စံၣ်ညီၣ်ကွီၢ်
၁၅ လၢခံ ဖဲတၢ်ကူးဘုကၠူၣ် အဆၢကတီၢ်န့ၣ် စီၤၡံၡိၣ် လဲၤအိၣ်သကိးအမါ ဒီးလဲၤစိာ်ဝဲ မဲာ်တဲးလဲးဖိ တဒုလီၤ. ဒီးအဝဲတဲဝဲလၢ “ယအဲၣ်ဒိး လဲၤနုာ်လၢ အဒၢးပူၤလီၤ.” ဘၣ်ဆၣ် ပိာ်မုၣ်တဂၤန့ၣ် အပၢ်တပျဲ လဲၤနုာ်အီၤဘၣ်. ၂ ပိာ်မုၣ်တဂၤန့ၣ် အပၢ်တဲဝဲလၢ “ယဆိကမိၣ်လၢ ‘နသးဟ့အီၤ သပှၢ်တၢၢ်လီၤ.’+ အဃိ ယဒုးဖျီအီၤဒီး နသကိးခွါတဂၤလီၤ.+ အဒ့မုၣ်န့ၣ် အဒိၣ်တၢ်ဂ့ၤဒိၣ်န့ၢ်အီၤဒံး တမ့ၢ်ဧီၤ. ဝံသးစူၤ ဟံးန့ၢ်အီၤလၢ နမါမီၤ.” ၃ ဒီးစီၤၡံၡိၣ် တဲဝဲလၢ “တဘျီအံၤဒု ယမ့ၢ်မၤဆါ ပှၤဖလ့ၡသးဖိ ဘၣ်ဆၣ် အဝဲသ့ၣ် ပာ်တၢ်ကမၣ်လၢ ယလိၤတသ့ဘၣ်.”
၄ အဃိ အဝဲလဲၤဖီၣ်န့ၢ် ထွံၣ်ဟီၣ်ခိၣ်အဒု ၃၀၀ လီၤ. ဒီးအဝဲဟံးန့ၢ် ဆှိတဖၣ် ဒီးစၢဃာ် ထွံၣ်ဟီၣ်ခိၣ် ခံဒုခံဒု လၢအခံမဲၢ် ဃုာ်ဒီး ဆှိတကဒိၣ်လၢ အဝဲသ့ၣ်ခံဒုစုာ်စုာ် အခံမဲၢ်လီၤ. ၅ ဝံၤဒီး အဝဲဒွဲၣ်ထီၣ် ဆှိတဖၣ်လၢမ့ၣ်အူ ဒီးပျၢ်လီၤ ထွံၣ်ဟီၣ်ခိၣ်တဖၣ်လၢ ပှၤဖလ့ၡသးဖိ အဘုပျီတဖၣ် အပူၤလီၤ. အဃိ ဘုကၠူၣ်မ့ၢ်ဂ့ၤ, ဘုမ့ၢ်ဂ့ၤ, စပံးကျီးတဖၣ်မ့ၢ်ဂ့ၤ, သ့ၣ်စၤယံးအကျီးတဖၣ်မ့ၢ်ဂ့ၤ မ့ၣ်အူအီၣ်ကွံာ်ဝဲ ခဲလၢာ်လီၤ.
၆ ဒီးပှၤဖလ့ၡသးဖိ သံကွၢ်ဝဲလၢ “မတဂၤမၤတၢ် ဒ်အံၤတဂၤလဲၣ်.” ဒီးပှၤတဲ အဝဲသ့ၣ်လၢ “စီၤၡံၡိၣ်မၤဝဲဒ်အံၤ ခီဖျိလၢ အမံၤပှၢ် ပှၤတံးမနးဖိ တဂၤန့ၣ် ဟ့ၣ်လီၤ စီၤၡံၡိၣ်အမါ လၢစီၤၡံၡိၣ်အသကိးတဂၤ အအိၣ်အဃိလီၤ.”+ ဒီးပှၤဖလ့ၡသးဖိ လဲၤဒွဲၣ်အူထီၣ် ပိာ်မုၣ်တဂၤန့ၣ် ဒီးအပၢ်လၢ မ့ၣ်အူလီၤ.+ ၇ ဒီးစီၤၡံၡိၣ် တဲအဝဲသ့ၣ်လၢ “ခီဖျိသုမၤဒ်န့ၣ်အဃိ ယတပတုာ်ဒံးဘၣ်, ယကမၤကၣ်က့ၤသု တုၤလၢအကတၢၢ်လီၤ.”+ ၈ ဒီးစီၤၡံၡိၣ် မၤသံကွံာ် အဝဲသ့ၣ် အါအါဂီၢ်ဂီၢ် တဂၤဝံၤတဂၤ ဝံၤဒီး စီၤၡံၡိၣ် လဲၤအိၣ်ဝဲလၢ လ့ဧ့ၤတၣ် အလ့ကိပူၤလီၤ.
၉ လၢခံ ပှၤဖလ့ၡသးဖိ ဟဲဆီလီၤအသးလၢ ယူဒၤအဟီၣ်ကဝီၤ ဒီးဟးဝ့ၤဝီၤဝဲလၢ လ့ၤဃံအပူၤလီၤ.+ ၁၀ ဒီးပှၤပိာ်ခွါတဖၣ် လၢအအိၣ်လၢ ယူဒၤ အဟီၣ်ကဝီၤအပူၤန့ၣ် တဲဝဲလၢ “ဘၣ်မနုၤအဃိ သုဟဲထီၣ်ဒုးပှၤလဲၣ်.” ဒီးအဝဲသ့ၣ် တဲဆၢဝဲလၢ “ပဟဲဒ်သိး ပကဖီၣ်န့ၢ် စီၤၡံၡိၣ် ဒီးမၤအီၤဒ် အမၤတ့ၢ်ပှၤအသိးလီၤ.” ၁၁ အဃိ ပှၤပိာ်ခွါ အဂၤ ၃,၀၀၀ လၢအအိၣ်လၢ ယူဒၤအဟီၣ်ကဝီၤ အပူၤန့ၣ် လဲၤလၢ လ့ဧ့ၤတၣ် အလ့ကိလီၤ. ဒီးအဝဲသ့ၣ် တဲဘၣ် စီၤၡံၡိၣ်လၢ “ပှၤဖလ့ၡသးဖိ ပၢပှၤန့ၣ် နတသ့ၣ်ညါဧီၤ.+ ဘၣ်မနုၤအဃိ နမၤပှၤဒ်အံၤလဲၣ်.” စီၤၡံၡိၣ် တဲဘၣ်အဝဲသ့ၣ်လၢ “ယမၤအဝဲသ့ၣ် ဒ်အဝဲသ့ၣ် မၤယၤအသိးလီၤ.” ၁၂ ဘၣ်ဆၣ် အဝဲသ့ၣ် တဲစီၤၡံၡိၣ်လၢ “ပဟဲဒ်သိး ပကဖီၣ်နၤ ဒီးဟ့ၣ်လီၤကွံာ်နၤလၢ ပှၤဖလ့ၡသးဖိ အစုပူၤလီၤ.” စီၤၡံၡိၣ် တဲဝဲလၢ “အၢၣ်လီၤယၤလၢ သုတမၤဒၢၣ်မၤဆါယၤ လၢသုနီၢ်ကစၢ်ဘၣ်မီၤ.” ၁၃ အဝဲသ့ၣ် တဲအီၤလၢ “ပတမၤဒၢၣ်မၤဆါနၤဘၣ်, အိၣ်ဒၣ် ပကစၢဃာ်နၤ ဒီးဟ့ၣ်လီၤနၤလၢ အဝဲသ့ၣ် အစုပူၤလီၤ. ပတမၤသံနၤဘၣ်.”
အဃိ အဝဲသ့ၣ် စၢဃာ်အီၤလၢ ပျံၤသီသီခံဘိ ဒီးဟဲက့ၤကိးထီၣ်အီၤ လၢလ့ကိပူၤလီၤ. ၁၄ ဖဲအလဲၤတုၤလၢ လ့ၤဃံအခါ ပှၤဖလ့ၡသးဖိ ထံၣ်အီၤ ဒီးကိးပသူထီၣ်လၢ တၢ်သးခုအပူၤလီၤ. ဒီးယဟိဝၤယွၤ အသးစီဆှံ ဟ့ၣ်စိဟ့ၣ်ကမီၤအီၤအဃိ+ ပျံၤတဖၣ်လၢ ပှၤစၢဃာ်အစုန့ၣ် အဝဲမၤထီၣ်တဲာ်ဝဲ ဒ်လုၣ်တဖၣ်လၢ မ့ၣ်အူအီၣ်ကွံာ်အီၤအသိး ဒီးပျံၤတဖၣ်လၢ ပှၤစၢဃာ် အစုလၣ်န့ၣ် လီၤတဲာ်ဝဲလီၤ.+ ၁၅ ဒီးစီၤၡံၡိၣ် ထံၣ်န့ၢ်ဝဲ ကသ့ၣ်ယီၤဖါ အခၣ်ဃံသီသီ တခါလီၤ. အဝဲဟံးန့ၢ်ဝဲ ဒီးမၤသံဝဲ ပှၤပိာ်ခွါအဂၤ ၁,၀၀၀ လၢကသ့ၣ်ယီၤ အခၣ်ဃံလီၤ.+ ၁၆ ဝံၤဒီး စီၤၡံၡိၣ် တဲဝဲလၢ
“ယမၤသံ ယဒုၣ်ယဒါ လၢကသ့ၣ်ယီၤ အခၣ်ဃံ ဒီးပာ်ဖှိၣ်ထီၣ်အဝဲသ့ၣ် တပူၣ် ခံပူၣ်ညါ,
ယမၤသံ ပှၤပိာ်ခွါအဂၤ ၁,၀၀၀ လၢကသ့ၣ်ယီၤ အခၣ်ဃံလီၤ.”+
၁၇ ဖဲစီၤၡံၡိၣ် တဲတၢ်ဝံၤအခါ အဝဲတၢၤကွံာ်ဝဲ ကသ့ၣ်ယီၤ အခၣ်ဃံလီၤ. ဒီးအဝဲကိးန့ၢ်ဝဲ တၢ်လီၢ်န့ၣ် အမံၤလၢ ရၤမးလ့ၤဃံလီၤ.*+ ၁၈ ဖဲန့ၣ်န့ၣ် အဝဲလီၤဘဲအီထံ ဒိၣ်မးအဃိ အဝဲကိးထီၣ် ယဟိဝၤယွၤ ဒီးတဲဝဲလၢ “နဟ့ၣ်ယၤ တၢ်မၤနၢၤဖးဒိၣ် တခါအံၤဝံၤဒီး ခဲအံၤ မ့ၢ်ယဘၣ်သံ လၢယလီၤဘဲအီထံ အဃိ ဒီးလီၤဘၣ်လၢ ပှၤလၢအတဒိးဘၣ် တၢ်ကူးတရံးတဖၣ် အစုပူၤဧါ.” ၁၉ အဃိ လၢလ့ၤဃံန့ၣ် ကစၢ်ယွၤ အိးဟိထီၣ်ဝဲ တၢ်ပူၤဟိ ဒီးထံဟဲထီၣ်လၢ တၢ်ပူၤလီၤ.+ ဖဲစီၤၡံၡိၣ် အီထံအခါ အဂံၢ်ထီၣ်ကဒါက့ၤ ဒီးအဂံၢ်ဆူၣ်ထီၣ်က့ၤလီၤ. အဃိ အဝဲကိးန့ၢ်ဝဲ တၢ်လီၢ်န့ၣ်အမံၤလၢ ဧ့ၣ်ဟးကိရ့ၤ* လၢအအိၣ်လၢ လ့ၤဃံ တုၤလၢ မုၢ်မဆါတနံၤအံၤလီၤ.
၂၀ ဖဲပှၤဖလ့ၡသးဖိ ဒိၣ်စိအခါ စီၤၡံၡိၣ် မၤတၢ်ဒ် စံၣ်ညီၣ်ကွီၢ်တဂၤ အသိး လၢပှၤအံၣ်စရ့လးဖိအဂီၢ် အနံၣ် ၂၀ လီၤ.+