ယံးရမံယၤ

၂၄ ဖဲဘၤဘူၤလိၣ် အစီၤပၤနဘူၤကးန့စၢ် က့ၤဖီၣ်ဝဲ စီၤယဟိၤယါကံၣ်+ အဖိခွါ လၢအမ့ၢ် ယူဒၤ အစီၤပၤယံးကၤနံယၤ*+ လၢဝ့ၢ်ယရူၤၡလ့ၣ် ဆူကီၢ်ဘၤဘူၤလိၣ် ဃုာ်ဒီးယူဒၤအပဒိၣ်ဖးဒိၣ်တဖၣ်, ပှၤစုသ့ဖိတဖၣ် ဒီးပှၤပိာ်ထးဖိတဖၣ် ဝံၤအလီၢ်ခံ ယဟိဝၤယွၤ ဒုးနဲၣ်ယၤချၢၣ်ဒၢသၣ်ခံနာ် လၢအအိၣ်လၢ ယဟိဝၤယွၤ အတၢ်လုၢ်ဟံၣ် အမဲာ်ညါလီၤ.+ ၂ ချၢၣ်ဒၢသၣ်တနာ်န့ၣ် မ့ၢ်ဝဲချၢၣ်ဒၢသၣ်လၢအဂ့ၤဒိၣ်မး လၢအလီၤဂာ်ဒ်သိးဒီး ချၢၣ်ဒၢသၣ်လၢ အသၣ်ထီၣ်ဆိလီၤ. မ့မ့ၢ်ချၢၣ်ဒၢသၣ်လၢ အဂၤတနာ်န့ၣ် မ့ၢ်ဝဲချၢၣ်ဒၢသၣ် လၢအတဂ့ၤနီတစဲးဘၣ် တုၤဒၣ်လဲာ် ပှၤအီၣ်ဝဲမးတသ့ဘၣ်.

၃ ယဟိဝၤယွၤ သံကွၢ်ယၤလၢ “စီၤယံးရမံယၤဧၢ, နထံၣ်မနုၤလဲၣ်.” ဒီးယတဲလၢ “ယထံၣ် ချၢၣ်ဒၢသၣ်တဖၣ်. ဒီးချၢၣ်ဒၢသၣ်လၢ အဂ့ၤတဖၣ်န့ၣ် ဂ့ၤဒိၣ်မး ဒီးလၢအတဂ့ၤဘၣ်တဖၣ်န့ၣ် တဂ့ၤနီတစဲးဘၣ် တုၤဒၣ်လဲာ် ပှၤအီၣ်ဝဲမးတသ့ဘၣ်.”+

၄ ဝံၤဒီး ယဟိဝၤယွၤ တဲယၤလၢ ၅ “ယၤ, အံၣ်စရ့လး အကစၢ် ယဟိဝၤယွၤ တဲဝဲလၢ ‘ယူဒၤအပှၤဂီၢ်မုၢ်လၢ ယဆှၢကွံာ်အီၤ လၢအယံၤဒီးတၢ်လီၢ်ဖဲအံၤ ဆူပှၤက့ၤစ့းဖိ အကီၢ်ပူၤန့ၣ် ယကပာ်အဝဲသ့ၣ် ဒ်သိးဒီး ချၢၣ်ဒၢသၣ်လၢ အဂ့ၤတဖၣ်အံၤ ဒီးယကဘၣ်သူၣ်ဘၣ်သး အဝဲသ့ၣ်လီၤ. ၆ ယကကွၢ်ထွဲ အဝဲသ့ၣ်လၢ အဝဲသ့ၣ်အဘျုးအဂီၢ် ဒီးယကဒုးဟဲက့ၤ အဝဲသ့ၣ်လၢ ကီၢ်တဘ့ၣ်အံၤလီၤ.+ ယကဒုးဘီၣ်ထီၣ်ညီထီၣ် အဝဲသ့ၣ် ဒီးယတမၤလီၤပှီၢ် အဝဲသ့ၣ်ဘၣ်. ယကသူၣ်လီၤ အဝဲသ့ၣ် ဒီးယတထဲးထီၣ်ကွံာ် အဝဲသ့ၣ်ဘၣ်.+ ၇ ယကဟ့ၣ်အဝဲသ့ၣ် အသးလၢ အအဲၣ်ဒိးသ့ၣ်ညါယၤလၢ ယမ့ၢ် ယဟိဝၤယွၤလီၤ.+ မ့ၢ်လၢအဝဲသ့ၣ် ကဟဲက့ၤလၢယအိၣ် လၢအသးဒီဖျၢၣ်အဃိ+ အဝဲသ့ၣ် ကကဲထီၣ် ယပှၤဂီၢ်မုၢ် ဒီးယကကဲထီၣ် အဝဲသ့ၣ် အကစၢ်ယွၤလီၤ.+

၈ “‘မ့မ့ၢ်ဘၣ်ဃးဒီး ချၢၣ်ဒၢသၣ်လၢ အတဂ့ၤနီတစဲးဘၣ် တုၤလၢ ပှၤအီၣ်အီၤတသ့ဘၣ်တဖၣ်န့ၣ်+ ယၤ, ယဟိဝၤယွၤ တဲဝဲလၢ “ယူဒၤ အစီၤပၤစံးဒကံယၤ,+ အပဒိၣ်ဖးဒိၣ်တဖၣ် ဒီးဝ့ၢ်ယရူၤၡလ့ၣ် အပှၤဂီၢ်မုၢ်လၢ အအိၣ်တ့ၢ်ဒံးလၢ ကီၢ်အံၤအပူၤမ့ၢ်ဂ့ၤ, လၢအအိၣ်လၢ ကီၢ်အဲၤကူပတူးအပူၤမ့ၢ်ဂ့ၤ, ယကပာ် အဝဲသ့ၣ်ဒ်သိးဒီး ချၢၣ်ဒၢသၣ်တဖၣ်န့ၣ်လီၤ.+ ၉ ယကဒုးဘၣ်အဝဲသ့ၣ်လၢ တၢ်ကီတၢ်ခဲ တုၤဒၣ်လဲာ် ပှၤကလုာ်ခဲလၢာ်လၢ+ အထံၣ်ဘၣ်ဝဲန့ၣ် ကပျံၤတၢ်ဖုးတၢ်လီၤ. ပှၤကတဲဆါ အဝဲသ့ၣ်, ပှၤကသူအဝဲသ့ၣ် ဒ်တၢ်ကတိၤဒိအသိး, ပှၤကဒုၣ်ဒွဲၣ်အဝဲသ့ၣ် ဒီးကဆိၣ်အၢ+ အဝဲသ့ၣ်လၢ တၢ်လီၢ်လၢ ယမၤလီၤပြံလီၤပြါအဝဲသ့ၣ် ကိးတီၤဒဲးလီၤ.+ ၁၀ ယကစံၣ်ညီၣ် အဝဲသ့ၣ်လၢ နး,+ တၢ်သၣ်ဝံၤလီၤဒိ ဒီးတၢ်ဆါသံသတြိာ်+ တုၤလၢအဝဲသ့ၣ် ဟးဂီၤကွံာ်လၢ ကီၢ်လၢ ယဟ့ၣ်ပာ်စၢၤ အဝဲသ့ၣ် ဒီးအမိၢ်ပၢ်ဖံဖု လၢပျၢၤတဖၣ် အပူၤလီၤ.”’”