စံးထီၣ်ပတြၢၤ
လၢတၢ်သူၣ်ဝံၣ်သးဆၢအခိၣ်အဂီၢ်. စီၤဒၤဝံးအထါ.
၁၄၀ အိ ယဟိဝၤယွၤဧၢ, မၤပူၤဖျဲးယၤလၢ ပှၤအၢပှၤသီတဖၣ် အစုပူၤ,
ဒီသဒၢယၤလၢ ပှၤလၢ အမၤဆူၣ်မၤစိးတၢ်တဖၣ် အစုပူၤ,+
၂ ပှၤလၢ အကူၣ်ထီၣ် တၢ်အၢတၢ်သီ လၢအသးပူၤ+
ဒီးပှၤလၢ အဃုတၢ်အ့ၣ်လိာ် ဒီတနံၤကျၢၤတဖၣ် အစုပူၤတက့ၢ်.
၃ အဝဲသ့ၣ် ကျ့အ့ၣ်ထီၣ်အပျ့ၤ ဒ်ဂုၢ်အပျ့ၤအသိး+
ဒီးတၢ်လၢအဟဲထီၣ်လၢ အဝဲသ့ၣ် အထးခိၣ်န့ၣ် မၤအသးဒ်ဂုၢ်အၢ အစုၣ်အပျၢ် အသိးလီၤ.+ (စ့လၤ)
၄ အိ ယဟိဝၤယွၤဧၢ, ဒီသဒၢယၤလၢ ပှၤအၢပှၤသီတဖၣ် အစုပူၤ+
ဒီးဒီသဒၢယၤလၢ ပှၤလၢအမၤဆူၣ်မၤစိးတၢ်တဖၣ်
လၢအကူၣ်ထီၣ်တၢ် ဒ်သိးကမၤလီၤဃံၢ်ယၤန့ၣ် အစုပူၤတက့ၢ်.
၅ ပှၤလၢအပာ်ထီၣ်ထီအသးန့ၣ် ဒိးလီၤခူသူၣ် ပျံၤသကွီၤ လၢယဂီၢ်
ဒီးဒါလီၤစၤလၢ ယကျဲလီၤ.+
အဝဲသ့ၣ် ဒိးယၤလၢထုလီၤ.+ (စ့လၤ)
၆ ယတဲ ယဟိဝၤယွၤလၢ “နမ့ၢ် ယကစၢ်ယွၤလီၤ.
အိ ယဟိဝၤယွၤဧၢ, ဒိကနၣ် ယတၢ်ဃ့ကညးလၢ တၢ်မၤစၢၤအဂီၢ်တက့ၢ်.”+
၇ အိ တၢ်ပၢကစၢ် ယဟိဝၤယွၤ လၢအမ့ၢ် ပှၤလၢအဂံၢ်ဆူၣ်ဘါဆူၣ် လၢအမၤပူၤဖျဲးယၤ တဂၤဧၢ,
၈ အိ ယဟိဝၤယွၤဧၢ, ပှၤအၢပှၤသီ အတၢ်သူၣ်လီသးကွံတဖၣ်န့ၣ် တဘၣ်မၤလၢပှဲၤန့ၢ် အဝဲသ့ၣ်တဂ့ၤ.
ဒ်သိး ပှၤသုတပာ်ဒိၣ်ပာ်ထီ အဝဲသ့ၣ်တဂ့ၤအဂီၢ် တဘၣ်ပျဲ အဝဲသ့ၣ် အတၢ်ကူၣ် ကဲထီၣ်လိၣ်ထီၣ်တဂ့ၤ. (စ့လၤ)+
၉ ပှၤလၢအ အိၣ်ဝးတရံးယၤတဖၣ် အတၢ်ကူၣ်အၢန့ၣ်
မ်အက့ၤဘၣ်က့ၤ အနီၢ်ကစၢ်တက့ၢ်.+
၁၀ မ်မ့ၣ်အူအ့ၣ် စူၤလီၤလၢ အဝဲသ့ၣ်အလိၤ,+
မ်အဝဲသ့ၣ် ဘၣ်တၢ်ကွံာ်လီၤအီၤလၢ မ့ၣ်အူကျါ
ဒီးမ်အဝဲသ့ၣ် ဘၣ်တၢ်ကွံာ်လီၤအီၤလၢ တၢ်ပူၤဖးယိာ်တဖၣ်အပူၤ+ ဒ်သိး အဝဲသ့ၣ် ဟဲက့ၤထီၣ်ကဒါက့ၤ သုတသ့ နီတဘျီလၢၤတဂ့ၤ န့ၣ်တက့ၢ်.
၁၁ ပှၤလၢအတဲဟးဂီၤ ပှၤဂၤတဖၣ်န့ၣ် မ်အသုတထံၣ်န့ၢ် တၢ်ဒီသဒၢအလီၢ်လၢ ဟီၣ်ခိၣ်ချၢတဂ့ၤ.+
မ်တၢ်အၢတၢ်သီ လူၤချုးန့ၢ် ပှၤလၢအမၤဆူၣ်မၤစိးတၢ်တဖၣ် ဒီးမၤသံ အဝဲသ့ၣ်တက့ၢ်.
၁၂ ယဟိဝၤယွၤ ကဒီသဒၢ ပှၤလၢအပတီၢ်ဖုၣ်
ဒီးစံၣ်ညီၣ်န့ၢ်တၢ် လၢပှၤဖှီၣ်ဖိယာ်ဖိအဂီၢ် တီတီလိၤလိၤန့ၣ် ယသ့ၣ်ညါလီၤ.+
၁၃ ပှၤတီပှၤလိၤ ကစံးထီၣ်ပတြၢၤနမံၤ သပှၢ်တၢၢ်လီၤ.
ပှၤလၢအသူၣ်ဘျၢသးဘျၢန့ၣ် ကအိၣ်လၢ နမဲာ်ညါလီၤ.+