စံၣ်ညီၣ်ကွီၢ်
၁ စီၤယိၤၡူ သံဝံၤအလီၢ်ခံ+ ပှၤအံၣ်စရ့လးဖိ သံကွၢ် ယဟိဝၤယွၤလၢ+ “လၢပကျါန့ၣ် မတၤကဘၣ်လဲၤထီၣ်ဒုးဆိ ပှၤကနၤဧၣ်ဖိတဖၣ်လဲၣ်.” ၂ ယဟိဝၤယွၤ တဲဆၢက့ၤဝဲလၢ “ယူဒၤအဒူၣ် ကဘၣ်လဲၤထီၣ်လီၤ.+ ယဟ့ၣ်လီၤကီၢ်လၢ အဝဲသ့ၣ် အစုပူၤလံ.” ၃ ဒီးယူဒၤအဒူၣ် တဲဘၣ်အဝဲသ့ၣ် အဒီပုၢ်ဝဲၢ် စူၤမ့းအိၣ်အဒူၣ်လၢ “လဲၤထီၣ်ဒီးပှၤဆူ ဟီၣ်ကဝီၤလၢ အဘၣ်တၢ်ဟ့ၣ်လီၤပှၤ+ ဒ်သိးပကဒုး ပှၤကနၤဧၣ်ဖိ အဂီၢ်မီၤ. မ့ၢ်ဝံၤန့ၣ် ပကလဲၤဒီးသုဆူ ဟီၣ်ကဝီၤလၢ အဘၣ်တၢ်ဟ့ၣ်လီၤသုလီၤ.” အဃိ စူၤမ့းအိၣ်အဒူၣ် လဲၤဒီးအဝဲသ့ၣ်လီၤ.
၄ ဖဲယူဒၤအဒူၣ် လဲၤထီၣ်ဒုးတၢ်အခါ ယဟိဝၤယွၤ ဟ့ၣ်လီၤ ပှၤကနၤဧၣ်ဖိ ဒီးပှၤပရးစၤဖိ လၢအဝဲသ့ၣ်အစုပူၤလီၤ.+ ဒီးအဝဲသ့ၣ် မၤနၢၤဝဲ ပှၤပိာ်ခွါ အဂၤ ၁၀,၀၀၀ ဖဲဝ့ၢ်ဘ့စ့းလီၤ. ၅ ဒီးဖဲအဝဲသ့ၣ် မၤနၢၤ ပှၤကနၤဧၣ်ဖိ+ ဒီးပှၤပရးစၤဖိအခါ+ အဝဲသ့ၣ် ထံၣ်စ့ၢ်ကီးဝဲ စီၤအဒိနံၤဘ့စ့း ဖဲဝ့ၢ်ဘ့စ့း ဒီးအဝဲသ့ၣ် ဒုးလိာ်သး ဒီးစီၤအဒိနံၤဘ့စ့း ဖဲန့ၣ်လီၤ. ၆ ဖဲစီၤအဒိနံၤဘ့စ့း ဃ့ၢ်ဝဲအခါ အဝဲသ့ၣ် လူၤအီၤ ဒီးဖီၣ်န့ၢ်အီၤလီၤ. ဝံၤဒီးအဝဲသ့ၣ် ဒီၣ်တဲာ်ကွံာ် အစုမုၢ်တဖၣ် ဒီးအခီၣ်မုၢ်တဖၣ်လီၤ. ၇ ဒီးစီၤအဒိနံၤဘ့စ့း တဲဝဲလၢ “စီၤပၤအဂၤ ၇၀ လၢအစုမုၢ်တဖၣ် ဒီးအခီၣ်မုၢ်တဖၣ် ဘၣ်တၢ်ဒီၣ်တဲာ်ကွံာ်အီၤန့ၣ် ထၢအီၣ်တၢ်အီၣ်လၢ အလီၤတဲာ်လၢ ယစီၢ်နီၤခိၣ် အဖီလာ်လီၤ. အဃိ ခဲအံၤန့ၣ် ကစၢ်ယွၤ မၤဆၢက့ၤယၤ ဒ်ယမၤတ့ၢ် အဝဲသ့ၣ်တဖၣ် အသိးလီၤ.” လၢခံ အဝဲသ့ၣ်လဲၤဆှၢအီၤ လၢဝ့ၢ်ယရူၤၡလ့ၣ်+ ဒီးအဝဲသံဝဲဖဲန့ၣ်လီၤ.
၈ တကးဒံးဘၣ် ယူဒၤအဒူၣ် ဒုးစ့ၢ်ကီးဝဲ ဝ့ၢ်ယရူၤၡလ့ၣ်+ ဒီးမၤန့ၢ်ဝ့ၢ်လီၤ. အဝဲသ့ၣ် ကျီသံကွံာ် ပှၤဝ့ၢ်ဖိလၢနး ဒီးဒွဲၣ်အူထီၣ်ကွံာ်ဝဲဝ့ၢ်လီၤ. ၉ ဒီးယူဒၤအဒူၣ် လဲၤဒုးဝဲ ပှၤကနၤဧၣ်ဖိ လၢအအိၣ်လၢ ကစၢၢ်ကလိကျါ ဒီးပှၤလၢအအိၣ်လၢ နဲကဲၤ ဒီးၡ့ဖလၣ်အပူၤလီၤ.+ ၁၀ ဝံၤဒီးယူဒၤအဒူၣ် လဲၤဒုးဝဲ ပှၤကနၤဧၣ်ဖိ လၢအအိၣ်လၢ ဝ့ၢ်ဃ့ဘြိၣ်လီၤ. (ဝ့ၢ်ဃ့ဘြိၣ်န့ၣ် လၢညါပှၤကိးအီၤလၢ ကံးရယးအၢ်ဘၤ) ဒီးအဝဲသ့ၣ် ကျီသံကွံာ် စီၤၡ့ၤၡဲ, စီၤအဃံမ့ၣ် ဒီးစီၤတးလမဲလီၤ.*+
၁၁ ဒီးအဝဲသ့ၣ် ဟးထီၣ်ဖဲန့ၣ် ဒီးလဲၤထီၣ်ဒုးဝဲ ပှၤအိၣ်လၢ ဝ့ၢ်ဒဘံၢ်တဖၣ်လီၤ.+ (ဝ့ၢ်ဒဘံၢ်န့ၣ် လၢညါပှၤကိးအီၤလၢ ကံးရယးစ့ဖ့ၢ်.)+ ၁၂ ဝံၤဒီးစီၤကၤလ့း+ တဲဝဲလၢ “ပှၤလၢအဒုး ဝ့ၢ်ကံးရယးစ့ဖ့ၢ် ဒီးမၤန့ၢ်အီၤန့ၣ် ယကဟ့ၣ်အီၤ ယဖိမုၣ်နီၢ်ဧၤကစ့ၤ ဒ်သိးအကကဲထီၣ် အမါလီၤ.”+ ၁၃ ဒီးစီၤဧီၤသန့လး+ လၢအမ့ၢ် စီၤကၤလ့းအပုၢ် စီၤကနးစး အဖိခွါန့ၣ်+ မၤန့ၢ်ဝဲဝ့ၢ်လီၤ. အဃိ စီၤကၤလ့း ဟ့ၣ်အီၤ အဖိမုၣ်နီၢ်ဧၤကစ့ၤ လၢအမါလီၤ. ၁၄ ဖဲနီၢ်ဧၤကစ့ၤ လဲၤလၢ အဝၤစီၤဧီၤသန့လး အဟံၣ်အခါ အဝဲမၢ အဝၤဃ့ ဟီၣ်ခိၣ်လီၢ် တကဝီၤလၢ အပၢ်စီၤကၤလ့းအအိၣ်လီၤ. ဒီးနီၢ်ဧၤကစ့ၤ စံၣ်လီၤလၢ ကသ့ၣ်ယီၤအလိၤ* ဒီးစီၤကၤလ့း သံကွၢ်အီၤလၢ “နလီကီတၢ်မနုၤလဲၣ်.” ၁၅ ဒီးနီၢ်ဧၤကစ့ၤ တဲအီၤလၢ “ဝံသးစူၤ ဆိၣ်ဂ့ၤယၤမီၤ. နဟ့ၣ်လီၤယၤ ဟီၣ်ခိၣ်လီၢ်လၢ ကလံၤထံး တကဝီၤလံ အဃိ ဟ့ၣ်စ့ၢ်ကီးယၤ ကူလိၤသမံမီၤ.”* ဒီးစီၤကၤလ့း ဟ့ၣ်လီၤအီၤ ကူလိၤ လၢထးခီ ဒီးလၢလာ်ခီန့ၣ်လီၤ.
၁၆ ဒီးပှၤက့ၣ်ဖိလၢအမ့ၢ်+ စီၤမိၤၡ့အမံၤပှၢ်+ အစၢၤအသွဲၣ်တဖၣ် ဃုာ်ဒီး ယူဒၤအပှၤဂီၢ်မုၢ်တဖၣ် ဟဲထီၣ်ဝဲလၢ ဝ့ၢ်သ့ၣ်စူၣ်ပလိၣ်*+ အပူၤ ဒီးလဲၤဝဲဆူ ယူဒၤအပှၢ်မုၢ်ကနၢ လၢအအိၣ်လၢ ဝ့ၢ်ဧရးအကလံၤထံးတခီလီၤ.+ ဒီးအဝဲသ့ၣ် အိၣ်ဝဲဆိးဝဲလၢ ပှၤဖဲန့ၣ်တဖၣ်အကျါလီၤ.+ ၁၇ ဒီးယူဒၤအဒူၣ် ဒီးအဒီပုၢ်ဝဲၢ် စူၤမ့းအိၣ်အဒူၣ် လဲၤထီၣ်ဒုးဝဲ ပှၤကနၤဧၣ်ဖိ လၢအအိၣ်လၢ ဝ့ၢ်စ့ဖး ဒီးမၤဟးဂီၤကွံာ်ဝဲဝ့ၢ်လီၤ.+ အဃိ အဝဲသ့ၣ် ကိးက့ၤဝဲ ဝ့ၢ်အမံၤလၢ ဝ့ၢ်ဃိၢ်မါလီၤ.+ ၁၈ ဝံၤဒီး ယူဒၤအဒူၣ် မၤန့ၢ်ဝဲ ဝ့ၢ်ဂါစၤ,+ ဝ့ၢ်အၤၡကလိၣ်,+ ဝ့ၢ်ဧ့ကြိၣ်+ ဒီးဝ့ၢ်တဖၣ်အံၤ အဟီၣ်ကဝီၤတဖၣ်လီၤ. ၁၉ ယဟိဝၤယွၤ အိၣ်ဒီးယူဒၤအဒူၣ် ဒီးအဝဲသ့ၣ်မၤန့ၢ် တၢ်လီၢ်လၢ ကစၢၢ်ကလိကျါလီၤ. ဘၣ်ဆၣ် အဝဲသ့ၣ် နီဟးထီၣ်ကွံာ် ပှၤလၢအအိၣ်ဝဲလၢ တၢ်ပၢၤခိၣ်တဖၣ် တန့ၢ်ဘၣ်, မ့ၢ်လၢ ပှၤတဖၣ်အံၤ အိၣ်ဒီးအလ့ၣ်ကဟၣ်သုးလၢ အအိၣ်ဒီး ထါဂဲာ်အဃိလီၤ.+ ၂၀ ဒီးဒ်စီၤမိၤၡ့ အၢၣ်လီၤပာ်စၢၤဝဲအသိး+ အဝဲသ့ၣ်ဟ့ၣ်ဝဲ စီၤကၤလ့းလၢ ဝ့ၢ်ဃ့ဘြိၣ်လီၤ. ဒီးစီၤကၤလ့း နီဟးထီၣ်ကွံာ်ဝဲ စီၤဧနး အဖိခွါသၢဂၤ လၢဝ့ၢ်ဃ့ဘြိၣ်အပူၤလီၤ.+
၂၁ မ့မ့ၢ်ပှၤဘံၣ်ယၤမံၣ်ဖိန့ၣ် တနီဟးထီၣ်ကွံာ် ပှၤယဘူၣ်ဖိ လၢအအိၣ် လၢဝ့ၢ်ယရူၤၡလ့ၣ် အပူၤဘၣ်. အဃိ ပှၤယဘူၣ်ဖိ ဆဲးအိၣ်ဝဲဒီး ပှၤဘံၣ်ယၤမံၣ်ဖိ လၢဝ့ၢ်ယရူၤၡလ့ၣ်အပူၤ တုၤလၢမုၢ်မဆါတနံၤအံၤလီၤ.+
၂၂ ဒီးစီၤယိၤသး အစၢၤအသွဲၣ်တဖၣ်+ လဲၤထီၣ်ဒုး ဝ့ၢ်ဘ့ၤသ့လး ဒီးယဟိဝၤယွၤ အိၣ်ဒီးအဝဲသ့ၣ်လီၤ.+ ၂၃ ဒီးစီၤယိၤသး အစၢၤအသွဲၣ်တဖၣ် လဲၤကွၢ်ဟုၣ် ဝ့ၢ်ဘ့ၤသ့လး (ဝ့ၢ်အံၤ လၢညါပှၤကိးအီၤလၢ လူးစး)+ ၂၄ ဒီးပှၤကွၢ်ဟုၣ်တၢ်တဖၣ် ထံၣ်ဝဲ ပိာ်ခွါတဂၤ ဟးထီၣ်လၢ ဝ့ၢ်ချၢလီၤ. အဃိ အဝဲသ့ၣ် တဲဘၣ်အီၤလၢ “ဝံသးစူၤ ဒုးနဲၣ်ပှၤကျဲလၢ အလဲၤနုာ်လၢဝ့ၢ်ပူၤမီၤ ဒီးပကပာ်ဖျါထီၣ် တၢ်သးကညီၤ လၢနဖီခိၣ်လီၤ.”* ၂၅ အဃိ ပိာ်ခွါတဂၤအံၤ ဒုးနဲၣ်အဝဲသ့ၣ် ကျဲလၢအဝဲသ့ၣ် ကဘၣ်နုာ်လီၤလၢဝ့ၢ်ပူၤ ဒီးအဝဲသ့ၣ် ကျီကွံာ် ပှၤအိၣ်လၢ ဝ့ၢ်ပူၤလၢနး ဘၣ်ဆၣ် အဝဲသ့ၣ်ပျဲပူၤ ပိာ်ခွါတဂၤအံၤ ဒီးအဟံၣ်ဖိဃီဖိ ကိးဂၤဒဲးလီၤ.+ ၂၆ ဒီးပိာ်ခွါတဂၤန့ၣ် လဲၤဝဲလၢ ပှၤဃ့ၤသးဖိအကီၢ် ဒီးတ့ထီၣ်ဝဲ ဝ့ၢ်တဖျၢၣ် ဒီးကိးဝဲအမံၤလၢ လူးစးလီၤ. ဝ့ၢ်အံၤ ပှၤကိးအီၤလၢ လူးစး တုၤလၢ မုၢ်မဆါတနံၤအံၤလီၤ.
၂၇ ပှၤကနၤဧၣ်ဖိ ဆဲးအိၣ်ဝဲလၢ ဝ့ၢ်ဘ့ၤသၡၣ် ဒီးအဒူသဝီတဖၣ်, ဝ့ၢ်တၤနး+ ဒီးအဒူသဝီတဖၣ်, ပှၤဒိၢ်ဖိ အိၣ်တၢ်လီၢ် ဒီးအဒူသဝီတဖၣ်, ပှၤယံးဘျၣ်ဖိ အိၣ်တၢ်လီၢ် ဒီးအဒူသဝီတဖၣ် ဒီးပှၤမကံးဒိၤဖိ အိၣ်တၢ်လီၢ် ဒီးအဒူသဝီတဖၣ် အဃိ ပှၤမနၤၡ့ၤအဒူၣ် တမၤန့ၢ်ဝဲ တၢ်လီၢ်တဖၣ်အံၤဘၣ်.+ ၂၈ ဖဲပှၤအံၣ်စရ့လးဖိတဖၣ် အဂံၢ်အဘါဆူၣ်ထီၣ်အခါ အဝဲသ့ၣ် မၢကဲကုၢ်ဝဲ ပှၤကနၤဧၣ်ဖိတဖၣ်+ ဒီးတနီဟးထီၣ်ကွံာ်အဝဲသ့ၣ် ခဲလၢာ်ခဲဆ့ဘၣ်.+
၂၉ ဒီးပှၤအ့ဖရဲၣ်ဖိ စ့ၢ်ကီး တနီဟးထီၣ်ကွံာ် ပှၤကနၤဧၣ်ဖိ လၢအအိၣ်လၢ ဝ့ၢ်က့စ့ၢ်အပူၤဘၣ်. အဃိ ပှၤကနၤဧၣ်ဖိ ဆဲးအိၣ်ဝဲလၢ အဝဲသ့ၣ်အကျါ လၢဝ့ၢ်က့စ့ၢ်အပူၤလီၤ.+
၃၀ ဒီးပှၤစဘူလိၣ်ဖိ တနီဟးထီၣ်ကွံာ် ပှၤကနၤဧၣ်ဖိ လၢအအိၣ်လၢ ဝ့ၢ်ကံတြိၣ် ဒီးဝ့ၢ်နၤဟလိလး အပူၤဘၣ်.+ အဃိ ပှၤကနၤဧၣ်ဖိ ဆဲးအိၣ်ဝဲလၢ ပှၤစဘူလိၣ်ဖိအကျါ ဒီးပှၤစဘူလိၣ်ဖိ မၢကဲကုၢ်အဝဲသ့ၣ်လီၤ.+
၃၁ ပှၤအၤၡ့ၢ်ဖိ စ့ၢ်ကီး တနီဟးထီၣ်ကွံာ် ပှၤကနၤဧၣ်ဖိ လၢအအိၣ်လၢ ဝ့ၢ်ဧးကိၤဒီးဝ့ၢ်စံဒိၣ်,+ ဝ့ၢ်အၤဃလာ်, ဝ့ၢ်အၤကစံာ်,+ ဝ့ၢ်ဃ့လဘၤ, ဝ့ၢ်အဖံး+ ဒီးရဃိာ် အပူၤဘၣ်.+ ၃၂ ခီဖျိလၢ ပှၤအၤၡ့ၢ်ဖိ တနီဟးထီၣ်ကွံာ် ပှၤကနၤဧၣ်ဖိဘၣ်အဃိ ပှၤအၤၡ့ၢ်ဖိတဖၣ် ဆဲးအိၣ်ဝဲလၢ ပှၤကနၤဧၣ်ဖိတဖၣ်အကျါလၢ ဟီၣ်ကဝီၤဖဲန့ၣ်လီၤ.
၃၃ နးသၤလံအဒူၣ် တနီဟးထီၣ်ကွံာ် ပှၤကနၤဧၣ်ဖိလၢ အအိၣ်လၢ ဝ့ၢ်ဘ့ၤသၡ့မ့ၣ် ဒီးဝ့ၢ်ဘ့ၤသၤနးအပူၤဘၣ်.+ အဃိ ပှၤကနၤဧၣ်ဖိတဖၣ် ဆဲးအိၣ်ဝဲလၢ ဟီၣ်ကဝီၤဖဲန့ၣ်ဒီး ပှၤနးသၤလံဖိ အိၣ်ဝဲလၢ အဝဲသ့ၣ် အကျါလီၤ.+ ဒီးပှၤလၢ အအိၣ်လၢ ဝ့ၢ်ဘ့ၤသၡ့မ့ၣ် ဒီးဝ့ၢ်ဘ့ၤသၤနးန့ၣ် ဘၣ်မၤတၢ်ဒ် ကုၢ်အသိးလၢ ပှၤနးသၤလံဖိတဖၣ် အဂီၢ်လီၤ.
၃၄ ဒီးပှၤအမိၢ်ဖိတဖၣ် မၢဆူၣ်ဝဲ ပှၤဒၣ်ဖိတဖၣ်လၢ ကအိၣ်လၢ ကစၢၢ်ကလိကျါ ဒီးတပျဲလၢ အဝဲသ့ၣ် ကဟဲလီၤအိၣ်လၢ တၢ်ပၢၤခိၣ်ဘၣ်.+ ၃၅ အဃိ ပှၤအမိၢ်ဖိတဖၣ် ဆဲးအိၣ်ဝဲလၢ ကစၢၢ်ဃ့ရ့း, အးယၤလိၣ်+ ဒီးဝ့ၢ်ၡးလဘံၣ်အပူၤလီၤ.+ ဘၣ်ဆၣ် ဖဲစီၤယိၤသး အစၢၤအသွဲၣ် အဂံၢ်အဘါဆူၣ်ထီၣ်အခါ အဝဲသ့ၣ် မၢကဲကုၢ်ဝဲ ပှၤအမိၢ်ဖိတဖၣ်လီၤ. ၃၆ ဒီးပှၤအမိၢ်ဖိတဖၣ် အဟီၣ်ကဝီၤန့ၣ် စးထီၣ်အသးလၢ ဧးကရးဘံၣ် အတၢ်စိခိၣ်+ ဒီးစ့လၤအထးခီတကပၤလီၤ.