ယၡါယၤ

၃၆ ဖဲစီၤပၤဃံးစကံယၤ ပၢတၢ် ၁၄ နံၣ်တနံၣ်န့ၣ် ကီၢ်အၤၡူၢ် အစီၤပၤစၤနဃ့ရံာ်+ ဟဲထီၣ်ဒုးဝဲ ယူဒၤဘီမုၢ် အဝ့ၢ်လၢအအိၣ်ဒီး အဒူၣ်လၢအကျၢၤ ကိးဖျၢၣ်ဒဲး ဒီးမၤန့ၢ်ဝဲ ဝ့ၢ်တဖၣ်န့ၣ်လီၤ.+ ၂ ပှၤစိာ်စပံးထံ အခိၣ်တဂၤ*+ လၢအအိၣ်လၢ ဝ့ၢ်လၤကံၣ်+ ဃုာ်ဒီး သုးမုၢ်ဖးဒိၣ်တဖုန့ၣ် ကီၢ်အၤၡူၢ် အစီၤပၤ မၢလီၤအီၤ ဆူစီၤပၤဃံးစကံယၤ အအိၣ်လၢ ဝ့ၢ်ယရူၤၡလ့ၣ်လီၤ. အဃိ အဝဲသ့ၣ် ဆီလီၤအသးလၢ ထံကမါလၢ ထးခီအထံကျိၤ ကပၤလီၤ.+ တၢ်လီၢ်အဝဲန့ၣ် အိၣ်ဘူးဒီး ကျဲမုၢ်လၢအလဲၤဆူ ပှၤဆှုၣ်တၢ်ကံးညာ် အပျီလီၤ.+ ၃ ဒီးစီၤဃံးလကံယၤ အဖိခွါ စီၤအ့ၤလယါကံၣ်လၢ+ အတီခိၣ်ရိၤမဲတၢ်လၢ နီပူၤ, နဲၣ်ရွဲၣ် စီၤၡ့ၤဘနၤ+ ဒီးစီၤအၤစာ် အဖိခွါ စီၤယိၤအၤ လၢအကဲ ပှၤကွဲးနီၣ်တၢ်ဖိန့ၣ် လဲၤထံၣ်လိာ်သးဒီး ပှၤစိာ်စပံးထံ အခိၣ်တဂၤလီၤ.

၄ ဒီးပှၤစိာ်စပံးထံ အခိၣ်တဂၤ တဲဘၣ်အဝဲသ့ၣ်လၢ “ဝံသးစူၤ တဲဘၣ် စီၤဃံးစကံယၤ ဒ်အံၤ, ‘စီၤပၤဖးဒိၣ် လၢအမ့ၢ် ကီၢ်အၤၡူၢ် အစီၤပၤ အဲၣ်ဒိးတဲနၤလၢ “ဘၣ်မနုၤအဃိ နနာ်န့ၢ်လီၤနသးလဲၣ်.+ ၅ နတဲလၢ နအိၣ်ဒီးတၢ်ကူၣ် ဒီးတၢ်စိတၢ်ကမီၤလၢ နကဒုးတၢ်အဂီၢ် ဘၣ်ဆၣ် နတၢ်ကတိၤတဖၣ်အံၤ မ့ၢ်တၢ်ကလီကလီလီၤ. နထီဒါက့ၤယၤဘူၣ်န့ၣ် မ့ၢ်နနာ်န့ၢ် မတဂၤလဲၣ်.+ ၆ နဟးသန့ၤနသးလၢ ကီၢ်အဲၤကူပတူး လၢအလီၤဂာ်ဒ်သိးဒီး တပိၢ်လၢအကၢ်တဘိ လၢအဆဲးနုာ်ဖျိ ပှၤလၢအသန့ၤအသးလၢအီၤန့ၣ် အစုပူၤလီၤ. ပှၤလၢ အသန့ၤအသးလၢ ကီၢ်အဲၤကူပတူး အစီၤပၤဖၤရိၤ အအိၣ်န့ၣ် ကဲထီၣ်အသးဒ်န့ၣ် ကိးဂၤဒဲးလီၤ.+ ၇ ဒီးသုမ့ၢ်ကတဲယၤလၢ သုသန့ၤသုသးလၢ သုကစၢ် ယဟိဝၤယွၤ သနာ်က့ စီၤဃံးစကံယၤ မၤလီၤမၢ်ကွံာ် အတၢ်လီၢ်ထီၣ်ထီတဖၣ်,+ အတၢ်လုၢ်လီၢ်တဖၣ် ဒီးတဲတ့ၢ်ပှၤလၢ ယူဒၤဘီမုၢ် ဒီးဝ့ၢ်ယရူၤၡလ့ၣ် အပူၤလၢ ‘သုကဘၣ် ထိၣ်လီၤပှီၤသုသးလၢ တၢ်လုၢ်လီၢ်တဖျၢၣ်အံၤ အမဲာ်ညါ တမ့ၢ်ဧီၤ.’”’+ ၈ ဝံသးစူၤနီၤ, ခဲအံၤန့ၣ် ယကစၢ် အၤၡူၢ်အစီၤပၤ+ အဲၣ်ဒိးဃ့ဘူၣ်နၤ* တၢ်တမံၤ. နဃုထံၣ်န့ၢ် ပှၤဒိးကသ့ၣ် အဂၤ ၂,၀၀၀ မ့ၢ်ဘၣ်န့ၣ် ယကဟ့ၣ်နၤ ကသ့ၣ်အဒုပှဲၤန့ၣ်လီၤ. ၉ အဃိ နမ့ၢ်သန့ၤနသးလၢ ကီၢ်အဲၤကူပတူး လၢကဟ့ၣ်နၤ လ့ၣ်ကဟၣ်တဖၣ် ဒီးပှၤဒိးကသ့ၣ်တဖၣ် အဂီၢ်ဒၣ်လဲာ် နနီဟးထီၣ် ပဒိၣ်လၢ အပၣ်ဃုာ်လၢ ယကစၢ် အခ့အပှၤလၢ အဆံးကတၢၢ်တဖၣ် အကျါတဂၤ ကသ့ဒ်လဲၣ်. ၁၀ ယဟဲထီၣ် ဒ်သိး ယကဒုး ဒီးမၤဟးဂီၤ တၢ်လီၢ်တတီၤအံၤန့ၣ် မ့ၢ်သုဆိကမိၣ်လၢ ယဟိဝၤယွၤ တဟ့ၣ်ယၤအခွဲးဘၣ်န့ၣ်ဧါ. ယဟိဝၤယွၤ အနီၢ်ကစၢ်တဲယၤလၢ ‘လဲၤထီၣ် ဒုးတၢ်လီၢ်န့ၣ် ဒီးမၤဟးဂီၤကွံာ် အီၤတက့ၢ်.’”

၁၁ ဖဲန့ၣ်အခါ စီၤအ့ၤလယါကံၣ်, စီၤၡ့ၤဘနၤ+ ဒီးစီၤယိၤအၤ တဲဘၣ် ပှၤစိာ်စပံးထံ အခိၣ်တဂၤလၢ+ “ပကနၣ် အရၣ်မ့း အကျိာ်သ့အဃိ+ ဝံသးစူၤ တဲတၢ်ဒီးပှၤလၢ အရၣ်မ့း* အကျိာ်မီၤ. ပှၤလၢ အအိၣ်လၢ ဝ့ၢ်ခိၣ်ဒူအလိၤ ကနၢ်ဟူဝဲအဃိ တဘၣ်တဲတၢ်ဒီးပှၤ* လၢပှၤယူဒၤဖိအကျိာ်တဂ့ၤ.”+ ၁၂ ဘၣ်ဆၣ် ပှၤစိာ်စပံးထံ အခိၣ်တဂၤန့ၣ် တဲဆၢက့ၤဝဲလၢ “မ့ၢ်ယကစၢ် ဆှၢလီၤယၤ လၢယကတဲ တၢ်ကတိၤသ့ၣ်တဖၣ်အံၤ ထဲလၢသုဒီး သုကစၢ် အဂီၢ်လီၤဧါ. တမ့ၢ်စ့ၢ်ကီးလၢ ပှၤလၢအအိၣ်လၢ ဝ့ၢ်ခိၣ်ဒူအလိၤ လၢအကအီၣ်လီၤက့ၤ အနီၢ်ကစၢ် အအ့ၣ် ဒီးအီလီၤက့ၤ အနီၢ်ကစၢ် အဆံၣ်ထံတဖၣ် တပူၤဃီဒီးသု အဂီၢ်ဧီၤ.”

၁၃ ဒီးပှၤစိာ်စပံးထံ အခိၣ်တဂၤန့ၣ် တဲဝဲလၢ အကလုၢ်ဒိၣ်ဒိၣ် လၢပှၤယူဒၤဖိ အကျိာ်လၢ+ “စီၤပၤဖးဒိၣ် လၢအမ့ၢ် ကီၢ်အၤၡူၢ် အစီၤပၤ အဲၣ်ဒိးတဲသု ဒ်အံၤလီၤ.+ ၁၄ စီၤပၤတဲဝဲလၢ ‘တဘၣ်ပျဲလၢ စီၤဃံးစကံယၤ လံၣ်န့ၢ်လီန့ၢ်သုတဂ့ၤ. အဝဲမၤပူၤဖျဲးသု တန့ၢ်ဘၣ်.+ ၁၅ စီၤဃံးစကံယၤ ကတဲသုလၢ “ယဟိဝၤယွၤ ကမၤပူၤဖျဲးပှၤ သပှၢ်ကတၢၢ်လီၤ. အတဟ့ၣ်လီၤ ဝ့ၢ်တဖျၢၣ်အံၤလၢ ကီၢ်အၤၡူၢ် အစီၤပၤအစုပူၤဘၣ်.” ဘၣ်ဆၣ် တဘၣ်ပျဲ အကဆီၣ်ထွဲသုလၢ သုကနာ်န့ၢ် ယဟိဝၤယွၤ+ အဂီၢ်တဂ့ၤ. ၁၆ တဘၣ်ကနၣ် စီၤဃံးစကံယၤ အကလုၢ်တဂ့ၤ. ကီၢ်အၤၡူၢ် အစီၤပၤ တဲဝဲလၢ “မၤတၢ်ဃူတၢ်ဖိးဒီးယၤ ဒီးပာ်လီၤသုစုကဝဲၤ ဒီးသုဝဲကိးဂၤဒဲး ကအီၣ်ဘၣ်တၢ်လၢ သုနီၢ်ကစၢ်အစပံးမုၢ်, သုနီၢ်ကစၢ် ချၢၣ်ဒၢထူၣ် ဒီးအီဘၣ်ထံလၢ သုနီၢ်ကစၢ် ထံကမါပူၤ ၁၇ တုၤလၢ ယဟဲကိးသုလၢ ကီၢ်တဘ့ၣ်လၢ အလီၤဂာ်ဒီး သုထံကီၢ်လီၤ.+ ကီၢ်တဘ့ၣ်န့ၣ် ပှဲၤဝဲဒီးဘု, စပံးထံ, ကိၣ် ဒီးစပံးကျီးတဖၣ်လီၤ. ၁၈ တဘၣ်ပျဲလၢ စီၤဃံးစကံယၤ ဆှၢကမၣ်သု ဒီးတဲသုလၢ ယဟိဝၤယွၤ ကမၤပူၤဖျဲးသုန့ၣ်တဂ့ၤ. ပှၤကလုာ် အယွၤတဖၣ်လၢ အမၤပူၤဖျဲး အဝဲသ့ၣ်အကီၢ် လၢအၤၡူၢ် အစီၤပၤအစုပူၤန့ၣ် အိၣ်တဂၤဂၤဧါ.+ ၁၉ ဝ့ၢ်ဃမါသး ဒီးဝ့ၢ်အၢ်ပး အယွၤတဖၣ် အိၣ်ဖဲလဲၣ်.+ ဝ့ၢ်စဖၤရဝံၣ် အယွၤတဖၣ် အိၣ်ဖဲလဲၣ်.+ မ့ၢ်အဝဲသ့ၣ် မၤပူၤဖျဲး ဝ့ၢ်ၡၤမရံလၢ ကီၢ်အၤၡူၢ် အစီၤပၤ အစုပူၤဧါ.+ ၂၀ ကီၢ်တဖၣ်အံၤ အကစၢ်လၢ အမၤပူၤဖျဲး အထံကီၢ်လၢ ယစုပူၤန့ၣ် အိၣ်ဝဲတဂၤဂၤဧါ. မ့မ့ၢ်ဒ်န့ၣ်န့ၣ် ယဟိဝၤယွၤ မၤပူၤဖျဲး ဝ့ၢ်ယရူၤၡလ့ၣ် လၢယစုပူၤ ကသ့ဒ်လဲၣ်.”’”+

၂၁ ဘၣ်ဆၣ် မ့ၢ်လၢ စီၤပၤဃံးစကံယၤ မၤလိာ်ပာ်စၢၤဝဲလၢ “သုတဘၣ် စံးဆၢက့ၤအီၤတဂ့ၤ”+ အဃိ အဝဲသ့ၣ် အိၣ်ဘှ့ၣ်ဝဲ ဒီးတတဲဆၢ တၢ်နီတမံၤဘၣ်. ၂၂ စီၤဃံးလကံယၤ အဖိခွါ စီၤအ့ၤလယါကံၣ်လၢ အတီခိၣ်ရိၤမဲတၢ်လၢနီပူၤ, နဲၣ်ရွဲၣ် စီၤၡ့ၤဘနၤ+ ဒီးစီၤအၤစာ် အဖိခွါ စီၤယိၤအၤ လၢအကဲ ပှၤကွဲးနီၣ်တၢ်ဖိန့ၣ် ဖှီညာ်လီၤ အဝဲသ့ၣ်အဆ့ကၤ ဒီးက့ၤလၢ စီၤဃံးစကံယၤ အအိၣ် ဒီးတဲဘၣ်အီၤလၢ ပှၤစိာ်စပံးထံ အခိၣ်တဂၤန့ၣ် အတၢ်ကတိၤတဖၣ်လီၤ.