၂ ကွဲးနီၣ်တၢ်
၁၃ ဖဲစီၤပၤယၤရၤဘၣ် ပၢတၢ် ၁၈ နံၣ်တနံၣ်န့ၣ် စီၤအဘံယၤ ကဲထီၣ် စီၤပၤလၢ ယူဒၤဘီမုၢ်အပူၤလီၤ.+ ၂ ဒီးစီၤအဘံယၤ ပၢတၢ်လၢ ဝ့ၢ်ယရူၤၡလ့ၣ်အပူၤ သၢနံၣ်လီၤ. အမိၢ်အမံၤမ့ၢ်ဝဲ နီၢ်မံၤကါယၤ*+ လၢအမ့ၢ် စီၤအူရံၤအ့လး လၢအအိၣ်ဟဲလၢ ဝ့ၢ်ကံဘဧၤန့ၣ်+ အဖိမုၣ်လီၤ. ဒီးလၢ စီၤအဘံယၤ ဒီးစီၤယၤရၤဘၣ် အဘၢၣ်စၢၤန့ၣ် တၢ်ဒုးတၢ်ယၤ အိၣ်ထီၣ်ဝဲလီၤ.+
၃ စီၤအဘံယၤ ဒီးအသုးမုၢ်လၢ အဂံၢ်ဆူၣ်ဘါဆူၣ် လၢအဘၣ်တၢ်ဃုထၢထီၣ်အီၤ အဂၤ ၄၀၀,၀၀၀ န့ၣ် လဲၤဒုးတၢ်လီၤ.+ ဒီးစီၤယၤရၤဘၣ် ဒီးအသုးမုၢ် လၢအဂံၢ်ဆူၣ်ဘါဆူၣ် လၢအဘၣ်တၢ်ဃုထၢထီၣ်အီၤ အဂၤ ၈၀၀,၀၀၀ န့ၣ် လဲၤထီၣ်ဆီလီၤအသး ဒ်သိးကဒုးအီၤလီၤ. ၄ စီၤအဘံယၤ ဆၢထၢၣ်လၢ ကစၢၢ်စမၤရဲၣ် လၢအအိၣ်လၢ အ့ဖရဲၣ် အကစၢၢ်ကလိကျါ ဒီးတဲဝဲလၢ “အိ စီၤယၤရၤဘၣ် ဒီးအံၣ်စရ့လး ခဲလၢာ်သ့ၣ်ဧၢ, ကနၣ်လၢအံၤ. ၅ အံၣ်စရ့လး အကစၢ် ယဟိဝၤယွၤ မၤတ့ၢ်တၢ်အၢၣ်လီၤအီလီၤ လၢအဂၢၢ်ကျၢၤ*+ ဒီးစီၤဒၤဝံးဒီး အဖိအလံၤတဖၣ်+ ဒီးဟ့ၣ်လီၤအဝဲသ့ၣ် ဘီမုၢ်လၢ အံၣ်စရ့လး အဖီခိၣ် လီၤထူလီၤယိာ်န့ၣ်+ မ့ၢ်သုတသ့ၣ်ညါဧီၤ. ၆ ဘၣ်ဆၣ် စီၤနဘး အဖိခွါ စီၤယၤရၤဘၣ်+ လၢအမ့ၢ် စီၤဒၤဝံးအဖိခွါ စီၤၡလိၤမိၤ အခ့အပှၤတဂၤန့ၣ် ဂဲၤဆၢထၢၣ် ထီဒါဝဲ အကစၢ်စီၤပၤလီၤ.+ ၇ ပှၤအၢပှၤသီလၢ အတၢ်မၤတအိၣ်ဘၣ်န့ၣ် ဟဲပာ်ဖှိၣ်ထီၣ်အသးဒီးအီၤ အါထီၣ်အါထီၣ်လီၤ. ဒီးစီၤၡလိၤမိၤ အဖိခွါ စီၤရဃၤဘၣ်န့ၣ် အတၢ်လဲၤခီဖျိစှၤ ဒီးအသးတဒူဘၣ် အဃိ အဝဲသ့ၣ် ပာ်ဆူၣ်ထီၣ်အသးလၢ ကထီဒါ စီၤရဃၤဘၣ် ဒီးစီၤရဃၤဘၣ် တြီဆၢအဝဲသ့ၣ် တန့ၢ်ဘၣ်.
၈ “ဒီးခဲအံၤန့ၣ် ခီဖျိလၢ သုပှၤအိၣ် အါအါဂီၢ်ဂီၢ် ဒီးသုအိၣ်ဒီး ကျီၢ်ထူဖိတဖၣ် လၢစီၤယၤရၤဘၣ် တ့ထီၣ်န့ၢ်သု ဒ်သုယွၤတဖၣ်အသိး အဃိ သုဆိကမိၣ်လၢ သုဒုး ယဟိဝၤယွၤ အဘီမုၢ်လၢ အအိၣ်လၢ စီၤဒၤဝံးအဖိအလံၤတဖၣ် အစုပူၤန့ၣ် ကန့ၢ်ဝဲလီၤ.+ ၉ သုနီဟးထီၣ် စီၤအၤဟရိၣ် အစၢၤအသွဲၣ်တဖၣ် လၢအမ့ၢ် ယဟိဝၤယွၤ အပှၤလုၢ်တၢ်ဒိၣ်တဖၣ်+ ဒီးသုနီဟးထီၣ် ပှၤလ့ၤဝံဖိတဖၣ် တမ့ၢ်ဧီၤ. ဒီးဒ်ပှၤအိၣ်လၢ ထံကီၢ်အဂၤတဖၣ်အသိး သုဃုထၢထီၣ် ပှၤလုၢ်တၢ်ဒိၣ်တဖၣ် လၢသုနီၢ်ကစၢ်လီၤ.+ ဒီးပှၤတဂၤဂ့ၤ တဂၤဂ့ၤလၢ အဟဲလုၢ်ထီၣ် ကျီၢ်ဖါဖိတဒု ဒီးသိဖါနွံဒုန့ၣ် ကဲထီၣ်ဝဲ ပှၤလုၢ်တၢ်ဒိၣ်လၢ သုတၢ်ဂီၤတၢ်ဖှီၣ်လၢ အတမ့ၢ်ယွၤ နီၢ်ကီၢ်ဘၣ်တဖၣ် အဂီၢ်လီၤ. ၁၀ မ့မ့ၢ်ပဝဲဒၣ်န့ၣ် ယဟိဝၤယွၤ မ့ၢ်ပကစၢ်ယွၤ+ ဒီးပတပာ်တ့ၢ်ကွံာ်အီၤဘၣ်. ပပှၤလုၢ်တၢ်ဒိၣ်တဖၣ် မ့ၢ်ဝဲ စီၤအၤဟရိၣ် အစၢၤအသွဲၣ် ဒီးအဝဲသ့ၣ် မၤယဟိဝၤယွၤ အတၢ်မၤ ဒီးပှၤလ့ၤဝံဖိတဖၣ် မၤစၢၤအဝဲသ့ၣ်လီၤ. ၁၁ အဝဲသ့ၣ် ဒွဲၣ်ခုၣ်ထီၣ် တၢ်လုၢ်ဒွဲၣ်အူတဖၣ် ဃုာ်ဒီး တၢ်နၢမူလၢ+ ယဟိဝၤယွၤအအိၣ် ကိးဂီၤဒဲး ကိးဟါဒဲးလီၤ.+ အဝဲသ့ၣ် ရဲၣ်လီၤ ကိၣ်လၢ+ တၢ်လုၢ်ထီၣ်တၢ်အဂီၢ် လၢစီၢ်နီၤခိၣ်ထူ အဖီခိၣ် ဒီးအဝဲသ့ၣ် ဒွဲၣ်ထီၣ်မ့ၣ်အူဒၢထူ+ ဒီးမ့ၣ်အူဒၢခွးတဖၣ် ကိးဟါဒဲးလီၤ.+ ပဝဲဒၣ်အံၤ ပမၤလၢပှဲၤ ပမူဒါလၢ ပကစၢ် ယဟိဝၤယွၤ ဟ့ၣ်လီၤပှၤ ဘၣ်ဆၣ်မ့မ့ၢ်သုန့ၣ် သုပာ်တ့ၢ်ကွံာ်အီၤလံ. ၁၂ ယွၤလၢအမ့ၢ်အတီတဂၤ အိၣ်ဒီးပှၤ ဒီးအဝဲဟံးစုနဲၣ်ကျဲပှၤလီၤ. အပှၤလုၢ်တၢ်ဒိၣ်တဖၣ် အိၣ်ဖဲအံၤ ဒ်သိးကအူထီၣ်ဝဲ တၢ်ဒုးအကွဲၤတဖၣ်လီၤ. အိ အံၣ်စရ့လးသ့ၣ်ဧၢ, တမ့ၢ်လၢ သုကမၤနၢၤတၢ်ဘၣ်အဃိ တဘၣ်ဒုး သုမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤ တဂ့ၤ.”+
၁၃ ဘၣ်ဆၣ် စီၤယၤရၤဘၣ် ဆှၢလီၤတ့ၢ် အသုးဖိတနီၤလၢ ကခိးခူသူၣ်တၢ် ဒီးဒုးယူဒၤ အသုးမုၢ်လၢ တၢ်လီၢ်ခံတခီလီၤ. အဃိ စီၤယၤရၤဘၣ် အသုးမုၢ် အါတက့ၢ်န့ၣ် အိၣ်ဝဲလၢ ယူဒၤအသုးမုၢ် အမဲာ်ညါတပၤလီၤ. ဒီးအသုးဖိတနီၤန့ၣ် အိၣ်ဝဲလၢ အဝဲသ့ၣ် အလီၢ်ခံ တပၤလီၤ. ၁၄ ဖဲယူဒၤ အသုးမုၢ် ဃၣ်လီၤလီၢ်ခံအခါ အဝဲသ့ၣ် သ့ၣ်ညါဝဲလၢ လၢအလီၢ်ခံမ့ၢ်ဂ့ၤ လၢမဲာ်ညါမ့ၢ်ဂ့ၤ ပှၤဟဲဒုးအဝဲသ့ၣ်လီၤ. အဃိ ဖဲပှၤလုၢ်တၢ်ဒိၣ်တဖၣ် အူထီၣ်ဝဲကွဲၤတဖၣ် သီၣ်ဖးဒိၣ်အခါ ယူဒၤအသုးမုၢ် ကိးထီၣ်လၢ ယဟိဝၤယွၤ အအိၣ်လၢ အကလုၢ်ဖးဒိၣ်လီၤ.+ ၁၅ ဒီးယူဒၤ အသုးမုၢ် ကိးပသူထီၣ်လၢ တၢ်ဒုးအတၢ်ကိးပသူထီၣ် ဒီးဖဲအဝဲသ့ၣ် မၤဝဲဒ်န့ၣ်အခါ ယွၤလၢအမ့ၢ်အတီတဂၤ ဟ့ၣ်လီၤကွံာ်ဝဲ စီၤယၤရၤဘၣ် ဒီးအံၣ်စရ့လး အသုးမုၢ် ခဲလၢာ်လၢ စီၤအဘံယၤ ဒီးယူဒၤအသုးမုၢ် အစုပူၤ ဒီးမၤနၢၤ အဝဲသ့ၣ်လီၤ. ၁၆ ကစၢ်ယွၤ ဟ့ၣ်လီၤကွံာ်ဝဲ အံၣ်စရ့လး အသုးမုၢ်လၢ ယူဒၤအစုပူၤ အဃိ အံၣ်စရ့လး အသုးမုၢ် ဃ့ၢ်ကွံာ်ဝဲလၢ ယူဒၤအမဲာ်ညါလီၤ. ၁၇ စီၤအဘံယၤ ဒီးအသုးဖိတဖၣ် မၤသံအဝဲသ့ၣ် အါအါဂီၢ်ဂီၢ်လီၤ. အဃိ အံၣ်စရ့လး အသုးဖိလၢ အဘၣ်တၢ်ဃုထၢထီၣ်ပာ်စၢၤအီၤန့ၣ် သံဝဲအဂၤ ၅၀၀,၀၀၀ လီၤ. ၁၈ ဖဲန့ၣ်အဆၢကတီၢ် အံၣ်စရ့လးအသုးမုၢ် ဘၣ်တၢ်မၤနၢၤကွံာ်အီၤလီၤ. မ့မ့ၢ် ယူဒၤအသုးမုၢ်န့ၣ် သန့ၤအသးလၢ အမိၢ်ပၢ်ဖံဖု လၢပျၢၤတဖၣ် အကစၢ်ယဟိဝၤယွၤအဃိ အဝဲသ့ၣ် မၤနၢၤတၢ်လီၤ.+ ၁၉ စီၤအဘံယၤ ဆဲးလူၤဝဲ စီၤယၤရၤဘၣ် ဒီးမၤန့ၢ်ဝဲအဝ့ၢ်တဖၣ် လၢအမ့ၢ် ဝ့ၢ်ဘ့ၤသ့လး+ ဒီးအဒူသဝီတဖၣ်, ဝ့ၢ်ယၡၤနၤ+ ဒီးအဒူသဝီတဖၣ် ဒီးဝ့ၢ်အ့ဖရဲၣ် ဒီးအဒူသဝီတဖၣ်လီၤ. ၂၀ ဖဲစီၤအဘံယၤ ပၢတၢ်အဆၢကတီၢ် စီၤယၤရၤဘၣ် တဒိးန့ၢ်ကဒါက့ၤ အစိအကမီၤ ဒ်လၢညါအသိး နီတဘျီလၢၤဘၣ်. လၢခံန့ၣ် ယဟိဝၤယွၤ တီၢ်အီၤ ဒီးအသံဝဲလီၤ.+
၂၁ မ့မ့ၢ်စီၤအဘံယၤန့ၣ် အစိအကမီၤ ဆဲးဒိၣ်ထီၣ်ဝဲလီၤ. ဒီးအဝဲဟံးန့ၢ်အမါ ၁၄ ဂၤ+ ဒီးအဖိခွါအိၣ်ဝဲ ၂၂ ဂၤ ဒီးအဖိမုၣ်အိၣ်ဝဲ ၁၆ ဂၤလီၤ. ၂၂ ဒီးစီၤအဘံယၤ အဂ့ၢ်လၢ အဂၤတဖၣ် ဒီးတၢ်လၢ စီၤအဘံယၤ တဲဝဲ ဒီးမၤဝဲတဖၣ်န့ၣ် ဘၣ်တၢ်ကွဲးလီၤအီၤလၢ ဝံဧံးဒိၤ အတၢ်ကွဲးနီၣ်ကွဲးဃါတဖၣ် အပူၤလီၤ.+