ် မ့ၢ်ထံၣ်ဘၣ် တၢ်နးတၢ်ဖှီၣ်န့ၣ် အတဘူၣ်ထီၣ်ဘါထီၣ် ကစၢ်ယွၤလၢၤဘၣ်. ဒီးပကၡဲပၠးအီၤလၢ ကစၢ်ယွၤ နာ်ဝဲလၢ ပှၤဟီၣ်ခိၣ်ဖိလၢ အတီဒီးအီၤ ဒီးတအဲၣ်လီၤထဲ အသးဘၣ်န့ၣ်အိၣ်ဝဲ. အဃိ ကစၢ်ယွၤပျဲလၢ ပှၤဟီၣ်ခိၣ်ဖိလၢ အတီဒီးအီၤန့ၣ် ကပာ်ဖျါထီၣ်လၢ မုၣ်ကီၤလံၢ် ကဲပှၤလံၣ်တၢ်. ဝံၤဒီး ပကၡဲပၠးအီၤလၢ စီၤယိၤဘး ထံၣ်ဘၣ်တၢ်နးတၢ်ဖှီၣ် သနာ်က့ အဆဲးအိၣ်ဒီး တၢ်သးတီအဃိ ကစၢ်ယွၤ ဆိၣ်ဂ့ၤက့ၤအီၤ. အဃိ ပမၤမုာ်ထီၣ်က့ၤပှၤသး သ့ခီဖျိ ပတဲဘၣ်အီၤလၢ ယဟိဝၤယွၤ တဒုးအိၣ်ထီၣ် တၢ်နးတၢ်ဖှီၣ်ဘၣ်.
ဒ်သိး ပှၤကသ့ၣ်ညါထီၣ်လၢ ကစၢ်ယွၤတဒုးအိၣ်ထီၣ် တၢ်အၢတၢ်သီဘၣ်အဂီၢ် ပတဲပၠးစီၤယိၤဘး အတၢ်လဲၤခီဖျိ ဒီးပမၤစၢၤပှၤဂၤ ကသ့ဒ်လဲၣ် (ကွၢ်လံာ်အဆၢ ၁၅)
၁၆. ပှၤလၢ အလဲၤခီဖျိဘၣ် တၢ်နးတၢ်ဖှီၣ်န့ၣ် လံာ်ယိၤဘး မၤစၢၤအီၤ သ့ဒ်လဲၣ်. တဲဖျါထီၣ် တၢ်အဒိ.
၁၆ ပကတဲသကိး တၢ်အဒိဘၣ်ဃးဒီး ပိာ်ခွါတဂၤလၢ အမံၤမ့ၢ် မၤရံအိၤန့ၣ် လံာ်ယိၤဘး မၤစၢၤအီၤ ဒ်လဲၣ်အဂ့ၢ်. ဖဲ ၂၀၂၁ န့ၣ် ဘၣ်တနံၤ ဒီပုၢ်ဝဲၢ်မုၣ်တဂၤ စံၣ်တဲၤတဲလီၤတၢ် လၢလီတဲစိပူၤ. အတဲသကိးဘၣ်တၢ်ဒီး ပှၤအဆိကတၢၢ်တဂၤန့ၣ် အကဲဝဲ မၤရံအိၤ. ဒီပုၢ်ဝဲၢ်မုၣ် ဖးန့ၢ်အီၤ လံာ်စီဆှံတဆၢ ဒီးၡဲပၠးအီၤလၢ ကစၢ်ယွၤန့ၣ် အဒိကနၣ် ပတၢ်ထုကဖၣ် တကးဒံးဘၣ် အဟ့ၣ်ပှၤတၢ်မုၢ်လၢ် လၢခါဆူညါအဂီၢ်. ဒီပုၢ်ဝဲၢ်မုၣ်သံကွၢ် မၤရံအိၤအတၢ်ထံၣ် ဘၣ်ဃးဒီး လံာ်စီဆှံအဆၢ. ဝံၤဒီး မၤရံအိၤ တဲက့ၤအီၤလၢ ဖဲအကိးအီၤလီတဲစိအခါ ဘၣ်ဖဲအကွဲးလံာ်လၢ အဟံၣ်ဖိဃီဖိအဂီၢ် ဒီးတဲအဝဲသ့ၣ်လၢ အအဲၣ်အဝဲသ့ၣ်ဝံၤဒီး အကမၤသံလီၤသး. မၤရံအိၤ ဆဲးတဲဝဲလၢ “ယနာ်ကစၢ်ယွၤ ဘၣ်ဆၣ် ယတူၢ်ဘၣ်လၢ ကစၢ်ယွၤ တသးအိၣ်ယၤ နီၢ်ကီၢ်ဘၣ်.” ဖဲဒီပုၢ်ဝဲၢ်မုၣ် ကိးအီၤလီတဲစိ လၢခံတဘျီအခါ ဒီပုၢ်ဝဲၢ်မုၣ်တဲပၠးအီၤ ဘၣ်ဃးဒီး စီၤယိၤဘးထံၣ်ဘၣ် တၢ်ကီတၢ်ခဲအဂ့ၢ်. စးထီၣ်ဖဲန့ၣ် မၤရံအိၤ ပာ်လီၤသးလၢ အကဖးလံာ်ယိၤဘး ဒီတဘ့ၣ်. အဃိ ပဒီပုၢ်ဝဲၢ်မုၣ် ဆှၢန့ၢ်အီၤ လ့း (link) လၢကဖးဝဲ ဟီၣ်ခိၣ်သီတၢ်ကွဲးကျိာ်ထံ လံာ်စီဆှံ လၢ jw.org အပူၤ. ဒီးလၢခံ မၤရံအိၤ စးထီၣ်မၤလိလံာ်စီဆှံအဃိ အသ့ၣ်ညါအါထီၣ် ဘၣ်ဃးဒီး ကစၢ်ယွၤ လၢအအဲၣ်အီၤ ဒီးသူၣ်အိၣ်သးအိၣ်အီၤအဂ့ၢ်.
၁၇. ဘၣ်မနုၤအဃိ ပစံးဘျုး ယဟိဝၤယွၤလၢ အပာ်ဖျါထီၣ်န့ၢ်ပှၤ စီၤယိၤဘးအဂ့ၢ်လၢ လံာ်စီဆှံပူၤလဲၣ်. (ယိၤဘး ၃၄:၁၂)
၁၇ လံာ်စီဆှံန့ၣ် အိၣ်ဒီးအစိကမီၤလၢ ကဆီတလဲ ပတၢ်အိၣ်မူ ဒီးကမၤမုာ်ထီၣ် ပှၤလၢအထံၣ်ဘၣ် တၢ်နးတၢ်ဖှီၣ်တဖၣ်အသး. (ဧ့ၤ ၄:၁၂) ယဟိဝၤယွၤ ပာ်ဖျါထီၣ် စီၤယိၤဘးအဂ့ၢ်လၢ လံာ်စီဆှံပူၤအဃိ ပစံးဘျုးအီၤဒိၣ်မး. (ဘး ၁၉:၂၃, ၂၄) ခီဖျိလၢ ပဖးဘၣ် လံာ်ယိၤဘး အဃိ ပသ့ၣ်ညါလၢ “ကစၢ်ယွၤ တမၤတၢ်အၢတၢ်သီဘၣ်.” (ဖး ယိၤဘး ၃၄:၁၂.) တကးဒံးဘၣ် လံာ်ယိၤဘး ပာ်ဖျါထီၣ်န့ၢ်ပှၤလၢ ဘၣ်မနုၤအဃိ ကစၢ်ယွၤပျဲလၢ တၢ်နးတၢ်ဖှီၣ် ကကဲထီၣ်သးလဲၣ် ဒီးပလဲၤခီဖျိအီၤ ကန့ၢ်ဒ်လဲၣ်. ဒီးအမၤစၢၤပှၤလၢ ပကမၤမုာ်ထီၣ် ပှၤလၢအထံၣ်ဘၣ် တၢ်နးတၢ်ဖှီၣ်တဖၣ်အသး. တၢ်မၤလိ လၢခံတခါန့ၣ် ပကတဲသကိး ဘၣ်ဃးဒီး ဖဲပဘၣ် ဟ့ၣ်ကူၣ်ပှၤဂၤအခါ ဒ်သိး ပတၢ်ဟ့ၣ်ကူၣ် ကကဲဘျုးအဂီၢ် လံာ်ယိၤဘး မၤစၢၤပှၤ ကသ့ဒ်လဲၣ်.
တၢ်သးဝံၣ် ၁၅၆ တၢ်နာ်မဲာ်ချံ
a စီၤယိၤဘး အိၣ်မူဝဲဖဲ စီၤယိၤသး သံဝံၤအလီၢ်ခံ ဒီးတချုးဖဲ ယဟိဝၤယွၤ ဆှၢလီၤ စီၤမိၤၡ့ဒ်သိး ကမၤပူၤဖျဲး ပှၤအံၣ်စရ့လးဖိလၢ ကီၢ်အဲၤကူပတူးအခါ. အဃိ ဖျါလၢတၢ်ဆၢကတီၢ်လၢ ယဟိဝၤယွၤ တဲတၢ်ဒီး မုၣ်ကီၤလံၢ် ဒီးစီၤယိၤဘးထံၣ်ဘၣ် တၢ်မၤကွၢ်န့ၣ် ကဲထီၣ်သးဖဲ ချ.ခ.န ၁၆၅၇ ဒီး ချ.ခ.န ၁၅၁၄ အဘၢၣ်စၢၤ တတီၤတီၤ.
b ပှၤမံၤတနီၤန့ၣ် ပှၤဆီတလဲဝဲ.