ဆဲးပာ်ဖျါထီၣ်တၢ်အဲၣ်လၢ အဟ့ၣ်ဂံၢ်ဟ့ၣ်ဘါပှၤဂၤ
“တၢ်အဲၣ်တၢ်ကွံန့ၣ် မၤထီၣ်မၤထီတၢ်လီၤ.”—၁ ကရံၣ်သူး ၈:၁.
၁. ဖဲယ့ၣ်ၡူးအိၣ်ဒီး အတၢ်မၢဖိအလီၢ်ခံကတၢၢ်တနၤန့ၣ် အဝဲတဲသကိးဝဲ တၢ်ဂ့ၢ်လၢအရ့ဒိၣ်မနုၤလဲၣ်.
တချုးလၢယ့ၣ်ၡူးသံဒံးဘၣ် ဖဲအဝဲအိၣ်ဒီးအတၢ်မၢဖိတဖၣ် အလီၢ်ခံကတၢၢ်တနၤန့ၣ် အဝဲတဲဖျါထီၣ်တၢ်အဲၣ်အဂ့ၢ် ကအိၣ်ဝဲအဘျီ ၃၀ ဃၣ်ဃၣ်ညါလီၤ. အဝဲတဲဘၣ်အတၢ်မၢဖိတဖၣ်လၢ အဝဲသ့ၣ်ကြၢး ‘အဲၣ်လိာ်ကွံလိာ်အသးသကိးသကိး’ လီၤ. (ယိၤဟၣ် ၁၅:၁၂, ၁၇) အဝဲသ့ၣ်မ့ၢ်အဲၣ်လိာ်အသးန့ၣ် ပှၤဂၤတဖၣ်ကပာ်သူၣ်ပာ်သးဝဲဒီး ကသ့ၣ်ညါဝဲလၢ အဝဲသ့ၣ်မ့ၢ် ခရံာ်အပျဲၢ်အဘီၣ်နီၢ်နီၢ်လီၤ. (ယိၤဟၣ် ၁၃:၃၄, ၃၅) တၢ်အဲၣ်လၢယ့ၣ်ၡူးတဲဝဲန့ၣ် တမ့ၢ်ထဲ သးအတၢ်တူၢ်ဘၣ်ဘၣ်. မ့ၢ်ဝဲတၢ်အဲၣ်လၢအသဟီၣ်ဆူၣ် ဒီးသးအိၣ်ဟ့ၣ်လီၤအသးလၢ ပှၤဂၤအဂီၢ်နီၢ်နီၢ်လီၤ. ယ့ၣ်ၡူးတဲဝဲလၢ “ပှၤမ့ၢ်ပာ်လီၤကွံာ်အသးသမူလၢ အတံၤအသကိးအဂီၢ်ဒီး, ပှၤတအိၣ်ဘၣ်ဒီးတၢ်အဲၣ်တၢ်ကွံ ဒိၣ်န့ၢ်အဝဲန့ၣ်နီတဂၤဘၣ်. ဖဲဒၣ်ယမၤလိာ်သုတဖၣ်န့ၣ်, သုမ့ၢ်မၤဒီး, သုမ့ၢ်ယတံၤယသကိးလီၤ.”—ယိၤဟၣ် ၁၅:၁၃, ၁၄.
၂. (က) ကစၢ်ယွၤအပှၤဂီၢ်မုၢ်တဖၣ် ဘၣ်တၢ်သ့ၣ်ညါအီၤလၢ အမ့ၢ်ပှၤဒ်လဲၣ်. (ခ) လၢတၢ်မၤလိတခါအံၤအပူၤ ပကတဲသကိး တၢ်သံကွၢ်မနုၤတဖၣ်လဲၣ်.
၂ ယဟိဝၤယွၤအပှၤဂီၢ်မုၢ်တဖၣ်လၢ မုၢ်မဆါတနံၤအံၤန့ၣ် ဘၣ်တၢ်သ့ၣ်ညါအီၤ ဒ်အမ့ၢ်ပှၤလၢ အအဲၣ်လိာ်အသးနီၢ်နီၢ်, သးအိၣ်ဟ့ၣ်လီၤအသး ဒီးအိၣ်ဒီးတၢ်ဃူတၢ်ဖိးနီၢ်ကီၢ်လီၤ. (၁ ယိၤဟၣ် ၃:၁၀, ၁၁) ယဟိဝၤယွၤအပှၤဂီၢ်မုၢ် လၢဟီၣ်ခိၣ်ဒီဘ့ၣ်န့ၣ် အဝဲသ့ၣ်ကလုာ်ဒူၣ်, အိၣ်တၢ်လီၢ်, အတၢ်ကတိၤ ဒီးဒိၣ်ထီၣ်ဘၣ်လၢ တၢ်အိၣ်သးတဒ်သိးလိာ်အသးသနာ်က့ အဝဲသ့ၣ်အဲၣ်လိာ်အသး တဂၤဒီးတဂၤလီၤ. ဆၢကတီၢ်ခဲအံၤ ဘၣ်မနုၤအဃိ တၢ်အဲၣ်တၢ်ကွံန့ၣ် မ့ၢ်တၢ်လၢအရ့ဒိၣ်လဲၣ်. ယဟိဝၤယွၤဒီးယ့ၣ်ၡူး ဟ့ၣ်ဂံၢ်ဟ့ၣ်ဘါပှၤလၢ တၢ်အဲၣ်တၢ်ကွံအပူၤဒ်လဲၣ်. ပဝဲသ့ၣ်တဖၣ်စ့ၢ်ကီး ပဟ့ၣ်ဂံၢ်ဟ့ၣ်ဘါဒီး မၤမုာ်ထီၣ်ပှၤဂၤလၢ တၢ်အဲၣ်တၢ်ကွံအပူၤ ကသ့ဒ်လဲၣ်.—၁ ကရံၣ်သူး ၈:၁.
ဆၢကတီၢ်ခဲအံၤ ဘၣ်မနုၤအဃိ တၢ်အဲၣ်တၢ်ကွံန့ၣ် မ့ၢ်တၢ်လၢအရ့ဒိၣ်လဲၣ်
၃. ‘ဆၢကတီၢ်လၢ အကီအခဲ’ အံၤအဃိ ပှၤဟီၣ်ခိၣ်ဖိတဖၣ် တူၢ်ဘၣ်တၢ်မနုၤလဲၣ်.
၃ ပအိၣ်မူဘၣ်လၢ ‘ဆၢကတီၢ်လၢ အကီအခဲ’ ဒီးပှၤအါဂၤ အတၢ်အိၣ်မူပှဲၤဝဲဒီး “တၢ်ကိၢ်တၢ်ဂီၤ, ဒီးတၢ်နးတၢ်ဖှီၣ်လီၤ.” (၂ တံၤမသ့း ၃:၁-၅; စံးထီၣ်ပတြၢၤ ၉၀:၁၀) ပှၤအါဂၤတူၢ်ဘၣ်တၢ်ကီတၢ်ခဲနးမးအဃိ တအဲၣ်ဒိးအိၣ်မူလၢၤဘၣ်. တနံၣ်ဘၣ်တနံၣ်န့ၣ် ပှၤလၢအမၤသံလီၤအနီၢ်ကစၢ်အသး အိၣ် ဝဲ ၈၀၀,၀၀၀ ဘျဲၣ်ညါလီၤ. ဒီးလၢစဲးကိာ် ၄၀ အတီၢ်ပူၤ ပှၤမၤသံလီၤနီၢ်ကစၢ်အသးအိၣ် ဝဲတဂၤလီၤ. လီၤသးအုးဒိၣ်မးလၢ ပဒီပုၢ်ဝဲၢ်တနီၤ တူၢ်ဘၣ်တၢ်ဒ်အံၤအဃိ မၤသံလီၤအသးလီၤ.
၄. လၢပျၢၤ ယွၤအခ့အပှၤတနီၤ လၢအတူၢ်ဘၣ်ဝဲလၢ အအဲၣ်ဒိးသံန့ၣ် မ့ၢ်မတၤသ့ၣ်တဖၣ်လဲၣ်.
၄ လၢပျၢၤ ယွၤအခ့အပှၤလၢအသးတီတနီၤ တူၢ်ဘၣ်ဝဲတၢ်ကီတၢ်ခဲအါမးအဃိ အဝဲသ့ၣ်တအဲၣ်ဒိးအိၣ်မူလၢၤဘၣ်. အဒိ စီၤယိၤဘး တူၢ်ဘၣ်တၢ်ကီတၢ်ခဲနးမးတုၤဒၣ်လဲာ် အဝဲတဲဝဲလၢ “ယသးဘၣ်အၢယသးသမူ, ယမူလီၤထူလီၤယိာ်န့ၣ် ယသးတအိၣ်ဘၣ်.” (ယိၤဘး ၇:၁၆; ၁၄:၁၃) စီၤယိၤနါစ့ၢ်ကီး အသူၣ်ဟးဂီၤသးဟးဂီၤဒိၣ်မးအဃိ အဝဲတဲဝဲလၢ “ခဲကနံၣ်အံၤ ယွၤဧၢ, ဟံးန့ၢ်ယသးသမူလၢယၤတက့ၢ်. အဂ့ၢ်ဒ်အံၤ, ယသံဂ့ၤန့ၢ်ယမူတက့ၢ်လီၤ.” (ယိၤနါ ၄:၃) မ့မ့ၢ်ဝံအ့ၤလံယၤန့ၣ် ဖဲအတူၢ်ဘၣ်ဝဲလၢ အတၢ်မုၢ်လၢ်တအိၣ်လၢၤဘၣ်အခါ အဝဲတဲဝဲလၢ “အါလံ. ခဲကနံၣ်အံၤ, ယွၤဧၢ, ဟံးထီၣ်ယသးတက့ၢ်.” (၁ စီၤပၤ ၁၉:၄) ဘၣ်ဆၣ်ယဟိဝၤယွၤ အဲၣ်အဝဲသ့ၣ်ဒီး အဲၣ်ဒိးလၢအဝဲသ့ၣ် ကဆဲးအိၣ်မူဒံးလီၤ. အဝဲသ့ၣ်တူၢ်ဘၣ်ဝဲဒ်န့ၣ်န့ၣ် ယဟိဝၤယွၤ တပာ်တၢ်ကမၣ်လၢအလိၤဘၣ်. လၢတၢ်န့ၣ်အလီၢ် ကစၢ်ယွၤမၤစၢၤအဝဲသ့ၣ် ဒ်သိးကအဲၣ်ဒိးဆဲးအိၣ်မူ ဒီးဆဲးမၤယွၤအတၢ်မၤ လၢတၢ်သးတီအပူၤ ကသ့အဂီၢ်လီၤ.
၅. ဆၢကတီၢ်ခဲအံၤ ဘၣ်မနုၤအဃိ ပဒီပုၢ်ဝဲၢ်မုၣ်ခွါသ့ၣ်တဖၣ် လိၣ်ဘၣ်ဝဲ ပတၢ်အဲၣ်သပှၢ်ကတၢၢ်လဲၣ်.
၅ ဆၢကတီၢ်ခဲအံၤ ပဒီပုၢ်ဝဲၢ်မုၣ်ခွါသ့ၣ်တဖၣ် ထံၣ်ဘၣ်ဒီးတၢ်သူၣ်ကိၢ်သးဂီၤတဖၣ်အဃိ အဝဲသ့ၣ်လိၣ်ဘၣ်ပတၢ်အဲၣ်လီၤ. အဝဲသ့ၣ်တနီၤန့ၣ် ဘၣ်တၢ်ဒုၣ်ဒွဲၣ်အီၤ မ့တမ့ၢ် ဘၣ်တၢ်မၤအၢမၤသီအီၤလီၤ. ဒီးတနီၤန့ၣ် ပှၤမၤနၢၤအီၣ်အီၤ ဒီးတဲဟးဂီၤအဂ့ၢ်လၢ တၢ်မၤလီၢ်လီၤ. ဒီးအဂၤတနီၤန့ၣ် မ့ၢ်လၢအဘၣ်မၤတၢ်မၤ နၣ်ရံၣ်အါမးအဃိ လီၤဘှံးလီၤတီၤဝဲလီၤ. ဒီးမ့မ့ၢ်အဂၤတနီၤန့ၣ် အိၣ်ဒီးဟံၣ်ဖိဃီဖိတၢ်ကီတၢ်ခဲတဖၣ်လီၤ. ဘၣ်သ့ၣ်သ့ၣ် အဝဲသ့ၣ်ကဆီဟံၣ်ဆီဃီဒီး ပှၤလၢအတဘူၣ်ထီၣ်ဘါထီၣ် ယဟိဝၤယွၤ အဃိအသးသမူတံၤသကိးတဖၣ်န့ၣ် ဒုၣ်ဒွဲၣ်စံးအၢအီၤလီၤ. ခီဖျိလၢ တၢ်ဂ့ၢ်တဖၣ်အံၤဒီး တၢ်ဆီၣ်သနံးလၢ အဂၤတဖၣ်အဃိ ပှၤအါဂၤအသူၣ်လီၤဘှံးသးလီၤဘှံးဒီး စးထီၣ်သးဒ့ဒီလၢ အတၢ်အိၣ်မူန့ၣ် မ့ၢ်အဘျုးအိၣ်ဒံးဧါန့ၣ်လီၤ. မတၤမၤစၢၤ အဝဲသ့ၣ်သ့လဲၣ်.
ယဟိဝၤယွၤအတၢ်အဲၣ် ဟ့ၣ်ပှၤတၢ်ဂံၢ်တၢ်ဘါ
၆. ယဟိဝၤယွၤအတၢ်အဲၣ်န့ၣ် ကဲထီၣ်တၢ်ဂံၢ်တၢ်ဘါလၢ အခ့အပှၤတဖၣ်အဂီၢ်ဒ်လဲၣ်.
၆ ယဟိဝၤယွၤအၢၣ်လီၤဝဲလၢ အဝဲကအဲၣ်အခ့အပှၤတဖၣ် ထီဘိလီၤ. ယဟိဝၤယွၤတဲ ပှၤအံၣ်စရ့လးဖိတဖၣ်လၢ “နမ့ၢ်တၢ်လုၢ်ဒိၣ်ပှ့ၤဒိၣ်လၢယမဲာ်ညါ, ဒီးနဘၣ်တၢ်လၤကပီၤ, ဒီးယအဲၣ်နၤ” ဒီး “ပျံၤတၢ်တဂ့ၤ, အဂ့ၢ်ဒ်အံၤ, ယအိၣ်ဒီးနၤလီၤ.” (ယၡါယၤ ၄၃:၄, ၅) ဖဲန့ၣ်အခါ အဝဲသ့ၣ် ကတူၢ်ဘၣ်ဝဲဒ်လဲၣ်န့ၣ် ဆိကမိၣ်ကွၢ်တက့ၢ်. ပသ့ၣ်ညါလၢ ပဝဲတဂၤစုာ်စုာ်စ့ၢ်ကီး ပမ့ၢ်တၢ်လုၢ်ဒိၣ်ပှ့ၤဒိၣ်လၢ ယဟိဝၤယွၤအဂီၢ်လီၤ.a (ကွၢ်တၢ်ဂ့ၢ်အဘျဲၣ်တက့ၢ်.) လံာ်စီဆှံအၢၣ်လီၤဝဲလၢ ယဟိဝၤယွၤမ့ၢ် ‘တၢ်အဆူၣ်လၢ အကအုၣ်က့ၤခီၣ်က့ၤတၢ်လီၤ. ကသူၣ်ဖှံသးညီလၢ ပဖီခိၣ်အိၣ်ဒီးအသူၣ်ခုသးခုလီၤ.’—စဖါနယၤ ၃:၁၆, ၁၇.
၇. ယဟိဝၤအတၢ်အဲၣ်န့ၣ် လီၤဂာ်ဒီးမိၢ်အတၢ်အဲၣ်ဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၇ ယဟိဝၤယွၤ အၢၣ်လီၤအခ့အပှၤတဖၣ်လၢ အဝဲသ့ၣ်မ့ၢ်ထံၣ်ဘၣ်တၢ်ကီတၢ်ခဲ ဒ်လဲၣ်ဂ့ၤဒ်လဲၣ်ဂ့ၤ အဝဲကဟ့ၣ်ဂံၢ်ဟ့ၣ်ဘါဒီး ကမၤမုာ်ထီၣ်အဝဲသ့ၣ်လီၤ. ကစၢ်ယွၤတဲဝဲလၢ “တၢ်ကစိာ်သုလၢအကပၤလိၤ, ဒီးတၢ်ကသယဲးသုလၢ အကံၣ်လူၢ်ခိၣ်လီၤ. ဒ်ပှၤလၢ အမိၢ်မၤမုာ်ထီၣ်က့ၤအီၤအသိးန့ၣ်, ယဲဒၣ်အံၤ ယကမၤမုာ်ထီၣ်က့ၤသုဒ်န့ၣ်သိး” လီၤ. (ယၡါယၤ ၆၆:၁၂, ၁၃) ပှၤဖိသၣ်တဂၤ ဖဲအမိၢ်စိာ်အီၤ မ့တမ့ၢ် လိာ်ကွဲဒီးအီၤအခါ အကတူၢ်ဘၣ်ဝဲလၢ အမိၢ်ကဟုကယာ်အီၤဂ့ၤဂ့ၤလီၤ. ဒ်န့ၣ်အသိး ယဟိဝၤယွၤအဲၣ်နၤဒိၣ်မးဒီး အဲၣ်ဒိးဝဲလၢနကအိၣ်ဘၣ် ဘံၣ်ဘံၣ်ဘၢဘၢလီၤ. နမ့ၢ်ပှၤတဂၤလၢ အလုၢ်ဒိၣ်ပှ့ၤဒိၣ်လၢယဟိဝၤယွၤအဂီၢ်န့ၣ် တဘၣ်သးဒ့ဒီ နီတဘျီတဂ့ၤ.—ယံးရမံယၤ ၃၁:၃.
၈, ၉. ယ့ၣ်ၡူးအတၢ်အဲၣ်န့ၣ် ဟ့ၣ်ပှၤတၢ်ဂံၢ်တၢ်ဘါဒ်လဲၣ်.
၈ တၢ်ဂ့ၢ်အဂၤတခါလၢ ပသ့ၣ်ညါလၢယဟိဝၤယွၤအဲၣ်ပှၤန့ၣ် ပထံၣ်ဘၣ်အီၤဖဲ ယိၤဟၣ် ၃:၁၆ အပူၤလီၤ. ဖဲန့ၣ်တဲဝဲလၢ “ယွၤအဲၣ်ဟီၣ်ခိၣ်ဖိ တုၤအဟ့ၣ်လီၤကွံာ် အဖိခွါအိၣ်တဂၤဃီ, ဒ်သိးကယဲၢ်ပှၤလၢ အစူၢ်က့ၤနာ်က့ၤအီၤတဂၤလၢ်လၢ်န့ၣ်, အသုတဟးဂီၤတဂ့ၤဒီး, ကန့ၢ်ဘၣ်တၢ်မူအထူအယိာ်လီၤ.” ယ့ၣ်ၡူးအတၢ်ဟ့ၣ်လုၢ်ထီၣ်သးန့ၣ် ပာ်ဖျါထီၣ်ဝဲလၢ အဝဲစ့ၢ်ကီးအဲၣ်ပှၤအဃိ ကဲထီၣ်တၢ်ဂံၢ်တၢ်ဘါလၢပဂီၢ်လီၤ. လံာ်စီဆှံတဲဝဲလၢ “တၢ်နးတၢ်ဖှီၣ်, တၢ်ကိၢ်တၢ်ဂီၤ” ဒၣ်လဲာ်န့ၣ် “မၤလီၤဖးပှၤဒီး ယွၤအတၢ်အဲၣ်တၢ်ကွံလၢ အအိၣ်လၢပကစၢ်ယ့ၣ်ၡူးခရံာ်အပူၤ, တသ့ဘၣ်လီၤ.”—ရိမ့ၤ ၈:၃၅, ၃၈, ၃၉.
၉ တဘျီတခီၣ် တၢ်ကီတၢ်ခဲတဖၣ် မၤလီၤစၢ်ပနီၢ်ခိ ဒီးပသးအဂံၢ်အဘါ မ့တမ့ၢ် မၤလီၤမၢ်ပတၢ်သူၣ်ခုသးခုလၢ ယဟိဝၤယွၤအတၢ်မၤအပူၤသ့ဝဲလီၤ. ဘၣ်ဆၣ် ပမ့ၢ်ဆိၣ်ကမိၣ်ထံက့ၤ ခရံာ်အတၢ်အဲၣ်န့ၣ် ကဟ့ၣ်ပှၤတၢ်ဂံၢ်တၢ်ဘါလၢ ပကအိၣ်ဒီးတၢ်တူၢ်န့ၢ်ခီၣ်ကဲအဂီၢ်လီၤ. (ဖး ၂ ကရံၣ်သူး ၅:၁၄, ၁၅ တက့ၢ်.) ယ့ၣ်ၡူးအတၢ်အဲၣ် ကမၤစၢၤပှၤဒ်သိး ပကအဲၣ်ဒိးဆဲးအိၣ်မူဒီး မၤယဟိဝၤယွၤအတၢ်မၤလီၤ. ဒီးဖဲပထံၣ်ဘၣ်ဒီး န့ဆၢၣ်တၢ်ဘၣ်ဒိဘၣ်ထံး, တၢ်မၤအၢမၤနး, တၢ်သူၣ်ဟးဂီၤသးဟးဂီၤ မ့တမ့ၢ် တၢ်ကိၢ်တၢ်ဂီၤအခါဒၣ်လဲာ် ယ့ၣ်ၡူးအတၢ်အဲၣ်ကမၤစၢၤပှၤဒ်သိး ပကအဲၣ်ဒိးဆဲးအိၣ်မူအဂီၢ်လီၤ.
ပဒီပုၢ်ဝဲၢ်တဖၣ် လိၣ်ဘၣ်ပတၢ်အဲၣ်
ပမ့ၢ်မၤလိ ယ့ၣ်ၡူးအဂ့ၢ်န့ၣ် ကထိၣ်ဟူးထိၣ်ဂဲၤထီၣ်ပှၤလၢ ပကဟ့ၣ်ဂံၢ်ဟ့ၣ်ဘါပှၤဂၤလၢ တၢ်အဲၣ်တၢ်ကွံအပူၤ (ကွၢ်လံာ်အဆၢ ၁၀, ၁၁)
၁၀, ၁၁. မတၤတဖၣ်အိၣ်ဒီးမူဒါလၢ ကဟ့ၣ်ဂံၢ်ဟ့ၣ်ဘါ ပဒီပုၢ်ဝဲၢ်လၢ အသးအဂံၢ်အဘါလီၤစၢ်သ့ၣ်တဖၣ်လဲၣ်, တဲပၠးတက့ၢ်.
၁၀ ယဟိဝၤယွၤသူဝဲ ဒီပုၢ်ဝဲၢ်မုၣ်ဒီပုၢ်ဝဲၢ်ခွါတဖၣ်လၢတၢ်အိၣ်ဖှိၣ်ပူၤ ဒ်သိးကဟ့ၣ်ဂံၢ်ဟ့ၣ်ဘါပှၤလၢ တၢ်အဲၣ်တၢ်ကွံအပူၤစ့ၢ်ကီးလီၤ. ပမ့ၢ်အဲၣ်ပဒီပုၢ်ဝဲၢ်မုၣ် ဒီးဒီပုၢ်ဝဲၢ်ခွါသ့ၣ်တဖၣ်န့ၣ် မ့ၢ်ဝဲပပာ်ဖျါထီၣ်လၢ ပအဲၣ်ယဟိဝၤယွၤလီၤ. အဃိ တသ့ဖဲအသ့ ပမၤစၢၤပဒီပုၢ်ဝဲၢ်တဖၣ် ဒ်သိးအဝဲသ့ၣ် ကသ့ၣ်ညါလၢ အမ့ၢ်ပှၤလၢအလုၢ်ဒိၣ်ပှ့ၤဒိၣ် ဒီးယဟိဝၤယွၤအဲၣ်အဝဲသ့ၣ်လီၤ. (၁ ယိၤဟၣ် ၄:၁၉-၂၁) တၢ်မၢဖိ ပီလူးကွဲးဝဲလၢ “မၤမုာ်ထီၣ်လိာ်သုသး, ဒီးမၤထီၣ်မၤထီလိာ်သုသးသကိးသကိး, ဒ်သုမၤစ့ၢ်ကီးအသိးန့ၣ်တက့ၢ်.” (၁ သ့းစၤလနံ ၅:၁၁) တမ့ၢ်ထဲတၢ်အိၣ်ဖှိၣ်သးပှၢ်သ့ၣ်တဖၣ် ဟ့ၣ်ဂံၢ်ဟ့ၣ်ဘါပှၤဂၤသ့န့ၣ်ဘၣ်. ပဝဲတဂၤစုာ်စုာ် ပကွၢ်လိမၤဒိး ယဟိဝၤယွၤဒီးယ့ၣ်ၡူးသ့ခီဖျိ ပမၤမုာ်ထီၣ် ပဒီပုၢ်ဝဲၢ်သ့ၣ်တဖၣ်အသးလီၤ.—ဖး ရိမ့ၤ ၁၅:၁, ၂ တက့ၢ်.
၁၁ ဒီပုၢ်ဝဲၢ်တနီၤနီၤလၢ တၢ်အိၣ်ဖှိၣ်ပူၤန့ၣ် တူၢ်ဘၣ်ဝဲတၢ်ဆါလၢ အသူၣ်အုးသးအုးဒီး သူၣ်ကိၢ်သးဂီၤတၢ်ညီအဃိ အဝဲသ့ၣ်ဘၣ်အီၣ်ကသံၣ်ကသီဒီး လိၣ်ဘၣ်ကသံၣ်သရၣ်အတၢ်မၤစၢၤလီၤ. (လူၤကၣ် ၅:၃၁) တၢ်အိၣ်ဖှိၣ်သးပှၢ်တဖၣ်ဒီး တၢ်အိၣ်ဖှိၣ်ဖိတဖၣ် တမ့ၢ်ကသံၣ်ကရၣ်ဘၣ်ဆၣ် အဝဲသ့ၣ်အတၢ်မၤစၢၤ ဒီးအတၢ်မၤမုာ်ထီၣ်န့ၣ် ကဲဘျုးဝဲဒိၣ်မးလီၤ. ၁ သ့းစၤလနံ ၅:၁၄ တဲဝဲလၢ “ပှၤလၢအသးတခုဘၣ်တဖၣ်န့ၣ်, မၤမုာ်ထီၣ်အီၤတက့ၢ်. ပှၤလၢအဂံၢ်စၢ်ဘါစၢ်တဖၣ်န့ၣ်, မၤစၢၤအီၤတက့ၢ်. ဝံသးစူၤပှၤခဲလၢာ်တက့ၢ်.” တၢ်အိၣ်ဖှိၣ်ဖိခဲလၢာ် မၤဝဲဒ်န့ၣ်အသိးသ့လီၤ. ဖဲပဒီပုၢ်ဝဲၢ်တဖၣ် အသးအဂံၢ်အဘါလီၤစၢ်အခါ ပကဘၣ်နၢ်ပၢၢ်စၢၤအီၤ, အိၣ်ဒီးတၢ်ဝံသးစူၤဒီး တဲတၢ်ဒီးအီၤမုာ်မုာ်ဒ်သိး ကဟ့ၣ်ဂံၢ်ဟ့ၣ်ဘါအီၤအဂီၢ်န့ၣ်လီၤ. မ့ၢ်ပဂုာ်ကျဲးစၢး ဟ့ၣ်ဂံၢ်ဟ့ၣ်ဘါပှၤဂၤဧါ. ဒ်သိးပဟ့ၣ်ဂံၢ်ဟ့ၣ်ဘါ ဒီးမၤမုာ်ထီၣ်ပှၤသးအါန့ၢ်အလီၢ် ကသ့အဂီၢ် ပမၤတၢ်မနုၤသ့လဲၣ်.
၁၂. ဒီပုၢ်ဝဲၢ်မုၣ်တဂၤဒိးန့ၢ်ဘၣ် တၢ်ဂံၢ်တၢ်ဘါခီဖျိ ဒီပုၢ်ဝဲၢ်လၢ တၢ်အိၣ်ဖှိၣ်ပူၤဒ်လဲၣ်န့ၣ် တဲဖျါထီၣ်တက့ၢ်.
၁၂ ဒီပုၢ်ဝဲၢ်မုၣ်လၢအအိၣ်လၢ ကီၢ်ယူရပၤတဂၤန့ၣ် တဲဝဲလၢ ‘ဘၣ်တဘျီဘျီ ယဆိကမိၣ်ထီၣ်လၢ ယကမၤသံလီၤယသး, ဘၣ်ဆၣ် ဒီပုၢ်ဝဲၢ်တဖၣ်မၤစၢၤယၤအါမးလီၤ. ပှၤလၢအအိၣ်လၢ ယတၢ်အိၣ်ဖှိၣ်ပူၤသ့ၣ်တဖၣ်န့ၣ် မၤပူၤဖျဲးယသးသမူလီၤ. ထီဘိန့ၣ် ဒီပုၢ်ဝဲၢ်မုၣ်ခွါတဖၣ် ဟ့ၣ်ဂံၢ်ဟ့ၣ်ဘါယၤလၢ တၢ်အဲၣ်တၢ်ကွံအပူၤလီၤ. ပှၤလၢအသ့ၣ်ညါ ယတၢ်တူၢ်ဘၣ်န့ၣ် အိၣ်ထဲစှၤဂၤဘၣ်ဆၣ် ပှၤလၢယတၢ်အိၣ်ဖှိၣ်အပူၤတဖၣ်န့ၣ် မၤစၢၤယၤထီဘိလီၤ. လီၤဆီဒၣ်တၢ် ဒီပုၢ်ဝဲၢ်နီၢ်ဒီမိၢ်ဝၤခံဂၤအံၤန့ၣ် လီၤဂာ်ဒ်သိး ယမိၢ်ယပၢ်လၢနီၢ်သးတကပၤလီၤ. အဝဲသ့ၣ်ကဟုကယာ်ယၤ ဒီးဖဲယလိၣ်ဘၣ် တၢ်မၤစၢၤအခါ မုၢ်နၤဂ့ၤမုၢ်ဆါဂ့ၤ အဝဲသ့ၣ်မၤစၢၤယၤလီၤ.’ ဘၣ်သ့ၣ်သ့ၣ် ပမၤစၢၤပဒီပုၢ်ဝဲၢ်တန့ၢ် ထဲသိးပဒီပုၢ်ဝဲၢ်အဂၤတဖၣ်မၤဝဲဘၣ်. ဘၣ်ဆၣ် ပဝဲကိးဂၤဒဲး ပမၤစၢၤပဒီပုၢ်ဝဲၢ်တဖၣ်လၢ အဂ့ၤကတၢၢ်သ့ဝဲလီၤ.b (ကွၢ်တၢ်ဂ့ၢ်အဘျဲၣ်တက့ၢ်.)
ပဟ့ၣ်ဂံၢ်ဟ့ၣ်ဘါပှၤဂၤလၢ တၢ်အဲၣ်တၢ်ကွံအပူၤကသ့ဒ်လဲၣ်
၁၃. ဒ်သိးပကမၤမုာ်ထီၣ်ပှၤဂၤအဂီၢ် ပကဘၣ်မၤဒ်လဲၣ်.
၁၃ ဒိကနၣ်ပှၤဂၤ လၢတၢ်သူၣ်အိၣ်သးအိၣ် အပူၤတက့ၢ်. (ယၤကိာ် ၁:၁၉) ပမ့ၢ်ဒိကနၣ် ပဒီပုၢ်ဝဲၢ်လၢတၢ်သူၣ်အိၣ်သးအိၣ်အပူၤန့ၣ် မ့ၢ်ဝဲပပာ်ဖျါထီၣ် တၢ်အဲၣ်တၢ်ကွံလၢအဝဲသ့ၣ်အဖီခိၣ်လီၤ. ဒ်သိးနကနၢ်ပၢၢ် နဒီပုၢ်ဝဲၢ်တဖၣ် အတၢ်တူၢ်ဘၣ်အဂီၢ် သံကွၢ်အီၤတၢ်သံကွၢ်လၢ တၢ်အဲၣ်တၢ်ကွံအပူၤတက့ၢ်. မ့ၢ်နသးအိၣ်အီၤဧါ တသးအိၣ်အီၤဧါန့ၣ် ဖဲအဝဲကွၢ်နမဲာ်အခါ အဝဲသ့ၣ်ညါဝဲလီၤ. ဖဲအဝဲတဲဖျါထီၣ် အတၢ်တူၢ်ဘၣ်အခါ တဘၣ်နုာ်လီၤတဲတၢ်တဂ့ၤ, ဒိကနၣ်အီၤလၢတၢ်ဝံသးစူၤအပူၤတက့ၢ်. နမ့ၢ်ဒိကနၣ်အီၤဂ့ၤဂ့ၤန့ၣ် နကသ့ၣ်ညါအါထီၣ်အတၢ်တူၢ်ဘၣ် ဒီးနမၤစၢၤအီၤ ဒ်သိးအဝဲနာ်န့ၢ်နၤကသ့ဝဲလီၤ. ဒီးဖဲနတဲတၢ် ဒီးဂုာ်ကျဲးစၢးမၤစၢၤအီၤအခါ ကညီလၢအဝဲကဒိကနၣ်နၤလီၤ. နမ့ၢ်သူၣ်အိၣ်သးအိၣ် အဝဲသ့ၣ်နီၢ်နီၢ်န့ၣ် အဝဲသ့ၣ်အသးမုာ်ထီၣ်သ့ဝဲလီၤ.
၁၄. ဘၣ်မနုၤအဃိ ပတဘၣ်ဃုထံၣ် ပှၤဂၤအတၢ်ကမၣ်ဘၣ်လဲၣ်.
၁၄ တဘၣ်ဃုထံၣ်အတၢ်ကမၣ်တဂ့ၤ. ပှၤလၢအသူၣ်ဟးဂီၤသးဟးဂီၤတဂၤ မ့ၢ်တူၢ်ဘၣ်ဝဲလၢ နဃုထံၣ်ထဲအတၢ်ကမၣ်န့ၣ် အသးကဟးဂီၤနးန့ၢ်အလီၢ်လီၤ. ဒီးနကမၤစၢၤအီၤအဂီၢ် ကကီဒိၣ်ထီၣ်ဝဲလီၤ. “ပှၤလၢအကတိၤဖဲအခိၣ်စၢၢ်ဆၢ ဒ်နးဧိၤဘီဧိၤဆဲးတၢ်အသိးန့ၣ်အိၣ်ဝဲလီၤ. မ့မ့ၢ်ပှၤကူၣ်တၢ်သ့အပျ့ၤန့ၣ် မၤဘျါက့ၤတၢ်လီၤ.” (ကတိၤဒိ ၁၂:၁၈) ပမ့ၢ်တပာ်လီၤပသးလၢ ပကတဲဆါ ပှၤလၢအသးဟးဂီၤတဂၤသနာ်က့ ဖဲပတဲတၢ်အခါ ပမ့ၢ်တပလီၢ်ပသးဘၣ်န့ၣ် ပမၤဘၣ်ဒိဘၣ်အသးသ့ဝဲလီၤ. ဒ်သိးနမၤမုာ်ထီၣ်အီၤလၢ တၢ်အဲၣ်တၢ်ကွံအပူၤကသ့အဂီၢ် နကဘၣ်မၤစၢၤအီၤဒ်သိး အကနာ်လၢ နနၢ်ပၢၢ်အတၢ်တူၢ်ဘၣ်န့ၣ်လီၤ.—မးသဲ ၇:၁၂.
၁၅. ဒ်သိးပကမၤမုာ်ထီၣ်ပှၤဂၤအဂီၢ် ပသူတၢ်မနုၤတဖၣ်သ့လဲၣ်.
၁၅ သူယွၤအကလုၢ်ကထါ ဒ်သိးကမၤမုာ်ထီၣ်ပှၤဂၤအဂီၢ်တက့ၢ်. (ဖး ရိမ့ၤ ၁၅:၄, ၅ တက့ၢ်.) လံာ်စီဆှံဟဲလၢ “တၢ်ဝံသးစူၤဒီးတၢ်မၤမုာ်အကစၢ်” အအိၣ်အဃိ ပဃုထံၣ်န့ၢ် တၢ်မၤမုာ်ထီၣ်က့ၤလၢ လံာ်စီဆှံအပူၤအါမးလီၤ. ပအိၣ်စ့ၢ်ကီးဒီး Watch Tower Publications Index ဒီး Research Guide for Jehovah’s Witnesses လီၤ. ပမ့ၢ်သူတၢ်ပီးတၢ်လီသ့ၣ်တဖၣ်အံၤန့ၣ် ကမၤစၢၤပှၤလၢ ပကဃုထံၣ်န့ၢ်လံာ်စီဆှံအဆၢဒီး လံာ်လဲၢ်တဖၣ် ဒ်သိးပကမၤမုာ်ထီၣ်ဒီး ဟ့ၣ်ဂံၢ်ဟ့ၣ်ဘါ ပဒီပုၢ်ဝဲၢ်တဖၣ်အဂီၢ်လီၤ.
၁၆. ဒ်သိးပကဟ့ၣ်ဂံၢ်ဟ့ၣ်ဘါ ပှၤလၢအသးဟးဂီၤတဖၣ်အဂီၢ် ပကဘၣ်အိၣ်ဒီး တၢ်မနုၤတဖၣ်လဲၣ်.
၁၆ အိၣ်ဒီးတၢ်အဲၣ် ဒီးတၢ်သးကညီၤ. ယဟိဝၤယွၤမ့ၢ်ဝဲ “တၢ်သးကညီၤအပၢ်, ဒီးတၢ်မၤမုာ်ခဲလၢာ်အကစၢ်” ဒီးတကးဒံးဘၣ်အိၣ်ဒီး “တၢ်သးကညီၤဒိၣ်” လၢအခ့အပှၤတဖၣ်အဖီခိၣ်လီၤ. (ဖး ၂ ကရံၣ်သူး ၁:၃-၆ တက့ၢ်; လူၤကၣ် ၁:၇၈; ရိမ့ၤ ၁၅:၁၃) ဘၣ်ဃးဒီး တၢ်ဂ့ၢ်အံၤန့ၣ် စီၤပီလူးပာ်လီၤဒိဂ့ၤတဲာ်ဘၣ် ခီဖျိလၢ အကွၢ်လိမၤဒိး ယဟိဝၤယွၤအဃိလီၤ. လၢတၢ်န့ၣ်အဃိ အဝဲတဲဝဲလၢ “မ့မ့ၢ်ပမ့ၢ်ပှၤအသးစူၤလၢသုကျါ ဒ်ပှၤကွၢ်ဖိ အံးက့ၤကွၢ်က့ၤအဖိဒၣ်ဝဲအသိးလီၤ. ဒ်န့ၣ်အသိး, မ့ၢ်ပအဲၣ်သုဒီး, ပသးအိၣ်ထဲလၢ ပကဟ့ၣ်သုလၢ ယွၤအတၢ်သးခုအကစီၣ်ဧိၤ တမ့ၢ်ဘၣ်, မ့ၢ်လၢပသးသမူဒၣ်လဲာ်စ့ၢ်ကီးလီၤ. အဂ့ၢ်ဒ်အံၤ, သုမ့ၢ်ပှၤလၢပအဲၣ်အီၤလီၤ.” (၁ သ့းစၤလနံ ၂:၇, ၈) ဒ်ယဟိဝၤယွၤအသိး ပမ့ၢ်ပာ်ဖျါထီၣ်တၢ်အဲၣ် လၢပဒီပုၢ်ဝဲၢ်တဖၣ်အဖီခိၣ်န့ၣ် မ့ၢ်ကျဲတဘိလၢ ယဟိဝၤယွၤစံးဆၢက့ၤ အဝဲသ့ၣ်အတၢ်ထုကဖၣ်လီၤ.
၁၇. ပမ့ၢ်အိၣ်ဒီး တၢ်ထံၣ်အကြၢးအဘၣ်လၢ ပဒီပုၢ်ဝဲၢ်တဖၣ်အဖီခိၣ်န့ၣ် ကကဲထီၣ်တၢ်ဂံၢ်တၢ်ဘါလၢ အဝဲသ့ၣ်အဂီၢ်ဒ်လဲၣ်.
၁၇ တဘၣ်မုၢ်လၢ် တၢ်လၢတၢ်ပှဲၤလၢ နဒီပုၢ်ဝဲၢ်တဖၣ်အအိၣ်တဂ့ၤ. အိၣ်ဒီးတၢ်ထံၣ်လၢအကြၢးအဘၣ်တက့ၢ်. နမ့ၢ်မုၢ်လၢ် တၢ်လၢတၢ်ပှဲၤလၢ နဒီပုၢ်ဝဲၢ်တဖၣ်အအိၣ်န့ၣ် အိၣ်ဒၣ်နသးကဟးဂီၤလီၤ. (စံၣ်တဲၤတဲလီၤတၢ် ၇:၂၁, ၂၂) ပကဘၣ်သ့ၣ်နီၣ်ထီၣ်လၢ ယဟိဝၤယွၤအိၣ်ဒီး တၢ်ထံၣ်လၢအကြၢးအဘၣ်လၢ ပဖီခိၣ်လီၤ. လၢတၢ်န့ၣ်အဃိ ပကဘၣ်ဝံသးစူၤလိာ်သး တဂၤဒီးတဂၤလီၤ. (အ့းဖ့းစူး ၄:၂, ၃၂) ပတအဲၣ်ဒိးလၢပဒီပုၢ်ဝဲၢ်တဖၣ်တူၢ်ဘၣ်ဝဲလၢ အဝဲသ့ၣ် တမၤကစၢ်ယွၤအတၢ်မၤလၢ အဂ့ၤကတၢၢ်ဒံးဘၣ် မ့တမ့ၢ် ပတအဲၣ်ဒိးလၢ အဝဲသ့ၣ်တူၢ်ဘၣ်လၢ ပထိၣ်သတြီၤအီၤဒီး ပှၤအဂၤန့ၣ်ဘၣ်. လၢတၢ်န့ၣ်အလီၢ် ပကဘၣ်ဟ့ၣ်ဂံၢ်ဟ့ၣ်ဘါအဝဲသ့ၣ် ဒီးပတြၢၤအဝဲသ့ၣ် ခီဖျိအတၢ်မၤလၢအဂ့ၤတဖၣ်အဃိလီၤ. ပမ့ၢ်မၤဒ်န့ၣ်န့ၣ် ကမၤစၢၤအဝဲသ့ၣ် ဒ်သိးအကဆဲးမၤ ယဟိဝၤယွၤအတၢ်မၤလၢ တၢ်သးခုအပူၤလီၤ.—ကလၤတံ ၆:၄.
၁၈. ဘၣ်မနုၤအဃိ ပအဲၣ်ဒိးဟ့ၣ်ဂံၢ်ဟ့ၣ်ဘါပှၤဂၤလၢ တၢ်အဲၣ်တၢ်ကွံအပူၤလဲၣ်.
၁၈ ပဝဲခဲလၢာ်န့ၣ် မ့ၢ်တၢ်လုၢ်ဒိၣ်ပှ့ၤဒိၣ်လၢ ယဟိဝၤယွၤ ဒီးယ့ၣ်ၡူးအဂီၢ်လီၤ. (ကလၤတံ ၂:၂၀) ပအဲၣ်ပဒီပုၢ်ဝဲၢ်မုၣ်ခွါတဖၣ်ဒိၣ်မးအဃိ ပကဘၣ်ရ့ဒီးအဝဲသ့ၣ်လၢ တၢ်အဲၣ်တၢ်ကွံအပူၤလီၤ. တကးဒံးဘၣ်ပ “လူၤတၢ်ဘၣ်ဃးဒီးတၢ်ဃူတၢ်ဖိး, ဒီးတၢ်ဒုးထီၣ်ဒုးထီလိာ်အသးသကိးသကိး” စ့ၢ်ကီးလီၤ. (ရိမ့ၤ ၁၄:၁၉) ပအိၣ်ခိးကွၢ်လၢ် ပၤရဒံစူး ဖဲဆၢကတီၢ်လၢ တၢ်သူၣ်ဟးဂီၤသးဟးဂီၤ, တၢ်ဆူးတၢ်ဆါ ဒီးတၢ်ဒုးတၢ်ယၤတအိၣ်လၢၤဘၣ်န့ၣ်လီၤ. တကးဒံးဘၣ် ပှၤဟီၣ်ခိၣ်ဖိတဖၣ် တသံဘၣ်လၢတၢ်ဒဲးဘးအဃိ နီတဘျီလၢၤဘၣ်, ဒီးတၢ်မၤအၢမၤသီမ့ၢ်ဂ့ၤ, ဟံၣ်ဖိဃီဖိအတၢ်ကီတၢ်ခဲတဖၣ်မ့ၢ်ဂ့ၤ, တၢ်သူၣ်ဟးဂီၤသးဟးဂီၤတဖၣ်မ့ၢ်ဂ့ၤ တအိၣ်လၢၤဘၣ်. ဖဲအနံၣ်တကထိဝံၤအလီၢ်ခံ ပှၤဟီၣ်ခိၣ်ဖိခဲလၢာ် ကကဲထီၣ်ပှၤလၢပှၤပှဲၤလီၤ. ဖဲတၢ်မၤကွၢ် အလီၢ်ခံကတၢၢ်ဝံၤအခါ အဝဲသ့ၣ်ကကဲထီၣ် ယဟိဝၤယွၤအဖိလၢ ဟီၣ်ခိၣ်ချၢဒီး အဝဲသ့ၣ် “ကလဲၤနုာ်ဆူယွၤအဖိတဖၣ် အတၢ်ထူၣ်ဖျဲးအလၤကပီၤအပူၤလီၤ.” (ရိမ့ၤ ၈:၂၁) အဃိ မ်ပဝဲခဲလၢာ်ပပာ်ဖျါထီၣ် တၢ်အဲၣ်လၢတဂၤဒီးတဂၤအဖီခိၣ် ဒီးမၤစၢၤလိာ်သးဒ်သိး ပကနုာ်လီၤဘၣ်လၢ ဟီၣ်ခိၣ်သီအပူၤတက့ၢ်.
a ကွၢ်လံာ်လၢအမ့ၢ် Draw Close to Jehovah (သုးဘူးနသးဆူ ယဟိဝၤယွၤအအိၣ်) အတၢ်မၤလိ ၂၄ တက့ၢ်.
b ဒ်သိးနကမၤစၢၤ ပှၤလၢအဆိကမိၣ်လၢ ကမၤသံလီၤအသးတဖၣ်အဂီၢ် ဖးကွၢ်လံာ်လၢအမ့ၢ် Awake! တၢ်မၤလိလၢအမ့ၢ် “Why Go On? Three Reasons to Keep Living”(April 2014); “When You Feel Like Giving Up on Life”(January 2012), ဒီး “Life Is Worth Living” (October 22, 2001) တက့ၢ်.