ယၡါယၤ

၂၀ ဖဲကီၢ်အၤၡူၢ် အစီၤပၤစၤရကိၣ် ဆှၢလီၤ သုးခိၣ်ကျၢၢ်တဂၤဆူ* ဝ့ၢ်အၤစဒိာ်+ အနံၣ်န့ၣ် သုးခိၣ်ကျၢၢ်တဂၤန့ၣ် ဒုးဝဲ ဝ့ၢ်အၤစဒိာ် ဒီးမၤန့ၢ်ဝဲ ဝ့ၢ်န့ၣ်လီၤ.+ ၂ ဖဲန့ၣ်အဆၢကတီၢ် ယဟိဝၤယွၤ တဲဘၣ် စီၤအၤမိး အဖိခွါ စီၤယၡါယၤလၢ+ “ဘ့ၣ်လီၤကွံာ် ထၢၣ်တၢ်ကံးညာ်လၢ နယီၢ်ဒ့လိၤ ဒီးဘ့ၣ်လီၤနခီၣ်ဖံးတက့ၢ်.” ဒီးစီၤယၡါယၤ မၤဝဲဒ်န့ၣ် ဒီးအဝဲဟးလၢ ဘ့ၣ်ဆ့ ဒီးအခီၣ်ဖံးတပၣ်ဘၣ်.

၃ ဒီးယဟိဝၤယွၤ တဲဝဲလၢ “ယခ့ယပှၤ စီၤယၡါယၤ ဟးဘ့ၣ်ဆ့ ဒီးဟးခီၣ်ဖံးတပၣ်ဘၣ်န့ၣ် အိၣ်သၢနံၣ်လံ. အဝဲန့ၣ် မ့ၢ်တၢ်ပနီၣ်+ ဒီးတၢ်ဟ့ၣ်ပလီၢ်လၢ အဘၣ်ဃးဒီး တၢ်ကမၤအသး ဒီးကီၢ်အဲၤကူပတူး+ ဒီးကီၢ်အဲၤသံအီးပးလီၤ.+ ၄ ဒ်န့ၣ်အသိး ကီၢ်အၤၡူၢ် အစီၤပၤ ကက့ၤဖီၣ်ဝဲ ပှၤလၢ ကီၢ်အဲၤကူပတူး+ ဒီးကီၢ်အဲၤသံအီးပးအပူၤန့ၣ်လီၤ. ဒီးပိာ်ခွါ သးပှၢ်မ့ၢ်ဂ့ၤ, ပိာ်ခွါ သးစၢ်မ့ၢ်ဂ့ၤ, ကဟးဘ့ၣ်ဆ့ ဒီးကဟးခီၣ်ဖံးတပၣ်ဘၣ် ဒီးအဝဲသ့ၣ် အခံကိၢ် ကဖျါထီၣ်ဝဲအဃိ ကကဲထီၣ် တၢ်မဲာ်ဆှးလၢ* ပှၤအဲၤကူပတူးဖိ အဂီၢ်လီၤ. ၅ ပှၤလၢ အမုၢ်လၢ်တၢ်လၢ ကီၢ်အဲၤသံအီးပး ဒီးပာ်ကဖၢလၢအသးလၢ ကီၢ်အဲၤကူပတူး အဃိန့ၣ် အဝဲသ့ၣ် ကပျံၤတၢ် ဒီးကမဲာ်ဆှးလီၤ. ၆ ဖဲန့ၣ်အဆၢကတီၢ် ပှၤလၢ အအိၣ်လၢ ပီၣ်လဲၣ်နံၤ အဟီၣ်ကဝီၤန့ၣ် ကတဲဝဲလၢ ‘လၢညါန့ၣ် ဒ်သိးပကပူၤဖျဲးလၢ ကီၢ်အၤၡူၢ် အစီၤပၤအဂီၢ် ပဃ့ၢ်လၢ ပှၤတဖၣ်န့ၣ်အအိၣ် ဒီးပမုၢ်လၢ်တၢ်လၢ အဝဲသ့ၣ်အအိၣ် ဘၣ်ဆၣ် တၢ်မၤအသး ဒီးအဝဲသ့ၣ် ဒ်လဲၣ်န့ၣ် ကွၢ်သၢၤ. ခဲအံၤန့ၣ် ပပူၤဖျဲးကသ့ဒ်လဲၣ်.’”