ရူၤသး
၁ ဖဲစံၣ်ညီၣ်ကွီၢ်တဖၣ်+ စံၣ်ညီၣ်တၢ်* အစိၤန့ၣ် တၢ်သၣ်ဝံၤလီၤဒိ အိၣ်ထီၣ်ဝဲလၢကီၢ်ပူၤလီၤ. ပှၤတဂၤလၢ အအိၣ်လၢ ဝ့ၢ်ဘ့ၤသလ့ဃ့ၣ်+ ယူဒၤအဟီၣ်ကဝီၤပူၤန့ၣ် လဲၤအိၣ်တမှံၤဝဲလၢ ကီၢ်မိၤအးလီၤ.+ အဝဲလဲၤဝဲဒီးအမါ ဒီးအဖိခွါခံဂၤလီၤ. ၂ ဒီးအမံၤမ့ၢ်ဝဲ စီၤအလံၤမ့လ့း ဒီးအမါအမံၤမ့ၢ်ဝဲ နီၢ်နၤဧမံ* ဒီးအဖိခွါခံဂၤအမံၤမ့ၢ်ဝဲ စီၤမၤဃလိၣ် ဒီးစီၤကံးလယိၣ်လီၤ. အဝဲသ့ၣ်မ့ၢ် ပှၤအ့ဖရးသးဖိလၢ အဟဲလၢ ဝ့ၢ်ဘ့ၤသလ့ဃ့ၣ် လၢယူဒၤအဟီၣ်ကဝီၤပူၤလီၤ. အဝဲသ့ၣ်လဲၤတုၤလၢ ကီၢ်မိၤအးဒီးအိၣ်ဝဲဖဲန့ၣ်လီၤ.
၃ လၢခံနီၢ်နၤဧမံ အဝၤစီၤအလံၤမ့လ့းသံဝဲ ဒီးအဝဲအိၣ်တ့ၢ်က့ၤဒီး အဖိခွါခံဂၤလီၤ. ၄ လၢခံအဖိခွါခံဂၤအံၤ ဆီဟံၣ်ဆီဃီဒီး ပှၤမိၤအးမုၣ်တဖၣ်လီၤ. တဂၤန့ၣ်အမံၤမ့ၢ်ဝဲ နီၢ်ဧိးရပၤ ဒီးလၢအဝဲတဂၤန့ၣ် အမံၤမ့ၢ်ဝဲ နီၢ်ရူၤသးလီၤ.+ ဒီးအဝဲသ့ၣ်အိၣ်ဝဲဖဲန့ၣ် အနံၣ်တဆံလီၤ. ၅ ဒီးအဖိခွါခံဂၤလၢအမ့ၢ် စီၤမၤဃလိၣ် ဒီးစီၤကံးလယိၣ်စ့ၢ်ကီး သံသဒၣ်အီၤအဃိ နီၢ်နၤဧမံန့ၣ် အဝၤဒီးအဖိတအိၣ်လၢၤဘၣ်. ၆ ဖဲအအိၣ်လၢ ကီၢ်မိၤအးအခါ အနၢ်ဟူဘၣ်ဝဲလၢ ယဟိဝၤယွၤ ဆိၣ်ဂ့ၤအပှၤဂီၢ်မုၢ် ဒီးဟ့ၣ်အဝဲသ့ၣ် တၢ်အီၣ်တၢ်အီအဃိ အဝဲပာ်လီၤအသးလၢ အကက့ၤလီၤ. အဃိ အဝဲဟးထီၣ်ကွံာ်လၢ ကီၢ်မိၤအးအပူၤ ဒီးအဒဲၣ်မုၣ်တဖၣ် ပိာ်ထီၣ်အခံလီၤ.
၇ အဝဲဟးထီၣ်လၢ တၢ်လီၢ်လၢ အဝဲဒီးအဒဲၣ်မုၣ်တဖၣ် အိၣ်ဝဲအလီၢ်န့ၣ်လီၤ. ဖဲအဝဲသ့ၣ်က့ၤလၢ ယူဒၤအဟီၣ်ကဝီၤအခါ လၢကျဲန့ၣ် ၈ နီၢ်နၤဧမံ တဲဘၣ်အဒဲၣ်မုၣ်ခံဂၤလၢ “က့ၤ, သုတဂၤစုာ်စုာ် က့ၤအိၣ်လၢ သုမိၢ်အဟံၣ်တက့ၢ်. မ်ယဟိဝၤယွၤ ပာ်ဖျါထီၣ်တၢ်အဲၣ်လၢအတီ လၢသုဖီခိၣ်+ ဒ်သုပာ်ဖျါထီၣ်အီၤလၢ ယၤဒီးသုဝၤလၢ အသံတ့ၢ်အဖီခိၣ် အသိးန့ၣ်တက့ၢ်. ၉ မ်ယဟိဝၤယွၤ ဟ့ၣ်သုလၢ တၢ်ဘံၣ်တၢ်ဘၢလၢ သုဝၤ အဟံၣ်ပူၤတက့ၢ်.”+ ဝံၤဒီးနီၢ်နၤဧမံ နၢမူအဝဲသ့ၣ် ဒီးအဝဲသ့ၣ်ဟီၣ်ဝဲလၢ အကလုၢ်ဖးဒိၣ်လီၤ. ၁၀ ဒီးအဝဲသ့ၣ်တဲအီၤလၢ “ဟၢၤအၢ, ပကလဲၤဒီးနၤဆူ နပှၤကလုာ်အအိၣ်လီၤ.” ၁၁ ဘၣ်ဆၣ် နီၢ်နၤဧမံ တဲဝဲလၢ “က့ၤဟီ ယဖိမုၣ်သ့ၣ်ဧၢ, ဘၣ်မနုၤအဃိ သုအဲၣ်ဒိးလဲၤပိာ်ယခံလဲၣ်. မ့ၢ်ယအိၣ်ဖျဲၣ်ထီၣ် ဖိခွါတဖၣ် ဒ်သိးကကဲထီၣ် သုဝၤကသ့ဒံးဧါ.+ ၁၂ က့ၤဟီ ယဖိမုၣ်သ့ၣ်ဧၢ, ယသးပှၢ်တလၢ လၢယကဆီဟံၣ်ဆီဃီ အဂီၢ်လီၤ. ယမ့ၢ်န့ၢ်ယဝၤလၢ တနၤညါအံၤ ဒီးယအိၣ်ဖျဲၣ်ထီၣ် ယဖိခွါတဖၣ် မ့ၢ်သ့သနာ်က့ ၁၃ မ့ၢ်သုကဆဲးအိၣ်ခိး အဝဲသ့ၣ် တုၤလၢအဝဲသ့ၣ် ဒိၣ်ထီၣ်ဧါ. မ့ၢ်သုကဆဲးအိၣ်မုၣ်ကမဲဒ်အံၤ လၢအဝဲသ့ၣ်အဃိဧါ. ယဖိမုၣ်သ့ၣ်ဧၢ, မၤဒ်အံၤတဂ့ၤ. ခီဖျိလၢ ယဟိဝၤယွၤ အစုထီဒါယၤအဃိ တၢ်ကဲထီၣ်အသးဒီးသု ဒ်အံၤန့ၣ် ယသးဘၣ်ဒိဒိၣ်မး.”+
၁၄ အဝဲသ့ၣ် ဟီၣ်ကဒီးဖးဒိၣ် ဝံၤဒီးနီၢ်ဧိးရပၤ နၢမူအမံၤပှၢ် ဒီးက့ၤဝဲလီၤ. မ့မ့ၢ်နီၢ်ရူၤသးန့ၣ် ဆဲးအိၣ်ဒီးအီၤလၢ တၢ်သးတီအပူၤလီၤ. ၁၅ အဃိ နီၢ်နၤဧမံ တဲဝဲလၢ “ကွၢ်လၢန့ၣ်မီၤ, နီၢ်ဧိးရပၤ က့ၤကဒါက့ၤလၢ အပှၤကလုာ် ဒီးအယွၤတဖၣ်အအိၣ်လံ. က့ၤပိာ်အခံသၢၤ.”
၁၆ ဘၣ်ဆၣ် နီၢ်ရူၤသး တဲဝဲလၢ “တဘၣ်ဃ့ကညးယၤ ဒ်သိးယကပာ်တ့ၢ်နၤ ဒီးဒ်သိး ယသုတလဲၤပိာ်နခံတဂ့ၤအဂီၢ်န့ၣ်တဂ့ၤ. ဖဲနလဲၤန့ၣ် ယကလဲၤ, ဖဲတၢ်လီၢ်လၢနမံန့ၣ် ယကမံလီၤ. နပှၤကလုာ် ကကဲထီၣ် ယပှၤကလုာ် ဒီးနကစၢ်ယွၤ ကကဲထီၣ် ယကစၢ်ယွၤလီၤ.+ ၁၇ ဖဲနသံအလီၢ်န့ၣ် ယကသံယဲ ဒီးတၢ်ကခူၣ်လီၤယၤ ဖဲန့ၣ်လီၤ. မ့တမ့ၢ် လၢတၢ်သံအဃိဘၣ်ဒီး တၢ်တမံၤဂ့ၤတမံၤဂ့ၤ မ့ၢ်မၤလီၤဖးယၤဒီးနၤန့ၣ် မ်ယဟိဝၤယွၤ စံၣ်ညီၣ်ယၤတက့ၢ်.”
၁၈ ဖဲနီၢ်နၤဧမံ ထံၣ်ဝဲလၢ နီၢ်ရူၤသး ဃ့လဲၤဒီးအီၤ သပှၢ်တၢၢ်အခါ အဝဲတမၢ အက့ၤလၢၤဘၣ်. ၁၉ ဒီးအဝဲသ့ၣ် ခံဂၤလၢာ် ဆဲးလဲၤတၢ်တုၤလၢ ဝ့ၢ်ဘ့ၤသလ့ဃ့ၣ်လီၤ.+ ဖဲအဝဲသ့ၣ် လဲၤတုၤလၢ ဝ့ၢ်ဘ့ၤသလ့ဃ့ၣ် တဘျီဃီန့ၣ် ပှၤဝ့ၢ်ဖိခဲလၢာ် ကမၢကမၣ်လၢ အဝဲသ့ၣ်အဃိလီၤ. ဒီးပှၤပိာ်မုၣ်တဖၣ် သံကွၢ်ဝဲလၢ “ပှၤတဂၤအံၤ အကဲနီၢ်နၤဧမံဧါ.” ၂၀ နီၢ်နၤဧမံ တဲပိာ်မုၣ်တဖၣ်န့ၣ်လၢ “ကိးယၤလၢ နီၢ်နၤဧမံ တဂ့ၤ. မ့ၢ်လၢသ့တၢ်လၢာ်ကစၢ် ပျဲလၢယတၢ်အိၣ်မူ ကပှဲၤဒီးတၢ်သးအုးအဃိ ကိးယၤလၢ နီၢ်မၤရၤ* တက့ၢ်.+ ၂၁ ဖဲယလဲၤအခါ တၢ်အိၣ်ဒီးယၤကိးမံၤဒဲး ဘၣ်ဆၣ် ယဟိဝၤယွၤ ဒုးဟဲက့ၤယၤ ခီလီလီလီၤ. ယဟိဝၤယွၤ လၢအမ့ၢ် သ့တၢ်လၢာ်ကစၢ် ထီဒါယၤ ဒီးပျဲလၢ ယကထံၣ်ဘၣ် တၢ်ကီတၢ်ခဲအဃိ သုကိးယၤလၢ နီၢ်နၤဧမံ, မ့ၢ်အဘၣ်မနုၤလဲၣ်.”+
၂၂ အဝဲအံၤ မ့ၢ်ဝဲ နီၢ်နၤဧမံ ဒီးအဒဲၣ်မုၣ် နီၢ်ရူၤသး လၢအမ့ၢ် ပှၤမိၤအးဖိန့ၣ် ဟးထီၣ်ကွံာ်လၢ ကီၢ်မိၤအးအဂ့ၢ်လီၤ.+ အဝဲသ့ၣ် ဟဲက့ၤတုၤလၢ ဝ့ၢ်ဘ့ၤသလ့ဃ့ၣ် ဖဲပှၤစးထီၣ်ကူးဘုမုယီၤ အဆၢကတီၢ်လီၤ.+