စံၣ်ညီၣ်ကွီၢ်
၁၂ ဒီးပှၤအ့ဖရဲၣ်ဖိတဖၣ် ပာ်ဖှိၣ်ထီၣ်အသး ဒီးခီဂာ်ဝဲ ထံကျိဆူ ဝ့ၢ်စၤဖိၣ် ဒီးတဲဘၣ် စီၤယံးဖသၤလၢ “ဖဲနလဲၤဒုး ပှၤဧၣ်မိၣ်ဖိတဖၣ်အခါ ဘၣ်မနုၤအဃိ နတကိးဃုာ်ဒီးပှၤလဲၣ်.+ ပကဒွဲၣ်အူထီၣ်နဟံၣ် ဃုာ်ဒီးနၤလၢအပူၤလီၤ.” ၂ ဘၣ်ဆၣ် စီၤယံးဖသၤ တဲဘၣ်အဝဲသ့ၣ်လၢ “ယၤဒီး ယပှၤသုးဖိတဖၣ် ဘၣ်ဒုးတၢ်ဒီး ပှၤဧၣ်မိၣ်ဖိတဖၣ် လၢတၢ်ဒုးဖးဒိၣ်ညါ. ယကိးသု လၢသုကဟဲ မၤစၢၤယၤအဂီၢ် ဘၣ်ဆၣ် သုတဟဲ မၤထူၣ်ဖျဲးယၤလၢ ပှၤဧၣ်မိၣ်ဖိတဖၣ် အစုပူၤဘၣ်. ၃ ဖဲယထံၣ်လၢ သုတဟဲမၤစၢၤယၤဘၣ်အခါ ယဆၢတဲာ်လီၤ ယသးလၢ တၢ်ဘၣ်ယိၣ်အလီၢ်လၢ ယသးသမူအဂီၢ်မ့ၢ်အိၣ် သနာ်က့ ယကလဲၤဒုး ပှၤဧၣ်မိၣ်ဖိလီၤ.+ ဒီးယဟိဝၤယွၤ ဟ့ၣ်လီၤအဝဲသ့ၣ်လၢ ယစုပူၤလီၤ. အဃိ တနံၤအံၤ သုဟဲဒ်သိး သုကဒုးတၢ်ဒီးယၤအဂီၢ် ဘၣ်လဲၣ်.”
၄ ဒီးပှၤအ့ဖရဲၣ်ဖိ တဲတ့ၢ်ဝဲလၢ “သုဝဲပှၤကံးလဧးဖိန့ၣ်+ သုအိၣ်လၢ အ့ဖရဲၣ်ဒီးမနၤၡ့ၤအဟီၣ်ကဝီၤအပူၤ ဘၣ်ဆၣ် သုမ့ၢ်ဒၣ် ပှၤဃ့ၢ်ပူၤဖျဲးထီၣ် အသးတဒူၣ်လၢ အဟဲလၢ အ့ဖရဲၣ်လီၤ.” ဒီးစီၤယံးဖသၤ ကိးဖှိၣ် ပှၤကံးလဧးဖိခဲလၢာ် ဒီးအဝဲသ့ၣ်ဒုး ပှၤအ့ဖရဲၣ်ဖိ ဒီးမၤနၢၤ ပှၤအ့ဖရဲၣ်ဖိလီၤ. ၅ ဒ်သိးပှၤအ့ဖရဲၣ်ဖိ သုတဃ့ၢ်ပူၤဖျဲး အသးတဂ့ၤအဂီၢ် ပှၤကံးလဧးဖိ လဲၤမၤန့ၢ်ဆူၣ် ထံကျိယၢ်ဒ့ၣ်+ အထံဒီၣ်အလီၢ်တဖၣ် ဒီးဆီလီၤအသး ဖဲန့ၣ်လီၤ. ဖဲပှၤအ့ဖရဲၣ်ဖိ ဃ့ခီဂာ်ဝဲအခါ အဝဲသ့ၣ် တဲဝဲလၢ “ပျဲယခီဂာ်မီၤ.” ဒီးပှၤကံးလဧးဖိ သံကွၢ်အဝဲသ့ၣ် တဂၤစုာ်စုာ်လၢ “နကဲ ပှၤအ့ဖရဲၣ်ဖိဧါ.” ဒီးအဝဲမ့ၢ်တဲဆၢလၢ “တမ့ၢ်ဘၣ်” န့ၣ် ၆ ပှၤကံးလဧးဖိ မၢအတဲဝဲ “ၡံးဘိၤလ့း” လီၤ. ဘၣ်ဆၣ် မ့ၢ်လၢပှၤအ့ဖရဲၣ်ဖိ တဲတၢ်ကတိၤတဖျၢၣ်န့ၣ် တလီၤဘၣ်အဃိ အဝဲသ့ၣ် တဲဝဲလၢ “စံးဘိၤလ့း” လီၤ. ဖဲန့ၣ်န့ၣ် ပှၤကံးလဧးဖိ ဖီၣ်အီၤ ဒီးမၤသံအီၤ ဖဲထံကျိယၢ်ဒ့ၣ် အထံဒီၣ်အလီၢ်တဖၣ်လီၤ. အဃိ တၢ်တဘျီန့ၣ် ပှၤအ့ဖရဲၣ်ဖိ သံဝဲအဂၤ ၄၂,၀၀၀ လီၤ.
၇ စီၤယံးဖသၤ မၤတၢ်ဒ် စံၣ်ညီၣ်ကွီၢ်တဂၤအသိး လၢပှၤအံၣ်စရ့လးဖိ အဂီၢ် ဃုနံၣ်လီၤ. လၢခံ ပှၤကံးလဧးဖိ စီၤယံးဖသၤ သံဝဲ ဒီးပှၤခူၣ်လီၤအီၤလၢ အနီၢ်ကစၢ်အဝ့ၢ်လၢ ကံးလဧးအဟီၣ်ကဝီၤ အပူၤလီၤ.
၈ ဖဲစီၤယံးဖသၤ သံဝံၤအလီၢ်ခံ စီၤအံးဘစၣ် လၢအအိၣ်လၢ ဝ့ၢ်ဘ့ၤသလ့ဃ့ၣ်န့ၣ် မၤတၢ်ဒ် စံၣ်ညီၣ်ကွီၢ်တဂၤအသိး လၢပှၤအံၣ်စရ့လးဖိ အဂီၢ်လီၤ.+ ၉ စီၤအံးဘစၣ်န့ၣ် အိၣ်ဒီး အဖိခွါ အဂၤ ၃၀ ဒီးအဖိမုၣ် အဂၤ ၃၀ လီၤ. အဝဲ ရဲၣ်ကျဲၤဝဲလၢ အဖိမုၣ်တဖၣ် ကဆီဟံၣ်ဆီဃီဒီး ပှၤလၢအတမ့ၢ် အဒူၣ်ဖိထၢဖိဘၣ်. ဒီးပိာ်မုၣ် အဂၤ ၃၀ လၢအတမ့ၢ် အဒူၣ်ဖိထၢဖိဘၣ်န့ၣ် အဝဲရဲၣ်ကျဲၤဝဲ ဒ်သိး အဝဲသ့ၣ် ကဆီဟံၣ်ဆီဃီဒီး အဖိခွါတဖၣ်လီၤ. ဒီးအဝဲ မၤတၢ်ဒ် စံၣ်ညီၣ်ကွီၢ်တဂၤအသိး လၢပှၤအံၣ်စရ့လးဖိအဂီၢ် နွံနံၣ်လီၤ. ၁၀ စီၤအံးဘစၣ် သံဝဲ ဒီးပှၤခူၣ်လီၤအီၤလၢ ဝ့ၢ်ဘ့ၤသလ့ဃ့ၣ် အပူၤလီၤ.
၁၁ ဖဲစီၤအံးဘစၣ် သံဝံၤအလီၢ်ခံ ပှၤစဘူလိၣ်ဖိ စီၤအ့လိၣ်န့ၣ် မၤတၢ်ဒ် စံၣ်ညီၣ်ကွီၢ်တဂၤအသိး လၢပှၤအံၣ်စရ့လးဖိအဂီၢ် အနံၣ်တဆံလီၤ. ၁၂ ဒီးပှၤစဘူလိၣ်ဖိ စီၤအ့လိၣ် သံဝဲ ဒီးပှၤခူၣ်လီၤအီၤလၢ အးယၤလိၣ် လၢစဘူလိၣ် အဟီၣ်ကဝီၤန့ၣ်လီၤ.
၁၃ ဖဲစီၤအ့လိၣ် သံဝံၤအလီၢ်ခံ ပှၤပံးရၤသိၣ်ဖိ စီၤဟံးလ့လး အဖိခွါ စီၤဧၤဘဒိၣ် မၤတၢ်ဒ် စံၣ်ညီၣ်ကွီၢ်တဂၤအသိး လၢပှၤအံၣ်စရ့လးဖိ အဂီၢ်လီၤ. ၁၄ စီၤဧၤဘဒိၣ် အိၣ်ဒီး အဖိခွါ အဂၤ ၄၀ ဒီးအလံၤခွါ အဂၤ ၃၀ လီၤ. ဒီးအဝဲသ့ၣ် တဂၤစုာ်စုာ်န့ၣ် အိၣ်ဒီး အနီၢ်ကစၢ် အကသ့ၣ်ယီၤ လၢအကဒိးဝဲအဂီၢ်လီၤ. စီၤဧၤဘဒိၣ် မၤတၢ်ဒ် စံၣ်ညီၣ်ကွီၢ်တဂၤအသိး လၢပှၤအံၣ်စရ့လးဖိအဂီၢ် ဃိးနံၣ်လီၤ. ၁၅ ဒီးပှၤပံးရၤသိၣ်ဖိ စီၤဟံးလ့လး အဖိခွါ စီၤဧၤဘဒိၣ် သံဝဲလီၤ. ဒီးပှၤခူၣ်လီၤအီၤလၢ ဝ့ၢ်ပံးရၤသိၣ် လၢအ့ဖရဲၣ်အဟီၣ်ကဝီၤ လၢပှၤဧမၤလ့းဖိ အကစၢၢ်ကလိကျါန့ၣ်လီၤ.+