မၤနၢၤတၢ်အိၣ်သယုၢ်သညိ ခီဖျိမၤစၢၤပှၤဂၤ—ဘၣ်ဃးဒီး တၢ်ဂ့ၢ်အံၤန့ၣ် လံာ်စီဆှံတဲဝဲဒ်လဲၣ်

ပှၤအါဂၤလၢ ဟီၣ်ခိၣ်ဒီဘ့ၣ်န့ၣ် တူၢ်ဘၣ်တၢ်သယုၢ်သညိ ဒီးတူၢ်ဘၣ်ဝဲလၢ အအိၣ်ထဲတဂၤ. ပှၤကူၣ်ဘၣ်ကူၣ်သ့လၢ တၢ်အိၣ်ဆူၣ်အိၣ်ချ့တကပၤတနီၤ တဲဝဲလၢ နမ့ၢ်မၤစၢၤပှၤဂၤန့ၣ် နတူၢ်ဘၣ်တၢ်သယုၢ်သညိ ကလီၤစှၤ.

• “နမ့ၢ်မၤစၢၤပှၤဂၤန့ၣ် နကသးခု ဒီးနတူၢ်ဘၣ်တၢ်သယုၢ်သညိ ကလီၤစှၤ ဒီးနတတူၢ်ဘၣ်လၢ နအိၣ်ထဲတဂၤလၢၤဘၣ်.”—U.S. National Institutes of Health.

ပကဘၣ်မၤစၢၤ ပှၤဂၤဒ်လဲၣ်န့ၣ် လံာ်စီဆှံ ပာ်ဖျါထီၣ်န့ၢ်ပှၤ တၢ်ဟ့ၣ်ကူၣ်. ပမ့ၢ်မၤထွဲ လံာ်စီဆှံ အတၢ်ဟ့ၣ်ကူၣ်န့ၣ် ပတၢ်သယုၢ်သညိ လီၤစှၤဝဲသ့.

တၢ်လၢနမၤသ့

သးအိၣ်ဟ့ၣ်တၢ်. ဃုကျဲလၢ နကရ့ဒီးပှၤဂၤ, လီၤဆီဒၣ်တၢ် လဲၤထံၣ်လိာ်သးဒီးအီၤ ဒီးရ့ဒီးအီၤ. သးအိၣ်ဟ့ၣ်ပှၤဂၤ တၢ်လၢအအိၣ်ဒီးနၤ. နမ့ၢ်မၤဒ်န့ၣ်န့ၣ် အဝဲကစံးဘျုးနၤ ဒီးကကဲထီၣ် တၢ်မၤစၢၤ ဒ်သိးသုကကဲထီၣ် ဒီသကိး.

• လံာ်စီဆှံအတၢ်ဟံးစုနဲၣ်ကျဲ– “ဟ့ၣ်တၢ်ထီဘိ ဒီးပှၤကဟ့ၣ်သုစ့ၢ်ကီးလီၤ.”—လူၤကၣ် ၆:၃၈.

သူနတၢ်ဂံၢ်တၢ်ဘါ လၢနကမၤစၢၤပှၤဂၤ. ဃုကျဲလၢ နကမၤစၢၤ ပှၤလၢအထံၣ်ဘၣ် တၢ်ကီတၢ်ခဲ. နမၤဒ်န့ၣ်သ့ခီဖျိ ဒိကနၣ်န့ၢ် အဝဲသ့ၣ် လၢတၢ်သူၣ်အိၣ်သးအိၣ်အပူၤ မ့တမ့ၢ် မၤစၢၤအဝဲသ့ၣ် ဒ်အတၢ်လိၣ်ဘၣ်အိၣ်ဝဲအသိး ဒ်သိးအတၢ်အိၣ်မူ ကညီထီၣ်အဂီၢ်.

• လံာ်စီဆှံအတၢ်ဟံးစုနဲၣ်ကျဲ– “တံၤသကိးတံၢ်နီၢ်န့ၣ် မၤစၢၤတၢ် ကိးဆၢကတီၢ်ဒဲး.”—ကတိၤ ၁၇:၁၇, Contemporary English Version.

နမ့ၢ်အဲၣ်ဒိး သ့ၣ်ညါအါထီၣ် ဘၣ်ဃးဒီး ဒ်သိးနကဆဲးအိၣ်ဒီး တၢ်ရ့လိာ်သးလၢအဂ့ၤဒီး ပှၤဂၤအဂီၢ် ဖးကွၢ်တၢ်ဂ့ၢ် လၢအမ့ၢ် “ဟံၣ်ဖိဃီဖိ ဒီးတၢ်ရ့တံၤရ့သကိး.”