၂ ကွဲးနီၣ်တၢ်
၃၅ စီၤယိၤၡံယၤ မၤဝဲဘူၣ်လဲၤကပာ်လၢ+ ယဟိဝၤယွၤအဂီၢ် လၢဝ့ၢ်ယရူၤၡလ့ၣ်အပူၤလီၤ. ဖဲလါအဆိကတၢၢ်တလါ, လါထီၣ် ၁၄ သီတသီန့ၣ်+ အဝဲသ့ၣ် မၤသံ ဆၣ်ဖိကီၢ်ဖိလၢ ဘူၣ်လဲၤကပာ် အတၢ်လုၢ်အဂီၢ်လီၤ.+ ၂ အဝဲဟ့ၣ်လီၤဝဲ ပှၤလုၢ်တၢ်ဒိၣ်တဖၣ်အမူဒါ ဒီးဟ့ၣ်ဂံၢ်ဟ့ၣ်ဘါ အဝဲသ့ၣ်လၢ ကမၤလၢပှဲၤ အမူဒါလၢ ယဟိဝၤယွၤ အဟံၣ်ပူၤလီၤ.+ ၃ ဒီးအဝဲတဲဘၣ် ပှၤလ့ၤဝံဖိတဖၣ် လၢအမ့ၢ် ပှၤသိၣ်လိတၢ်တဖၣ်လၢ ကီၢ်အံၣ်စရ့လးအပူၤ+ ဒီးပှၤစီဆှံလၢ ယဟိဝၤယွၤအဂီၢ်လၢ “ပာ်လီၤ တလါစီဆှံလၢ ဟံၣ်လၢအံၣ်စရ့လး အစီၤပၤဒၤဝံး အဖိခွါ စီၤၡလိၤမိၤ တ့ထီၣ်ဝဲအပူၤန့ၣ်တက့ၢ်.+ သုတဘၣ်ယိးအီၤလၢ သုဖံဘၣ်ခိၣ်လၢၤဘၣ်.+ ခဲအံၤ မၤက့ၤတၢ်လၢ သုကစၢ် ယဟိဝၤယွၤအဂီၢ် ဒီးအပှၤဂီၢ်မုၢ် အံၣ်စရ့လးအဂီၢ်တက့ၢ်. ၄ ကတဲာ်ကတီၤသုသးလၢ သုကရူၢ်တဖၣ်အပူၤ ဒ်သုပၢ်အဒူၣ်ဖိထၢဖိတဖၣ် အိၣ်ဝဲအသိး ဒီးမၤထွဲတၢ်လၢ အံၣ်စရ့လး အစီၤပၤဒၤဝံး+ ဒီးအဖိခွါစီၤၡလိၤမိၤ ကွဲးတ့ၢ်ဝဲန့ၣ်တက့ၢ်.+ ၅ လဲၤဆၢထၢၣ်လၢ တၢ်စီဆှံအလီၢ် ဒ်သုပၢ်အဒူၣ်ဖိထၢဖိတဖၣ် အိၣ်ဝဲအသိး ဒီးရဲၣ်လီၤကျဲၤလီၤ သုသး တဒူၣ်ဘၣ်တဒူၣ် ဒ်သိးပှၤဂီၢ်မုၢ် တဒူၣ်စုာ်စုာ်န့ၣ် ကအိၣ်ဒီး ပှၤလ့ၤဝံဖိတဒူၣ်လၢ အကမၤစၢၤ အဝဲသ့ၣ် အဂီၢ်တက့ၢ်. ၆ မၤသံ ဆၣ်ဖိကီၢ်ဖိတဖၣ်လၢ ဘူၣ်လဲၤကပာ် အတၢ်လုၢ်အဂီၢ်+ ဝံၤဒီးမၤစီဆှံထီၣ်သုသးတက့ၢ်. ဒီးကတဲာ်ကတီၤန့ၢ်တၢ်လၢ သုဒီပုၢ်ဝဲၢ်တဖၣ်အဂီၢ် ဒ်သိးအဝဲသ့ၣ် ကမၤထွဲ ယဟိဝၤယွၤ အတၢ်ကတိၤ ခီဖျိစီၤမိၤၡ့န့ၣ်တက့ၢ်.”
၇ ဒီးစီၤယိၤၡံယၤ ဟ့ၣ်မၤဘူၣ်လီၤဝဲ သိဖါ, သိဖါဖိ ဒီးမဲာ်တဲးလဲးဖါဖိတဖၣ် ခဲလၢာ်ခဲဆ့အဒု ၃၀,၀၀၀ ဒီးကျီၢ်အဒု ၃,၀၀၀ ဒ်သိးပှၤဂီၢ်မုၢ်လၢ အအိၣ်ဖဲန့ၣ်တဖၣ် ကသူဝဲလၢ ဘူၣ်လဲၤကပာ် အတၢ်လုၢ်တဖၣ် အဂီၢ်လီၤ. ဒီးစီၤပၤဟ့ၣ်လီၤ ဆၣ်ဖိကီၢ်ဖိတဖၣ်န့ၣ်လၢ အနီၢ်ကစၢ် အဆၣ်ဖိကီၢ်ဖိတဖၣ် အကျါလီၤ.+ ၈ စီၤပၤအပဒိၣ်ဖးဒိၣ်တဖၣ် ဟ့ၣ်လီၤစ့ၢ်ကီးဝဲ တၢ်မၤဘူၣ်တဖၣ်လၢ ပှၤဂီၢ်မုၢ်, ပှၤလုၢ်တၢ်ဒိၣ်တဖၣ် ဒီးပှၤလ့ၤဝံဖိတဖၣ်အဂီၢ် လၢတၢ်သူၣ်အိၣ်သးအိၣ် အပူၤလီၤ. ဒီးစီၤဃံးလကံယၤ,+ စီၤစကၤရယၤ ဒီးစီၤယဃံအ့လး လၢအမ့ၢ် ပှၤအခိၣ်တဖၣ်လၢ အတီခိၣ်ရိၤမဲတၢ်လၢ ယွၤလၢအမ့ၢ်အတီ အဟံၣ်န့ၣ် ဟ့ၣ်လီၤဝဲ ပှၤလုၢ်တၢ်ဒိၣ်တဖၣ်လၢ ဆၣ်ဖိကီၢ်ဖိအဒု ၂,၆၀၀ လၢဘူၣ်လဲၤကပာ် အတၢ်လုၢ်အဂီၢ် ဒီးကျီၢ်အဒု ၃၀၀ လီၤ. ၉ စီၤကနၤနယၤ ဒီးအဒီပုၢ်ဝဲၢ်ခွါတဖၣ် စီၤၡမါယၤ ဒီးစီၤနၤသန့လး ဃုာ်ဒီး စီၤဃၡၤဘယၤ, စီၤယံၤအ့လး, စီၤယိစဘး လၢအမ့ၢ် ပှၤလ့ၤဝံဖိ အခိၣ်အနၢ်တဖၣ်န့ၣ် ဟ့ၣ်လီၤဝဲ ပှၤလ့ၤဝံဖိတဖၣ်လၢ ဆၣ်ဖိကီၢ်ဖိအဒု ၅,၀၀၀ လၢဘူၣ်လဲၤကပာ် အတၢ်လုၢ်အဂီၢ် ဒီးကျီၢ်အဒု ၅၀၀ လီၤ.
၁၀ ဖဲပှၤကတဲာ်ကတီၤတၢ်လၢ ဘူၣ်အဂီၢ် ဝံၤဒီး ပှၤလုၢ်တၢ်ဒိၣ်တဖၣ် ဆၢထၢၣ်ဝဲလၢအလီၢ် ဒီးပှၤလ့ၤဝံဖိတဖၣ် ဆၢထၢၣ်ဝဲလၢ အကရူၢ်တဖၣ်အအိၣ်+ ဒ်စီၤပၤမၤလိာ်တ့ၢ်ဝဲ အသိးလီၤ. ၁၁ ပှၤလ့ၤဝံဖိတဖၣ် မၤသံဝဲ ဆၣ်ဖိကီၢ်ဖိလၢ ဘူၣ်လဲၤကပာ် အတၢ်လုၢ်အဂီၢ်+ ဒီးဖဲပှၤလ့ၤဝံဖိတဖၣ် အုၣ်ကွံာ် ဆၣ်ဖိကီၢ်ဖိတဖၣ် အဘ့ၣ်အခါ+ ပှၤလုၢ်တၢ်ဒိၣ်တဖၣ် ဖှံဝဲတၢ်သွံၣ် လၢအဝဲသ့ၣ် ဒိးန့ၢ်ဘၣ်ဝဲလၢ ပှၤလ့ၤဝံဖိတဖၣ် အအိၣ်လီၤ.+ ၁၂ ဝံၤဒီးအဝဲသ့ၣ် ကတဲာ်ကတီၤဝဲ တၢ်လုၢ်ဒွဲၣ်အူတဖၣ် ဒ်သိးကနီၤလီၤဝဲလၢ ပှၤဂီၢ်မုၢ်လၢ အဆၢထၢၣ်ဝဲ တဒူၣ်ဘၣ်တဒူၣ်န့ၣ်အအိၣ် ဒ်သိးပှၤဂီၢ်မုၢ်တဖၣ်န့ၣ် ကလဲၤလုၢ်ထီၣ် တၢ်သ့ၣ်တဖၣ်န့ၣ်လၢ ယဟိဝၤယွၤအအိၣ် ဒ်တၢ်ကွဲးအသးလၢ စီၤမိၤၡ့အလံာ်ပူၤ အိၣ်ဝဲအသိးလီၤ. ဒီးအဝဲသ့ၣ်မၤဝဲ ကျီၢ်တဖၣ်န့ၣ် ဒ်န့ၣ်စ့ၢ်ကီးလီၤ. ၁၃ ဒ်လုၢ်လၢ်အိၣ်ဝဲအသိး အဝဲသ့ၣ် ဖီဝဲ* ဘူၣ်လဲၤကပာ် အတၢ်လုၢ်လၢ မ့ၣ်အူအဖီခိၣ်လီၤ.+ ဒီးအဝဲသ့ၣ် ဖီဝဲ တၢ်လုၢ်စီဆှံတဖၣ်လၢ သပၢၤ, သပၢၤဖးဒိၣ် ဒီးသပၢၤဘံၣ်တဖၣ်အပူၤ ဝံၤဒီးအဝဲသ့ၣ် ကရီလဲၤစိာ်ဝဲလၢ ပှၤဂီၢ်မုၢ်လၢ အဆၢထၢၣ်ဝဲ တဒူၣ်ဘၣ်တဒူၣ်န့ၣ် အအိၣ်လီၤ. ၁၄ လၢခံ အဝဲသ့ၣ် ကတဲာ်ကတီၤထီၣ်တၢ်လၢ အနီၢ်ကစၢ်အဂီၢ် ဒီးပှၤလုၢ်တၢ်ဒိၣ်တဖၣ်အဂီၢ် မ့ၢ်လၢ ပှၤလုၢ်တၢ်ဒိၣ်တဖၣ် လၢအမ့ၢ် စီၤအၤဟရိၣ် အစၢၤအသွဲၣ်န့ၣ် လုၢ်ထီၣ် တၢ်လုၢ်ဒွဲၣ်အူတဖၣ် ဒီးတၢ်အသိ အကူာ်အခီတဖၣ် တုၤလီၤလၢမုၢ်နၤခီညါ. အဃိ ပှၤလ့ၤဝံဖိတဖၣ် ကတဲာ်ကတီၤထီၣ်ဝဲတၢ်လၢ တၢ်လုၢ်လၢ ဘူၣ်လဲၤကပာ်အဂီၢ်, လၢအနီၢ်ကစၢ်အဂီၢ် ဒီးလၢပှၤလုၢ်တၢ်ဒိၣ်တဖၣ် လၢအမ့ၢ် စီၤအၤဟရိၣ် အစၢၤအသွဲၣ်တဖၣ် အဂီၢ်လီၤ.
၁၅ စီၤအၤစာ် အဖိခွါတဖၣ်+ လၢအမ့ၢ် ပှၤသးဝံၣ်တၢ်ဖိတဖၣ်န့ၣ် အိၣ်ဝဲလၢ အမူဒါလီၤဝဲအလီၢ် ဒ်စီၤဒၤဝံး မၤလိာ်တ့ၢ်ဝဲအသိးလီၤ.+ အဝဲသ့ၣ်မ့ၢ်ဝဲ စီၤအၤစာ်,+ စီၤဟ့မၣ် ဒီးစီၤယဒူသူၣ်+ လၢအမ့ၢ် စီၤပၤ အပှၤထံၣ်တၢ်ထံၣ်လၢညါခီတဂၤလီၤ. ပှၤခိးတြဲၤဖိတဖၣ် ခိးတၢ်လၢ တြဲၤတဖၣ်အခီၣ်ထံးလီၤ.+ ဒီးမ့ၢ်လၢ အဝဲသ့ၣ် အဒီပုၢ်ဝဲၢ်ခွါ ပှၤလ့ၤဝံဖိအဂၤတဖၣ် ကတဲာ်ကတီၤန့ၢ်တၢ်လၢ အဝဲသ့ၣ်အဂီၢ်အဃိ အဝဲသ့ၣ် တလိၣ်ဟးထီၣ်ဖဲ အမူဒါလီၤဝဲအလီၢ်ဘၣ်. ၁၆ အဃိ ဖဲတၢ်တနံၤန့ၣ် တၢ်မၤခဲလၢာ်လၢ ယဟိဝၤယွၤအဂီၢ် လၢပှၤကမၤဘူၣ်လဲၤကပာ်+ ဒီးလၢကလုၢ်ထီၣ် တၢ်လုၢ်ဒွဲၣ်အူတဖၣ်လၢ ယဟိဝၤယွၤ အတၢ်လုၢ်လီၢ်အဖီခိၣ် အဂီၢ်န့ၣ် အဝဲသ့ၣ် ကတဲာ်ကတီၤဝဲ ဒ်စီၤပၤယိၤၡံယၤ မၤလိာ်ဝဲအသိး ဝံၤဝဲခဲလၢာ်လီၤ.+
၁၇ ဖဲန့ၣ်အခါ ပှၤအံၣ်စရ့လးဖိလၢ အအိၣ်ဖဲန့ၣ်တဖၣ် မၤဘူၣ်လဲၤကပာ် ဒီးဆဲးမၤဝဲ ဘူၣ်ကိၣ်လၢ အတပၣ်ဒီး ကိၣ်မံၣ်ဘၣ် နွံသီလီၤ.+ ၁၈ စးထီၣ်လၢ ဝံၡမူၤအ့လးအစိၤ တုၤခဲအံၤန့ၣ် ပှၤတမၤဘူၣ်လဲၤကပာ်ဒ်အံၤ နီတဘျီဘၣ်. ဒီးဘူၣ်လဲၤကပာ်လၢ စီၤယိၤၡံယၤ,+ ပှၤလုၢ်တၢ်ဒိၣ်တဖၣ်, ပှၤလ့ၤဝံဖိတဖၣ် ဒီးပှၤဂီၢ်မုၢ်လၢ အဟဲလၢ ယူဒၤဒီးအံၣ်စရ့လး ဒီးဝ့ၢ်ယရူၤၡလ့ၣ်တဖၣ် မၤဝဲတဘျီအံၤန့ၣ် အံၣ်စရ့လး အစီၤပၤအဂၤ တမၤဝဲဒ်အံၤ နီတဂၤဘၣ်. ၁၉ ဒီးဘူၣ်လဲၤကပာ် တဘျီအံၤ ဘၣ်တၢ်မၤအီၤဖဲ စီၤယိၤၡံယၤ ပၢတၢ် ၁၈ နံၣ်တနံၣ်န့ၣ်လီၤ.
၂၀ တၢ်မၤအသးတဖၣ်န့ၣ် ခဲလၢာ်ဝံၤအလီၢ်ခံ ဖဲစီၤယိၤၡံယၤ ကတဲာ်ကတီၤထီၣ်က့ၤ တၢ်လုၢ်ဟံၣ်ဝံၤဝဲအခါ ကီၢ်အဲၤကူပတူး အစီၤပၤနကိၤ+ ဟဲထီၣ်ဒ်သိး ကဒုးတၢ်လၢ ကၢ်ကမံၣ် လၢအဘူးဒီး ထံကျိဖရၤသးလီၤ. ဒီးစီၤယိၤၡံယၤ လဲၤထီၣ်ဒ်သိး ကဒုးအီၤလီၤ.+ ၂၁ ဒီးစီၤပၤနကိၤ ဆှၢလီၤ ပှၤစိာ်တၢ်ကစီၣ်ဖိလၢ စီၤယိၤၡံယၤအအိၣ် ဒီးတဲအီၤလၢ “ယူဒၤအစီၤပၤဧၢ, တၢ်ဂ့ၢ်တခါအံၤ မ့ၢ်အဘၣ်ဃးဒီး နၤဒ်လဲၣ်. တနံၤအံၤ ယတဟဲဒုးနၤဘၣ်, ယကလဲၤဒုး ပှၤအဂၤတကလုာ်ဟီ. ဒီးကစၢ်ယွၤတဲဝဲလၢ ယကဘၣ်လဲၤချ့ချ့လီၤ. ကစၢ်ယွၤအိၣ်ဒီးယၤ အဃိ လၢနနီၢ်ကစၢ်အဘျုးအဂီၢ် တဘၣ်ထီဒါ ကစၢ်ယွၤတဂ့ၤ. နမ့ၢ်ထီဒါအီၤန့ၣ် အဝဲကမၤဟးဂီၤနၤလီၤ.” ၂၂ ဘၣ်ဆၣ် စီၤယိၤၡံယၤ တဃၣ်ကွံာ်အသးဘၣ် ဒီးအဝဲမၤလီၤဆီထီၣ်အသး+ ဒ်သိးအကဒုး စီၤနကိၤလီၤ. ဒီးအဝဲတဒိကနၣ် စီၤနကိၤ အတၢ်ကတိၤလၢ အဟဲလၢ ကစၢ်ယွၤအအိၣ်န့ၣ်ဘၣ်. အဃိ အဝဲလဲၤဒုးတၢ်လၢ မကံးဒိၤ အတၢ်ပၢၤခိၣ်လီၤ.+
၂၃ ဒီးပှၤခးပျၢ်ဖိတဖၣ် ခးဘၣ်ဝဲ စီၤပၤယိၤၡံယၤလီၤ. အဃိ စီၤပၤတဲဘၣ် အခ့အပှၤတဖၣ်လၢ “ယဘၣ်ဒိနးမးလံ, ထုးထီၣ်ကွံာ်ယၤဖဲအံၤ.” ၂၄ အဃိ အခ့အပှၤတဖၣ် ထုးထီၣ်ကွံာ်အီၤလၢ လ့ၣ်ကဟၣ်အပူၤ ဒီးက့ၤတီၣ်အီၤလၢ လ့ၣ်ကဟၣ်သုး ခံခိၣ်တခိၣ်အပူၤ ဆူဝ့ၢ်ယရူၤၡလ့ၣ်လီၤ. ဒီးစီၤယိၤၡံယၤ သံဝဲဒီး ပှၤခူၣ်လီၤကွံာ်အီၤလၢ အမိၢ်ပၢ်ဖံဖု လၢပျၢၤတဖၣ် အတၢ်သွၣ်ခိၣ်လီၤ.+ ဒီးယူဒၤ ဒီးဝ့ၢ်ယရူၤၡလ့ၣ် အပှၤဂီၢ်မုၢ်ခဲလၢာ် ဟီၣ်ဝဲလၢ စီၤယိၤၡံယၤ အဃိလီၤ. ၂၅ ဒီးဝံယံးရမံယၤ+ အုၣ်ထါလၢ စီၤယိၤၡံယၤအဂီၢ်လီၤ. ဒီးပိာ်မုၣ်မ့ၢ်ဂ့ၤ ပိာ်ခွါမ့ၢ်ဂ့ၤ လၢအမ့ၢ် ပှၤသးဝံၣ်တၢ်ဖိတဖၣ်န့ၣ်+ ကွဲးဝဲထါဟီၣ်တဖၣ်လၢ အဘၣ်ဃးဒီး စီၤယိၤၡံယၤ ဒီးသးဝံၣ်ဝဲ တုၤလၢ မုၢ်မဆါတနံၤအံၤလီၤ. ထါဟီၣ်တဖၣ်အံၤ ဘၣ်တၢ်ကွဲးလီၤအီၤလၢ ပှၤပာ်ဖှိၣ်ထါဟီၣ် အလံာ်ပူၤ ဒီးကဲထီၣ်ဝဲ လုၢ်လၢ်တခါလၢ ပှၤကဘၣ်သးဝံၣ်အီၤလၢ ကီၢ်အံၣ်စရ့လးအပူၤလီၤ.
၂၆ မ့မ့ၢ် စီၤယိၤၡံယၤ အဂ့ၢ်လၢအဂၤတဖၣ်, အတၢ်မၤလၢ အမၤဝဲ ခီဖျိလၢ အတၢ်အဲၣ်လၢအတီအဃိ, အအိၣ်မူမၤထွဲ တၢ်လၢအဘၣ်တၢ်ကွဲးလီၤအီၤလၢ ယဟိဝၤယွၤ အတၢ်သိၣ်တၢ်သီအပူၤ ၂၇ ဒီးတၢ်လၢအမၤဝဲ စးထီၣ်လၢ အခီၣ်ထံး တုၤလၢ အကတၢၢ်န့ၣ် ဘၣ်တၢ်ကွဲးလီၤအီၤလၢ အံၣ်စရ့လးဒီး ယူဒၤအစီၤပၤတဖၣ် အလံာ်ပူၤလီၤ.+