ပသူတၢ်မၤဘူၣ်တဖၣ်ဒ်လဲၣ်
တၢ်အဖျၢၣ်ဖိတဖၣ်လၢ အဆီတလဲပှၤတၢ်အိၣ်မူ
လါအီးကထိဘၢၣ် ၁, ၂၀၂၁
၁၉၁၂, လါယူၤ ၁, တၢးထီခိးတၢ် ပာ်ဖျါဝဲလၢ “ပှၤဖးလံာ်ဖိအါတက့ၢ်န့ၣ် ကသ့ၣ်ညါလိာ်အသးဒီး ပှၤလၢအမဲာ်တထံၣ်တၢ်တဖၣ်လီၤ. လံာ်လဲၢ်လၢ ပှၤမဲာ်တထံၣ်တၢ်အဂီၢ်န့ၣ် ပှၤဒိးန့ၢ်ကလီသ့ဝဲလံ. . . လံာ်အံၤ ဘၣ်တၢ်စဲးကျံးထုးထီၣ်အီၤလၢ လံာ်မဲာ်ဖျၢၣ်ကဖိတဖၣ်လၢ ပှၤမဲာ်တထံၣ်တၢ်ဖးဝဲသ့လီၤ. ပာ်ဖျါထီၣ်စ့ၢ်ကီးဝဲလၢ “ပှၤမဲာ်တထံၣ်တၢ်အါတက့ၢ်န့ၣ် စံးဘျုးဝဲလၢ ပၣ်ဃုာ်ဒီးတၢ်ကစီၣ်လၢ ပကဒိးန့ၢ်ဘၣ် တၢ်ဆိၣ်ဂ့ၤလၢအဂ့ၤဒိၣ်မးတဖၣ် လၢဟီၣ်ခိၣ်အံၤအဃိ”
ဖဲန့ၣ်အခါ ထံကီၢ်လၢအကတိၤ ကိၤလၤဝါကျိာ်တဖၣ် အပှၤမဲာ်တထံၣ်တၢ်အကျိာ်န့ၣ် လီၤဆီလိာ်အသး. ဘၣ်ဆၣ် မ့မ့ၢ် ယဟိဝၤပှၤအုၣ်အသးတဖၣ်န့ၣ် ထုးထီၣ်ဝဲ လံာ်စီဆှံ တၢ်မ့ၢ်တၢ်တီလၢ လံာ်မဲာ်ဖျၢၣ်ကဖိတဖၣ် လၢအမ့ၢ် ပှၤမဲာ်တထံၣ်တၢ်အလံာ်ဝံၤလံ. ဒီးပဆဲးထုးထီၣ်ဒံး. ပလံာ်လဲၢ်လၢ ပှၤမဲာ်တထံၣ်တၢ်အဂီၢ်န့ၣ် ပှၤဒိးန့ၢ်ဘၣ်အီၤသ့လၢ ကျိာ် ၅၀ ဘျဲၣ်လံ. ပမၤအီၤဒ်လဲၣ်.
လံာ်မဲာ်ဖျၢၣ်တဖျၢၣ်န့ၣ် ပၣ်ဃုာ် တၢ်အဖျၢၣ်ဖိတဖျၢၣ် တုၤလၢဃုဖျၢၣ်လီၤ. တၢ်အဖျၢၣ်ဖိတဖၣ်န့ၣ် ဘၣ်တၢ်ရဲၣ်လီၤအီၤလၢ တၢ်လွံၢ်နၢၣ်ဃုခါအပူၤ
တၢ်ဆီတလဲက့ၤဆူ ပှၤမဲာ်တထံၣ်တၢ် အလံာ်မဲာ်ဖျၢၣ်
ပှၤကထုးထီၣ် ပှၤမဲာ်တထံၣ်တၢ်အလံာ်လဲၢ်အဂီၢ် အဆိကတၢၢ်န့ၣ် ပှၤဘၣ်ဆီတလဲလံာ်မဲာ်ဖျၢၣ်တဖၣ်ဆူ ပှၤမဲာ်တထံၣ်တၢ် အလံာ်မဲာ်ဖျၢၣ်. မဲကၢၤ မံလဲ လၢအမၤတၢ်လၢ Text Processing Services လၢ ဖဲထစၢၤ, နူယီး, တဲဝဲလၢ “လၢအပူၤကွံာ်န့ၣ် ပကဆီတလဲလံာ်မဲာ်ဖျၢၣ်ဆူ ပှၤမဲာ်တထံၣ်တၢ် အလံာ်မဲာ်ဖျၢၣ်အဂီၢ် ပသူ စီးဝဲ (software) လၢပှၤဂၤမၤဝဲ, ဘၣ်ဆၣ် ပသူအီၤလၢ ကျိာ်ခဲလၢာ်လၢ ပလိၣ်ဘၣ်အီၤတဖၣ်တသ့ဘၣ်. ခဲအံၤ ပသူ Watchtower Translation System လၢကဲထီၣ်တၢ်မၤစၢၤလၢ ပကထုးထီၣ်လံာ်လဲၢ်လၢ ပှၤမဲာ်တထံၣ်တၢ်အကျိာ် အါတက့ၢ်လၢ ပှၤသူအီၤလၢ ဟီၣ်ခိၣ်ဒီဘ့ၣ်လီၤ. တၢ်ရဲၣ်တၢ်ကျဲၤ ဒ်သိးအံၤန့ၣ် နဟးဃုလၢ တၢ်လီၢ်အဂၤတဘၣ်ဘၣ်.”
ပှၤမဲာ်တထံၣ်တၢ်အလံာ်န့ၣ် ပၣ်ဃုာ်ဒီးလံာ်မဲာ်ဖျၢၣ် တကးဒံးဘၣ် ပၣ်ဃုာ်ဒီးလံာ်မဲာ်ဖျၢၣ်လၢ တၢ်ဂီၤအဂီၢ်စ့ၢ်ကီး. အဒိ, တၢ်ဂီၤလၢ အိၣ်မူလီၤထူလီၤယိာ် ပှဲၤဒီးတၢ်သးခု အကုခိၣ်န့ၣ် ပှၤကွဲးလီၤလၢ “ပှၤပိာ်ခွါတဂၤ စးထီၣ်ဟးလၢကျဲက့ၣ်ကူတဘိအဖီခိၣ် ဒီးအကပၤန့ၣ် အိၣ်ဒီးကစၢၢ်ကလိ ဒီးသ့ၣ်ထူၣ်ဝၣ်ထူၣ်လၢ အလါဟ့.” ကၠဲၤၡဲး လၢအမဲာ်တထံၣ်တၢ် လၢအမၤပှၤလဲၤလၢညါ ဒီးကဲတၢ်အိၣ်ဖှိၣ်အပှၤမၤစၢၤတၢ်တဂၤန့ၣ် တဲဝဲလၢ “တၢ်ဂီၤတခါအံၤ လုၢ်ဒိၣ်ပှ့ၤဒိၣ်လၢ ယဂီၢ်ဒိၣ်မး.”
ပှၤဆီတလဲလံာ်မဲာ်ဖျၢၣ်ဝံၤအလီၢ်ခံ လံာ်တြံာ် (file) တဖၣ်န့ၣ် ပှၤဆှၢလီၤဆူ ဝဲၤတြၢ်ဒ်သိး ကမၤကဖိထီၣ်ဝဲ လံာ်မဲာ်ဖျၢၣ်အဂီၢ်. လံာ်တဖၣ်အံၤန့ၣ် ပှၤစဲကျံးအီၤလၢ လံာ်က့တီၣ်တီၣ်အဖီခိၣ် ဒီးမၤကဖိထီၣ်အဖျၢၣ်တဖၣ်. တၢ်အဖျၢၣ်ဖိတဖၣ်အံၤ ပှၤမၤအီၤဒ်သိး ပှၤသူအီၤ ကတူၢ်ယံာ်အဂီၢ်. လၢခံလံာ်ကဘျံးတဖၣ် ပှၤပာ်ဖှိၣ်ထီၣ်, ဘျးစဲထီၣ်အီၤလၢ ထးကွီၤ ဝံၤဒီးပှၤဆှၢလီၤဆူ တၢ်အိၣ်ဖှိၣ်တဖၣ် ဒ်လံာ်အဂၤတဖၣ်အသိး. မ့တမ့ၢ် ပှၤကွဲးလီၤလၢ “ပှၤမဲာ်တထံၣ်တၢ်အဂီၢ်” ဒီးပှၤဆှၢလီၤလၢ လံာ်တၢး (post office) လီၤ. အလီၢ်မ့ၢ်အိၣ်န့ၣ် ဝဲၤတြၢ်တဖၣ် ဆှၢလီၤဝဲ ပှၤမဲာ်တထံၣ်တၢ်အလံာ်လၢ လိၣ်လၢတၢ်အိၣ်ဖှိၣ်ရိဖှိၣ်အဂီၢ်လီၤ.
တၢ်မၤတဖၣ်အံၤအဂီၢ် လၢာ်ဝဲတၢ်ဆၢကတီၢ်ဒီး ကျိၣ်စ့အါမး. ပတၢ်စဲကျံးတၢ်အရူလၢ ဝီ(လ်)ခ့ နူယီးန့ၣ် မ့ၢ်စဲကျံးထုးထီၣ်ဝဲ လံာ်စီဆှံလၢ ပှၤမဲာ်တထံၣ်တၢ်အလံာ် ၂ ဘ့ၣ်န့ၣ် တၢ်ဆၢကတီၢ်လၢာ်ထဲသိးဒီး တၢ်ထုးထီၣ် လံာ်စီဆှံလၢပှၤမဲာ်ထံၣ်တၢ်အဂီၢ် အဘ့ၣ် ၅၀,၀၀၀ ညါ. လံာ်စီဆှံလၢ ပှၤမဲာ်တထံၣ်တၢ်အဂီၢ်လၢ ကိၤလၤဝါကျိာ် တဘ့ၣ်န့ၣ် အိၣ်ဝဲ ၂၅ ကတြူၢ် ဒီးတၢ်လၢာ်ဘူၣ်လၢာ်စ့ၤလၢ လံာ်အကတြူၢ်တဖၣ်အဂီၢ်န့ၣ် လၢာ်အါန့ၢ်ဒံး လံာ်စီဆှံလၢပှၤမဲာ်ထံၣ်တၢ်အဂီၢ် အတၢ်လၢာ်ဘူၣ်လၢာ်စ့ၤ ၁၂၃ စးလီၤ. ထဲလံာ်ကုခိၣ်တခါလၢ လံာ် ၂၅ ကတြူၢ်အဂီၢ်န့ၣ် လီၤလဲဝဲ စ့ဒီလၣ် ၁၅၀ (U.S.) လီၤ.
ဟီၣ်ခိၣ်သီ တၢ်ကွဲးကျိာ်ထံလံာ်စီဆှံလၢ ကိၤလၤဝါကျိာ် လၢပှၤမဲာ်တထံၣ်တၢ်အဂီၢ်လၢ အိၣ်ဝဲ ၂၅ ကတြူၢ်
ပှၤလၢအမၤစၢၤတၢ်လၢ တၢ်ထုးထီၣ် ပှၤမဲာ်တထံၣ်တၢ် အလံာ်လဲၢ်တဖၣ်, ဘၣ်ဃးဒီးအတၢ်မၤန့ၣ် တဲဝဲဒ်လဲၣ်. နါဒံၤယၤ လၢအမၤတၢ်လၢ ကလံၤထံး အၤဖြံၤကၤဝဲၤတြၢ်န့ၣ် တဲဝဲလၢ “ပဒီပုၢ်ဝဲၢ်လၢ အမဲာ်တထံၣ်တၢ် မ့တမ့ၢ် အမဲာ်တထံၣ်တၢ်ဂ့ၤဂ့ၤတဖၣ် အတၢ်အိၣ်မူန့ၣ် တညီဘၣ်. အဃိ ယမၤစၢၤဘၣ် အဝဲသ့ၣ်န့ၣ် ယထံၣ်အီၤဒ် တၢ်ဆိၣ်ဂ့ၤတခါ. တၢ်န့ၣ်မ့ၢ်တၢ်အုၣ်အသးလၢ ယဟိဝၤယွၤ အဲၣ်အဝဲသ့ၣ်ဒိၣ်မး.”
မၤလိပှၤမဲာ်တထံၣ်တၢ်အလံာ်
ဘၣ်ဆၣ်, ပှၤမဲာ်တထံၣ်တၢ်လၢ အဖးဝဲ ပှၤမဲာ်တထံၣ်တၢ်အလံာ်တဘၣ်အဂီၢ်ဟီမီၤ. ပူၤကွံာ်စှၤကိာ်နံၣ်န့ၣ် ပထုးထီၣ်ဝဲလံာ်လၢအမ့ၢ် မၤလိပှၤမဲာ်တထံၣ်တၢ်အလံာ်, လၢပၣ်ဃုာ်ဒီး ပှၤမဲာ်တထံၣ်တၢ်အလံာ် ဒီးလံာ်စဲကျံးလီၤ. ပှၤတိာ်ပာ်ဝဲလၢ ပှၤမဲာ်ထံၣ်တၢ်ဒီး ပှၤမဲာ်တထံၣ်တၢ် ကသူဝဲဒ်သိးသိးအဂီၢ်. လံာ်အံၤန့ၣ် ပၣ်ဃုာ်ဒီး တၢ်ပီးတၢ်လီလၢ ပှၤမဲာ်တထံၣ်တၢ်တဖၣ် ကသူဝဲအဂီၢ်. ပှၤလၢအမၤလိ ပှၤမဲာ်တထံၣ်တၢ်အကျိာ်န့ၣ် သူဝဲတၢ်ပီးတၢ်လီတဖၣ်အံၤလၢ ကကွဲးလီၤဝဲ ပှၤမဲာ်တထံၣ်တၢ်အလံာ်လၢ အနီၢ်ကစၢ်အဂီၢ်. မ့ၢ်လၢအကွဲးလီၤဝဲဒ်န့ၣ်အဃိ မၤစၢၤအီၤလၢ ကနီၣ်ဘၣ်ဝဲ လံာ်မဲာ်ဖျၢၣ်တဖျၢၣ်စုာ်စုာ် ဖဲအထိးလီၤဝဲအခါလီၤ.
“ယမ့ၢ်တဖးဘၣ် ယအိၣ်တကဲဘၣ်”
ပဒီပုၢ်ဝဲၢ်လၢ အမဲာ်တထံၣ်တၢ် မ့တမ့ၢ် အမဲာ်တထံၣ်တၢ်ဂ့ၤဂ့ၤတဖၣ် ဒိးန့ၢ်ဘၣ်အဘျုးလၢ ပလံာ်လဲၢ်တဖၣ်ဒ်လဲၣ်. အၢနဲး လၢအအိၣ်လၢ ဟ့းထံၣ်န့ၣ် ညီနုၢ်ထီၣ်ဝဲ တၢ်အိၣ်ဖှိၣ်လီၤ. ဘၣ်ဆၣ် အဝဲတအိၣ်ဒီး ပှၤမဲာ်တထံၣ်တၢ်အလံာ်ဘၣ်. အဃိ, ဘၣ်တိၢ်နီၣ်သံဃာ်ဝဲ တၢ်ဂ့ၢ်တၢ်ကျိၤလၢ အကမၤဝဲအကၠိဖိမူဒါအဂီၢ်ဒီး ကဟ့ၣ်တၢ်စံးဆၢလၢ တၢ်အိၣ်ဖှိၣ်အဂီၢ်. ခဲအံၤအဝဲတဲဝဲလၢ. “ဘၣ်ဆၣ် ခဲအံၤ ဖဲယအဲၣ်ဒိးဟ့ၣ်တၢ်စံးဆၢ တဘျီဂ့ၤ တဘျီဂ့ၤန့ၣ် ယစံးဆၢသ့လီၤ. ယတူၢ်ဘၣ်လၢ ယပၣ်ဃုာ်ဘၣ်လၢ ယဒီပုၢ်ဝဲၢ်တဖၣ်အကျါ. ပဝဲခဲလၢာ် ပဒိးန့ၢ်ဘၣ် နီၢ်သးအတၢ်အီၣ်တၢ်အီဒ်သိးသိးလီၤ.”
ဒီပုၢ်ဝဲၢ် ယၣ် လၢအမဲာ်တထံၣ်တၢ်ဒီး အမ့ၢ်တၢ်အိၣ်ဖှိၣ်သးပှၢ်လၢ အအိၣ်လၢ ကီၢ်အီးစထြံယါန့ၣ်ဘၣ်ဖီၣ်ဝဲ တၢးထီခိးတၢ် တၢ်မၤလိ ဒီးတၢ်အိၣ်ဖှိၣ် တၢ်မၤလိလံာ်စီဆှံ. အဝဲတဲဝဲလၢ “ပလံာ်လဲၢ်တဖၣ်န့ၣ် အၡဲဒိၣ်န့ၢ်ဒံး ပှၤမဲာ်တထံၣ်တၢ်အလံာ်လဲၢ်လၢ ယဖးတ့ၢ်ဘၣ်တဖၣ်ဒံး. အဒိ, အိၣ်ဒီး ကဘျံးပၤနီၣ်ဂံၢ်, တၢ်ဂ့ၢ်အဘျဲၣ်လၢ ပဃုဘၣ်ညီ, တၢ်ဂီၤလၢပှၤကွဲးဖျါထီၣ် အခီပညီတဖၣ်”
စွၤအိၤလၢ အအိၣ်လၢ ကလံၤထံး ခိရံယါ ဒီးအမ့ၢ်ပှၤလဲၤလၢညါတဂၤန့ၣ် အမဲာ်တထံၣ်တၢ်ဒီး တနၢ်ဟူတၢ်ဘၣ်. လၢအပူၤကွံာ် အဝဲမ့ၢ်ထီၣ်တၢ်အိၣ်ဖှိၣ်န့ၣ် အဝဲဘၣ်သန့ၤအသးလၢ စုပနီၣ်ကျိာ်လၢ ပှၤဘၣ်ဖီၣ်အစုဒီးၡဲပၠးအီၤ သနာ်က့ ခဲအံၤ အဝဲဖးဝဲ ပှၤမဲာ်တထံၣ်တၢ်အလံာ်လၢ အနီၢ်ကစၢ်သ့ဝဲလံ. အဝဲတဲဝဲလၢ “ပှၤမဲာ်တထံၣ်တၢ်အလံာ်အဂၤတဖၣ်န့ၣ် အဖျၢၣ်ဖိတဖၣ် အိၣ်တ့ၢ်တနီၤ, အကျိၤတဘျၢဘၣ် ဒီးလံာ်ကဘျံးဘူအဃိ ယဖးဘၣ်အီၤကီဝဲ. မ့မ့ၢ် ယဟိဝၤပှၤအုၣ်အသးတဖၣ် သူဝဲလံာ်ကဘျံးလၢအဂ့ၤ ဒီးအဖျၢၣ်ဖိတဖၣ် ကဖိထီၣ်ဂ့ၤဂ့ၤအဃိ ယဖးဘၣ်ညီဝဲ” အဝဲတဲဒံးဝဲလၢ “လၢအပူၤကွံာ်န့ၣ် ယဘၣ်မၤလိ လံာ်လဲၢ်လၢ အဒိးသန့ၤထီၣ်အသးလၢ လံာ်စီဆှံတဖၣ်န့ၣ် လၢပှၤဂၤအတၢ်မၤစၢၤလီၤ. ဘၣ်ဆၣ် ခဲအံၤ ယမၤလိဒၣ်ယတၢ်သ့လံ. ယကတဲာ်ကတီၤ တၢ်အိၣ်ဖှိၣ်လၢ တနွံဘၣ်တနွံအဂီၢ်လၢယနီၢ်ကစၢ်သ့ဒီး ယပၣ်ဃုာ်ဘၣ် လၢလၢပှဲၤပှဲၤအဃိ ယသးခု. ပလံာ်လဲၢ်လၢ ပှၤမဲာ်တထံၣ်တၢ်အဂီၢ်န့ၣ် ယဖးအီၤခဲလၢာ်. ယမ့ၢ်တဖးဘၣ် ယအိၣ်တကဲဘၣ်.”
ဒ်ပလံာ်လဲၢ်အဂၤတဖၣ်အသိး ပှၤမဲာ်တထံၣ်တၢ်အလံာ်လၢ ပထုးထီၣ်တဖၣ်န့ၣ် အိၣ်စ့ၢ်ကီးဒီး လံာ်ကျိၤအံၤ “လံာ်တဘ့ၣ်အံၤတမ့ၢ်လၢ ပှၤကဆါအီၤအဂီၢ်ဘၣ်. ဘၣ်တၢ်ကတဲာ်ကတီၤအီၤလၢ ဟီၣ်ခိၣ်ဒီဘ့ၣ် တၢ်ဒုးသ့ၣ်ညါနၢ်ပၢၢ် လံာ်စီဆှံအတၢ်မၤ, လၢအဘၣ်တၢ်ဆီၣ်ထွဲမၤစၢၤအီၤလၢ တၢ်မၤဘူၣ်လၢတၢ်သးအိၣ်န့ၣ်လီၤ.” ပစံးဘျုးဘၣ်သုဒိၣ်မး လၢသုဟ့ၣ်လီၤတၢ်မၤဘူၣ်လၢ donate.jw.org လီၤ. မ့ၢ်လၢသုဟ့ၣ်လီၤ တၢ်မၤဘူၣ်လၢ တၢ်သူၣ်အိၣ်သးအိၣ်အဃိ ပရၤလီၤလံာ်လဲၢ်လၢအဒိးသန့ၤထီၣ်အသးလၢ လံာ်စီဆှံတဖၣ်န့ၢ်ဝဲ ဃုာ်ဒီးလံာ်လဲၢ်လၢ ပှၤမဲာ်တထံၣ်တၢ်အဂီၢ်လီၤ.