မၤစၢၤ “ပှၤတမှံၤ”တဖၣ် ဒ်သိးအကမၤ ယဟိဝၤယွၤ အတၢ်မၤလၢ “တၢ်သးခု”အပူၤ တက့ၢ်
“ယွၤအံးက့ၤကွၢ်က့ၤပှၤတမှံၤ” လီၤ.—စံးထီၣ်ပတြၢၤ ၁၄၆:၉.
၁, ၂. (က) ပဒီပုၢ်ဝဲၢ်မုၣ်ဒီပုၢ်ဝဲၢ်ခွါ တနီၤနီၤထံၣ်ဘၣ်ဝဲ တၢ်ကီတၢ်ခဲမနုၤတဖၣ်လဲၣ်. (ခ) တၢ်သံကွၢ်မနုၤအိၣ်ထီၣ်ဝဲလဲၣ်.
ဒီပုၢ်ဝဲၢ် လံကၠံ တဲဝဲလၢ “ဖဲတၢ်ဒုးကဲထီၣ်လၢ ကီၢ်ဘရူဒံၣ်အပူၤအခါ ဘၣ်လၢပထီၣ် တၢ်အိၣ်ဖှိၣ်ဖးဒိၣ်န့ၣ်လီၤ. ပထံၣ်ပှၤဃ့ၢ်ပြံပြါ ဒီးပှၤခးလိာ်အသးလၢကျိန့ၣ်လီၤ. ယမိယပါဒီး ပဒီပုၢ်ဝဲၢ် ၁၁ ဂၤန့ၣ်ပဃ့ၢ်ကရီကဒးအဃိ ပတၢ်တပၣ်နီတမံၤဘၣ်. ပဟံၣ်ဖိဃီဖိဘၣ် လီၤမုၢ်လီၤဖးဝဲလီၤ. ဒီးတနီၤနီၤန့ၣ် ဘၣ်ဃ့ၢ်ယံၤဝဲ အကံလိမံထၢၣ် ၁,၆၀၀ (အမံးလာ် ၁,၀၀၀) ဒီးလဲၤတုၤဝဲလၢ ပှၤဘၣ်ကီဘၣ်ခဲဒဲကဝီၤ လၢကီၢ်မလၣ်ဝံၣ် အပူၤန့ၣ်လီၤ.”
၂ ဟီၣ်ခိၣ်ဒီဘ့ၣ် ပှၤဘၣ်ကီဘၣ်ခဲလၢ အဘၣ်ဃ့ၢ်မှံဟးဖျိးလၢ တၢ်ဒုးတၢ်ယၤအဃိန့ၣ် အိၣ်ဝဲ ၆၅ ကကွဲၢ်ဘျဲၣ်ညါလီၤ. ပှၤဘၣ်ကီဘၣ်ခဲအိၣ်အါထဲထဲအံၤ တအိၣ်ဝဲနီတဘျီဘၣ်.a (ကွၢ်တၢ်ဂ့ၢ်အဘျဲၣ်တက့ၢ်.) လၢပှၤဘၣ်ကီဘၣ်ခဲတဖၣ်အကျါန့ၣ် ပၣ်ဃုာ်ဒီး ယဟိဝၤပှၤအုၣ်အသး လၢအကထိတဖၣ်ညါ. အဝဲသ့ၣ်အါဂၤန့ၣ်ထံၣ်ဘၣ်ဝဲ ပှၤလၢအအဲၣ်ဘၣ်ဝဲတဖၣ်သံဝဲ ဒီးဘၣ်ပာ်တ့ၢ်ကွံာ် ဝဲတၢ်လၢ အအိၣ်ဒီးအဝဲသ့ၣ်ခဲလၢာ်လီၤ. အဝဲသ့ၣ်ထံၣ်ဘၣ်ဒံး တၢ်ကီတၢ်ခဲအဂၤ မနုၤတဖၣ်လဲၣ်. ပဒီပုၢ်ဝဲၢ်မုၣ်ဒီပုၢ်ဝဲခွါလၢ လဲၤခီဖျိတၢ်ကီတၢ်ခဲ ဒ်အံၤတဖၣ်န့ၣ် ဒ်သိးအဝဲသ့ၣ်ဆဲးမၤ ယဟိဝၤယွၤအတၢ်မၤလၢ တၢ်သူၣ်ခုသးခုအပူၤကန့ၢ်အဂီၢ် ပမၤစၢၤအီၤကသ့ဒ်လဲၣ်. (စံးထီၣ်ပတြၢၤ ၁၀၀:၂) ဒီးပှၤဘၣ်ကီဘၣ်ခဲတဖၣ်လၢ အတသ့ၣ်ညါဒံးယဟိဝၤယွၤန့ၣ် ပစံၣ်တဲၤတဲလီၤအဝဲသ့ၣ်ကသ့ဒ်လဲၣ်.
ပှၤဘၣ်ကီဘၣ်ခဲတဖၣ် အတၢ်အိၣ်မူ
၃. ယ့ၣ်ၡူးဒီးအပျဲၢ်အဘီၣ်အါဂၤ ကဲထီၣ်ပှၤဘၣ်ကီဘၣ်ခဲဒ်လဲၣ်.
၃ ယဟိဝၤယွၤ အမူခိၣ်ကလူးတဂၤ ဒုးသ့ၣ်ညါ စီၤယိၤသးလၢ စီၤပၤဟ့ၤရိာ်အဲၣ်ဒိးမၤသံ ယ့ၣ်ၡူးလီၤ. လၢတၢ်န့ၣ်အဃိ ယ့ၣ်ၡူးအမိၢ်ဒီးအပၢ် ဘၣ်လဲၤဃ့ၢ်အိၣ်ဝဲလၢ ကီၢ်အဲၤကူပတူး ဒီးကဲထီၣ်ပှၤဘၣ်ကီဘၣ်ခဲန့ၣ်လီၤ. အဝဲသ့ၣ်ဘၣ်အိၣ်ဝဲဖဲန့ၣ် တုၤစီၤပၤဟ့ၤရိာ်သံဝဲတစုလီၤ. (မးသဲ ၂:၁၃, ၁၄, ၁၉-၂၁) နံၣ်တဖၣ်ပူၤကွံာ်အါမးအလီၢ်ခံ ယ့ၣ်ၡူးအပျဲၢ်အဘီၣ်တဖၣ်စ့ၢ်ကီး အဝဲသ့ၣ် “လီၤပြံလီၤပြါလၢ ကီၢ်ယူဒၤ, ဒီးကီၢ်ၡၤမရံ” ခီဖျိလၢ ပှၤမၤအၢမၤနးအဝဲသ့ၣ်အဃိလီၤ. (မၤတၢ် ၈:၁) ယ့ၣ်ၡူးသ့ၣ်ညါဝဲလၢ အပျဲၢ်အဘီၣ်အါဂၤ ကဘၣ်ဃ့ၢ်မှံဟးဖျိးဝဲလီၤ. အဝဲစံးဝဲလၢ “တုၤပှၤမၤအၢမၤနးသုလၢ ဝ့ၢ်တဖျၢၣ်အံၤဒီး, ဃ့ၢ်ထီၣ်ဆူအဂၤတဖျၢၣ်တက့ၢ်.” (မးသဲ ၁၀:၂၃) လၢတၢ်ဂ့ၢ်တမံၤဂ့ၤတမံၤဂ့ၤအဃိ ပှၤမ့ၢ်ဘၣ်ဃ့ၢ်မှံဟးဖျိးန့ၣ် တမ့ၢ်တၢ်လၢအညီလၢ အဝဲသ့ၣ်အဂီၢ်ဘၣ်.
၄, ၅. (က) ဖဲပှၤဘၣ်ကီဘၣ်ခဲတဖၣ် ဃ့ၢ်မှံဟးဖျိးအခါ အဝဲသ့ၣ်ထံၣ်ဘၣ် တၢ်ကီတၢ်ခဲမနုၤလဲၣ်. (ခ) ဒီးဖဲအဝဲသ့ၣ်အိၣ်လၢ ပှၤဘၣ်ကီဘၣ်ခဲ ဒဲကဝီၤပူၤအခါ အိၣ်ဒီးတၢ်ဘၣ်ယိၣ်ဘၣ်ဘှီ မနုၤတဖၣ်လဲၣ်.
၄ ဖဲပှၤဘၣ်ကီဘၣ်ခဲတဖၣ် ဘၣ်ဃ့ၢ်မှံဟးဖျိး မ့တမ့ၢ် အိၣ်လၢပှၤဘၣ်ကီဘၣ်ခဲ ဒဲကဝီၤပူၤအခါ အဝဲသ့ၣ်ထံၣ်ဘၣ်ဝဲတၢ်ကီတၢ်ခဲအါမးလီၤ. ဒီပုၢ်ဝဲၢ်လံကၠံ အပုၢ် ကဲး(စ်) တဲဝဲလၢ “ပဘၣ်ဟးလၢပခီၣ် အနွံတဖၣ်အနွံ ဒီးဖဲပဟးအခါ ပထံၣ်ဘၣ်ပှၤသံအစိၣ် အိၣ်လၢအကယၤတဖၣ်ညါ. ဒီးဖဲန့ၣ်အခါ ယအိၣ်ဒၣ်ထဲ ၁၂ နံၣ်ဒံးလီၤ. ယဟးအါတလၢအဃိ ယခီၣ်ညိးထီၣ်ဒီး ယမၢယဟံၣ်ဖိဃီဖိ ပာ်တ့ၢ်ကွံာ်ယၤလီၤ. ဘၣ်ဆၣ် ယပၢ်တပာ်တ့ၢ်ကွံာ်ယၤဘၣ် အဝဲပုထီၣ်ယၤလီၤ. ပဃ့ဘါထုကဖၣ် ဒီးသန့ၤပသးလၢယဟိဝၤယွၤအဃိ ပလဲၤခီဖျိတၢ်ကီတၢ်ခဲတဖၣ် တသီဘၣ်တသီန့ၢ်ဝဲလီၤ. တဘျီတခီၣ် ပဘၣ်အီၣ်ထဲတခိးသၣ်လၢ ပထံၣ်ဘၣ်လၢ ကျဲန့ၣ်လီၤ.”—ဖံလံးပံၤ ၄:၁၂, ၁၃.
၅ ဒီပုၢ်ဝဲၢ်လံကၠံ အဟံၣ်ဖိဃီဖိအါဂၤ ဘၣ်အိၣ်ဝဲလၢ ပှၤဘၣ်ကီဘၣ်ခဲဒဲကဝီၤပူၤ အနံၣ်အါမးလီၤ. ဒီးဖဲန့ၣ်စ့ၢ်ကီး တၢ်လီၤဘၣ်ယိၣ်အိၣ်ဝဲအါမးလီၤ. ခဲအံၤဒီပုၢ်ဝဲၢ်လံကၠံ မ့ၢ်ဝဲကဝီၤအပှၤကွၢ်တၢ် စံးဝဲလၢ “ပှၤအိၣ်ဖဲန့ၣ်တဖၣ် အါတက့ၢ်န့ၣ် အတၢ်မၤတအိၣ်ဘၣ်. အဝဲသ့ၣ်ဟးတဲအီၣ်ပှၤအဂ့ၢ်, အီမူၤသံး, တၤကျိၣ်တၤစ့, ဟုၣ်တၢ် ဒီးမၤကမၣ်မုၣ်ကမၣ်ခွါလီၤ.” ဒ်သိးဒီပုၢ်ဝဲၢ်တဖၣ် ဟးဆှဲးလုၢ်လၢ်သကဲာ်ပဝး တဖၣ်အံၤကန့ၢ်အဂီၢ် အဝဲသ့ၣ်အတၢ်မၤကဘၣ်အါလၢ တၢ်အိၣ်ဖှိၣ်တၢ်ဖံးတၢ်မၤအဂီၢ်လီၤ. (ဧ့ၤဘြံၤ ၆:၁၁, ၁၂; ၁၀:၂၄, ၂၅) ဒီပုၢ်ဝဲၢ်တဖၣ်သူဝဲ အတၢ်ဆၢကတီၢ်လၢ ကမၤဆူၣ်ထီၣ်အနီၢ်သး ဒီးလၢအဝဲသ့ၣ်အကျါအါဂၤန့ၣ် စးထီၣ်မၤပှၤလဲၤလၢညါန့ၣ်လီၤ. အဝဲသ့ၣ်သ့ၣ်နီၣ်ထီၣ်ဝဲလၢ ဒ်ပှၤအံၣ်စရ့လးဖိသ့ၣ်တဖၣ် တအိၣ်ဘၣ်လၢ ပှၢ်မုၢ်ကနၢအပူၤ လီၤထူလီၤယိာ်ဘၣ်အသိး အဝဲသ့ၣ်စ့ၢ်ကီး တအိၣ်ဘၣ်လၢ ပှၤဘၣ်ကီဘၣ်ခဲဒဲကဝီၤပူၤ လီၤထူလီၤယိာ်ဘၣ်. အဝဲသ့ၣ်မၤဝဲဒ်အံၤအဃိ မၤစၢၤအဝဲသ့ၣ်လၢ ကဆဲးအိၣ်ဒီးတၢ်ထံၣ်လၢအဂ့ၤန့ၣ်လီၤ.—၂ ကရံၣ်သူး ၄:၁၈.
ပာ်ဖျါထီၣ်တၢ်အဲၣ်တၢ်ကွံလၢ ပှၤဘၣ်ကီဘၣ်ခဲတဖၣ်အဖီခိၣ်
၆, ၇. (က) “ယွၤအတၢ်အဲၣ်” န့ၣ် ထိၣ်ဟူးထိၣ်ဂဲၤထီၣ်ပှၤလၢ ပကမၤတၢ်မနုၤလဲၣ်. (ခ) ဟ့ၣ်တၢ်အဒိတက့ၢ်.
၆ “ယွၤအတၢ်အဲၣ်” န့ၣ်ထိၣ်ဟူးထိၣ်ဂဲၤထီၣ်ပှၤလၢ ပကပာ်ဖျါထီၣ်တၢ်အဲၣ်လၢ ပဒီပုၢ်ဝဲၢ်တဖၣ်အဖီခိၣ် လီၤဆီဒၣ်တၢ် ဖဲအဝဲသ့ၣ်တူၢ်ဘၣ် တၢ်ကီတၢ်ခဲအခါန့ၣ်လီၤ. (ဖး ၁ ယိၤဟၣ် ၃:၁၇, ၁၈ တက့ၢ်.) အဒိ, လၢညါန့ၣ် တၢ်သၣ်ဝံၤလီၤဒိအိၣ်ထီၣ်ဝဲလၢ ကီၢ်ယူဒၤအပူၤအဃိ ဒ်သိးဒီပုၢ်ဝဲၢ်သ့ၣ်တဖၣ် ကအီၣ်ဘၣ်အီဘၣ်အဂီၢ် တၢ်အိၣ်ဖှိၣ်ရဲၣ်လီၤကျဲၤလီၤဝဲ တၢ်မၤစၢၤလၢအဝဲသ့ၣ်အဂီၢ်လီၤ. (မၤတၢ် ၁၁:၂၈, ၂၉) တၢ်မၢဖိပီလူး ဒီးပ့းတရူးစ့ၢ်ကီး ဟ့ၣ်ဂံၢ်ဟ့ၣ်ဘါဝဲ ခရံာ်ဖိတဖၣ်လၢ ကသးအိၣ်တူၢ်လိာ်တမှံၤတပျီၤန့ၣ်လီၤ. (ရိမ့ၤ ၁၂:၁၃; ၁ ပ့းတရူး ၄:၉) ပမ့ၢ်ဘၣ်တူၢ်လိာ်မုာ် ပဒီပုၢ်ဝဲၢ်လၢအဟဲဟးလၢ ပအိၣ်တဖၣ်န့ၣ် ဒီပုၢ်ဝဲၢ်လၢအဘၣ်ကီဘၣ်ခဲ မ့တမ့ၢ် အဘၣ်တၢ်မၤအၢမၤနးအီၤလၢ အတၢ်နာ်အဃိတဖၣ်န့ၣ် ပကြၢးပာ်ဖျါထီၣ် တၢ်အဲၣ်တၢ်ကွံ ဒီးတၢ်ကဟုကယာ် အါန့ၢ်အန့ၣ် တမ့ၢ်ဘၣ်ဧါ.b (ကွၢ် တၢ်ဂ့ၢ်အဘျဲၣ်တက့ၢ်.)—ဖး ကတိၤဒိ ၃:၂၇ တက့ၢ်.
၇ ဖဲအပူၤကွံာ်တယံာ်ဒံးဘၣ်န့ၣ် လၢတၢ်ဒုးတၢ်ယၤဒီး တၢ်မၤအၢမၤနးအဃိ ဒီပုၢ်ဝဲၢ်လၢအကထိတဖၣ် လၢအအိၣ်လၢ ကီၢ်ယူၣ်ခြ့မုၢ်ထီၣ်တခီန့ၣ် ဘၣ်ဃ့ၢ်မှံဟးဖျိးဝဲလီၤ. လီၤသးအုးဒိၣ်မးလၢ အဝဲသ့ၣ်အကျါတနီၤန့ၣ် ဘၣ်တၢ်မၤသံအီၤလီၤ. ဒီပုၢ်ဝဲၢ်လၢတၢ်လီၢ်အဂၤတဖၣ်လၢ ကီၢ်ယူၣ်ခြ့ၣ်ဒီး ကီၢ်ရၢၡါအပူၤ တူၢ်လိာ်မုာ်ဝဲ ဒီပုၢ်ဝဲၢ်လၢ အဃ့ၢ်မှံဟးဖျိးတဖၣ်န့ၣ်လီၤ. ဒီးလၢ ထံကီၢ်ခံဘ့ၣ်အံၤအပူၤ ဒီပုၢ်ဝဲၢ်တဖၣ်န့ၣ် “တဘၣ်ဃးဘၣ်ဒီး ဟီၣ်ခိၣ်ဘၣ်” အဃိ အဝဲသ့ၣ်တမၤဘၣ်ဃးအသးဒီး ထံဂ့ၢ်ကီၢ်ဂ့ၢ်ဘၣ်. အဝဲသ့ၣ်ဆဲး စံၣ်တဲၤတဲလီၤယွၤ “အကလုၢ်အကထါ” လၢတၢ်သူၣ်ဆူၣ်သးဆူၣ်အပူၤလီၤ.—ယိၤဟၣ် ၁၅:၁၉; မၤတၢ် ၈:၄.
ဒ်သိးပှၤဘၣ်ကီဘၣ်ခဲတဖၣ် အတၢ်နာ် ကဂၢၢ်ကျၢၤအဂီၢ် မၤစၢၤအဝဲသ့ၣ်တက့ၢ်
၈, ၉. (က) ဖဲပှၤဘၣ်ကီဘၣ်ခဲတဖၣ် လဲၤတုၤလၢ ထံဂၤကီၢ်ဂၤသီသီအခါ ကွၢ်ဆၢၣ်မဲာ်ဘၣ်ဒီး တၢ်မနုၤလဲၣ်. (ခ) ဘၣ်မနုၤအဃိ ပဘၣ်မၤစၢၤအဝဲသ့ၣ်လၢ တၢ်သူၣ်စူၤသးစူၤအပူၤလဲၣ်.
၈ ပှၤဘၣ်ကီဘၣ်ခဲတနီၤနီၤန့ၣ် အဝဲသ့ၣ် ဘၣ်ဃ့ၢ်မှံဟးဖျိး လၢတၢ်လီၢ်တတီၤတီၤ လၢအနီၢ်ကစၢ် အထံလီၢ်ကီၢ်ပူၤလီၤ. ဘၣ်ဆၣ်တနီၤနီၤန့ၣ် ဘၣ်လဲၤအိၣ်တမှံၤလၢထံကီၢ်အဂၤအဃိ လၢအဝဲသ့ၣ်အဂီၢ် ကီဒိၣ်မးလီၤ. ဖဲအဝဲသ့ၣ်လဲၤအိၣ်လၢ ထံဂၤကီၢ်ဂၤအခါ ပဒိၣ်သ့ၣ်တဖၣ် ဟ့ၣ်အဝဲသ့ၣ်တၢ်မၤစၢၤတနီၤ ဒီးဒုးအီၣ်ဒုးအီအဝဲသ့ၣ်လီၤ. ဘၣ်ဆၣ် တၢ်ကီတၢ်ခဲလၢအဂၤတဖၣ် အိၣ်ဒံးဝဲလီၤ. အဒိ, တၢ်အီၣ်တၢ်အီတဖၣ်န့ၣ် တဒ်သိးဒီးတၢ်အီၣ်လၢအဝဲသ့ၣ် အီၣ်ညီနုၢ်ဝဲဘၣ်. ပှၤဘၣ်ကီဘၣ်ခဲတနီၤနီၤန့ၣ် အိၣ်ဟဲလၢထံကီၢ်လၢအကိၢ်အဃိ ဖဲအဝဲသ့ၣ်ဟဲတုၤလၢ ထံကီၢ်လၢအခုၣ်အခါ ကဘၣ်ကူဘၣ်သိးဝဲ ဒ်လဲၣ်ဒ်လဲၣ်န့ၣ် တသ့ၣ်ညါဝဲဘၣ်. တနီၤနီၤန့ၣ် ကဘၣ်မၤလိအသးလၢ ကသူဝဲတၢ်ပီးတၢ်လီ လၢအတထံၣ်ဘၣ်ဝဲ နီတဘျီတဖၣ်န့ၣ်လီၤ.
၉ ထံကီၢ်တနီၤနီၤန့ၣ် အဝဲသ့ၣ်ဒုးအိၣ်ထီၣ်ဝဲ တၢ်ရဲၣ်တၢ်ကျဲၤလၢ ကမၤစၢၤ ပှၤဘၣ်ကီဘၣ်ခဲတဖၣ် ဒ်သိးအိၣ်လၢအထံကီၢ်ပူၤ ကသ့အဂီၢ်လီၤ. ဘၣ်ဆၣ် လၢတၢ်လီၢ်အါတီၤန့ၣ် အဝဲသ့ၣ်ဒိးန့ၢ်ဘၣ် တၢ်မၤစၢၤစှၤကိးလါဝံၤအလီၢ်ခံ ကဘၣ်ဆၢထၢၣ်က့ၤလၢ အနီၢ်ကစၢ်အခီၣ်အဃိ ကဲထီၣ်တၢ်ကီတၢ်ခဲလၢ အဝဲသ့ၣ်အဂီၢ်ဒိၣ်မးလီၤ. အဒိ, အဝဲသ့ၣ် ကဘၣ်မၤလိသ့ထီၣ်အသးလၢ ပှၤဂၤအကျိာ်, တၢ်ဆဲးတၢ်လၤ, တၢ်သိၣ်တၢ်သီ, ကဘၣ်ဟ့ၣ် တၢ်အဘူးအလဲဒီး တၢ်ခိတၢ်သွဲ, ကဘၣ်ထီၣ်ကၠိ ဒီးကဘၣ်သိၣ်အဖိအလံၤန့ၣ်လီၤ. လၢတၢ်သူၣ်စူၤသးစူၤဒီး တၢ်ဒိသူၣ်ဒိသးအပူၤ နမၤစၢၤ ဒီပုၢ်ဝဲၢ်သ့ၣ်တဖၣ်အံၤ ကသ့ဧါ.—ဖံလံးပံၤ ၂:၃, ၄.
၁၀. ပှၤဘၣ်ကီဘၣ်ခဲလၢ အဟဲတုၤလၢ ပအိၣ်တၢ်လီၢ်တဖၣ် ဒ်သိးအဝဲသ့ၣ်အတၢ်နာ် ကဂၢၢ်ကျၢၤထီၣ်အဂီၢ် ပမၤစၢၤအဝဲသ့ၣ်ကသ့ဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၁၀ တဘျီတခီၣ် တၢ်ကရၢကရိတနီၤနီၤ မၤကီမၤခဲ ပဒီပုၢ်ဝဲၢ်လၢအမ့ၢ် ပှၤဘၣ်ကီဘၣ်ခဲတဖၣ် ဒ်သိးအသုတဆဲးကျိးဒီး တၢ်အိၣ်ဖှိၣ်တဂ့ၤအဂီၢ်လီၤ. ဘၣ်သ့ၣ်သ့ၣ် အဝဲသ့ၣ်ကတဲဝဲ ဒီပုၢ်ဝဲၢ်သ့ၣ်တဖၣ်လၢ သုမ့ၢ်တတူၢ်လိာ် တၢ်မၤလၢပဃုန့ၢ်သုန့ၣ် သုအိၣ်လၢထံကီၢ်အံၤအပူၤတသ့လၢၤဘၣ်. ဒီးဒီပုၢ်ဝဲၢ်သ့ၣ်တဖၣ် မ့ၢ်တူၢ်လိာ်တၢ်မၤအံၤန့ၣ် အဝဲသ့ၣ်ထီၣ် တၢ်အိၣ်ဖှိၣ်တချုးလၢၤဘၣ်. ဘၣ်ဆၣ် မ့ၢ်လၢဒီပုၢ်ဝဲၢ်တနီၤနီၤပျံၤတၢ် မ့တမ့ၢ် ဘၣ်ယိၣ်ဝဲလၢ တဒိးန့ၢ်ဘၣ်တၢ်မၤစၢၤအဃိ အဝဲသ့ၣ်တူၢ်လိာ်ဝဲ တၢ်မၤလၢ ပှၤဃုန့ၢ်အီၤတဖၣ်န့ၣ်လီၤ. လၢတၢ်န့ၣ်အဃိ ဖဲပဒီပုၢ်ဝဲၢ်လၢ အဘၣ်ကီဘၣ်ခဲတဖၣ် ဟဲတုၤလၢပအိၣ်တၢ်လီၢ်အခါ ပကဘၣ်လဲၤထံၣ်လိာ်သးဒီးအီၤလၢ အဆိအချ့လီၤ. အဝဲသ့ၣ်လိၣ်ဘၣ် ပတၢ်ကဟုကယာ်လီၤ. ပမ့ၢ်ပာ်ဖျါထီၣ် တၢ်ကဟုကယာ်န့ၣ် ကမၤစၢၤအဝဲသ့ၣ်ဒ်သိး အတၢ်နာ်ကဂၢၢ်ကျၢၤထီၣ်လီၤ.—ကတိၤဒိ ၁၂:၂၅; ၁၇:၁၇.
မၤစၢၤပှၤဘၣ်ကီဘၣ်ခဲတဖၣ်တက့ၢ်
၁၁. (က) ဖဲပှၤဘၣ်ကီဘၣ်ခဲတဖၣ် ဟဲတုၤသီသီအခါ အဝဲသ့ၣ်လိၣ်ဘၣ်ဝဲတၢ်မနုၤလဲၣ်. (ခ) ပှၤဘၣ်ကီဘၣ်ခဲတဖၣ် ပာ်ဖျါထီၣ်တၢ်စံးဘျုးစံးဖှိၣ် ကသ့ဒ်လဲၣ်.
၁၁ ဖဲအဝဲသ့ၣ်ဟဲတုၤအခါ ကလိၣ်ဘၣ်ဝဲ တၢ်အီၣ်တၢ်အီ, တၢ်ကူတၢ်သိး ဒီးတၢ်မၤစၢၤအဂၤတဖၣ်လီၤ.c (ကွၢ်တၢ်ဂ့ၢ်အဘျဲၣ်တက့ၢ်) ပမ့ၢ်ဟ့ၣ်အဝဲသ့ၣ် တၢ်ဟ့ၣ်ဆံးဆံးဖိဒၣ်လဲာ် အဝဲသ့ၣ်ကသးခုဝဲလီၤ. ပှၤဘၣ်ကီဘၣ်ခဲတဖၣ် တဘၣ်ဃ့န့ၢ်ဆူၣ်တၢ်ထီဘိဘၣ်. လၢတၢ်န့ၣ်အလီၢ် ဖဲအဝဲသ့ၣ်ဒိးန့ၢ်ဘၣ် တၢ်မၤစၢၤအခါ ကဘၣ်ပာ်ဖျါထီၣ် တၢ်စံးဘျုးစံးဖှိၣ်န့ၣ်လီၤ. အဝဲသ့ၣ်မ့ၢ်မၤဝဲဒ်န့ၣ်န့ၣ် ဒီပုၢ်ဝဲၢ်လၢအမၤစၢၤတၢ်တဖၣ် ကသူၣ်ခုသးခုစ့ၢ်ကီးလီၤ. ပှၤဘၣ်ကီဘၣ်ခဲတဖၣ်စ့ၢ်ကီး အဝဲသ့ၣ် ကဘၣ်ဂုာ်ကျဲးစၢးဆၢထၢၣ်လၢ အနီၢ်ကစၢ်အခီၣ်လီၤ. အဝဲသ့ၣ်မ့ၢ်မၤဝဲဒ်န့ၣ်န့ၣ် တဆိကမိၣ်ဆံးလီၤအသးလၢၤဘၣ် ဒီးအတၢ်ရ့လိာ်မုာ်လိာ်ဒီး ဒီပုၢ်ဝဲၢ်တဖၣ်စ့ၢ်ကီး ကဂ့ၤဝဲလီၤ. (၂ သ့းစၤလနံ ၃:၇-၁၀) ဘၣ်ဆၣ် အဝဲသ့ၣ်ကလိၣ်ဘၣ်ဒံး ပတၢ်မၤစၢၤန့ၣ်လီၤ.
ပမၤစၢၤ ပဒီပုၢ်ဝဲၢ်လၢ အမ့ၢ်ပှၤဘၣ်ကီဘၣ်ခဲတဖၣ် ကသ့ဒ်လဲၣ် (ကွၢ်လံာ်အဆၢ ၁၁-၁၃)
၁၂, ၁၃. (က) ပမၤစၢၤ ပှၤဘၣ်ကီဘၣ်ခဲတဖၣ် ကသ့ဒ်လဲၣ်. (ခ) ဟ့ၣ်အဒိတက့ၢ်.
၁၂ ဒ်သိးပကမၤစၢၤ ပှၤဘၣ်ကီဘၣ်ခဲတဖၣ်အဂီၢ် တလိၣ်လၢပစ့ကဘၣ်အိၣ်အါအါဘၣ်. အဝဲသ့ၣ်န့ၣ် လိၣ်ဘၣ်ဝဲပတၢ်အဲၣ်ဒီး ပတၢ်ကဟုကယာ်လီၤ. အဒိ, ဒ်သိးအဝဲသ့ၣ်ဒိး ဘၢး(စ်)ကါ မ့တမ့ၢ် လ့ၣ်မ့ၣ်အူ ဒီးပှ့ၤတၢ်အီၣ်တၢ်အီလၢ အပှ့ၤဘၣ်ဒီး ဂ့ၤလၢအတၢ်အိၣ်ဆူၣ်အိၣ်ချ့အဂီၢ် ပဒုးနဲၣ်အဝဲသ့ၣ်သ့ဝဲလီၤ. တကးဒံးဘၣ် ဒ်သိးအဝဲသ့ၣ် သူဝဲတၢ်ပီးတၢ်လီလၢ ကလုၢ်အီၣ်အသးသမူကသ့အဂီၢ် ပမၤစၢၤအီၤသ့ဝဲလီၤ. တၢ်လၢအရ့ဒိၣ်ကတၢၢ်တခါန့ၣ် ဒ်သိးအဝဲသ့ၣ် ကအိၣ်ဘူးဘူးတံၢ်တံၢ်ဒီးတၢ်အိၣ်ဖှိၣ်လၢ အသီတဖုအံၤဒီး ဒ်သိးအသုတတူၢ်ဘၣ်လၢ အမ့ၢ်ပှၤတမှံၤတဂ့ၤအဂီၢ် ပမၤစၢၤအီၤသ့ဝဲလီၤ. ဒီးဒ်သိးအဝဲသ့ၣ် ကလဲၤထီၣ်ဘၣ် တၢ်အိၣ်ဖှိၣ်ရိဖှိၣ်အဂီၢ် မ့ၢ်သ့န့ၣ် လဲၤကိးအီၤတက့ၢ်. တကးဒံးဘၣ် ဒ်သိးအစံၣ်တဲၤတဲလီၤတၢ်လၢ လီၢ်ကဝီၤဖဲန့ၣ်အပူၤကသ့ဂ့ၤဂ့ၤအဂီၢ် တဲနၢ်ပၢၢ်အဝဲသ့ၣ်တက့ၢ်. ဒီးဖဲနလဲၤစံၣ်တဲၤတဲလီၤတၢ်အခါ လဲၤကိးဃုာ်အဝဲသ့ၣ်တက့ၢ်.
၁၃ ဖဲပှၤဘၣ်ကီဘၣ်ခဲ သးစၢ်လွံၢ်ဂၤ ဟဲတုၤလၢတၢ်လီၢ်အသီအခါ တၢ်အိၣ်ဖှိၣ်သးပှၢ်တဖၣ် မၤစၢၤအဝဲသ့ၣ်လီၤ. တၢ်အိၣ်ဖှိၣ်သးပှၢ်တဖၣ် သိၣ်လိအဝဲသ့ၣ်လၢ ကနီကါ, ကဒိလံာ် ဒီးကဘၣ်ဃုတၢ်ဖံးတၢ်မၤ ဒ်လဲၣ်ဒ်လဲၣ်န့ၣ်လီၤ. တကးဒံးဘၣ် အဝဲသ့ၣ်မၤစၢၤဝဲဒ်သိး ပှၤသးစၢ်တဖၣ်အံၤ ကပာ်ယဟိဝၤယွၤ အတၢ်မၤလၢနီၣ်ဂံၢ်တၢန့ၣ်လီၤ. (ကလၤတံ ၆:၁၀) တယံာ်ဘၣ်ဒီး ပှၤသးစၢ်လွံၢ်ဂၤအံၤ ကဲထီၣ်ဝဲပှၤလဲၤလၢညါန့ၣ်လီၤ. မ့ၢ်လၢတၢ်အိၣ်ဖှိၣ်သးပှၢ်တဖၣ် မၤစၢၤအဝဲသ့ၣ်ဒီး အနီၢ်ကစၢ်အတၢ်ဂုာ်ကျဲးစၢးအဃိ အဝဲသ့ၣ်လဲၤထီၣ်လဲၤထီလၢ နီၢ်သးတကပၤဒီး ဟးဆှဲးမုၣ်ကီၤလံၢ် အတၢ်လ့ပစီန့ၢ်ဝဲလီၤ.
၁၄. (က) ပှၤဘၣ်ကီဘၣ်ခဲတဖၣ် ဘၣ်ဟးဆှဲးဝဲ တၢ်လ့ပစီ မနုၤတဖၣ်လဲၣ်. (ခ) ဟ့ၣ်အဒိတက့ၢ်.
၁၄ ဒ်ခရံာ်ဖိအဂၤတဖၣ်အသိး ပှၤဘၣ်ကီဘၣ်ခဲစ့ၢ်ကီး ကဘၣ်ပလီၢ်အသးဒ်သိး အသုတပာ်ဆိ တၢ်ထူးတၢ်တီၤလၢ နီၣ်ဂံၢ်တၢလၢ အတၢ်အိၣ်မူအပူၤတဂ့ၤအဂီၢ်လီၤ.d (ကွၢ်တၢ်ဂ့ၢ်အဘျဲၣ်တက့ၢ်.) ဒီပုၢ်ဝဲၢ်လံကၠံဒီး အဒီပုၢ်ဝဲၢ်မုၣ်ဒီပုၢ်ဝဲၢ်ခွါတဖၣ် သ့ၣ်နီၣ်ထီၣ်ဝဲ အပၢ်အတၢ်ကတိၤလီၤ. ဖဲအဝဲသ့ၣ်ဃ့ၢ်ဝဲအဆၢကတီၢ်န့ၣ် အပၢ်သိၣ်လိအီၤ ဘၣ်ဃးဒီး တၢ်စူၢ်တၢ်နာ်အဂ့ၢ်လီၤ. အဝဲသ့ၣ်တဲဝဲလၢ “ပပါထုးထီၣ်ကွံာ်တၢ်လၢ အရ့တဒိၣ်ဘၣ်လၢ ထၢၣ်ပူၤတခါဝံၤတခါလီၤ. ဒီးလၢခံလၢအထၢၣ်ပူၤန့ၣ် တၢ်တအိၣ်နီတမံၤလၢၤဘၣ်. အဝဲစိာ်ထီၣ်ထၢၣ် ဒီးနံၤကမှံထီၣ်ဝဲ ဒီးတဲဝဲလၢ ‘သုထံၣ်ဧါ, ပလိၣ်ဘၣ်ထဲအံၤလီၤ.’”—ဖး ၁ တံၤမသ့း ၆:၈ တက့ၢ်.
ပမၤစၢၤပှၤဘၣ်ကီဘၣ်ခဲတဖၣ် အတၢ်လိၣ်ဘၣ်လၢ အရ့ဒိၣ်ကတၢၢ်
၁၅, ၁၆. (က) ဒ်သိးပဒီပုၢ်ဝဲၢ်တဖၣ် အတၢ်စူၢ်တၢ်နာ်ကဂၢၢ်ကျၢၤထီၣ်အဂီၢ် ပမၤစၢၤအဝဲသ့ၣ်ကသ့ဒ်လဲၣ်. (ခ) ပမၤမုာ်ထီၣ် အဝဲသ့ၣ်အသး ကသ့ဒ်လဲၣ်.
၁၅ ပှၤဘၣ်ကီဘၣ်ခဲတဖၣ်န့ၣ် တလိၣ်ဘၣ်ထဲတၢ်ကူတၢ်သိး ဒီးတၢ်အီၣ်တၢ်အီဘၣ်. အဝဲသ့ၣ်လိၣ်ဘၣ် တၢ်မၤစၢၤဒ်သိး အတၢ်တူၢ်ဘၣ်ကကိညၢ်အဂီၢ်ဒီးတၢ်ဟ့ၣ်ဂံၢ်ဟ့ၣ်ဘါလၢ လံာ်စီဆှံအပူၤလီၤ. (မးသဲ ၄:၄) ဒ်သိးပှၤဘၣ်ကီဘၣ်ခဲတဖၣ် ကဒိးန့ၢ်ဘၣ်လံာ်လဲၢ်လၢ အဝဲသ့ၣ်အကျိာ်ဒီး ကဆဲးကျိးလိာ်အသးဒီး ဒီပုၢ်ဝဲၢ်လၢအတဲ အဝဲသ့ၣ်အကျိာ်တဖၣ်အဂီၢ် တၢ်အိၣ်ဖှိၣ်သးပှၢ်တဖၣ်န့ၣ် မၤစၢၤဝဲသ့လီၤ. မ့ၢ်လၢအဝဲသ့ၣ် ဘၣ်စးထီၣ်တၢ်အိၣ်မူလၢ အသီခဲလၢာ်အဃိ အဝဲသ့ၣ်လိၣ်ဘၣ်တၢ်မၤစၢၤလီၤ. အဝဲသ့ၣ်ကသးသယုၢ်ဘၣ် အဟံၣ်ဖိဃီဖိ, အတၢ်လီၢ်တၢ်ကျဲဒီး အတၢ်အိၣ်ဖှိၣ်န့ၣ်လီၤ. အဝဲသ့ၣ်ကဘၣ်တူၢ်ဘၣ် ယဟိဝၤယွၤအတၢ်အဲၣ် ဒီးအတၢ်သးကညီၤလၢ ခရံာ်ဖိတဖၣ်အအိၣ်လီၤ. အဝဲသ့ၣ်မ့ၢ်တဒိးန့ၢ်ဘၣ် တၢ်အဲၣ်ဒီးတၢ်ကဟုကယာ်လၢ ပဒီပုၢ်ဝဲၢ်သ့ၣ်တဖၣ် အအိၣ်ဘၣ်န့ၣ် ဘၣ်သ့ၣ်သ့ၣ် အဝဲသ့ၣ် ကလဲၤဃ့တၢ်မၤစၢၤလၢ ပှၤလၢတဘူၣ်ထီၣ်ဘါထီၣ် ယဟိဝၤယွၤ လၢအဟဲလၢတၢ်လီၢ်ဒ်သိးသိးဒီး အဝဲသ့ၣ်တဖၣ်အအိၣ်လီၤ. (၁ ကရံၣ်သူး ၁၅:၃၃) ပကဘၣ်မၤစၢၤအဝဲသ့ၣ်ဒ်သိး အကတူၢ်ဘၣ်လၢ ပတူၢ်လိာ်အီၤဂ့ၤဂ့ၤလီၤ. ပမ့ၢ်မၤဒ်န့ၣ်န့ၣ် မ့ၢ်ဒၣ်ပမၤသကိးတၢ်ဒီး ယဟိဝၤယွၤလၢအ “အံးက့ၤကွၢ်က့ၤပှၤတမှံၤ” န့ၣ်လီၤ.—စံးထီၣ်ပတြၢၤ ၁၄၆:၉.
၁၆ ဖဲပှၤလၢအအဲၣ်ဒိးမၤသံယ့ၣ်ၡူးတဂၤ ပၢဒံးတၢ်အဖၢမုၢ်န့ၣ် ယ့ၣ်ၡူးဒီးအမိၢ်အပၢ် က့ၤဝဲလၢအထံအကီၢ်တဘူၣ်ဘၣ်. ဒ်န့ၣ်အသိး ပှၤဘၣ်ကီဘၣ်ခဲတဖၣ်စ့ၢ်ကီး ဘၣ်သ့ၣ်သ့ၣ် အဝဲသ့ၣ်က့ၤကဒါက့ၤလၢ အတၢ်လီၢ်တၢ်ကျဲ တသ့လၢၤဘၣ်. ဒီးတနီၤနီၤန့ၣ် တအဲၣ်ဒိးက့ၤကဒါက့ၤလၢ အတၢ်လီၢ်တၢ်ကျဲလၢၤဘၣ်. လံကၠံ တဲဝဲလၢ မိၢ်ပၢ်အါဂၤ ထံၣ်ဘၣ်ဝဲလၢအဟံၣ်ဖိဃီဖိတနီၤနီၤ ဘၣ်တၢ်မၤတရီတပါအီၤ မ့တမ့ၢ် ဘၣ်တၢ်မၤသံအီၤလၢအထံလီၢ်ကီၢ်ပူၤအဃိ အဝဲသ့ၣ်တအဲၣ်ဒိး က့ၤကိးအဖိဖဲန့ၣ်လၢၤဘၣ်. လၢတၢ်န့ၣ်အဃိ ဒ်သိးပကမၤစၢၤ ပဒီပုၢ်ဝဲၢ်တဖၣ်အံၤအဂီၢ် ပကဘၣ်မ့ၢ်ပှၤလၢအ “ဒိးဃုာ်တၢ်, ပှၤအဲၣ်ဒီပုၢ်ဝဲၢ်, ပှၤသးကညီၤတၢ်, ပှၤဆီၣ်လီၤအသးန့ၣ်” လီၤ. (၁ ပ့းတရူး ၃:၈) လၢတၢ်မၤအၢမၤသီအဃိ ပှၤဘၣ်ကီဘၣ်ခဲတနီၤန့ၣ် တအဲၣ်ဒိးရ့ဒီးပှၤဂၤအါအါလၢၤဘၣ်. လီၤဆီဒၣ်တၢ် အဝဲသ့ၣ် တအဲၣ်ဒိးတဲဖျါထီၣ် အတၢ်တူၢ်ဘၣ်တဖၣ်လၢ အဖိအမဲာ်ညါဘၣ်. သံကွၢ်လီၤနသးလၢ ‘ယမ့ၢ်တူၢ်ဘၣ်တၢ်ဒ်သိး အဝဲသ့ၣ်န့ၣ် ယအဲၣ်ဒိးလၢပှၤကရ့ယၤဒ်လဲၣ်.’—မးသဲ ၇:၁၂.
ဖဲပစံၣ်တဲၤတဲလီၤတၢ်ဆူ ပှၤဘၣ်ကီဘၣ်ခဲအအိၣ်အခါ
၁၇. ပတၢ်စံၣ်တဲၤတဲလီၤန့ၣ် ကဲဘျုးလၢ ပှၤဘၣ်ကီဘၣ်ခဲတဖၣ် အဂီၢ်ဒ်လဲၣ်.
၁၇ ပှၤဘၣ်ကီဘၣ်ခဲအါဂၤ အဝဲသ့ၣ်အိၣ်ဟဲလၢ ထံကီၢ်လၢအတြီ တၢ်စံၣ်တဲၤတဲလီၤတၢ် တၢ်မၤန့ၣ်လီၤ. ဘၣ်ဆၣ် ပသးခုဒိၣ်မးလၢ ဒီပုၢ်ဝဲၢ်တဖၣ် အတၢ်သူၣ်ဆူၣ်သးဆူၣ်အဃိ ပှၤဘၣ်ကီဘၣ်ခဲလၢ အကထိတဖၣ် နၢ်ဟူဘၣ်ဝဲ “ဘီမုၢ်” တၢ်သးခုကစီၣ် အဆိကတၢၢ်တဘျီန့ၣ်လီၤ. (မးသဲ ၁၃:၁၉, ၂၃) ဖဲပှၤလၢအတၢ် “ဝံတၢ်ယိးဃၢ” တဖၣ်ဟဲထီၣ် တၢ်အိၣ်ဖှိၣ်ရိဖှိၣ်ဒီးပှၤအခါ ဘၣ်သ့ၣ်သ့ၣ် အဝဲသ့ၣ်တူၢ်ဘၣ်ဝဲလၢ အတၢ်ဝံတၢ်ယိးဖှံလီၤ ဒီးအသးမုာ်ထီၣ်ဝဲ ဒီးစံးဝဲလၢ– “ယွၤအိၣ်လၢသုကျါ နီၢ်နီၢ်လီၤ.”—မးသဲ ၁၁:၂၈-၃၀; ၁ ကရံၣ်သူး ၁၄:၂၅.
၁၈, ၁၉. ဖဲပစံၣ်တဲၤတဲလီၤ ပှၤဘၣ်ကီဘၣ်ခဲအခါ ပကဘၣ်အိၣ်ဒီးတၢ်ကူၣ်သ့ဒ်လဲၣ်.
၁၈ ဖဲပလဲၤစံၣ်တဲၤတဲလီၤတၢ်လၢ ပှၤဘၣ်ကီဘၣ်ခဲတဖၣ်အအိၣ်အခါ ပကဘၣ်အိၣ်ဒီး ‘တၢ်ကူၣ်သ့’ လီၤ. (မးသဲ ၁၀:၁၆; ကတိၤဒိ ၂၂:၃) ဖဲပှၤဘၣ်ကီဘၣ်ခဲတဖၣ် ကတိၤတၢ်အခါ ဒိကနၣ်န့ၢ်အဝဲသ့ၣ်လၢ တၢ်သးစူၤအပူၤတက့ၢ်. ဘၣ်ဆၣ် တဘၣ်တဲသကိး ထံဂ့ၢ်ကီၢ်ဂ့ၢ်တဂ့ၤ. ဒ်သိးတၢ်ဘၣ်ယိၣ်သုတကဲထီၣ်လၢ ပဂီၢ်ဒီးအဝဲသ့ၣ်အဂီၢ်တဂ့ၤအဂီၢ် ပကြၢးမၤပိာ်ထွဲဒ် ဝဲၤတြၢ်ဒီးပဒိၣ်တဖၣ် အတၢ်ဟံးစုနဲၣ်ကျဲအသိးန့ၣ်လီၤ. မ့ၢ်လၢအဝဲသ့ၣ် အလုၢ်အလၢ်ဒီး အတၢ်ထံၣ်တဒ်သိးဒီးပှၤအဃိ ပကြၢးဃုသ့ၣ်ညါဒီး ပာ်ကဲအဝဲသ့ၣ် အတၢ်တူၢ်ဘၣ်ဒီး အတၢ်ထံၣ်တဖၣ်လီၤ. အဒိ, ပှၤလၢအိၣ်ဟဲလၢထံကီၢ် အဂၤတနီၤနီၤန့ၣ် အဝဲသ့ၣ်ထံၣ်ဝဲလၢ ပိာ်မုၣ်သ့ၣ်တဖၣ်န့ၣ် ကဘၣ်ကူကၤဝဲ ဘံၣ်ဘံၣ်ဘၢဘၢလီၤ. လၢတၢ်န့ၣ်အဃိ ဖဲပလဲၤစံၣ်တဲၤတဲလီၤတၢ်လၢ အဝဲသ့ၣ်အအိၣ်အခါ ပတကြၢးကူကၤ တၢ်ကူတၢ်ကၤလၢ အမၤတံာ်တာ်အဝဲသ့ၣ်အသးန့ၣ်ဘၣ်.
၁၉ ပှၤလၢတမ့ၢ်ယဟိဝၤပှၤအုၣ်အသးလၢ အတူၢ်ဘၣ်တၢ်နးတၢ်ဖှီၣ်တဖၣ်စ့ၢ်ကီး ပအဲၣ်ဒိးမၤစၢၤအဝဲသ့ၣ်လီၤ. ပမ့ၢ်မၤဒ်န့ၣ်န့ၣ် မ့ၢ်ဒၣ်ပကွၢ်လိမၤဒိး ပှၤၡၤမရံဖိတဂၤလၢ ယ့ၣ်ၡူးအတၢ်ကတိၤဒိအပူၤန့ၣ်လီၤ. (လူၤကၣ် ၁၀:၃၃-၃၇) ကျဲအဂ့ၤကတၢၢ်တဘိလၢ ပကမၤစၢၤပှၤဂၤန့ၣ် မ့ၢ်ပတဲဘၣ်အဝဲသ့ၣ်လၢ ဘီမုၢ်တၢ်သးခုကစီၣ်န့ၣ်လီၤ. တၢ်အိၣ်ဖှိၣ်သးပှၢ်တဂၤလၢ အမၤစၢၤဘၣ် ပှၤဘၣ်ကီဘၣ်ခဲအါမးန့ၣ် တဲဝဲလၢ ပကဘၣ်တဲဘၣ်အဝဲသ့ၣ်လၢ ပမ့ၢ်ယဟိဝၤပှၤအုၣ်အသးလီၤ. အဆိကတၢၢ် ပကြၢးဒုးသ့ၣ်ညါအဝဲသ့ၣ်လၢ ပတၢ်တိာ်ပာ်အခိၣ်သ့ၣ်န့ၣ်တမ့ၢ်လၢ ပကမၤစၢၤအဝဲသ့ၣ်လၢ နီၢ်ခိတကပၤဘၣ်. လၢတၢ်န့ၣ်အလီၢ် ပတၢ်တိာ်ပာ်အခိၣ်သ့ၣ်န့ၣ် မ့ၢ်ဝဲ ဒ်သိးပကမၤစၢၤအဝဲသ့ၣ်လၢ ကသ့ၣ်ညါထီၣ် တၢ်မုၢ်လၢ်လၢလံာ်စီဆှံအပူၤန့ၣ်လီၤ.
နကဒိးန့ၢ်ဘၣ်တၢ်သးခု
၂၀, ၂၁. (က) ပမ့ၢ်ပာ်ဖျါထီၣ် တၢ်အဲၣ်တၢ်ကွံလၢ ပှၤဘၣ်ကီဘၣ်ခဲတဖၣ်အဖီခိၣ်န့ၣ် ပကဒိးန့ၢ်ဘၣ်အဘျုးဒ်လဲၣ်. (ခ) တၢ်မၤလိလၢခံတခါန့ၣ် ပကမၤလိဘၣ်တၢ်ဂ့ၢ်မနုၤလဲၣ်.
၂၀ ပမ့ၢ်ပာ်ဖျါထီၣ် တၢ်အဲၣ်လၢ “ပှၤတမှံၤ” တဖၣ်အဖီခိၣ်န့ၣ် ပကဒိးန့ၢ်ဘၣ်တၢ်သးခုလီၤ. ဒီပုၢ်ဝဲၢ်မုၣ်တဂၤ တဲဖျါထီၣ်ဝဲလၢ ဖဲအဝဲအိၣ်လၢ ကီၢ်အဲရံးထြံးအၣ်အခါ မ့ၢ်လၢတၢ်မၤအၢမၤသီအဃိ ဘၣ်ဃ့ၢ်မုၢ်ဟးဖျိးဝဲလီၤ. အဖိလွံၢ်ဂၤ ဘၣ်လဲၤဃ့ၢ်ဝဲလၢ ကီၢ်စူၤဒၤဒီး ဘၣ်ခီဂာ်ဝဲမဲးမုၢ်ခိၣ် ယံာ်ဝဲဃိးသီညါ. ဒီးဖဲအဝဲသ့ၣ်လဲၤတုၤလၢ ကီၢ်စူၤဒၤအခါ လီၤဘှံးလီၤတီၤဝဲဒိၣ်မးလီၤ. အဝဲစံးဝဲလၢ “ဒီပုၢ်ဝဲၢ်သ့ၣ်တဖၣ် ကဟုကယာ်အဝဲသ့ၣ် ဒ်အဘူးအတံၢ်တဖၣ်အသိးလီၤ. အဝဲသ့ၣ်ဒုးအီၣ်ဒုးအီပှၤ, ဟ့ၣ်ပှၤတၢ်ကူတၢ်သိး, ရဲၣ်ကျဲၤန့ၢ်ပှၤ တၢ်အိၣ်တၢ်ဆိးအလီၢ် ဒီးဒ်သိးပဟးထီၣ်ဟးလီၤ ကသ့အဂီၢ်လီၤ. ပှၤလၢကတူၢ်လိာ် ပှၤတမှံၤလၢအဟံၣ်ပူၤဒ်အံၤ မ့ၢ်လၢအတၢ်ဘူၣ်တၢ်ဘါ ဒ်သိးသိးအဃိန့ၣ် နဃုထံၣ်န့ၢ်အီၤကသ့ဖဲလဲၣ်. ပဃုထံၣ်န့ၢ်အီၤသ့ထဲလၢ ယဟိဝၤယွၤပှၤအုၣ်အသးအကျါလီၤ.”—ဖး ယိၤဟၣ် ၁၃:၃၅ တက့ၢ်.
၂၁ မ့မ့ၢ် ဖိလၢအဟဲပိာ် အမိၢ်အပၢ်အခံတဖၣ် တခီမီၤ. ဒ်သိးအဝဲသ့ၣ် မၤယဟိဝၤယွၤအတၢ်မၤလၢ တၢ်သူၣ်ခုသးခုအပူၤကန့ၢ်အဂီၢ် ပမၤစၢၤအဝဲသ့ၣ် ကသ့ဒ်လဲၣ်န့ၣ် ပကမၤလိဘၣ်လၢ တၢ်မၤလိလၢခံတခါန့ၣ်လီၤ.
a လၢတၢ်မၤလိအံၤအပူၤ တၢ်ကတိၤလၢအမ့ၢ် “ပှၤဘၣ်ကီဘၣ်ခဲ” န့ၣ်အဲၣ်ဒိးတဲဝဲပှၤလၢ အဘၣ်ဃ့ၢ်မှံဟးဖျိးလၢ တၢ်ဒုးတၢ်ယၤ, တၢ်မၤအၢမၤသီ, န့ဆၢၣ်တၢ်ဘၣ်ဒိဘၣ်ထံးအဃိလီၤ. အဝဲသ့ၣ်ဘၣ်လဲၤအိၣ်ဝဲလၢ ထံကီၢ်အဂၤ မ့တမ့ၢ် တၢ်လီၢ်အဂၤတတီၤတီၤလၢ အထံလီၢ်ကီၢ်ပူၤန့ၣ်လီၤ. UNHCR (ဘီမုၢ်စၢဖှိၣ်ကရၢလၢ ပှၤဘၣ်ကီဘၣ်ခဲဖိအဂီၢ်) စံးဝဲလၢပှၤ ၁၁၃ ဂၤအကျါတဂၤန့ၣ် ဘၣ်ဃ့ၢ်မှံဟးဖျိးဝဲလီၤ.
b ကွၢ်တၢ်ဂ့ၢ်လၢ “တၢ်အဲၣ်တမှံၤန့ၣ် သးပ့ၤနီၣ်တဂ့ၤ” လၢ တၢးထီခိးတၢ် လါအီးကထိဘၢၣ် ၂၀၁၆, လံာ်ကဘျံးပၤ ၃-၈ အပူၤန့ၣ်တက့ၢ်.
c ဖဲပှၤဘၣ်ကီဘၣ်ခဲတဖၣ် ဟဲတုၤအခါ တၢ်အိၣ်ဖှိၣ်သးပှၢ်တဖၣ် ကြၢးမၤပိာ်ထွဲဝဲဒ် တၢ်ဟံးစုနဲၣ်ကျဲလၢ Organized to Do Jehovah’s Will, chapter 8, paragraph 30 အပူၤအသိး လၢအဆိအချ့လီၤ. ဒ်သိးကဆဲးကျိးဒီး တၢ်အိၣ်ဖှိၣ်လၢ အဝဲသ့ၣ်အိၣ်ဟဲတၢ်လီၢ်အဂီၢ် တၢ်အိၣ်ဖှိၣ်သးပှၢ်တဖၣ် သူဝဲ jw.org ဒ်သိးကကွဲးလံာ်လၢ အနီၢ်ကစၢ် အဝဲၤတြၢ်အအိၣ်သ့ဝဲလီၤ. လၢတၢ်ဘၢၣ်စၢၤအကတီၢ်န့ၣ် အဝဲသ့ၣ် သံကွၢ်ဝဲ ပှၤဘၣ်ကီဘၣ်ခဲတဖၣ် ဘၣ်ဃးဒီးအဝဲသ့ၣ် အတၢ်အိၣ်ဖှိၣ်ဒီး အဂ့ၢ်အကျိၤသ့ဝဲစ့ၢ်ကီးလီၤ.
d ကွၢ်တၢ်ဂ့ၢ်လၢ “No One Can Serve Two Masters” and “Be of Good Courage—Jehovah Is Your Helper!” in The Watchtower of April 15, 2014, pages 17-26 တက့ၢ်.