နဘၣ်အိၣ် သယုၢ်သညိထဲတဂၤဧိၤအခါ နဘၣ်မၤဒ်လဲၣ်
နတူၢ်ဘၣ်လၢ နဘၣ်အိၣ် သယုၢ်သညိထဲတဂၤဧါ. နမ့ၢ်တူၢ်ဘၣ်ဒ်န့ၣ်န့ၣ် နတၢ်အိၣ်သး ကလီၤဂာ်ဒ် ပှၤကွဲးထါစံးထီၣ်ပတြၢၤ တဲဝဲအသိး “ဒ်ထိၣ်ဖှံးအိၣ်တဘ့ၣ်ဃီလၢ ဟံၣ်ခိၣ်အဖီခိၣ်အသိးန့ၣ်လီၤ.” (စံးထီၣ်ပတြၢၤ ၁၀၂:၇) ဒ်သိးနလဲၤခီဖျိ တၢ်အိၣ်သယုၢ်သညိကန့ၢ်အဂီၢ် လံာ်စီဆှံ အတၢ်ဟ့ၣ်ကူၣ်တဖၣ် မၤစၢၤနၤသ့ဝဲလီၤ.
သုးဘူးနသးဆူ ယွၤအအိၣ်တက့ၢ်
နမ့ၢ်တူၢ်ဘၣ်လၢ နဘၣ်အိၣ်သယုၢ်သညိထဲ တဂၤဧိၤဒၣ်လဲာ် နဃုထံၣ်န့ၢ် တၢ်သူၣ်မံသးမုာ် သ့ခီဖျိလၢ နသ့ၣ်ညါလီၤနသးလၢ အလိၣ်ဘၣ် ကစၢ်ယွၤ အတၢ်ဟံးစုနဲၣ်ကျဲ ဒီးဂုာ်ကျဲးစၢး သုးဘူးနသးဆူ ယွၤအအိၣ်န့ၣ်လီၤ. (မးသဲ ၅:၃, ၆) တၢ်ဂ့ၢ်လၢ လာ်တဖၣ်အံၤ မၤစၢၤနၤသ့ဝဲလီၤ.
လံာ်စီဆှံလၢ online အပူၤန့ၣ် နဖးဘၣ်အီၤညီ ဒီးအလီၤတံၢ်လီၤဆဲး
Online တၢ်မၤလိ လံာ်စီဆှံတဖၣ်န့ၣ် စံးဆၢဝဲ တၢ်သံကွၢ်အရ့ဒိၣ်လၢ ဘၣ်ဃးဒီး ပတၢ်အိၣ်မူ
တၢ်ဂီၤမူဖုၣ်ကိာ် လၢအဘၣ်ဃးဒီး လံာ်စီဆှံအတၢ်သိၣ်လိလၢ အရ့ဒိၣ်
“လံာ်စီဆှံအတၢ်သံကွၢ်တဖၣ် အတၢ်စံးဆၢ”—တၢ်သံကွၢ်လၢ ညီနုၢ်ပှၤသံကွၢ်တဖၣ် အတၢ်စံးဆၢလိၤလိၤ
“ကွၢ်လိမၤဒိး အဝဲသ့ၣ်အတၢ်နာ်”—တၢ်မၤလိတဖၣ်အံၤ ကမၤစၢၤပှၤလၢ ပကထံၣ်တမှံကွၢ် တၢ်မၤအသးဒီး ပှၤပိာ်မုၣ်ဒီးပှၤပိာ်ခွါ လၢအိၣ်ဒီးတၢ်သးတီလၢ လံာ်ဆှံအပူၤတဖၣ်အဂ့ၢ်
“တၢ်ဘၣ်တ့ကစၢ်အိၣ်ဧါ”—လၢတၢ်မၤလိတဖၣ်အံၤအပူၤ ကပာ်ဖျါထီၣ်ဝဲ န့ဆၢၣ်အတၢ်ဃံတၢ်လၤ ဒီးအတၢ်လီၤကမၢကမၣ်တဖၣ်အဂ့ၢ်
ဖးလံာ်စီဆှံအဆၢလၢ အန့ၢ်ဂံၢ်န့ၢ်ဘါတဖၣ်တက့ၢ်
ပှၤအါတက့ၢ်န့ၣ် ဒိးန့ၢ်ဘၣ်ဝဲ တၢ်ဂံၢ်တၢ်ဘါလၢ လံာ်စီဆှံအဆၢတဖၣ်လၢ ဘၣ်တၢ်ပာ်ဖျါထီၣ်အီၤလၢ လာ်အံၤလီၤ. လၢနကဖး လံာ်စီဆှံအဆၢတဖၣ်အံၤ တဘျီဃီခဲလၢာ်အလီၢ်န့ၣ် ဖဲနအိၣ်တဂၤအခါ ဟံးန့ၢ်တၢ်ဆၢကတီၢ်လၢ နကဆိကမိၣ်ထံ လံာ်စီဆှံအဆၢ တခါစုာ်စုာ် ဒီးဃ့ဘါထုကဖၣ်တက့ၢ်.—မၢ်ကူး ၁:၃၅.
ဘၣ်မနုၤအဃိ ဟီၣ်ခိၣ်အတၢ်အိၣ်အသးတဖၣ် နးထီၣ်ဝဲလဲၣ်န့ၣ် ဃုသ့ၣ်ညါအီၤတက့ၢ်
နမ့ၢ်သ့ၣ်ညါလၢ ဘၣ်မနုၤအဃိ ဟီၣ်ခိၣ်တၢ်အိၣ်အသးတဖၣ် နးထီၣ်ဝဲလဲၣ် ဒီးကစၢ်ယွၤ ကမၤဘၣ်ဂီၢ်က့ၤ ဟီၣ်ခိၣ် အတၢ်အိၣ်သးတဖၣ်အံၤဒ်လဲၣ်န့ၣ် နလဲၤခီဖျိ တၢ်ကီတၢ်ခဲတဖၣ်အံၤ ကန့ၢ်ဝဲလီၤ.—ယၡါယၤ ၆၅:၁၇.
တၢ်သူၣ်ကိၢ်သးဂီၤလၢ အဘျုးတအိၣ်ဘၣ်တဖၣ်န့ၣ် ထုးထီၣ်ကွံာ်တက့ၢ်
တၢ်ဂ့ၢ်လၢ လာ်တဖၣ်အံၤန့ၣ် ကမၤစၢၤပှၤဒ်သိး ကလဲၤခီဖျိ တၢ်သူၣ်ကိၢ်သးဂီၤလၢ အဟဲအိၣ်ထီၣ်ဖဲ ပအိၣ်သယုၢ်သညိအခါအ ကန့ၢ်အဂီၢ် ဒီးပသု “တဘၣ်ယိၣ်” တၢ်လၢၤတဂ့ၤအဂီၢ်လီၤ.—မးသဲ ၆:၂၅.
ဒုးအိၣ်ထီၣ် တၢ်ရ့လိာ်သးအဂ့ၤ ဒီးပှၤဂၤတက့ၢ်
တံၤသကိးလၢအဂ့ၤန့ၣ် ကမၤဆူၣ်ထီၣ် ပသးဒီး တၢ်အိၣ်ဆူၣ်အိၣ်ချ့တကပၤလီၤ. လီၤဆီဒၣ်တၢ် ဖဲပထံၣ်လိာ်သး တဂၤဒီးတဂၤလၢ မဲာ်သကိးမဲာ် တန့ၢ်ဘၣ်အခါ ပလိၣ်ဘၣ်အဝဲသ့ၣ် အါထီၣ်လီၤ. နမ့ၢ်ဘၣ်အိၣ်လၢဟံၣ်ဒီး ဟးထီၣ်လၢတၢ်ချၢ မ့ၢ်တန့ၢ်ဘၣ်န့ၣ် နကိးလိာ်သးလၢ Video call မ့တမ့ၢ် တဲသကိးတၢ်လၢ လီတဲစိအပူၤ ဒ်သိး နဆဲးပၢၤဃာ် နတၢ်ရ့လိာ်သးဒီး နသကိးသ့ဝဲအသိး, နဒုးအိၣ်ထီၣ် တၢ်ရ့လိာ်သးဒီး ပှၤအသီလၢအဂၤတဖၣ် သ့စ့ၢ်ကီးလီၤ. တၢ်မၤလိလၢ လာ်တဖၣ်အံၤ ကမၤစၢၤပှၤ ဒ်သိး ပဃုထံၣ်န့ၢ် ‘တံၤသကိး နီၢ်နီၢ်’ ကသ့ဒ်လဲၣ် ဒီးပနီၢ်ကစၢ်ဒၣ်ဝဲ ပကဲထီၣ် တံၤသကိးလၢအဂ့ၤ ကသ့ဒ်လဲၣ်န့ၣ်လီၤ”—ကတိၤဒိ ၁၇:၁၇.
မၤနီၢ်ခိတၢ်ဟူးတၢ်ဂဲၤတက့ၢ်
လံာ်စီဆှံတဲဝဲလၢ “နီၢ်ခိအတၢ်ဟူးတၢ်ဂဲၤ အိၣ်ဒီးအဘျုးအဖှိၣ် တနီၤ” လီၤ. (၁ တံၤမသ့း ၄:၈, ခ့ခါစှီၤကျိာ်) လီၤဆီဒၣ်တၢ် ဖဲနဘၣ်အိၣ် သယုၢ်သညိထဲတဂၤဧိၤအခါ တၢ်မၤ နီၢ်ခိအတၢ်ဟူးတၢ်ဂဲၤန့ၣ် မၤဂ့ၤထီၣ် ပသးအတၢ်အိၣ်ဆူၣ်အိၣ်ချ့ သ့ဝဲလီၤ. နမ့ၢ်ဘၣ်အိၣ်လၢဟံၣ်ဒီး ဟးထီၣ်လၢတၢ်ချၢ မ့ၢ်တန့ၢ်ဘၣ်ဒၣ်လဲာ် နသးကဖှံအဂီၢ် တၢ်လၢနမၤတၢ်သ့တဖၣ် အိၣ်ဝဲလီၤ.