၂ ကွဲးနီၣ်တၢ်
၁၄ လၢခံ စီၤအဘံယၤ သံဝဲဒ် အမိၢ်ပၢ်ဖံဖု လၢပျၢၤတဖၣ်အသိး ဒီးပှၤခူၣ်လီၤကွံာ်အီၤလၢ စီၤဒၤဝံး အဝ့ၢ်ပူၤလီၤ.+ ဒီးအဖိခွါ စီၤအၤစါ ကဲထီၣ်က့ၤ စီၤပၤလၢအလီၢ်လီၤ. ဖဲစီၤအၤစါ ပၢတၢ်အခါ လၢကီၢ်ပူၤန့ၣ် တၢ်မုာ်တၢ်ခုၣ်* အိၣ်ဝဲအနံၣ် တဆံလီၤ.
၂ စီၤအၤစါ မၤတၢ်လၢ အကစၢ် ယဟိဝၤယွၤ ထံၣ်ဝဲလၢ အဂ့ၤဒီးအဘၣ်လီၤ. ၃ အဝဲမၤဟးဂီၤကွံာ်ဝဲ ပှၤထံဂၤကီၢ်ဂၤဖိ အတၢ်လုၢ်လီၢ်တဖၣ်+ ဒီးတၢ်လီၢ်ထီၣ်ထီတဖၣ်လီၤ. အဝဲမၤကၢ်လီၤကွံာ် လၢၢ်ထူၣ်စီဆှံတဖၣ်+ ဒီးမၤလီၤကူၢ်ကွံာ်ဝဲ တၢ်စီဆှံအထူၣ်တဖၣ်လီၤ.*+ ၄ တကးဒံးဘၣ် အဝဲတဲဘၣ် ယူဒၤအပှၤဂီၢ်မုၢ်လၢ ကဘူၣ်ထီၣ်ဘါထီၣ်အဝဲသ့ၣ် အမိၢ်ပၢ်ဖံဖု လၢပျၢၤတဖၣ် အကစၢ်ယဟိဝၤယွၤ ဒီးအိၣ်မူမၤထွဲ စီၤမိၤၡ့အတၢ်သိၣ်တၢ်သီ ဒီးအတၢ်မၤလိာ်လီၤ. ၅ အဝဲမၤဟးဂီၤကွံာ် တၢ်လီၢ်ထီၣ်ထီတဖၣ် ဒီးတၢ်လုၢ်တၢ်နၢမူ အလီၢ်တဖၣ်+ လၢယူဒၤအဝ့ၢ်ခဲလၢာ် အပူၤလီၤ. ဒီးလၢအတၢ်တီခိၣ်ရိၤမဲ အဖီလာ်န့ၣ် ဘီမုၢ်အိၣ်ဒီး တၢ်မုာ်တၢ်ခုၣ်လီၤ. ၆ ဒီးယဟိဝၤယွၤ ဟ့ၣ်ဒုးအိၣ်အီၤ မုာ်မုာ်ခုၣ်ခုၣ်+ ဒီးဖဲတၢ်အနံၣ်တဆံန့ၣ်အတီၢ်ပူၤ ပှၤတဟဲဒုးအီၤ နီတဂၤဘၣ် ဒီးလၢကီၢ်ပူၤန့ၣ် အိၣ်ဒီး တၢ်မုာ်တၢ်ခုၣ်အဃိ အဝဲတ့ထီၣ် ဝ့ၢ်တဖၣ်လၢ အအိၣ်ဒီး အဒူၣ်လၢအကျၢၤ လၢယူဒၤ အဟီၣ်ကဝီၤပူၤလီၤ.+ ၇ စီၤအၤစါ တဲဘၣ်ယူဒၤအပှၤဂီၢ်မုၢ်လၢ “ကဲ, ပတ့ထီၣ်သကိး ဝ့ၢ်တဖၣ်အံၤ, တ့တၢ်ဒူၣ် ဝးတရံးအီၤ, တၢးတဖၣ်,+ တြဲၤတဖၣ် ဒီးတြဲၤအဘိတဖၣ်ဟီ. ပဘူၣ်ထီၣ်ဘါထီၣ် ပကစၢ် ယဟိဝၤယွၤအဃိ တၢ်လီၢ်အံၤ ကဲဒံးပတၢ်လီၤ. ပဘူၣ်ထီၣ်ဘါထီၣ်အီၤအဃိ အဝဲဟ့ၣ်ပှၤတၢ်မုာ်တၢ်ခုၣ် လၢပကပိာ်ကပၤ ဝးဝးလီၤ.” အဃိ အဝဲသ့ၣ် အတၢ်သူၣ်ထီၣ်တၢ်မၤန့ၣ် ကဲထီၣ်လိၣ်ထီၣ်ဝဲလီၤ.+
၈ စီၤအၤစါ အသုးမုၢ် ပၣ်ဃုာ်ဒီး သုးဖိလၢယူဒၤအဒူၣ်ကျါ အဂၤ ၃၀၀,၀၀၀ လၢအအိၣ်ဒီး ကတီၤဖးဒိၣ် ဒီးဘီတဖၣ်လီၤ. တကးဒံးဘၣ် ပၣ်ဃုာ်ဒီး ပှၤအဂၤ ၂၈၀,၀၀၀ လၢဘံၣ်ယၤမံၣ် အဒူၣ်ကျါ လၢအမ့ၢ် သုးဖိလၢ အဂံၢ်ဆူၣ်ဘါဆူၣ်တဖၣ် လၢအအိၣ်ဒီး ကတီၤဖိ ဒီးချံၣ်တဖၣ်လီၤ.+
၉ လၢခံ ပှၤအဲၤသံအီးပးဖိ စီၤစ့ရၤ ဒီးအသုးမုၢ် အဂၤ ၁,၀၀၀,၀၀၀ ဒီးအလ့ၣ်ကဟၣ်အခိၣ် ၃၀၀ န့ၣ်+ လဲၤဝဲဒ်သိး ကဒုးအဝဲသ့ၣ်လီၤ. ဖဲစီၤစ့ရၤ လဲၤတုၤလၢ ဝ့ၢ်မရ့ၡၤ အခါ+ ၁၀ စီၤအၤစါ လဲၤထီၣ်ဝဲ ဒ်သိးကဒုးအီၤ ဒီးအဝဲသ့ၣ် လဲၤထီၣ်ဆီလီၤအသးလၢ စဖၤသး အတၢ်တြီၤ ဖဲဝ့ၢ်မရ့ၡၤန့ၣ်လီၤ. ၁၁ စီၤအၤစါ ဃ့ကညး အကစၢ် ယဟိဝၤယွၤလၢ+ “အိ ယဟိဝၤယွၤဧၢ, ပှၤလၢနအဲၣ်ဒိး မၤစၢၤအီၤတဖၣ်န့ၣ် အပှၤနီၣ်ဂံၢ် အိၣ်အါဧါ စှၤဧါ, ဒီးအဝဲသ့ၣ် အဂံၢ်ဆူၣ်ဧါ အဂံၢ်စၢ်ဧါန့ၣ် အရ့တဒိၣ် လၢနဂီၢ်ဘၣ်.+ အိ ပကစၢ် ယဟိဝၤယွၤဧၢ, ပသန့ၤပသး လၢနၤ+ ဒီးပဟဲဒုး ပှၤဂီၢ်မုၢ် တဒူၣ်အံၤ လၢနမံၤအဃိ မၤစၢၤပှၤတက့ၢ်.+ အိ ယဟိဝၤယွၤဧၢ, နမ့ၢ်ပယွၤလီၤ. တဘၣ်ဟ့ၣ်အခွဲးလၢ ပှၤဟီၣ်ခိၣ်ဖိတဖၣ် ကမၤနၢၤနၤတဂ့ၤ.”+
၁၂ အဃိ ယဟိဝၤယွၤ မၤနၢၤကွံာ် ပှၤအဲၤသံအီးပးဖိ လၢစီၤအၤစါ ဒီးယူဒၤအဘီမုၢ် အဂီၢ်လီၤ. ဒီးပှၤအဲၤသံအီးပးဖိ ဃ့ၢ်ကွံာ်ဝဲလီၤ.+ ၁၃ စီၤအၤစါ ဒီးအပှၤတဖၣ် လူၤအဝဲသ့ၣ် တုၤလၢ ကရၢ်+ ဒီးပှၤအဲၤသံအီးပးဖိတဖၣ် သံဝဲ ဒီးတဂၤမး တအိၣ်တ့ၢ်လၢၤဘၣ်, မ့ၢ်လၢ ယဟိဝၤယွၤ ဒီးအသုးမုၢ် မၤဟးဂီၤကွံာ် အဝဲသ့ၣ်အဃိလီၤ. ဝံၤဒီးယူဒၤအသုးမုၢ် က့ၤစိာ်ဝဲ တၢ်ဖိတၢ်လံၤ အါအါဂီၢ်ဂီၢ်လီၤ. ၁၄ တကးဒံးဘၣ် ယူဒၤအသုးမုၢ် မၤဟးဂီၤကွံာ်ဝဲ ဝ့ၢ်လၢအအိၣ်လၢ ကရၢ် အခိၣ်အဃၢၤတဖၣ်န့ၢ်ဝဲ မ့ၢ်လၢ ပှၤလၢအအိၣ်လၢ ဝ့ၢ်ပူၤတဖၣ်န့ၣ် ပျံၤယဟိဝၤယွၤဒိၣ်မးလီၤ. ဒီးလၢဝ့ၢ်တဖၣ်န့ၣ်အပူၤ တၢ်ဖိတၢ်လံၤတဖၣ် အိၣ်ဝဲဒီဒူၣ် အဃိ အဝဲသ့ၣ် ဂုာ်န့ၢ်ဝဲ တၢ်ဖိတၢ်လံၤ အါအါဂီၢ်ဂီၢ်လၢ ဝ့ၢ်တဖၣ်န့ၣ်အပူၤလီၤ. ၁၅ အဝဲသ့ၣ် လဲၤထီၣ်ဒုးစ့ၢ်ကီး ပှၤတနီၤလၢ အအိၣ်လၢ ဒဲတဖၣ် ဒီးအိၣ်ဒီး ဆၣ်ဖိကီၢ်ဖိတဖၣ် ဒီးအဝဲသ့ၣ် မၤန့ၢ် သိဒီးကီၤလၤအူး အါအါဂီၢ်ဂီၢ်လီၤ. ဝံၤဒီး အဝဲသ့ၣ် က့ၤကဒါက့ၤလၢ ဝ့ၢ်ယရူၤၡလ့ၣ်လီၤ.