တၢ်ဒီသဒၢလၢ ပှၤထူလံၤဖိတဖၣ် ကဘူၣ်ထီၣ်ဘါထီၣ်တၢ်လၢ တၢ်သဘျ့အဂီၢ်

လၢ လဲထၢၤ အမဲရကၤန့ၣ်​ ပှၤအိၣ်ဝဲ အကကွဲၢ်လၢအကယၤ ဒီးဖဲန့ၣ်အကျါန့ၣ်​ အိၣ်စ့ၢ်ကီးဒီး ပှၤထူလံၤဖိလၢအကကွဲၢ်တဖၣ်​ လၢအိၣ်ဒီးအနီၢ်ကစၢ်အကျိာ် ဒီးအတၢ်ဆဲးတၢ်လၤလီၤ. ပှၤထူလံၤဖိအါဂၤန့ၣ်​ မ့ၢ်ဝဲယဟိဝၤပှၤအုၣ်အသးတဖၣ်​ ဒီးအဝဲသ့ၣ်​ ပာ်လုၢ်ပာ်ပှ့ၤဝဲ အတၢ်ဆဲးတၢ်လၤလီၤ. လၢ လဲထၢၤ အမဲရကၤန့ၣ်​ ဒ်သိးအဝဲသ့ၣ်​ ကမၤစၢၤပှၤဂၤလၢ ကသ့ၣ်ညါထီၣ်​ လံာ်စီဆှံတၢ်မ့ၢ်တၢ်တီအဂီၢ် အဝဲသ့ၣ်ကွဲးကျိာ်ထံ ဒီးထုးထီၣ်ရၤလီၤဝဲ လံာ်လဲၢ်လၢ ပှၤထူလံၤဖိအကျိာ် ၁၃၀ ဘျဲၣ်လီၤ.a ဘၣ်ဆၣ်​ ပှၤတနီၤန့ၣ်​ ခီဖျိလၢ အဃုထၢဝဲလၢ ကမၤယဟိဝၤယွၤအတၢ်မၤ ဒီးတမၤထွဲဝဲ လုၢ်လၢ်လၢအတလီၤပလိာ်ဒီး လံာ်စီဆှံတၢ်သိၣ်တၢ်သီတဖၣ်ဘၣ်အဃိ အဝဲသ့ၣ်​ ထံၣ်ဘၣ်ဒီး တၢ်ထီဒုၣ်ထီဒါလီၤ. ပသူနတၢ်မၤဘူၣ်​ ဒီးမၤစၢၤအဝဲသ့ၣ်ဒ်လဲၣ်.

မၤစၢၤအဝဲသ့ၣ်လၢ ကဟဲက့ၤဆူအဟံၣ်

လၢကီၢ်မဲးကစံၣ်ကိၣ်န့ၣ်​ ပဒီပုၢ်ဝဲၢ်မုၣ်ခွါလၢအမ့ၢ် ဝံခၠိၣ်ကလုာ်ဒူၣ်​ လၢအအိၣ်လၢ ဟၣ်လံၣ်စကိၣ်ကီၢ်ရ့ၣ်​ အကစၢၢ်ကျါတဖၣ်န့ၣ်​ လၢတၢ်ပာ်ကဲအပူၤ အဝဲသ့ၣ်​ တဲပၠးဝဲပှၤဂၤလၢ အဝဲသ့ၣ်တပၣ်ဃုာ်လၢ တၢ်ဘူၣ်တၢ်ဘါအလုၢ်အလၢ်လၢ အထီဒါလိာ်အသးဒီး လံာ်စီဆှံ အတၢ်သိၣ်လိတဖၣ်အကျါဘၣ်. သနာ်က့ ပှၤတနီၤန့ၣ်​ အသးဒိၣ်ထီၣ်​ အဝဲသ့ၣ်ဒံး.b ဖဲ ၂၀၁၇ လါဒံၣ်စ့ဘၢၣ် ၄ သီန့ၣ်​ ပှၤလၢအသးဒိၣ်ထီၣ်တၢ်တဖၣ်​ ဟဲထီဒါဝဲ ယဟိဝၤပှၤအုၣ်သး ဒီးပှၤလၢအိၣ်ဒီးအဝဲသ့ၣ်တဖၣ်လီၤ. အဝဲသ့ၣ်​ မၢဆူၣ်ဝဲ ယဟိဝၤပှၤအုၣ်အသးတဖၣ်လၢ ကဟးထီၣ်လၢတၢ်လီၢ်ဖဲန့ၣ်, မၤဟးဂီၤကွံာ် အဝဲသ့ၣ်အတၢ်လီၢ်တၢ်ကျဲ ဒီးတဲပျံၤတဲဖုးဝဲလၢ အဝဲသ့ၣ်မ့ၢ်ဟဲက့ၤကဒါက့ၤန့ၣ်​ ကမၤသံကွံာ်ဝဲလီၤ.

ယဟိဝၤပှၤအုၣ်အသးလၢ အိၣ်လၢသဝီအဂၤလၢ အဘူးဒီးအဝဲသ့ၣ်န့ၣ်​ မၤစၢၤအဝဲသ့ၣ်​ အတၢ်လိၣ်ဘၣ်တဖၣ်လီၤ. ဘၣ်ဆၣ်​ ဒ်သိးအဝဲသ့ၣ်​ က့ၤကဒါက့ၤလၢ အဟံၣ်ကန့ၢ်အဂီၢ် ကမၤဝဲဒ်လဲၣ်. ဒီပုၢ်ဝဲၢ် အီကဲးစတ့ တဲဝဲလၢ “ပကငါ ပီၢ်ရီအဂီၢ်န့ၣ်​ ပစ့တအိၣ်ဘၣ်. ဒ်သိးပကန့ၢ်ဘၣ်​ ပီၢ်ရီအတၢ်ဟ့ၣ်ကူၣ်အဂီၢ် ပကဘၣ်ဃ့ တၢ်မၤစၢၤဖဲလဲၣ်​ ပတသ့ၣ်ညါဘၣ်.”

ပဒီပုၢ်ဝဲၢ်မုၣ်ခွါတဖၣ်​ အတၢ်ခွဲးတၢ်ယာ်လၢ ကဘူၣ်ထီၣ်ဘါထီၣ်တၢ်လၢ တၢ်သဘျ့အပူၤန့ၣ်​ ဘၣ်တၢ်ထီဒါအီၤအဃိ ဝဲၤတြၢ်လၢ အမဲရကၤ အခၢၣ်သးန့ၣ်​ ရဲၣ်လီၤကျဲၤလီၤတၢ်တဘျီဃီလီၤ. အဆိကတၢၢ်န့ၣ်​ အဝဲသ့ၣ်ဃ့ဝဲ လီၢ်ကဝီၤပဒိၣ်ပပှၢ်တဖၣ်လၢ ကသမံသမိးဝဲ ပှၤလၢအဟဲထီဒါတၢ်တဖၣ်လီၤ. လၢခံအဝဲသ့ၣ်​ ဒိးန့ၢ်ဘၣ်အခွဲးလၢ ပှၤပၢဆှၢတၢ်ကမံးတံာ် အပှၤရဲၣ်ကျဲၤတၢ်ကမံးတံာ်အအိၣ်​ လၢကပာ်ဖှိၣ်မၤသကိးတၢ်ဒီး ဝဲၤလီၢ်ခိၣ်သ့ၣ်​ သဲစးဝဲၤကျိၤ ဒီးတီၣ်ထီၣ်ဝဲ ဒီပုၢ်ဝဲၢ်မုၣ်ခွါလၢ ဝံခၠိၣ်ကလုာ်ဒူၣ်တဖၣ်​ အတၢ်ဂ့ၢ်လၢရူလီၤ. လၢခံန့ၣ်​ တၢ်ဂ့ၢ်အံၤထီၣ်တုၤလၢ ကီၢ်မဲးကစံၣ်ကိၣ်​ အစံၣ်ညီၣ်ကွီၢ်အရူလၢ အဒိၣ်တၢၢ်တဖျၢၣ်လီၤ.

ပီၢ်ရီတဖုလၢအဘၣ်ဃးဒီးဟီၣ်ခိၣ်ဒီဘ့ၣ်န့ၣ်​ ပာ်ဖျါဒီးတဲနၢ်ပၢၢ်ဝဲလၢ ဒ်သိးပှၤအဂၤတဖၣ်​ ကဘၣ်ပာ်ကဲဝဲ ပှၤထူလံၤဖိတဖၣ်​ အတၢ်ဆဲးတၢ်လၤအသိး ပှၤထူလံၤဖိတဖၣ်စ့ၢ်ကီး ကဘၣ်ပာ်ကဲ ဒီးဒီသဒၢဝဲ ပှၤလၢအဝဲသ့ၣ်​ အကလုာ်ဒူၣ်အကျါတဖၣ်​ အတၢ်သဘျ့လီၤ. ပှၤဟီၣ်ခိၣ်ဖိတဖၣ်​ မ့ၢ်အိၣ်လၢတၢ်လီၢ်ဖဲလဲၣ်ဂ့ၤဖဲလဲၣ်ဂ့ၤ အိၣ်ဒီးအနီၢ်ကစၢ် အတၢ်သဘျ့လီၤ.

ဖဲ ၂၀၂၀ လါယူၤလံ, ၈ သီန့ၣ်​ စံၣ်ညီၣ်ကွီၢ်အရူလၢအဒိၣ်ကတၢၢ်အံၤ ဒုးနၢၤဝဲ ယဟိဝၤပှၤအုၣ်အသးတဖၣ်လီၤ. ဒီးအဝဲသ့ၣ်​ ဆၢတဲာ်ဝဲလၢ ပှၤလၢအဘၣ်တၢ်နီဟးထီၣ်အီၤတဖၣ်​ ပှၤကဘၣ်တူၢ်လိာ်က့ၤအဝဲသ့ၣ်လၢ အတၢ်လီၢ်တၢ်ကျဲလီၤ. ဘၣ်ဃးဒီး ဒီပုၢ်ဝဲၢ်မုၣ်ခွါတဖၣ်​ အတၢ်စံးဘျုးစံးဖှိၣ်​ ဒီးအတၢ်တူၢ်ဘၣ်န့ၣ်​ ဒီပုၢ်ဝဲၢ် အီကဲးစတ့ တဲဝဲလၢ “ပသးခု ဒီးစံးဘျုးစံးဖှိၣ်ဘၣ်​ ဒီပုၢ်ဝဲၢ်လၢ အမၤန့ၢ်တၢ်လၢပဂီၢ်တဖၣ်ဒိၣ်မး. အဝဲသ့ၣ်​ မ့ၢ်တမၤစၢၤပှၤဘၣ်န့ၣ်​ ပမၤတၢ်တသ့နီတမံၤဘၣ်.”

“မၤတၢ်အါမးလၢ ပှၤစှၤဂၤအဂီၢ်”

လၢ အဲးခွံးဒီ သဝီစါဟွၣ်ဒ့ၣ်​ အံၣ်လူမဲၤ အိဒၢၤဘလိၣ်​ တၢ်တြီၤန့ၣ်​ ပှၤထူလံၤဖိတဖၣ်​ အိၣ်အါမးလီၤ. အဝဲသ့ၣ်တဖၣ်စ့ၢ်ကီး ထံၣ်ဘၣ်ဒီးတၢ်ထီဒုၣ်ထီဒါလီၤ. ဖဲ ၂၀၁၄ န့ၣ်ဒီပုၢ်ဝဲၢ်တဖၣ်​ ဒိးန့ၢ်ဘၣ်အခွဲးလၢ ကသူၣ်ထီၣ်ဘီမုၢ်ဘျီၣ်ဒိၣ်ဝံၤအလီၢ်ခံ အဝဲသ့ၣ်​ စးထီၣ်သူၣ်ထီၣ်ဝဲလီၤ. ဘၣ်ဆၣ်​ တၢ်ဘူၣ်တၢ်ဘါခိၣ်နၢ်တဂၤန့ၣ်​ ကိးထီၣ်ဝဲပှၤအဂၤ ၁၀၀ ဘျဲၣ်​ ဒီးဟဲမၢဆူၣ်ဝဲ ဒီပုၢ်ဝဲၢ်တဖၣ်လၢ ကပတုာ်တၢ်သူၣ်ထီၣ်ဘှီထီၣ်တၢ်မၤလီၤ. ပှၤသဝီဖိတဖၣ်စ့ၢ်ကီး မၢယဟိဝၤပှၤအုၣ်အသးတဖၣ်လၢ ကပတုာ်ထီၣ်တၢ်အိၣ်ဖှိၣ်လီၤ.

သဲစးဝဲၤကျိၤလၢအအိၣ်လၢ အဲးခွံးဒီ ဒီးဝဲၤလီၢ်ခိၣ်သ့ၣ်န့ၣ်​ ပာ်ဖှိၣ်မၤသကိးတၢ် လၢကဒီသဒၢဝဲ တၢ်အိၣ်ဖှိၣ်တဖၣ်​ ဒ်သိးကဘူၣ်ထီၣ်ဘါထီၣ်ဘၣ်တၢ်လၢ တၢ်သဘျ့အပူၤအဂီၢ်လီၤ. အဃိ ဒီပုၢ်ဝဲၢ်တဖၣ်​ တီၣ်ထီၣ်ဝဲ တၢ်ဂ့ၢ်အံၤလၢရူလီၤ. ဒီးရူဆၢတဲာ်ဝဲလၢ သဝီဖိတဖၣ်​ တဘၣ်ထီဒါ ဒီပုၢ်ဝဲၢ်တဖၣ်လၢၤဘၣ်, ကဘၣ်ဟ့ၣ်အခွဲးလၢ ဒီပုၢ်ဝဲၢ်တဖၣ်ကထီၣ်တၢ်အိၣ်ဖှိၣ်​ ဒီးကဘှီဝံၤက့ၤ ဘီမုၢ်ဘျီၣ်ဒိၣ်လီၤ. ဒ်သိးကဒီသဒၢဝဲ ဒီပုၢ်ဝဲၢ်တဖၣ်​ အတၢ်ခွဲးတၢ်ယာ်အဂီၢ် ဒီပုၢ်ဝဲၢ်လၢအခၢၣ်စးတၢ်တဖၣ်န့ၣ်​ ဃ့ဝဲစံၣ်ညီၣ်ကွီၢ်အရူလၢအဒိၣ်တဖျၣ်လၢ ကမၤဝဲတၢ်ဆၢတဲာ်လၢ ဘၣ်ဃးဒီး တၢ်သံကွၢ်အရ့ဒိၣ်လၢ မ့ၢ်ပှၤထူလံၤဖိတဖၣ်​ ကြၢးပာ်ကဲဝဲ ဟီၣ်ခိၣ်ဒီဘ့ၣ်​ ပှၤဟီၣ်ခိၣ်ဖိခွဲးယာ်ဧါ တကြၢးပာ်ကဲဝဲဘၣ်ဧါ.

ဖဲ ၂၀၂၀ လါယူၤလံ ၁၆ န့ၣ်​ စံၣ်ညီၣ်ကွီၢ်အရူလၢအထီကတၢၢ်လၢ အဲးခွံးဒီန့ၣ်​ သမံသမိးဝဲ တၢ်ဂ့ၢ်အံၤလီၤ. ဒီပုၢ်ဝဲၢ်လၢအအိၣ်လၢ အဲးခွံးဒီ လၢအကဲဝဲပီၢ်ရီတဖၣ်န့ၣ်​ မၤတၢ်လၢတၢ်အိၣ်ဖှိၣ်အခၢၣ်စးလီၤ. တကးဒံးဘၣ်​ ဒီပုၢ်ဝဲၢ်လွံၢ်ဂၤလၢ အိၣ်ဒီးတၢ်လဲၤခီဖျိအါမး ဒီးမၤတၢ်လၢဘၣ်ဃးဒီး ဟီၣ်ခိၣ်ဒီဘ့ၣ်ပီၢ်ရီတကပၤန့ၣ်​ တဲဖျါထီၣ်တၢ်ဂ့ၢ်လၢ ရူလီၤ. ခီဖျိလၢ တၢ်တြီဃာ်ဘၣ်ဃးဒီး ခိၤရိၤနၤတၢ်ဆါ (COVID-19) အဃိ ထံကီၢ်အါဘ့ၣ်န့ၣ်​ တဲသကိးတၢ်လၢ videoconference လီၤ. တၢ်အံၤမ့ၢ်တၢ်အဆိကတၢၢ်တဘျီလၢ ရူဟ့ၣ်အခွဲးလၢ သဲစးဝဲၤကျိၤလၢ အခၢၣ်စးဝဲ ယဟိဝၤပှၤအုၣ်အသးလၢ ဟီၣ်ခိၣ်ဒီဘ့ၣ်​ ကမၤဝဲဒ်အံၤလီၤ.c ဒီပုၢ်ဝဲၢ်လၢအမၤတၢ်လၢ သဲစးဝဲၤကျိၤန့ၣ်​ ယၢၤထီၣ်ဝဲ ဟီၣ်ခိၣ်ဒီဘ့ၣ်သဲစးတၢ်ဘျၢ ဒ်သိးရူကပာ်ဂၢၢ်ပာ်ကျၢၤဝဲလၢ ပှၤထူလံၤဖိတဖၣ်စ့ၢ်ကီး အိၣ်ဒီးပှၤဟီၣ်ခိၣ်ဖိခွဲးယာ်လီၤ. ခီဖျိလၢအဝဲသ့ၣ်​ မ့ၢ်ဝဲပှၤထူလံၤဖိအဃိ အတၢ်ခွဲးတၢ်ယာ် တလီၤမၢ်ဘၣ်.

ပဒီပုၢ်ဝဲၢ်လၢ အအိၣ်လၢ အိဒၢၤဘလိၣ်​ တၢ်တြီၤတဖၣ်န့ၣ်​ ခိးကွၢ်လၢ်ဝဲ ရူအတၢ်ဆၢတဲာ်လီၤ. ဖဲန့ၣ်အဆၢကတီၢ် အဝဲသ့ၣ်တဖၣ်​ ပာ်လုၢ်ပာ်ပှ့ၤဝဲ တၢ်မၤစၢၤလၢအဝဲသ့ၣ်​ ဒိးန့ၢ်ဘၣ်ဝဲလီၤ. တၢ်အိၣ်ဖှိၣ်သးပှၢ်လၢ အမံၤမ့ၢ် စံၣ်စၤ လၢအအိၣ်လၢ အံၣ်လူမဲၤ ခွဲးခၠးဝၤ တၢ်အိၣ်ဖှိၣ်န့ၣ်​ တဲဝဲလၢ “ထဲဒၣ်ယဟိဝၤယွၤတဂၤလီၤ, မၤန့ၢ်တၢ်အါမးလၢ ပှၤစှၤဂၤအဂီၢ် ခီဖျိလၢအတၢ်ကရၢကရိ.”

ပီၢ်ရီလၢအဟံးမူဒါလၢ တၢ်မူးအဂီၢ်တဖၣ်န့ၣ်​ မ့ၢ်ဝဲယဟိဝၤပှၤအုၣ်အသးတဖၣ်လီၤ. အဝဲသ့ၣ်တဖၣ်န့ၣ်​ အသးအိၣ်ဟ့ၣ်ကူၣ်ဟ့ၣ်ဖး တၢ်လၢဘၣ်ဃးဒီး သဲစးတကပၤ ဒီးတဃ့ဝဲအဘူးအလဲဘၣ်. ဘၣ်ဆၣ်​ ကတီၣ်ထီၣ်​ တၢ်မူးအဂီၢ်, တၢ်ကတဲာ်ကတီၤတၢ်အဂီၢ် ဒီးကပာ်ဖျါထီၣ်​ တၢ်ဂ့ၢ်လၢရူပူၤအဂီၢ် တၢ်ဆၢကတီၢ် ဒီးကျိၣ်စ့လၢာ်ဝဲအါမးလီၤ. ပဒီပုၢ်ဝဲၢ်ပီၢ်ရီတဖၣ်​ ဒီးဒီပုၢ်ဝဲၢ်အဂၤတဖၣ်န့ၣ်​ ဖဲအဝဲသ့ၣ်​ ကတဲာ်ကတီၤဝဲ တၢ်ဂ့ၢ်လၢကထီၣ်ရူအဂီၢ်အခါ တၢ်ဆၢကတီၢ်လၢာ်ဝဲအနၣ်ရံၣ်​ ၃၈၀ ဘျဲၣ်​ ဒီးဒ်သိးအဝဲသ့ၣ်​ ကကွဲးကျိာ်ထံဝဲ တၢ်ဂ့ၢ်လၢကလဲၤဒိကနၣ်ဝဲလၢ မဲးကစံၣ်ကိၣ်​ အရူအဂီၢ်အခါ တၢ်ဆၢကတီၢ်လၢာ်ဝဲ အနၣ်ရံၣ်​ ၂၄၀ လီၤ. ပီၢ်ရီအဂၤ ၄၀ ဃၣ်ဃၣ်လၢ အအိၣ်လၢ ဟီၣ်ခိၣ်ဒီဘ့ၣ်န့ၣ်​ သူဝဲတၢ်ဆၢကတီၢ်, နၣ်ရံၣ်လၢအကယၤတဖၣ်​ လၢကထီၣ်ရူလၢ အဲးခွံးဒီအဂီၢ်လီၤ. ဒ်သိးပကဒီသဒၢ ပဒီပုၢ်ဝဲၢ်တဖၣ်အဂီၢ် တၢ်လၢာ်ဘူၣ်လၢာ်စ့ၤတဖၣ်​ ပဒိးန့ၢ်ဘၣ်အီၤဖဲလဲၣ်. ပဒိးန့ၢ်ဘၣ်အီၤ ခီဖျိလၢ သုဟ့ၣ်လီၤတၢ်မၤဘူၣ်လၢ ကျဲအါဘိ ဒ်အဘၣ်တၢ်ပာ်ဖျါထီၣ်အီၤလၢ donate.jw.org အပူၤအဃိလီၤ. ပစံးဘျုးဘၣ်သုဒိၣ်မးလၢ သုတၢ်သးအိၣ်ဟ့ၣ်တၢ်အဃိလီၤ.