မၤဂၢၢ်ကျၢၤ နတၢ်သးတီဒီး ယွၤအဘီမုၢ်တက့ၢ်
“အဝဲသ့ၣ်တဘၣ်ဃးဘၣ်ဒီး ဟီၣ်ခိၣ်ဘၣ်.”—ယိၤဟၣ် ၁၇:၁၆.
တၢ်သးဝံၣ်– ၆၃, ၁၂၉
၁, ၂. (က) တၢ်သးတီဒီးယဟိဝၤယွၤ ဒီးတၢ်တမၤဘၣ်ဃးသးဒီး ဟီၣ်ခိၣ်တၢ်သဘံၣ်သဘုၣ်န့ၣ် ဘၣ်ထွဲလိာ်အသးဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.) (ခ) ပှၤဟီၣ်ခိၣ်ဖိအါဂၤ အသးတီဒီးတၢ်မနုၤလဲၣ်, ဘၣ်ဆၣ်တၢ်အံၤဒုးအိၣ်ထီၣ် တၢ်ကီတၢ်ခဲမနုၤလဲၣ်.
ယဟိဝၤယွၤ အခ့အပှၤတဖၣ် တမၤဘၣ်ဃးအသးဒီး ထံဂ့ၢ်ကီၢ်ဂ့ၢ်ဒီး တၢ်ဂ့ၢ်လၢအမၤလီၤဖးပှၤအဒူၣ်အဆၢ ဒ်သိးဒီး ထံကီၢ်, ကလုာ်ဒူၣ် မ့တမ့ၢ် တၢ်ဆဲးတၢ်လၤတဖၣ်န့ၣ်ဘၣ်. ဘၣ်မနုၤအဃိလဲၣ်. ခီဖျိလၢပအဲၣ် ယဟိဝၤယွၤ, ပတီဒီးအီၤဒီးပဒိကနၣ် အကလုၢ်အဃိန့ၣ်လီၤ. (၁ ယိၤဟၣ် ၅:၃) ပမ့ၢ်အိၣ်ဖဲလဲၣ်ဂ့ၤဂ့ၤ, ပမ့ၢ်ဒိၣ်ထီၣ်လၢ တၢ်လီၢ်ဖဲလဲၣ်ဂ့ၤဂ့ၤ ပလူၤပိာ်ထွဲ ယွၤအတၢ်သိၣ်တၢ်သီတဖၣ်န့ၣ်လီၤ. ပတၢ်သးတီဒီး ယဟိဝၤယွၤ ဒီးအဘီအမုၢ်န့ၣ် မ့ၢ်တၢ်အရ့ဒိၣ်ကတၢၢ်လီၤ. (မးသဲ ၆:၃၃) လၢတၢ်န့ၣ်အဃိ ပစံးသ့လၢပ “တဘၣ်ဃးဘၣ်ဒီးဟီၣ်ခိၣ်” ဘၣ်န့ၣ်လီၤ.—ဖး ယိၤဟၣ် ၁၇:၁၁, ၁၅, ၁၆ တက့ၢ်; ယၡါယၤ ၂:၄.
၂ မုၢ်မဆါတနံၤအံၤ ပှၤအါဂၤ တီဝဲဒီးအထံအကီၢ်, အပှၤကလုာ်, အတၢ်ဆဲးတၢ်လၤ မ့တမ့ၢ် ပှၤလိာ်ကွဲဖိတဖုဖုန့ၣ်လီၤ. လၢတၢ်န့ၣ်အဃိ အဝဲသ့ၣ်အါဂၤန့ၣ် ပြၢလိာ်အသး တဂၤဒီးတဂၤ ဒီးသးဟ့လိာ်အသး တုၤဒၣ်လဲာ် မၤသံလိာ်အသးန့ၣ်လီၤ. ပမ့ၢ်တပၣ်ဃုာ်လၢ တၢ်သဘံၣ်သဘုၣ်တဖၣ်အံၤ အကျါဒၣ်လဲာ် တၢ်သ့ၣ်တဖၣ်န့ၣ် မၤဘၣ်ဒိပှၤဒီးပဟံၣ်ဖိဃီဖိသ့ ဒီးပဝဲစ့ၢ်ကီး ပကတူၢ်ဘၣ် တၢ်ကီတၢ်ခဲလၢ တၢ်တတီတလိၤတဖၣ်အံၤအဃိသ့န့ၣ်လီၤ. မ့ၢ်လၢကစၢ်ယွၤတ့လီၤပှၤ ဃုာ်ဒီးတၢ်သ့တၢ်ဘၣ်လၢ ပသ့ၣ်ညါတၢ်အဘၣ်ဒီးတၢ်အကမၣ်အဃိ ဖဲပထံၣ်ဘၣ်ထံကီၢ် ပဒိၣ်ပပှၢ်တဖုဖု မၤတၢ်တဘၣ်အခါ ပကပာ်ဒ့ၣ်ပာ်ကမၣ်အဝဲသ့ၣ်ညီဝဲလီၤ. (၁ မိၤၡ့ ၁:၂၇; ၅ မိၤၡ့ ၃၂:၄) ဖဲတၢ်တတီတလိၤအိၣ်ထီၣ်အခါ မ့ၢ်နတူၢ်ဘၣ်ဒ်လဲၣ်. မ့ၢ်နအိၣ်လၢတၢ်ဘၢၣ်စၢၤကသ့ဒံးဧါ. မ့တမ့ၢ် နကအိၣ်ဃူဒီး ပဒိၣ်တဖုဖုဧါ.
၃, ၄. (က) ဖဲတၢ်သဘံၣ်ဘုၣ်အိၣ်ထီၣ်ဝဲအခါ ဘၣ်မနုၤအဃိ ပကဘၣ်ဃုထၢ တၢ်အိၣ်ဘၢၣ်စၢၤန့ၣ်လဲၣ်. (ခ) တၢ်မၤလိတခါအံၤအပူၤ ပကတဲသကိးတၢ်ဂ့ၢ်မနုၤလဲၣ်.
၃ ဖဲတၢ်သဘံၣ်သဘုၣ်တဖၣ် ဟဲအိၣ်ထီၣ်ဝဲအခါ ပဒိၣ်ပပှၢ်တဖၣ် ဆီၣ်သနံးကမျၢၢ်တဖၣ် ဒ်သိးကအိၣ်ဃူဒီးအီၤအဂီၢ်န့ၣ်လီၤ. ဘၣ်ဆၣ်ခီဖျိလၢ ပပိာ်ယ့ၣ်ၡူးခရံာ်အခံအဃိ ပတပၣ်ဃုာ်လၢ ထံဂ့ၢ်ကီၢ်ဂ့ၢ်ဘၣ်. ဒီးပတဖီၣ်စ့ၢ်ကီးတၢ်စုကဝဲၤဒီး လဲၤဒုးတၢ်ဘၣ်. (မးသဲ ၂၆:၅၂) ခရံာ်ဖိနီၢ်နီၢ်တဖၣ် တကြၢးဆိကမိၣ်လၢ ဟီၣ်ခိၣ်လၢ မုၣ်ကီၤလံၢ်ပၢဝဲတဘ့ၣ်အပူၤအံၤ ပဒိၣ်တဖုဖုဂ့ၤဒိၣ်န့ၢ် အဂၤတဖၣ်န့ၣ်ဘၣ်. (၂ ကရံၣ်သူး ၂:၁၁) ဟီၣ်ခိၣ်တၢ်သဘံၣ်ဘုၣ်တဖၣ်အကျါ ပတအဲၣ်ဒိးပၣ်ဃုာ်ဘၣ်.—ဖး ယိၤဟၣ် ၁၅:၁၈, ၁၉ တက့ၢ်.
၄ ခီဖျိလၢ ပတလၢတပှဲၤဘၣ်အဃိ ပဝဲတနီၤ ပကထံၣ်ဆံး ပှၤကလုာ်အဂၤတဖၣ်သ့န့ၣ်လီၤ. (ယံးရမံယၤ ၁၇:၉; အ့းဖ့းစူး ၄:၂၂-၂၄) လၢတၢ်မၤလိအံၤအပူၤ ပကမၤလိဘၣ် တၢ်ဘျၢသ့ၣ်တဖၣ်လၢ ကမၤစၢၤပှၤ ဒ်သိးပကထီဒါ ဒီးမၤနၢၤ တၢ်ဆိကမိၣ်လၢ အမၤလီၤဖးပှၤဟီၣ်ခိၣ်ဖိတဖၣ်န့ၣ်လီၤ. ဒီးပမ့ၢ်ဂုာ်ကျဲးစၢးဆိကမိၣ်တၢ်ဒ် ယဟိဝၤယွၤဒီးယ့ၣ်ၡူးအသိးဒီးတၢ်အံၤ ကမၤစၢၤပှၤလၢပကတီဒီး ယွၤအဘီမုၢ်ကသ့ဒ်လဲၣ်အဂ့ၢ်န့ၣ် ပကဆိကမိၣ်ကွၢ်တက့ၢ်.
ဘၣ်မနုၤအဃိ ပတဆီၣ်ထွဲ ဟီၣ်ခိၣ်ဘၣ်လဲၣ်
၅, ၆. ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ အတၢ်ထံၣ်ဘၣ်ဃး ကလုာ်ဒူၣ် အတၢ်လီၤဆီတဖၣ်န့ၣ်ဒ်လဲၣ်, ဒီးဘၣ်မနုၤအဃိလဲၣ်.
၅ ဖဲနထံၣ်ဘၣ်တၢ်ကီတၢ်ခဲလၢ နကအိၣ်လၢတၢ်ဘၢၣ်စၢၤအခါ နကဘၣ်သံကွၢ်လီၤနသးလၢ ‘ဖဲတၢ်အိၣ်အသးဒ်အံၤအခါ မ့မ့ၢ်ယ့ၣ်ၡူးန့ၣ် ကမၤဝဲဒ်လဲၣ်.’ ဖဲယ့ၣ်ၡူးအိၣ်လၢဟီၣ်ခိၣ်ချၢအခါ တၢ်သဘံၣ်သဘုၣ် ဒီးတၢ်သးတလီၤပလိာ်တဖၣ် အိၣ်ထီၣ်ဝဲလၢ ပှၤယူဒၤဖိ, ပှၤကၤလံၤလါဖိ, ဒီးပှၤၡၤမရံဖိတဖၣ်အကျါန့ၣ်လီၤ. ဆိကမိၣ်ကွၢ် တၢ်အဒိတဖၣ်အံၤတက့ၢ်. ပှၤယူဒၤဖိဒီး ပှၤၡၤမရံဖိတဖၣ် တကတိၤလိာ်အသးဘၣ်. (ယိၤဟၣ် ၄:၉) ပှၤဖၤရံၤၡဲ ဒီးစးဒူၤကဲဖိတဖၣ် အသးတလီၤပလိာ်လၢ တၢ်ဂ့ၢ်အါမံၤန့ၣ်လီၤ. (မၤတၢ် ၂၃:၆-၉) ပှၤယူဒၤဖိတဖၣ်လၢ အမၤလိဘၣ် တၢ်သိၣ်တၢ်သီန့ၣ် ဆိကမိၣ်ဆံးဝဲဒၣ် ပှၤလၢတမၤလိဘၣ် တၢ်သိၣ်တၢ်သီတဖၣ်န့ၣ်လီၤ. (ယိၤဟၣ် ၇:၄၉) ဒီးအဝဲသ့ၣ်အါဂၤ သးဟ့ပှၤဃ့သွဲဖိဒီး ပှၤရိမ့ၤဖိတဖၣ်န့ၣ်လီၤ. (မးသဲ ၉:၁၁) ဘၣ်ဆၣ် ယ့ၣ်ၡူးတပၣ်ဃုာ်လၢ တၢ်သ့ၣ်တဖၣ်န့ၣ်အကျါဘၣ်. ယ့ၣ်ၡူးဆီၣ်ထွဲဝဲ တၢ်မ့ၢ်တၢ်တီ ဘၣ်ဃးဒီးယဟိဝၤယွၤ ဒီးသ့ၣ်ညါဝဲလၢ ပှၤအံၣ်စရ့လးဖိမ့ၢ် ယွၤအပှၤဂီၢ်မုၢ်တဒူၣ်သနာ်က့ အဝဲတသိၣ်လိ အပျဲၢ်အဘီၣ်လၢ အဝဲသ့ၣ်ဂ့ၤန့ၢ်ကလုာ်အဂၤဘၣ်. (ယိၤဟၣ် ၄:၂၂) လၢတၢ်န့ၣ်အလီၢ် ယ့ၣ်ၡူးသိၣ်လိအပျဲၢ်အဘီၣ်လၢ ကဘၣ်အဲၣ်ပှၤကိးကလုာ်ဒဲးလီၤ.—လူၤကၣ် ၁၀:၂၇.
၆ ဘၣ်မနုၤအဃိ ယ့ၣ်ၡူးတထံၣ်ဝဲလၢ ပှၤတကလုာ်ဂ့ၤဒိၣ်န့ၢ် ပှၤကလုာ်အဂၤန့ၣ်လဲၣ်. မ့ၢ်လၢအဝဲဒီးအပၢ် အတၢ်ထံၣ်လီၤဂာ်လိာ်အသးအဃိန့ၣ်လီၤ. ဖဲယဟိဝၤယွၤ တ့လီၤပှၤဟီၣ်ခိၣ်ဖိအခါ အတၢ်တိာ်ပာ်န့ၣ်မ့ၢ်ဝဲ ဟီၣ်ခိၣ်ဒီဘ့ၣ်အံၤ ကပှဲၤဝဲဒီးပှၤအကလုာ်ကလုာ်န့ၣ်လီၤ. (၁ မိၤၡ့ ၁:၂၇, ၂၈) လၢတၢ်န့ၣ်အဃိ ယဟိဝၤယွၤဒီးယ့ၣ်ၡူး တထံၣ်ဝဲလၢ ကလုာ်ဒူၣ် မ့တမ့ၢ် ကျိာ်တကျိာ်န့ၣ် ဂ့ၤဒိၣ်န့ၢ်အဂၤတဖၣ်န့ၣ်ဘၣ်. (မၤတၢ် ၁၀:၃၄, ၃၅; လီၣ်ဖျါ ၇:၉, ၁၃, ၁၄) ပကဘၣ် ကွၢ်လိအဝဲသ့ၣ် အဒိအတဲာ်လၢ အဂ့ၤအံၤန့ၣ်လီၤ.—မးသဲ ၅:၄၃-၄၈.
၇, ၈. (က) ပကဃုထၢပတၢ်ပၢကစၢ် လၢမတၤတဂၤန့ၣ်လဲၣ်, ဒီးဘၣ်မနုၤအဃိလဲၣ်. (ခ) ပှၤဟီၣ်ခိၣ်ဖိ အတၢ်ကီတၢ်ခဲ ကလီၤမၢ်ကွံာ်ဝဲအဂီၢ်န့ၣ် ပကဘၣ်သ့ၣ်နီၣ်ထီၣ် တၢ်မနုၤလဲၣ်.
၇ ဘၣ်မနုၤအဃိ ပဝဲသ့ၣ်တဖၣ် ပတဆီၣ်ထွဲ ပဒိၣ်ပပှၢ်တဂၤဂၤ မ့တမ့ၢ် ပဒိၣ်တဖုဖု အတၢ်ပၢန့ၣ်လဲၣ်. မ့ၢ်လၢပဃုထၢယဟိဝၤယွၤ လၢပတၢ်ပၢကစၢ်အဃိန့ၣ်လီၤ. ဖဲဧ့ၤဒ့ၣ်တၤသၣ်အလီၢ်ပူၤ မုၣ်ကီၤလံၢ် စံးဝဲလၢ ယဟိဝၤယွၤန့ၣ် တမ့ၢ်ပှၤပၢတၢ် အဂ့ၤကတၢၢ်လၢ ပှၤဟီၣ်ခိၣ်ဖိတဖၣ်အဂီၢ်န့ၣ်ဘၣ်. မုၣ်ကီၤလံၢ်အဲၣ်ဒိးဝဲလၢ ပှၤဟီၣ်ခိၣ်ဖိ ကနာ်ဝဲလၢ အတၢ်ပၢန့ၣ် ဂ့ၤဒိၣ်န့ၢ်ဒံးကစၢ်ယွၤအတၢ်ပၢတက့ၢ်လီၤ. ယဟိဝၤယွၤပျဲပှၤလၢ ပကဃုထၢ အီၤမ့တမ့ၢ် ပကဃုထၢမုၣ်ကီၤလံၢ်န့ၣ်လီၤ. ဘၣ်ဆၣ် မ့မ့ၢ်နၤန့ၣ် နကမၤဒ်လဲၣ်. နနာ်လၢ ယဟိဝၤယွၤအကျဲန့ၣ် ဂ့ၤဒိၣ်န့ၢ်နကျဲအဃိ နဒိကနၣ် အကလုၢ်န့ၣ်ဧါ. နနာ်လၢ ထဲဒၣ်ယဟိဝၤယွၤအဘီအမုၢ် ကမၤလီၤမၢ်ကွံာ် နတၢ်ကီတၢ်ခဲတဖၣ်န့ၣ်ဧါ. မ့တမ့ၢ်ဘၣ်န့ၣ် မ့ၢ်နဆိကမိၣ်လၢ ပှၤဟီၣ်ခိၣ်ဖိတဖၣ် ပၢလီၤက့ၤအသးဒၣ်ဝဲကသ့ဧါ.—၁ မိၤၡ့ ၃:၄, ၅.
၈ အဒိ ပှၤတဂၤမ့ၢ်သံကွၢ်နၤ နတၢ်ထံၣ်ဘၣ်ဃးဒီး ပဒိၣ်တဖု မ့တမ့ၢ် တၢ်ကရၢကရိတဖုဖုအဂ့ၢ်န့ၣ် နကစံးဆၢအီၤဒ်လဲၣ်. တၢ်ကရၢကရိတနီၤနီၤ သးအိၣ်မၤစၢၤ ကမျၢၢ်နီၢ်နီၢ်လီၤ. ဘၣ်ဆၣ်ပသ့ၣ်ညါလၢ ထဲဒၣ်ယဟိဝၤယွၤအဘီအမုၢ်န့ၣ် ကမၤလီၤမၢ်ကွံာ် ပှၤဟီၣ်ခိၣ်ဖိ အတၢ်ကီတၢ်ခဲတဖၣ်ဒီး ထုးကွံာ် တၢ်တတီတလိၤခဲလၢာ်န့ၣ်လီၤ. မ့မ့ၢ်ပဝဲတဂၤစုာ်စုာ် ပတမၤဒ်ပနီၢ်ကစၢ်အတၢ်ဆိကမိၣ်အသိးဘၣ်. လၢတၢ်န့ၣ်အလီၢ် ပလူၤပိာ်ထွဲ ယဟိဝၤယွၤ အတၢ်ဟံးစုနဲၣ်ကျဲတဖၣ်လၢ ဟဲခီဖျိဝဲလၢတၢ်အိၣ်ဖှိၣ်အပူၤန့ၣ်လီၤ. လၢတၢ်န့ၣ်အဃိ တၢ်အိၣ်ဖှိၣ်အိၣ်ဝဲဒီး တၢ်ဃူတၢ်ဖိးန့ၣ်လီၤ.
၉. လၢတၢယၤဖှိၣ်အစိၤ ခရံာ်ဖိတဖၣ်အကျါ တၢ်ကီတၢ်ခဲမနုၤဟဲအိၣ်ထီၣ်ဝဲလဲၣ်, ဒီးအဝဲသ့ၣ်ကဘၣ်မၤ ဝဲတၢ်မနုၤလဲၣ်.
၉ လၢတၢယၤဖှိၣ်အစိၤ ခရံာ်ဖိလၢကရံၣ်သူးအပူၤတနီၤ တဲအါလိာ်အသး တဂၤဒီးတဂၤ ဒီးစံးဝဲလၢ, “ယဲဒၣ်အံၤ ယမ့ၢ်ပှၤဘၣ်ဃးဒီးစီၤပီလူး, ဒီးယဲဒၣ်အံၤ ယမ့ၢ်ပှၤဘၣ်ဃးဒီး စီၤအပီးလိၤ, ဒီးယဲဒၣ်အံၤ ယမ့ၢ်ပှၤဘၣ်ဃးဒီးစီၤက့ၤဖး, ဒီးယဲဒၣ်အံၤ ယမ့ၢ်ပှၤဘၣ်ဃးဒီးခရံာ်လီၤ.” ဖဲစီၤပီလူး သ့ၣ်ညါဘၣ်ဝဲ တၢ်ဂ့ၢ်အံၤအခါ အဝဲဖုးဘၣ်အသးလီၤ. တၢ်အံၤမ့ၢ် တၢ်ဂ့ၢ်ကီဖးဒိၣ်တခါန့ၣ်လီၤ. မ့ၢ်ဝဲတၢ်လီၤဘၣ်ယိၣ်လၢ တၢ်အိၣ်ဖှိၣ် အတၢ်ဃူတၢ်ဖိးအဂီၢ်န့ၣ်လီၤ. လၢတၢ်န့ၣ်အဃိ အဝဲ သံကွၢ်ဒီပုၢ်ဝဲၢ်မုၣ်ခွါတဖၣ်လၢ– “တၢ်လၢခရံာ်န့ၣ် လီၤဖးအသးဧါ.” စီၤပီလူးဟ့ၣ်ကူၣ်အဝဲသ့ၣ်လၢ– “ဒီးပုၢ်သ့ၣ်ဝဲၢ်သ့ၣ်ဧၢ, ဒ်သိးသုကကတိၤတၢ် တမံၤဃီခဲလၢာ်, ဒီးတၢ်လီၤမုၢ်လီၤဖး သုတအိၣ်လၢသုကျါတဂ့ၤ, ဒီးသုကအိၣ်ဒီး သုကူၣ်ထီၣ်ဖးလီၤတၢ်တမံၤဃီ, ဒီးသုကဆိကမိၣ်တမံၤဃီဒီး, ယဃ့ကညးသုလၢ ပကစၢ်ယ့ၣ်ၡူးခရံာ်အမံၤလီၤ.” မုၢ်မဆါတနံၤညါအံၤစ့ၢ်ကီး တၢ်လီၤမုၢ်လီၤဖး တကြၢးအိၣ်ထီၣ်လၢ တၢ်အိၣ်ဖှိၣ်ပူၤဘၣ်.—၁ ကရံၣ်သူး ၁:၁၀-၁၃; ဖး ရိမ့ၤ ၁၆:၁၇, ၁၈ တက့ၢ်.
၁၀. စီၤပီလူးဒုးသ့ၣ်နီၣ်ထီၣ်က့ၤ ခရံာ်ဖိတဖၣ်ဒ်လဲၣ်, ဒီးပဒိးန့ၢ်ဘၣ် တၢ်မၤလိမနုၤလဲၣ်.
၁၀ စီၤပီလူး ဒုးသ့ၣ်နီၣ်ထီၣ်က့ၤ ခရံာ်ဖိလၢ ဘၣ်တၢ်ဒိးဖှူအီၤတဖၣ်လၢ အဝဲသ့ၣ်မ့ၢ် မူခိၣ်ဘီမုၢ်ဖိအဃိ တကြၢးသးစၢၢ်ဆၢဒီး “ဟီၣ်ခိၣ်အတၢ်” ဘၣ်. (ဖံလံးပံၤ ၃:၁၇-၂၀)a (ကွၢ်တၢ်ဂ့ၢ်အဘျဲၣ်တက့ၢ်.) ပှၤလၢအဘၣ်တၢ်ဒိးဖှူအီၤတဖၣ်န့ၣ် မ့ၢ်ယွၤဒီးယ့ၣ်ၡူးခရံာ် အပှၤခၢၣ်စးလီၤ. ထံကီၢ်အပှၤခၢၣ်စးတဂၤ မ့ၢ်လဲၤဆူထံဂၤကီၢ်ဂၤအခါ အဝဲတမၤဘၣ်ဃးအသးဒီး ထံကီၢ်တဘ့ၣ်န့ၣ် အတၢ်သဘံၣ်ဘုၣ်ဒီး အထံဂ့ၢ်ကီၢ်ဂ့ၢ်ဘၣ်. ဒ်န့ၣ်အသိး ပှၤလၢအဘၣ်တၢ်ဒိးဖှူအီၤသ့ၣ်တဖၣ်စ့ၢ်ကီး တမၤဘၣ်ဃးအသးဒီး ဟီၣ်ခိၣ်အတၢ်သဘံၣ်သဘုၣ် ဒီးဟီၣ်ခိၣ်အထံဂ့ၢ်ကီၢ်ဂ့ၢ်ဘၣ်. (၂ ကရံၣ်သူး ၅:၂၀) ပှၤလၢအသးတီဒီး ယွၤအဘီအမုၢ် ဒီးကအိၣ်မူဘၣ်လၢ ဟီၣ်ခိၣ်လီၤထူလီၤယိာ်တဖၣ်စ့ၢ်ကီး တမၤဘၣ်ဃးအသးဒီး ဟီၣ်ခိၣ်အတၢ်သဘံၣ်သဘုၣ်တဖၣ်န့ၣ်ဘၣ်.
မၤလိနသးလၢ နကတီဒီး ယဟိဝၤယွၤ အဘီအမုၢ်န့ၣ်တက့ၢ်
၁၁, ၁၂. (က) ပမ့ၢ်အဲၣ်ဒိး မၤဂၢၢ်ကျၢၤ ပတၢ်သးတီဒီး ယွၤအဘီအမုၢ်န့ၣ် ပကဘၣ်ဟးဆှဲး တၢ်ပာ်သူၣ်ပာ်သးမနုၤတဖၣ်လဲၣ်. (ခ) ဘၣ်ဃးဒီး ပှၤကလုာ်အဂၤန့ၣ် ဒီပုၢ်ဝဲၢ်မုၣ်တဂၤ ထံၣ်ဝဲဒ်လဲၣ်, ဒီးတၢ်မနုၤမၤစၢၤအီၤ ဒ်သိးကဆီတလဲအတၢ်ထံၣ်အဂီၢ်န့ၣ်လဲၣ်.
၁၁ ပှၤအိၣ်လၢတၢ်လီၢ်အါတီၤတဖၣ် အဲၣ်ဝဲဒၣ်ထဲပှၤလၢ အတၢ်စံၣ်စိၤတဲစိၤ, တၢ်ဆဲးတၢ်လၤ ဒီးကျိာ်လီၤဂာ်လိာ်သးဒီးအီၤတဖၣ်န့ၣ်လီၤ. အဝဲသ့ၣ်တနီၤ ပာ်ထီၣ်ထီအသးလၢ တၢ်လီၢ်လၢအဝဲသ့ၣ်ဒိၣ်ထီၣ်ဝဲအဃိန့ၣ်လီၤ. ဘၣ်ဆၣ်မ့မ့ၢ်ပဝဲဒၣ်အံၤ ပတဘၣ်ပျဲတၢ်သ့ၣ်တဖၣ်အံၤ လုၢ်ဘၢကွံာ်ပသးဘၣ်. လၢတၢ်န့ၣ်အလီၢ် ပကဘၣ်ဆီတလဲ ပတၢ်ဆိကမိၣ်ဒီး သိၣ်လိပသးလၢအသ့ၣ်ညါဒၣ်တၢ် ဒ်သိးပကအိၣ်လၢ တၢ်အိၣ်ဘၢၣ်စၢၤကသ့အဂီၢ်န့ၣ်လီၤ. ပမၤတၢ်အံၤ ကသ့ဒ်လဲၣ်.
၁၂ အဒိ မကၠဲထၤb (ကွၢ်တၢ်ဂ့ၢ်အဘျဲၣ်တက့ၢ်.) အိၣ်ဖျဲၣ်ထီၣ်ဝဲလၢ ထံကီၢ်လၢ အပူၤကွံာ် ဘၣ်တၢ်ကိးအီၤလၢ ကီၢ်ယူၣ်ကိၣ်စလါဘံယါန့ၣ်လီၤ. ပှၤအိၣ်လၢအဝဲဒိၣ်ထီၣ်ဝဲအလီၢ်တဖၣ်န့ၣ် သးဟ့ဝဲဒၣ် ပှၤစၢဘံယါဖိလီၤ. ဖဲအဝဲမၤလိဘၣ် ယဟိဝၤယွၤအဂ့ၢ်အခါ သ့ၣ်ညါဘၣ်ဝဲလၢ ကစၢ်ယွၤ တအဲၣ်ဒိၣ်ဆံး ပှၤကလုာ်ဒူၣ်ဘၣ်. မ့မ့ၢ်မုၣ်ကီၤလံၢ်န့ၣ် အဲၣ်ဒိးလၢ ပှၤသးဟ့လိာ်သးကဒဲကဒဲလီၤ. လၢတၢ်န့ၣ်အဃိ ဒီပုၢ်ဝဲၢ်မုၣ်အံၤ ဂုာ်ကျဲးစၢးဆီတလဲ အတၢ်ပာ်သူၣ်ပာ်သးန့ၣ်လီၤ. ဘၣ်ဆၣ်အခါဖဲ တၢ်ဒုးစးထီၣ် လၢကလုာ်ဒူၣ်ကဒဲကဒဲအကျါန့ၣ် အဝဲသးဟ့ကဒီးဝဲ ပှၤစၢဘံယါဖိတဖၣ် တုၤဒၣ်လဲာ် အဝဲတအဲၣ်ဒိး စံၣ်တဲၤတဲလီၤတၢ်လၢ အဝဲသ့ၣ်အကျါလၢၤဘၣ်လီၤ. အဝဲသ့ၣ်ညါလၢ တၢ်အံၤမ့ၢ်တၢ်လၢအကမၣ်လီၤ. လၢတၢ်န့ၣ်အဃိ အဝဲဃ့ကညး ယဟိဝၤယွၤဒ်သိး အတၢ်တူၢ်ဘၣ် ဒ်အံၤတဖၣ် ကလီၤမၢ်ကွံာ်အဂီၢ်န့ၣ်လီၤ. အဝဲဃ့စ့ၢ်ကီး တၢ်မၤစၢၤလၢ ကမၤဝဲပှၤလဲၤလၢညါတၢ်မၤအဂီၢ်န့ၣ်လီၤ. မကၠဲထၤစံးဝဲ– “ဖဲယသးစၢၢ်ဆၢ တၢ်စံၣ်တဲၤတဲလီၤတၢ်မၤအခါ တၢ်အံၤမ့ၢ်တၢ်မၤစၢၤလၢအဂ့ၤကတၢၢ်လီၤ. ယဂုာ်ကျဲးစၢးကွၢ်လိ ယဟိဝၤယွၤ အတၢ်ဂ့ၤတၢ်ဝါတဖၣ် ဒီးယတၢ်ပာ်သူၣ်ပာ်သး လၢအတဂ့ၤတဖၣ် လီၤမၢ်ကွံာ်ဝဲလီၤ.”
၁၃. (က) စွါလၣ် ကွၢ်ဆၢၣ်မဲာ်ဘၣ်ဒီးတၢ်မနုၤလဲၣ် ဒီးအဝဲမၤဝဲဒ်လဲၣ်. (ခ) စွါလၣ် အတၢ်လဲၤခီဖျိအံၤန့ၣ် ပဒိးန့ၢ်ဘၣ်တၢ်မၤလိမနုၤသ့လဲၣ်.
၁၃ စွါလၣ် မ့ၢ်ဒီပုၢ်ဝဲၢ်မုၣ်တဂၤလၢ ကီၢ်မဲးကစံၣ်ကိၣ် ဒီးအဝဲလဲၤသုးလီၢ်သုးကျဲဆူ ကီၢ်ယူရပၤန့ၣ်လီၤ. လၢအဝဲအတၢ်အိၣ်ဖှိၣ်အပူၤ ဒီပုၢ်ဝဲၢ်မုၣ်ဒီပုၢ်ဝဲၢ်ခွါတဖၣ်လၢ လဲးတ့ၣ်အမဲရကၤအဂၤတတီၤတီၤအိၣ်ဝဲစ့ၢ်ကီးလီၤ. စွါလၣ်စံးဝဲလၢ အဝဲသ့ၣ်အကျါတနီၤန့ၣ် တဲမဲာ်ဆှးအီၤဘၣ်ဃး ထံကီၢ်လၢအဟဲဝဲ, အလုၢ်အလၢ် ဒီးအတၢ်ဒ့တၢ်အူတဖၣ်န့ၣ်လီၤ. လၢတၢ်တဖၣ်န့ၣ်အဃိ အဝဲအသးဘၣ်ဒိ ဒီးဃ့ဘါထုကဖၣ် လၢယဟိဝၤယွၤအအိၣ် ဒ်သိးအသးသုတထီၣ်ဘၣ် ဒီပုၢ်ဝဲၢ်သ့ၣ်တဖၣ်တဂ့ၤန့ၣ်လီၤ. ပမ့ၢ်အိၣ်ဘၣ်လၢအဝဲအလီၢ်န့ၣ် ပကတူၢ်ဘၣ်ဒ်လဲၣ်. ပဒီပုၢ်ဝဲၢ်အကျါတနီၤန့ၣ် ဖဲနၢ်ဟူဘၣ်ဝဲ ပှၤတဲဟးဂီၤဘၣ်ဃးဒီး တၢ်လီၢ်လၢအဝဲသ့ၣ်ဟဲအဂ့ၢ်အခါအိၣ်ဒီး တၢ်ကီတၢ်ခဲလၢကပၢၤဃာ် အတၢ်သးဒိၣ်အဂီၢ်န့ၣ်လီၤ. ပတအဲၣ်ဒိးတဲတၢ်မ့တမ့ၢ် မၤတၢ်တမံၤမံၤလၢ ကဒုးအိၣ်ထီၣ်ကလုာ်ဒူၣ် အဒူၣ်အဆၢဘၣ်. ပတအဲၣ်ဒိး နီၤဖးတၢ်အဒူၣ်အဆၢလၢ တၢ်အိၣ်ဖှိၣ်အပူၤ မ့တမ့ၢ် လၢတၢ်လီၢ်အဂၤတတီၤန့ၣ်ဘၣ်.—ရိမ့ၤ ၁၄:၁၉; ၂ ကရံၣ်သူး ၆:၃.
၁၄. တၢ်မနုၤကမၤစၢၤနၤလၢ နကအိၣ်ဒီးတၢ်ထံၣ် ဒ်ယဟိဝၤယွၤအသိးန့ၣ်လဲၣ်.
၁၄ ပဝဲသ့ၣ်တဖၣ် ပသ့ၣ်ညါဘၣ်လၢ ယဟိဝၤယွၤအခ့အပှၤတဖၣ်န့ၣ် အိၣ်ဃူအိၣ်ဖိးဝဲဒ် ပှၤတကလုာ်ဃီအသိးန့ၣ်လီၤ. လၢတၢ်န့ၣ်အဃိ ပဝဲသ့ၣ်တဖၣ် ပတဘၣ်ထံၣ်လၢ တၢ်လီၢ်တတီၤတီၤ မ့တမ့ၢ် ထံကီၢ်တဘ့ၣ်ဘ့ၣ် ဂ့ၤဒိၣ်န့ၢ်ဒံးအဂၤတဖၣ်န့ၣ်ဘၣ်. ဘၣ်ဆၣ် နဒိၣ်ထီၣ်အလီၢ်မ့ၢ်ဂ့ၤ, နဟံၣ်ဖိဃီဖိမ့ၢ်ဂ့ၤ လုၢ်ဘၢနတၢ်ထံၣ်သ့လီၤ. လၢတၢ်န့ၣ်အဃိ ဘၣ်သ့ၣ်သ့ၣ် နတၢ်ထံၣ်ဆံး ပှၤလၢထံကီၢ်, တၢ်ဆဲးတၢ်လၤ, ကျိာ် မ့တမ့ၢ် ကလုာ်ဒူၣ်တဒ်သိးနၤတဖၣ် ကအိၣ်ဒံးဝဲလီၤ. နကဆီတလဲ နတၢ်ထံၣ်အဂီၢ် တၢ်မနုၤကမၤစၢၤနၤလဲၣ်. ဆိကမိၣ်ကွၢ် ယဟိဝၤယွၤအတၢ်ထံၣ်ဘၣ်ဃးဒီး ပှၤလၢအပာ်ထီၣ်ထီအသးလၢ အထံကီၢ်အဃိ မ့တမ့ၢ် ပှၤလၢအဆိကမိၣ်လီၤအသးလၢ အဂ့ၤန့ၢ်ဒံးပှၤဂၤတဖၣ်အဂ့ၢ်န့ၣ်တက့ၢ်. ဃုသ့ၣ်ညါအါထီၣ် ဘၣ်ဃးတၢ်ဂ့ၢ်တဖၣ်အံၤ ဖဲနနီၢ်ကစၢ်တၢ်မၤလိလံာ်စီဆှံအခါ မ့တမ့ၢ် ဟံၣ်ဖိဃီဖိတၢ်မၤလိလံာ်စီဆှံအခါန့ၣ်တက့ၢ်. ဃ့တၢ်မၤစၢၤလၢ ယဟိဝၤယွၤအအိၣ် ဒ်သိးနကအိၣ်ဒီးတၢ်ထံၣ် ဒ်အဝဲအသိးန့ၣ်တက့ၢ်.—ဖး ရိမ့ၤ ၁၂:၂ တက့ၢ်.
ပှၤအါဂၤ မ့ၢ်မၤပှၤတမံၤဂ့ၤ တမံၤဂ့ၤ, ပကတီဒီး ယဟိဝၤယွၤ ခီဖျိလၢပဒိကနၣ်အကလုၢ်န့ၣ်လီၤ (ကွၢ်လံာ်အဆၢ ၁၅, ၁၆)
၁၅, ၁၆. (က) ခီဖျိလၢ ပလီၤဆီဒီး ပှၤအဂၤအဃိ ပှၤကထံၣ်ပှၤဒ်လဲၣ်. (ခ) ဖိတဖၣ် ကတီဒီး ယဟိဝၤယွၤအဂီၢ် မိၢ်ပၢ်တဖၣ်မၤစၢၤအဝဲသ့ၣ်ကသ့ဒ်လဲၣ်.
၁၅ ပအဲၣ်ဒိးမၤ ယဟိဝၤယွၤအတၢ်မၤ ပှဲၤဒီးသးလၢအသ့ၣ်ညါဒၣ်တၢ်လၢအကဆှီအဃိ ပကဘၣ်လီၤဆီလၢ ပှၤမၤသကိးတၢ်ဒီးပဝဲမ့ၢ်ဂ့ၤ, ပသကိးလၢကၠိမ့ၢ်ဂ့ၤ, ပှၤလၢပဃၢၤမ့ၢ်ဂ့ၤ, ပဘူးပတံၢ်တဖၣ်အကျါမ့ၢ်ဂ့ၤန့ၣ်လီၤ. (၁ ပ့းတရူး ၂:၁၉) ယ့ၣ်ၡူးဟ့ၣ်ပလီၢ်ပှၤလၢ ပှၤကသးဟ့ပဝဲ ခီဖျိလၢပလီၤဆီဒီး အဝဲသ့ၣ်န့ၣ်လီၤ. ပကဘၣ်သ့ၣ်နီၣ်ထီၣ်လၢ ပှၤလၢအထီဒါပှၤတဖၣ် အါဒၣ်တက့ၢ်န့ၣ် တသ့ၣ်ညါ ယွၤအဘီအမုၢ်အဂ့ၢ်ဘၣ်. ဘၣ်မနုၤအဃိ အရ့ဒိၣ်လၢ ပကဘၣ်တီဒီးယွၤအဘီအမုၢ် ဒိၣ်န့ၢ်ဒံးပှၤဟီၣ်ခိၣ်ဖိ အပဒိၣ်တဖၣ်လဲၣ်န့ၣ် အဝဲသ့ၣ် တနၢ်ပၢၢ်ဝဲဘၣ်.
၁၆ ပှၤအါဂၤမ့ၢ်မၤပှၤ တမံၤဂ့ၤတမံၤဂ့ၤ, မ့ၢ်စံးပှၤဒ်လဲၣ်ဂ့ၤ ဒ်လဲၣ်ဂ့ၤ ပကတီဒီးယဟိဝၤယွၤ ခီဖျိလၢပဒိကနၣ်အကလုၢ်န့ၣ်လီၤ. (ဒၤနံးယ့လး ၃:၁၆-၁၈) လီၤဆီဒၣ်တၢ် ပှၤသးစၢ်တဖၣ် ကအိၣ်လီၤဆီလၢ ပှၤဂၤအဂီၢ်န့ၣ် ကကီဝဲလီၤ. လၢတၢ်န့ၣ်အဃိ မိၢ်ပၢ်သ့ၣ်တဖၣ် ကဘၣ်မၤစၢၤအဖိ ဒ်သိးကအိၣ်ဒီး တၢ်သးဒူ ဖဲအိၣ်လၢကၠိအခါန့ၣ်လီၤ. ဖဲနဖိတဖၣ် ကဘၣ်ဂ့ၢ်လိာ် တၢ်ယူးယီၣ်နီၣ်တယၢ် မ့တမ့ၢ် တၢ်ပၣ်ဃုာ်လၢ ထံကီၢ်အမူးပွဲတဖၣ်အခါန့ၣ် ဘၣ်သ့ၣ်သ့ၣ် အဝဲသ့ၣ်ကပျံၤတၢ်လီၤ. လၢတၢ်န့ၣ်အဃိ ဖဲဟံၣ်ဖိဃီဖိ တၢ်မၤလိလံာ်စီဆှံအဆၢကတီၢ်န့ၣ် သိၣ်လိနဖိတဖၣ် လၢယဟိဝၤယွၤ အတၢ်ထံၣ် ဘၣ်ဃးတၢ်သ့ၣ်တဖၣ်အံၤန့ၣ်တက့ၢ်. ဖဲအဝဲသ့ၣ်ဘၣ်သဂၢၢ်ဒီး တၢ်သ့ၣ်တဖၣ်အံၤအခါ ဒ်သိးအဝဲသ့ၣ် ကတဲနၢ်ပၢၢ်ပှၤဂၤလၢတၢ်ပာ်ကဲအပူၤဂ့ၤဂ့ၤကသ့အဂီၢ်န့ၣ် သိၣ်လိစ့ၢ်ကီးအဝဲသ့ၣ်တက့ၢ်. (ရိမ့ၤ ၁:၁၆) မ့ၢ်သ့န့ၣ် မၤစၢၤနဖိတဖၣ်ခီဖျိ နလဲၤတဲတၢ်ဒီး အသရၣ်တဖၣ်ဘၣ်ဃး ပတၢ်နာ်အဂ့ၢ်န့ၣ်တက့ၢ်.
သးခုလၢယဟိဝၤယွၤ အတၢ်ဘၣ်တ့ခဲလၢာ် အဖီခိၣ်တက့ၢ်
၁၇. ပကဘၣ်ဟးဆှဲး တၢ်ဆိကမိၣ် ဒ်လဲၣ်တကလုာ်လဲၣ်, ဒီးဘၣ်မနုၤအဃိလဲၣ်.
၁၇ ပဝဲသ့ၣ်တဖၣ် ညီနုၢ်ပဘၣ်သူၣ်ဘၣ်သး တၢ်အီၣ်တၢ်အီ, ကျိာ်, န့ဆၢၣ်အတၢ်ဃံတၢ်လၤ ဒီးလုၢ်လၢ်လၢပဒိၣ်ထီၣ်ဘၣ်အလီၢ်န့ၣ်လီၤ. ဘၣ်ဆၣ် မ့ၢ်ပဆိကမိၣ်ထီဘိလၢ တၢ်လၢပဘၣ်သူၣ်ဘၣ်သးသ့ၣ်တဖၣ်န့ၣ် ဂ့ၤဒိၣ်န့ၢ်ဒံးပှၤဂၤအတၢ်န့ၣ်ဧါ. ယဟိဝၤယွၤ အဲၣ်ဒိးဝဲလၢ ပကသးဖှံလၢအတၢ်ဘၣ်တ့ အကလုာ်ကလုာ်အဖီခိၣ်န့ၣ်လီၤ. (စံးထီၣ်ပတြၢၤ ၁၀၄:၂၄; လီၣ်ဖျါ ၄:၁၁) လၢတၢ်န့ၣ်အဃိ ပတကြၢးဆိကမိၣ်လၢ တၢ်ထံၣ်တမံၤန့ၣ်ဂ့ၤဒိၣ်န့ၢ် အဂၤတမံၤန့ၣ်ဘၣ်.
၁၈. ပမ့ၢ်ထံၣ်ပှၤဂၤဒ်ယဟိဝၤယွၤထံၣ်အဝဲသ့ၣ်အသိးန့ၣ် ဘၣ်မနုၤအဃိဂ့ၤဝဲလဲၣ်.
၁၈ ယဟိဝၤယွၤအဲၣ်ဒိးလၢ ပှၤဟီၣ်ခိၣ်ဖိခဲလၢာ် ကသ့ၣ်ညါအီၤ, ဘူၣ်ထီၣ်ဘါထီၣ်အီၤ ဒီးအိၣ်မူလီၤထူလီၤယိာ်န့ၣ်လီၤ. (ယိၤဟၣ် ၃:၁၆; ၁ တံၤမသ့း ၂:၃, ၄) လၢတၢ်န့ၣ်အဃိ ဖဲပဒီပုၢ်ဝဲၢ်တဖၣ်အိၣ်ဒီး တၢ်ထံၣ်လၢအလီၤဆီလိာ်သး ဒီးပှၤအခါ ပကဘၣ်ဒိကနၣ်အတၢ်ထံၣ်လၢ တၢ်သူၣ်အိၣ်သးအိၣ်လီၤ. အဝဲသ့ၣ်အတၢ်ထံၣ် မ့ၢ်လီၤပလိာ်ဒီး ယဟိဝၤယွၤအတၢ်ထံၣ်န့ၣ် ပတူၢ်လိာ်သ့ဝဲလီၤ. ပမ့ၢ်မၤဒ်န့ၣ်န့ၣ် ပတၢ်အိၣ်မူ ကပှဲၤဒီးတၢ်သူၣ်မံသးမုာ် ဒီးပကအိၣ်ဃူအိၣ်ဖိး ဒီးဒီပုၢ်ဝဲၢ်မုၣ်ဒီပုၢ်ဝဲၢ်ခွါတဖၣ်န့ၣ်လီၤ. ခီဖျိလၢ ပတီဒီးယဟိဝၤယွၤ ဒီးအဘီအမုၢ်အဃိ ပတမၤဘၣ်ဃးပသးဒီး ဟီၣ်ခိၣ်အတၢ် သဘံၣ်သဘုၣ်တဖၣ်န့ၣ်ဘၣ်. ပသးဟ့တၢ်ပာ်ထီၣ်ထီသး ဒီးတၢ်ပြၢလိာ်သးတဖၣ်လီၤ. ပစံးဘျုးစံးဖှိၣ်ယဟိဝၤယွၤဒိၣ်မး လၢသိၣ်လိပှၤ ဒ်သိးပကအိၣ်ဒီး တၢ်ဃူတၢ်ဖိးဒီး တၢ်ဆီၣ်လီၤသးအဂီၢ်န့ၣ်လီၤ. ပတူၢ်ဘၣ်ဒ်ပှၤကွဲး ထါစံးထီၣ်ပတြၢၤ အတၢ်ကတိၤလၢအမ့ၢ်– “ဒီပုၢ်ဝဲၢ်အိၣ်ဝဲဆိးဝဲလၢ အသးတဖျၢၣ်ဃီအံၤ, ဂ့ၤဆံးဒိၣ်လဲၣ်, ဒီးမုာ်ဆံးဒိၣ်လဲၣ် ဆံးဒိၣ်လဲၣ်န့ၣ်ကွၢ်ကွၢ်တက့ၢ်” န့ၣ်လီၤ.—စံးထီၣ်ပတြၢၤ ၁၃၃:၁.
a ဒီပုၢ်ဝဲၢ်တနီၤလၢ ဖံလံးပံၤ တၢ်အိၣ်ဖှိၣ်ပူၤန့ၣ် ကမ့ၢ်ဝဲရိမ့ၤအပှၤထံဖိကီၢ်ဖိ ဒီးလၢတၢ်အံၤအဃိ အဝဲသ့ၣ်အတၢ်ခွဲးတၢ်ယာ်တဖၣ်ကအိၣ်အါန့ၢ်ဒံး ဒီပုၢ်ဝဲၢ်လၢ တမ့ၢ်ရိမ့ၤအပှၤထံဖိကီၢ်ဖိတဖၣ်န့ၣ်လီၤ.
b ပှၤမံၤတနီၤဘၣ်တၢ်ဆီတလဲအီၤလီၤ.