ရူၤသး

၃ နီၢ်ရူၤသးန့ၣ်​ အမံၤပှၢ်ပိာ်မုၣ်​ နီၢ်နၤဧမံတဲအီၤလၢ “ယဖိမုၣ်ဧၢ, ဒ်သိးနကအိၣ်ဘၣ်​ မုာ်မုာ်ခုၣ်ခုၣ်အဂီၢ် ယတကြၢးဃုန့ၢ် နဝၤ*+ ဘၣ်ဧါ. ၂ စီၤဘိၤဧးန့ၣ်​ ဒီဘူးဒီးပှၤ တမ့ၢ်ဘၣ်ဧါ.+ အဝဲမ့ၢ်ပှၤတဂၤလၢ နလဲၤမၤသကိးတၢ်ဒီး အပျဲၢ်မုၣ်န့ၣ်လီၤ. တနၤညါအံၤ အဝဲကနီၤဖးဝဲဘု* ဒီးလီၢ်ဘိလၢ ကြဲၢ်ပူၤန့ၣ်လီၤ. ၃ အဃိ လုၢ်ထံလုၢ်နိဒီး ဖှူထီၣ်နလိၤလၢ သိနၢမူ ဒီးကူထီၣ်သိးထီၣ်​ တၢ်ကူတၢ်ကၤဂ့ၤဂ့ၤ ဒီးလဲၤလီၤလၢ ကြဲၢ်ပူၤတက့ၢ်. အဝဲအီၣ်တၢ်အီတၢ် မ့ၢ်တဝံၤဒံးဘၣ်န့ၣ်​ တဘၣ်ပာ်ဖျါထီၣ်နသး လၢအအိၣ်တဂ့ၤ. ၄ ဖဲအမံနီၤအခါ ကွၢ်နီၣ်ပာ် တၢ်လီၢ်လၢအမံနီၤ ဝံၤဒီးလဲၤဒီး မၤဖျါထီၣ်အခီၣ်လၣ်​ ဒီးမံနီၤဖဲန့ၣ်တက့ၢ်. ဒီးအဝဲကတဲနၤ တၢ်လၢနကဘၣ်မၤန့ၣ်လီၤ.”

၅ ဖဲန့ၣ်အခါ နီၢ်ရူၤသးတဲဝဲလၢ “တၢ်လၢနတဲယၤန့ၣ်​ ယကမၤခဲလၢာ်လီၤ.” ၆ အဃိ အဝဲလဲၤလီၤလၢ ကြဲၢ်ပူၤ ဒီးအဝဲမၤဝဲဒ် အမံၤပှၢ်ပိာ်မုၣ်​ မၢအီၤအသိးခဲလၢာ်လီၤ. ၇ ဖဲန့ၣ်အခါ စီၤဘိၤဧး အီၣ်တၢ်အီတၢ် ဒီးသူၣ်ဖှံသးညီဝဲလီၤ. ဝံၤဒီးအဝဲ လဲၤမံနီၤဝဲလၢ ဘုပူၣ်အကပၤလီၤ. ဒီးနီၢ်ရူၤသး လဲၤဝဲကစုဒု ဒီးမၤဖျါထီၣ်​ စီၤဘိၤဧး အခီၣ်လၣ်​ ဒီးမံနီၤဝဲဖဲန့ၣ်လီၤ. ၈ ဖဲဖးဖီမုၢ် အဆၢကတီၢ်န့ၣ်​ စီၤဘိၤဧး ကနိးဝဲ ဒီးအဝဲ ဝံၣ်ထီၣ်အသး ဒီးထံၣ်ဝဲပိာ်မုၣ်တဂၤ မံနီၤဝဲလၢ အခီၣ်ထံးလီၤ. ၉ အဝဲတဲဝဲလၢ “နမ့ၢ်မတဂၤလဲၣ်.” ဒီးနီၢ်ရူၤသး စံးဆၢက့ၤဝဲလၢ “ယမ့ၢ်နပျဲၢ်မုၣ်​ နီၢ်ရူၤသးလီၤ. နမ့ၢ်ပှၤပှ့ၤက့ၤတၢ်တဂၤအဃိ+ သလၣ်ထီၣ်​ နတၢ်ကူတၢ်သိးလၢ နပျဲၢ်မုၣ်​ အဖီခိၣ်တက့ၢ်.”* ၁၀ ဖဲန့ၣ်​ စီၤဘိၤဧးတဲဝဲလၢ “ယဖိမုၣ်ဧၢ, မ်ယဟိဝၤယွၤ ဆိၣ်ဂ့ၤနၤတက့ၢ်. ခီဖျိလၢ နတလူၤ ပိာ်ခွါသးစၢ်လၢ အဖှီၣ်မ့ၢ်ဂ့ၤ, အထူးအတီၤမ့ၢ်ဂ့ၤဘၣ်အဃိ နပာ်ဖျါထီၣ်​ နတၢ်အဲၣ်လၢအတီလၢ အခဲအံၤတဘျီန့ၣ်​ ဒိၣ်န့ၢ်ဒံး တၢ်အဲၣ်လၢ နပာ်ဖျါထီၣ်လၢ အခီၣ်ထံးတဘျီန့ၣ်လီၤ.+ ၁၁ ယဖိမုၣ်ဧၢ, ပျံၤတၢ်တဂ့ၤ. ယကမၤဒ် နတဲအသိး ကိးမံၤဒဲးလီၤ.+ ပှၤဝ့ၢ်ဖိကိးဂၤဒဲးန့ၣ်​ သ့ၣ်ညါဝဲလၢ နမ့ၢ်ပိာ်မုၣ်လၢ အဂ့ၤအဝါလီၤ. ၁၂ ယမ့ၢ်ပှၤပှ့ၤက့ၤတၢ်တဂၤ+ သနာ်က့ ပှၤပှ့ၤက့ၤတၢ် လၢအဘူးဒိၣ်န့ၢ်ဒံးယၤန့ၣ်​ အိၣ်ဝဲတဂၤလီၤ.+ ၁၃ မ့မ့ၢ်တနၤညါအံၤန့ၣ်​ အိၣ်ဖဲအံၤ ဒီးဖဲမုၢ်ဝါထီၣ်အခါ ပှၤလၢအပှ့ၤက့ၤတၢ်တဂၤန့ၣ်​ မ့ၢ်ပှ့ၤက့ၤနၤဒီး ပှ့ၤဒၣ်ဝဲ.+ ဘၣ်ဆၣ်​ ဒ်ယဟိဝၤယွၤ မ့ၢ်ပှၤလၢအမူဝဲ သပှၢ်တၢၢ်အသိး ယအၢၣ်လီၤလၢ ပှၤတဂၤအံၤ မ့ၢ်တအဲၣ်ဒိးပှ့ၤက့ၤနၤဘၣ်န့ၣ်​ ယကပှ့ၤက့ၤနၤ လၢယနီၢ်ကစၢ်လီၤ. မံနီၤဖဲအံၤ တုၤလီၤလၢ မုၢ်ဝါထီၣ်တက့ၢ်.”

၁၄ အဃိ နီၢ်ရူၤသးမံနီၤဝဲလၢ စီၤဘိၤဧးအခီၣ်ထံး တုၤလၢမုၢ်ဝါထီၣ်လီၤ. ဘၣ်ဆၣ်​ ဒ်သိးပှၤကွၢ်နီၣ်အီၤ သုတဘၣ်တဂ့ၤအဂီၢ် အဝဲဂဲၤဆၢထၢၣ်ဖဲ တၢ်ကပီၤထီၣ်​ ပံၢ်လ့ပံၢ်လ့အခါလီၤ. စီၤဘိၤဧးတဲဝဲလၢ “တဘၣ်ပျဲလၢ ပှၤကသ့ၣ်ညါလၢ ပှၤပိာ်မုၣ်တဂၤ ဟဲလၢကြဲၢ်ပူၤန့ၣ်တဂ့ၤ.” ၁၅ ဒီးအတဲစ့ၢ်ကီးဝဲလၢ “ဟဲစိာ်တၢ်ကံးညာ်တဘ့ၣ်​ လၢနသိးအီၤန့ၣ်​ ဒီးဒိးလီၤအီၤ ဖဲအံၤတက့ၢ်.” အဃိ အဝဲဒိးလီၤဝဲ အတၢ်ကံးညာ် ဒီးစီၤဘိၤဧးပၢနုာ်ဝဲ ဘုမုယီၤ ၆ စ့အၤ* လၢအပူၤ ဒီးဒုးတီထီၣ်အီၤလီၤ. ဝံၤဒီးစီၤဘိၤဧးန့ၣ်​ က့ၤဝဲလၢ ဝ့ၢ်ပူၤလီၤ.

၁၆ ဒီးနီၢ်ရူၤသး က့ၤဝဲဆူ အမံၤပှၢ်ပိာ်မုၣ်အအိၣ်လီၤ. ဒီးအမံၤပှၢ်ပိာ်မုၣ်​ သံကွၢ်ဝဲလၢ “ယဖိမုၣ်ဧၢ, တၢ်မၤအသးဒီးနၤ ဒ်လဲၣ်.” ဒီးနီၢ်ရူၤသး တဲဘၣ်အီၤ ကယဲၢ်တၢ်ခဲလၢာ်လၢ ပိာ်ခွါတဂၤန့ၣ်​ မၤန့ၢ်အီၤန့ၣ်လီၤ. ၁၇ နီၢ်ရူၤသး ဆဲးတဲဝဲလၢ “အဝဲဟ့ၣ်လီၤယၤလၢ ဘုမုယီၤ ၆ စ့အၤ ဒီးတဲယၤလၢ ‘တဘၣ်က့ၤလၢ နမံၤပှၢ်ပိာ်မုၣ်အအိၣ်​ ခီလီလီတဂ့ၤ.’” ၁၈ ဒီးနီၢ်နၤဧမံတဲဝဲလၢ “ယဖိမုၣ်ဧၢ, အိၣ်ခိးဖဲအံၤ တုၤလီၤလၢ နသ့ၣ်ညါထီၣ်​ တၢ်ကမၤအသး ဒ်လဲၣ်န့ၣ်တက့ၢ်. တနံၤအံၤ စီၤဘိၤဧး ကမၤဝံၤဝဲ တၢ်ဂ့ၢ်သ့ၣ်တဖၣ်အံၤ တုၤအဝံၤတစုလီၤ.”