၂ ကွဲးနီၣ်တၢ်
၁၁ ဖဲစီၤရဃၤဘၣ် က့ၤတုၤဝဲလၢ ဝ့ၢ်ယရူၤၡလ့ၣ် တဘျီဃီန့ၣ် အဝဲဒုးအိၣ်ဖှိၣ် ပှၤပိာ်ခွါ ကိးဂၤဒဲးလၢ ယူဒၤအဒူၣ် ဒီးဘံၣ်ယၤမံၣ်+ အဒူၣ်ကျါ လၢအမ့ၢ် ပှၤသုးဖိလၢ အဘၣ်တၢ်ဃုထၢထီၣ်အီၤ အဂၤ ၁၈၀,၀၀၀ ဒ်သိးကဒုးတၢ်ဒီး အံၣ်စရ့လး ဒီးသူၣ်ထီၣ်က့ၤ ဘီမုၢ်လၢ စီၤရဃၤဘၣ် အစုပူၤလီၤ.+ ၂ ဘၣ်ဆၣ် ယဟိဝၤယွၤ တဲဘၣ် အဝံ* စီၤၡမါယၤလၢ+ ၃ “တဲဘၣ် စီၤၡလိၤမိၤ အဖိခွါ စီၤရဃၤဘၣ် လၢအမ့ၢ် ယူဒၤအစီၤပၤ ဒီးပှၤအံၣ်စရ့လးဖိခဲလၢာ်လၢ ယူဒၤအဒူၣ် ဒီးဘံၣ်ယၤမံၣ်အဒူၣ်ကျါ ဒ်အံၤ, ၄ ‘ယဟိဝၤယွၤ တဲဝဲလၢ “သုတဘၣ် လဲၤထီၣ်ဒုး သုဒီပုၢ်ဝဲၢ် ပှၤအံၣ်စရ့လးဖိတဖၣ်တဂ့ၤ. ယဒုးကဲထီၣ် တၢ်မၤအသးအံၤအဃိ သုဝဲတဂၤစုာ်စုာ် ကဘၣ်က့ၤလၢ သုဟံၣ်လီၤ.”’”+ အဃိ အဝဲသ့ၣ်ဒိကနၣ် ယဟိဝၤယွၤ အကလုၢ် ဒီးက့ၤကဒါဝဲ ဒီးတလဲၤဒုး စီၤယၤရၤဘၣ်လၢၤဘၣ်.
၅ စီၤရဃၤဘၣ် အိၣ်ဝဲလၢ ဝ့ၢ်ယရူၤၡလ့ၣ် ဒီးသူၣ်ထီၣ်ဝဲ ဝ့ၢ်တဖၣ်လၢ အအိၣ်ဒီး အဒူၣ်လၢအကျၢၤလၢ ယူဒၤဘီမုၢ်အပူၤလီၤ. ၆ အဝဲတ့ထီၣ်က့ၤဝဲ ဝ့ၢ်ဘ့ၤသလ့ဃ့ၣ်,+ ဝ့ၢ်ဧ့ၤတၣ်, ဝ့ၢ်တကိၤ,+ ၇ ဝ့ၢ်ဘ့ၤသစူၢ်, ဝ့ၢ်ၡိကိး,+ ဝ့ၢ်ဧဒူးလၣ်,+ ၈ ဝ့ၢ်ကၤသး,+ ဝ့ၢ်မရ့ၡၤ, ဝ့ၢ်စံဖး,+ ၉ ဝ့ၢ်အဒိရဲၣ်, ဝ့ၢ်လၤကံၣ်,+ ဝ့ၢ်ဧစ့ကၤ,+ ၁၀ ဝ့ၢ်စိးရၤ, ဝ့ၢ်အးယၤလိၣ်+ ဒီးဝ့ၢ်ဃ့ဘြိၣ်လီၤ.+ ဝ့ၢ်တဖၣ်အံၤ မ့ၢ်ဝဲ ဝ့ၢ်လၢအအိၣ်ဒီး အဒူၣ်လၢ အကျၢၤလၢ အအိၣ်လၢ ယူဒၤဒီး ဘံၣ်ယၤမံၣ် အဟီၣ်ကဝီၤလီၤ. ၁၁ တကးဒံးဘၣ် စီၤရဃၤဘၣ် မၤကျၢၤထီၣ် ဝ့ၢ်တဖၣ်လၢအအိၣ်ဒီး အဒူၣ် ဒီးပာ်ထီၣ် ခိၣ်နၢ်တဖၣ်လၢ ဝ့ၢ်တဖၣ်အံၤအပူၤ ဒီးအဝဲဟ့ၣ်လီၤ ပှၤဝ့ၢ်ဖိတဖၣ်လၢ တၢ်အီၣ်တၢ်အီ, သိ ဒီးစပံးထံ, ၁၂ ကတီၤဖးဒိၣ်တဖၣ် ဒီးဘီတဖၣ်လီၤ. အဃိ အဝဲမၤကျၢၤထီၣ် ဝ့ၢ်တဖၣ်အံၤ သပှၢ်တၢၢ်လီၤ. ဒီးယူဒၤ ဒီးဘံၣ်ယၤမံၣ်အဒူၣ် ဆဲးအိၣ်ဝဲလၢ အတၢ်ပၢအဖီလာ်လီၤ.
၁၃ ဒီးပှၤလုၢ်တၢ်ဒိၣ်တဖၣ် ဒီးပှၤလ့ၤဝံဖိတဖၣ်လၢ အအိၣ်လၢ အံၣ်စရ့လး အဟီၣ်ကဝီၤခဲလၢာ်န့ၣ် ဟးထီၣ်ဝဲလၢ အတၢ်လီၢ်တၢ်ကျဲတဖၣ် ဒီးလဲၤဝဲလၢ စီၤရဃၤဘၣ် အအိၣ်တခီလီၤ. ၁၄ ပှၤလ့ၤဝံဖိတဖၣ် ပာ်တ့ၢ်ကွံာ် အတၢ်ပျီတဖၣ် ဒီးအတၢ်စုလီၢ်ခီၣ်ခိၣ်+ ဒီးလဲၤအိၣ်ဝဲလၢ ယူဒၤအဟီၣ်ကဝီၤ ဒီးဝ့ၢ်ယရူၤၡလ့ၣ် မ့ၢ်လၢ စီၤယၤရၤဘၣ် ဒီးအဖိခွါတဖၣ် တဟ့ၣ်အခွဲးလၢ အဝဲသ့ၣ် ကကဲ ယဟိဝၤယွၤ အပှၤလုၢ်တၢ်ဒိၣ်တဖၣ်လၢၤဘၣ် အဃိလီၤ.+ ၁၅ ဒီးစီၤယၤရၤဘၣ် အနီၢ်ကစၢ် ဃုထၢထီၣ် ပှၤလုၢ်တၢ်ဒိၣ်တဖၣ်လၢ အကမၤတၢ်ဖဲ တၢ်လီၢ်ထီၣ်ထီတဖၣ်လီၤ.+ အဝဲသ့ၣ် တီခိၣ်ရိၤမဲ တၢ်ဘူၣ်ထီၣ်ဘါထီၣ် တၢ်ဝံတၢ်နါ လၢအလီၤဂာ်ဒီး မဲာ်တဲးလဲးတဖၣ်+ ဒီးကျီၢ်ဖိတဖၣ် လၢစီၤယၤရၤဘၣ် တ့ထီၣ်ဝဲန့ၣ်လီၤ.+ ၁၆ ဒီးလၢအံၣ်စရ့လး အဒူၣ်တဖၣ်အကျါ ပှၤကိးဂၤဒဲးလၢ အပာ်လီၤအသး ဂၢၢ်ဂၢၢ်ကျၢၤကျၢၤလၢ ကဘူၣ်ထီၣ်ဘါထီၣ် အံၣ်စရ့လး အကစၢ်ယဟိဝၤယွၤန့ၣ် လဲၤပိာ် ပှၤလ့ၤဝံဖိတဖၣ်အခံဆူ ဝ့ၢ်ယရူၤၡလ့ၣ် ဒ်သိးကလုၢ်ထီၣ်တၢ်လၢ အဝဲသ့ၣ် အမိၢ်ပၢ်ဖံဖု လၢပျၢၤတဖၣ်အကစၢ် ယဟိဝၤယွၤ အအိၣ်အဂီၢ်လီၤ.+ ၁၇ ဒီးအဝဲသ့ၣ် မၤထွဲဝဲဒ်စီၤဒၤဝံး ဒီးစီၤၡလိၤမိၤ မၤတ့ၢ်ဝဲအသိးလၢ သၢနံၣ်အတီၢ်ပူၤလီၤ. အဃိ အဝဲသ့ၣ် မၤဂၢၢ်မၤကျၢၤထီၣ် ယူဒၤဘီမုၢ်အတၢ်ပၢ ဒီးဆီၣ်ထွဲ စီၤၡလိၤမိၤအဖိခွါ စီၤရဃၤဘၣ် သၢနံၣ်လီၤ.
၁၈ ဒီးစီၤရဃၤဘၣ် ဟံးန့ၢ် စီၤယရံမိး အဖိမုၣ် နီၢ်မၤဃလ့း လၢအမါလီၤ. စီၤယရံမိး မ့ၢ်ဝဲ စီၤဒၤဝံးအဖိခွါလီၤ. ဒီးနီၢ်မၤဃလ့း မ့ၢ်ဝဲ နီၢ်အဘံဃယ့းလး အဖိမုၣ်, နီၢ်အဘံဃယ့းလး မ့ၢ်ဝဲ စီၤအလံအာ် အဖိမုၣ် ဒီးစီၤအလံအာ် မ့ၢ်ဝဲ စီၤယံးၡဲ အဖိခွါလီၤ.+ ၁၉ လၢခံ နီၢ်မၤဃလ့း အိၣ်ဖျဲၣ်ထီၣ်ဝဲ ဖိခွါတဖၣ်လၢအမ့ၢ် စီၤဧူၡး, စီၤၡမၤရယၤ ဒီးစီၤစၤဟၣ်လီၤ. ၂၀ လၢခံ စီၤရဃၤဘၣ် ဟံးန့ၢ် စီၤအးဘၡါလိၣ်+ အလံၤမုၣ် နီၢ်မၤကၤ လၢအမါလီၤ. ဒီးနီၢ်မၤကၤ အိၣ်ဖျဲၣ်ထီၣ်န့ၢ်အီၤ စီၤအဘံယၤ,+ စီၤဧၤတဲ, စီၤစံစာ် ဒီးစီၤၡလိမံးလီၤ. ၂၁ စီၤရဃၤဘၣ်န့ၣ် အမါအိၣ်ဝဲ ၁၈ ဂၤ ဒီးအသံၣ်မါ* အိၣ်ဝဲ အဂၤ ၆၀ လီၤ. စီၤရဃၤဘၣ် အဲၣ်ဝဲ စီၤအးဘၡါလိၣ် အလံၤမုၣ် နီၢ်မၤကၤ ဒိၣ်န့ၢ်ဒံး အမါအဂၤတဖၣ် ဒီးအသံၣ်မါခဲလၢာ်လီၤ.+ ဒီးအဖိခွါအိၣ်ဝဲ ၂၈ ဂၤ ဒီးအဖိမုၣ်အိၣ်ဝဲ အဂၤ ၆၀ လီၤ. ၂၂ စီၤရဃၤဘၣ် ပာ်လီၤအသးလၢ ကဒုးကဲထီၣ် နီၢ်မၤကၤ အဖိခွါ စီၤအဘံယၤလၢ စီၤပၤအဃိ အဝဲဒုးကဲထီၣ် စီၤအဘံယၤလၢ အဒီပုၢ်ဝဲၢ်ခွါတဖၣ် အခိၣ်လီၤ. ၂၃ ဘၣ်ဆၣ် စီၤရဃၤဘၣ် မၤဝဲလၢ တၢ်ကူၣ်သ့အပူၤ ဒီးဆှၢဝဲ အဖိခွါတနီၤ ဆူဝ့ၢ်လၢ အအိၣ်ဒီးအဒူၣ်လၢအကျၢၤ+ လၢယူဒၤ ဒီးဘံၣ်ယၤမံၣ် အဟီၣ်ကဝီၤပူၤ ခဲလၢာ်န့ၣ်လီၤ. ဒီးအဝဲဟ့ၣ်လီၤအဝဲသ့ၣ် တၢ်အီၣ်တၢ်အီ အါအါဂီၢ်ဂီၢ် ဒီးဃုန့ၢ်အဝဲသ့ၣ်အမါ ဒီဒူၣ်လီၤ.