စံၣ်ညီၣ်ကွီၢ်
၁၃ ဒီးတၢ်လၢ ယဟိဝၤယွၤ ထံၣ်ဝဲလၢအအၢန့ၣ် ပှၤအံၣ်စရ့လးဖိ မၤကဒီးဝဲလီၤ.+ အဃိ ယဟိဝၤယွၤ ဟ့ၣ်လီၤအဝဲသ့ၣ်လၢ ပှၤဖလ့ၡသးဖိ အစုပူၤ+ အနံၣ် ၄၀ လီၤ.
၂ ဒီးပှၤလၢအမံၤမ့ၢ် စီၤမၤနိန့ၣ်+ အိၣ်ဝဲတဂၤလီၤ. အဝဲအိၣ်လၢ ဝ့ၢ်စိးရၤ+ ဒီးအဝဲပၣ်ဃုာ်လၢ ဒၣ်အဒူၣ်ကျါလီၤ.+ ဒီးအမါန့ၣ် မ့ၢ်ပှၤတူာ်ဖိ အဃိ အဖိတအိၣ် နီတဂၤဘၣ်.+ ၃ လၢခံ ယဟိဝၤယွၤ အမူခိၣ်ကလူး ဟဲအိၣ်ဖျါထီၣ်လၢ ပိာ်မုၣ်တဂၤန့ၣ် အမဲာ်ညါ ဒီးတဲအီၤလၢ “နမ့ၢ်ပှၤတူာ်ဖိ အဃိ နဖိတအိၣ် နီတဂၤဘၣ်. ဘၣ်ဆၣ် နကဒၢထီၣ် ဒီးအိၣ်ဖျဲၣ်ထီၣ် ဖိခွါတဂၤလီၤ.+ ၄ ပလီၢ်နသး ဒ်သိး နသုတအီ စပံးထံမ့ၢ်ဂ့ၤ, တၢ်လၢအပၣ်ဃုာ် ဒီးသံးမ့ၢ်ဂ့ၤ+ ဒီးနသုတအီၣ် တၢ်လၢအတကဆှီဘၣ် နီတမံၤတဂ့ၤ အဂီၢ်တက့ၢ်.+ ၅ နကဒၢထီၣ် ဒီးအိၣ်ဖျဲၣ်ထီၣ် ဖိခွါတဂၤလီၤ. ဒီးစးထီၣ်လၢ ဖိသၣ်တဂၤအံၤ အိၣ်ဖျဲၣ်ထီၣ်လံၤလံၤန့ၣ် အဝဲကကဲထီၣ် ကစၢ်ယွၤ အပှၤနစၤရံဖိတဂၤအဃိ ပှၤတဘၣ် တံာ်အခိၣ်ဆူၣ် နီတဘျီဘၣ်.+ ဒီးအဝဲ ကတီခိၣ်ရိၤမဲတၢ် ဒ်သိး ကမၤထူၣ်ဖျဲးထီၣ် ပှၤအံၣ်စရ့လးဖိလၢ ပှၤဖလ့ၡသးဖိ အစုပူၤ အဂီၢ်လီၤ.”+
၆ လၢခံ ပိာ်မုၣ်န့ၣ် က့ၤတဲဘၣ်အဝၤလၢ “ယွၤလၢအမ့ၢ်အတီ အခ့အပှၤတဂၤ ဟဲလၢယအိၣ်လီၤ. ဒီးအက့ၢ်အဂီၤ ဖျါလီၤဂာ်လၢ အကဲ ယွၤလၢအမ့ၢ်အတီ အမူခိၣ်ကလူးတဂၤ ဒီးအဖျါလီၤဆီဒိၣ်မး. အဟဲဖဲလဲၣ်န့ၣ် ယတသံကွၢ်ဘၣ်အီၤဘၣ် ဒီးအတတဲဘၣ်ယၤ လၢအမံၤစ့ၢ်ကီးဘၣ်.+ ၇ ဘၣ်ဆၣ် အဝဲတဲဘၣ်ယၤလၢ ‘နကဒၢထီၣ် ဒီးအိၣ်ဖျဲၣ်ထီၣ် ဖိခွါတဂၤလီၤ. ဒီးဖိသၣ်န့ၣ် ကကဲထီၣ် ကစၢ်ယွၤ အပှၤနစၤရံဖိတဂၤ စးထီၣ်လၢ အအိၣ်ဖျဲၣ်ထီၣ်လံၤလံၤ ဒီးတုၤလၢ အသံန့ၣ်လီၤ. အဃိ ပလီၢ်နသး ဒ်သိး နသုတအီ စပံးထံမ့ၢ်ဂ့ၤ, တၢ်လၢအပၣ်ဃုာ် ဒီးသံးမ့ၢ်ဂ့ၤ ဒီးနသုတအီၣ် တၢ်လၢအတ ကဆှီဘၣ် နီတမံၤတဂ့ၤ အဂီၢ်တက့ၢ်.’”
၈ ဒီးစီၤမၤနိ ဃ့ကညး ယဟိဝၤယွၤလၢ “ယဟိဝၤယွၤဧၢ, နခ့နပှၤလၢ နဆှၢလီၤ ဖဲမကိာ်တဂၤန့ၣ် ဝံသးစူၤ မ်အဟဲက့ၤ ဒီးဟံးစုနဲၣ်ကျဲပှၤ ဘၣ်ဃးဒီး ဖိသၣ်လၢ အကအိၣ်ဖျဲၣ်ထီၣ်တဂၤန့ၣ် ပကဘၣ် ကွၢ်လုၢ်ဒိၣ်ထီၣ်အီၤ ဒ်လဲၣ်န့ၣ်တက့ၢ်.” ၉ အဃိ ယွၤလၢအမ့ၢ်အတီတဂၤ ဒိကနၣ်ဝဲ စီၤမၤနိလီၤ. ဒီးဖဲအမါ ဆ့ၣ်နီၤဝဲလၢ ပျီပူၤအခါ ယွၤလၢ အမ့ၢ်အတီ အမူခိၣ်ကလူးတဂၤန့ၣ် ဟဲကဒီး လၢစီၤမၤနိအမါ အအိၣ်လီၤ. ဒီးအဝၤစီၤမၤနိ တအိၣ်ဒီးအီၤ ဖဲန့ၣ်ဘၣ်. ၁၀ ဒီးပိာ်မုၣ်န့ၣ် ကရီလဲၤဃ့ၢ်ဝဲလၢ အဝၤအအိၣ် ဒီးတဲအီၤလၢ “ပှၤပိာ်ခွါတဂၤလၢ အဟဲလၢယအိၣ် လၢအဝဲတနံၤန့ၣ် လီၣ်ဖျါထီၣ်ကဒီးအသး လၢယအိၣ်လံ.”+
၁၁ ဒီးစီၤမၤနိ လဲၤပိာ်အမါအခံ လၢပှၤပိာ်ခွါတဂၤန့ၣ် အအိၣ်ဒီး တဲအီၤလၢ “လၢညါတဘျီ ပှၤလၢအတဲတၢ်ဒီး ယမါန့ၣ် အကဲနၤဧါ.” ပှၤပိာ်ခွါတဂၤန့ၣ် တဲအီၤလၢ “ယၤလီၤ.” ၁၂ ဒီးစီၤမၤနိ တဲဝဲလၢ “ဒ်နတဲပှၤအသိးန့ၣ် မ်အကဲထီၣ်အသး ဒ်န့ၣ်တက့ၢ်. ဖိသၣ်တဂၤန့ၣ် အတၢ်အိၣ်မူ ကမၤအသး ဒ်လဲၣ် ဒီးအဝဲကမၤတၢ်မၤ ဒ်လဲၣ်တကလုာ်လဲၣ်.”+ ၁၃ အဃိ ယဟိဝၤယွၤ အမူခိၣ်ကလူး တဲဘၣ် စီၤမၤနိလၢ “နမါ ကဘၣ်ဟးဆှဲး တၢ်လၢယတဲပာ်အီၤ ခဲလၢာ်လီၤ.+ ၁၄ ဒီးစပံးသၣ် ဒီးတၢ်တမံၤဂ့ၤတမံၤဂ့ၤ လၢပှၤတ့အီၤလၢ စပံးသၣ်န့ၣ် အဝဲတဘၣ်အီၣ်ဝဲဘၣ်. စပံးထံမ့ၢ်ဂ့ၤ, တၢ်လၢအပၣ်ဃုာ်ဒီးသံးမ့ၢ်ဂ့ၤ အဝဲတဘၣ်အီဝဲဘၣ်.+ ဒီးအဝဲတဘၣ် အီၣ်တၢ်လၢ အတကဆှီဘၣ် နီတမံၤဘၣ်.+ တၢ်လၢ ယမၤလိာ်အီၤန့ၣ် မ်အဝဲမၤထွဲဝဲ ကိးမံၤဒဲးတက့ၢ်.”
၁၅ ဒီးစီၤမၤနိ တဲဘၣ် ယဟိဝၤယွၤ အမူခိၣ်ကလူးလၢ “ဝံသးစူၤ က့ၤဒံးတဂ့ၤ. ပကဖီဒုးအီၣ်နၤ မဲာ်တဲးလဲးဖိတဒုလီၤ.”+ ၁၆ ဘၣ်ဆၣ် ယဟိဝၤယွၤ အမူခိၣ်ကလူး တဲစီၤမၤနိလၢ “ယမ့ၢ်တက့ၤဒံးဘၣ် သနာ်က့ ယတအီၣ် နတၢ်အီၣ်ဘၣ်. ဘၣ်ဆၣ် နမ့ၢ်ဘၣ်သး လုၢ်ထီၣ် တၢ်လုၢ်ဒွဲၣ်အူ လၢယဟိဝၤယွၤ အအိၣ်န့ၣ် နလုၢ်ထီၣ်အီၤ သ့လီၤ.” စီၤမၤနိ တသ့ၣ်ညါဝဲလၢ ပိာ်ခွါတဂၤန့ၣ် ကဲဝဲ ယဟိဝၤယွၤ အမူခိၣ်ကလူးဘၣ်. ၁၇ ဒီးစီၤမၤနိ တဲဘၣ် ယဟိဝၤယွၤ အမူခိၣ်ကလူးလၢ “ဖဲတၢ်ကတိၤလၢ နတဲပှၤ ဟဲကဲထီၣ်အသးအခါ ဒ်သိး ပမၤလၤကပီၤနၤ ကသ့အဂီၢ် တဲဘၣ်ပှၤနမံၤမီၤ.”+ ၁၈ ဘၣ်ဆၣ် ယဟိဝၤယွၤ အမူခိၣ်ကလူး တဲအီၤလၢ “ယမံၤမ့ၢ် မံၤလၢအလီၤကမၢကမၣ်တဖျၢၣ် အဃိ တဘၣ်သံကွၢ် ယမံၤတဂ့ၤ.”
၁၉ ဒီးစီၤမၤနိ ဟံးန့ၢ် မဲာ်တဲးလဲးဖိတဒု ဒီးတၢ်လုၢ်ဘု ဒီးလုၢ်ထီၣ်ဝဲလၢ ယဟိဝၤယွၤအအိၣ် လၢလၢၢ်တဖျၢၣ်အလိၤလီၤ. ဖဲစီၤမၤနိ ဒီးအမါ ကွၢ်ဃီၤတၢ်အခါ ကစၢ်ယွၤ မၤဝဲတၢ်လီၤလိၢ်လီၤလး တမံၤလီၤ. ၂၀ ဖဲမ့ၣ်အူလၣ် လၢတၢ်လုၢ်လီၢ်အဖီခိၣ် လဲၤထီၣ်ဝဲဆူ တၢ်ဖးဖီအခါ ယဟိဝၤယွၤ အမူခိၣ်ကလူး က့ၤထီၣ်ဝဲလၢ မ့ၣ်အူလၣ်အကျါလီၤ. ဒီးစီၤမၤနိ ဒီးအမါ ထံၣ်ဝဲအဃိ အဝဲသ့ၣ် ထိၣ်လီၤပှီၤအသး ဒီးကျးလီၤအမဲာ် လၢဟီၣ်ခိၣ် အလိၤလီၤ. ၂၁ ယဟိဝၤယွၤ အမူခိၣ်ကလူး တလီၣ်ဖျါထီၣ် ကဒီးအသးလၢ စီၤမၤနိ ဒီးအမါ အအိၣ်လၢၤဘၣ်. ဖဲန့ၣ်အခါ စီၤမၤနိ သ့ၣ်ညါဘၣ်ဝဲလၢ ပှၤပိာ်ခွါတဂၤန့ၣ် မ့ၢ်ဝဲ ယဟိဝၤယွၤ အမူခိၣ်ကလူးလီၤ.+ ၂၂ အဃိ စီၤမၤနိ တဲဘၣ် အမါလၢ “မ့ၢ်လၢ ပထံၣ်ဘၣ် ကစၢ်ယွၤအဃိ ပကသံ သပှၢ်ကတၢၢ်လီၤ.”+ ၂၃ ဘၣ်ဆၣ် အမါတဲအီၤလၢ “ယဟိဝၤယွၤ မ့ၢ်အဲၣ်ဒိးမၤသံပှၤန့ၣ် ပတၢ်လုၢ်ဒွဲၣ်အူ+ ဒီးတၢ်လုၢ်ဘု လၢပလုၢ်ထီၣ်န့ၣ် တမ့ၢ်လၢ အကတူၢ်လိာ်ဝဲဘၣ်. ဒီးတမ့ၢ်လၢ အကဒုးနဲၣ်ပှၤ ဒီးတဲဘၣ်ပှၤ တၢ်သ့ၣ်တဖၣ်န့ၣ် နီတမံၤဘၣ်.”
၂၄ လၢခံ စီၤမၤနိအမါ အိၣ်ဖျဲၣ်ထီၣ်ဝဲ ဖိခွါတဂၤ ဒီးကိးန့ၢ်ဝဲ အမံၤလၢ စီၤၡံၡိၣ်လီၤ.+ ဒီးဖိသၣ်န့ၣ် ဒိၣ်ထီၣ်ဝဲ ဒီးယဟိဝၤယွၤ ဆိၣ်ဂ့ၤအီၤလီၤ. ၂၅ လၢခံ ဖဲစီၤၡံၡိၣ် အိၣ်လၢ မၤဃန့ၤဒၣ်အခါ+ ယဟိဝၤယွၤ အသးစီဆှံ ထိၣ်ဟူးထိၣ်ဂဲၤထီၣ်အီၤလီၤ.+ မၤဃန့ၤဒၣ်န့ၣ် အိၣ်ဝဲလၢ ဝ့ၢ်စိးရၤ ဒီးဝ့ၢ်အ့ၤၡတိလး အဘၢၣ်စၢၤလီၤ.+