နနီၣ်ဘၣ်ဒံးဧါ

တၢးထီခိးတၢ် လၢတနံၣ်အံၤအဂီၢ်န့ၣ် နဖးဘၣ်တၢ်ဂ့ၢ်တဖၣ်အံၤ လၢာ်လံဧါ. နကစံးဆၢ တၢ်သံကွၢ်တဖၣ်အံၤ ဒ်လဲၣ်.

ဘၣ်မနုၤအဃိ ပသးအိၣ်မၤလၤကပီၤ ယဟိဝၤယွၤလဲၣ်.

ပမၤလၤကပီၤ ယဟိဝၤယွၤ ခီဖျိလၢ ပယူးယီၣ်ပာ်ကဲအီၤ ဒီးပအဲၣ်အီၤဒိၣ်မးအဃိ. ဒီးပမၤလၤကပီၤ ယဟိဝၤယွၤ ခီဖျိလၢ ပအဲၣ်ဒိးလၢ ပှၤဂၤကသ့ၣ်ညါထီၣ်အီၤစ့ၢ်ကီး.—တၢး၂၅.၀၁, ကဘျံးပၤ ၃.

ဖဲပှၤမၤဘၣ်ဒိပသးအခါ ပပျၢ်ကွံာ်ပှၤဂၤ အတၢ်ကမၣ်ကညီအဂီၢ် ပကဘၣ်မၤဒ်လဲၣ်.

ပတဘၣ် ကွၢ်ကပာ်ကွံာ် ပတၢ်တူၢ်ဘၣ်ဘၣ်. ဒီးပမ့ၢ်တဆဲး သးဒိၣ်ထီၣ်တၢ်ဘၣ် ဒီးပျၢ်ကွံာ် ပှၤတၢ်ကမၣ်န့ၣ် ပကရ့ဒီးပှၤဂၤဂ့ၤဂ့ၤ.—တၢး၂၅.၀၂, ကဘျံးပၤ ၁၅-၁၆.

ဘၣ်မနုၤအဃိ စီၤမၢ်ကူးန့ၣ် အကဲပှၤဒိဂ့ၤတဲာ်ဘၣ်လၢ ဒီပုၢ်ဝဲၢ်ခွါသးစၢ်တဖၣ် အဂီၢ်လဲၣ်.

စီၤမၢ်ကူးန့ၣ် အသးအိၣ် တူၢ်လိာ်မူဒါ ဒီးမၤစၢၤပှၤဂၤ. ဖဲစီၤပီလူး တအဲၣ်ဒိးလဲၤကိး စီၤမၢ်ကူးလၢ မံၤၡၢၤနရံၤတၢ်လဲၤ ခံဘျီတဘျီဘၣ်အခါ ဘၣ်သ့ၣ်သ့ၣ် အသးကဘၣ်ဒိ ဒီးအသးတမုာ်ဘၣ်. ဘၣ်ဆၣ် စီၤမၢ်ကူး တဟ့ၣ်အၡူဘၣ်. အဆဲးမၤဂ့ၤထီၣ် အတၢ်ရ့လိာ်သးဒီး စီၤပီလူး ဒီးဒီပုၢ်ဝဲၢ်မုၣ်ခွါလၢ အဒိၣ်တုာ်ခိၣ်ပှဲၤတဖၣ်.—တၢး၂၅.၀၄, ကဘျံးပၤ ၂၇.

ဖဲယ့ၣ်ၡူး ဃ့ထုကဖၣ်လၢ “ယဒုးသ့ၣ်ညါ အဝဲသ့ၣ်လၢနမံၤလံ” အခါ အအဲၣ်ဒိးတဲဝဲ မနုၤလဲၣ်. (ယိၤ ၁၇:၂၆)

ယ့ၣ်ၡူးအပျဲၢ်အဘီၣ်တဖၣ် သ့ၣ်ညါပာ်စၢၤ ကစၢ်ယွၤအမံၤလံ. ဘၣ်ဆၣ် ဒ်သိး အပျဲၢ်အဘီၣ်တဖၣ် ကသ့ၣ်ညါထီၣ် ယဟိဝၤယွၤအဂ့ၢ် ဂ့ၤဂ့ၤအဂီၢ် ယ့ၣ်ၡူးဒုးသ့ၣ်ညါအဝဲသ့ၣ်လၢ ယဟိဝၤယွၤ အတၢ်တိာ်ပာ်, တၢ်လၢ ယဟိဝၤယွၤ မၤတ့ၢ်ဝဲ, တၢ်လၢအကမၤဝဲ လၢခါဆူညါ ဒီးအတၢ်ဂ့ၤတၢ်ဝါတဖၣ်.—တၢး၂၅.၀၅, ကဘျံးပၤ ၂၀-၂၁.

ပမ့ၢ်အိၣ်ဒီး တၢ်ဆီၣ်လီၤသးန့ၣ် အကဲဘျုးလၢ ပဂီၢ်ဒ်လဲၣ်.

တၢ်ဆီၣ်လီၤသး ကမၤစၢၤပှၤဒ်သိး ပကတူၢ်လိာ်လၢ ပတသ့ၣ်ညါတၢ်ခဲလၢာ်ဘၣ်. အဒိ တၢ်အကတၢၢ်ကဟဲတုၤ အခါဖဲလဲၣ် ဒီးဖဲန့ၣ်အခါ ယဟိဝၤယွၤ ကမၤစၢၤပှၤဒ်လဲၣ်န့ၣ် ပတသ့ၣ်ညါဘၣ်. ခဲမုၢ်ဆ့ၣ် တၢ်ကမၤအသးဒ်လဲၣ်န့ၣ် ပတသ့ၣ်ညါဘၣ်. ဒီးယဟိဝၤယွၤ သ့ၣ်ညါပှၤ ဂ့ၤထဲလဲၣ်န့ၣ် ပနၢ်ပၢၢ် တသ့စ့ၢ်ကီးဘၣ်.—တၢး၂၅.၀၆, ကဘျံးပၤ ၁၅-၁၈.

ဒ်သိးပက ဒိးန့ၢ်ဘၣ်အဘျုးလၢ တၢ်ဂ့ၢ်ဒီးလံာ်လဲၢ်လၢ ပတၢ်ကရၢကရိ ထုးထီၣ်ဝဲ မ့တမ့ၢ် တၢ်စံၣ်တဲၤတဲလီၤတၢ်လၢ ကမျၢၢ်အဂီၢ်န့ၣ် ပကဘၣ်မၤဒ်လဲၣ်.

ပသံကွၢ်လီၤသး ဒ်အံၤသ့. ‘ဒ်သိး ပှၤလၢအသးအိၣ်တၢ်တဂၤ ကနာ်ဝဲ တၢ်မ့ၢ်တၢ်တီအံၤအဂီၢ် တၢ်ဂ့ၢ်အံၤ ပာ်ဖျါထီၣ် တၢ်အုၣ်သး မနုၤလဲၣ်. ဖဲယသိၣ်လိပှၤဂၤ တၢ်မ့ၢ်တၢ်တီအခါ တၢ်အဒိလၢအကဲဘျုး လၢယသူက့ၤအီၤသ့န့ၣ် အိၣ်တခါခါဧါ. တၢ်ဂ့ၢ်အံၤ မတဂၤ ကအဲၣ်ဒိး သ့ၣ်ညါဝဲလဲၣ် ဒီးယတဲဘၣ်အီၤ ကသ့လၢအခါဖဲလဲၣ်’—တၢး၂၅.၀၇, ကဘျံးပၤ ၁၉.

ဘၣ်ဃးဒီး ယဟိဝၤယွၤပျၢ်ကွံာ် စီၤဒၤဝံးအတၢ်ကမၣ်န့ၣ် ပန့ၢ်ဘၣ် တၢ်မၤလိဒ်လဲၣ်.

စီၤဒၤဝံး မၤဘၣ်တၢ်ကမၣ်ဖးဒိၣ် ဘၣ်ဆၣ် ဖဲအပီၢ်ယၢ်လီၤက့ၤသးအခါ ယဟိဝၤယွၤ ပျၢ်ကွံာ်အတၢ်ကမၣ်. (၁ စီၤပၤ ၉:၄, ၅) ဖဲယဟိဝၤယွၤ ပျၢ်ကွံာ် ပတၢ်ကမၣ်အခါ အတသ့ၣ်နီၣ်ထီၣ်က့ၤဝဲဘၣ်. အဃိ ပသ့ၣ်ညါဘၣ်လၢ အတစံၣ်ညီၣ်ပှၤလၢ တၢ်ကမၣ်လၢ ပမၤတ့ၢ် နီတဘျီလၢၤဘၣ်.—တၢး၂၅.၀၈, ကဘျံးပၤ ၁၇.

ပှၤမၤလိလံာ်စီဆှံဖိတဂၤ မ့ၢ်တနၢ်ပၢၢ် တၢ်ဂ့ၢ်တခါ ဂ့ၤဂ့ၤဘၣ်န့ၣ် ပကဘၣ်မၤဒ်လဲၣ်

ပှၤမၤလိလံာ်စီဆှံဖိတဂၤ မ့ၢ်တနၢ်ပၢၢ် တၢ်ဂ့ၢ်ဂ့ၤဂ့ၤဘၣ်န့ၣ် နတလိၣ်ဆဲးတဲဘၣ်. ဆဲးမၤလိ တၢ်ဂ့ၢ်လၢညါ ဒီးရဲၣ်ကျဲၤလၢ နကတဲသကိး တၢ်ဂ့ၢ်တခါန့ၣ်လၢခံ.—တၢး၂၅.၀၉, ကဘျံးပၤ ၂၄.

လံာ်စီဆှံ တဲဘၣ်ဃးဒီး “တၢ်ဒဲးဘးအစိအကမီၤလၢ အလံၣ်န့ၢ်လီန့ၢ်တၢ်သ့” အဂ့ၢ်န့ၣ် အဲၣ်ဒိးတဲဝဲ မနုၤလဲၣ်. (ဧ့ၤ ၃:၁၃)

တၢ်ဒဲးဘးအစိကမီၤအံၤ ကွဲန့ၢ်လွဲန့ၢ်ပှၤလၢ ပကမၤကမၣ်တၢ်. တကးဒံးဘၣ် ခီဖျိလၢ ပကဲပှၤတၢ်ဒဲးဘးဖိအဃိ ပကတူၢ်ဘၣ်လၢ ယဟိဝၤယွၤ တအဲၣ်ပှၤဘၣ် ခဲအံၤခဲအံၤ.—တၢး၂၅.၁၀, ကဘျံးပၤ ၁၆.

တၢ်ဂ့ၢ်သၢထံၣ်လၢ ကမၤစၢၤပှၤဒ်သိး ပကမၤဂ့ၤဒိၣ်ထီၣ် ပတၢ်ဃ့ထုကဖၣ်န့ၣ် မ့ၢ်မနုၤလဲၣ်.

(၁) ဆိကမိၣ်ထံ ယဟိဝၤယွၤ အတၢ်ဂ့ၤတၢ်ဝါ. (၂) ဆိကမိၣ်ပာ်စၢၤ တၢ်ဂ့ၢ်လၢပကတဲ. အဒိ ခဲအံၤပထံၣ်ဘၣ် တၢ်ကီတၢ်ခဲမနုၤလဲၣ် ဒီးပှၤလၢ ပကဘၣ်ပျၢ်ကွံာ် အတၢ်ကမၣ်န့ၣ် အိၣ်တဂၤဂၤဧါ ဝံၤဒီးတဲဖျါထီၣ်လၢ ပတၢ်ထုကဖၣ်. (၃) ဖဲပဃ့ထုကဖၣ်အခါ ပဘၣ်ဟံးန့ၢ်တၢ်ဆၢကတီၢ် ဒီးဃ့ကရီတဂ့ၤ. ပမ့ၢ်ဟံးန့ၢ်အါထီၣ်တၢ်ဆၢကတီၢ် တစဲးဖိန့ၣ် ကမၤစၢၤပှၤဒ်သိး ပတဲဖျါထီၣ် ပတၢ်တူၢ်ဘၣ် ကသ့အါထီၣ်.—တၢး၂၅.၁၀, ကဘျံးပၤ ၁၉-၂၀.

ပမၤစၢၤ ပှၤသးပှၢ် ကသ့ဒ်လဲၣ်.

ပလဲၤဟး ဒီးကိးအိၣ်သကိး ဒီပုၢ်ဝဲၢ်မုၣ်ခွါသးပှၢ်တဖၣ်လၢ လီတဲစိသ့. ဒီးဖဲအဝဲသ့ၣ် လဲၤထံၣ်လိာ်သးဒီး ကသံၣ်သရၣ်အခါ ပလဲၤစၢၤအီၤသ့. မ့တမ့ၢ် ပလဲၤစံၣ်တဲၤတဲလီၤတၢ်ဒီး အဝဲသ့ၣ် ဒီးမၤတၢ်စံၣ်တဲၤတဲလီၤတၢ်မၤ အကလုာ်ကလုာ် သ့စ့ၢ်ကီး.—တၢး၂၅.၁၁, ကဘျံးပၤ ၆-၇.

ဒ်သိး နတၢ်ဖျီန့ၣ် ကကဲထီၣ် တၢ်လၤကပီၤလၢ ယဟိဝၤယွၤအဂီၢ် နကဘၣ်မၤဒ်လဲၣ်.

နကဘၣ် ဃုသ့ၣ်ညါ ဒီးမၤထွဲ ပဒိၣ်အတၢ်သိၣ်တၢ်သီ. နတၢ်ဖျီအမူးန့ၣ် အကဘၣ်ပာ်ဖျါထီၣ် တၢ်ဂ့ၤတၢ်ဝါတဖၣ်လၢ သးစီဆှံအတၤသၣ် ဒုးအိၣ်ထီၣ်ဝဲ. နတၢ်ကူတၢ်ကၤ ဒီးတၢ်ကယၢကယဲန့ၣ် ကဘၣ်ဖျါ လီၤပာ်ကဲ ဒီးဟးဆှဲး လုၢ်လၢ် ဒီးတၢ်ဆဲးတၢ်လၤလၢ အတဘၣ်လိာ်သးဒီး လံာ်စီဆှံဘၣ်. ဒီးဖဲနရဲၣ်ကျဲၤ နတၢ်ဖျီအခါ တဲသကိးတၢ် လီၤတံၢ်လီၤဆဲး.—တၢး၂၅.၁၂, ကဘျံးပၤ ၂၁-၂၄.