၂ စီၤပၤ
၂၅ ဖဲစီၤစံးဒကံယၤ ပၢတၢ်ခွံနံၣ်တနံၣ်, ဖဲလါအလါတဆံ, လါထီၣ် အသီတဆံန့ၣ် ဘၤဘူၤလိၣ် အစီၤပၤနဘူၤကးန့စၢ်+ ဒီးအသုးမုၢ် လဲၤဝဲလၢ ဝ့ၢ်ယရူၤၡလ့ၣ်န့ၣ်လီၤ.+ အဝဲဆီလီၤအသး ဒ်သိးကဒုးဝ့ၢ်အဂီၢ် ဒီးတ့ထီၣ် တၢ်ဒူၣ်ဝးတရံးဝ့ၢ်လီၤ.+ ၂ ဒီးဝ့ၢ်န့ၣ် ဘၣ်တၢ်ကဝီၤဃာ်အီၤ တုၤလၢ စီၤပၤစံးဒကံယၤ ပၢတၢ် ၁၁ နံၣ်အနံၣ်န့ၣ်လီၤ. ၃ ဒီးဖဲလါ လွံၢ်လါတလါ, လါထီၣ်ခွံသီတသီန့ၣ် တၢ်သၣ်ဝံၤလီၤဒိ+ အိၣ်ဝဲလၢ ဝ့ၢ်ပူၤနးမး ဒီးလၢပှၤထံဖိကီၢ်ဖိအဂီၢ်န့ၣ် တၢ်အီၣ်တအိၣ်လၢၤဘၣ်.+ ၄ ပှၤက့ၤစ့းဖိတဖၣ် ဘၢၣ်ဖျိကွံာ်ဝ့ၢ်ဒူၣ်+ ဒီးဖဲအဝဲသ့ၣ် ကဝီၤဃာ်ဝ့ၢ်အခါ သုးဖိခဲလၢာ် ဃ့ၢ်ပူၤဖျဲးအသးလၢ မုၢ်နၤခီ ဒီးဟးထီၣ်ကွံာ်ဝဲလၢ တြဲၤလၢ အအိၣ်ဝဲလၢ တၢ်ဒူၣ်ခံခါ အဘၢၣ်စၢၤလၢ စီၤပၤအတၤသၣ်လီၢ် အကပၤလီၤ. ဒီးစီၤပၤစံးဒကံယၤ လဲၤဝဲလၢ ဧၤရဘၤအကျဲလီၤ.+ ၅ ဘၣ်ဆၣ် ပှၤက့ၤစ့းဖိ အသုးမုၢ်လူၤဝဲ စီၤပၤစံးဒကံယၤ ဒီးချုးန့ၢ်အီၤဖဲ ဝ့ၢ်ယရံၤဃိ အတၢ်ပၢၤခိၣ်လီၤ. ဒီးစီၤပၤ အသုးဖိခဲလၢာ် လီၤမုၢ်ပြံပြါကွံာ်ဝဲလၢ အအိၣ်လီၤ. ၆ ဒီးအဝဲသ့ၣ် ဖီၣ်န့ၢ်စီၤပၤ+ ဒီးက့ၤကိးအီၤလၢ ဘၤဘူၤလိၣ် အစီၤပၤအအိၣ် လၢဝ့ၢ်ရံးဘလၤ ဒီးအဝဲသ့ၣ် စံၣ်ညီၣ်အီၤလီၤ. ၇ အဝဲသ့ၣ် မၤသံ စီၤစံးဒကံယၤ အဖိခွါတဖၣ်လၢ အမဲာ်ညါ ဝံၤဒီးစီၤနဘူၤကးန့စၢ် တူခွဲးထီၣ်ကွံာ် စီၤစံးဒကံယၤ အမဲာ်ချံ, စၢဃာ်အီၤလၢ ထးသွဲတိၢ်ဘီတဖၣ် ဒီးက့ၤကိးအီၤဆူ ဝ့ၢ်ဘၤဘူၤလိၣ်လီၤ.+
၈ ဖဲဘၤဘူၤလိၣ် အစီၤပၤ နဘူၤကးန့စၢ် ပၢတၢ် ၁၉ နံၣ်တနံၣ်, လါယဲၢ်လါတလါ, လါထီၣ်နွံသီတသီန့ၣ် ဘၤဘူၤလိၣ် အစီၤပၤ အခ့အပှၤလၢအမ့ၢ် ပှၤခိးတၢ်ဖိအခိၣ် စီၤနဘူစၢ်ရဒၣ်န့ၣ်+ လဲၤတုၤလၢ ဝ့ၢ်ယရူၤၡလ့ၣ်လီၤ.+ ၉ အဝဲဒွဲၣ်အူထီၣ်ကွံာ် ယဟိဝၤယွၤ အတၢ်လုၢ်ဟံၣ်,+ စီၤပၤအဟံၣ်+ ဒီးဟံၣ်ခဲလၢာ်လၢ ဝ့ၢ်ယရူၤၡလ့ၣ်အပူၤလီၤ.+ ဒီးအဝဲဒွဲၣ်အူထီၣ်ကွံာ်စ့ၢ်ကီး ပှၤပိာ်ခွါလၢ အမံၤဒိၣ်ကိးဂၤဒဲး အဟံၣ်လီၤ.+ ၁၀ ဒီးပှၤက့ၤစ့းဖိ အသုးမုၢ်ဒီတဖု လၢအအိၣ်ဒီး ပှၤခိးတၢ်ဖိအခိၣ်န့ၣ် မၤလီၤပှီၢ်ကွံာ်ဝဲ ယရူၤၡလ့ၣ် အဝ့ၢ်ဒူၣ်လီၤ.+ ၁၁ ပှၤခိးတၢ်ဖိအခိၣ် စီၤနဘူစၢ်ရဒၣ် က့ၤဖီၣ်ပှၤလၢ အအိၣ်ဒံးလၢ ဝ့ၢ်ပူၤ, ပှၤလၢအလဲၤအိၣ်ဃူ ဘၤဘူၤလိၣ်အစီၤပၤ ဒီးပှၤထံဖိကီၢ်ဖိတဖၣ်န့ၣ်လီၤ.+ ၁၂ ဘၣ်ဆၣ် ပှၤခိးတၢ်ဖိအခိၣ် ပာ်တ့ၢ်ဝဲ ပှၤလၢအဖှီၣ်ကတၢၢ်တနီၤလၢ ကီၢ်ပူၤ ဒ်သိး ကမၤတၢ်လၢ စပံးကျီး ဒီးမၤတၢ်ဒ် ပှၤလၢ အဘၣ်တၢ်မၢဆူၣ်အီၤလၢ ကမၤတၢ်အဂီၢ်လီၤ.+ ၁၃ ဒီးယဟိဝၤယွၤ အဟံၣ် အတၢ်ထူၣ်တဖၣ်လၢ အဘၣ်တၢ်မၤအီၤလၢ တိၢ်ဘီ,+ လ့ၣ်ဆီၣ်တဖၣ်ဒီး+ ထံဒၢဖးဒိၣ်တဖျၢၣ်လၢ ပှၤကိးဝဲလၢ ပီၣ်လဲၣ်တိၢ်ဘီ+ လၢအအိၣ်လၢ ယဟိဝၤယွၤ အဟံၣ်အပူၤန့ၣ် အဝဲသ့ၣ် မၤတဲာ်ကွံာ်ဝဲ တကူာ်ဘၣ်တကူာ် ဒီးအဝဲသ့ၣ် က့ၤစိာ်ဝဲ တိၢ်ဘီဆူ ကီၢ်ဘၤဘူၤလိၣ်လီၤ.+ ၁၄ အဝဲသ့ၣ် က့ၤစိာ်စ့ၢ်ကီး ထံစဲၤတဖၣ်, နီၣ်တရီာ်တၢ်တဖၣ်, ထးရံးတဖၣ်, ထံခွးတဖၣ် ဒီးတၢ်ပီးတၢ်လီလၢ အဘၣ်တၢ်တ့အီၤလၢ တိၢ်ဘီ လၢပှၤသူအီၤလၢ တၢ်လုၢ်ဟံၣ်အပူၤ ခဲလၢာ်လီၤ. ၁၅ ပှၤခိးတၢ်ဖိအခိၣ်န့ၣ် က့ၤစိာ်စ့ၢ်ကီး တၢ်စိာ်မ့ၣ်အူအ့ၣ်အခွးတဖၣ် ဒီးလီခီဖျၢၣ်တဖၣ်လၢ ဘၣ်တၢ်တ့အီၤလၢ ထူစီ+ ဒီးစ့ညၣ်တဖၣ်လီၤ.+ ၁၆ မ့မ့ၢ် တၢ်အထူၣ် ခံထူၣ်, ထံဒၢဖးဒိၣ်တဖျၢၣ်လၢ ပှၤကိးဝဲလၢ ပီၣ်လဲၣ်တိၢ်ဘီ ဒီးလ့ၣ်ဆီၣ်တဖၣ်လၢ စီၤၡလိၤမိၤ တ့ထီၣ်ပာ်စၢၤဝဲလၢ ယဟိဝၤယွၤ အဟံၣ်အဂီၢ်န့ၣ် အတိၢ်ဘီအိၣ်ဝဲ အါတလၢ လၢပှၤကစီၤဝဲအဂီၢ်လီၤ.+ ၁၇ ဒီးတၢ်ထူၣ်တထူၣ်စုာ်စုာ်န့ၣ် အထီအိၣ်ဝဲ ၁၈ ပျၢ်*+ ဒီးတၢ်ထူၣ် အခိၣ်ထိးန့ၣ် ဘၣ်တၢ်တ့အီၤလၢ တိၢ်ဘီ ဒီးတၢ်ထူၣ်အခိၣ်ထိးန့ၣ် အထီအိၣ်ဝဲ သၢပျၢ်လီၤ. ဒီးတၢ်ကယၢကယဲလၢ အလီၤဂာ်ဒ်ပှာ်အသိး ဒီးတၢ်ကယၢကယဲတဖၣ်လၢ အလီၤဂာ်ဒ်သလဲသၣ်အသိးန့ၣ် အိၣ်ဝးတရံး တၢ်အခိၣ်ထိး ဒီးဘၣ်တၢ်တ့အီၤလၢ တိၢ်ဘီခဲလၢာ်လီၤ.+ ဒီးတၢ်အထူၣ် ခံထူၣ်တထူၣ် လၢအအိၣ်ဒီး တၢ်ကယၢကယဲလၢ အလီၤဂာ်ဒ်ပှာ်အသိးန့ၣ် ဘၣ်တၢ်တ့အီၤ ဒ်န့ၣ်စ့ၢ်ကီးလီၤ.
၁၈ ပှၤခိးတၢ်ဖိအခိၣ် က့ၤကိးစ့ၢ်ကီး ပှၤလုၢ်တၢ်ဒိၣ်အခိၣ် စီၤစရါယၤ,+ ပှၤလုၢ်တၢ်ဒိၣ် ခံဂၤတဂၤ စီၤစဖါနယၤ+ ဒီးပှၤခိးတြဲၤဖိ သၢဂၤလီၤ.+ ၁၉ ဒီးလၢဝ့ၢ်ပူၤန့ၣ် အဝဲက့ၤကိးပဒိၣ်တဂၤ လၢအမ့ၢ် ပှၤသုးဖိအခိၣ်, စီၤပၤအပှၤဟ့ၣ်ကူၣ်တၢ် ယဲၢ်ဂၤလၢ အအိၣ်လၢ ဝ့ၢ်ပူၤ, သုးခိၣ်ကျၢၢ် အနဲၣ်ရွဲၣ်လၢ အထၢသုးဖိအသီတဖၣ် ဒီးပှၤပိာ်ခွါအဂၤ ၆၀ လၢအအိၣ်လၢ ဝ့ၢ်ပူၤလီၤ. ၂၀ ပှၤခိးတၢ်ဖိအခိၣ် စီၤနဘူစၢ်ရဒၣ်+ က့ၤကိးအဝဲသ့ၣ်လၢ ဘၤဘူၤလိၣ် အစီၤပၤအအိၣ် ဖဲဝ့ၢ်ရံးဘလၤလီၤ.+ ၂၁ ဒီးဘၤဘူၤလိၣ် အစီၤပၤ မၤသံကွံာ်အဝဲသ့ၣ် ဖဲဝ့ၢ်ရံးဘလၤ လၢဃမါသး အဟီၣ်ကဝီၤန့ၣ်လီၤ.+ အဃိ ယူဒၤအပှၤဂီၢ်မုၢ် ဘၣ်တၢ်က့ၤကိးအီၤ ဖးယံၤဒီး အထံကီၢ်လီၤ.+
၂၂ ဘၤဘူၤလိၣ် အစီၤပၤနဘူၤကးန့စၢ် ပာ်ထီၣ် စီၤၡၤဖၣ်+ အလံၤခွါ စီၤကဒါလယၤ+ လၢအမ့ၢ် စီၤအဃံကၣ်+ အဖိခွါန့ၣ်လၢ ပှၤဂီၢ်မုၢ်လၢ အအိၣ်တ့ၢ်ဒံးလၢ ယူဒၤအပူၤန့ၣ် အဖီခိၣ်လီၤ.+ ၂၃ ဖဲသုးခိၣ်ခဲလၢာ် ဒီးအဝဲသ့ၣ်အသုးဖိတဖၣ် နၢ်ဟူဝဲလၢ ဘၤဘူၤလိၣ်အစီၤပၤ ပာ်ထီၣ် စီၤကဒါလယၤလၢ ပှၤဂီၢ်မုၢ်အဖီခိၣ်အခါ အဝဲသ့ၣ် လဲၤဝဲလၢ စီၤကဒါလယၤအအိၣ် လၢဝ့ၢ်မံးစပၤအပူၤ တဘျီဃီလီၤ. အဝဲသ့ၣ်န့ၣ် မ့ၢ်ဝဲ စီၤနသၤနံယၤ အဖိခွါ စီၤယံးၡမၤဧ့လး, စီၤကါရ့ၤ အဖိခွါ စီၤယိဃၤနၣ်, ပှၤနတိဖၤဖိ စီၤတ့ၣ်ဃူမ့း အဖိခွါ စီၤစရါယၤ ဒီးပှၤမၤကးဖိတဂၤ အဖိခွါ စီၤယၤစါနယၤလီၤ. ဒီးအဝဲသ့ၣ် ဟဲဝဲဒီး အသုးဖိတဖၣ်လီၤ.+ ၂၄ စီၤကဒါလယၤ မၤတၢ်အၢၣ်လီၤဒီးအဝဲသ့ၣ်ဒီး အပှၤသုးဖိတဖၣ် ဒီးတဲအဝဲသ့ၣ်လၢ “တဘၣ်ဘၣ်ယိၣ်တၢ်လၢ သုဘၣ်ကဲ ပှၤက့ၤစ့းဖိ အခ့အပှၤ အဃိတဂ့ၤ. အိၣ်လၢ ကီၢ်ပူၤဒီး မၤတၢ်လၢ ဘၤဘူၤလိၣ် အစီၤပၤအဂီၢ်တက့ၢ်. သုမ့ၢ်မၤဒ်န့ၣ်န့ၣ် သုကအိၣ်ဘၣ် မုာ်မုာ်ခုၣ်ခုၣ်လီၤ.”+
၂၅ ဖဲလါ နွံလါတလါန့ၣ် စီၤယံးၡမၤဧ့လး+ လၢအမ့ၢ် စီၤပၤအစၢၤအသွဲၣ်န့ၣ် ဟဲဒီးအပှၤအဂၤတဆံ ဒီးအဝဲသ့ၣ်မၤသံဝဲ စီၤကဒါလယၤ ဃုာ်ဒီး ပှၤယူဒၤဖိ ဒီးပှၤက့ၤစ့းဖိ လၢအအိၣ်ဒီးအီၤ ဖဲဝ့ၢ်မံးစပၤန့ၣ်လီၤ.+ စီၤယံးၡမၤဧ့လး အပၢ်မ့ၢ်ဝဲ စီၤနသၤနံယၤ ဒီးစီၤနသၤနံယၤ အပၢ်မ့ၢ်ဝဲ စီၤအလံၡမၤလီၤ. ၂၆ ဒီးပှၤဂီၢ်မုၢ်ခဲလၢာ် စးထီၣ်လၢအဒိၣ် တုၤလၢအဆံး ဃုာ်ဒီးသုးခိၣ်တဖၣ် ပျံၤဝဲ ပှၤက့ၤစ့းဖိအဃိ+ အဝဲသ့ၣ်ခဲလၢာ် လဲၤဝဲလၢ ကီၢ်အဲၤကူပတူးလီၤ.+
၂၇ ဒီးဖဲယူဒၤအစီၤပၤ ယဟိၤယါခံၣ်+ ဘၣ်တၢ်က့ၤဖီၣ်အီၤ ပှဲၤထီၣ် ၃၇ နံၣ်တနံၣ်, လါ ၁၂ လါတလါ, လါထီၣ် ၂၇ သီတသီန့ၣ် ဘၤဘူၤလိၣ် အစီၤပၤအ့ဝလးမရၤဒိး ပျၢ်ကွံာ် ယူဒၤ အစီၤပၤယဟိၤယါခံၣ် လၢဃိာ်ပူၤလီၤ.+ တၢ်ကဲထီၣ်အသးဒ်န့ၣ် ဖဲစီၤအ့ဝလးမရၤဒိး ကဲထီၣ်စီၤပၤ အဆိကတၢၢ်တနံၣ် အတီၢ်ပူၤလီၤ. ၂၈ ဘၤဘူၤလိၣ် အစီၤပၤန့ၣ် တဲတၢ်ဒီးစီၤယဟိၤယါခံၣ် မုာ်မုာ် ဒီးအဝဲပာ်ထီၣ် စီၤယဟိၤယါခံၣ် ထီန့ၢ်ဒံး* စီၤပၤအဂၤတဖၣ်လၢ အဘၣ်တၢ်က့ၤဖီၣ်အီၤ လၢဘၤဘူၤလိၣ်အပူၤန့ၣ်လီၤ. ၂၉ အဃိ စီၤယဟိၤယါခံၣ် ဘ့ၣ်လီၤကွံာ် ပှၤဃိာ်ဖိအတၢ်ကူတၢ်ကၤ ဒီးဖဲအဝဲအိၣ်မူဒံးဝဲ အဆၢကတီၢ်န့ၣ် အဝဲအီၣ်တၢ်လၢ စီၤပၤအစီၢ်နီၤခိၣ် ထီဘိလီၤ. ၃၀ ဖဲအဝဲ အိၣ်မူဒံးဝဲ အဆၢကတီၢ်န့ၣ် စီၤပၤ ဟ့ၣ်လီၤအီၤ တၢ်အီၣ်တၢ်အီ တနံၤဘၣ်တနံၤ ထီဘိလီၤ.