၂ ကွဲးနီၣ်တၢ်
၂၅ ဖဲစီၤအမၤစယါ ကဲထီၣ် စီၤပၤအခါ အသးနံၣ်အိၣ်ဝဲ ၂၅ နံၣ် ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ၂၉ နံၣ်လီၤ. အမိၢ်မ့ၢ်ဝဲ နီၢ်ယဟိဧဒၣ် လၢအအိၣ်လၢ ဝ့ၢ်ယရူၤၡလ့ၣ်လီၤ.+ ၂ စီၤအမၤစယါ ဆဲးမၤတၢ်လၢ ယဟိဝၤယွၤ ထံၣ်ဝဲလၢအဂ့ၤ ဘၣ်ဆၣ် တမၤဝဲလၢ အသးဒီဖျၢၣ်ဘၣ်. ၃ ဖဲဘီမုၢ် အိၣ်ဂၢၢ်ကျၢၤဝဲလၢ အစုပူၤအခါ အဝဲမၤသံကွံာ်ဝဲ အခ့အပှၤတဖၣ် လၢအမၤသံတ့ၢ်ဝဲ အပၢ်လၢအမ့ၢ် စီၤပၤန့ၣ်လီၤ.+ ၄ ဘၣ်ဆၣ် အဝဲတမၤသံ အဝဲသ့ၣ် အဖိခွါတဖၣ်ဘၣ်. အဝဲမၤထွဲ ယဟိဝၤယွၤ အတၢ်မၤလိာ်လၢ အကွဲးအသးလၢ စီၤမိၤၡ့ အတၢ်သိၣ်တၢ်သီ အပူၤန့ၣ်လီၤ. တၢ်မၤလိာ်န့ၣ် တဲဝဲလၢ “ပၢ်တဖၣ် တကြၢးသံလၢ အဝဲသ့ၣ် အဖိခွါတဖၣ်အဃိဘၣ် ဒီးဖိခွါတဖၣ် တကြၢးသံလၢ အဝဲသ့ၣ် အပၢ်တဖၣ် အဃိဘၣ်. ပှၤတဂၤစုာ်စုာ် ကြၢးသံလၢ အနီၢ်ကစၢ် အတၢ်ဒဲးဘး အဃိလီၤ.”+
၅ စီၤအမၤစယါ ကရၢကရိထီၣ် ပှၤပိာ်ခွါလၢ ယူဒၤဒီးဘံၣ်ယၤမံၣ် အဒူၣ်အကျါ ခဲလၢာ် ဒီးမၢအဝဲသ့ၣ် ဆၢထၢၣ်ရဲၣ်လီၤအသး ဒ်အဝဲသ့ၣ်အဒူၣ်ဖိထၢဖိ* အိၣ်ဝဲအသိး ဃုာ်ဒီး ပှၤတကထိအခိၣ် ဒီးပှၤတကယၤအခိၣ်တဖၣ်လၢ ယူဒၤဒီးဘံၣ်ယၤမံၣ် အဒူၣ်အဂီၢ်လီၤ.+ ဒီးအဝဲထၢဝဲ ပှၤပိာ်ခွါလၢ အသးနံၣ်အိၣ် အနံၣ် ၂၀ ဒီးဆူအဖီခိၣ်+ အနီၣ်ဂံၢ် ဒီးပှၤလၢအဘၣ် တၢ်ဃုထၢထီၣ်အီၤလၢ အအိၣ်ဒီးတၢ်သ့တၢ်ဘၣ်လၢ ကသူဝဲဘီဒီး ကတီၤဖးဒိၣ်န့ၣ်အိၣ်ဝဲ အဂၤ ၃၀၀,၀၀၀ လီၤ. ၆ တကးဒံးဘၣ် အဝဲငါန့ၢ် အံၣ်စရ့လး အသုးဖိလၢ အဂံၢ်ဆူၣ်ဘါဆူၣ် အဂၤ ၁၀၀,၀၀၀ လၢစ့ညၣ် အတၤလၣ်* ၁၀၀ လီၤ. ၇ ဘၣ်ဆၣ် ယွၤလၢအမ့ၢ်အတီ အပှၤတဂၤ ဟဲလၢ စီၤအမၤစယါအအိၣ် ဒီးတဲအီၤလၢ “စီၤပၤဧၢ, တဘၣ်ပျဲ အံၣ်စရ့လး အသုးဖိလဲၤဒီးသုတဂ့ၤ. အံၣ်စရ့လးအဘီမုၢ် လၢအမ့ၢ် ပှၤအ့ဖရဲၣ်ဖိတဖၣ်န့ၣ် ယဟိဝၤယွၤ တအိၣ်ဒီးအဝဲသ့ၣ် နီတဂၤဘၣ်.+ ၈ အဃိ သုကဘၣ်လဲၤလၢ သုနီၢ်ကစၢ်လီၤ. အိၣ်ဒီးတၢ်သးဒူလၢ တၢ်ဒုးအပူၤတက့ၢ်. သုမ့ၢ်တမၤဒ်န့ၣ်ဘၣ်န့ၣ် ယွၤလၢအမ့ၢ်အတီတဂၤ မၤလီၤဃံၢ်သုလၢ သုဒုၣ်သုဒါ အမဲာ်ညါသ့ဝဲ မ့ၢ်လၢ ကစၢ်ယွၤ အိၣ်ဒီး တၢ်စိတၢ်ကမီၤလၢ ကမၤစၢၤသုအဂီၢ်+ ဒီးလၢကမၤလီၤဃံၢ်သု အဂီၢ်လီၤ.” ၉ ဒီးစီၤအမၤစယါ တဲယွၤလၢအမ့ၢ်အတီ အပှၤတဂၤန့ၣ်လၢ “မ့မ့ၢ်ဒ်န့ၣ်န့ၣ် ယစ့ညၣ် အတၤလၣ်အဘ့ၣ် ၁၀၀ လၢယဟ့ၣ်ပာ်စၢၤ အံၣ်စရ့လး အပှၤသုးဖိတဖၣ်ဟီမီၤ.” ယွၤလၢအမ့ၢ်အတီ အပှၤတဂၤ တဲဆၢက့ၤဝဲလၢ “ယဟိဝၤယွၤ ဟ့ၣ်နၤသ့ အါန့ၢ်အန့ၣ် စၢၢ်တလၢၢ်ဒံး.”+ ၁၀ အဃိ ပှၤသုးဖိလၢ အအိၣ်ဟဲလၢ အ့ဖရဲၣ် အဟီၣ်ကဝီၤန့ၣ် စီၤအမၤစယါ ပျဲက့ၤအဝဲသ့ၣ် လၢအဝဲသ့ၣ် အနီၢ်ကစၢ် တၢ်လီၢ်တၢ်ကျဲလီၤ. ဘၣ်ဆၣ် ပှၤသုးဖိတဖၣ်န့ၣ် သးဒိၣ်ထီၣ် ယူဒၤအပှၤဂီၢ်မုၢ်ဒီး က့ၤကဒါဝဲလၢ အဝဲသ့ၣ် အနီၢ်ကစၢ် တၢ်လီၢ်တၢ်ကျဲ လၢတၢ်သူၣ်ဒိၣ်သးဖျိး အပူၤလီၤ.
၁၁ လၢတၢ်သူၣ်ဒူသးဒူအပူၤ စီၤအမၤစယါ တီခိၣ်ရိၤမဲဝဲ အပှၤသုးဖိတဖၣ် ဒီးအဝဲသ့ၣ်လဲၤဝဲလၢ အံသၣ်အတၢ်တြီၤလီၤ.+ ဒီးအဝဲမၤသံဝဲ ပှၤစ့ဧၢ်ဖိ အဂၤ ၁၀,၀၀၀ လီၤ.+ ၁၂ ဒီးယူဒၤအပှၤသုးဖိတဖၣ် ဖီၣ်မူဒံးအဝဲသ့ၣ် အဂၤ ၁၀,၀၀၀ လီၤ. ဒီးယူဒၤအသုးဖိတဖၣ်န့ၣ် လဲၤကိးအဝဲသ့ၣ်လၢ လ့ခိၣ် ဒီးကွံာ်လီၤအဝဲသ့ၣ် လၢတၢ်ဖီလာ်ဒီး အဝဲသ့ၣ် လီၤကလဲကွံာ်ဝဲ တက့တခီလီၤ. ၁၃ သုးဖိတဖၣ်လၢ အပိာ်ထီၣ် စီၤအမၤစယါ အခံ ဝံၤဒီးစီၤအမၤစယါ မၢအဝဲသ့ၣ် က့ၤကဒါက့ၤတဖၣ်န့ၣ်+ လဲၤထီၣ်ဒုးဝဲ ယူဒၤအဝ့ၢ်တဖၣ် စးထီၣ်ဖဲ ဝ့ၢ်ၡၤမရံ+ တုၤလီၤလၢ ဝ့ၢ်ဘ့ၤသဃိရိၣ်လီၤ.+ အဝဲသ့ၣ် မၤသံကွံာ် ပှၤအဂၤ ၃,၀၀၀ ဒီးဟံးန့ၢ် တၢ်ဖိတၢ်လံၤ ဒီဒူၣ်လီၤ.
၁၄ ဖဲစီၤအမၤစယါ မၤသံကွံာ်ဝဲ ပှၤအဒိၣ်ဖိ ဝံၤဒီးဟဲက့ၤဝဲအခါ အဝဲဟဲက့ၤစိာ်ဝဲ ပှၤစ့ဧၢ်ဖိ အယွၤတဖၣ် ဒီးဆီလီၤဝဲဒ် ယွၤတဖၣ်လၢ အနီၢ်ကစၢ်အဂီၢ်လီၤ.+ ဒီးအဝဲဘူၣ်ထီၣ်ဘါထီၣ် ယွၤတဖၣ်န့ၣ် ဒီးဒွဲၣ်ခုၣ်ထီၣ် တၢ်လုၢ်လၢ ယွၤတဖၣ်န့ၣ်အအိၣ်လီၤ. ၁၅ အဃိ ယဟိဝၤယွၤ သးပှံၢ်ထီၣ် စီၤအမၤစယါ ဒီးကစၢ်ယွၤဆှၢလီၤ ဝံတဂၤလၢအအိၣ်လီၤ. ဒီးဝံန့ၣ်တဲဘၣ် စီၤအမၤစယါလၢ “ပှၤတကလုာ်အယွၤတဖၣ်လၢ အတမၤပူၤဖျဲး အနီၢ်ကစၢ် အပှၤဂီၢ်မုၢ်လၢ နစုပူၤဘၣ်န့ၣ် ဘၣ်မနုၤအဃိ နဘူၣ်ထီၣ်ဘါထီၣ် အဝဲသ့ၣ်လဲၣ်.”+ ၁၆ ဖဲဝံတဲတၢ်ဒီး စီၤပၤအခါ စီၤပၤတဲအီၤလၢ “နမ့ၢ်တအဲၣ်ဒိးသံဘၣ်န့ၣ် သီၣ်နီတစဲးတဂ့ၤ,+ မ့ၢ်ပပာ်ထီၣ်နၤလၢ စီၤပၤအပှၤဟ့ၣ်ကူၣ်တၢ်ဖိဧါ.”+ ဒီးတချုးလၢ ဝံတဂၤန့ၣ်အိၣ်ဘှ့ၣ်ဒံးဘၣ်အခါ ဝံတဲဝဲလၢ “နမၤဒ်အံၤ ဒီးနတဒိကနၣ် ယတၢ်ဟ့ၣ်ကူၣ်ဘၣ်အဃိ ခဲအံၤ ယသ့ၣ်ညါလၢ ကစၢ်ယွၤ ပာ်လီၤအသးလၢ အကမၤဟးဂီၤနၤလီၤ.”+
၁၇ ယူဒၤအစီၤပၤအမၤစယါ တၢၣ်ပီၣ်တၢၣ်ပီလိာ်သးဒီး အပှၤဟ့ၣ်ကူၣ်တၢ်တဖၣ် ဝံၤအလီၢ်ခံ အဝဲဆှၢလီၤ ပှၤစိာ်တၢ်ကစီၣ်ဖိတဖၣ်လၢ အံၣ်စရ့လး အစီၤပၤယဟိအါဃး အဖိခွါ စီၤယိၤအၣ် အအိၣ် ဒီးတဲဝဲလၢ “ဟဲထီၣ် ဒီးပကဒုးလိာ်သးသၢၤ.”+ စီၤယဟိအါဃး အပၢ်မ့ၢ်ဝဲ စီၤယ့ၤဟူလီၤ. ၁၈ ဒီးအံၣ်စရ့လး အစီၤပၤယိၤအၣ် ဆှၢလီၤ အတၢ်စံးဆၢလၢ စီၤပၤအမၤစယါ အအိၣ်ဒ်လာ်အံၤအသိးလီၤ. “တၤဆှုၣ်တၤမဲလၢ လဘၤနိၣ် အကစၢၢ်ကလိကျါ ဆှၢလီၤတၢ်ကစီၣ်လၢ သ့ၣ်ဆှိအ့ရ့းတထူၣ် လၢလဘၤနိၣ် အကစၢၢ်ကလိကျါ ဒီးတဲအီၤလၢ ‘ဟ့ၣ်လီၤနဖိမုၣ် ဒ်သိးအကဖျီအသးဒီး ယဖိခွါအဂီၢ်တက့ၢ်.’ ဘၣ်ဆၣ် ဆၣ်ဖိကီၢ်ဖိ အမံၤတဒုလၢ လဘၤနိၣ် အကစၢၢ်ကလိကျါန့ၣ် ဟဲယီၢ်တံၢ်လီၤ တၤဆှုၣ်တၤမဲလီၤ. ၁၉ ခဲအံၤန့ၣ် နတဲလီၤနသးလၢ နမၤနၢၤ ပှၤအဒိၣ်ဖိတဖၣ်+ အဃိ နပာ်ကဖၢလၢနသးဒီး နအဲၣ်ဒိး လၢပှၤက မၤလၤကပီၤနၤလံ. ဘၣ်ဆၣ် ခဲအံၤ ဆဲးအိၣ်လၢ နနီၢ်ကစၢ်အဟံၣ်သၢၤ. ဘၣ်မနုၤအဃိ နအဲၣ်ဒိးဒုးအိၣ်ထီၣ် တၢ်နးတၢ်ဖှီၣ် ဒီးလီၤဃံၢ် ဒီးတွံၢ်လီၤ ယူဒၤအဘီမုၢ် ဃုာ်ဒီးနၤလဲၣ်.”
၂၀ ဘၣ်ဆၣ် စီၤအမၤစယါ တဒိကနၣ်ဝဲဘၣ်,+ မ့ၢ်လၢ အဝဲသ့ၣ် ဘူၣ်ထီၣ်ဘါထီၣ် ပှၤအဒိၣ်ဖိ အယွၤတဖၣ်အဃိ+ ယွၤလၢအမ့ၢ်အတီတဂၤ မၤဝဲဒ်သိး အကဟ့ၣ်လီၤကွံာ် အဝဲသ့ၣ်လၢ အဒုၣ်အဒါ အစုပူၤလီၤ.+ ၂၁ အဃိ အံၣ်စရ့လး အစီၤပၤယိၤအၣ် လဲၤထီၣ်သဂၢၢ်ဝဲ ယူဒၤအစီၤပၤအမၤစယါ လၢတၢ်ဒုးအပူၤ ဖဲဝ့ၢ်ဘ့ၤသၡ့မ့ၣ်+ လၢအအိၣ်လၢ ယူဒၤအဘီမုၢ် အတၢ်ပၢဖီလာ်န့ၣ်လီၤ. ၂၂ အံၣ်စရ့လး မၤနၢၤဝဲ ယူဒၤအဃိ ယူဒၤအသုးဖိ တဂၤစုာ်စုာ် က့ၤဃ့ၢ်ဝဲလၢ အဟံၣ်လီၤ.* ၂၃ အံၣ်စရ့လး အစီၤပၤယိၤအၣ် ဖီၣ်န့ၢ် ယူဒၤအစီၤပၤအမၤစယါ ဖဲဝ့ၢ်ဘ့ၤသၡ့မ့ၣ်လီၤ. စီၤအမၤစယါ အပၢ်မ့ၢ်ဝဲ စီၤယိၤအၣ် ဒီးစီၤယိၤအၣ် အပၢ်မ့ၢ်ဝဲ စီၤယဟိအါဃးလီၤ.* ဝံၤဒီးအံၣ်စရ့လး အစီၤပၤယိၤအၣ် လဲၤကိးအီၤလၢ ဝ့ၢ်ယရူၤၡလ့ၣ် ဒီးမၤလီၤပှီၢ် ယရူၤၡလ့ၣ် အဝ့ၢ်ဒူၣ် စးထီၣ်လၢ အ့ဖရဲၣ်အတြဲၤ+ တုၤလၢ တၢ်အသနၢၣ်အတြဲၤ+ လၢအဒ့ၣ်စၢၤယံၤဝဲ အပျၢ်* ၄၀၀ လီၤ. ၂၄ ဒီးအဝဲဟံးန့ၢ်ဝဲ ထူ, စ့ညၣ် ဒီးတၢ်ဖိတၢ်လံၤ ခဲလၢာ်လၢ အအိၣ်လၢ စီၤဧိၤဘ့းအ့ဒိၣ် အတၢ်ကွၢ်ထွဲအဖီလာ်လၢ ယွၤလၢအမ့ၢ်အတီတဂၤ အဟံၣ်ပူၤ ဒီးလၢတၢ်လုၢ်ဒိၣ်ပှ့ၤဒိၣ် အလီၢ်လၢ စီၤပၤ အဟံၣ်ပူၤလီၤ.+ ဒီးအဝဲဖီၣ်န့ၢ် ပှၤတနီၤ ဒီးက့ၤကဒါက့ၤဝဲလၢ ဝ့ၢ်ၡၤမရံလီၤ.
၂၅ အံၣ်စရ့လး အစီၤပၤယဟိအါဃး+ အဖိခွါ စီၤယိၤအၣ်+ သံဝံၤအလီၢ်ခံ ယူဒၤအစီၤပၤယိၤအၣ် အဖိခွါ စီၤအမၤစယါ+ ဆဲးအိၣ်မူဒံးဝဲ ၁၅ နံၣ်လီၤ. ၂၆ မ့မ့ၢ် စီၤအမၤစယါ အဂ့ၢ်လၢအဂၤတဖၣ် စးထီၣ်လၢ အခီၣ်ထံးတုၤလၢ အကတၢၢ်န့ၣ် ဘၣ်တၢ်ကွဲးလီၤအီၤလၢ အံၣ်စရ့လးဒီးယူဒၤ အစီၤပၤတဖၣ် အလံာ်ပူၤလီၤ. ၂၇ စးထီၣ်ဖဲ စီၤအမၤစယါ တဆဲးမၤထွဲ ယဟိဝၤယွၤ အတၢ်မၤလိာ်လၢၤဘၣ်န့ၣ် ပှၤကူၣ်အၢ+ စီၤအမၤစယါ လၢဝ့ၢ်ယရူၤၡလ့ၣ် ဒီးအဝဲလဲၤဃ့ၢ်လၢ ဝ့ၢ်လၤကံၣ်လီၤ. ဘၣ်ဆၣ် ပှၤကူၣ်အၢတၢ်တဖၣ် ဆှၢလီၤ ပှၤပိာ်ခွါတဖၣ်လၢ ဝ့ၢ်လၤကံၣ် ဒီးအဝဲသ့ၣ် လဲၤလူၤအီၤဒီး မၤသံကွံာ်အီၤဖဲန့ၣ်လီၤ. ၂၈ ဒီးအဝဲသ့ၣ် ဟဲက့ၤတီၣ် စီၤအမၤစယါအစိၣ်လၢ ကသ့ၣ်တဖၣ်အလိၤ ဒီးပှၤခူၣ်လီၤကွံာ်အီၤ တပူၤဃီဒီး အမိၢ်ပၢ်ဖံဖု လၢပျၢၤတဖၣ် လၢယူဒၤ အဝ့ၢ်ပူၤလီၤ.