၂ စီၤပၤ
၂၄ ဖဲစီၤယဟိၤယါကံၣ် ပၢတၢ်အခါန့ၣ် ကီၢ်ဘၤဘူၤလိၣ်အစီၤပၤ နဘူၤကးန့စၢ်+ ဟဲထီၣ်ထီဒါအီၤ ဒီးစီၤယဟိၤယါကံၣ် ကဲထီၣ်အခ့အပှၤ သၢနံၣ်လီၤ. ဘၣ်ဆၣ် လၢခံ စီၤယဟိၤယါကံၣ် တတူၢ်လိာ်လၢၤဘၣ် ဒီးထီဒါက့ၤအီၤလီၤ. ၂ ဒီးယဟိဝၤယွၤ ဆှၢလီၤ ပှၤက့ၤစ့းဖိ,+ ပှၤစူၤရံဖိ, ပှၤမိၤအးဖိ, ဒီးပှၤဧၣ်မိၣ်ဖိ အသုးဖိအဒူၣ်တဖၣ်လီၤ. ဒီးယဟိဝၤယွၤ ဆဲးဆှၢလီၤ ပှၤတဖၣ်န့ၣ် ဒ်သိး ကမၤဟးဂီၤယူဒၤအဘီမုၢ် ဒ်အတဲတ့ၢ်+ ခီဖျိလၢ အခ့အပှၤလၢ အမ့ၢ်ဝံတဖၣ်လီၤ. ၃ တၢ်ကဲထီၣ်အသးဒီး ယူဒၤအပှၤဂီၢ်မုၢ်ဒ်န့ၣ်န့ၣ် ခီဖျိလၢ ယဟိဝၤယွၤ အတၢ်မၤလိာ်အဃိ ဒီးမ့ၢ်ဒ်သိးကစၢ်ယွၤ ကနီဟးထီၣ်ကွံာ် အဝဲသ့ၣ်လၢ အမဲာ်ညါလီၤ.+ ဒီးယွၤမၤဝဲဒ်န့ၣ် ခီဖျိလၢ စီၤမနၤၡ့ၤ မၤတ့ၢ်တၢ်ဒဲးဘးအါမံၤ+ ၄ ဒီးအဝဲလူလီၤစ့ၢ်ကီး ပှၤလၢအတၢ်ကမၣ်တအိၣ်ဘၣ်တဖၣ် အသွံၣ်+ တုၤလၢ အအိၣ်ပှဲၤလၢ ဝ့ၢ်ယရူၤၡလ့ၣ်ပူၤ အဃိ ယဟိဝၤယွၤ တသးအိၣ်ပျၢ် တၢ်ကမၣ်လၢၤဘၣ်.+
၅ မ့မ့ၢ် စီၤယဟိၤယါကံၣ် အဂ့ၢ်လၢအဂၤတဖၣ် ဒီးတၢ်လၢအမၤတ့ၢ်ဝဲခဲလၢာ်န့ၣ် ဘၣ်တၢ်ကွဲးလီၤအီၤလၢ ယူဒၤအစီၤပၤ တၢ်စံၣ်စိၤတဲစိၤ အလံာ်ပူၤလီၤ.+ ၆ ဒီးစီၤယဟိၤယါကံၣ် သံဝဲဒ်အမိၢ်ပၢ်ဖံဖု လၢပျၢၤတဖၣ်အသိး+ ဒီးအဖိခွါ စီၤယဟိၤယါခံၣ် ကဲထီၣ်စီၤပၤလၢအလီၢ်လီၤ.
၇ မ့ၢ်လၢ ကီၢ်ဘၤဘူၤလိၣ်အစီၤပၤ မၤန့ၢ် အဲၤကူပတူးအစီၤပၤ အတၢ်လီၢ်တၢ်ကျဲ+ ခဲလၢာ်စးထီၣ်လၢ အဲၤကူပတူးအတၢ်တြီၤပူၤ+ ပၢၢ်တုၤလၢ ထံကျိဖရၤသး+ အဃိ အဲၤကူပတူးအစီၤပၤ တဟးထီၣ်လၢ အကီၢ်ပူၤနီတဘျီလၢၤဘၣ်.
၈ ဖဲစီၤယဟိၤယါခံၣ်+ ကဲထီၣ်စီၤပၤအခါ အသးနံၣ်အိၣ်ဝဲ ၁၈ နံၣ် ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ သၢလါလီၤ.+ စီၤယဟိၤယါခံၣ် အမိၢ်မ့ၢ်ဝဲ နီၢ်နဃူၡတၤ လၢအမ့ၢ် စီၤအ့လနၤသၣ် လၢအအိၣ်လၢ ဝ့ၢ်ယရူၤၡလ့ၣ်န့ၣ် အဖိမုၣ်လီၤ. ၉ စီၤယဟိၤယါခံၣ် ဆဲးမၤဝဲ တၢ်လၢ ယဟိဝၤယွၤထံၣ်ဝဲလၢ အအၢ ဒ်အပၢ်မၤဝဲအသိး ခဲလၢာ်လီၤ. ၁၀ ဖဲန့ၣ်အဆၢကတီၢ် ဘၣ်လၢ ကီၢ်ဘၤဘူၤလိၣ် အစီၤပၤ နဘူၤကးန့စၢ် အခ့အပှၤတဖၣ် ဟဲထီၣ်ဒ်သိး ကဒုးဝဲ ဝ့ၢ်ယရူၤၡလ့ၣ် ဒီးဝ့ၢ်န့ၣ် ဘၣ်တၢ်ကဝီၤဃာ်အီၤလီၤ.+ ၁၁ ဖဲကီၢ်ဘၤဘူၤလိၣ် အစီၤပၤနဘူၤကးန့စၢ် အခ့အပှၤတဖၣ် ကဝီၤဃာ်ဝဲ ဝ့ၢ်အခါ အဝဲလဲၤတုၤလၢ ဝ့ၢ်ယရူၤၡလ့ၣ်လီၤ.
၁၂ ယူဒၤအစီၤပၤ ယဟိၤယါခံၣ်, အမိၢ်, အခ့အပှၤတဖၣ်, အပဒိၣ်ဖးဒိၣ်တဖၣ်,*+ ဒီးအပဒိၣ်တဖၣ် လဲၤထီၣ်လၢ ကီၢ်ဘၤဘူၤလိၣ် အစီၤပၤအအိၣ်လီၤ.+ အဃိ ဖဲကီၢ်ဘၤဘူၤလိၣ် အစီၤပၤ ပၢတၢ်ဃိးနံၣ်တနံၣ်န့ၣ် အဝဲက့ၤဖီၣ်ဝဲ စီၤယဟိၤယါခံၣ်လီၤ.+ ၁၃ ဒီးအဝဲဟံးန့ၢ်ဝဲ တၢ်လုၢ်ဒိၣ်ပှ့ၤဒိၣ် ခဲလၢာ်လၢ အအိၣ်လၢ ယဟိဝၤယွၤ အဟံၣ်ပူၤ ဒီးလၢစီၤပၤအနီပူၤလီၤ.+ ဒီးတၢ်ပီးတၢ်လီထူခဲလၢာ် လၢ အံၣ်စရ့လး အစီၤပၤ ၡလိၤမိၤတ့ပာ်စၢၤဝဲလၢ ယဟိဝၤယွၤ အတၢ်လုၢ်ဟံၣ်အဂီၢ်န့ၣ် အဝဲကျီကွံာ်ဝဲ တကူာ်ဘၣ်တကူာ်လီၤ.+ တၢ်မၤအသးတဖၣ်အံၤ ကဲထီၣ် ဒ်ယဟိဝၤယွၤ တဲပာ်စၢၤဝဲအသိးခဲလၢာ်လီၤ. ၁၄ အဝဲက့ၤဖီၣ်ဝဲ ပှၤလၢဝ့ၢ်ယရူၤၡလ့ၣ်အပူၤ ခဲလၢာ်, ပဒိၣ်ဖးဒိၣ်ခဲလၢာ်,+ ပှၤသုးဖိလၢ အဂံၢ်ဆူၣ်ဘါဆူၣ်ခဲလၢာ်, ပှၤစုသ့ဖိ ဒီးပှၤပိာ်ထးဖိခဲလၢာ်လီၤ.+ အဝဲက့ၤဖီၣ် ပှၤအဂၤ ၁၀,၀၀၀ လီၤ. ပှၤလၢအအိၣ်တ့ၢ်န့ၣ် အိၣ်ထဲ ပှၤလၢအဖှီၣ်ကတၢၢ်တဖၣ်လီၤ.+ ၁၅ အဃိ အဝဲက့ၤဖီၣ် စီၤယဟိၤယါခံၣ်+ ဆူကီၢ်ဘၤဘူၤလိၣ်လီၤ.+ ဒီးလၢဝ့ၢ်ယရူၤၡလ့ၣ်အပူၤန့ၣ် အဝဲဖီၣ်န့ၢ်စ့ၢ်ကီး စီၤပၤအမိၢ်, စီၤပၤအမါတဖၣ်, အပဒိၣ်တဖၣ် ဒီးကီၢ်အပှၤဒိၣ်ပှၤပှၢ်တဖၣ် ဒီးက့ၤကိးအဝဲသ့ၣ်လၢ ကီၢ်ဘၤဘူၤလိၣ်လီၤ. ၁၆ ဒီးကီၢ်ဘၤဘူၤလိၣ်အစီၤပၤ က့ၤဖီၣ်စ့ၢ်ကီး ပှၤဒူပှၤဃိၤ ခဲလၢာ်ခဲဆ့ အဂၤ ၇,၀၀၀ ဒီးပှၤစုသ့ဖိ ဒီးပှၤပိာ်ထးဖိ အဂၤ ၁,၀၀၀ လီၤ. ပှၤတဖၣ်န့ၣ်ခဲလၢာ် မ့ၢ်ဝဲ ပိာ်ခွါလၢ အဂံၢ်ဆူၣ်ဘါဆူၣ် ဒီးအဒုးတၢ်သ့ ကိးဂၤဒဲးလီၤ. ၁၇ ကီၢ်ဘၤဘူၤလိၣ် အစီၤပၤ ဒုးကဲထီၣ်ဝဲ စီၤယဟိၤယါခံၣ် အတံ စီၤမးတၤနယၤ+ လၢစီၤပၤလၢ စီၤယဟိၤယါခံၣ်အလီၢ် ဒီးဆီတလဲဝဲ စီၤမးတၤနယၤ အမံၤလၢ စီၤစံးဒကံယၤလီၤ.+
၁၈ ဖဲစီၤစံးဒကံယၤ ကဲထီၣ်စီၤပၤအခါ အသးနံၣ်အိၣ်ဝဲ ၂၁ နံၣ် ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ၁၁ နံၣ်လီၤ. စီၤစံးဒကံယၤ အမိၢ်မ့ၢ်ဝဲ နီၢ်ဃမူတလး+ လၢအမ့ၢ် စီၤယံးရမံယၤ လၢအအိၣ်ဟဲလၢ ဝ့ၢ်လံးဘနၤန့ၣ် အဖိမုၣ်လီၤ. ၁၉ စီၤစံးဒကံယၤ ဆဲးမၤတၢ်လၢ ယဟိဝၤယွၤ ထံၣ်ဝဲလၢအအၢ ဒ်စီၤယဟိၤယါကံၣ် မၤတ့ၢ်ဝဲအသိးခဲလၢာ်လီၤ.+ ၂၀ ခီဖျိလၢ ယဟိဝၤယွၤ အတၢ်သးဒိၣ်ထီၣ်အဃိ တၢ်ကဲထီၣ်အသးဒ်အံၤလၢ ဝ့ၢ်ယရူၤၡလ့ၣ် ဒီးလၢယူဒၤဘီမုၢ်ပူၤ တုၤလၢ အနီဟးထီၣ်ကွံာ်အဝဲသ့ၣ်လၢ အမဲာ်ညါလီၤ.+ ဒီးစီၤစံးဒကံယၤ ထီဒါက့ၤ ကီၢ်ဘၤဘူၤလိၣ် အစီၤပၤလီၤ.+