၂ ကွဲးနီၣ်တၢ်
၃၆ ဒီးပှၤထံဖိကီၢ်ဖိ ပာ်ထီၣ် စီၤယိၤၡံယၤ အဖိခွါ စီၤယဟိအါဃး+ ဒ်စီၤပၤလၢ ဝ့ၢ်ယရူၤၡလ့ၣ်အပူၤ လၢအပၢ် စီၤယိၤၡံယၤ အလီၢ်န့ၣ်လီၤ.+ ၂ ဖဲစီၤယဟိအါဃး ကဲထီၣ်စီၤပၤအခါ အသးနံၣ်အိၣ်ဝဲ ၂၃ နံၣ် ဒီးအဝဲပၢဘၣ်တၢ် လၢဝ့ၢ်ယရူၤၡလ့ၣ်အပူၤ သၢလါလီၤ. ၃ ဘၣ်ဆၣ် ကီၢ်အဲၤကူပတူး အစီၤပၤ ထုးကွံာ်အီၤလၢ အလီၢ်အလၤ လၢဝ့ၢ်ယရူၤၡလ့ၣ်အပူၤ ဒီးအီၣ်လိးဝဲ ယူဒၤဘီမုၢ်လၢ စ့ညၣ် အတၤလၣ်* ၁၀၀ ဒီးထူတတၤလၣ်လီၤ.+ ၄ တကးဒံးဘၣ် ကီၢ်အဲၤကူပတူး အစီၤပၤ ဒုးကဲထီၣ် စီၤယဟိအါဃး အဒီပုၢ်ဝဲၢ်ခွါ စီၤအ့ၤလယါကံၣ် လၢစီၤပၤ လၢယူဒၤဒီးဝ့ၢ်ယရူၤၡလ့ၣ်အပူၤ ဒီးအဝဲ ဆီတလဲက့ၤဝဲ စီၤအ့ၤလယါကံၣ် အမံၤလၢ စီၤယဟိၤယါကံၣ်လီၤ. မ့မ့ၢ် စီၤအ့ၤလယါကံၣ် အဒီပုၢ်ဝဲၢ်ခွါ စီၤယဟိအါဃးန့ၣ် စီၤနကိၤ+ က့ၤကိးအီၤလၢ ကီၢ်အဲၤကူပတူးလီၤ.+
၅ ဖဲစီၤယဟိၤယါကံၣ်+ ကဲထီၣ်စီၤပၤအခါ အသးနံၣ်အိၣ်ဝဲ ၂၅ နံၣ်ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ၁၁ နံၣ်လီၤ. စီၤယဟိၤယါကံၣ် ဆဲးမၤတၢ်လၢ အကစၢ် ယဟိဝၤယွၤ ထံၣ်ဝဲလၢအအၢလီၤ.+ ၆ ကီၢ်ဘၤဘူၤလိၣ် အစီၤပၤ နဘူၤကးန့စၢ်+ ဟဲထီၣ်ထီဒါ စီၤယဟိၤယါကံၣ် ဒ်သိး အကစၢဃာ်အီၤဒီး ထးသွဲတိၢ်ဘီခံဘိ ဒီးက့ၤကိးအီၤလၢ ကီၢ်ဘၤဘူၤလိၣ် အဂီၢ်လီၤ.+ ၇ ဒီးစီၤနဘူၤကးန့စၢ် ဟံးန့ၢ်ဝဲ တၢ်ပီးတၢ်လီတနီၤလၢ ယဟိဝၤယွၤ အဟံၣ်ပူၤ ဒီးအဝဲက့ၤစိာ်ဝဲလၢ ကီၢ်ဘၤဘူၤလိၣ်လီၤ. ဒီးအဝဲက့ၤပာ်ဝဲလၢ အနီပူၤလၢ ကီၢ်ဘၤဘူၤလိၣ်န့ၣ်လီၤ.+ ၈ မ့မ့ၢ် စီၤယဟိၤယါကံၣ် အဂ့ၢ်လၢအဂၤတဖၣ် ပၣ်ဃုာ်ဒီး တၢ်လၢအလီၤသးဘၣ်အၢ လၢအမၤဝဲခဲလၢာ် ဒီးအဂ့ၢ်လၢ အတဂ့ၤဘၣ်တဖၣ်န့ၣ် ဘၣ်တၢ်ကွဲးလီၤအီၤလၢ အံၣ်စရ့လးဒီးယူဒၤ အစီၤပၤတဖၣ် အလံာ်ပူၤလီၤ. ဒီးအဖိခွါ စီၤယဟိၤယါခံၣ် ကဲထီၣ်စီၤပၤ လၢအလီၢ်လီၤ.+
၉ ဖဲစီၤယဟိၤယါခံၣ်+ ကဲထီၣ်စီၤပၤအခါ အသးနံၣ်အိၣ်ဝဲ ၁၈ နံၣ် ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ သၢလါ ဒီးအသီတဆံလီၤ. ဒီးစီၤယဟိၤယါခံၣ် ဆဲးမၤဝဲ တၢ်လၢ ယဟိဝၤယွၤ ထံၣ်ဝဲလၢအအၢလီၤ.+ ၁၀ ဖဲနံၣ်စးထီၣ်သီသီန့ၣ် စီၤပၤနဘူၤကးန့စၢ် ဆှၢလီၤသုးဖိတဖၣ် လၢကဟဲက့ၤစိာ် တၢ်ဖိတၢ်လံၤ လၢအလုၢ်ဒိၣ်ပှ့ၤဒိၣ်တဖၣ် လၢအအိၣ်လၢ ယဟိဝၤယွၤ အဟံၣ်ပူၤ+ ဒီးဟဲက့ၤကိးဃုာ်ဒီး စီၤယဟိၤယါခံၣ်ဆူ ကီၢ်ဘၤဘူၤလိၣ်လီၤ.+ ဒီးစီၤနဘူၤကးန့စၢ် ဒုးကဲထီၣ်ဝဲ စီၤယဟိၤယါခံၣ်အတံ စီၤစံးဒကံယၤ လၢစီၤပၤလၢ ယူဒၤဒီးဝ့ၢ်ယရူၤၡလ့ၣ် အပူၤလီၤ.+
၁၁ ဖဲစီၤစံးဒကံယၤ+ ကဲထီၣ်စီၤပၤအခါ အသးနံၣ်အိၣ်ဝဲ ၂၁ နံၣ် ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ၁၁ နံၣ်လီၤ.+ ၁၂ စီၤစံးဒကံယၤ ဆဲးမၤတၢ်လၢ အကစၢ် ယဟိဝၤယွၤ ထံၣ်ဝဲလၢအအၢလီၤ. ဒီးအဝဲ တဆီၣ်လီၤအသးလၢ ဝံယံးရမံယၤ+ လၢအတဲတၢ် ဒ်ယဟိဝၤယွၤ မၤလိာ်ဝဲအသိးန့ၣ် အမဲာ်ညါဘၣ်. ၁၃ စီၤပၤနဘူၤကးန့စၢ် မၢစီၤစံးဒကံယၤ မၤတၢ်အၢၣ်လီၤလၢ ကစၢ်ယွၤအမဲာ်ညါလၢ အကတီဒီးအီၤ ဒီးစီၤစံးဒကံယၤ မၤဝဲဝံၤလံ သနာ်က့ စီၤစံးဒကံယၤ ထီဒါက့ၤ စီၤပၤနဘူၤကးန့စၢ်လီၤ.+ စီၤစံးဒကံယၤ အခိၣ်ကိၤ ဒီးအနၢ်က့ၣ် ထီဘိ ဒီးတသးအိၣ်ဒိကနၣ် အံၣ်စရ့လး အကစၢ် ယဟိဝၤယွၤ အကလုၢ် နီတစဲးဘၣ်. ၁၄ ပှၤလုၢ်တၢ်ဒိၣ်တဖၣ် အပှၤခိၣ်ပှၤနၢ်တဖၣ် ဃုာ်ဒီး ပှၤဂီၢ်မုၢ် ခဲလၢာ်န့ၣ် မၤဝဲတၢ်လၢ အတတီတလိၤဘၣ်တဖၣ် အါထီၣ်အါထီၣ်, မၤဝဲ တၢ်လၢအလီၤ သးဘၣ်အၢတဖၣ် ဒ်ပှၤကလုာ်တဖၣ် မၤဝဲအသိး ဒီးအဝဲသ့ၣ် မၤဘၣ်အၢ ယဟိဝၤယွၤ အဟံၣ်လၢ+ အပာ်စီဆှံပာ်စၢၤဝဲလၢ ဝ့ၢ်ယရူၤၡလ့ၣ် အပူၤန့ၣ်လီၤ.
၁၅ အဝဲသ့ၣ် အမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤန့ၣ် သးကညီၤ အပှၤဂီၢ်မုၢ် ဒီးသူၣ်အိၣ်သးအိၣ်ဝဲ အတၢ်အိၣ်တၢ်ဆိး အလီၢ်အဃိ အဝဲဟ့ၣ်ပလီၢ် အဝဲသ့ၣ် တဘျီဝံၤတဘျီ ခီဖျိ အပှၤစိာ်တၢ်ကစီၣ်ဖိတဖၣ် တလီၢ်လီၢ်လီၤ. ၁၆ ဘၣ်ဆၣ် အဝဲသ့ၣ် တဲဆါယွၤလၢ အမ့ၢ်အတီ အပှၤစိာ်တၢ်ကစီၣ်ဖိတဖၣ်+ ဒီးအဝဲသ့ၣ် တပာ်ကဲကစၢ်ယွၤ အတၢ်ကတိၤတဖၣ်ဘၣ်.+ ဒီးအဝဲသ့ၣ် တဲဆဲးအဲး ယွၤအဝံတဖၣ်+ တုၤလၢ ယဟိဝၤယွၤ အတၢ်သးဒိၣ်လီၤဘၣ် အပှၤဂီၢ်မုၢ်+ ဒီးအဝဲသ့ၣ် အတၢ်မုၢ်လၢ် တအိၣ်လၢၤဘၣ်.
၁၇ အဃိ ကစၢ်ယွၤဒုးဟဲ ပှၤက့ၤစ့းဖိ အစီၤပၤလၢ ကဒုးအဝဲသ့ၣ်အဂီၢ်လီၤ.+ အဝဲမၤသံကွံာ် ပိာ်ခွါသးစၢ်တဖၣ်လၢနး+ ဖဲတၢ်စီဆှံအလီၢ်လီၤ.+ ပှၤသးစၢ်မ့ၢ်ဂ့ၤ, ပှၤသးပှၢ်မ့ၢ်ဂ့ၤ, မုၣ်ကနီၤမ့ၢ်ဂ့ၤ, ပှၤဆူးပှၤဆါမ့ၢ်ဂ့ၤ အဝဲတသးကညီၤ ပှၤနီတဂၤဘၣ်.+ ကစၢ်ယွၤ ဟ့ၣ်လီၤကွံာ် တၢ်ခဲလၢာ်လၢ အစုပူၤလီၤ.+ ၁၈ တၢ်ပီးတၢ်လီ အဒိၣ်မ့ၢ်ဂ့ၤ, အဆံးမ့ၢ်ဂ့ၤ လၢအအိၣ်လၢ ယွၤလၢအမ့ၢ်အတီတဂၤအဟံၣ် ဃုာ်ဒီး တၢ်လုၢ်ဒိၣ်ပှ့ၤဒိၣ် လၢအအိၣ်လၢ ယဟိဝၤယွၤအဟံၣ်ပူၤ, တၢ်လုၢ်ဒိၣ်ပှ့ၤဒိၣ် လၢအအိၣ်လၢ စီၤပၤအဟံၣ်ပူၤ ဒီးအပဒိၣ်ဖးဒိၣ်တဖၣ် အဟံၣ်ပူၤန့ၣ် အဝဲက့ၤစိာ်ဝဲလၢ ကီၢ်ဘၤဘူၤလိၣ် ခဲလၢာ်လီၤ.+ ၁၉ အဝဲ ဒွဲၣ်အူထီၣ်ကွံာ် ယွၤလၢအမ့ၢ်အတီတဂၤအဟံၣ်,+ မၤလီၤပှီၢ်ကွံာ် ယရူၤၡလ့ၣ်အဝ့ၢ်ဒူၣ်,+ ဒွဲၣ်အူထီၣ်ကွံာ်ဝဲ တၢးလၢအကျၢၤတဖၣ် ဒီးမၤဟးဂီၤကွံာ်ဝဲ တၢ်လၢအလုၢ်ဒိၣ်ပှ့ၤဒိၣ် ခဲလၢာ်လီၤ.+ ၂၀ ဒီးပှၤလၢ အပူၤဖျဲးမူဒံးတဖၣ်န့ၣ်* အဝဲက့ၤဖီၣ်ဝဲဆူ ကီၢ်ဘၤဘူၤလိၣ်+ ဒီးအဝဲသ့ၣ် ကဲထီၣ်အခ့အပှၤ+ ဒီးအဖိခွါတဖၣ် အခ့အပှၤတဖၣ် တုၤလီၤလၢ ဖၢၡၢၣ်အဘီမုၢ် စးထီၣ်ပၢတၢ် အဆၢကတီၢ်လီၤ.+ ၂၁ အဃိတၢ်လၢ ယဟိဝၤယွၤ တဲဆိပာ်ဝဲ ခီဖျိစီၤယံးရမံယၤန့ၣ်+ လၢထီၣ်ပှဲၤထီၣ်ဝဲလီၤ. ဒီးထံကီၢ်အိၣ်ဘှံးဘၣ် မ့ၢ်လၢ တၢ်အိၣ်ဘှံးအနံၣ်လၢ အပူၤကွံာ်တဖၣ်န့ၣ် အတအိၣ်ဘှံးဘၣ်ဘၣ် အဃိလီၤ.+ ဖဲထံကီၢ်အိၣ်သယုၢ်အခါ ထံကီၢ်အိၣ်ဘှံးဘၣ် တုၤလၢအပှဲၤထီၣ် အနံၣ် ၇၀ လီၤ.+
၂၂ ဒ်သိးယဟိဝၤယွၤ အတၢ်ကတိၤ ခီဖျိလၢ ဝံယံးရမံယၤ+ ကလၢထီၣ်ပှဲၤထီၣ်အဂီၢ် ယဟိဝၤယွၤ ထိၣ်ဟူးထိၣ်ဂဲၤထီၣ် ဖၢၡၢၣ် အစီၤပၤကိရ့ၣ်+ အသး ဒ်သိး အကဘိးဘၣ်သ့ၣ်ညါ တၢ်ဂ့ၢ်တမံၤလၢ အဘီမုၢ်ဒီဘ့ၣ်ညါအပူၤလီၤ. တၢ်မၤအသးဒ်အံၤန့ၣ် ဘၣ်ဖဲဖၢၡၢၣ် အစီၤပၤကိရ့ၣ် ပၢတၢ်အဆိကတၢၢ်တနံၣ် အတီၢ်ပူၤလီၤ. ဒီးအတၢ်ဘိးဘၣ်သ့ၣ်ညါအံၤန့ၣ် အဝဲကွဲးလီၤစ့ၢ်ကီးဝဲ+ ဒ်လၢလာ်အံၤအသိးလီၤ. ၂၃ “ကီၢ်ဖၢၡၢၣ် အစီၤပၤကိရ့ၣ် တဲဝဲလၢ ‘မူခိၣ်အကစၢ် ယဟိဝၤယွၤ ဟ့ၣ်လီၤယၤ ဘီမုၢ်ခဲလၢာ်လၢ ဟီၣ်ခိၣ်ချၢ+ ဒီးအဟ့ၣ်လီၤယၤ မူဒါလၢ ယကတ့ထီၣ်န့ၢ်အီၤ ဟံၣ်တဖျၢၣ်ဖဲ ဝ့ၢ်ယရူၤၡလ့ၣ် လၢယူဒၤ အဟီၣ်ကဝီၤအပူၤလီၤ.+ သုဝဲကိးဂၤဒဲးလၢ အပၣ်ဃုာ်လၢ အပှၤဂီၢ်မုၢ်အကျါန့ၣ် မ်သုလဲၤထီၣ်ဖဲန့ၣ် ဒီးမ်သုကစၢ် ယဟိဝၤယွၤ အိၣ်ဒီးသုတက့ၢ်.’”+