မ့ၢ်ယဟိဝၤပှၤအုၣ်အသးတဖၣ် အိၣ်ဒီးအလံာ်စီဆှံ လီၤလီၤဆီဆီဧါ
ယဟိဝၤပှၤအုၣ်အသးတဖၣ် ဖးဝဲတၢ်ကွဲးကျိာ်ထံ လံာ်စီဆှံ အကလုာ်ကလုာ် လၢကမၤလိလံာ်စီဆှံအဂီၢ်လီၤ. ဘၣ်ဆၣ် ဟီၣ်ခိၣ်သီ တၢ်ကွဲးကျိာ်ထံလံာ်စီဆှံ မ့ၢ်အိၣ်လၢကျိာ်လၢ ပဖးအီၣ်ဘၣ်န့ၣ် ပဖးလၢ ဟီၣ်ခိၣ်သီ တၢ်ကွဲးကျိာ်ထံလံာ်စီဆှံ, မ့ၢ်လၢအအိၣ်ဒီး ကစၢ်ယွၤအမံၤ, အဘၣ်လီၤတံၢ်လီၤဆဲး ဒီးပနၢ်ပၢၢ်ဘၣ်အီၤညီ အဃိ.
အအိၣ်ဒီး ကစၢ်ယွၤအမံၤ. ပှၤလၢအထုးထီၣ်ရၤလီၤ လံာ်စီဆှံ တနီၤန့ၣ် တမၤလၤကပီၤဝဲ ပှၤလၢအကြၢးဒိးန့ၢ်ဘၣ် တၢ်လၤကပီၤတဂၤန့ၣ်ဘၣ်. အဒိ, တၢ်ကွဲးကျိာ်ထံလံာ်စီဆှံတဘ့ၣ်န့ၣ် ကွဲးလီၤဝဲ ပှၤအဂၤ ၇၀ ဘျဲၣ်အမံၤ လၢအမၤစၢၤဘၣ်တၢ်လၢ ကထုးထီၣ်ဝဲ လံာ်စီဆှံတဘ့ၣ်အံၤအဂီၢ်. ဘၣ်ဆၣ် လံာ်စီဆှံတဘ့ၣ်အံၤအပူၤန့ၣ် အဝဲသ့ၣ်ထုးထီၣ်ကွံာ်ဝဲ ယဟိဝၤယွၤလၢအမ့ၢ် ပှၤလၢအဒုးအိၣ်ထီၣ် လံာ်စီဆှံတဂၤအံၤအမံၤ.
ဘၣ်ဆၣ်မ့မ့ၢ်လၢ ဟီၣ်ခိၣ်သီ တၢ်ကွဲးကျိာ်ထံလံာ်စီဆှံ န့ၣ်ထၢနုာ်ကဒါက့ၤ ကစၢ်ယွၤအမံၤ အဖျၢၣ်လၢအကထိ လၢအလီၢ်ဒၣ်ဝဲ ဒ်အအိၣ်ပာ်စၢၤလၢ အခီၣ်ထံးအသိး. ဒီးပှၤလၢအမၤစၢၤဘၣ်တၢ်လၢ ကထုးထီၣ်ဝဲ လံာ်စီဆှံတဘ့ၣ်အံၤအဂီၢ်န့ၣ် ပှၤတကွဲးဖျါထီၣ် အဝဲသ့ၣ်အမံၤဘၣ်.
အဘၣ်လီၤတံၢ်လီၤဆဲး. ကယဲၢ်တၢ်ကွဲးကျိာ်ထံခဲလၢာ်န့ၣ် တပာ်ဖျါထီၣ် လံာ်စီဆှံ အတၢ်ကစီၣ်လၢအဘၣ်လီၤတံၢ်လီၤဆဲး ဒ်အအိၣ်ပာ်စၢၤလၢ အခီၣ်ထံးအသိးဘၣ်. အဒိ, တၢ်ကွဲးကျိာ်ထံတခါ ကွဲးကျိာ်ထံဝဲ မးသဲ ၇:၁၃ ဒ်အံၤ “လဲၤနုာ်လီၤလၢ တြဲၤလၢအအံၣ်တက့ၢ်. မ့ၢ်လၢတြဲၤလၢအလဲၤလၢ လရာ်န့ၣ်လဲၢ်ဝဲ ဒီးကျဲလၢအဆှၢပှၤ ဖဲန့ၣ်န့ၣ် ပှၤလဲၤဘၣ်အီၤ ညီဒိၣ်မး.” လၢတၢ်ကတိၤလၢအမ့ၢ် “လရာ်” အလီၢ်န့ၣ် တၢ်ကွဲးအသး အခီၣ်ထံး သူဝဲတၢ်ကတိၤလၢအမ့ၢ် “တၢ်ဟးဂီၤ” လီၤ. ဘၣ်သ့ၣ်သ့ၣ် ပှၤလၢအကွဲးကျိာ်ထံတၢ်တဖၣ်အံၤ ထၢနုာ်ဝဲ တၢ်ကတိၤလၢ “လရာ်” န့ၣ် ကမ့ၢ်လၢအဝဲသ့ၣ် နာ်ဝဲလၢ ပှၤအၢပှၤသီသ့ၣ်တဖၣ်န့ၣ် ကဘၣ်တၢ်မၤအၢမၤနးအီၤလၢ လရာ်မ့ၣ်အူအပူၤ လီၤထူလီၤယိာ်အဃိလီၤ. ဘၣ်ဆၣ် လံာ်စီဆှံ တဆီၣ်ထွဲဝဲ အဝဲသ့ၣ် အတၢ်နာ်တခါအံၤဘၣ်. မ့မ့ၢ်လၢ ဟီၣ်ခိၣ်သီ တၢ်ကွဲးကျိာ်ထံလံာ်စီဆှံ လၢကီၤလၤဝါကျိာ်န့ၣ် ကွဲးကျိာ်ထံဝဲ လီၤတံၢ်လီၤဆဲးလၢ “လဲၤနုာ်လီၤလၢ တြဲၤလၢအအံၣ်တက့ၢ်. တြဲၤလၢအလဲၢ်ဒီး ကျဲလၢအလဲၢ်န့ၣ် ဆှၢပှၤလၢတၢ်ဟးဂီၤ” လီၤ.
ပနၢ်ပၢၢ်ဘၣ်အီၤညီ. တၢ်ကွဲးကျိာ်ထံလၢအဂ့ၤန့ၣ် တမ့ၢ်ထဲ အကဘၣ် ဘၣ်လီၤတံၢ်လီၤဆဲးဘၣ်, ပှၤကဘၣ် နၢ်ပၢၢ်ဘၣ်အီၤညီစ့ၢ်ကီး. ပကကွၢ်သကိး တၢ်အဒိတခါ. တၢ်ကတိၤလၢ တၢ်မၢဖိပီလူး တဲဝဲဖဲ ရိမ့ၤ ၁၂:၁၁ အပူၤန့ၣ် အခီပညီလိၤလိၤမ့ၢ်ဝဲ “ကလာ်ထီၣ်လၢ သးစီဆှံအဃိ.” မ့မ့ၢ်လၢ ကီၤလၤဝါကျိာ်န့ၣ် တၢ်ကတိၤအံၤ ပှၤလၢပစိၤခဲအံၤ နၢ်ပၢၢ်ဘၣ်အီၤသ့ တစဲးတစဲးလီၤ. ဘၣ်ဆၣ်လၢ ဟီၣ်ခိၣ်သီ တၢ်ကွဲးကျိာ်ထံလံာ်စီဆှံ လၢကီၤလၤဝါကျိာ်အပူၤန့ၣ် လံာ်စီဆှံ အဆၢဖိတဆၢအံၤ ပှၤနၢ်ပၢၢ်ဘၣ်အီၤ ညီဒိၣ်မး. ဖဲန့ၣ် တဲဝဲလၢ ခရံာ်ဖိတဖၣ်န့ၣ်ကြၢး ‘ပျဲသးစီဆှံ မၤဆူၣ်ထီၣ်အသး’ လီၤ.
ဟီၣ်ခိၣ်သီ တၢ်ကွဲးကျိာ်ထံလံာ်စီဆှံ န့ၣ်အိၣ်ဒီး ကစၢ်ယွၤအမံၤ, အဘၣ်လီၤတံၢ်လီၤဆဲး ဒီးပှၤနၢ်ပၢၢ်ဘၣ်အီၤညီ. တကးဒံးဘၣ် ပှၤရၤလီၤအီၤ ဒီးပှၤတဃ့အပှ့ၤဘၣ်. လၢတၢ်န့ၣ်အဃိ ပှၤလၢအကကွဲၢ်တဖၣ် ဖးဘၣ်ဝဲ လံာ်စီဆှံအံၤ လၢအဝဲသ့ၣ် အနီၢ်ကစၢ်အကျိာ် ဒီးပှၤလၢအပှ့ၤ လံာ်စီဆှံ တန့ၢ်ဘၣ်တဖၣ်န့ၣ် အဝဲသ့ၣ် အနီၢ်ကစၢ်လံာ်စီဆှံအိၣ်ဝဲ.