စံၣ်ညီၣ်ကွီၢ်
၁၀ ဖဲစီၤအဘံၤမ့လ့း သံဝံၤအလီၢ်ခံ ပှၤယံးစၣ်ကၢ်ဖိ စီၤတိလၤ စးထီၣ်မၤတၢ်ဒ် စံၣ်ညီၣ်ကွီၢ်တဂၤအသိး ဒ်သိးကမၤထူၣ်ဖျဲးထီၣ် ပှၤအံၣ်စရ့လးဖိ အဂီၢ်လီၤ.+ အဝဲမ့ၢ် စီၤဒိဒိၤအလံၤခွါ ဒီးစီၤပူအၤအဖိခွါ ဒီးအဝဲအိၣ်ဝဲလၢ ၡၤမံၢ်လၢ အ့ဖရဲၣ်အကစၢၢ်ကလိကျါလီၤ. ၂ စီၤတိလၤ မၤတၢ်ဒ်စံၣ်ညီၣ်ကွီၢ် တဂၤအသိး လၢပှၤအံၣ်စရ့လးဖိအဂီၢ် ၂၃ နံၣ်လီၤ. ဝံၤဒီးအဝဲသံဝဲ ဒီးပှၤခူၣ်လီၤအီၤလၢ ၡၤမံၢ်န့ၣ်လီၤ.
၃ ဖဲစီၤတိလၤ သံဝံၤအလီၢ်ခံ ပှၤကံးလဧးဖိ စီၤယၤအံၢ် မၤတၢ်ဒ် စံၣ်ညီၣ်ကွီၢ်တဂၤအသိး လၢပှၤအံၣ်စရ့လးဖိအဂီၢ် ၂၂ နံၣ်လီၤ. ၄ စီၤယၤအံၢ်န့ၣ် အဖိခွါအိၣ်ဝဲ အဂၤ ၃၀ လီၤ. အဖိခွါ တဂၤစုာ်စုာ်န့ၣ် အိၣ်ဒီး အနီၢ်ကစၢ် အကသ့ၣ်ယီၤ ဒီးအနီၢ်ကစၢ် အဝ့ၢ်လီၤ. အဝ့ၢ်အဖျၢၣ် ၃၀ အံၤပှၤကိးအီၤလၢ ဃၤပိးယၤအံၢ်+ တုၤလၢမုၢ်မဆါတနံၤအံၤလီၤ. ဒီးဝ့ၢ်တဖၣ်အံၤ အိၣ်လၢ ကံးလဧး အဟီၣ်ကဝီၤလီၤ. ၅ လၢခံ စီၤယၤအံၢ် သံဝဲ ဒီးပှၤခူၣ်လီၤအီၤ လၢဝ့ၢ်ကၤမိၣ်န့ၣ်လီၤ.
၆ ဒီးတၢ်လၢ ယဟိဝၤယွၤ ထံၣ်ဝဲလၢအအၢန့ၣ် ပှၤအံၣ်စရ့လးဖိ မၤကဒီးဝဲလီၤ.+ ဒီးအဝဲသ့ၣ် ဘူၣ်ထီၣ်ဘါထီၣ်ဝဲ ဘဧၤလး+ ဒီးဧၤၡတြိး တၢ်ဂီၤတၢ်ဖှီၣ်တဖၣ်, ပှၤစူၤရံဖိအယွၤတဖၣ်, ပှၤစံဒိၣ်ဖိအယွၤတဖၣ်, ပှၤမိၤအးဖိအယွၤတဖၣ်,+ ပှၤဧၣ်မိၣ်ဖိအယွၤတဖၣ်+ ဒီးပှၤဖလ့ၡသးဖိ အယွၤတဖၣ်လီၤ.+ အဝဲသ့ၣ် ပာ်တ့ၢ်ကွံာ် ယဟိဝၤယွၤ ဒီးတဘူၣ်ထီၣ်ဘါထီၣ် အီၤလၢၤဘၣ်. ၇ အဃိ ယဟိဝၤယွၤ သးပှံၢ်ထီၣ် ပှၤအံၣ်စရ့လးဖိ ဒီးဟ့ၣ်လီၤကွံာ်* အဝဲသ့ၣ်လၢ ပှၤဖလ့ၡသးဖိ ဒီးပှၤဧၣ်မိၣ်ဖိ အစုပူၤလီၤ.+ ၈ ဖဲတၢ်တနံၣ်န့ၣ် အဝဲသ့ၣ် မၤဟးဂီၤဒီး ဆီၣ်တံၢ်မၤနၢၤ ပှၤအံၣ်စရ့လးဖိ သပှၢ်တၢၢ်လီၤ. လၢ ၁၈ နံၣ်အတီၢ်ပူၤန့ၣ် အဝဲသ့ၣ် ဆီၣ်တံၢ်မၤနၢၤ ပှၤအံၣ်စရ့လးဖိ ခဲလၢာ်လၢ အအိၣ်လၢ ပှၤအမိၢ်ဖိတဖၣ် အဟီၣ်ကဝီၤလၢ ကံးလဧးအပူၤလၢ ထံကျိယၢ်ဒ့ၣ်ဝၢ်ခီလီၤ. ၉ ပှၤဧၣ်မိၣ်ဖိ စ့ၢ်ကီး ဒ်သိးကဒုးဝဲ ယူဒၤ, ဘံၣ်ယၤမံၣ် ဒီးအ့ဖရဲၣ် အဒူၣ်အဂီၢ် အဝဲသ့ၣ် လဲၤခီဝဲ ထံကျိယၢ်ဒ့ၣ်လီၤ. ဒီးပှၤအံၣ်စရ့လးဖိ ဘၣ်ကီဘၣ်ခဲ နးမးလီၤ. ၁၀ အဃိ ပှၤအံၣ်စရ့လးဖိ ဃ့တၢ်မၤစၢၤလၢ ယဟိဝၤယွၤအအိၣ်+ ဒီးတဲဝဲလၢ “ပကစၢ်ယွၤဧၢ, မ့ၢ်လၢပပာ်တ့ၢ်ကွံာ်နၤ ဒီးဘူၣ်ထီၣ်ဘါထီၣ် ဘဧၤလး အတၢ်ဂီၤတၢ်ဖှီၣ်တဖၣ် အဃိ ပမၤကမၣ် ဘၣ်နၤလံ.”+
၁၁ ဘၣ်ဆၣ် ယဟိဝၤယွၤ တဲပှၤအံၣ်စရ့လးဖိလၢ “လၢညါ ဖဲပှၤအဲၤကူပတူးဖိ,+ ပှၤအမိၢ်ဖိ,+ ပှၤဧၣ်မိၣ်ဖိ, ပှၤဖလ့ၡသးဖိ+ ၁၂ ပှၤစံဒိၣ်ဖိ, ပှၤဧမၤလ့းဖိ ဒီးပှၤမံးဒယၣ်ဖိတဖၣ် ဆီၣ်တံၢ်မၤနၢၤသုအခါ ယမၤထူၣ်ဖျဲးထီၣ်သု တမ့ၢ်ဧီၤ. ဖဲသုကိးထီၣ်ယၤအခါ ယမၤထူၣ်ဖျဲးသုလၢ အဝဲသ့ၣ် အစုပူၤလီၤ. ၁၃ ဘၣ်ဆၣ် သုပာ်တ့ၢ်ကွံာ်ယၤ ဒီးဘူၣ်ထီၣ်ဘါထီၣ် ယွၤအဂၤတဖၣ်လီၤ.+ ခီဖျိလၢ သုမၤဒ်န့ၣ်အဃိ ယတမၤထူၣ်ဖျဲးထီၣ် သုလၢၤဘၣ်.+ ၁၄ လဲၤဃ့ တၢ်မၤစၢၤလၢ ယွၤလၢ သုဘူၣ်ထီၣ်ဘါထီၣ်အီၤတဖၣ်န့ၣ် အအိၣ်မီၤ.+ ဖဲသုဘၣ်ကီဘၣ်ခဲအခါ မၢအဝဲသ့ၣ် မၤပူၤဖျဲးသုမီၤ.”+ ၁၅ ဘၣ်ဆၣ် ပှၤအံၣ်စရ့လးဖိ တဲယဟိဝၤယွၤလၢ “ပမၤဘၣ် တၢ်ဒဲးဘးလံ. မၤပှၤဒ် နအဲၣ်ဒိးမၤပှၤ အသိးတက့ၢ်. ဘၣ်ဆၣ် တဘျီအံၤ ဝံသးစူၤ မၤထူၣ်ဖျဲးထီၣ်ပှၤ တက့ၢ်.” ၁၆ ဒီးအဝဲသ့ၣ် တၢၤကွံာ်ဝဲ ယွၤအဂၤတဖၣ်လၢ အဝဲသ့ၣ်အကျါ ဒီးဘူၣ်ထီၣ်ဘါထီၣ် ယဟိဝၤယွၤလီၤ.+ အဃိ ကစၢ်ယွၤ ကွၢ်ပှၤအံၣ်စရ့လးဖိ အတၢ်နးတၢ်ဖှီၣ်တဖၣ် တကဲလၢၤဘၣ်.+
၁၇ လၢခံ ပှၤဧၣ်မိၣ်ဖိ+ ပာ်ဖှိၣ်ထီၣ် အပှၤသုးဖိ လၢတၢ်ဒုးအဂီၢ် ဒီးအဝဲသ့ၣ် ဆီလီၤအသးလၢ ကံးလဧး အဟီၣ်ကဝီၤအပူၤလီၤ. အဃိ အံၣ်စရ့လးအပှၤသုးဖိ စ့ၢ်ကီး ပာ်ဖှိၣ်ထီၣ်အသး ဒီးဆီလီၤအသးလၢ ဝ့ၢ်မံးစပၤလီၤ. ၁၈ ပှၤကံးလဧးဖိ ဒီးအခိၣ်အနၢ်တဖၣ် တဲလိာ်အသးလၢ “ဒ်သိး ပကဒုး ပှၤဧၣ်မိၣ်ဖိအဂီၢ် မတဂၤ ကတီခိၣ်ရိၤမဲပှၤလဲၣ်.+ ပှၤတဂၤန့ၣ် ကဘၣ်ကဲထီၣ် ပှၤလၢအအိၣ်လၢ ကီၢ်ကံးလဧး ကိးဂၤဒဲး အခိၣ်လီၤ.”